1-2. Étɛ́ mɛɖé ka ɖó ná wa cóbó bló batɛ́mu?

 ÐO XWE atɔ́ɔ́n e wá yi lɛ́ é vlamɛ ɔ, mɛ lǐvi ɖokpó jɛjí wɛ bló batɛ́mu, bo húzú Kúnnuɖetɔ́ Jexóva tɔn. Yě mɛ gěgé tíin bɔ “sín hwenu e [yě] ɖo vǔ é” wɛ è ko kplɔ́n nǔgbó ɔ yě, ahwanvú xwe kanweko nukɔntɔn ɔ tɔn Timɔtée ɖɔhun. (2 Tim. 3:14, 15) Mɛ ɖěvo lɛ́ ko nyí mɛxó cóbó kplɔ́n nǔ dó Jexóva wú; kpo wɛ mɛ ɖěvo lɛ́ ka kpo cóbó wa mɔ̌. É ko bló xwe nabí ɖé din bɔ nyɔ̌nu mɛxómɔ ɖokpó kplɔ́n Biblu xá Kúnnuɖetɔ́ Jexóva tɔn lɛ́, bo bló batɛ́mu hwenu e é ɖó xwe 97 é.

² Ényí Biblu kplɔ́n wɛ a ɖe, alǒ agun ɔ mɛ wɛ è ji we dó ɔ, a ka ɖo linlin wɛ bo ná bló batɛ́mu a? Nǔ ɖagbe e gbé a sixú nya é nɛ́! Amɔ̌, cóbónú a ná bló batɛ́mu ɔ, é ná byɔ́ ɖɔ a ní zé hwiɖée jó nú Jexóva. Xóta élɔ́ ná tínmɛ nǔ e mɛɖée zízé jó nú Jexóva nɔ byɔ́ lɛ́ é. É ná lɛ́ d’alɔ we bɔ a ná mɔ nǔ e wú a ma ɖó ná ɖó nǎ nǎ nú afɔ énɛ́ ɖiɖe ǎ, bɔ hwenu e a ná ɖo gbesisɔmɛ é ɔ, a ná bló batɛ́mu é.

NǓ E È NÍ ZÉ MƐÐÉE JÓ NÚ JEXÓVA NYÍ É

3. Nǎ kpɔ́ndéwú mɛ e xó Biblu ɖɔ bɔ yě zé yěɖée jó nú Jexóva é tɔn ɖé lɛ́.

³ Ðo Biblu mɛ ɔ, mɛ e è sɔ́, alǒ ɖe ɖó vo nú nǔ bǔnɔ ɖé é wɛ mɛ e zé éɖée jó nú Jexóva é nyí. Izlayɛ́li ví lɛ́ ɔ, akɔta ɖeɖóvo Jexóva tɔn wɛ yě nyí. Amɔ̌, mɛɖé lɛ́ ɖo akɔta ɔ mɛ bo zé yěɖée jó nú Jexóva ɖo ali bǔnɔ ɖé nu. Ði kpɔ́ndéwú ɔ, Aalɔ́ɔn nɔ dó nǔ e xlɛ́ ɖɔ è ‘ɖe è ɖó vo nú Jexóva’ é; sikágan gbajagbaja e ɖo tablá tɔn wú ɖo nukɔn, bo nɔ ɖo sísɛ́ wɛ é wɛ. Sikágan gbajagbaja énɛ́ xlɛ́ ɖɔ è sɔ́ ɛ bónú é ná sɛn Jexóva ɖo ali bǔnɔ ɖé nu, énɛ́ wɛ nyí ɖɔ é ná nyí vɔ̌sánúxwlémawutɔ́  ɖaxó ɖo Izlayɛ́li. (Lev. 8:9) Nazilínu lɛ́ lɔmɔ̌ ɔ, mɛ e è ɖe ɖó vo nú Jexóva ɖo ali bǔnɔ ɖé nu é wɛ yě nyí. Xókwín Ebléegbe tɔn nazir e tínmɛ tɔn nyí “sɔ́ ɖó vo,” alǒ “ɖe ɖó vo” é mɛ wɛ xókwín “Nazilínu” ɔ gosín. Nazilínu lɛ́ ɖó ná se tónú nú sɛ́n bǔnɔ e è dó nú yě, bɔ è wlán dó Mɔyízisɛ́n ɔ mɛ lɛ́ é.—Kɛ́n. 6:2-8.

