1. Nɛ̌ nǔ ka nɔ cí nú mɛɖé lɛ́ dó xó ɖiɖɔ nú mɛ ɖěvo lɛ́ ɖo sinsɛnzɔ́ ɔ mɛ wú? (Kpɔ́n fɔtóo ɔ lɔmɔ̌.)

 ÐÓ MǏ nyí togun Jexóva tɔn wútu ɔ, wǎn e mǐ yí nú Tɔ́ mǐtɔn jǐxwé tɔn ɔ é nɔ zɔ́n bɔ mǐ nɔ jlá wɛn ɔ mɛ ɖěvo lɛ́, bo nɔ lɛ́ ba ná d’alɔ yě bónú yě ná kplɔ́n bá tuun i. Wɛnjlátɔ́ gěgé nɔ ɖu vǐví wɛnɖagbejíjlázɔ́ ɔ tɔn tawun. Amɔ̌, é nɔ vɛ́ wǔ nú mɛ ɖěvo lɛ́ nú yě ná ɖu vǐví tɔn. Étɛ́wú? Mɛ ɖé lɛ́ sixú nɔ kú winnyá tawun, bo nɔ mɔ ɖɔ émí kún nyí nǔkplɔ́nmɛtɔ́ ɖagbe ɖé ó. Mɛ ɖé lɛ́ nɔ lin ɖɔ émí kún vo bo ná yi xwé e gbe è ma ylɔ́ émí ɖe ǎ lɛ́ é ó. Mɛ ɖé lɛ́ sixú ɖi xɛsi ɖɔ è ná nya émí. È ko kplɔ́n mɛ ɖé lɛ́ ɖɔ yě ní nɔ nyi alɔ nú tagba jijɛ xá mɛ ɖěvo lɛ́. Nɔví énɛ́ lɛ́ yí wǎn nú Jexóva tawun có, yě nɔ mɔ ɖɔ jǒnɔ lɛ́ sisɛkpɔ́ bo má wɛn ɖagbe ɔ xá yě nɔ vɛ́ wǔ nú émí. É ɖo mɔ̌ có, yě mɔ lě do azɔ̌ énɛ́ ɖo tají sɔ é, bo nɔ ɖ’alɔ ɖ’é mɛ hwɛhwɛ. Dǒ nukún lě do é ná ko hun xomɛ nú Jexóva sɔ é mɛ kpɔ́n!

2. Ényí é nɔ vɛ́ wǔ nú we bɔ a ná mɔ awǎjijɛ ɖo sinsɛnzɔ́ ɔ mɛ ɔ, aniwú awakanmɛ ma ka ɖó ná kú we ǎ?

² É ka nɔ vɛ́ wǔ nú we hweɖélɛ́nu bɔ a ná mɔ awǎjijɛ ɖo sinsɛnzɔ́ ɔ mɛ ɖó hwɛjijɔ mɔ̌hun lɛ́ wú wɛ a? Ényí mɔ̌ hǔn, ma nú awakanmɛ kú we ó. Jiɖe e a ma ɖó dó hwiɖée wú ǎ é sixú ɖo xlɛ́xlɛ́ wɛ ɖɔ, kpó mɛɖéesɔ́hwe kpó ɔ, a ba ná nyi alɔ nú ayi dindɔn wá hwiɖée jí. É nɔ lɛ́ xlɛ́ ɖɔ a kún ba ná dɔn adɔn xá mɛ ɖěvo lɛ́ ó. Gɔ́ ná ɔ, mɛ ɖěbǔ nɔ ba ɖɔ è ní nya émí dó  gbě, tají ɔ, hwenu e é ɖo tíntɛ́nkpɔ́n wɛ bá wa ɖagbe nú mɛ ɖěvo lɛ́ é ǎ. Tɔ́ towe jǐxwé tɔn ɔ tuun wǔvɛ́ ɖěɖěe mɛ gbɔn dín wɛ a ɖe lɛ́ é ganjí, bo ba ná dó alɔ e sín hudó a ɖó é we. (Eza. 41:13) Ðo xóta élɔ́ mɛ ɔ, mǐ ná gbéjé wěɖexámɛ e ná d’alɔ mǐ bɔ mǐ ná ɖí xwi xá linlin mɔ̌hun lɛ́ é atɔ́ɔ́n kpɔ́n, bo ná lɛ́ mɔ lěe mǐ ná tɛ́n kpɔ́n bo ɖó awǎjijɛ ɖo sinsɛnzɔ́ ɔ mɛ gbɔn é.

