È ji mì ɖo 1955, bɔ ɖo vǐ súnnu atɔn mɛjitɔ́ ce lɛ́ tɔn lɛ́ mɛ ɔ, nyi wɛ nyí kpodé ɔ. Un su ɖo malínmálín dó fí e sɛkpɔ́ xu hú gǎn ɖo tofɔligbé Finlande tɔn é; égbé ɔ, è nɔ ylɔ́ fí énɛ́ ɖɔ toxo Vantaa tɔn.

Nɔ ce bló batɛ́mu bo húzú Kúnnuɖetɔ́ Jexóva tɔn, cóbó wá ji mì ɖo xwe yɔywɛ ɖé gúdo. Amɔ̌, tɔ́ ce klán gbe xá nǔgbó ɔ, bo nɔ lɔn nú nɔ ce ní kplɔ́n nǔ xá mǐ mɛ vǐ lɛ́, alǒ kplá mǐ yi kplé agun tɔn lɛ́ domɛ ǎ. Énɛ́ wú ɔ, é nɔ kplɔ́n nǔgbó nukɔn nukɔntɔn Biblu tɔn lɛ́ mǐ, hwenu e tɔ́ ce ma ɖo fínɛ́ ǎ é.

Sín vǔhwenu ce wɛ un wá gbeta ɔ kɔn ɖɔ un ná nɔ se tónú nú Jexóva. Ði kpɔ́ndéwú ɔ, hwenu e un ɖo xwe tɛ́nwe ɖó wɛ é ɔ, mɛ̌si ce sin xomɛ dó mì tawun gbe ɖokpó, ɖó un gbɛ́ ɖɔ un kún ná ɖu verilättyjä (hungó Finlande tɔn) ó wútu. É sɔ́ alɔ tɔn ɖokpó bo fyɔ́n klɛ̌n ce lɛ́, bo ná dó hun nu ce, lobo sɔ́ alɔ tɔn wegɔ́ ɔ, bo tɛ́n kpɔ́n, bo ná zín gǎfu e nu hungó kpɛɖé ɖe é dó nu ce mɛ. Un dó gǎn bo flɛ́ gǎfu ɔ sín alɔ tɔn mɛ.

Hwenu e un ɖo xwe 12 ɖó wɛ é ɔ, tɔ́ ce kú. Énɛ́ gúdo ɔ, un kpé wú bo jɛ kplé agun tɔn lɛ́ yi jí. Nɔví súnnu e ɖo agun ɔ mɛ lɛ́ é nyɔ́ xomɛ dó wǔ ye, bɔ énɛ́ sísɛ́ mì bɔ un yi nukɔn ɖo gbigbɔ lixo. Un jɛ Biblu xa jí gbe bǐ gbe, bo nɔ lɛ́ kplɔ́n wěma mǐtɔn lɛ́ kpó sɔxwixwe kpó. Nǔkplɔ́nkplɔ́n sín walɔ ɖagbe énɛ́ lɛ́ e un ɖó é wɛ d’alɔ mì bɔ un  bló batɛ́mu ɖo 8 août 1969, hwenu e un ɖo xwe 14 ɖó wɛ é.

Ée un fó wěmaxɔmɛ gúdo zaan é ɔ, un bɛ́ gběxosín-alijítɔ́ hwebǐnu tɔn sín azɔ̌. Aklúnɔzángbla yɔywɛ ɖé gúdo ɔ, un sɛ tɛn bo ná yi d’alɔ ɖo fí e hudó sukpɔ́ ɖe é ɖo Pielavesi, éé ɖo malínmálín dó tɛ́ntin Finlande tɔn é.

