1-2. (a) Ninɔmɛ tɛ́ mɛ Pɔ́lu ka ɖe bo wlán wěma sɛ́dó Efɛ́zinu lɛ́? (b) Nǔkanbyɔ́ tɛ́ lɛ́ mǐ ka ná ba xósin ná?

 HWENU e è sú Pɔ́lu dó xwé ɖé gbe ɖo Hlɔ̌ma é ɔ, é jló ná dó wǔsyɛ́n lanmɛ nú nǔɖitɔ́ hǎtɔ́ tɔn lɛ́. É sixú yi ba yě kpɔ́n cɔɔ lě ǎ, énɛ́ wú ɔ, é wlán wěma sɛ́dó yě. Wěma e é wlán sɛ́dó Efɛ́zinu lɛ́ ɖo xwe 60 H.M. tɔn mɔ̌ alǒ xwe 61 H.M. tɔn mɔ̌ é ɖo wěma énɛ́ lɛ́ mɛ.—Efɛ́. 1:1; 4:1.

² Xwe wǒ mɔ̌ wá yi ɔ, Pɔ́lu ko nɔ Efɛ́zi nú hwenu kpɛɖé, bo jlá wɛn ɖagbe ɔ lobo kplɔ́n nǔ mɛ. (Mɛ. 19:1, 8-10; 20:20, 21) É yí wǎn nú nɔví tɔn lɛ́ titewungbe tɔn, bo jló ná d’alɔ yě bónú yě ní nɔ gbejí nú Jexóva. Amɔ̌, aniwú é ka wlán nǔ sɛ́dó klisánwun e gbigbɔ mímɛ́ sɔ́ lɛ́ é dó zǐnflú kpó wěziza kpó wú lo? Étɛ́ lɛ́ wě énɛ́ e é ɖe xá yě é ka sixú kplɔ́n klisánwun lɛ́ bǐ? Mi nú mǐ ní ba xósin nú nǔkanbyɔ́ énɛ́ lɛ́.

SÍN ZǏNFLÚ MƐ WÁ WĚZIZA NU

3. Nǔjlɛ́dónǔwú tɛ́ Pɔ́lu ka zán ɖo wěma e é sɛ́dó Efɛ́zinu lɛ́ é mɛ?

³ Pɔ́lu wlán nǔ élɔ́ sɛ́dó klisánwun e ɖo Efɛ́zi lɛ́ é: “Mi ko nɔ zǐnflú mɛ ɖ’ayǐ, amɔ̌ din ɔ, mi ɖo wěziza nu.” (Efɛ́. 5:8) Pɔ́lu zán xókwín zǐnflú kpó wěziza kpó ɖo fí dó xlɛ́ lě do Efɛ́zinu lɛ́ húzú sɔ é. Mi nú mǐ ní ɖɔ xó dó nǔ e wú Pɔ́lu ná ko ɖɔ ɖɔ Efɛ́zinu lɛ́ “ko nɔ zǐnflú mɛ ɖ’ayǐ” é jí.

4. Ali tɛ́ nu Efɛ́zinu lɛ́ ka ɖo zǐnflú mɛ ɖo sinsɛn linu ɖe?

 ⁴ Zǐnflú mɛ ninɔ ɖo sinsɛn linu. Efɛ́zinu e Pɔ́lu wlán wěma sɛ́dó lɛ́ é ko nyí kannumɔ nú sinsɛn nǔvú sín linlin lɛ́ kpó xɛxó lɛ́ kpó cóbó wá kplɔ́n nǔ dó nǔgbó ɔ wú, bo húzú klisánwun. Toxo Efɛ́zi tɔn mɛ wɛ vodúnxɔ Aatemísi tɔn nukúnɖéjí ɔ ɖe; vodúnxɔ énɛ́ wɛ mɛ hwexónu tɔn lɛ́ nɔ kpɔ́n dó mɔ nǔ tɛ́nwe e jí wǔ ɖo gbɛ ɔ mɛ lɛ́ é ɖokpó. Mɛ lɛ́ nɔ yi sɛn bǒcyɔ lɛ́ ɖo fínɛ́. Ajɔ̌ e kpé kwɛ́ tawun é ɖé wɛ vodúnxɔ Aatemísi tɔn kpɛví kpɛví lɛ́ blóbló bo sa nyí. (Mɛ. 19:23-27) Gɔ́ ná ɔ, mɛ e ɖo toxo ɔ mɛ lɛ́ é gěgé nyí majíkiblótɔ́.—Mɛ. 19:19.