4. (a) Ényí a zé hwiɖée jó nú Jexóva ɔ, étɛ́ ka nɔ húzú nǔ e ɖo tají hú gǎn é nú we? (b) Étɛ́ ka nyí tínmɛ ‘è ní gbɛ́ mɛɖée’ tɔn? (Kpɔ́n fɔtóo ɔ lɔmɔ̌.)

⁴ Ényí a zé hwiɖée jó nú Jexóva ɔ, gbeta ɔ kɔn wɛ a wá ɖɔ émí ná húzú ahwanvú Jezu Klísu tɔn, bo ná sɔ́ jlǒ Mawu tɔn wiwa dó ɖó nǔ e ɖo tají hú gǎn é ɖo gbɛzán émítɔn mɛ nɛ́. Étɛ́ mɔ̌ wiwa ka ná byɔ́ ɖo así we? Jezu ɖɔ: “Ényí mɛɖé jló ná xwedó mì hǔn, é ní gbɛ́ éɖée.” (Mat. 16:24) Xógbe Glɛ̌kigbe tɔn e è tínmɛ bɔ é nyí “é ní gbɛ́ éɖée” é ɔ, è sixú lɛ́ tínmɛ bɔ é ná nyí “é ní ma sɔ́ nɔ gbɛ nú éɖée ó.” Ðó a nyí mɛsɛntɔ́ Jexóva tɔn e sɔ́ éɖée jó n’i é wútu ɔ, a ɖó ná gbɛ́ nǔ e ma nɔ nyɔ́ nukún tɔn mɛ ǎ lɛ́ é bǐ. (2 Kɔ. 5:14, 15) Énɛ́ nɔ byɔ́ ɖɔ è ní gbɛ́ “hwɛhuhu gbaza sín nǔwiwa lɛ́,” ɖi nǔblíblíwiwa mɔ̌. (Ga. 5:19-21; 1 Kɔ. 6:18) Tónú sise nú sɛ́n énɛ́ lɛ́ ka ná zɔ́n bɔ gbɛ ná vɛ́ wǔ nú we wɛ a? Wǎn jɛ́n a yí nú Jexóva bo kú d’é jí ɖɔ ɖagbe towe wú wɛ é dó sɛ́n tɔn lɛ́ ɔ, a ná mɔ mɔ̌ ǎ. (Ðɛh. 119:97; Eza. 48:17, 18) Nɔví súnnu e nɔ nyí Nicholas é ɖɔ: “A sixú kpɔ́n nǔgbódodó Jexóva tɔn lɛ́ dó mɔ gankpá e glɔ́n ali nú we bɔ a ma ná wa nǔ e jló we é ǎ é ɖé, alǒ aja e mɛ è sɔ́ kinnikínní ɖé dó b’ɛ ná xɔ we ɖo awǒvinú sí é ɖé.”

5. (a) Nɛ̌ a ka ná zé hwiɖée jó nú Jexóva gbɔn? (b) Vogbingbɔn tɛ́ ka ɖo è ní zé mɛɖée jó nú Jexóva kpó è ní bló batɛ́mu kpó tɛ́ntin? (Kpɔ́n fɔtóo ɔ lɔmɔ̌.)

⁵ Nɛ̌ a ka ná zé hwiɖée jó nú Jexóva gbɔn? A ná d’akpá n’i ɖo ɖɛ mɛ ɖɔ éɖokpónɔ géé wɛ émí ná sɛn, bo ná sɔ́ jlǒ tɔn wiwa dó ɖó nǔ e ɖo tají hú gǎn é ɖo gbɛzán towe mɛ. A wa mɔ̌ hǔn, akpá dó nú Jexóva wɛ a ɖe ɖɔ émí ná  kpo ɖo wǎn yí n’i wɛ “kpó ayi towe bǐ kpó, kpó lǐndɔ̌n towe bǐ kpó, kpó linlin towe bǐ kpó, kpó hlɔ̌nhlɔ́n towe bǐ kpó” nɛ́. (Mak. 12:30) Zě e a ná zé hwiɖée jó nú Jexóva é ɔ, hwi kpó Jexóva kpó kɛ́ɖɛ́ tɛ́ntin wɛ é ná nɔ. Amɔ̌ batɛ́mu ɔ, agbawungba wɛ è nɔ bló éyɛ́ ɖe; é nɔ xlɛ́ mɛ ɖěvo lɛ́ ɖɔ è ko sɔ́ mɛɖée jó nú Jexóva. Akpá syɛ́nsyɛ́n ɖé wɛ zě e a zé hwiɖée jó nú Jexóva é nyí; nǔ e gbé a ɖó ná nya é wɛ nyí ɖɔ a ní ɖe akpá énɛ́, bɔ nǔ e Jexóva nɔ ɖó nukún ɖo así we é nɛ́.—Nǔt. 5:4, 5.

