1. Nɛ̌ è ka bló tuto nú togun Jexóva tɔn ɖo xwe kanweko nukɔntɔn ɔ mɛ gbɔn?

 HWEÐÉBǓNU e Jexóva sɔ́ azɔ̌ ɖé d’así nú togun tɔn é ɔ, é nɔ ɖó nukún ɖɔ è ní wa kpó tuto kpó. (1 Kɔ. 14:33) Ði kpɔ́ndéwú ɔ, jlǒ Mawu tɔn wɛ nyí ɖɔ è ní jlá wɛn ɖagbe ɔ gbɔn ayǐkúngban ɔ bǐ jí. (Mat. 24:14) Jezu wɛ Jexóva sɔ́ ɖó azɔ̌ énɛ́ nu. Jezu nɔ tɛ́n kpɔ́n bo nɔ kú d’é jí ɖɔ è ɖo azɔ̌ énɛ́ wa wɛ kpó tuto kpó. Ðo xwe kanweko nukɔntɔn ɔ mɛ, hwenu e è ɖó agun lɛ́ ayǐ ɖo fí vovo lɛ́ é ɔ, è sɔ́ mɛxó agun tɔn lɛ́ bónú yě ná xlɛ́ ali mɛ lobo lɛ́ nɔ nukɔn nú nǔ lɛ́. (Mɛ. 14:23) Hǎgbɛ́ alixlɛ́mɛtɔ́ e ɖo Jeluzalɛ́mu bɔ mɛsɛ́dó lɛ́ kpó mɛxó agun tɔn ɖé lɛ́ kpó ɖ’é mɛ é wá gbeta ɖé lɛ́ kɔn bo ɖó nukún ɖɔ agun lɛ́ bǐ ná wa nǔ sɔgbe xá. (Mɛ. 15:2; 16:4) Ée agun lɛ́ se tónú nú wě e è ɖe xá yě lɛ́ é ɔ, yě “nɔ fɔ́n bo nɔ ɖo dǒ lí wɛ ɖo nǔɖiɖi mɛ, bɔ nǔɖitɔ́ lɛ́ sín kɛ́n nɔ ɖo jijɛjí wɛ.”—Mɛ. 16:5.

2. Sín 1919 ɔ, nɛ̌ Jexóva ka nɔ xlɛ́ ali togun tɔn, bo nɔ lɛ́ ná nǔɖuɖu gbigbɔ tɔn ɛ gbɔn?

² Égbé ɖésú ɔ, Jexóva kpo ɖo tuto bló nú togun tɔn wɛ. Sín 1919 ɔ, Jezu ɖo gbɛ̌ta kpɛví nɔví súnnu e gbigbɔ mímɛ́ sɔ́ lɛ́ é tɔn ɖé zán dó bló tuto nú wɛnɖagbejíjlázɔ́ ɔ wɛ, bo nɔ lɛ́ zán yě dó ná nǔɖuɖu gbigbɔ tɔn ahwanvú tɔn lɛ́. a (Luk. 12:42) É ɖo wɛn ɖɔ, Jexóva ɖo nyɔ̌ná kɔn dó azɔ̌ gbɛ̌ta énɛ́ tɔn jí wɛ.—Eza. 60:22; 65:13, 14.

3-4. (a) Nǎ kpɔ́ndéwú lěe mǐ nɔ ɖu le tuto e è bló nú mǐ é tɔn gbɔn é tɔn ɖokpó. (b) Étɛ́ lɛ́ mǐ ka ná gbéjé kpɔ́n ɖo xóta élɔ́ mɛ?

 ³ Ényí ɖɔ è ma ko bló tuto nú mǐ wɛ ǎ ɔ, mǐ ná kpé wú bo wa azɔ̌ e Jezu zɔ́n mǐ ɖɔ mǐ ní wa é ǎ. (Mat. 28:19, 20) Ði kpɔ́ndéwú ɔ, ényí nɔví lɛ́ ma bló tuto nú mǐ bónú mǐ ná jlá wɛn ɖagbe ɔ gbɔn fí e è ɖe nú agun mǐtɔn lɛ́ é bǐ ǎ ɔ, fí ɖé jló mɛɖé kpowun ɔ, é sixú nɔ jlá wɛn ɖagbe ɔ gbɔn. Wɛnjlátɔ́ vovo lɛ́ sixú nɔ ɖɔ mawuxó gbɔn xá ɖé lɛ́ mɛ azɔn mɔ̌kpán có, xá ɖěvo lɛ́ mɛ ka sixú tíin bɔ è wɔn ya ná bǐ gbídígbídí. A ka sixú lin tamɛ dó ali ɖěvo ɖěɖěe nu mǐ nɔ ɖu le tuto e è bló nú mǐ é tɔn ɖe lɛ́ é jí a?