5. Ali tɛ́ nu Efɛ́zinu lɛ́ ka ɖo zǐnflú mɛ ɖo walɔ ɖagbe linu ɖe?

⁵ Zǐnflú mɛ ninɔ ɖo walɔ ɖagbe linu. Mɛ e ɖo Efɛ́zi lɛ́ é nyí nǔblíblíwatɔ́ heelú lɛ́ bɔ nǔwalɔ yětɔn ka nɔ lɛ́ hu winnyá nú yě ǎ. È nɔ yá wǔ se xó gblégblé lɛ́ ɖo nǔkpɔ́ntɛn toxo ɔ tɔn lɛ́, bo tlɛ nɔ lɛ́ se ɖo nǔwiwa sinsɛn tɔn lɛ́ domɛ. (Efɛ́. 5:3) “Nǔ ɖěbǔ sɔ́ nɔ nyí winnyá nú” gěgé Efɛ́zinu lɛ́ tɔn ǎ, énɛ́ sín tínmɛ blǔju tɔn wɛ nyí ɖɔ yě “sɔ́ nɔ se vǐvɛ́ ǎ.” (Efɛ́. 4:17-19) Cóbónú Efɛ́zinu lɛ́ ná kplɔ́n nǔ dó nǔgbódodó Jexóva tɔn e kunkplá nǔ ɖagbe kpó nǔ nyanya kpó lɛ́ é wú ɔ, ayi yětɔn nɔ dó ya nú yě, hwenu e yě wa nǔ nyanya é ǎ; yě nɔ lɛ́ lin ɖɔ émí kún ɖó gbe ɖě bo ná ɖó nú Jexóva ó. Hwɛjijɔ énɛ́ wú wɛ Pɔ́lu ná ko ɖɔ dó yě wú ɖɔ yě “ɖo ablu mɛ bo jɛ zɔ nú gbɛ e nyí Mawu tɔn é.”

6. Aniwú Pɔ́lu ka sixú ko ɖɔ nú Efɛ́zinu lɛ́ ɖɔ: “Din ɔ, mi ɖo wěziza nu”?

⁶ É ɖo mɔ̌ có, Efɛ́zinu ɖé lɛ́ cí zǐnflú ɔ mɛ ǎ. Pɔ́lu wlán xó élɔ́ dó yě wú: “Din ɔ, mi ɖo wěziza nu, ɖó bǔ e mi ɖe xá Aklúnɔ é wútu.” (Efɛ́. 5:8) Yě zunfán nǔgbó Biblu tɔn e cí wěziza ɖɔhun é. (Ðɛh. 119:105) Efɛ́zinu énɛ́ lɛ́ jó nǔwalɔ sinsɛn nǔvú tɔn yětɔn lɛ́ kpó nǔblíblíwiwa kpó dó. Yě nɔ “xwedó kpɔ́ndéwú Mawu tɔn” bo ɖo nǔ e wú yě kpé é bǐ wa wɛ bo ná sɛn Jexóva lobo hɛn xomɛ tɔn hun.—Efɛ́. 5:1.

7. Ali tɛ́ nu ninɔmɛ mǐtɔn ka cí klisánwun Efɛ́zi tɔn lɛ́ sín ninɔmɛ ɖɔhun ɖe?

⁷ Ðo ali ɖokpó ɔ nu ɔ, cóbónú mǐ ná kplɔ́n nǔ dó nǔgbó ɔ wú ɔ, mǐ ko nɔ zǐnflú mɛ ɖo  sinsɛn kpó walɔ ɖagbe kpó linu. Mǐ mɛ ɖé lɛ́ ko nɔ ɖu xwe sinsɛn nǔvú tɔn lɛ́, bɔ mɛ ɖěvo lɛ́ nɔ zán gbɛ blíblí. Amɔ̌, ée mǐ kplɔ́n nǔ dó nǔgbódodó Jexóva tɔn e kunkplá nǔ ɖagbe kpó nǔ nyanya kpó lɛ́ é wú é ɔ, mǐ bló hǔzúhúzú lɛ́. Mǐ jɛ gbɛ zán sɔgbe xá nǔgbódodó jlɔ́jlɔ́ Mawu tɔn lɛ́ jí. Bɔ wǎgbɔ tɔn ɔ, é hɛn le gěgé wá nú mǐ. (Eza. 48:17) É ɖo mɔ̌ có, mǐ kpo ɖo tagba ɖé lɛ́ mɔ wɛ. Mǐ ɖó ná nɔ zɔ nú zǐnflú e mɛ mǐ gosín é, bo ná “ɖo gbɛ zán wɛ vǐ wěziza tɔn lɛ́ ɖɔhun.” Nɛ̌ mǐ ka sixú wa mɔ̌ gbɔn?