NǓ E WÚ A NÁ ZÉ HWIÐÉE JÓ NÚ JEXÓVA É

6. Étɛ́ lɛ́ ka nɔ sísɛ́ mɛɖé bɔ é nɔ zé éɖée jó nú Jexóva?

⁶ Hwɛjijɔ tají e wú a ná zé hwiɖée jó nú Jexóva é wɛ nyí ɖɔ a yí wǎn n’i. Lěe nǔ nɔ cí nú mɛ é kpowun jí wɛ wǎn e a yí n’i é jínjɔ́n ǎ. É nyɔ́ wa ɔ, tuun e a tuun Jexóva kpó linlin tɔn lɛ́ kpó ganjí é wɛ zɔ́n bɔ wǎn e a yí n’i é jɛjí. (Koló. 1:9) Xó tɔn e a kplɔ́n é zɔ́n bɔ a kú d’é jí ɖɔ (1) Jexóva tíin nǔgbó, (2) Biblu ɔ, Xó tɔn wɛ bɔ é sɔ́ dó ayi mɛ nú gbɛtɔ́ lɛ́ bɔ yě wlán, lobɔ (3) é nɔ zán tutoblónúnǔ tɔn dó wa jlǒ tɔn.

7. Étɛ́ lɛ́ wa wɛ mǐ ka ɖó ná ɖe cóbó sɔ́ mǐɖée jó nú Mawu?

⁷ Mɛ ɖěɖěe nɔ zé yěɖée jó nú Jexóva lɛ́ é ɖó ná tuun nǔkplɔ́nmɛ bǐbɛ́mɛ tɔn e ɖo Xó Mawu tɔn mɛ lɛ́ é, bo nɔ lɛ́ zán gbɛ sɔgbe xá nǔgbódodó tɔn lɛ́. Yě nɔ wa nǔ e wú yě kpé é bǐ, bo nɔ má nǔ e yě ɖi nǔ ná lɛ́ é xá mɛ ɖěvo lɛ́. (Mat. 28:19, 20) Wǎn e yě yí nú Jexóva é jɛjí, bɔ nǔ e ba wɛ yě ɖe vɛ́návɛ́ná é wɛ nyí ɖɔ yě ní sɛn éɖokpónɔ kpó ayi bǐ kpó. A ka mɔ hwiɖée ɖo xó énɛ́ lɛ́ mɛ a? Ényí a ɖó wǎnyíyí mɔ̌hun ɔ, a ná zé hwiɖée jó nú Jexóva ɖó a jló ná dó xomɛhunhun nú Biblu kplɔ́ntɔ́ towe, alǒ mɛjitɔ́ towe lɛ́ wú ǎ; mɔ̌ jɛ́n a ma ka  ná lɛ́ wa mɔ̌ ɖó xɔ́ntɔn towe lɛ́ ɖo mɔ̌ wa wɛ kpowun wútu ǎ é nɛ́.