Pielavesi wɛ un xo go Sirkka e ná wá húzú asivɛ́ ce é ɖe. Mɛɖéesɔ́hwetɔ́ e é nyí é kpó wǎn ɖaxó e é yí nú Jexóva é kpó dɔn mì. É nɔ nya mɛ nukúnɖéjí nyínyí alǒ dɔkun gbé ǎ. Mǐ mɛ we lɛ́ bǐ wɛ ba vɛ́návɛ́ná bo ná sɛn Jexóva bǐ mlɛ́mlɛ́ lěe é nyɔ́ bló gbɔn é, ényí è na bo sɔ́ wǔjɔmɛzɔ́ ɖěbǔ d’así nú mǐ ɔ nɛ́. Mǐ wlí alɔ ɖo 23 mars 1974. Mǐ yí gbɔjɛ e è nɔ yí ɖo alɔwlíwlí mɛtɔn gúdo é ǎ, é nyɔ́ wa ɔ, mǐ sɛ tɛn bo yi wa sinsɛnzɔ́ ɖo Karttula, fí e hudó wɛnɖagbejlátɔ́ Axɔ́súɖuto ɔ tɔn lɛ́ tɔn sukpɔ́ ɖe hú gǎn é ɖé.

Do bǐbɛ́mɛ alɔwlíwlí mǐtɔn tɔn ɔ, Jexóva ɖe xlɛ́ mǐ ɖɔ ényí Axɔ́súɖuto émítɔn myá nukún nú mǐ jɛ nukɔn ɔ, émí ná kpé nukún dó hudó mǐtɔn lɛ́ wú ɖo agbaza lixo. (Mat. 6:33) Ði kpɔ́ndéwú ɔ, mǐ ɖó mɔ̌to ɖo Karttula ǎ. Ðo bǐbɛ́mɛ ɔ, kɛkɛ́ afɔdókwín wɛ mǐ nɔ zán dó yi tomɛ. Amɔ̌, ɖo avivɔhwenu ɔ, jɔhɔn nɔ gbɛ́ zɛ xwé wú ɖo fínɛ́. Ðó fí e agun ɔ nɔ ɖe kúnnu gbɔn é d’agba wútu ɔ, mǐ ɖó hudó mɔ̌to tɔn bo ná dó jlá wɛn ɔ. Mǐ ka ɖó akwɛ́ e ná xɔ é ǎ.

Mǐ ɖó nukún tɔn ɖěbǔ ǎ, bɔ fofó ce wá ba mǐ kpɔ́n. É nyɔ́ xomɛ dó mǐ wú bo ná mǐ mɔ̌to tɔn. É ko yí gǎnjɛwúwéma nú mɔ̌to ɔ. Sánsin jijɛ kɛ́ɖɛ́ jɛ́n nyí nǔ e kpo nú mǐ é. Mǐ ɖó mɔ̌to e sín hudó mǐ ɖó é lo.

Jexóva ɖe xlɛ́ mǐ ɖɔ émí ɖo gbesisɔmɛ bo ná kpé nukún dó hudó agbaza tɔn mǐtɔn lɛ́ wú. Nǔ e mǐdɛɛ lɛ́ ɖó ná wa kpowun é wɛ nyí ɖɔ Axɔ́súɖuto ɔ sín nǔ lɛ́ ní myá nukún nú mǐ jɛ nukɔn.