NƆ ZƆ NÚ ZǏNFLÚ

8. Sɔgbe xá Efɛ́zinu lɛ́ 5:3-5 ɔ, étɛ́ lɛ́ klisánwun Efɛ́zi tɔn lɛ́ ka ɖó ná nyi alɔ ná?

⁸ Xa Efɛ́zinu lɛ́ 5:3-5. Bo ná dó kpo ɖo zɔ nɔ nú zǐnflúmɛninɔ ɖo walɔ ɖagbe lixo wɛ ɔ, klisánwun Efɛ́zi tɔn lɛ́ ɖó ná kpo ɖo alɔ nyi nú nǔwalɔ ɖěɖěe ma nɔ nyɔ́ Jexóva nukúnmɛ ǎ lɛ́ é wɛ. Nǔblíblíwiwa kɛ́ɖɛ́ wɛ ǎ, xó gblégblé lɛ́ lɔ ɖ’é mɛ. Pɔ́lu flín klisánwun Efɛ́zi tɔn lɛ́ ɖɔ yě ɖó ná nyi alɔ nú nǔ mɔ̌hun lɛ́ ényí yě jló ná ɖu “Axɔ́súɖuto Klísu kpó Mawu kpó tɔn sín gǔ” ɔ nɛ́.

9. Aniwú mǐ ka ɖó ná nyi alɔ nú nǔ ɖěbǔ e sixú dɔn mǐ dó nǔblíblíwiwa mɛ é?

⁹ Mǐ lɔmɔ̌ ɖó ná kpo ɖo ahwan fun wɛ, bo ma wá húzú kannumɔ nú “azɔ̌ e ma nɔ ná sínsɛ́n ǎ, bo nyí zǐnflú tɔn lɛ́ é” ó. (Efɛ́. 5:11) Nǔ e è mɔ kpɔ́n lɛ́ é xlɛ́ ɖɔ, hwɛhwɛ ɔ, lě do mɛɖé nɔ kpɔ́n, ɖótó, alǒ ɖɔ xó dó nǔ kwíjikwíji lɛ́ alǒ nǔblíblíwiwa wú sɔ é ɔ, mɔ̌ do wɛ é nɔ bɔ wǔ n’i sɔ bɔ é ná wa nǔ nyanya. (Bǐb. 3:6; Ja. 1:14, 15) Ðo to ɖé mɛ ɔ, nɔví súnnu kpó nɔví nyɔ̌nu kpó gěgé húzú xɔ́ntɔn ɖo tɛn Ɛntɛnɛ́ti tɔn e jí è nɔ zun xɔ́ntɔn ɖe é ɖé jí. Ðo bǐbɛ́mɛ ɔ, yě mɛ gěgé nɔ ɖɔ xó dó nǔ gbigbɔ tɔn lɛ́ wú. Amɔ̌ kpɛɖé kpɛɖé ɔ, yě jɛ xó ɖɔ dó nǔ e ma nɔ nyɔ́ Jexóva nukúnmɛ ǎ lɛ́ é wú jí. Yě jɛ xó ɖɔ dó xóɖóxámɛ wú jí hú gǎn. Nukɔnmɛ ɔ, nɔví súnnu énɛ́ lɛ́ gěgé wá yí gbe ɖɔ, xó gblégblé énɛ́ lɛ́ ɖiɖɔ zɔ́n bɔ émí lɛ aga.