8. Nɛ̌ nǔsumɛnukúnmɛ ɖiɖexlɛ́ ka ná d’alɔ we bɔ a ná wá gbeta ɔ kɔn bá zé hwiɖée jó nú Jexóva gbɔn? (Ðɛhan 116:12-14)

⁸ Ényí a nɔ lin tamɛ dó nǔ ɖěɖěe Jexóva ko wa nú we lɛ́ é bǐ jí ɔ, é ɖo wɛn ɖɔ, mɛɖé kún ná ɖɔ nú we cóbónú a ná wá gbeta ɔ kɔn bá zé hwiɖée jó n’i ó. (Xa Ðɛhan 116:12-14.) Biblu sín hwɛ jɔ bɔ é ylɔ́ Jexóva ɖɔ Mɛ e nɔ ná “nǔníná ɖagbe ɖagbe bǐ kpó nǔníná e nǔ bǐ vɔ ɖ’é wú é bǐ kpó” mɛ é. (Ja. 1:17) Vɔ̌ e Vǐ tɔn Jezu sá dó ta mǐtɔn mɛ é wɛ nyí nǔníná ɖaxó hú gǎn ɔ. Dǒ nukún mɛ kpɔ́n! Gbɛxixɔ ɔ zɔ́n bɔ a sixú vɛ́ kpó Jexóva kpó. Gɔ́ ná ɔ, é lɛ́ hun ali nú we bɔ a ná nɔ gbɛ káká sɔ́yi. (1 Jaan 4:9, 10, 19) Hwiɖée zízé jó nú Jexóva wɛ nyí ali ɖagbe hú gǎn e nu a sixú ɖe nǔsumɛnukúnmɛ xlɛ́ ɛ nú wǎnyíyí núwiwa ɖaxó hú gǎn énɛ́ e mɛɖé ma ko wa kpɔ́n ǎ é, gɔ́ nú nyɔ̌ná ɖěɖěe é nɔ kɔn dó jǐ towe lɛ́ é bǐ ɖe é. (Sɛ́n. 16:17; 2 Kɔ. 5:15) È tɛ ɖɛ̌ nǔsumɛnukúnmɛ énɛ́ ɖiɖexlɛ́ jí ɖo akpáxwé 4​gɔ́, nǔkplɔ́nkplɔ́n 46​gɔ́ wěma Ðu gbɛ víví káká sɔ́yi! tɔn mɛ; video cɛ́jú atɔnnɔ e xóta tɔn nyí Nɔ ná nǔ Mawu é ɖo akpáxwé énɛ́ mɛ.

A KA ÐO GBESISƆMƐ BÁ ZÉ HWIÐÉE JÓ NÚ JEXÓVA BO BLÓ BATƐ́MU A?

9. Aniwú è ma ka ɖó ná dó jɔngwínjɔngwín nú mɛɖé bónú é ná zé éɖée jó nú Jexóva ǎ?

⁹ A sixú lin ɖɔ émí kún ɖo gbesisɔmɛ bá zé émíɖée jó nú Jexóva bo bló batɛ́mu ó. Vlafo é sixú byɔ́ ɖɔ a ní bló hǔzúhúzú lɛ́ ɖo gbɛzán towe mɛ, bo ná dó wa nǔ sɔgbe xá nǔgbódodó Jexóva tɔn lɛ́, alǒ bóyá a ɖó hudó hwenu tɔn d’é jí bá ná hlɔ̌nhlɔ́n nǔɖiɖi towe. (Koló. 2:6, 7) Nǔkplɔ́ntɔ́ lɛ́ bǐ wɛ nɔ yi nukɔn ɖó bǎ ɖokpó ɔ mɛ ǎ, mɔ̌ jɛ́n mɛ wínnyáwínnyá lɛ́ bǐ ma ka nɔ lɛ́ ɖo gbesisɔmɛ bá bló batɛ́mu zɛ̌ɛ́n ǎ é nɛ́. Sɔ́ nǔ e wú a nɔ kpé bo nɔ wa lɛ́ é dó da nukɔn e yi wɛ a ɖe ɖo gbigbɔ lixo é kpɔ́n; ma sɔ́ hwiɖée jlɛ́ dó mɛ ɖěvo wú ó.—Ga. 6:4, 5.

10. Ényí a mɔ ɖɔ a kún ko ɖo gbesisɔmɛ bo ná zé hwiɖée jó nú Jexóva, bo bló batɛ́mu ó ɔ, étɛ́ a ka sixú wa? (Kpɔ́n gbǎví “ Nú mɛ ɖěɖěe è ji dó agun ɔ mɛ lɛ́ é” lɔmɔ̌.)

¹⁰ Ényí a na bo tlɛ mɔ ɖɔ a kún ko ɖo gbesisɔmɛ bo ná zé hwiɖée jó nú Jexóva ó hǔn, sɔ́ afɔ énɛ́ ɖiɖe dó ɖó nǔ e gbé a ná nya é. Byɔ̌ nyɔ̌ná Jexóva tɔn dó gǎn e dó wɛ a ɖe lɛ́ é jí, ɖɔ é ní d’alɔ we bónú a ná bló hǔzúhúzú ɖěbǔ e ɖo dandan lɛ́ é. (Filí. 2:13; 3:16) A sixú ɖeji ɖɔ é ná se ɖɛ towe, bo ná d’alɔ we.—1 Jaan 5:14.

