1. Linlin tɛ́ mɛsɛntɔ́ Jexóva tɔn gbejínɔtɔ́ ɖé lɛ́ ka sixú ɖí xwi xá?

 TUUN e mǐ tuun ɖɔ togun Jexóva tɔn blěbú sín nǔ nɔ nyɔ́ nukún Tɔn mɛ é nɔ dó wǔsyɛ́n lanmɛ nú mǐ kpɔ́n. Biblu ɖɔ: ‘Nǔ nɔ víví nú Jexóva ɖo togun tɔn mɛ.’ (Ðɛh. 149:4) Amɔ̌ hweɖélɛ́nu ɔ, awakanmɛ nɔ wá kú mɛɖé lɛ́ káká bɔ yě sixú kanbyɔ́ ɖɔ: ‘Nǔ ce ka nɔ nyɔ́ Jexóva nukúnmɛ dóó a?’ Hweɖélɛ́nu wá su bɔ mɛsɛntɔ́ Jexóva tɔn gbejínɔtɔ́ hwexónu tɔn ɖé lɛ́ wá ɖí xwi xá linlin mɔ̌hun lɛ́.—1 Sam. 1:6-10; Jɔb. 29:2, 4; Ðɛh. 51:13.

2. Mɛ̌ mɛ̌ e sín nǔ ka nɔ nyɔ́ Jexóva nukúnmɛ?

² Biblu ɖe xlɛ́ nyi wɛn ɖɔ gbɛtɔ́ hwɛhutɔ́ lɛ́ sín nǔ sixú nyɔ́ Jexóva nukúnmɛ. Gbɔn nɛ̌ é? Mǐ ɖó ná tɛ́n kpɔ́n bo ɖi nǔ nú Jezu Klísu, lobo bló batɛ́mu. (Jaan 3:16) Mɔ̌ mɛ ɔ, mǐ nɔ ɖe xlɛ́ ɖo agbawungba ɖɔ hwɛ mǐtɔn lɛ́ vɛ́ nú mǐ, bo ko d’akpá nú Mawu ɖɔ mǐ ná wa jlǒ tɔn. (Mɛ. 2:38; 3:19) Ényí mǐ ɖe afɔ énɛ́ lɛ́ bá zun xɔ́ntɔn xá Jexóva ɔ, xomɛ nɔ hun i. Ényí mǐ kpo ɖo nǔ e wú mǐ kpé é bǐ wa wɛ, bo nɔ zán gbɛ sɔgbe xá akpá e mǐ dó nú Jexóva bo zé mǐɖée jó n’i é ɔ, nǔ mǐtɔn nɔ nyɔ́ nukún tɔn mɛ bɔ é nɔ sɔ́ mǐ dó ɖó xɔ́ntɔn vívɛ́.—Ðɛh. 25:14.

3. Étɛ́ lɛ́ jí mǐ ka ná ɖɔ xó dó din?

³ Amɔ̌, aniwú hweɖélɛ́nu ɔ, mɛɖé lɛ́ ka sixú nɔ mɔ ɖɔ nǔ émítɔn kún nɔ nyɔ́ Mawu nukúnmɛ ó? Nɛ̌ Jexóva ka nɔ ɖe xlɛ́ ɖɔ mɛɖé sín nǔ nyɔ́ nukún émítɔn mɛ gbɔn? Gɔ́ ná ɔ, nɛ̌ klisánwun ɖé ka sixú ná hlɔ̌nhlɔ́n kú e é kú d’é jí ɖɔ nǔ émítɔn nyɔ́ Mawu nukúnmɛ é gbɔn?

NǓ E WÚ MƐÐÉ LƐ́ SIXÚ NƆ MƆ ÐƆ NǓ ÉMÍTƆN KÚN NYƆ́ JEXÓVA NUKÚNMƐ Ó É

4-5. Ényí mǐ ná bo tlɛ nɔ mɔ ɖɔ mǐ kún hwɛ́n nǔɖé ó ɔ, gǎnjɛwú tɛ́ mǐ ka sixú ɖó?