NǓ XÓ MAWU TƆN NÍ NÁ HLƆ̌NHLƆ́N WE

3. Étɛ́ ka d’alɔ gbeyíɖɔ Jelemíi bɔ é ɖɔ mawuxó nú mɛ ɖěvo lɛ́?

³ É ná bo tlɛ nyí ɖo hwexónu ɔ, wɛn e gosín Mawu gɔ́n é ná hlɔ̌nhlɔ́n mɛsɛntɔ́ tɔn lɛ́ hwenu e yě ɖó azɔ̌ syɛ́nsyɛ́n ɖé bá wa é. Mǐ ní kpɔ́n kpɔ́ndéwú gbeyíɖɔ Jelemíi tɔn. É xo nǔ kpɔ́n hwenu e Jexóva zɔ́n azɔ̌ ɛ ɖɔ é ní jlá wɛn ɔ é. Jelemíi ɖɔ: “Un ma nyɔ́ xó ɖɔ nɛ́! Yɔkpɔ́vú wɛ nú mì.” (Jel. 1:6) Nɛ̌ é ka ɖu ɖo jiɖe e é ma nɔ ɖó dó éɖée wú ǎ é jí gbɔn? Xó e Mawu ɖɔ n’i é wɛ ná ɛ hlɔ̌nhlɔ́n. É ɖɔ: “É nɔ cí ɖɔ myɔ wɛ ɖo xo ce mɛ, bo ɖo jiji wɛ ɖɔhun, bɔ un nɔ tɛ́n kpɔ́n bo ná dɛ ɖ’é nu, un ka nɔ kpé wú ǎ.” (Jel. 20:8, 9) Mɛ e Jelemíi ná jlá wɛn ɔ lɛ́ é nyí mɛ fífá ɖé ǎ có, wɛn e è zɔ́n ɛ ɖɔ é ní jlá é ná ɛ hlɔ̌nhlɔ́n e sín hudó é ɖó bo ná wa azɔ̌ ɔ é.

4. Ényí mǐ nɔ xa Xó Mawu tɔn bo nɔ lɛ́ lin tamɛ d’é jí ɔ, étɛ́ ka nɔ jɛ? (Kolósinu lɛ́ 1:9, 10)

⁴ Wɛn Mawu tɔn e ɖo Xó Mawu tɔn mɛ é wɛ nɔ ná hlɔ̌nhlɔ́n e sín hudó klisánwun lɛ́ ɖó é yě. Ðo wěma e mɛsɛ́dó Pɔ́lu wlán sɛ́dó Kolósinu lɛ́ é mɛ ɔ, é ɖɔ ɖɔ nukúnnúmɔjɛnǔmɛ e sɔgbe é ɖíɖó ná sísɛ́ nɔví émítɔn lɛ́ bɔ yě ná “zán gbɛ lěe é jɛxá Jexóva gbɔn é,” mɔ̌ mɛ ɔ, yě ná kpo ɖo “sínsɛ́n ná wɛ ɖo nǔɖagbewiwa bǐ mɛ.” (Xa Kolósinu lɛ́ 1:9, 10.) Wɛn ɖagbe ɔ jíjlá ɖo azɔ̌ ɖagbe énɛ́ lɛ́ mɛ. Énɛ́ wú ɔ, ényí mǐ nɔ xa Xó Mawu tɔn, bo nɔ lɛ́ lin tamɛ d’é jí ɔ, mǐ nɔ ná hlɔ̌nhlɔ́n nǔɖiɖi e mǐ ɖó nú Jexóva é, bo nɔ lɛ́ mɔ nukúnnú jɛ nǔ e wú é ɖo tají ɖɔ è ní jlá Axɔ́súɖuto ɔ sín wɛn ɖagbe é mɛ hú gǎn.