NǓ E WÚ MƐÐÉ LƐ́ NƆ ÐÓ NǍ NǍ NÁ É

11. Nɛ̌ Jexóva ka ná d’alɔ mǐ bɔ mǐ ná kpo ɖo gbejí n’i gbɔn?

¹¹ Mɛɖé lɛ́ nɔ ɖo gbesisɔmɛ bá zé yěɖée jó nú Jexóva, bo bló batɛ́mu, cóbó ka nɔ lɛ́ kpo ɖo nǎ nǎ ɖó ná wɛ. Ado sixú nɔ hu yě, bɔ yě ná nɔ kanbyɔ́ yěɖée ɖɔ: ‘Ényí un ka wá hu hwɛ syɛ́nsyɛ́n ɖé bónú è ɖe mì sín agun mɛ ɔ ka lo?’ Ényí xɛsi mɔ̌hun wɛ nɔ ɖi we hǔn, kú d’é jí ɖɔ Jexóva ná ná we nǔ e sín hudó a ɖó bo ná dó “zán gbɛ lěe é jɛxá [ɛ] gbɔn é bo ná dó nyɔ́ nukún tɔn mɛ bǐ mlɛ́mlɛ́” é bǐ. (Koló. 1:10) É ná lɛ́ ná hlɔ̌nhlɔ́n we, bɔ a ná dó wa nǔ e sɔgbe é. Lěe é ko d’alɔ mɛ ɖěvo lɛ́ gbɔn wá yi é xlɛ́ ɖɔ é sixú wa mɔ̌. (1 Kɔ. 10:13) Hwɛjijɔ e wú mɛ kpɛɖé kpowun jɛ́n è nɔ ɖe sín agun klisánwun tɔn mɛ é ɖokpó nɛ́. Jexóva nɔ d’alɔ togun tɔn, bɔ é nɔ nɔ gbejí n’i.

12. Nɛ̌ mǐ ka sixú nyi alɔ nú hwɛ syɛ́nsyɛ́n huhu gbɔn?

¹² Gbɛtɔ́ hwɛhutɔ́ lɛ́ bǐ wɛ zɛn nǔnyanyawiwa tɔn nɔ wá sɔ́. (Ja. 1:14) É ɖo mɔ̌ có, hwiɖésú wɛ ná wá gbeta nǔ e a ná wa é tɔn kɔn hwenu e mɛtɛ́nkpɔ́n énɛ́ ná wá xwetɔ́n é. Nǔ ɔ wɛ nyí ɖɔ, hwi wɛ ɖ’acɛ bo ná ɖɔ lěe a ná zán gbɛ towe gbɔn é. Mɛɖé lɛ́ nɔ ɖɔ ɖɔ mǐ kún  sixú ɖ’acɛ dó lěe nǔ nɔ cí nú mǐ é kpó nǔ e mǐ nɔ wa lɛ́ é kpó jí ó. Nǔvú ka wɛ. A sixú kplɔ́n bo nɔ ɖu ɖo jlǒ masɔgbe e a nɔ ɖó lɛ́ é jí. Gɔ́ ná ɔ, ényí jlǒ masɔgbe ɖé lɛ́ tlɛ wá xwetɔ́n ɔ, a sixú wá gbeta ɔ kɔn ɖɔ émí kún ná wa nǔ nyanya ó. Bónú é ná kpa we hǔn, nɔ xo ɖɛ gbe bǐ gbe. Tɛ́n kpɔ́n bo nɔ kplɔ́n Xó Mawu tɔn ɖo gbesisɔmɛ. Nɔ yi kplé klisánwun tɔn lɛ́. Nɔ má nǔ e a ɖi nǔ ná lɛ́ é xá mɛ ɖěvo lɛ́. Afɔ énɛ́ lɛ́ ɖiɖe hwebǐnu ná ná hlɔ̌nhlɔ́n we bɔ a ná kpo ɖo gbejí nɔ nú akpá e a dó nú Jexóva é wɛ. Gɔ́ ná ɔ, hɛn d’ayi mɛ ɖɔ Jexóva ná d’alɔ we bɔ a ná kpé wú.—Ga. 5:16.