Hwenu e mǐ yi Wěmaxɔmɛ sinsɛnzɔ́ gběxosín-alijítɔ́ tɔn ɖo 1978 é ɔ, Raimo Kuokkanen, a éé nyí ɖokpó ɖo nǔkplɔ́nmɛtɔ́ mǐtɔn lɛ́ mɛ é dó wǔsyɛ́n lanmɛ nú mǐ ɖɔ mǐ ní d’alɔ wěma mɛ bá yi wěmaxɔmɛ Galádi tɔn. Énɛ́ wú ɔ, mǐ jɛ Glɛ̌nsigbe kplɔ́n jí bo ná mɔ tɛn dó jɛxá bá yi. Amɔ̌, ɖo 1980 ɔ, mǐ ko d’alɔ wěma ɔ mɛ cóbɔ è ylɔ́ mǐ bónú mǐ ná yi wa sinsɛnzɔ́ ɖo alaxɔ mɛ ɖo Finlande ǎ. Hwe énɛ́ nu ɔ, mɛ e nɔ w’azɔ̌ ɖo Betɛ́li lɛ́ é sixú d’alɔ  wěma mɛ bá yi Galádi ǎ. Jlǒ mǐtɔn wɛ ka nyí ɖɔ mǐ ní wa sinsɛnzɔ́ ɖo fí ɖěbǔ e Jexóva lin ɖɔ é nyɔ́ nú mǐ hú gǎn é, é nyí fí e mǐdɛɛ lɛ́ lin ɖɔ é nyɔ́ nú mǐ hú gǎn é ǎ. Énɛ́ wú ɔ, mǐ yí gbe nú ylɔ̌ e è ylɔ́ mǐ é. É ɖo mɔ̌ có, mǐ gbɛ kan dó Glɛ̌nsigbe ɔ kplɔ́nkplɔ́n nu, ɖó è nɔ nywɛ́ ǎ, ali ɔ sixú wá hun nú mǐ, bɔ mǐ ná d’alɔ wěma mɛ bá yi Galádi wútu.

Ðo xwe yɔywɛ ɖé lɛ́ gúdo ɔ, Hǎgbɛ́ alixlɛ́mɛtɔ́ ɔ hun ali ɔ nú mɛ e nɔ w’azɔ̌ ɖo Betɛ́li lɛ́ é lɔmɔ̌ bónú yě ná nɔ d’alɔ wěma mɛ bá yi Galádi. Tlóló jɛ́n mǐ d’alɔ wěma mɛ, é ka nyí ɖɔ Betɛ́li e mǐ ɖe é víví nú mǐ ǎ wútu wɛ ǎ. Cɛ́nnyícɛ́nnyí ɖé lɔ ǎ! Mǐ jló kpowun bo ná sɔ́ mǐɖée jó bá wa sinsɛnzɔ́ ɖo fí e hudó sukpɔ́ ɖe hú gǎn é ɖé wɛ, ényí mǐ jɛxá ɔ nɛ́. È yí gbe nú mǐ bónú mǐ ná yi Galádi, bɔ mǐ yí kúnnuɖewéma klási 79​gɔ́ ɔ tɔn ɖo septembre 1985. Colombie wɛ è sɛ́ mǐ dó.

Ðo Colombie ɔ, alaxɔ mɛ wɛ è sɛ́ mǐ dó jɛ nukɔn hwɛ̌. Un tɛ́n kpɔ́n bo wa nǔ e wú un kpé é bǐ ɖo azɔ̌ e è sɔ́ d’así nú mì é kɔn, amɔ̌, ée mǐ bló xwe ɖokpó ɖo alaxɔ mɛ gúdo é ɔ, un mɔ ɖɔ mǐ ɖó hudó hǔzúhúzú ɖé tɔn. Azɔn nukɔntɔn ɔ kpó gǔdo tɔn ɔ kpó nɛ́ ɖo gbɛzán ce mɛ bɔ un byɔ́ ɖɔ è ní sɔ́ azɔ̌ ɖěvo d’así nú mì. Énɛ́ gúdo ɔ, è byɔ́ mǐ ɖɔ mǐ ní yi wa mɛsɛ́dózɔ́ ɖo gle ɔ mɛ ɖo toxo Neiva tɔn mɛ, ɖo tokpɔn Huila tɔn mɛ.