⁴ Lěe Jezu bló tuto nú ahwanvú tɔn lɛ́ gbɔn hwenu e é ɖo ayǐkúngban jí é ɔ, mɔ̌ wɛ é kpo ɖo tuto bló nú togun Mawu tɔn wɛ gbɔn ɖo égbé. Ðo xóta élɔ́ mɛ ɔ, mǐ ná gbéjé kpɔ́ndéwú e Jezu sɔ́ ɖ’ayǐ é kpó lěe tutoblónúnǔ mǐtɔn nɔ xwedó kpɔ́ndéwú énɛ́ gbɔn é kpó kpɔ́n. Mǐ ná lɛ́ ɖɔ xó dó lěe mǐ sixú ɖe xlɛ́ ɖɔ mǐ nɔ ɖe sísí xlɛ́ tutoblónúnǔ Jexóva tɔn, bɔ é nɔ lɛ́ xɔ akwɛ́ ɖo nukún mǐtɔn mɛ hwebǐnu gbɔn é jí.

TUTOBLÓNÚNǓ MǏTƆN NƆ XWEDÓ KPƆ́NDÉWÚ JEZU TƆN

5. Nǎ kpɔ́ndéwú ali e nu tutoblónúnǔ mǐtɔn nɔ xwedó kpɔ́ndéwú Jezu tɔn ɖe é tɔn ɖokpó. (Jaan 8:28)

⁵ Nǔ e Jezu wa lɛ́ é kpó nǔ e é ɖɔ lɛ́ é kpó ɔ, Tɔ́ tɔn jǐxwé tɔn ɔ gɔ́n wɛ é kplɔ́n ɖe. Tutoblónúnǔ Jexóva tɔn nɔ xwedó kpɔ́ndéwú Jezu tɔn, bo nɔ sɔ́ nǔ e é nɔ kplɔ́n mɛ dó walɔ ɖagbe wú lɛ́ é kpó ali e é nɔ xlɛ́ mɛ lɛ́ é kpó jínjɔ́n Xó Mawu tɔn jí. (Xa Jaan 8:28; 2 Tim. 3:16, 17) È nɔ flín mǐ hwɛhwɛ ɖɔ mǐ ní nɔ xa Xó Mawu tɔn, bo nɔ lɛ́ zán nǔ e mǐ kplɔ́n lɛ́ é. Ényí mǐ nɔ xwedó wě énɛ́ e è nɔ ɖe xá mǐ é ɔ, nɛ̌ mǐ ka nɔ ɖu le tɔn gbɔn?

6. Ðɔ ali tají e nu mǐ nɔ ɖu le Biblu kplɔ́nkplɔ́n tɔn ɖe é ɖokpó.

⁶ Nú mǐ nɔ zán wěma mǐtɔn lɛ́ dó kplɔ́n Biblu ɔ, mǐ nɔ ɖu le tɔn tawun. Ði kpɔ́ndéwú ɔ, mǐ nɔ kpé wú bo nɔ jlɛ́ nǔkplɔ́nmɛ Biblu tɔn lɛ́ dó ali e xlɛ́ mǐ wɛ tutoblónúnǔ ɔ ɖe é wú. Ényí mǐ mɔ ɖɔ ali e xlɛ́ mǐ wɛ tutoblónúnǔ Jexóva tɔn ɖe é jínjɔ́n Mawuxówéma ɔ jí ɔ, jiɖe e mǐ ɖó dó tutoblónúnǔ ɔ wú é nɔ lɛ́ jɛjí.—Hlɔ̌. 12:2.