13. Kpɔ́ndéwú ɖagbe tɛ́ Jozɛ́fu ka sɔ́ ɖ’ayǐ nú mǐ?

¹³ A ná mɔ ɖɔ é ná bɔ wǔ nú we hú gǎn ɖɔ a ní nɔ gbejí nú Jexóva, ényí a ko wá gbeta nǔ e a ná wa hwenu e è ná tɛ́n we kpɔ́n é tɔn kɔn cóbɔ nǔ wá nyí mɔ̌ ɔ nɛ́. Biblu ɖɔ mɛɖé lɛ́ xó nú mǐ, bɔ yě lɔmɔ̌ ɔ, hwɛhutɔ́ wɛ nú yě có, yě ka wa mɔ̌. Ði kpɔ́ndéwú ɔ, azɔn mɔ̌kpán wɛ Potifáa sín asi tɛ́n kpɔ́n bo ná hu ji nú Jozɛ́fu. Amɔ̌, Jozɛ́fu ko tuun lěe é ná wa nǔ gbɔn é. Biblu ɖɔ nú mǐ ɖɔ é “gbɛ́,” bo ɖɔ: “Un sixú dó nǔ baɖabaɖa mɔ̌hun sin, bo hu hwɛ dó Mawu ce ǎ.” (Bǐb. 39:8-10) É jɛ wě ɖɔ, Jozɛ́fu ko tuun lěe é ná wa nǔ gbɔn é, cóbɔ nyɔ̌nu ɔ tɛ́n ɛ kpɔ́n. Énɛ́ zɔ́n bɔ hwenu e é wá tɛ́n ɛ kpɔ́n é ɔ, é bɔ wǔ n’i hú gǎn bɔ é wa nǔ e sɔgbe é.

14. Nɛ̌ a ka sixú kplɔ́n bo ná nɔ ɖó wǔ zɔ nú nǔnyanyawiwa gbɔn?

¹⁴ Nɛ̌ a ka sixú wa nǔ Jozɛ́fu ɖɔhun bo nɔ gbejí nú Mawu hwenu e è tɛ́n we kpɔ́n é gbɔn? A sixú wá gbeta nǔ e a ná wa hwenu e mɛtɛ́nkpɔ́n ɖé ná wá xwetɔ́n é tɔn kɔn din. Kplɔ́n bo nɔ dó gǔdo nǔ e Jexóva gbɛ́ wǎn ná lɛ́ é afɔjíafɔjí, ma tlɛ lin ná lin tamɛ dó yě jí lɔ vɔ́vɔ́ ó. (Ðɛh. 97:10; 119:165) Mɔ̌ mɛ ɔ, a ná wa nǔ nyi do hwenu e mɛtɛ́nkpɔ́n ɖé ná wá xwetɔ́n é ǎ. A ná ko tuun lěe a ná wa nǔ gbɔn é ɖó te.

15. Nɛ̌ mɛɖé ka sixú xlɛ́ ɖɔ émí ‘ɖo Jexóva ba wɛ vɛ́návɛ́ná’ gbɔn? (Eblée lɛ́ 11:6)

¹⁵ Ðo ninɔmɛ towe mɛ ɔ, vlafo a tuun ɖɔ nǔgbó ɔ ɖíe émí mɔ è, bɔ a ba ná sɛn Jexóva kpó ayi towe bǐ kpó, amɔ̌, nǔɖé kpo ɖo kpo gbo nyi ali jí nú we wɛ bónú a ná zé hwiɖée jó nú Jexóva bo bló batɛ́mu. A sixú wa nǔ e axɔ́sú Davídi wa é. A sixú sa vo nú Jexóva ɖɔ: “Mawu ce, kpɔ́n xo ce mɛ bǐ! Kpɔ́n lěe un ɖe é, kpɔ́n nǔ e ɖo gbigbo mì wɛ ɖo ayi mɛ é! Kpɔ́n ɖɔ ali nyanya wɛ un wlí a jí, bo dɔn mì ɖó ali e nyí towe é jí, ali e nyí towe káká sɔ́yi é jí.” (Ðɛh. 139:23, 24) Ðɛ mɔ̌hun nɔ xlɛ́ ɖɔ a ɖo alɔdó Jexóva tɔn ba wɛ, bo nɔ lɛ́ xlɛ́ ɖɔ a  ɖo azɔ̌ wa wɛ bo ná kpé hwiɖée zízé jó nú Jexóva kpó batɛ́mu bíbló kpó e gbé nya wɛ a ɖe é wú. Jexóva nɔ kɔn nyɔ̌ná dó mɛ ɖěɖěe nɔ “ɖo biba ɛ wɛ vɛ́návɛ́ná lɛ́ é” jí. Gǎn e dó wɛ a ɖe bá zé hwiɖée jó n’i, bo lɛ́ bló batɛ́mu é nɔ xlɛ́ ɛ ɖɔ a ɖo biba ɛ wɛ vɛ́návɛ́ná.—Xa Eblée lɛ́ 11:6.