⁴ Mɛ gěgé ɖo mǐ mɛ bo nɔ mɔ ɖɔ émí kún hwɛ́n nǔɖé ó, bɔ sín vǔhwenu yětɔn ɖokpóo wɛ yě ko ɖo xwi ɖí xá linlin mɔ̌hun wɛ.  (Ðɛh. 88:16) Nɔví súnnu ɖé nɔ nyí Adrián, bo ɖɔ: “Hwebǐnu wɛ un nɔ mɔ ɖɔ un kún hwɛ́n nǔɖé ó. Nǔ e takúnmɛ un nɔ xo ɖɛ dó ɖ’ayǐ bo flín lɛ́ é ɖokpó wɛ nyí ɖɔ xwédo ce ní nɔ palaɖísi mɛ, amɔ̌, un kú d’é jí ɖɔ nyɛ kún jɛxá sɔmɔ̌ bo ná nɔ mɛ ó.” Tony ɔ, xwédo e ma nɔ sɛn Jexóva ǎ é ɖé mɛ wɛ é su ɖe; é ɖɔ: “Mɛjitɔ́ ce lɛ́ nɔ ɖɔ nú mì gbeɖé ɖɔ émí yí wǎn nú mì, alǒ ɖɔ émí nɔ gó ɖó wǔ ye ǎ. Énɛ́ zɔ́n bɔ un nɔ mɔ ɖɔ un kún sixú wa nǔ ɖě bo nyɔ́ ɖo yě sí ó.”

⁵ Ényí hweɖélɛ́nu ɔ, mǐ nɔ mɔ ɖɔ mǐ kún hwɛ́n nǔɖé ó, bo ɖo xwi ɖí xá linlin mɔ̌hun lɛ́ wɛ ɔ, mǐ sixú flín ɖɔ Jexóva ɖésúnɔ wɛ dɔn mǐ wá éɖée gɔ́n. (Jaan 6:44) É nɔ mɔ nǔ ɖagbe e ɖo mǐ mɛ, bɔ mǐdɛɛ lɛ́ ɖésú ma sixú mɔ ǎ lɛ́ é bo lɛ́ tuun nǔ e ɖo ayi mǐtɔn mɛ é. (1 Sam. 16:7; 2 Tan 6:30) Énɛ́ wú ɔ, ényí é ɖɔ ɖɔ mǐ xɔ akwɛ́ ɔ, mǐ sixú ɖeji dó xó énɛ́ wú.—1 Jaan 3:19, 20.

6. Nɛ̌ nǔ ka cí nú Pɔ́lu dó hwɛ e é hu wá yi lɛ́ é wú?

⁶ Cóbónú mǐ mɛ ɖé lɛ́ ná kplɔ́n nǔgbó ɔ ɔ, mǐ ko wa nǔɖé lɛ́ bɔ káká jɛ din ɔ, nǔ énɛ́ lɛ́ sín agban kpo ɖo mǐ kpɛn wɛ. (1 Pi. 4:3) Klisánwun gbejínɔtɔ́ lɛ́ lɔ tlɛ sixú ɖí xwi xá gǎnmaɖó lɛ́. Ayi towe ka nɔ dó hwɛ we wɛ a? Ényí mɔ̌ ɔ, tuuntuun ɖɔ mɛsɛntɔ́ gbejínɔtɔ́ Jexóva tɔn ɖé lɛ́ ko ɖí xwi xá linlin mɔ̌hun lɛ́ ná dó gbɔ nú we. Ði kpɔ́ndéwú ɔ, mɛsɛ́dó Pɔ́lu mɔ ɖɔ gbɛ émítɔn blá wǔ hwenu e é lin tamɛ dó nǔwanyido tɔn lɛ́ jí é. (Hlɔ̌. 7:24) É ɖo wɛn ɖɔ hwɛ Pɔ́lu tɔn lɛ́ vɛ́ n’i, bɔ é bló batɛ́mu. É ɖo mɔ̌ có, é ɖɔ dó éɖée wú ɖɔ émí wɛ nyí “mɛ e hwe hú mɛ bǐ ɖo mɛsɛ́dó lɛ́ mɛ é,” bo lɛ́ ɖɔ dó éɖée wú ɖɔ émí wɛ “nyí hwɛhutɔ́ hú hwɛhutɔ́ lɛ́ bǐ.”—1 Kɔ. 15:9; 1 Tim. 1:15.

7. Étɛ́ mǐ ka ɖó ná hɛn d’ayi mɛ dó hwɛ e mǐ hu wá yi lɛ́ é wú?