10. Nɛ̌ Satáan ka nɔ tɛ́n kpɔ́n bo ná blɛ́ mǐ gbɔn? (Efɛ́zinu lɛ́ 5:6)

¹⁰ Gbɛ Satáan tɔn nɔ tɛ́n kpɔ́n bo ná blɛ́ mǐ, bo ná bló bɔ mǐ ná ɖi ɖɔ nǔ e Jexóva nɔ ylɔ́ ɖɔ nǔ blíblí, alǒ nǔ kwíjikwíji é kún nylá ɖěbǔ ó. (2 Pi. 2:19) Énɛ́ ka kpácá mǐ ɖěbǔ ǎ! Wlɛnwín e Awǒvi nɔ zán hwɛhwɛ lɛ́ é ɖokpó wɛ nyí ɖɔ, é nɔ flú mɛ lɛ́ bɔ yě sɔ́ nɔ kpé wú bo nɔ tuun nǔ ɖagbe ɖó vo nú nǔ nyanya ǎ. (Eza. 5:20; 2 Kɔ. 4:4) É nɔ kpácá mǐ ɖěbǔ ɖɔ fímu, tuto televizyɔn jí tɔn lɛ́ kpó tɛn Ɛntɛnɛ́ti tɔn lɛ́ kpó gěgé nɔ sɔ́ linlin e sɔ́ ta nǔgbódodó jlɔ́jlɔ́ Jexóva tɔn lɛ́ é ɖ’ajo ǎ. Satáan nɔ tɛ́n kpɔ́n bo ná blɛ́ mǐ, bónú mǐ ná lin ɖɔ nǔwalɔ blíblí lɛ́ kpó gbɛ blíblí zínzán kpó nyɔ́, nɔ ná mɛ awǎjijɛ, bo kún ka nɔ lɛ́ hɛn nǔ ɖě gblé dó mɛ wú ó.—Xa Efɛ́zinu lɛ́ 5:6.

11. Nɛ̌ nǔ e xá Angela é ka xlɛ́ ɖɔ mǐ ɖó ná nɔ zán wě e nǔnywɛ́ kpé bɔ è ɖe xá mɛ ɖo Efɛ́zinu lɛ́ 5:7 mɛ é gbɔn? (Kpɔ́n fɔtóo ɔ lɔmɔ̌.)

¹¹ Satáan nɔ jló ɖɔ mǐ ní dó gbɛ̌ xá mɛ ɖěɖěe ná bló bɔ é ná vɛ́ wǔ nú mǐ bɔ mǐ ná tɛ́ dó nǔgbódodó Jexóva tɔn lɛ́ wú lɛ́ é. Énɛ́ wɛ zɔ́n bɔ Pɔ́lu dó wǔsyɛ́n élɔ́ lanmɛ nú klisánwun Efɛ́zi tɔn lɛ́: “Mi ma kpé nǔ ɖěbǔ xá yě ó,” énɛ́ wɛ nyí, mɛ ɖěɖěe nɔ wa nǔ e nylá Mawu nukúnmɛ lɛ́ é. (Efɛ́. 5:7) Amɔ̌, é byɔ́ ɖɔ mǐ ní tlɛ lɛ́ cɔ́ mǐɖée lɛ́ hú gǎn klisánwun e nɔ Efɛ́zi ɖo hwexónu lɛ́ é, ɖó égbé ɔ, mɛ e mǐ nɔ mɔ cɔɔ lě lɛ́ é kɛ́ɖɛ́ wɛ mǐ sixú zán hwenu ɖó kpɔ́ xá ǎ. Loɔ, mǐ sixú lɛ́ wa mɔ̌ ɖo tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é jí. Angela a e nɔ nɔ Azíi é mɔ lě do tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é sixú nyí awǒvinú sɔ é. É yí gbe ɖɔ: “É cí mɔ ɖé ɖɔhun, bɔ kpɛɖé kpɛɖé ɔ, é nɔ húzú linlin mɛtɔn. É sɔ́ lín ǎ bɔ xɔ́ntɔn zunzun xá mɛ ɖěɖěe ma nɔ ɖó sísí nú  nǔgbódodó Biblu tɔn lɛ́ ǎ é sɔ́ nɔ dó ya nú mì ǎ. Wǎgbɔ tɔn ɔ, un jɛ linlin jí ɖɔ, è ní zán gbɛ e ma nyɔ́ Jexóva nukúnmɛ ǎ é kún nylá ó.” É su nukún mǐtɔn mɛ ɖɔ mɛxó agun tɔn wǎnyíyínɔ lɛ́ d’alɔ Angela bɔ é bló hǔzúhúzú e jɛxá lɛ́ é. É ɖɔ: “Jexóva kpó linlin tɔn lɛ́ kpó jí wɛ un nɔ sɔ́ ayi ɖó din, é sɔ́ nɔ nyí ɖó tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é jí ǎ.”