5. Nɛ̌ mǐ ka sixú ɖu le Biblu xixa kpó Biblu kplɔ́nkplɔ́n kpó tɔn hú gǎn gbɔn?

⁵ Bo ná dó ɖu Xó Mawu tɔn sín le bǐ mlɛ́mlɛ́ ɔ, mǐ ɖó ná zɔn kplakpla jí hwenu e mǐ ɖo xixa wɛ é, alǒ ɖo kplɔ́nkplɔ́n wɛ é, kabǐ ɖo tamɛ lin d’é jí wɛ é ǎ. Nɔ xwe sɔ. Ényí a xa wěmafɔ ɖé bɔ nukúnnú mimɔ jɛ mɛ vɛ́ wǔ nú we hǔn, ma wɔn ya ná kpowun ó. É nyɔ́ wa hǔn, zǎn Index des publications des Témoins de Jéhovah, alǒ Alixlɛ́mɛwéma dobanúnǔ tɔn nú Kúnnuɖetɔ́ Jexóva tɔn lɛ́ bo ná dó mɔ tínmɛ ɖé  dó wěmafɔ ɔ jí. Ényí a nɔ xwe sɔ hwenu e a ɖo nǔ kplɔ́n wɛ é ɔ, a ná ná hlɔ̌nhlɔ́n gǎn e a gán jɛ wú ɖɔ Xó Mawu tɔn nyí nǔgbó é. (1 Tɛ. 5:21) Lě do a kú dó nǔ e a kplɔ́n lɛ́ é jí sɔ é ɔ, mɔ̌ do wɛ a ná ɖu vǐví nǔ énɛ́ lɛ́ mímá xá mɛ ɖěvo lɛ́ tɔn sɔ.

NƆ SƆ́ NǓ GANJÍ NÚ SINSƐNZƆ́ Ɔ

6. Étɛ́wú mǐ ka ɖó ná nɔ sɔ́ nǔ ganjí nú sinsɛnzɔ́ ɔ?

⁶ Ényí a nɔ sɔ́ nǔ ganjí nú sinsɛnzɔ́ ɔ, a ná ɖibla mɔ ɖɔ émí vo hú gǎn hwenu e émí ɖo xó ɖɔ ɖó kpɔ́ xá mɛ ɖěvo lɛ́ wɛ é. Jezu d’alɔ ahwanvú tɔn lɛ́ bɔ yě sɔ́ nǔ cóbɔ é sɛ́ yě dó sinsɛnzɔ́ ɔ mɛ. (Luk. 10:1-11) Ðó ahwanvú lɛ́ zán nǔ e Jezu kplɔ́n yě lɛ́ é wútu ɔ, yě kpé wú bo wa nǔ gěgé, b’ɛ zɔ́n bɔ yě ɖ’awǎjijɛ tawun.—Luk. 10:17.

7. Nɛ̌ mǐ ka sixú nɔ sɔ́ nǔ nú sinsɛnzɔ́ ɔ gbɔn? (Kpɔ́n fɔtóo ɔ lɔmɔ̌.)

⁷ Nɛ̌ mǐ ka sixú nɔ sɔ́ nǔ nú sinsɛnzɔ́ ɔ gbɔn? Mǐ ɖó ná nɔ lin tamɛ dó lěe mǐ sixú zán xógbe mǐɖésúnɔ tɔn lɛ́ dó ɖɔ xó dó nǔgbó ɔ wú ganjí gbɔn é jí. Tamɛ linlin dó lěe mɛ lɛ́ sixú wa nǔ gbɔn ɖo fí e mǐ nɔ ɖɔ mawuxó gbɔn lɛ́ é we, alǒ atɔn jí, gɔ́ nú lěe mǐ ná ná xósin yě ɖo ninɔmɛ ɖokpó ɖokpó mɛ gbɔn é hinhɛn ayi mɛ lɔ sixú d’alɔ. Gɔ́ ná ɔ, ényí mǐ sɛkpɔ́ mɛ lɛ́ ɔ, mǐ sixú tɛ́n kpɔ́n bo vo, ko nǔ yɛ́sɛ́ɛ́, bo lɛ́ dó xɔ́ntɔn yě.

