1. Étɛ́ ka nyí palaɖísi gbigbɔ tɔn ɔ? Étɛ́ mǐ ka ɖó ná kán ɖ’é jí bá wa?

 PALAÐÍSI ɖé ɖo ayǐkúngban jí égbé, bɔ gbɛtɔ́ e alɔnu yětɔn ján ɖo nǔ ɖagbe lɛ́ wiwa kɔn é gɔ́ mɛ. Gbɛtɔ́ lǐvi mɔ̌kpán e ɖo fífá adodwé ɔ sín vǐví ɖu wɛ lɛ́ é wɛ gɔ́ mɛ. Mɛ ɖěɖěe ko ɖo palaɖísi énɛ́ mɛ lɛ́ é kán ɖ’é jí, bo ná gosín mɛ gbeɖé ǎ. Yě lɛ́ jló ɖɔ mɛ gěgé ní xo kpóɖó nú yě lěe é nyɔ́ bló gbɔn é ɖo fí bǔnɔ énɛ́. Fítɛ́ ka wɛ? Palaɖísi gbigbɔ tɔn a ɔ wɛ!

2. Étɛ́ ka jí wǔ ɖo palaɖísi gbigbɔ tɔn ɔ sín xó mɛ?

² É jí wǔ ɖɔ Jexóva ɖó fí e ayijayǐ ɖe é ɖé ayǐ ɖo gbɛ e Satáan bló bɔ é húzú nɔtɛn wǎngbɛ́númɛ, nǔnyanyawiwa kpó awǒvinú lɛ́ kpó tɔn é mɛ. (1 Jaan 5:19; Nǔɖe. 12:12) Mawu mǐtɔn wǎnyíyínɔ ɔ nɔ mɔ lěe gbɛ élɔ́ nɔ hɛn nǔ gblé dó mɛ wú gbɔn é, bo sɔ́ nǔ nú nɔtɛn ayijayǐ tɔn e sín hudó mǐ ɖó, bo ná kpo ɖo sinsɛn ɛ wɛ kpó awǎjijɛ kpó é. Xó tɔn jlɛ́ palaɖísi gbigbɔ tɔn ɔ dó fí e è nɔ “bɛ yɛ” ɖe ɖo ayijayǐ mɛ é kpó “jikpá e sin kpé” é kpó wú. (Eza. 4:6; 58:11) Nyɔ̌ná e Jexóva nɔ kɔn dó mɛ ɖěɖěe ɖo palaɖísi énɛ́ mɛ lɛ́ é jí é nɔ zɔ́n bɔ, yě nɔ kpé wú bo nɔ ɖó awǎjijɛ, bo nɔ lɛ́ mɔ ɖɔ émí ɖo ayijayǐ mɛ ɖo azǎn gǔdo gúdo tɔn élɔ́ lɛ́ e vɛ́ wǔ é mɛ.—Eza. 54:14; 2 Tim. 3:1.

3. Nɛ̌ Ezayíi wěmata 65​gɔ́ ɔ ka jɛnu ɖo hwexónu gbɔn?

³ Jexóva gbɔn gbeyíɖɔ Ezayíi jí bo tínmɛ lěe gbɛ ná cí nú mɛ e ná nɔ palaɖísi gbigbɔ tɔn énɛ́ mɛ lɛ́ é. A sixú mɔ tínmɛ énɛ́ ɖo Ezayíi wěmata 65​gɔ́ ɔ mɛ; é jɛnu azɔn nukɔntɔn ɔ ɖo  537 J.H.M. tɔn. Ðo hwe énɛ́ nu ɔ, è ɖe Jwifu e hwɛ yětɔn vɛ́ ná lɛ́ é sín kannumɔgbénu ɖo Babilɔ́nu bɔ yě lɛ́ kɔ yi xwé. Jexóva kɔn nyɔ̌ná dó togun tɔn jí, bo d’alɔ ɛ bɔ é vɔ́ toxo Jeluzalɛ́mu tɔn e ko gba é blóɖó bɔ é lɛ́ nyɔ́ ɖɛkpɛ, lobo bló bɔ tɛ́npli tɔn lɛ́ húzú hɔ̌nkan mawusinsɛn nǔgbó ɔ tɔn ɖo Izlayɛ́li.—Eza. 51:11; Zak. 8:3.