7. Wɛn tɛ́ Jezu ka jlá? Nɛ̌ tutoblónúnǔ Jexóva tɔn ka nɔ xwedó kpɔ́ndéwú tɔn gbɔn?

⁷ Jezu jlá “wɛn ɖagbe Axɔ́súɖuto Mawu tɔn tɔn.” (Luk. 4:43, 44) Gɔ́ ná ɔ, Jezu ɖe gbe nú ahwanvú tɔn lɛ́ ɖɔ yě ní jlá wɛn ɖagbe Axɔ́súɖuto ɔ tɔn. (Luk. 9:1, 2; 10:8, 9) Égbé ɔ, mɛ e nyí wɛnjlátɔ́ ɖo tutoblónúnǔ Jexóva tɔn mɛ lɛ́ é bǐ wɛ nɔ jlá wɛn ɖagbe Axɔ́súɖuto ɔ tɔn, ényí yě ná bo nɔ nɔ fí ɖěbǔ, alǒ ényí yě ná bo ɖó wǔjɔmɛzɔ́ nabí ɖěbǔ ɔ nɛ́.

8. Wǔ tɛ́ è ka jɔ mǐ?

⁸ Wǔjɔmɛ ɖé wɛ é nyí nú mǐ ɖɔ mǐ ní má nǔgbó e kunkplá Axɔ́súɖuto Mawu tɔn é xá mɛ ɖěvo lɛ́! Mɛ bǐ wɛ è jɔ wǔ énɛ́ ǎ. Ði kpɔ́ndéwú ɔ, hwenu e Jezu ɖo ayǐkúngban jí é ɔ, é yí gbe nú awǒvi lɛ́ ɖe kúnnu dó wǔ tɔn ǎ. (Luk. 4:41) Égbé ɔ, cóbónú mɛɖé ná nɔ ɖ’alɔ ɖo sinsɛnzɔ́ ɔ mɛ xá togun Jexóva tɔn ɔ, mɛ ɔ ɖó ná to jɛxá wǔjɔmɛzɔ́ énɛ́ hwɛ̌. Ényí mǐ nɔ jlá wɛn ɖagbe ɔ ɖo fí ɖěbǔ, lobo nɔ lɛ́ wa mɔ̌ hweɖébǔnu lěe mǐ kpé wú gbɔn é hǔn, lě do wǔ e è jɔ mǐ bɔ mǐ ná jlá wɛn ɖagbe ɔ é su nukún mǐtɔn mɛ sɔ é ɖe xlɛ́ wɛ mǐ ɖe mɔ̌ nɛ́. Jezu ɖɔhun ɔ, nǔ e gbé nya wɛ mǐ ɖe é wɛ nyí ɖɔ mǐ ná dó kwín nǔgbó Axɔ́súɖuto ɔ tɔn lɛ́ dó ayi mɛ lɛ́ tɔn mɛ, lobo lɛ́ hú sin nú yě.—Mat. 13:3, 23; 1 Kɔ. 3:6.

9. Nɛ̌ tutoblónúnǔ ɔ ka nɔ bló bɔ mɛ ɖěvo lɛ́ nɔ tuun nyǐkɔ Mawu tɔn gbɔn?

⁹ Jezu bló bɔ è tuun nyǐkɔ Mawu tɔn. Ðo ɖɛ e Jezu xo sɛ́dó Tɔ́ tɔn jǐxwé tɔn ɔ é ɖé mɛ ɔ, é ɖɔ: “Un bló bɔ yě tuun nyǐkɔ towe.” (Jaan 17:26) Tutoblónúnǔ Jexóva tɔn nɔ xwedó kpɔ́ndéwú Jezu tɔn, bo nɔ wa nǔ e wú é kpé é bǐ dó d’alɔ  mɛ ɖěvo lɛ́ bɔ yě nɔ kplɔ́n bo nɔ tuun nyǐkɔ Mawu tɔn. Biblu gbɛ yɔ̌yɔ́ ɔ tɔn wa azɔ̌ tají ɖé ɖo akpá énɛ́ ɔ xwé, gbɔn nyǐkɔ Mawu tɔn sísɔ́ ɖó fí e jɛxá lɛ́ é gblamɛ. Biblu énɛ́ blěbú, alǒ akpáxwé tɔn ɖé ko tíin din dó gbe 270 jɛjí mɛ. Mɔjɛmɛ ɖěvo lɛ́ A4 kpó A5 kpó e ɖo Biblu énɛ́ mɛ é ná tínmɛ ɖé lɛ́ dó lěe è lɛ́vɔ́ sɔ́ nyǐkɔ Mawu tɔn ɖó tɛn tɔn mɛ ɖo Biblu mɛ gbɔn é wú. Kúnnuɖenú gěgé ɖo Mɔjɛmɛ ɖěvo lɛ́ C éé tɔ́n ɖo Biblu nǔkplɔ́nkplɔ́n tɔn mɛ é mɛ, bo xlɛ́ ɖɔ nyǐkɔ Mawu tɔn ɖó ná tɔ́n ɖo akpáxwé Nǔwlánwlán mímɛ́ lɛ́ tɔn e ɖo Glɛ̌kigbe mɛ é mɛ azɔn 237.