8. Ali tɛ́ nu klisánwun lɛ́ ka cí kozɛ́n e xó mɛsɛ́dó Pɔ́lu ɖɔ ɖo nǔjlɛ́dónǔwú tɔn mɛ lɛ́ é ɖɔhun ɖe?

⁸ Mɛsɛ́dó Pɔ́lu ɖɔ xó élɔ́ nú klisánwun hǎtɔ́ tɔn lɛ́: “Mǐ cí kozɛ́n lɛ́ ɖɔhun có, mǐ ɖó dɔkun énɛ́.” (2 Kɔ. 4:7) Étɛ́ ka ɖo dɔkun énɛ́ ɔ nyí wɛ? Gbɛhwlɛngánzɔ́ e nyí wɛn ɖagbe Axɔ́súɖuto ɔ tɔn jíjlá é wɛ. (2 Kɔ. 4:1) Étɛ́ kozɛ́n lɛ́ ka nɔ te ná? Yě nɔ te nú mɛsɛntɔ́ Mawu tɔn ɖěɖěe nɔ jlá wɛn ɖagbe ɔ mɛ ɖěvo lɛ́ é. Ðo Pɔ́lu sín hwenu ɔ, ajɔ̌tɔ́ lɛ́ nɔ zán kozɛ́n lɛ́ dó bɛ́ nǔ xɔ akwɛ́ ɖagbe lɛ́, ɖi nǔɖuɖu, vɛ̌ɛn kpó akwɛ́ kpó sín fí ɖé jɛ fí ɖěvo. Ðo ali ɖokpó ɔ nu ɔ, Jexóva byɔ́ mǐ ɖɔ mǐ ní jlá wɛn ɖagbe e nyí wɛn xɔ akwɛ́ ɖé é. Kpó alɔdó Jexóva tɔn kpó ɔ, mǐ sixú ɖó hlɔ̌nhlɔ́n e sín hudó mǐ ɖó bo ná jlá wɛn ɔ kpó gbejíninɔ kpó é.

NƆ XO ÐƐ DÓ BYƆ́ AKƆ́NKPINKPAN

9. Nɛ̌ mǐ ka sixú ɖu ɖo xɛsi e mǐ nɔ ɖi nú gbɛtɔ́, alǒ xɛsi e mǐ nɔ ɖi ɖɔ è ná gbɛ́ wɛn mǐtɔn é jí gbɔn? (Kpɔ́n fɔtóo ɔ lɔmɔ̌.)

⁹ Hweɖélɛ́nu ɔ, mǐ sixú ɖi xɛsi nú gbɛtɔ́, alǒ ɖi xɛsi ɖɔ è ná gbɛ́ wɛn mǐtɔn. Nɛ̌ mǐ ka sixú  ɖu ɖo wǔvɛ́ énɛ́ jí gbɔn? Mǐ ní ɖɔ xó dó ɖɛ e mɛsɛ́dó lɛ́ xo hwenu e è gbɛ́ nú yě ɖɔ yě ma jlá wɛn ɔ é wú. Yě ɖi xɛsi ǎ, é nyɔ́ wa ɔ, yě byɔ́ Jexóva ɖɔ é ní d’alɔ émí “bónú [émí] ná kpo ɖo xó [tɔn] ɖɔ wɛ kpó adɔgbígbó kpó.” Tlóló kpowun ɔ, Jexóva ná sin nú ɖɛ yětɔn. (Mɛ. 4:18, 29, 31) Ényí xɛsi ɖi nú gbɛtɔ́ wa nǔ dó mǐ wú hweɖélɛ́nu ɔ, mǐ lɔ ɖó ná xo ɖɛ bo byɔ́ alɔdó Jexóva tɔn. Nɔ byɔ́ Jexóva ɖɔ é ní d’alɔ we bónú a ná yí wǎn nú mɛ lɛ́, énɛ́ ɔ, a ná ɖu ɖo xɛsi ɖi nú gbɛtɔ́ jí.

10. Nɛ̌ Jexóva ka nɔ d’alɔ mǐ bɔ mǐ nɔ kpé wú bo nɔ wa Kúnnuɖetɔ́ tɔn e mǐ nyí é sín azɔ̌ gbɔn? (Ezayíi 43:10-12)

¹⁰ Jexóva sɔ́ mǐ bɔ mǐ nyí Kúnnuɖetɔ́ tɔn lɛ́, bo lɛ́ d’akpá bá d’alɔ mǐ nú mǐ ná kpankɔ́n. (Xa Ezayíi 43:10-12.) Mǐ ní gbéjé ali e nu é nɔ wa mɔ̌ ɖe é ɛnɛ kpowun kpɔ́n. Nukɔntɔn, Jezu ɖo kpɔ́ xá mǐ hweɖébǔnu e mǐ ɖo wɛn ɖagbe ɔ jlá wɛ é. (Mat. 28:18-20) Wegɔ́, Jexóva ɖe azɔ̌ nú wɛnsagun ɖé lɛ́ bɔ yě ná d’alɔ mǐ. (Nǔɖe. 14:6) Atɔngɔ́, Jexóva ná mǐ gbigbɔ mímɛ́ tɔn bɔ é nɔ d’alɔ mǐ bɔ mǐ nɔ flín nǔ e mǐ kplɔ́n lɛ́ é. (Jaan 14:25, 26) Ɛnɛgɔ́, Jexóva ná mǐ nɔví lɛ́ bɔ yě ná wa azɔ̌ ɖó kpɔ́ xá mǐ. Kpó alɔdó Jexóva tɔn kpó, gɔ́ nú gǔdo e kplékplé nɔví lɛ́ tɔn mǐtɔn wǎnyíyínɔ ɔ nɔ nɔ nú mǐ é ɔ, mǐ nɔ ɖó nǔ ɖěbǔ e sín hudó mǐ ɖó bo ná kpé azɔ̌ ɔ wú é.