KPO ÐO VǏVƐ́ XÁ JEXÓVA WƐ

16-17. Nɛ̌ Jexóva ka nɔ dɔn mɛ ɖěɖěe è ji dó agun mɛ lɛ́ é gbɔn? (Jaan 6:44)

¹⁶ Jezu ɖɔ ɖɔ Jexóva wɛ nɔ dɔn ahwanvú émítɔn lɛ́. (Xa Jaan 6:44.) Xó énɛ́ gɔ́ngɔ́n tawun, bo lɛ́ kan we. Jexóva nɔ mɔ nǔ ɖagbe ɖé ɖo mɛ e é nɔ dɔn wá éɖée gɔ́n lɛ́ é ɖokpó ɖokpó mɛ. É nɔ kpɔ́n mǐ mɛ ɖokpó ɖokpó dó mɔ nǔ e é “ɖe ɖó vo” é, alǒ ‘nǔ vívɛ́ná’ tɔn. (Sɛ́n. 7:6) Lěe é nɔ mɔ hwi lɔmɔ̌ gbɔn é nɛ́.

¹⁷ Amɔ̌, é sixú nyí ɖɔ mɛ wínnyáwínnyá wɛ nú we bɔ è ji we dó agun mɛ. A sixú mɔ ɖɔ émí ɖo Jexóva sɛn wɛ kpowun ɖó mɛjitɔ́ émítɔn lɛ́ ɖo mɔ̌ wa wɛ wútu, bɔ é kún nyí Jexóva wɛ dɔn we wá éɖée gɔ́n ó. É ɖo mɔ̌ có, Biblu ɖɔ: “Mi sɛkpɔ́ Mawu, énɛ́ ɔ, é ná sɛkpɔ́ mi.” (Ja. 4:8; 1 Tan 28:9) Ényí a ɖe afɔ nukɔntɔn ɔ bo sɛkpɔ́ Jexóva ɔ, éɖésúnɔ ná sɛkpɔ́ we. Jexóva nɔ mɔ we dó mɔ mɛ e ɖo gbɛ̌ta ɖé mɛ é kpowun ǎ. É nɔ dɔn mɛ ɖokpó ɖokpó, káká jɛ mɛ ɖěɖěe è ji dó agun mɛ lɛ́ é ɖokpó ɖokpó jí. Ényí mɛ mɔ̌hun ɖe afɔ nukɔntɔn ɔ bo sɛkpɔ́ Jexóva ɔ, É nɔ yí gbe bo nɔ sɛkpɔ́ ɛ, lěe mǐ mɔ gbɔn ɖo Jaki 4:8 mɛ é.—Sɔ́ jlɛ́ dó 2 Tɛsaloníkinu lɛ́ 2:13 wú.

18. Étɛ́ jí mǐ ka ná ɖɔ xó dó ɖo xóta e bɔ d’é wú é mɛ? (Ðɛhan 40:9)

¹⁸ Ényí a zé hwiɖée jó nú Jexóva bo bló batɛ́mu hǔn, a wa nǔ Jezu ɖɔhun nɛ́. É sɔ́ jlǒ dó sɔ́ éɖée xlɛ́ Tɔ́ tɔn jǐxwé tɔn ɔ, bá wa nǔ ɖěbǔ e é byɔ́ ɛ é. (Xa Ðɛhan 40:9; Ebl. 10:7) Ðo xóta e bɔ d’é wú é mɛ ɔ, mǐ ná ɖɔ xó dó nǔ ɖěɖěe ná d’alɔ we bɔ a ná kpo ɖo Jexóva sɛn wɛ kpó gbejíninɔ kpó ɖo batɛ́mu towe gúdo lɛ́ é jí.