4. Nɛ̌ Ezayíi wěmata 65​gɔ́ ɔ ka ɖo jijɛnu wɛ gbɔn ɖo égbé?

⁴ Nǔɖɔɖayǐ Ezayíi tɔn sín jijɛnu wegɔ́ ɔ bɛ́ ɖo 1919 H.M. tɔn, hwenu e è ɖe mɛsɛntɔ́ Jexóva tɔn égbé tɔn lɛ́ sín Babilɔ́nu ɖaxó ɔ kannu é. Énɛ́ ɔ, palaɖísi gbigbɔ tɔn ɔ jɛ kan vun gbɔn ayǐkúngban ɔ jí jí. Wɛnɖagbejlátɔ́ Axɔ́súɖuto ɔ tɔn kanɖódónǔwútɔ́ lɛ́ ɖó agun gěgé ayǐ, bo lɛ́ ɖe jijɔ klisánwun tɔn lɛ́ xlɛ́. Súnnu kpó nyɔ̌nu kpó ɖěɖěe nɔ wa alǎnnú, bo nɔ lɛ́ zán gbɛ blíblí lɛ́ é “sɔ́ gbɛtɔ́ yɔ̌yɔ́ ɔ dó. É wɛ nyí gbɛtɔ́ yɔ̌yɔ́ e Mawu dá sɔgbe xá jlǒ tɔn é.” (Efɛ́. 4:24) Nǔgbó wɛ ɖɔ gbɛ yɔ̌yɔ́ sɔgúdo tɔn ɔ mɛ wɛ nyɔ̌ná ɖěɖěe xó Ezayíi ɖɔ lɛ́ é gěgé ná jɛnu tlɔlɔ ɖe. Amɔ̌ din hwɛ̌ ɔ, mǐ ɖo nyɔ̌ná ɖaaɖagbe ɖé lɛ́ sín vǐví ɖu wɛ. Mi nú mǐ ní ɖɔ xó dó lěe palaɖísi gbigbɔ tɔn énɛ́ ɖo le hɛn wá nú mǐ wɛ gbɔn é kpó nǔ e wú mǐ ma ɖó ná gosín mɛ gbeɖé ǎ é kpó jí.

NINƆMƐ E MƐ MƐ ÐĚÐĚE ÐO PALAÐÍSI GBIGBƆ TƆN Ɔ MƐ LƐ́ É ÐE LƐ́ É

5. Lěe è dó akpá tɔn gbɔn ɖo Ezayíi 65:13 mɛ é ɔ, étɛ́ lɛ́ sín vǐví mǐ ka nɔ ɖu ɖo palaɖísi gbigbɔ tɔn ɔ mɛ?

⁵ Yě nɔ ɖu nǔ gɔ́ xo, bɔ è nɔ lɛ́ fá kɔ nú yě. Nǔɖɔɖayǐ Ezayíi tɔn xlɛ́ vogbingbɔn ɖaxó e ɖo lěe mɛ e ɖo palaɖísi gbigbɔ tɔn ɔ mɛ lɛ́ é sín gbɛ cí é kpó lěe mɛ ɖěɖěe ma ɖ’é mɛ ǎ lɛ́ é sín gbɛ cí é kpó tɛ́ntin é. (Xa Ezayíi 65:13.) Jexóva nɔ sú hudó gbigbɔ tɔn e mɛsɛntɔ́ tɔn lɛ́ ɖó é sín do b’ɛ nɔ túnflá. É ná mǐ gbigbɔ mímɛ́ tɔn, Xó tɔn kpó nǔɖuɖu gbigbɔ tɔn e túnflá é kpó, mɔ̌ mɛ ɔ, mǐ sixú ‘mɔ nǔ ɖu, mɔ sin bo nu, bo lɛ́ ɖo awǎjijɛ mɛ.’ (Sɔ́ jlɛ́ dó Nǔɖexlɛ́mɛ 22:17 wú.) Amɔ̌, mɛ ɖěɖěe ma ɖo palaɖísi gbigbɔ tɔn ɔ mɛ ǎ lɛ́ é sín ninɔmɛ gbɔn vo tawun; yě ɖo “xovɛ́, . . . nugblá . . . [bo lɛ́] ɖu winnyá.” È nɔ sú hudó gbigbɔ tɔn e yě ɖó é sín do nú yě ǎ.—Amɔ́. 8:11.