⁷ Tɔ́ mǐtɔn jǐxwé tɔn ɔ d’akpá ɖɔ ényí hwɛ mǐtɔn lɛ́ vɛ́ nú mǐ ɔ, émí ná sɔ́ hwɛ kɛ mǐ. (Ðɛh. 86:5) Énɛ́ wú ɔ, ényí hwɛ e mǐ hu lɛ́ é vɛ́ nú mǐ nǔgbó nǔgbó ɔ, mǐ sixú ɖeji ɖɔ nǔ e Jexóva ɖɔ é ɔ, nǔgbó wɛ, é wɛ nyí ɖɔ é ko sɔ́ hwɛ mǐtɔn lɛ́ kɛ mǐ.—Koló. 2:13.

8-9. Ényí mǐ nɔ mɔ ɖɔ mǐ kún sixú wa nǔɖé káká bo nyɔ́ ɖo Jexóva nukúnmɛ gbeɖé ó ɔ, nɛ̌ mǐ ka sixú ɖu ɖo linlin mɔ̌hun jí gbɔn?

⁸ Mǐ mɛ bǐ wɛ nɔ ba ná sɛn Jexóva lěe é nyɔ́ bló gbɔn é bǐ mlɛ́mlɛ́. Amɔ̌, mɛɖé lɛ́ sixú mɔ ɖɔ émí kún sixú wa nǔ ɖěbǔ káká bá nyɔ́ ɖo Jexóva nukúnmɛ gbeɖé ó. Nɔví nyɔ̌nu ɖé nɔ nyí Amanda bo ɖɔ: “Hwebǐnu wɛ un nɔ lin ɖɔ nǔ ɖagbe hú gǎn e un ɖó é níná Jexóva sín tínmɛ wɛ nyí ɖɔ má fɔ́n bo ɖo gǎn dó d’é jí wɛ hwebǐnu. Hwɛhwɛ ɔ, un nɔ ɖó nukún nǔ ɖo nyiɖée sí hú nǔ e un sixú wa é. Ényí un ‘xo kpo’ ɔ, awakanmɛ nɔ kú mì, bɔ un nɔ mɔ ɖɔ mɔ̌ wɛ nǔ nɔ cí nú Jexóva dó nyiɖésúnɔ wú.”

⁹ Ényí mǐ nɔ lin ɖɔ mǐ kún sixú wa nǔ ɖě káká bá nyɔ́ ɖo Jexóva sí gbeɖé ó ɔ, nɛ̌ mǐ ka sixú ɖu ɖo linlin énɛ́ jí gbɔn? Flín ɖɔ Jexóva kún nɔ hɛn nǔ gángángán ó. É nɔ ɖó nukún nǔ ɖo mǐ sí zɛ nǔ e wú mǐ sixú kpé bo wa é wú gbeɖé ǎ. Ényí mǐ vɛ́ ko ɖo nǔ ɖagbe hú gǎn e wú mǐ kpé é ná ɛ wɛ kpowun ɔ, nǔ mǐtɔn nɔ nyɔ́ nukún tɔn mɛ. Gɔ́ ná ɔ, nɔ lin tamɛ dó mɛ ɖěɖěe xó Biblu ɖɔ bɔ yě sɛn Jexóva kpó lǐndɔ̌n yětɔn bǐ kpó lɛ́ é sín kpɔ́ndéwú jí. Lin tamɛ dó kpɔ́ndéwú Pɔ́lu tɔn jí. É wa sinsɛnzɔ́ kpó kanɖódónǔwú kpó nú xwe mɔ̌kpán, zɔn ali nú kilomɛ́tlu afatɔ́n mɔ̌kpán hɛn yi tomɛ, bo lɛ́ ɖó agun gěgé ayǐ. Amɔ̌, ée ninɔmɛ lɛ́ ɖó dogbó nú alɔ e é nɔ ɖó ɖo mawuxóɖiɖɔzɔ́ ɔ mɛ é ɔ, énɛ́ xlɛ́ ɖɔ nǔ tɔn kún sɔ́ nyɔ́ Mawu nukúnmɛ ó wɛ a? Éǒ. É kpo ɖo nǔ e wú é kpé é wa wɛ bɔ Jexóva kɔn nyɔ̌ná dó jǐ tɔn. (Mɛ. 28:30, 31) Ðo ali ɖokpó ɔ nu ɔ, nǔ e mǐ sixú ná Jexóva é sixú gbɔn vo sín hweɖénu jɛ hweɖénu. Amɔ̌, nǔ e nɔ ɖu ayi mɛ n’i é wɛ nyí nǔ e wú mǐ wa nǔ ɔ é. Din ɔ, mi nú mǐ ní gbéjé ali e nu Jexóva nɔ ɖe xlɛ́ ɖɔ nǔ mǐtɔn nyɔ́ nukún émítɔn mɛ ɖe é ɖé lɛ́ kpɔ́n.