Sinsɛnzɔ́wiwa ɖo gle ɔ mɛ nɔ víví nú mì hwebǐnu. Hwenu e un nyí gběxosín-alijítɔ́ tlɛnnɔ ɖé ɖo Finlande é ɔ, hweɖélɛ́nu ɔ, un nɔ jlá wɛn ɔ sín zǎnzǎn tɛɛn káká jɛ gbadanu bǐ. Hwenu e nyi kpó Sirkka kpó wlí alɔ tlóló é ɔ, nyi kpó é kpó lɔmɔ̌ nɔ zán hwenu gěgé dó jlá wɛn ɔ ɖo azǎn lɛ́ jí. Ényí mǐ ɖo wɛn ɔ jlá wɛ ɖo fí e jɛ zɔ tawun lɛ́ é ɔ, mǐ nɔ dɔ́ mɔ̌to mǐtɔn mɛ hweɖélɛ́nu. Énɛ́ nɔ ɖe ali zinzɔn sín hwenu kpo, bo nɔ zɔ́n bɔ mǐ nɔ yá wǔ bɛ́ azɔ̌ ayǐhɔ́ngbe tɔn.

Ðó mǐ nyí mɛsɛ́dó ɖo gle ɔ mɛ wútu ɔ, akpakpa e nɔ sɔ́ mǐ ɖ’ayǐ ɖo sinsɛnzɔ́ ɔ mɛ é lɛ́ jɛ mǐ sɔ́ jí. Wɛnjlátɔ́ lɛ́ jɛjí ɖo agun mǐtɔn mɛ, bɔ nɔví súnnu kpó nɔví nyɔ̌nu kpó Colombie tɔn lɛ́ nɔ sí mɛ, yí wǎn nú mɛ, bɔ nǔ nɔ lɛ́ su nukún yětɔn mɛ.

Toxo ɖé lɛ́ ɖo malínmálín dó Neiva fí e è ɖe azɔ̌ nú mǐ dó é, bɔ Kúnnuɖetɔ́ ɖě ɖo toxo énɛ́ lɛ́ mɛ ǎ. Un nɔ ɖó linkpɔ́n tawun dó lěe è ná wá jlá wɛn ɖagbe ɔ ɖo fí énɛ́ lɛ́ gbɔn é wú. É ɖo mɔ có, ɖó ahwan e fun wɛ sɔ́ja gǔfɔ́ntɔ́ lɛ́ ɖe é wútu ɔ, mɛ e ma nyí xá ɔ mɛ nu ǎ lɛ́ é sixú nɔ ayijayǐ mɛ ɖo fí énɛ́ lɛ́ ǎ. Énɛ́ wú ɔ, un nɔ xo ɖɛ ɖɔ mɛɖé ní gosín toxo énɛ́ lɛ́ ɖokpó mɛ, bo wá húzú Kúnnuɖetɔ́. Un nɔ lin ɖɔ bo ná kplɔ́n nǔgbó ɔ ɔ, Neiva jɛ́n mɛ mɔ̌hun ɖé ɖó ná nɔ nɔ. Énɛ́ wú ɔ, un nɔ lɛ́ xo ɖɛ ɖɔ ɖo batɛ́mu tɔn gúdo ɔ, é ní su ɖo gbigbɔ lixo bo lɛ́ kɔ yi to tɔn mɛ bo ná mɔ tɛn dó jlá wɛn ɔ. Un ɖó ná ko tuun ɖɔ lěe Jexóva lin ná ɖe ɖɛ ninɔmɛ ɔ gbɔn é nyɔ́ tawun hú lěe nyɛ lin gbɔn é.