6. Nɛ̌ Jowɛ́li 2:21-24 ka tínmɛ nǔ e è sɔ́ nǔ ná nú mǐ ɖo gbigbɔ lixo lɛ́ é gbɔn? Nɛ̌ yě ka sixú hɛn le wá nú mǐ gbɔn?

⁶ Ðo nǔɖɔɖayǐ Jowɛ́li tɔn mɛ ɔ, é ɖɔ dandannú gbɛmɛ tɔn ɖé lɛ́ ɖi nǔkún, vɛ̌ɛn kpó Olívumi kpó xó dó xlɛ́ ɖɔ Jexóva nɔ hun alɔ dó ná nǔ e sín hudó togun Tɔn ɖó é è, káká jɛ nǔɖuɖu gbigbɔ tɔn lɛ́ jí. (Jowɛ́. 2:21-24) É nɔ wa mɔ̌ gbɔn Biblu, wěma mǐtɔn lɛ́, tɛn Ɛntɛnɛ́ti tɔn mǐtɔn, gɔ́ nú kplé mǐtɔn lɛ́, kpléɖókpɔ́ lɛ̌dó tɔn lɛ́ kpó kpléɖókpɔ́ ɖaxó lɛ́ kpó gblamɛ. Mǐ sixú ɖu nǔ e é sɔ́ nǔ ná nú mǐ ɖo gbigbɔ lixo lɛ́ é sín vǐví gbe bǐ gbe, bɔ mɔ̌ mɛ ɔ, mǐ nɔ mɔ ɖɔ mǐ ɖu nǔ gɔ́ xo, bo nɔ lɛ́ mɔ ɖɔ è fá kɔ nú mǐ hú gǎn.

7. Étɛ́ ka nɔ zɔ́n bɔ mǐ nɔ mɔ ɖɔ “nǔ . . . nyɔ́ nú” mǐ? (Ezayíi 65:14)

⁷ Yě nɔ ɖó awǎjijɛ bɔ gbɛzán yětɔn nɔ lɛ́ jɛmɛ nú yě. Togun Mawu tɔn kpé wú bo “nɔ ɖo xó sú wɛ kpó awǎjijɛ kpó,” ɖó nǔ e Jexóva nɔ wa nú yě é nɔ su nukún yětɔn mɛ tawun wútu. (Xa Ezayíi 65:14.) Nǔgbó ɖěɖěe nɔ ná hlɔ̌nhlɔ́n nǔɖiɖi mɛtɔn lɛ́ é kpó akpá gbɔdónúmɛ tɔn e ɖo Xó Mawu tɔn mɛ lɛ́ é kpó, gɔ́ nú nukúnɖíɖó ɖeji d’é wú mǐtɔn e jínjɔ́n vɔ̌sísá gbɛxɔnúmɛ tɔn Klísu tɔn jí é nɔ zɔ́n bɔ mǐ nɔ mɔ ɖɔ “nǔ . . . nyɔ́ nú” mǐ. Xó ɖiɖɔ dó nǔ énɛ́ lɛ́ jí xá nɔví súnnu kpó nɔví nyɔ̌nu kpó mǐtɔn lɛ́ nɔ zɔ́n bɔ mǐ nɔ ɖó awǎjijɛ tawun!—Ðɛh. 34:9; 133:1-3.