 NƐ̌ JEXÓVA KA NƆ ÐE XLƐ́ ÐƆ NǓ MƐÐÉ TƆN NYƆ́ NUKÚN ÉMÍTƆN MƐ GBƆN?

10. Nɛ̌ mǐ ka sixú “se” bɔ Jexóva ɖo ɖiɖɔ wɛ ɖɔ nǔ mǐtɔn nyɔ́ nukún émítɔn mɛ gbɔn? (Jaan 16:27)

¹⁰ Gbɔn Biblu gblamɛ. Jexóva nɔ ba ali ɖěɖěe nu é ná ɖe xlɛ́ mɛ e ɖo togun tɔn mɛ lɛ́ é ɖe ɖɔ émí yí wǎn nú yě, bɔ xomɛ nɔ lɛ́ hun émí dó yě wú ɖe lɛ́ é. Mawuxówéma ɔ ɖɔ xó dó ninɔmɛ e mɛ Jexóva ɖɔ nú Jezu ɖɔ Vǐ súnnu vívɛ́ná émítɔn wɛ é nyí bɔ xomɛ nɔ lɛ́ hun émí dó wǔ tɔn ɖe é we wú. (Mat. 3:17; 17:5) A ka nɔ ba ná se bɔ Jexóva ná vɔ́ gǎnjɛwú ná we ɖɔ nǔ towe nɔ nyɔ́ nukún émítɔn mɛ a? Jexóva nɔ ɖɔ xó nú mǐ tlɔlɔ ǎ, loɔ, é nɔ ɖɔ xó nú mǐ gbɔn Xó tɔn gblamɛ. Ényí mǐ ɖo xó Jezu tɔn e ɖo Wɛnɖagbewéma lɛ́ mɛ lɛ́ é xa wɛ ɔ, mǐ sixú “se” gbe Jexóva tɔn e ɖo ɖiɖɔ wɛ ɖɔ nǔ mǐtɔn nyɔ́ nukún émítɔn mɛ é. (Xa Jaan 16:27.) Jezu ɖe jijɔ Tɔ́ tɔn tɔn lɛ́ xlɛ́ bɔ nǔ bǐ vɔ ɖ’é wú. Énɛ́ wú ɔ, ée mǐ xa ɖɔ Jezu ɖe xlɛ́ ahwanvú tɔn hwɛhutɔ́ e ka ɖo gbejí lɛ́ é ɖɔ nǔ yětɔn nyɔ́ nukún émítɔn mɛ é ɔ, mǐ sixú dó nukún mɛ kpɔ́n ɖɔ Jexóva ɖo xó énɛ́ lɛ́ ɖɔ nú mǐ lɔ wɛ.—Jaan 15:9, 15.

11. Aniwú ninɔmɛ syɛ́nsyɛ́n lɛ́ mɛ gbingbɔn ma ka nɔ xlɛ́ ɖɔ nǔ mǐtɔn kún sɔ́ nyɔ́ Jexóva nukúnmɛ ó ǎ? (Jaki 1:12)

¹¹ Gbɔn nǔwiwa tɔn lɛ́ gblamɛ. Xomɛ nɔ hun Jexóva dó alɔ dídó mǐ wú; nǔ e nɔ hudó mǐ ɖo agbaza lixo lɛ́ é sín do súsú lɔ ɖo nǔ e é nɔ wa dó d’alɔ mǐ lɛ́ é mɛ. Hweɖélɛ́nu ɔ, Jexóva sixú yí gbe bɔ mǐ gbɔn ninɔmɛ vɛ́ wǔ lɛ́ mɛ lěe é nyí gbɔn nú nǔjlɔ́jlɔ́watɔ́ Jɔbu é ɖɔhun. (Jɔb. 1:8-11) Ényí mǐ ɖo tagba lɛ́ mɔ wɛ ɔ, xlɛ́xlɛ́ wɛ é ɖe ɖɔ nǔ mǐtɔn kún sɔ́ nyɔ́ Mawu nukúnmɛ ó ǎ. É nyɔ́ wa ɔ, yě nɔ hun ali lɛ́ nú mǐ bónú mǐ ná ɖe lě do mǐ yí wǎn nú Mawu bo nɔ ɖeji dó wǔ tɔn sɔ é xlɛ́. (Xa Jaki 1:12.) Ényí é ɖo alɔ dó mǐ wɛ bónú mǐ ɖo didɛ wɛ ɔ, mǐ nɔ ɖu le nukún e é nɔ kpé dó mǐ wú kpó wǎnyíyí kpó, gɔ́ nú gǔdo e é nɔ nɔ nú mǐ é tɔn.