NƆ HÚZÚ SƆGBE XÁ HUDÓ MƐ LƐ́ TƆN, BO NƆ LƐ́ ÐÓ LINLIN ÐAGBE

11. Nɛ̌ mǐ ka sixú mɔ mɛ gěgé d’é jí gbɔn hwenu e mǐ ɖo sinsɛnzɔ́ ɔ mɛ é? (Kpɔ́n fɔtóo ɔ lɔmɔ̌.)

¹¹ Ényí a mɔ mɛ kpɛɖé ɖo xwégbe ɔ, awakanmɛ nɔ kú we wɛ a? Ényí mɔ̌ hǔn, nɔ kan nǔ élɔ́ lɛ́ byɔ́ hwiɖée: ‘Fítɛ́ mɛ e ɖo fí e mǐ nɔ ɖɔ mawuxó ɖe lɛ́ é ka ná ɖe din?’ (Mɛ. 16:13) ‘Azɔ̌mɛ wɛ yě ná ɖe a, kabǐ axi mɛ?’ Ényí mɔ̌ wɛ ɔ, a ka sixú ɖe kúnnu ɖo alitó, bo ɖe kúnnu nú mɛ gěgé hú gǎn a? Nɔví súnnu ɖé nɔ nyí Joshua bo ɖɔ: “Ali gěgé hun nú mì bɔ un ɖɔ mawuxó ɖo ajɔ̌watɛn lɛ́ kpó tokplétɛn lɛ́ kpó.” É kpó asi tɔn Bridget kpó lɛ́ mɔ mɛ gěgé d’é jí ɖo xwégbe hwenu e yě ylɔ́ mɛ lɛ́ ɖo alǒkan jí ɖo gbadanu cawun lɛ́ kpó aklúnɔzángbe hwelɛ́kɔ lɛ́ kpó é.—Efɛ́. 5:15, 16.

12. Nɛ̌ mǐ ka sixú tuun nǔ e mɛ lɛ́ ɖi nǔ ná é, alǒ nǔ e nɔ ɖu ayi mɛ nú yě lɛ́ é gbɔn?

¹² Ényí mɛ lɛ́ ma ɖó kɔ káká ɖé wɛn ɔ wú ǎ hǔn, tɛ́n kpɔ́n bo tuun nǔ e yě ɖi nǔ ná é, alǒ nǔ e nɔ ɖu ayi mɛ nú yě é. Joshua kpó  Bridget kpó nɔ zán nǔkanbyɔ́ e ɖo tláti ɖé sín akpa jí lɛ́ é dó bɛ́ xóɖɔɖókpɔ́ xá mɛ e yě xo go lɛ́ é. Ði kpɔ́ndéwú ɔ, ényí yě ɖo tláti Étɛ́ a ka nɔ lin dó Biblu wú? zán wɛ ɔ, yě nɔ ɖɔ: “Mɛɖé lɛ́ nɔ lin ɖɔ Biblu ɔ wěma ɖé wɛ bo gosín Mawu gɔ́n, mɛ ɖěvo lɛ́ ka nɔ lin mɔ̌ ǎ. Étɛ́ hwɛ ka nɔ lin?” Énɛ́ nɔ hun xóɖɔɖókpɔ́ ɖé sín ali hwɛhwɛ.

