Gbɛ e Jezu xɔ nú mǐ gbɔn hun tɔn gblamɛ é kɛ́ɖɛ́ jɛ́n sixú zɔ́n bɔ è sɔ́ hwɛ mǐtɔn lɛ́ kɛ mǐ. (Efɛ́. 1:7) É ɖo mɔ̌ có, Biblu ɖɔ: “Ðó ɖ’ayǐ ɔ, ɖo suúlu [Mawu] tɔn mɛ ɔ, é nɔ ɖo hwɛ e mɛ lɛ́ hu lɛ́ é sɔ́ kɛ yě wɛ,” énɛ́ wɛ nyí, cóbónú Jezu ná xɔ gbɛ nú mɛ. (Hlɔ̌. 3:25, tínmɛ e ɖo do é.) Nɛ̌ Jexóva ka sixú wa mɔ̌, bɔ hwe ɖokpó ɔ nu ɔ, é ná lɛ́ kpo ɖo Mawu nǔjlɔ́jlɔ́watɔ́ nyí wɛ gbɔn?

Jexóva dó “kúnkan” ɖé sín akpá, bɔ é wɛ ná hwlɛ́n mɛ ɖěɖěe ɖi nǔ nú éyɛ́ Jexóva ɔ, kpó akpá tɔn lɛ́ kpó lɛ́ é. Hwenu e é d’akpá énɛ́ é ɔ, è ko sú gbɛxixɔ ɔ sín axɔ́ ǎ, amɔ̌, é cí ɖɔ è ko wa mɔ̌ wɛ ɖɔhun. (Bǐb. 3:15; 22:18) Mawu kú d’é jí bǐ mlɛ́mlɛ́ ɖɔ hwenu e émí ɖó dó é su ɔ, Vǐɖokpónɔ émítɔn ná xɔ gbɛ nú gbɛtɔ́ lɛ́ kpó jlǒ kpó. (Ga. 4:4; Ebl. 10:7-10) Hwenu e Jezu wá ayǐkúngban jí, afɔsɔ́ɖótetɔ́ Mawu tɔn ɖɔhun é ɔ, Jexóva ko ná ɛ acɛ e nɔ sɔ́ hwɛ kɛ mɛ é cóbɔ é wá xɔ gbɛ nú gbɛtɔ́ lɛ́. Jezu sixú sɔ́ hwɛ kɛ mɛ ɖěɖěe ɖi nǔ lɛ́ é, ɖó é tuun ɖɔ vɔ̌ e émí ná sá é ná súnsún hwɛ yětɔn lɛ́.—Mat. 9:2-6.