12. Étɛ́ ka ná d’alɔ mǐ bɔ mǐ ná tɛ́ dó nǔgbódodó Jexóva tɔn e kunkplá nǔ ɖagbe kpó nǔ nyanya kpó lɛ́ é wú?

¹² Mǐ ɖó ná nɔ fun ahwan xá linlin gbɛ ɔ tɔn e ɖɔ ɖɔ nǔblíblíwiwa sɔgbe é. Ðó mǐ tuun ɖɔ é nylá. (Efɛ́. 4:19, 20) É ná nyɔ́ tawun ɖɔ mǐ ní nɔ kan nǔ élɔ́ lɛ́ byɔ́ mǐɖée: ‘Un ka kán ɖ’é jí bo ná nɔ nyi alɔ nú gbɛ̌ e ma ɖo dandan ǎ é dídó xá azɔ̌gbɛ́ ce lɛ́, wěmaxɔmɛvígbɛ́ ce lɛ́, alǒ mɛ ɖěvo e ma nɔ ɖó sísí nú nǔgbódodó jlɔ́jlɔ́ Jexóva tɔn lɛ́ ǎ é a? Un ka nɔ kpankɔ́n bo nɔ tɛ́ dó nǔgbódodó Jexóva lɛ́ wú ényí mɔ̌ wiwa tlɛ ná zɔ́n bɔ mɛɖé lɛ́ ná lin ɖɔ un nɔ hɛn nǔ gángángán ɔ a?’ Lěe 2 Timɔtée 2:20-22 xlɛ́ gbɔn é ɔ, mǐ ɖó ná lɛ́ ɖó ayi te, hwenu e mǐ ná ɖo mɛ e mǐ ná zun xɔ́ntɔn vívɛ́ xá ɖo agun klisánwun tɔn mɛ lɛ́ é cyán wɛ é. Mǐ nɔ hɛn d’ayi mɛ ɖɔ mɛɖé lɛ́ tíin bo kún sixú d’alɔ mǐ bɔ mǐ ná nɔ gbejí nú Jexóva ó.

GBƐ ZÍNZÁN “VǏ WĚZIZA TƆN LƐ́ ÐƆHUN”

13. Étɛ́ ka nyí tínmɛ è “ní nɔ ɖo gbɛ zán wɛ vǐ wěziza tɔn lɛ́ ɖɔhun” tɔn? (Efɛ́zinu lɛ́ 5:7-9)

¹³ Pɔ́lu dó wǔsyɛ́n lanmɛ nú klisánwun Efɛ́zi tɔn lɛ́ ɖɔ yě ní nɔ nyi alɔ nú zǐnflú kpowun ǎ, loɔ, é lɛ́ dó wǔsyɛ́n lanmɛ nú yě ɖɔ yě “ní nɔ ɖo gbɛ zán wɛ vǐ wěziza tɔn lɛ́ ɖɔhun.” (Xa Efɛ́zinu lɛ́ 5:7-9.) Étɛ́ ka nyí tínmɛ énɛ́ tɔn? Tínmɛ tɔn kpowun wɛ nyí ɖɔ mǐ ná nɔ zán gbɛ klisánwun nǔgbó ɖɔhun hwebǐnu. Ali e nu mǐ sixú kpé énɛ́ wú ɖe é ɖokpó wɛ nyí ɖɔ mǐ ná nɔ xa Biblu kpó wěma mǐtɔn lɛ́ kpó, kpódó sɔxwixwe kpán, lobo ná nɔ lɛ́ kplɔ́n yě gbɔn mɔ̌. É lɛ́ ɖo tají tawun ɖɔ mǐ ní nɔ sɔ́ ayi ɖó kpɔ́ndéwú Jezu Klísu e nyí “wěziza nú gbɛ ɔ” é tɔn kpó nǔkplɔ́nmɛ tɔn lɛ́ kpó jí ganjí.—Jaan 8:12; Nǔx. 6:23.