10. Étɛ́ nǔ e nǎwe e nɔ nɔ Birmanie é ɖé ɖɔ é ka kplɔ́n we?

¹⁰ Jezu ɖɔhun ɔ, mǐ ba ná d’alɔ mɛ gěgé lěe mǐ kpé wú gbɔn é bɔ yě ná kplɔ́n bo tuun nyǐkɔ Mawu tɔn. Ée nǎwe e ɖó xwe 67, bo nɔ nɔ Birmanie é ɖé kplɔ́n ɖɔ Mawu ɖó nyǐkɔ é ɔ, ɖasin wá yi dó è, b’ɛ ɖɔ: “Azɔn nukɔntɔn e un se ɖo gbɛzán ce mɛ ɖɔ nyǐkɔ Mawu tɔn nɔ nyí Jexóva é ɖíe. . . . A kplɔ́n mì nǔ e ɖo tají hú gǎn, bɔ un ma sixú kpé wú bo kplɔ́n kpɔ́n ǎ é.” Lěe tan énɛ́ xlɛ́ gbɔn é ɔ, nyǐkɔ Mawu tɔn kplɔ́nkplɔ́n sixú húzú gbɛzán mɛ lɛ́ tɔn.

KPO ÐO XLƐ́XLƐ́ WƐ ÐƆ ÉMÍ NƆ ÐÓ SÍSÍ NÚ TUTOBLÓNÚNǓ MǏTƆN, LOBO NƆ LƐ́ ÐEJI DÓ WǓ TƆN

11. Nɛ̌ mɛxó agun tɔn lɛ́ ka sixú nɔ ɖe xlɛ́ ɖɔ émí nɔ ɖó sísí nú tutoblónúnǔ Jexóva tɔn, lobo nɔ lɛ́ ɖeji dó wǔ tɔn gbɔn? (Kpɔ́n fɔtóo ɔ lɔmɔ̌.)

¹¹ Ali tɛ́ nu mɔ̌ mɛxó agun tɔn lɛ́ ka sixú nɔ ɖe xlɛ́ ɖɔ émí nɔ ɖó sísí nú tutoblónúnǔ Mawu tɔn, lobo nɔ lɛ́ ɖeji dó wǔ tɔn ɖe? Ényí è sɛ́ wěma ɖé dó mɛxó agun tɔn lɛ́ bónú wěɖexámɛ lɛ́ ɖ’é mɛ ɔ, é byɔ́ ɖɔ yě ná nɔ xa kpó sɔxwixwe kpó, bɔ énɛ́ gúdo ɔ, yě ná zán lěe yě kpé wú gbɔn é bǐ. Ði kpɔ́ndéwú ɔ, è nɔ ɖe wě xá yě dó lěe yě ná kpé nukún dó kplé sín akpáxwé vovo lɛ́ wú, xo ɖɛ ɖo kplé lɛ́ jí, lobo lɛ́ kpé nukún dó lɛ̌ngbɔ́ Klísu tɔn lɛ́ wú gbɔn é wú. Ényí mɛxó agun tɔn lɛ́ nɔ xwedó wě e tutoblónúnǔ ɔ nɔ ɖe xá yě lɛ́ é bǐ ɔ, nɔví súnnu lɛ́ kpó nɔví nyɔ̌nu lɛ́ kpó nɔ mɔ ɖɔ Jexóva yí wǎn nú émí, bo nɔ lɛ́ kpé nukún dó émí wú.