8. Nǔ tají we tɛ́ lɛ́ ka nyí xlɛ̌ palaɖísi gbigbɔ tɔn ɔ tɔn?

⁸ Wǎnyíyí kpó bǔninɔ kpó e ɖo togun Jexóva tɔn mɛ é nyí palaɖísi gbigbɔ tɔn ɔ sín xlɛ̌ tají we. “Bǔ” énɛ́ e mǐ ɖe é nɔ d’alɔ mǐ bɔ mǐ nɔ dó nukún lěe gbɛ ná cí ɖo gbɛ yɔ̌yɔ́ ɔ mɛ é mɛ kpɔ́n, fínɛ́ ɔ, mɛsɛntɔ́ Jexóva tɔn lɛ́ ná ɖu  wǎnyíyí kpó bǔninɔ kpó e tlɛ syɛ́n hú gǎn égbé tɔn é sín vǐví. (Koló. 3:14) Nɔví nyɔ̌nu ɖé ɖɔ nǔ e wú é ɖó ayi ɖo togun Jexóva tɔn mɛ azɔn nukɔntɔn e é xo go yě é. É ɖɔ: “Un tuun lěe nyiɖésúnɔ ná ɖó awǎjijɛ alǒ tlɛ ɖó ɖo xwédo ce mɛ gbɔn é ɖ’ayǐ ǎ. Azɔn nukɔntɔn e un mɔ bɔ mɛ lɛ́ ɖo wǎnyíyí adodwé ɔ ɖe xlɛ́ yěɖée lɛ́ wɛ é wɛ nyí hwenu e un xo go Kúnnuɖetɔ́ Jexóva tɔn lɛ́ é.” Mɛ ɖěbǔ e ba ná ɖó awǎjijɛ jɔ awǎjijɛ kpó gbɛzán e jɛmɛ nú mɛ é kpó é ɖó ná ɖo palaɖísi gbigbɔ tɔn mǐtɔn mɛ. Mɛsɛntɔ́ Jexóva tɔn lɛ́ ɖó nyǐkɔ e wlí yɛ̌yi é, alǒ nyǐkɔ ɖagbe ɖé ɖo ta ɖo Jexóva kpó mɛ e nɔ sɛn ɛ lɛ́ é kpó nukɔn, ényí gbɛ ɔ ná bo nɔ lin nǔ ɖěbǔ dó yě wú ɔ nɛ́.—Eza. 65:15.

9. Akpá tɛ́ Ezayíi 65:16, 17 ka dó dó wǔvɛ́ gbɛ mɛ tɔn lɛ́ wú?

⁹ Yě nɔ vo bɔ è nɔ lɛ́ xo hwihwɛ́ yě. Ezayíi 65:14 ɖɔ ɖɔ mɛ ɖěɖěe wá gbeta ɔ kɔn bo ma ná byɔ́ palaɖísi gbigbɔ tɔn ɔ mɛ ǎ lɛ́ é ná nɔ “ɖo wǔvɛ́ mɔ wɛ bo ná ɖo xó sú wɛ. [Yě] ná dán ɖěwagbɔn bo ná ɖo alě ná wɛ.” Bɔ nǔ ɖěɖěe zɔ́n bɔ togun Mawu tɔn se wǔvɛ́ bo lɛ́ nɔ aluwɛ mɛ lɛ́ é ka lo? Gǔdo mɛ ɔ, nǔ énɛ́ lɛ́ ɔ, “è ná wɔn yě. Yě ná bú sín nukún [Mawu tɔn] mɛ.” (Xa Ezayíi 65:16, 17.) Jexóva ná ɖe tagba mǐtɔn lɛ́ síin, bɔ ɖo hwetɔnnu ɔ, wǔvɛ́ e nǔ énɛ́ lɛ́ flínflín nɔ ɖó nú mǐ é ná bú bǐ mlɛ́mlɛ́.

10. Étɛ́wú a ka nɔ mɔ ɖɔ nyɔ̌ná ɖé wɛ é nyí ɖɔ a ní ɖo kpɔ́ xá nɔví súnnu kpó nɔví nyɔ̌nu kpó towe lɛ́? (Kpɔ́n fɔtóo ɔ lɔmɔ̌.)

¹⁰ Din hwɛ̌ ɔ, kplé klisánwun tɔn mǐtɔn lɛ́ nɔ xo hwihwɛ́ mǐ. Ðo kplé énɛ́ lɛ́ domɛ ɔ, mǐ nɔ vo bo sɔ́ nɔ sɔ́ ayi ɖó adohu adohu e gbɛ nyanya élɔ́ nɔ ɖó nú mǐ lɛ́ é jí ǎ. Mǐ nɔ gɔ́ so nú lě do palaɖísi gbigbɔ tɔn mǐtɔn nɔ xo hwihwɛ́ mɛ sɔ é gbɔn jijɔ élɔ́ lɛ́ e ɖo sínsɛ́n gbigbɔ Mawu tɔn tɔn mɛ lɛ́ é ɖiɖe xlɛ́ gblamɛ: Wǎnyíyí, awǎjijɛ, fífá, xomɛnyínyɔ́ kpó xomɛfífá kpó. (Ga. 5:22, 23) Nyɔ̌ná ɖaxó wɛ é nyí nú mǐ ɖɔ mǐ ɖo tutoblónúnǔ Mawu tɔn mɛ! Mɛ ɖěɖěe ma ná gosín palaɖísi gbigbɔ tɔn ɔ mɛ ǎ lɛ́ é ná mɔ bɔ “jǐnukúnsin yɔ̌yɔ́” kpó “ayǐkúngban yɔ̌yɔ́” kpó sín akpá e Mawu dó é ná jɛnu bǐ mlɛ́mlɛ́.