12. Étɛ́ nǔ e xá Dmitrii é ka sixú kplɔ́n mǐ?

¹² Ð’ayi kpɔ́ndéwú nɔví súnnu e nɔ nɔ Asie bo nɔ nyí Dmitrii é tɔn wú. Azɔ̌ gblé dó è, bɔ é ka sɔ́ mɔ ɖěvo ǎ nú sun mɔ̌kpán. Énɛ́ wú ɔ, é wá gbeta ɔ kɔn bo ná zán hwenu d’é jí ɖo sinsɛnzɔ́ ɔ mɛ, mɔ̌ mɛ ɔ, é ɖe jiɖe e é ɖó dó Jexóva wú é xlɛ́. Sun lɛ́ ɖo wǐwá yi wɛ có, é ka ko mɔ azɔ̌ ɖě ǎ. Énɛ́ gúdo ɔ, é wá bɛ́ lanmɛzɔ́n ɖé bɔ é syɛ́n káká bɔ é sɔ́ sixú nɔ sí te sín zan jí ǎ. É jɛ nǔ xo kpɔ́n jí ɖɔ émí ka jɛxá bo ná nyí asú kpó tɔ́ kpó a jí, lobo jɛ kinkanbyɔ́ éɖée jí ɖɔ nǔ émítɔn ka kpo ɖo Jexóva nukúnmɛ nyɔ́ wɛ dóó a jí. Énɛ́ gúdo ɖo gbadanu ɖokpó ɔ, vǐ  nyɔ̌nu tɔn wlán xógbe élɔ́ lɛ́ e ɖo Ezayíi 30:15 mɛ lɛ́ é dó wěma ɖokpó jí: ‘Hlɔ̌nhlɔ́n ɖokpó e ná kpo nú mi ɔ wɛ nyí ɖɔ mi ná cí xwíí, bo ná ɖeji dó wǔ ce.’ É sɔ́ wěma ɔ wá zan tɔn kpá, bo ɖɔ: “Papá, ényí a ɖo wǔvɛ́ mɛ hǔn, nɔ flín wěmafɔ élɔ́.” Dmitrii ɖ’ayi wú ɖɔ Jexóva wɛ nyí tɔn bɔ xwédo émítɔn kpo ɖo nǔɖuɖu, nǔzínzán kpó xɔ kpó e jɛxá é mɔ wɛ. É ɖɔ: “Nǔ e é byɔ́ ɖɔ má wa é wɛ nyí ɖɔ má cí xwíí bo kpo ɖo jiɖe ɖó dó Mawu ce wú wɛ.” Ényí a ɖo wǔvɛ́ mɔ̌hun ɖé ɖí xwi xá wɛ ɔ, a sixú ɖeji ɖɔ Jexóva ɖo nukún kpé dó wǔ we wɛ, bo ná d’alɔ we bɔ a ná dɛ.