Hwenu kpɛɖé gúdo ɔ, un bɛ́ Biblu kplɔ́nkplɔ́n xá dɔ̌nkpɛvú ɖé, bɔ é nɔ nyí Fernando González. Algeciras, éé nyí ɖokpó ɖo toxo e mɛ Kúnnuɖetɔ́ ɖě ma ɖe ǎ lɛ́ é mɛ wɛ é nɔ nɔ. Fernando nɔ zɔn ali nú kilomɛ́tlu 50 jɛjí ɖo aklúnɔzángbla lɛ́ bǐ, bo nɔ wá w’azɔ̌ ɖo Neiva. É nɔ sɔ́ nǔ ganjí nú nǔkplɔ́nkplɔ́n ɖokpó ɖokpó, bɔ tlóló jɛ́n é lɛ́ jɛ kplé lɛ́ bǐ wá jí. Bɛ́sín aklúnɔzángbla nukɔntɔn e mɛ  Fernando jɛ nǔ kplɔ́n jí é mɛ ɔ, é nɔ xo mɛ ɖěvo e ɖo toxo tɔn mɛ lɛ́ é kplé bo nɔ kplɔ́n nǔ e é kplɔ́n ɖo Biblu kplɔ́nkplɔ́n tɔn hwenu lɛ́ é yě.

Fernando bɛ́ Biblu kplɔ́nkplɔ́n b’ɛ bló sun ayizɛ́n é ɔ, é bló batɛ́mu ɖo janvier 1990. Énɛ́ gúdo ɔ, é húzú gběxosín-alijítɔ́ hwebǐnu tɔn. Ðó Kúnnuɖetɔ́ xá ɔ mɛ tɔn ɖokpó ɖo Algeciras wútu ɔ, alaxɔ ɔ mɔ ɖɔ ayi jɛ ayǐ din hú gǎn bɔ è ná sɛ́ gběxosín-alijítɔ́ titewungbe lɛ́ dó ayǐ ɔ jí. Ðo février 1992 ɔ, è ɖó agun ɖé ayǐ ɖo toxo énɛ́ mɛ.

Mɛ e ɖo toxo Fernando tɔn mɛ lɛ́ é kɛ́ɖɛ́ jɛ́n é nɔ ɖɔ mawuxó ná a? Éǒ! Ée é wlí alɔ gúdo é ɔ, é kpó asi tɔn kpó sɛ tɛn yi San Vicente del Caguán, toxo e mɛ Kúnnuɖetɔ́ ɖě ma ɖe ǎ é ɖěvo mɛ. Ðo fínɛ́ ɔ, yě d’alɔ bɔ è ɖó agun ɖé ayǐ. Ðo 2002 ɔ, è sɔ́ Fernando nukúnkpénǔwútɔ́ lɛ̌dó tɔn, bɔ é kpó asi tɔn Olga kpó ɖo tomɛyiyizɔ́ ɔ wa wɛ káká jɛ égbé.

Kpó nǔ énɛ́ e jɛ é kpó ɔ, un kplɔ́n lě do é ɖo tají ɖɔ è ní nɔ xo ɖɛ dó nǔ tawun tawun e kunkplá azɔ̌ Axɔ́súɖuto ɔ tɔn e è ɖe nú mǐ lɛ́ é tamɛ sɔ é. Jexóva wa nǔ e mǐ ma sixú wa ǎ é. Ðěbǔ wɛ é ná bo nyí gbɔn ɔ, jinukúngbo tɔn wɛ, é nyí mǐtɔn ǎ.—Mat. 9:38.

Ðo 1990 ɔ, è byɔ́ mǐ ɖɔ mǐ ní wa lɛ̌dó sín azɔ̌. Toxo Bogotá tɔn, éé nyí azinkan to ɔ tɔn é wɛ nyí lɛ̌dó mǐtɔn nukɔntɔn ɔ. Xɛsi ɖi mǐ ɖɔ mǐ kún ná w’azɔ̌ énɛ́ ganjí ó. Gbɛtɔ́ kpaa e ma ɖó nǔwúkpíkpé bǔnɔ ɖěbǔ ǎ lɛ́ é wɛ nyi kpó asi ce kpó nyí. Gɔ́ ná ɔ, gbɛ ninɔ ɖo toxo ɖaxó e mɛ alɔnu mɛ lɛ́ tɔn nɔ ján tawun ɖe é mɛ má mǐ ǎ. É ɖo mɔ có, Jexóva ɖe akpá élɔ́ e é dó ɖo Filípunu lɛ́ 2:13 mɛ é: “Mawu wɛ nyí mɛ e ɖo azɔ̌ wa ɖo mi mɛ wɛ é, bo nɔ ná mi jlǒ kpó hlɔ̌nhlɔ́n kpó bǐ, bónú mi ná wa nǔ sɔgbe xá nǔ e nɔ hun xomɛ n’i lɛ́ é.”