13. Ényí mɛ lɛ́ ná bo ma tlɛ ɖótó mǐ ǎ ɔ, étɛ́wú mǐ ka sixú ɖɔ ɖɔ sinsɛnzɔ́ mǐtɔn kpa mǐ? (Nǔnywɛ́xó 27:11)

¹³ Sínsɛ́n e sinsɛnzɔ́ mǐtɔn ná é jí wɛ è nɔ zɔn dó bo nɔ ɖɔ ɖɔ sinsɛnzɔ́ mǐtɔn kpa mǐ ǎ. Aniwú? Ðó mǐ wa nǔ e Jexóva kpó Vǐ tɔn kpó zɔ́n mǐ ɖɔ mǐ ní wa é, énɛ́ wɛ nyí ɖɔ mǐ ɖe kúnnu. (Mɛ. 10:42) É ná bo tlɛ nyí hwenu e mǐ ma mɔ mɛɖé bo ɖɔ xó xá ǎ é, alǒ hwenu e è gbɛ́ wɛn mǐtɔn é ɔ, mǐ sixú ɖ’awǎjijɛ, ɖó mǐ tuun ɖɔ nǔ mǐtɔn nɔ nyɔ́ Tɔ́ mǐtɔn jǐxwé tɔn ɔ nukúnmɛ.—Xa Nǔnywɛ́xó 27:11.

14. Ényí wɛnjlátɔ́ ɖěvo mɔ jlǒɖótɔ́ ɖé ɖo fí e mǐ nɔ ɖɔ mawuxó ɖe é ɔ, étɛ́wú mǐ ka sixú j’awǎ?

¹⁴ Mǐ sixú lɛ́ j’awǎ hwenu e wɛnjlátɔ́ ɖěvo mɔ mɛɖé ɖo fí e mǐ nɔ ɖɔ mawuxó ɖe é bɔ é yí wɛn ɖagbe ɔ é. Atɔxwɛ jlɛ́ azɔ̌ mǐtɔn dó vǐ e bú é ɖé biba wú. Mɛ gěgé wɛ nɔ ɖo biba ɛ wɛ sín xá ɖé mɛ jɛ xá ɖěvo mɛ. Ényí è mɔ vǐ ɔ ɔ, mɛ lɛ́ bǐ wɛ nɔ ɖó hwɛjijɔ e wú yě ná j’awǎ é, ényí mɛ e mɔ ɛ é kɛ́ɖɛ́ ǎ. Ðo ali ɖokpó ɔ nu ɔ, nǔkplɔ́nkplɔ́n mɛ lɛ́ bónú yě ná húzú ahwanvú sín azɔ̌ ɔ, gǎndídó mɛ e ɖo agun ɔ mɛ lɛ́ é bǐ tɔn wɛ. É byɔ́ ɖɔ mɛ bǐ ní nyi ahwan byɔ́ fí e mǐ nɔ ɖɔ mawuxó gbɔn lɛ́ é, bɔ ényí mɛ yɔ̌yɔ́ ɖé jɛ kplé lɛ́ wá jí ɔ, mɛ bǐ nɔ j’awǎ.

NƆ SƆ́ AYI ÐÓ WǍN E A YÍ NÚ JEXÓVA KPÓ NƆZO TOWE LƐ́ KPÓ É JÍ

15. Nɛ̌ Matíe 22:37-39 zínzán ka nɔ d’alɔ mǐ bɔ akpakpa e nɔ sɔ́ mǐ dó sinsɛnzɔ́ ɔ wú é nɔ lɛ́ jɛjí gbɔn? (Kpɔ́n fɔtóo e ɖo akpa ɔ jí é lɔmɔ̌.)

¹⁵ Mǐ sixú bló bɔ akpakpa e nɔ sɔ́ mǐ dó mawuxóɖiɖɔzɔ́ ɔ wú é ná lɛ́ jɛjí gbɔn ayi sísɔ́ ɖó wǎn e mǐ yí nú Jexóva kpó nɔzo mǐtɔn lɛ́ kpó é jí gblamɛ. (Xa Matíe 22:37-39.) Ényí Jexóva mɔ mǐ ɖo sinsɛnzɔ́ ɔ mɛ ɔ, dǒ nukún lě do é nɔ j’awǎ sɔ é mɛ kpɔ́n, bo lɛ́ dó nukún lě do mɛ lɛ́ ná j’awǎ sɔ hwenu e yě jɛ Biblu kplɔ́n jí é mɛ kpɔ́n! Lɛ̌ lin tamɛ dó hwlɛngán e ɖo te kpɔ́n mɛ ɖěɖěe yí wɛn ɔ lɛ́ é jí.—Jaan 6:40; 1 Tim. 4:16.