11. Sɔgbe xá Ezayíi 65:18, 19 ɔ, nɛ̌ palaɖísi gbigbɔ tɔn e Jexóva ɖó ayǐ é ka nɔ hɛn le wá nú mǐ gbɔn?

¹¹ Nǔ nɔ su nukún yětɔn mɛ bɔ akpakpa nɔ lɛ́ sɔ́ yě. Ezayíi gbɛ kan d’é nu bo ɖɔ nǔ e wú mǐ ɖó hwɛjijɔ lɛ́ bǐ bɔ ‘xomɛ ná hun mǐ bɔ mǐ ná nɔ j’awǎ’ ɖo palaɖísi gbigbɔ tɔn ɔ mɛ é. Jexóva wɛ ɖó palaɖísi nǔjlɛ́dónǔwú tɔn énɛ́ ɔ ayǐ. (Xa Ezayíi 65:18, 19.) Hǔn, zǎn e zán mǐ wɛ é ɖe bo ɖo mɛ lɛ́ dɔn sín tutoblónúnǔ gbɛ xóxó élɔ́ tɔn lɛ́, éé ma nɔ kplɔ́n nǔgbó ɔ yě dó Mawu wú ǎ é mɛ, byɔ́ palaɖísi gbigbɔ tɔn ɖɛkpɛ ɖɛkpɛ mǐtɔn mɛ wɛ é sɔ́ nɔ kpácá mǐ ǎ!  Nyɔ̌ná ɖěɖěe sín vǐví mǐ nɔ ɖu ɖó mǐ ɖo nǔgbó ɔ mɛ wútu lɛ́ é nɔ sɔ́ akpakpa mǐ, bɔ énɛ́ nɔ sísɛ́ mǐ bɔ mǐ nɔ ɖɔ xó yětɔn nú mɛ ɖěvo lɛ́.—Jel. 31:12.

12. Nɛ̌ nǔ ka nɔ cí nú we dó akpá ɖěɖěe xó è ɖɔ ɖo Ezayíi 65:20-24 mɛ lɛ́ é wú? Aniwú?

¹² Nukúnɖíɖó e mǐ ɖó ɖó mǐ ɖo palaɖísi gbigbɔ tɔn ɔ mɛ wútu é nɔ lɛ́ su nukún mǐtɔn mɛ, bo nɔ sɔ́ akpakpa mǐ. Lin tamɛ dó nǔ tobutóbú e mǐ ná mɔ, bo ná lɛ́ wa ɖo gbɛ yɔ̌yɔ́ Mawu tɔn mɛ lɛ́ é jí! Biblu d’akpá ɖɔ: “Yɔkpɔ́vú ɖě sɔ́ ná flɛ́ kɛ́n ǎ. Degénɔ ɖě sɔ́ ná kú azǎn tɔn ma sɔgbe ǎ.” Mǐ ná “sá xwé bo nɔ ɛ mɛ. [Mǐ] ná tun vǐwun bo ná ɖu sínsɛ́n tɔn.” Mǐ “sɔ́ ná jɛ tagba dó wǔvɔ́ ɖě ǎ,” ɖó “mɛ e jí [Jexóva] xo ɖɛ dó lɛ́” é wɛ mǐ ná nyí. É dó gbɛ e mɛ ayijayǐ ɖe, jɛmɛ nú mɛ bo lɛ́ ɖó nu é sín akpá nú mǐ. “É ná sú jlǒ nǔ e ɖo gbɛ lɛ́ é bǐ tɔn sín do nú yě”; é ná ko tuun hudó yě mɛ ɖokpó ɖokpó tɔn, “[cóbɔ] yě ná ylɔ́” ɛ.—Eza. 65:20-24; Ðɛh. 145:16, nwt.