Ðo nukɔnmɛ ɔ, è sɛ́ mǐ dó lɛ̌dó ɖé mɛ ɖo Medellin, toxo e wú un kɛ nu dó ɖo bǐbɛ́mɛ é sín xá mɛ. È ko nɔ xo dǎka mɛ wú ɖo ali lɛ́ jí sɔmɔ̌ bɔ é sɔ́ nɔ ɖɔ nǔ ɖě nú mɛ e su ɖo xá énɛ́ mɛ lɛ́ é ǎ. Ði kpɔ́ndéwú ɔ, un ɖo Biblu kplɔ́n xá mɛɖé wɛ gbe ɖokpó, bɔ è jɛ tú da jí ɖo hɔn ɔ to. Nyɛ ko ɖibla mlɔ́ ayǐ ɖo kɔ́mɛ bǐ, Biblu kplɔ́ntɔ́ ɔ ka vo fɛɛ bo kpo ɖo akpáxwé e xa wɛ é ɖe é xa wɛ. Ée é xa nǔ ɔ kpé é ɔ, é dó kɛnklɛ́n bo tɔ́n. É ná nɔ zaan é ɔ, é lɛ́ kɔ wá kpó vǐ kpɛví we kpó, bo ɖɔ kpó gbe fífá kpó ɖɔ: “Ma sin xomɛ ó, é byɔ́ ɖɔ má yi kplá vǐ ce lɛ́ ɖ’ayǐ wɛ.”

Awǒvinú ɖěvo lɛ́vɔ́ ɖibla jɛ dó mǐ jí. Mǐ ɖo kúnnu ɖe sín xwé ɖé gbe jɛ xwé ɖé gbe wɛ gbe ɖokpó bɔ asi ce kán wezun wá gɔ́n ce wǔbláwúblá. É ɖɔ ɖɔ nya ɖé da tú dó émí. Énɛ́ hu ado nú mì. Amɔ̌, ɖo nukɔnmɛ ɔ, mǐ wá mɔ ɖɔ é kún nyí Sirkka da tú dó wɛ nya ɔ ɖe ó; nya e ɖo dǐndín gbɔn Sirkka kpá wɛ é da tú wɛ é ɖe.

Hwenu ɖo yiyi wɛ é ɔ, mǐ kplɔ́n bo ɖí xwi xá dǎka e è nɔ xo mɛ wú ɖo ali lɛ́ jí lɛ́ é. Didɛ Kúnnuɖetɔ́ ayǐ ɔ jí tɔn e ɖo ninɔmɛ mɔ̌hun lɛ́ kpó éé nylá hú mɔ̌ lɛ́ é kpó mɛ lɛ́ é tɔn dó wǔsyɛ́n lanmɛ nú mǐ. Mǐ wá mɔ ɖɔ ényí Jexóva ɖo alɔ dó yě wɛ ɔ, é ná d’alɔ mǐ lɔ. Mǐ nɔ xwedó wěɖexámɛ mɛxó ayǐ ɔ jí tɔn lɛ́ tɔn hwebǐnu, nɔ sɔ́ nǔ ɖ’ayǐ, bo nɔ jó éé kpo é dó alɔ mɛ nú Jexóva.