12. (a) Étɛ́wú mǐ ka ɖó ná nɔ wa nǔ alɔ ɖ’alɔ mɛ xá mɛ e ɖo nukɔn nú nǔ lɛ́ é? (Eblée lɛ́ 13:7, 17) (b) Étɛ́wú mǐ ka ɖó ná nɔ sɔ́ ayi ɖó jijɔ ɖagbe mɛ e ɖo nukɔn nú mǐ lɛ́ é tɔn jí?

¹² Ényí mɛxó agun tɔn lɛ́ ɖe wě xá mǐ ɔ, mǐ ɖó ná xwedó kpó jlǒ kpó. Ényí mǐ nɔ wa mɔ̌ ɔ, mǐ ná bló bɔ é ná bɔ wǔ nú mɛ ɖěɖěe ɖo nukɔn nú nǔ lɛ́ é hú gǎn bɔ yě ná wa azɔ̌ yětɔn ganjí. Biblu dó wǔsyɛ́n lanmɛ nú mǐ ɖɔ mǐ ní nɔ se tónú nú mɛ ɖěɖěe ɖo nukɔn nú mǐ lɛ́ é, lobo nɔ lɛ́ hwihwɛ́ mǐɖée dó glɔ̌ yětɔn. (Xa Eblée lɛ́ 13:7, 17.) Énɛ́ ka sixú vɛ́ wǔ hweɖélɛ́nu. Aniwú? Ðó súnnu énɛ́ lɛ́ nyí mɛ maɖóblɔ̌ ǎ. Amɔ̌, ényí mǐ nɔ sɔ́ ayi ɖó jijɔ yětɔn nyanya lɛ́ jí, b’ɛ ma nɔ nyí ɖó ɖagbe lɛ́ jí ǎ ɔ, é ɖo wɛn ɖɔ mǐ ná húzú alɔgɔ́tɔ́ nú kɛntɔ́ mǐtɔn lɛ́. Ðo ali tɛ́ nu? Jiɖe e mǐ nɔ ɖó dó tutoblónúnǔ Mawu tɔn wú é ná vɔ́ da, nǔ e ba wɛ kɛntɔ́ mǐtɔn lɛ́ ka ɖe é nɛ́. Nǔ tají tɛ́ lɛ́ mɔ̌ mǐ ka sixú wa, bo ná nɔ ɖ’ayi adingban e kɛntɔ́ mǐtɔn lɛ́ nɔ ɖo fúnfúnfúnfún kpé wɛ lɛ́ é wú, lobo lɛ́ nyi alɔ nú yě?

MA LƆN NÚ MƐ ÐĚVO LƐ́ VƆ́ DA NÚ JIÐE E A ÐÓ DÓ TUTOBLÓNÚNǓ Ɔ WÚ É Ó

13. Nɛ̌ kɛntɔ́ Mawu tɔn lɛ́ ka nɔ tɛ́n kpɔ́n bo ná bló bɔ è ná nɔ ɖó linlin agɔ dó tutoblónúnǔ Mawu tɔn wú gbɔn?

¹³ Kɛntɔ́ Mawu tɔn lɛ́ nɔ tɛ́n kpɔ́n bo ná bló bɔ nǔ ɖagbe e wa wɛ tutoblónúnǔ Jexóva tɔn ɖe lɛ́ é ná cí nǔ nyanya ɖɔhun ɖo nukún mǐtɔn mɛ. Ði kpɔ́ndéwú ɔ, mǐ kplɔ́n ɖo Biblu mɛ ɖɔ Jexóva nɔ ɖó nukún ɖɔ mɛsɛntɔ́ émítɔn lɛ́ ní mɛ́ ɖo agbaza, walɔ kpó gbigbɔ kpó lixo. É byɔ́ ɖɔ è ní nɔ ɖe mɛ ɖěbǔ e nɔ ɖo gbɛ blíblí zán wɛ, bo gbɛ́ kɔ lɛ́ sín hwɛ tɔn lɛ́ gúdo é sín agun ɔ mɛ. (1 Kɔ. 5:11-13; 6:9, 10) Mǐ nɔ se tónú nú gbeɖiɖe énɛ́ e ɖo Mawuxówéma ɔ mɛ é. Amɔ̌, gbeklánxámɛtɔ́ mǐtɔn lɛ́ nɔ tɛ́n kpɔ́n bo nɔ zɔn  dó énɛ́ jí bo nɔ dó hwɛ mǐ ɖɔ mǐ nɔ hɛn nǔ gángángán, nɔ ɖɔ hwɛ xá mɛ ɖěvo lɛ́, lobo kún nɔ lɛ́ yí wǎn nú mɛ ó.