14. Nɛ̌ gbigbɔ mímɛ́ ka sixú d’alɔ mǐ gbɔn?

¹⁴ Mǐ ɖó alɔdó gbigbɔ mímɛ́ Mawu tɔn tɔn sín hudó bo ná dó kpo ɖo gbɛ zán wɛ “vǐ wěziza tɔn lɛ́ ɖɔhun.” Aniwú? Ðó é vɛ́ wǔ tawun bɔ è ná nɔ mǐmɛ́ jí ɖo gbɛ élɔ́ e nǔblíblíwiwa  gɔ́ é mɛ. (1 Tɛ. 4:3-5, 7, 8) Gbigbɔ mímɛ́ sixú d’alɔ mǐ bɔ mǐ ná fun ahwan xá linlin gbɛ ɔ tɔn lɛ́, káká jɛ tamɛ-núkplɔ́nmɛ tɔn lɛ́ kpó linlin e mɛ e ɖo gbɛ ɔ mɛ lɛ́ é nɔ ɖó bɔ yě sɔ́ ta linlin Mawu tɔn lɛ́ é kpó jí. Gbigbɔ mímɛ́ sixú lɛ́ d’alɔ mǐ bɔ mǐ ná ná sínsɛ́n “ɖagbewiwa alɔkpa bǐ” kpó “nǔjlɔ́jlɔ́wiwa alɔkpa bǐ” kpó tɔn.—Efɛ́. 5:9.

15. Ali tɛ́ lɛ́ nu mǐ ka sixú mɔ gbigbɔ mímɛ́ yí ɖe? (Efɛ́zinu lɛ́ 5:19, 20)

¹⁵ Ali e nu mǐ sixú mɔ gbigbɔ mímɛ́ yí ɖe lɛ́ é ɖokpó wɛ nyí ɖɔ mǐ ná nɔ xo ɖɛ dó byɔ́. Jezu ɖɔ ɖɔ Jexóva ná “ná gbigbɔ mímɛ́ mɛ e nɔ ɖo byɔ̌byɔ́ ɛ wɛ lɛ́ é.” (Luk. 11:13) Gɔ́ ná ɔ, ényí mǐ ɖo susu kpa nú Jexóva wɛ ɖó kpɔ́ ɖo kplé klisánwun tɔn mǐtɔn lɛ́ jí ɔ, mǐ nɔ lɛ́ mɔ gbigbɔ mímɛ́ yí. (Xa Efɛ́zinu lɛ́ 5:19, 20.) Alɔ e gbigbɔ mímɛ́ Mawu tɔn nɔ dó mǐ é ná zɔ́n bɔ mǐ ná zán gbɛ e nɔ nyɔ́ Mawu nukúnmɛ é.

16. Étɛ́ ka ná d’alɔ mǐ bɔ mǐ ná wá gbeta e nǔnywɛ́ kpé lɛ́ é kɔn? (Efɛ́zinu lɛ́ 5:10, 17)

¹⁶ Ényí mǐ ɖo gbeta tají lɛ́ kɔn ná wa wɛ ɔ, é byɔ́ ɖɔ mǐ ní nɔ mɔ nukúnnú jɛ “nǔ e nyí jlǒ Jexóva tɔn é” mɛ, bɔ énɛ́ gúdo ɔ, mǐ ná nɔ wa nǔ sɔgbe xá. (Xa Efɛ́zinu lɛ́ 5:10, 17.) Ényí mǐ nɔ ba nǔgbódodó Biblu tɔn e ɖɔ xó dó ninɔmɛ mǐtɔn wú lɛ́ é hǔn, linlin e Mawu ɖó dó xó ɔ wú é ba wɛ mǐ ɖe mɔ̌ nɛ́. Énɛ́ gúdo ɔ, ényí mǐ nɔ wa nǔ sɔgbe xá nǔgbódodó tɔn lɛ́ ɔ, mǐ ná kpé wú bo ná nɔ wá gbeta ɖagbe lɛ́ kɔn.

17. Étɛ́ hwenu mǐtɔn zínzán kpó nǔnywɛ́ kpó ka nɔ byɔ́? (Efɛ́zinu lɛ́ 5:15, 16) (Kpɔ́n fɔtóo ɔ lɔmɔ̌.)