13. Nɛ̌ Ezayíi 65:25 ka tínmɛ hǔzúhúzú e mɛ lɛ́ nɔ bló ɖo gbɛzán yětɔn mɛ hwenu e yě jɛ Jexóva sɛn jí é gbɔn?

¹³ Yě ɖo fífá kpó ayijayǐ kpó mɛ. Kpó alɔdó gbigbɔ Mawu tɔn tɔn kpó ɔ, mɛ ɖěɖěe nɔ wa nǔ kanlin ɖɔhun ɖ’ayǐ lɛ́ é gěgé ko bló hǔzúhúzú nukúnɖéjí lɛ́ ɖo gbɛzán yětɔn mɛ. (Xa Ezayíi 65:25.) Yě ko w’azɔ̌ syɛ́nsyɛ́n bo jó jijɔ nyanya yětɔn lɛ́ dó. (Hlɔ̌. 12:2; Efɛ́. 4:22-24) É ɖo wɛn ɖɔ, togun Mawu tɔn kpo ɖo hwɛhutɔ́ nyí wɛ. Énɛ́ wú ɔ, mǐ ná kpo ɖo nǔ wa nyi do wɛ. É ɖo mɔ̌ có, Jexóva ko dɔn “gbɛtɔ́ alɔkpa lɛ́ bǐ ” ɖó bǔ; mɛ énɛ́ lɛ́ yí wǎn n’i, bo lɛ́ yí wǎn nú yěɖée lɛ́, bɔ énɛ́ zɔ́n bɔ yě ɖo fífá kpó bǔninɔ kpó adodwé ɔ sín vǐví ɖu wɛ. (Ti. 2:11) Mawu Nǔbǐwúkpétɔ́ ɔ kɛ́ɖɛ́ jɛ́n sixú bló nǔjíwǔ énɛ́!

14. Nɛ̌ nǔ e jɛ ɖo ninɔmɛ nɔví súnnu ɖokpó tɔn mɛ é ka xlɛ́ ɖɔ Ezayíi 65:25 nyí nǔgbó gbɔn?

¹⁴ Gbɛtɔ́ lɛ́ ka sixú húzú jijɔ nǔgbó a? Lin tamɛ dó kpɔ́ndéwú élɔ́ jí. Dɔ̌nkpɛvú e ɖó xwe 20 bɔ è ko wlí i dó gan mɛ azɔn mɔ̌kpán é ɖé nɔ zán gbɛ blíblí ɖésú, bo nɔ lɛ́ xo dǎka tawun. È wlí i dó gan mɛ ɖó mɔ̌to finfin, xwé mɛ lɛ́ tɔn gbe byɔ́byɔ́ gǎnnugǎnnu bo fin nǔ yětɔn kpó nǔ baɖabaɖa ɖěvo e é nɔ dó sin lɛ́ é kpó wú. É nɔ ɖo gbesisɔmɛ bo ná kpé hun xá mɛ ɖěbǔ. Hwenu e é se nǔgbó e ɖo Biblu mɛ é xó azɔn nukɔntɔn ɔ, bo jɛ kplé Kúnnuɖetɔ́ Jexóva tɔn lɛ́ tɔn lɛ́ yi jí é ɔ, é kú d’é jí ɖɔ émí mɔ nǔ e émí ná sɔ́ gbɛ émítɔn dó wa é, é wɛ nyí ɖɔ é ná sɛn Jexóva ɖo palaɖísi gbigbɔ tɔn ɔ mɛ. Ée é bló batɛ́mu bo húzú Kúnnuɖetɔ́ Jexóva tɔn gúdo é ɔ, é nɔ lin tamɛ dó lěe Ezayíi 65:25 jɛnu ɖo gbɛzán tɔn mɛ gbɔn é jí hwɛhwɛ. Éyɛ́ mɛ e cí kinnikínní ɖɔhun, bo nyí hunnylátɔ́ é cí lɛ̌ngbɔ́ ɖɔhun din bo nyí gbɛtɔ́ fífá.

15. Étɛ́wú mǐ ka nɔ jló ná ylɔ́ mɛ ɖěvo lɛ́ bónú yě ná xo kpóɖó nú mǐ ɖo palaɖísi gbigbɔ tɔn ɔ mɛ? Nɛ̌ mǐ ka sixú wa mɔ̌ gbɔn?