13. Mɛ ɖětɛ́ lɛ́ Jexóva ka sixú zán dó ɖe xlɛ́ ɖɔ nǔ mǐtɔn nyɔ́ nukún émítɔn mɛ? Nɛ̌ é ka nɔ wa mɔ̌ gbɔn?

¹³ Gbɔn nǔɖitɔ́ hǎtɔ́ lɛ́ gblamɛ. Jexóva nɔ gbɔn nɔví mǐtɔn lɛ́ jí dó ɖe xlɛ́ ɖɔ nǔ mǐtɔn nyɔ́ nukún émítɔn mɛ. Ði kpɔ́ndéwú ɔ, é hɛn ɔ, é ná sísɛ́ mɛ ɖěvo lɛ́ bɔ yě ná ɖɔ wǔsyɛ́n dó lanmɛ nú mɛ xó lɛ́ nú mǐ ɖo hwetɔnnu. Nɔví nyɔ̌nu ɖokpó nɔ nɔ Asie, bo ɖu le énɛ́ tɔn hwenu e é ɖo linkpɔ́n ɖaxó mɛ é. Azɔ̌ gblé dó è bɔ é lɛ́ bɛ́ azɔn syɛ́nsyɛ́n. Énɛ́ gúdo ɔ, asú tɔn hu hwɛ syɛ́nsyɛ́n ɖé bo sɔ́ nyí mɛxó agun tɔn ǎ. É ɖɔ: “Un mɔ nǔ jɛ nǔ e wú nǔ énɛ́ lɛ́ ɖo jijɛ wɛ é wú ǎ. Un lin ɖɔ bóyá nǔɖé wɛ un ná ko wa nyi do bɔ nǔ ce kún sɔ́ nyɔ́ Jexóva nukúnmɛ ó.” Nɔví nyɔ̌nu mǐtɔn sa vo nú Jexóva ɖɔ é ní vɔ́ gǎnjɛwú ná émí ɖɔ nǔ émítɔn kpo ɖo nukún tɔn mɛ nyɔ́ wɛ. Nɛ̌ Jexóva ka wa mɔ̌ gbɔn? É ɖɔ: “Mɛxó agun tɔn lɛ́ ɖɔ xó xá mì, bo vɔ́ gǎnjɛwú ná mì ɖɔ Jexóva yí wǎn nú mì.” Nukɔnmɛ ɔ, nɔví nyɔ̌nu ɔ lɛ́ wá byɔ́ alɔdó Jexóva tɔn. É ɖɔ: “Ðo azǎn énɛ́ ɖokpó ɔ jí ɔ, nɔví e ɖo agun ɔ mɛ é ɖé lɛ́ sɛ́ wěma ɖé dó mì. Ée un ɖo gbɔdónúmɛxó yětɔn lɛ́ xa wɛ é ɔ, un mɔ ɖɔ Jexóva se ɖɛ ce.” Ɛɛn, hwɛhwɛ ɔ, Jexóva nɔ ɖe xlɛ́ ɖɔ nǔ mǐtɔn nyɔ́ nukún émítɔn mɛ gbɔn xomɛnyínyɔ́xó e mɛ ɖěvo lɛ́ nɔ ɖɔ nú mǐ lɛ́ é gblamɛ.—Ðɛh. 10:17.

14. Ðɔ ali ɖěvo e nu Jexóva nɔ ɖe xlɛ́ ɖɔ nǔ mǐtɔn nyɔ́ nukún émítɔn mɛ ɖe é.

 ¹⁴ Jexóva nɔ lɛ́ zán nǔɖitɔ́ hǎtɔ́ mǐtɔn lɛ́ dó ɖe wě xá mǐ dó xlɛ́ ɖɔ nǔ mǐtɔn nyɔ́ nukún émítɔn mɛ. Ði kpɔ́ndéwú ɔ, ɖo xwe kanweko nukɔntɔn ɔ mɛ ɔ, Jexóva sɔ́ d’ayi mɛ nú mɛsɛ́dó Pɔ́lu bɔ é wlán wěma 14 sɛ́dó nǔɖitɔ́ hǎtɔ́ tɔn lɛ́. Wěɖexámɛ e ɖo tlɔlɔ bɔ wǎnyíyí lɛ́ kpé lɛ́ é ɖo wěmasɛ́dómɛ énɛ́ lɛ́ mɛ. Aniwú Jexóva ka sɔ́ d’ayi mɛ nú Pɔ́lu bɔ é sɔ́ wěɖexámɛ énɛ́ lɛ́ dó wěmasɛ́dómɛ tɔn lɛ́ mɛ? Jexóva ɔ, Tɔ́ ɖagbe ɖé wɛ n’i, bɔ é nɔ gbɛ́ nǔ nú vǐ tɔn e “é yí wǎn ná [lɛ́] é.” (Nǔx. 3:11, 12) Énɛ́ wú ɔ, ényí è ɖe wě e jínjɔ́n Biblu jí é ɖé xá mǐ ɔ, mǐ sixú mɔ ɖɔ kúnnuɖenú e xlɛ́ ɖɔ nǔ mǐtɔn kpo ɖo Mawu nukúnmɛ nyɔ́ wɛ é ɖé wɛ, é nyí é kún sɔ́ nyɔ́ nukún tɔn mɛ ó ǎ. (Ebl. 12:6) Nǔ ɖěvo tɛ́ lɛ́ ka nɔ lɛ́ xlɛ́ ɖɔ nǔ mǐtɔn nyɔ́ Jexóva nukúnmɛ?