¹⁷ Pɔ́lu lɛ́ ɖe wě xá klisánwun Efɛ́zi tɔn lɛ́ ɖɔ yě ní nɔ zán hwenu yětɔn kpó nǔnywɛ́ kpó. (Xa Efɛ́zinu lɛ́ 5:15, 16.) Kɛntɔ́ mǐtɔn Satáan e nyí “mɛ nyanya ɔ” é nɔ ba ná bló bɔ alɔnu mǐtɔn ná ján ɖo gbɛ ɔ sín nǔ lɛ́ kɔn sɔmɔ̌, bɔ mǐ sɔ́ ná mɔ hwenu ɖě dó sɛn Mawu ǎ. (1 Jaan 5:19) É bɔ wǔ tawun ɖɔ klisánwun ɖé ní jɛ ayi sɔ́ ɖó nǔɖókan lɛ́, wěmaxɔmɛ kpó azɔ̌ kpó jí jí, bo sɔ́ ná nɔ sɔ́ ayi ɖó ali tootóbú e hun n’i bɔ é ná sɛn Jexóva é jí ǎ. Ényí nǔ nyí mɔ̌ hǔn, xlɛ́xlɛ́ wɛ énɛ́ ɖe ɖɔ linlin  gbɛ ɔ tɔn ko ɖo nǔ wa dó wǔ tɔn wɛ. Nǔ énɛ́ lɛ́ nylá dandan wɛ ǎ, loɔ, yě ɖó ná nɔ nɔ tɛn nukɔntɔn ɔ mɛ ɖo gbɛzán mǐtɔn mɛ gbeɖé ǎ. Bo ná dó nɔ zán gbɛ “vǐ wěziza tɔn lɛ́ ɖɔhun” ɔ, mǐ ɖó ná nɔ “zán hwenu [mǐtɔn] ganjí,” bo ná nɔ sɔ́ ayi ɖó nǔ e ɖo tají nǔgbó nǔgbó lɛ́ é jí.

18. Afɔ tɛ́ lɛ́ Donald ka ɖe bo ná dó zán hwenu tɔn ganjí?

¹⁸ Ba ali ɖěɖěe sixú hun nú we bɔ a ná sɛn Jexóva d’é jí hú gǎn lɛ́ é. Nǔ e Donald e nɔ nɔ Afrique du sud é wa é nɛ́. É ɖɔ: “Un lin tamɛ dó ninɔmɛ ce jí bo sa vo nú Jexóva ɖɔ é ní d’alɔ mì bónú sinsɛnzɔ́ ce ní ná sínsɛ́n hú gǎn. Un xo ɖɛ bo byɔ́ azɔ̌ e ná d’alɔ mì, bɔ un ná mɔ hwenu hú gǎn bo ɖɔ mawuxó é. Kpó alɔdó Jexóva tɔn kpó ɔ, un mɔ azɔ̌ e jɛxá é. Énɛ́ gúdo ɔ, nyi kpó asi ce kpó jɛ gběxosín-alijítɔ́zɔ́ wa jí ɖó kpɔ́.”

19. Nɛ̌ mǐ ka sixú kpo ɖo gbɛ zán wɛ “vǐ wěziza tɔn lɛ́ ɖɔhun” gbɔn?

¹⁹ Wěma e Pɔ́lu wlán sɛ́dó Efɛ́zinu lɛ́ é ná ko d’alɔ yě tawun bɔ yě nɔ gbejí nú Jexóva. Wě énɛ́ e gbigbɔ mímɛ́ sɔ́ dó ayi mɛ n’i bɔ é ɖe xá mɛ é sixú d’alɔ mǐ lɔ. Lěe mǐ mɔ gbɔn é ɔ, é sixú d’alɔ mǐ bɔ mǐ ná cyán ayiɖeɖayǐ mǐtɔn lɛ́, gɔ́ nú xɔ́ntɔn mǐtɔn lɛ́ kpó nǔnywɛ́ kpó. É sixú sísɛ́ mǐ bɔ mǐ ná nɔ kplɔ́n Biblu ɖo gbesisɔmɛ bónú wěziza nǔgbó ɔ tɔn ní kpo ɖo ali xlɛ́ mǐ wɛ ɖo nǔwiwa mǐtɔn lɛ́ bǐ mɛ. É lɛ́ tɛ ɖɛ̌ lěe gbigbɔ mímɛ́ e sixú zɔ́n bɔ mǐ ná ná sínsɛ́n ɖagbe lɛ́ é ɖo tají sɔ é jí. Nǔ e Pɔ́lu wlán lɛ́ é zínzán sixú d’alɔ mǐ, bɔ mǐ ná wá gbeta e nǔnywɛ́ kpé, bo sɔgbe xá linlin Jexóva tɔn lɛ́ é kɔn. Nǔ énɛ́ lɛ́ wiwa ná zɔ́n bɔ mǐ ná kpé wú bo nɔ zɔ nú zǐnflú gbɛ élɔ́ tɔn, bo kpo ɖo wěziza nu!