¹⁵ Ezayíi 65:13 bɛ́ gbɔn lě: “Xó e nyɛ Aklúnɔ [Jexóva] ɖɔ ɔ ɖíe.” Wěmafɔ 25​gɔ́ ɔ fó kpó xó élɔ́ lɛ́ kpó: “Xó e nyɛ [Jexóva] ɖɔ ɔ nɛ́.” Xó tɔn lɛ́ ka nɔ jɛnu hwebǐnu. (Eza. 55:10, 11) Palaɖísi gbigbɔ tɔn ɔ ko tíin din. Jexóva ko sɔ́ nǔ nú kplékplé nɔví lɛ́ tɔn e ma kpé we ǎ é ɖé. Ðó mǐ ɖo togun tɔn mɛ wútu ɔ, mǐ sixú nɔ fífá mɛ ɖó bǎ ɖé mɛ, bo lɛ́ ɖu ayijayǐ sín vǐví ɖo gbɛ e dǎkaxixo gɔ́ é ɖé mɛ. (Ðɛh. 72:7) Ðó hwɛjijɔ énɛ́ lɛ́ wútu ɔ, mǐ ba ná d’alɔ mɛ gěgé lěe é nyɔ́ bló gbɔn é, bónú yě ní xo kpóɖó nú mǐ ɖo kplékplé nɔví lɛ́ tɔn mǐtɔn mɛ. Mǐ sixú wa mɔ̌ gbɔn ayi sísɔ́ ɖó blóbló bónú mɛ lɛ́ ní húzú ahwanvú sín azɔ̌ ɔ jí gblamɛ.—Mat. 28:19, 20.

LĚE È SIXÚ DƆN MƐ ÐĚVO LƐ́ WÁ PALAÐÍSI GBIGBƆ TƆN Ɔ MƐ GBƆN É

16. Étɛ́ ka sixú d’alɔ mɛ lɛ́ bɔ yě ná ba ná wá palaɖísi gbigbɔ tɔn ɔ mɛ?

¹⁶ Mǐ mɛ ɖokpó ɖokpó ɖó azɔ̌ tají ɖé bo ná wa, bónú palaɖísi gbigbɔ tɔn ɔ ní dɔn mɛ ɖěvo lɛ́. Mǐ sixú kpé azɔ̌ énɛ́ wú bo wa, ényí  mǐ nɔ wa nǔ Jexóva ɖɔhun ɔ nɛ́. É nɔ dɔn mɛ lɛ́ wá tutoblónúnǔ tɔn mɛ gǎnnugǎnnu ǎ. É nyɔ́ wa ɔ, kpó xomɛnyínyɔ́ kpó wɛ é nɔ “dɔn” gbɛtɔ́ lɛ́. (Jaan 6:44; Jel. 31:3) Ényí gbɛtɔ́ ayijlɔ́jlɔ́nɔ lɛ́ kplɔ́n nǔ dó wǎnyíyí Jexóva tɔn kpó jijɔ tɔn e dɔn mɛ lɛ́ é kpó wú ɔ, énɛ́ nɔ dɔn yě jɛ́n wɛ. Nɛ̌ mǐ ka sixú dɔn mɛ lɛ́ wá palaɖísi gbigbɔ tɔn ɔ mɛ, gbɔn jijɔ ɖagbe mǐtɔn lɛ́ kpó walɔ ɖagbe mǐtɔn lɛ́ kpó gblamɛ gbɔn?

17. Nɛ̌ mǐ ka sixú dɔn mɛ ɖěvo lɛ́ wá palaɖísi gbigbɔ tɔn ɔ mɛ gbɔn?

¹⁷ Ali e nu mǐ sixú dɔn mɛ ɖěvo lɛ́ wá palaɖísi gbigbɔ tɔn ɔ mɛ ɖe é ɖokpó wɛ nyí gbɔn nǔ wiwa xá nǔɖitɔ́ hǎtɔ́ mǐtɔn lɛ́ kpó wǎnyíyí kpó, kpódó xomɛnyínyɔ́ kpán gblamɛ. Lěe nǔ cí nú nǔmaɖitɔ́ e ná ko nɔ yi kplé lɛ́ domɛ ɖo agun Kɔlɛ́nti hwexónu tɔn ɔ tɔn mɛ lɛ́ é ɔ, mɔ̌ wɛ mǐ ba ɖɔ nǔ ní nɔ cí nú mɛ yɔ̌yɔ́ ɖěɖěe nɔ wá kplé agun tɔn mǐtɔn lɛ́ domɛ lɛ́ é. Nǔmaɖitɔ́ énɛ́ lɛ́ ɖɔ: “Mawu ɖo tɛ́ntin mitɔn nǔgbó.” (1 Kɔ. 14:24, 25; Zak. 8:23) Énɛ́ wú ɔ, mǐ ɖó ná kpo ɖo wě e è ɖe xá mǐ ɖɔ mǐ “ní nɔ nɔ fífá mɛ xá [mǐɖée] lɛ́” é xwedó wɛ.—1 Tɛ. 5:13.