KÚNNUÐENÚ ÐĚVO E XLƐ́ ÐƆ NǓ MǏTƆN NƆ NYƆ́ JEXÓVA NUKÚNMƐ LƐ́ É

15. Mɛ̌ mɛ̌ e Jexóva ka nɔ ná gbigbɔ mímɛ́ tɔn? Aniwú énɛ́ ka sixú ná mǐ gǎnjɛwú?

¹⁵ Jexóva nɔ ná gbigbɔ mímɛ́ tɔn mɛ ɖěɖěe sín nǔ nɔ nyɔ́ nukún tɔn mɛ lɛ́ é. (Mat. 12:18) Mǐ sixú kan nǔ élɔ́ byɔ́ mǐɖée: ‘Un ka ko kpé wú bo ɖe jijɔ ɖěɖěe gbigbɔ Mawu tɔn nɔ bló bɔ è nɔ ɖó lɛ́ é ɖé lɛ́ xlɛ́ ɖo gbɛzán ce mɛ a?’ A ka nɔ ɖ’ayi wú ɖɔ émí nɔ ɖó suúlu dó mɛ ɖěvo lɛ́ wú din hú gǎn hwenu e a ma ko kplɔ́n bo tuun Jexóva ǎ é a? Nǔgbó ɔ, lě do a kplɔ́n bo nɔ ɖe jijɔ e gbigbɔ Mawu tɔn nɔ zɔ́n bɔ è nɔ ɖó lɛ́ é xlɛ́ sɔ é ɔ, mɔ̌ do wɛ é ná za wě nú we ɖɔ nǔ towe nyɔ́ Jexóva nukúnmɛ sɔ.—Kpɔ́n gbǎví “ Jijɔ ɖěɖěe gbigbɔ ɔ nɔ zɔ́n bɔ è nɔ ɖó lɛ́ é wɛ nyí . . . ”

16. Mɛ̌ mɛ̌ e Jexóva ka nɔ zán bɔ yě nɔ jlá wɛn ɖagbe ɔ? Nɛ̌ nǔ ka cí nú we dó énɛ́ wú? (1 Tɛsaloníkinu lɛ́ 2:4)

¹⁶ Jexóva sɔ́ wɛn ɖagbe ɔ jíjlá sín azɔ̌ d’alɔ mɛ nú mɛ ɖěɖěe sín nǔ nyɔ́ nukún tɔn mɛ lɛ́ é. (Xa 1 Tɛsaloníkinu lɛ́ 2:4.) Ð’ayi lěe nɔví nyɔ̌nu e nɔ nyí Jocelyn é ɖu le wɛn ɖagbe ɔ jíjlá mɛ ɖěvo lɛ́ tɔn gbɔn é wú. Gbe ɖokpó ɔ, Jocelyn fɔ́n kpó linkpɔ́n kpó. É ɖɔ: “Un sɔ́ ɖó gǎn ɖé ǎ, bɔ é lɛ́ cí nú mì ɖɔ un kún xɔ akwɛ́ ó ɖɔhun. Amɔ̌, gběxosín-alijítɔ́ wɛ nú mì, bɔ kúnnuɖegbé sín azǎn ce lɛ́vɔ́ nɛ́. Énɛ́ wú ɔ, un xo ɖɛ, bo yi sinsɛnzɔ́ ɔ mɛ.” Zǎnzǎn énɛ́ ɔ, Jocelyn xo go Mary; nyɔ̌nu xomɛnyɔ́tɔ́ ɖé wɛ, bo yí gbe nú Biblu kplɔ́nkplɔ́n. Sun ɖé lɛ́ gúdo ɔ, Mary ɖɔ ɖɔ ɖɛ xo sɛ́dó Mawu dó byɔ́ alɔdó tɔn wɛ émí ɖe bɔ Jocelyn xúxú hɔn émítɔn. Jocelyn lin tamɛ dó nǔ énɛ́ e jɛ é jí, bo ɖɔ: “É cí nú mì ɖɔ Jexóva ɖo ɖiɖɔ nú mì wɛ ɖɔ: ‘Nǔ towe nyɔ́  nukún ce mɛ ɖɔhun.’” É ɖo wɛn ɖɔ é kún nyí mɛ lɛ́ bǐ wɛ ná yí mǐ ganjí ɖo sinsɛnzɔ́ ɔ mɛ ó. Amɔ̌, mǐ sixú kú d’é jí ɖɔ ényí mǐ wa nǔ e wú mǐ kpé é bǐ bo jlá wɛn ɖagbe ɔ mɛ ɖěvo lɛ́ ɔ, nǔ mǐtɔn nɔ nyɔ́ Jexóva nukúnmɛ.