14. Mɛ̌ ka ɖo gǔdo nú xɛxó e è nɔ ɖɔ dó tutoblónúnǔ ɔ wú lɛ́ é?

¹⁴ Mɔ nǔ jɛ mɛ e ɖo ahwan tɔ́n mǐ wɛ tawun é wú. Satáan Awǒvi wɛ ɖo gǔdo nú xɛxó énɛ́ lɛ́. É ‘wɛ dó adingban wá.’ (Jaan 8:44; Bǐb. 3:1-5) Énɛ́ wú ɔ, mǐ ɖó ná nɔ ɖó nukún ɖɔ Satáan ná nɔ zán mɛ e nɔ nɔ gǔdo n’i lɛ́ é bónú yě ná fúnfún adingbanxó lɛ́ kpé dó tutoblónúnǔ Jexóva tɔn wú. Énɛ́ jɛ wě ɖo xwe kanweko nukɔntɔn ɔ mɛ.

15. Étɛ́ sinsɛngán lɛ́ ka wa nú Jezu kpó ahwanvú tɔn lɛ́ kpó?

¹⁵ Ðo xwe kanweko nukɔntɔn ɔ mɛ ɔ, Satáan zán mɛ ɖěɖěe ɖo gǔdo n’i lɛ́ é dó ɖó adingban ɖě jɛ ɖě gúdo dó nǔjíwǔ e Vǐ Mawu tɔn bló bɔ xó ɖě ma ɖ’é wú ǎ lɛ́ é wú. Ði kpɔ́ndéwú ɔ, sinsɛngán lɛ́ ɖɔ nú mɛ lɛ́ ɖɔ acɛ e Jezu ɖó bo nɔ nya awǒvi lɛ́ ná é ɔ, “awǒvi lɛ́ sín gǎn” wɛ ná ɛ. (Mak. 3:22) Hwenu e Jezu ɖo wǔvɛ́ mɛ é ɔ, sinsɛngán lɛ́ dó hwɛ ɛ ɖɔ é nyí nunyládómawuwútɔ́, bo sísɛ́ ahwan ɔ bónú yě ná byɔ́ kú tɔn. (Mat. 27:20) Nukɔnmɛ ɔ, ée ahwanvú Klísu tɔn lɛ́ ɖo wɛn ɖagbe ɔ jlá wɛ é ɔ, mɛ e klán gbe xá yě lɛ́ é ‘fɔ́n mɛ lɛ́ dó jǐ’ nú klisánwun énɛ́ lɛ́, bónú yě lɔ ná wa nǔ ɖokpó ɔ. (Mɛ. 14:2, 19) Atɔxwɛ (Gungbe) 1^er décembre 1998 tɔn tínmɛ nǔ élɔ́ dó Mɛsɛ́dó 14:2 wú: “Mɛ e ɖo gǔdo nú Satáan lɛ́ é gbɛ́ wɛn e jlá wɛ klisánwun lɛ́ ɖe é, bo lɛ́ ɖɔ nǔ masɔgbe lɛ́ dó yě wú bónú mɛ lɛ́ ní ma ɖótó yě ó, lobo lɛ́ gbɛ́ wǎn nú yě.”

16. Ényí mǐ se xɛxó lɛ́ ɔ, étɛ́ mǐ ka ɖó ná nɔ flín?