16. Ényí è glɔ́n mǐ dó xwégbe ɔ, nɛ̌ mǐ ka sixú mɔ awǎjijɛ ɖo sinsɛnzɔ́ ɔ mɛ gbɔn? Nǎ kpɔ́ndéwú ɖé lɛ́.

¹⁶ È glɔ́n we dó xwégbe ɖó hwɛjijɔ ɖé wú  wɛ a? Ényí mɔ̌ hǔn, nɔ sɔ́ ayi ɖó nǔ e a sixú wa bo ná nɔ ɖe wǎnyíyí xlɛ́ Jexóva kpó nɔzo towe lɛ́ kpó é jí. Ðo jɛmɛjí Covid-19 hwenu ɔ, è glɔ́n Samuel kpó Dania kpó dó xwé yětɔn gbe. Ðo hwenu vɛ́ wǔ énɛ́ mɛ ɔ, yě nɔ ɖe kúnnu hwɛhwɛ gbɔn alǒkan jí, nɔ wlán wěma sɛ́dó mɛ, lobo nɔ lɛ́ kplɔ́n Biblu xá mɛ gbɔn kan jí. Samuel nɔ ɖe kúnnu nú mɛ ɖěɖěe é xo go ɖo dotóoxwé mɛ kpaa tɔn e è ɖo nukún kpé dó kansɛ́ɛzɔn tɔn wú ɖe wɛ é. É ɖɔ: “Ninɔmɛ syɛ́nsyɛ́n lɛ́ nɔ zɔ́n bɔ nǔ nɔ ci kɔ nú mǐ ɖo taglomɛ, ɖo agbaza lixo kpó gbigbɔ lixo kpó. É byɔ́ ɖɔ mǐ ní mɔ awǎjijɛ ɖo sinsɛnzɔ́ e wa nú Jexóva wɛ mǐ ɖe é mɛ.” Énɛ́ ɖɔ wɛ è ɖe bɔ Dania j’ayǐ, lobɔ è glɔ́n ɛ nú sun atɔn. Énɛ́ gúdo ɔ, é byɔ́ ɖɔ é ná zán afɔtɔ́nɔ lɛ́ sín kɛkɛ́ví nú sun ayizɛ́n. Dania ɖɔ: “Un tɛ́n kpɔ́n bo wa nǔ e ninɔmɛ ce yí gbe ná lɛ́ é bǐ. Un kpé wú bo ɖe kúnnu nú dotóo e nɔ wá kpɔ́n mì é, bo lɛ́ ɖɔ xó nú mɛ ɖěɖěe nɔ hɛn nǔ wá xɔ ɔ mɛ lɛ́ é. Un lɛ́ ɖɔ xó ɖagbe ɖé lɛ́ xá nyɔ̌nu e nɔ wa azɔ̌ ɖo azɔ̌xwé e nɔ sa azɔ̌wanú dotóoxwé tɔn lɛ́ é ɖé gbɔn kan jí.” Samuel kpó Dania kpó sín ninɔmɛ lɛ́ ɖó dogbó nú azɔ̌ yětɔn, amɔ̌, yě mɔ awǎjijɛ ɖo nǔ e wú yě sixú kpé bo wa lɛ́ é mɛ.

17. Nɛ̌ a ka sixú ɖu wěɖexámɛ ɖěɖěe ɖo xóta élɔ́ mɛ lɛ́ é sín le hú gǎn gbɔn?

¹⁷ Wěɖexámɛ e tɔ́n ɖo xóta élɔ́ mɛ lɛ́ é nɔ wa azɔ̌ ganjí, ényí è zán yě bǐ ɔ nɛ́. Wěɖexámɛ lɛ́ ɖokpó ɖokpó cí ɖadónú e è nɔ zán dó ɖa nǔɖé ná é ɖɔhun. Ényí è zán ɖadónú lɛ́ bǐ dó ɖa nǔɖuɖu ɔ ná ɔ, nǔɖuɖu ɔ ná víví. Ðo ali ɖokpó ɔ nu ɔ, ényí mǐ zán wěɖexámɛ lɛ́ bǐ ɔ, mǐ ná ɖo gbesisɔmɛ hú gǎn bo ná ɖu ɖo linlin nyanya lɛ́ jí, lobo ná lɛ́ ɖ’awǎjijɛ hú gǎn ɖo sinsɛnzɔ́ ɔ mɛ.