17. Étɛ́ a ka kplɔ́n dó gbɛxixɔ ɔ wú ɖo xó ɖěɖěe Vicky ɖɔ lɛ́ é mɛ? (Ðɛhan 5:13)

¹⁷ Jexóva nɔ zɔn dó gbɛxixɔ ɔ wú dó sɔ́ hwɛ kɛ mɛ ɖěɖěe sín nǔ nɔ nyɔ́ nukún tɔn mɛ lɛ́ é. (1 Tim. 2:5, 6) Amɔ̌, ényí mǐ ɖi nǔ nú gbɛxixɔ ɔ, bo bló batɛ́mu có, é ka kpo ɖo wǔ vɛ́ nú mǐ wɛ bɔ mǐ ná yí gbe ɖɔ nǔ mǐtɔn nyɔ́ Jexóva nukúnmɛ ɔ ka lo? Flín ɖɔ mǐ kún sixú ɖeji dó lěe nǔ nɔ cí nú mǐ é wú hwebǐnu ó, loɔ, mǐ sixú ɖeji dó Jexóva wú. Hwɛjijɔnɔ wɛ mɛ ɖěɖěe ɖi nǔ nú gbɛxixɔ ɔ lɛ́ é nyí ɖo Jexóva nukúnmɛ bɔ é d’akpá bo ná kɔn nyɔ̌ná dó yě jí. (Xa Ðɛhan 5:13; Hlɔ̌. 3:26) Tamɛ linlin dó gbɛxixɔ ɔ jí d’alɔ Vicky. Ée é lin tamɛ dó gbɛxixɔ ɔ jí dó nǔjɔnǔ mɛ gbe ɖokpó gúdo é ɔ, é wá ɖɔ: “Sín hwenu línlín ɖíe wɛ Jexóva ko ɖo suúlu ɖó dó wǔ ye wɛ. . . . Amɔ̌, é cí xó lěhun ɖɔ nú Jexóva wɛ un ɖe ɖɔhun: ‘A sixú yí wǎn nú gbɛtɔ́ nyiɖɔhun ǎ. Vɔ̌sísá Vǐ towe tɔn sixú cyɔ́n nǔ dó hwɛ ce lɛ́ ǎ.’” Ée é lin tamɛ dó nǔníná e gbɛxixɔ ɔ nyí é jí gúdo é ɔ, é jɛ mimɔ jí ɖɔ Jexóva yí wǎn nú émí. Ényí mǐ lɔmɔ̌ nɔ lin tamɛ dó gbɛxixɔ ɔ jí ɔ, mǐ ná mɔ ɖɔ Jexóva yí wǎn nú mǐ bɔ nǔ mǐtɔn lɛ́ nyɔ́ nukún tɔn mɛ.

18. Ényí mǐ kpo ɖo wǎn yí nú Tɔ́ mǐtɔn jǐxwé tɔn ɔ wɛ ɔ, étɛ́ jí mǐ ka sixú kú dó?

¹⁸ Mǐ sixú dó gǎn syɛ́nsyɛ́n bo xwedó wě e è ɖe xá mǐ ɖo aga lɛ́ é có, hweɖélɛ́nu ɔ, awakanmɛ sixú kú mǐ bɔ mǐ jɛ kinkanbyɔ́ mǐɖée jí ɖɔ nǔ mǐtɔn ka nyɔ́ Jexóva nukúnmɛ a jí. Ényí nǔ mɔ̌hun jɛ hǔn, flín ɖɔ mɛ ɖěɖěe “kpo ɖo wǎnyíyí ɖó n’i wɛ lɛ́ é” sín nǔ nɔ nyɔ́ nukún tɔn mɛ. (Ja. 1:12) Énɛ́ wú ɔ, kpo ɖo vǐvɛ́ xá Jexóva wɛ, bo nɔ lɛ́ ɖ’ayi ali ɖěɖěe nu é nɔ ɖe xlɛ́ ɖe ɖɔ nǔ towe nɔ nyɔ́ nukún tɔn mɛ ɖe lɛ́ é wú. Nɔ hɛn d’ayi mɛ hwebǐnu ɖɔ Jexóva kún “lín dó ɖokpó ɖokpó mǐtɔn” ó.—Mɛ. 17:27.