¹⁶ Satáan ɖó adingban ɖíɖó te ɖo xwe kanweko nukɔntɔn ɔ mɛ ǎ. Égbé ɔ, é kpo ɖo “ayǐkúngban ɔ bǐ flú wɛ.” (Nǔɖe. 12:9) Ényí a se adingbanxó lɛ́ dó tutoblónúnǔ ɔ, alǒ nɔví e ɖo nukɔn nú nǔ lɛ́ é wú hǔn, nɔ flín lěe kɛntɔ́  Mawu tɔn lɛ́ wa nǔ xá Jezu kpó ahwanvú xwe kanweko nukɔntɔn ɔ tɔn lɛ́ kpó gbɔn é. Égbé ɔ, è ɖo ya dó nú togun Jexóva tɔn wɛ, bo lɛ́ ɖo adingban baɖabaɖa lɛ́ ɖó dó kɔ n’i wɛ lěe Biblu ɖɔ ɖ’ayǐ gbɔn é pɛ́pɛ́pɛ́. (Mat. 5:11, 12) Ényí mǐ tuun fí e xɛxó lɛ́ gosín é, bo lɛ́ yá wǔ wa nǔ ɔ, yě ná dɔn mǐ yi bú ǎ. Afɔ tɛ́ mǐ ka ɖó ná ɖe?

17. Nɛ̌ mǐ ka sixú nyi alɔ nú xɛxó lɛ́ gbɔn, bɔ yě ma ná wa nǔ dó mǐ wú ǎ? (2 Timɔtée 1:13) (Kpɔ́n gbǎví “ Lěe è sixú wa nǔ gbɔn ɖo xɛxó lɛ́ nukɔn é” lɔmɔ̌)

¹⁷ Nɔ nyi alɔ nú xɛxó lɛ́. Mɛsɛ́dó Pɔ́lu ɖe wě e za wě lɛ́ é xá mǐ dó nǔ e mǐ ná wa hwenu e mǐ wá se xɛxó lɛ́ é wú. É ɖɔ nú Timɔtée ɖɔ é ní ‘ɖe gbe nú mɛɖé lɛ́ ɖɔ yě ní ma nɔ sɔ́ ayi ɖó xɛxó lɛ́ jí ó,’ bo nɔ “hɔn nú xɛxó e nɔ kɔn cí dó nǔ mímɛ́ lɛ́ wú lɛ́ é.” (1 Tim. 1:3, 4; 4:7) Nǔgbó wɛ ɖɔ yɔkpɔ́vú e ma ɖó nǔnywɛ́ ǎ é ɖé sixú sɔ́ nǔɖé ɖo kɔ́mɛ, bo sɔ́ dó nu, amɔ̌ mɛ e zin, bo mɔ nukúnnú jɛ awǒvinú e ɖ’é mɛ é wú é ná wa mɔ̌ gbeɖé ǎ. Mǐ nɔ nyi alɔ nú xɛxó lɛ́, ɖó mǐ tuun fí e yě nɔ gosín é. “Xó ɖagbe” nǔgbó ɔ tɔn lɛ́ kɛ́ɖɛ́ wɛ mǐ nɔ ɖótó.—Xa 2 Timɔtée 1:13.

18. Nɛ̌ mǐ ka sixú nɔ ɖe xlɛ́ ɖɔ mǐ nɔ ɖeji dó tutoblónúnǔ Jexóva tɔn wú gbɔn?

¹⁸ Ali ɖěɖěe nu tutoblónúnǔ Mawu tɔn nɔ xwedó kpɔ́ndéwú Jezu tɔn ɖe lɛ́ é atɔn kpowun jɛ́n mǐ gbéjé kpɔ́n. Ée a ná ɖo Biblu kplɔ́n wɛ é ɔ, nɔ ɖ’ayi ali ɖěvo e nu tutoblónúnǔ ɔ nɔ xwedó kpɔ́ndéwú Jezu tɔn ɖe lɛ́ é wú. Nɔ d’alɔ mɛ ɖěvo lɛ́ ɖo agun towe mɛ bónú yě ní nɔ jiɖe dó tutoblónúnǔ ɔ wú hú gǎn. Gɔ́ ná ɔ, kpo ɖo jiɖe e a ɖó dó tutoblónúnǔ ɔ wú é ɖe xlɛ́ wɛ, gbɔn nǔ élɔ́ lɛ́ wiwa gblamɛ: Jexóva sinsɛn kpó gbejíninɔ kpó, gɔ́ nú tutoblónúnǔ e é nɔ zán dó wa jlǒ tɔn é wú títɛ́dó. (Ðɛh. 37:28) Mi nú wǔ e è jɔ mǐ bɔ mǐ ɖo bǔ ɖo togun Jexóva tɔn e mɛ wǎnyíyí kpó gbejíninɔ kpó gɔ́ é mɛ é ní kpo ɖo nukún mǐtɔn mɛ su wɛ.