Nǔgbó ɔ, ninɔmɛ ɖé lɛ́ nɔ nylá sɔ lěe mǐ vɛdó é ǎ. Gbe ɖokpó ɔ, un se nǔɖé bɔ é cí ɖɔ  nyɔ̌nu we wɛ ɖo yě ɖé lɛ́ zun wɛ kpó xósúsú kpó ɖo xwé e gbe un wá é sín hɔn to ɖɔhun. Un jló ná nɔ jlɛ ɖé tɛn mɛ ǎ có, xwétɔ́ ɔ ɖɔ nú mì ɖɔ nyi ní tɔ́n wá kɔ́xo. Ée nǔ lɛ́ jɛ wě é ɔ, é wá nyí ɖɔ kɛsɛ́ (Perroquets) we wɛ ɖo nǔ xwe ɖɔ wɛ ɖo yěɖée lɛ́ tɛ́ntin bo ɖo mɛ e ɖo xwé ɔ kpá lɛ́ é vlɛ́ wɛ.

Ðo 1997 ɔ, è sɔ́ mì bɔ un nyí nǔkplɔ́nmɛtɔ́ ɖo Wěmaxɔmɛ devízɔ́ kplɔ́nkplɔ́n tɔn. b Hwebǐnu wɛ wěmaxɔmɛ tutoblónúnǔ ɔ tɔn lɛ́ yiyi nɔ hun xomɛ nú mì, amɔ̌, un lin gbeɖé ɖɔ un ná ɖó wǔjɔmɛ ɖaaɖagbe énɛ́ bo ná nyí nǔkplɔ́nmɛtɔ́ ɖo ɖě domɛ ǎ.

Nukɔnmɛ ɔ, un wa sinsɛnzɔ́ nukúnkpénǔwútɔ́ agbegbe tɔn tɔn. Hwenu e tuto énɛ́ nɔ te é ɔ, un lɛ́ jɛ lɛ̌dó sín azɔ̌ wa jí. Énɛ́ wú ɔ, nú xwe 30 jɛjí ɔ, un ɖu vǐví sinsɛnzɔ́ nǔkplɔ́nmɛtɔ́ kpó nukúnkpénǔwútɔ́ tomɛyitɔ́ kpó tɔn. Azɔ̌ énɛ́ lɛ́ zɔ́n bɔ un mɔ nyɔ̌ná gěgé. É ɖo mɔ̌ có, nǔ lɛ́ bɔ wǔ hwebǐnu ǎ. Mi nú má tínmɛ nú mi.

Un nɔ ɖi xɛsi nú nǔɖé ǎ. Énɛ́ d’alɔ mì bɔ un ɖí xwi xá ninɔmɛ vɛ́ wǔ lɛ́. É ɖo mɔ có, hweɖélɛ́nu ɔ, tíntɛ́nkpɔ́n bá jlá ninɔmɛ lɛ́ ɖó ɖo agun lɛ́ mɛ sín akpakpa nɔ sɔ́ mì zɛ xwé wú. É nɔ jɛ bɔ un nɔ ɖe gbe nú mɛɖé lɛ́ syɛ́nsyɛ́n ɖɔ yě ní nɔ ɖe wǎnyíyí xlɛ́ mɛ ɖěvo lɛ́ bo nɔ lɛ́ nɔ jlɛ̌ jí xá yě. Loɔ, é hwɛ́n tawun ɖɔ hwe énɛ́ lɛ́ nu wɛ nyiɖésúnɔ ma nɔ ɖe jijɔ énɛ́ lɛ́ xlɛ́ ǎ.—Hlɔ̌. 7:21-23.

