Mɛɖé lɛ nɔ kanbyɔ yeɖée ɖɔ Xó Mawu tɔn e è wlán é ɖyɔ wɛ à jí. Gbeyiɖɔ Ezayíi ɖɔ ɖɔ Xó Mawu tɔn “na nɔ ayǐ kaka sɔyi.” (Ezayíi 40:8) Nɛ̌ mǐ ka sixu ɖeji ɖɔ è sɛ̀ akpá Mawu tɔn lɛ xwè ganji gbɔn?

Mawu ɖó hlɔnhlɔn bo na sɛ̀ Xó tɔn xwè, bo lɛ́ cyɔn alɔ jí bonu è ni ma huzu ó. Ðò hwexónu ɔ, mɛ e nɔ xwè sɔ́ bo nɔ vɔ́ nǔwlanwlán mímɛ́ lɛ wlán ɖó alɔ wu lɛ é nɔ xà wekwín lɛ ɖokpo ɖokpo, bo nɔ kúdeji ɖɔ è kún gɔ́ ɖě na, huzu alǒ jó ɖě dó ó. É ɖò mɔ̌ có, ɖó gbɛtɔ́ lɛ nyí hwɛhutɔ́ wu ɔ, mɛ e nɔ vɔ́ wema lɛ wlán lɛ é ɖé lɛ wà nǔ klewun klewun ɖé lɛ gbɔ; nǔwanyido enɛ lɛ ka wà nǔ ɖě dó xó e ɖò nǔwlanwlán dodó ɔ mɛ lɛ é wu ǎ.

Alɔnuwema hwexónu tɔn Nǔwlanwlán Mímɛ́ lɛ tɔn afatɔ́n mɔ̌kpan wɛ tíìn. Enyi vogbingbɔn klewun ɖé tlɛ ɖò wema e è vɔ́ wlán é ɖé mɛ ɔ, è sixu sɔ́ jlɛ́ dó alɔnuwema ɖevo lɛ wu, bo na mɔ nǔgbo ɔ.—Bo na dó mɔ tinmɛ ɖevo lɛ hǔn, kpɔ́n xóta “La Bible a-​t-​elle été modifiée ou falsifiée?” ɖò jw.org jí.

Ði kpɔ́ndéwú ɔ, kpɔ́n wema hwexónu tɔn ɖěɖee è nɔ ylɔ́ ɖɔ wema Mlámlá Xù Kúkú ɔ tɔn lɛ, bɔ è mɔ ɖò só xomɛ sɛkpɔ́ Xù Kúkú ɔ ɖò 1947 é. Nǔwlanwlán Mímɛ́ lɛ sín akpáxwé ɖé lɛ wɛ ɖò wema hwexónu tɔn enɛ lɛ mɛ, bo ko tíìn sín xwè 2 000 jɛji ɖíe. Akɔwé lɛ sɔ́ wema enɛ lɛ jlɛ́ dó Nǔwlanwlán Mímɛ́ ee mǐ ɖó égbé lɛ é wu. Etɛ ye ka mɔ?

Akɔwé lɛ mɔ ɖɔ nǔ e ɖò Xó Mawu tɔn e mǐ ɖó égbé lɛ é mɛ é nyí nǔ ɖokpo ɔ kpo nǔwlanwlán dodó lɛ kpo. * Alɔnuwema hwexónu tɔn lɛ gbígbéjé kpɔ́n kpo sɔxwixwe kpo dó zǒgbe jí ɖɔ nǔ e mǐ nɔ xà ɖò Nǔwlanwlán Mímɛ́ lɛ mɛ é nyí Mawuxó dodó ɔ. Mǐ sixu kúdeji ɖɔ Mawu sɛ̀ nǔgbo e ɖò Nǔwlanwlán Mímɛ́ tɔn lɛ mɛ lɛ é xwè ganji nú mǐ égbé.

Mɔ̌ mɛ ɔ, mǐ sixu xà Xó Mawu tɔn bo ganjɛwu bǐ mlɛ́mlɛ́ ɖɔ é sɔgbe. Mǐ ni hɛn enɛ d’ayi mɛ bo gbéjé nǔ e mǐ sixu kplɔ́n dó Mawu wu gbɔn gbeyiɖɔ tɔn lɛ gblamɛ é kpɔ́n.