18. Étɛ́ ka sixú dɔn mɛ lɛ́ wá tutoblónúnǔ mǐtɔn mɛ?

¹⁸ Mǐ ɖó ná nɔ tɛ́n kpɔ́n hwebǐnu bo ná nɔ kpɔ́n nɔví súnnu kpó nɔví nyɔ̌nu kpó mǐtɔn lɛ́, lěe Jexóva nɔ kpɔ́n yě gbɔn é. Bo ná dó wa mɔ̌ ɔ, mǐ nɔ sɔ́ ayi ɖó jijɔ ɖagbe yětɔn lɛ́ jí, é nyí ɖó nǔwanyido yětɔn e ná wá bú lɛ́ é jí ǎ. Mǐ sixú ɖe ɖɛ gbemanɔkpɔ́ ɖěbǔ e nɔ fɔ́n ɖo tɛ́ntin mǐtɔn lɛ́ é kpó wǎnyíyí kpó, ényí mǐ “nɔ nyɔ́ xomɛ dó [mǐɖée] lɛ́ wú, bo nɔ ɖe nǔbláwǔkúnúmɛ e gɔ́ngɔ́n é xlɛ́, lobo nɔ sɔ́ hwɛ kɛ [mǐɖée] lɛ́ faa” hwebǐnu ɔ nɛ́. (Efɛ́. 4:32) Mɔ̌ mɛ ɔ, palaɖísi gbigbɔ tɔn ɔ ná dɔn mɛ ɖěɖěe nɔ ba ɖɔ è ní nɔ wa nǔ xá émí ɖo ali ɖokpó ɔ nu lɛ́ é. b

 CÍ PALAÐÍSI GBIGBƆ TƆN Ɔ MƐ

19. (a) Lěe gbǎví “ Yě gosín mɛ bo lɛ́ lɛ́ kɔ wá” ɔ xlɛ́ gbɔn é ɔ, étɛ́ mɛɖé lɛ́ ka ɖɔ hwenu e yě lɛ́ kɔ wá palaɖísi gbigbɔ tɔn ɔ mɛ gúdo é? (b) Étɛ́ mǐ ka ɖó ná kán ɖ’é jí bá wa? (Kpɔ́n ɖiɖe ɔ lɔmɔ̌.)

¹⁹ Palaɖísi gbigbɔ tɔn mǐtɔn xɔ akwɛ́ nú mǐ tawun. É nyɔ́ ɖɛkpɛ din hú ɖ’ayǐ tɔn, bɔ mɛsɛntɔ́ Jexóva tɔn gěgé lɛ́ ɖ’é mɛ din hú ɖ’ayǐ tɔn. Mi nú palaɖísi énɛ́ e Jexóva ɖó ayǐ nú mǐ é ní kpo ɖo nukún mǐtɔn mɛ su wɛ káká sɔ́yi. Mɛ ɖěbǔ e ba ná vo, ɖó awǎjijɛ, ba ɖɔ è ní xo hwihwɛ́ émí, bo lɛ́ ba ná nɔ ayijayǐ mɛ é ɖó ná byɔ́ palaɖísi gbigbɔ tɔn ɔ mɛ, bo ka ná gosín mɛ gbeɖé ǎ! Amɔ̌, mǐ ɖó ná ɖo acéjí, ɖó Satáan ɖo nǔ e wú é kpé é bǐ wa wɛ bo ná flú mǐ, bónú mǐ ná tɔ́n sín mɛ. (1 Pi. 5:8; Nǔɖe. 12:9) Mǐ ná jó è dó bɔ é ná ɖu ɖ’é jí ǎ. Mi nú mǐ ní dó gǎn syɛ́nsyɛ́n bo nya xɛ ɖo ɖɛkpɛ, mǐmɛ́ kpó fífá kpó palaɖísi gbigbɔ tɔn ɔ tɔn jí.