Nǔɖé lɛ́ e wú un ma kpé ǎ é zɔ́n bɔ awakanmɛ kú mì tawun hweɖélɛ́nu. (Hlɔ̌. 7:24) Hweɖénu ɔ, un ɖɔ nú Jexóva ɖo ɖɛ mɛ ɖɔ é ná nyɔ́ nú mì hú ɖɔ má jó mɛsɛ́dózɔ́ ɔ dó bo lɛ́ kɔ yi Finlande. Gbadanu énɛ́ ɔ, un yi kplé. Nǔ e un se ɖo kplé énɛ́ jí é ná gǎnjɛwú mì ɖɔ un ɖó ná kpo ɖo sinsɛnzɔ́ ce wa wɛ, bo lɛ́ kpo ɖo azɔ̌ wa ɖo gǎnmaɖó ce lɛ́ wú wɛ. Káká jɛ égbé ɔ, lěe Jexóva ná sin e za wě é nú ɖɛ énɛ́ gbɔn é nɔ byɔ́ lanmɛ nú mì tawun. Gɔ́ ná ɔ, lěe é d’alɔ mì kpó xomɛnyínyɔ́ kpó bɔ un ɖu ɖo gǎnmaɖó ce lɛ́ jí gbɔn é su nukún ce mɛ tawun.

Wǔ e Jexóva jɔ nyi kpó Sirkka kpó bɔ mǐ zán ɖibla nyí gbɛhwenu mǐtɔn bǐ ɖo sinsɛnzɔ́ hwebǐnu tɔn mɛ é nɔ su nukún mǐtɔn mɛ tawun. É lɛ́ su nukún ce mɛ tawun ɖɔ Jexóva ná mì asi wǎnyíyínɔ kpó gbejínɔtɔ́ kpó lěhun ɖo xwe énɛ́ lɛ́ bǐ vlamɛ.

Zaanɖé din ɔ, un ná ɖó xwe 70, bo ná ɖó sinsɛnzɔ́ nǔkplɔ́nmɛtɔ́ kpó nukúnkpénǔwútɔ́ tomɛyitɔ́ kpó tɔn wiwa te. É ɖo mɔ̌ có, énɛ́ zɔ́n bónú awakanmɛ kú mì ǎ. Aniwú? Ðó un ɖi nǔ syɛ́nsyɛ́n ɖɔ nǔ e nɔ wlí yɛ̌yi nú Jexóva hú gǎn é wɛ nyí ɖɔ mǐ ní sɛn ɛ kpó jlɛ̌jíninɔ kpó, bo lɛ́ kpa susu n’i kpó ayi e wǎnyíyí kpó nǔsumɛnukúnmɛ kpó gɔ́ b’ɛ túnflá é kpó. (Micée 6:8; Mak. 12:32-34) Bo ná dó wlí yɛ̌yi nú Jexóva ɔ, é byɔ́ ɖɔ mǐ ní ɖó wǔjɔmɛzɔ́ nukúnɖéjí ɖé ǎ.

Nú un kpɔ́n azɔ̌ e sín vǐví un ɖu wá yi lɛ́ é sɛ́dó ɔ, un nɔ mɔ ɖɔ é kún nyí ɖɔ un kpɔ́n te hú gǎn mɛ ɖěvo lɛ́ wú wɛ è sɔ́ yě d’así nú mì ó; mɔ̌ jɛ́n é ma ka lɛ́ nyí ɖɔ nǔwúkpíkpé bǔnɔ ɖé wɛ un ɖó wɛ zɔ́n bɔ è jɔ wǔ énɛ́ lɛ́ mì ǎ é nɛ́. Ðěbǔ lɔ ǎ! É nyɔ́ wa ɔ, fɛ́nú Jexóva tɔn wɛ zɔ́n bɔ é sɔ́ azɔ̌ énɛ́ lɛ́ d’así nú mì. Gǎnmaɖó ce lɛ́ ɖo fínɛ́ có, é jɔ wǔ énɛ́ lɛ́ mì. Un tuun ɖɔ alɔdó Jexóva tɔn kɛ́ɖɛ́ wɛ zɔ́n bɔ un w’azɔ̌ énɛ́ lɛ́ e è sɔ́ d’así nú mì é. Ðo ali énɛ́ nu ɔ, gǎnmaɖó ce lɛ́ sɔ́ hlɔ̌nhlɔ́n Mawu tɔn su.—2 Kɔ. 12:9.