1. Etɛ Jehovah ka wà nú mɛsɛntɔ́ tɔn gbejinɔtɔ́ lɛ ɖokpo ɖokpo?

WANYIYI sísɛ́ Jehovah bɔ é sɔ́ mɛsɛntɔ́ tɔn gbejinɔtɔ́ lɛ ɖokpo ɖokpo ɖó tɛn ɖé mɛ ɖò agun tɔn mɛ. Azɔ̌ mǐtɔn gbɔn vovo có, mǐ bǐ wɛ ka xɔ akwɛ, bo lɛ́ ɖó hudo mǐɖée tɔn. Mɛsɛ́dó Pɔlu d’alɔ mǐ bɔ mǐ mɔ nǔ jɛ nǔkplɔnmɛ taji enɛ wu. Gbɔn nɛ̌ é?

2. Sɔgbe xá Efɛzinu lɛ 4:16 ɔ, etɛwu mǐ ka ɖó na nɔ ɖó sísí nú mǐɖée bo na nɔ wà azɔ̌ ɖó kpɔ́?

² Lee wemafɔ e jí xóta ɔ jinjɔn é ɖɔ gbɔn é ɔ, mǐ mɛ ɖebǔ sixu ɖɔ ɖɔ mɛsɛntɔ́ Jehovah tɔn ɖevo lɛ sín nǔ kún hudo mǐ ó ǎ. (1 Kɔ. 12:21) Enyi mǐ ba ɖɔ fífá ni tíìn ɖò agun ɔ mɛ ɔ, mǐ ɖó na nɔ ɖó sísí nú mǐɖée bo na lɛ́ wà azɔ̌ ɖó kpɔ́. (Xà Efɛzinu lɛ 4:16.) Enyi mǐ nɔ nɔ bǔ bo nɔ w’azɔ̌ ɖó kpɔ́ ɔ, agun ɔ na yì nukɔn bo na lidǒ ɖò wanyiyi mɛ.

3. Etɛ lɛ jí mǐ ka na ɖɔ xó dó ɖò xóta elɔ mɛ?

³ Ninɔmɛ tɛ lɛ mɛ mɔ̌ mǐ ka sixu ɖè sísí xlɛ́ Klisanwun ɖevo lɛ ɖò agun ɔ mɛ ɖè? Ðò xóta elɔ mɛ ɔ, mǐ na ɖɔ xó dó lee mɛxo agun tɔn lɛ sixu ɖè sísí xlɛ́ mɛxo agun tɔn gbɛ̌ yetɔn lɛ gbɔn é jí. Enɛ gudo ɔ, mǐ na ɖɔ xó dó lee mǐ bǐ sixu ɖè sísí xlɛ́ nɔví sunnu kpo nɔví nyɔnu kpo tlɛnnɔ lɛ gbɔn é jí. Gudo mɛ ɔ, mǐ na kplɔ́n lee mǐ sixu ɖè sísí xlɛ́ mɛ ɖěɖee ma sixu dó gbè mǐtɔn ganji ǎ lɛ é gbɔn é.

4. Wěɖexámɛ Pɔlu tɔn tɛ ka ɖò Hlɔmanu lɛ 12:10 mɛ bɔ mɛxo agun tɔn lɛ ɖó na xwedó?

⁴ Gbigbɔ mímɛ́ Jehovah tɔn wɛ nɔ sɔ́ mɛxo agun tɔn lɛ bǐ. É ɖò mɔ̌ có, ye mɛ ɖokpo ɖokpo ɖó nǔwukpíkpé vovo lɛ. (1 Kɔ. 12:17, 18) Mɛɖé lɛ sixu nyí mɛxo agun tɔn yɔyɔ̌, bo ko mɔ nǔ kpɔ́n sɔ mɛxo agun tɔn ɖevo lɛ ǎ. Xwè kpo azɔn kpo sixu ɖó dogbó nú mɛ ɖevo lɛ. É ɖò mɔ̌ có, mɛxo ɖě ɖó na kpɔ́n mɛxo gbɛ̌ tɔn ɖevo bo ɖɔ ɖɔ “nǔ tɔn kún hudo emi ó ǎ.” É nyɔ́ wà ɔ, mɛxo lɛ ɖokpo ɖokpo ɖó na xwedó wěɖexámɛ Pɔlu tɔn e ɖò Hlɔmanu lɛ 12:10 mɛ é.—Xà.

5. Nɛ̌ mɛxo agun tɔn lɛ ka nɔ xlɛ́ ɖɔ ye ɖó sísí nú mɛxo agun tɔn gbɛ̌ yetɔn lɛ gbɔn? Etɛwu é ka ɖò taji ɖɔ ye ni wà mɔ̌?

⁵ Mɛxo agun tɔn lɛ nɔ xlɛ́ ɖɔ ye ɖó sísí nú mɛxo agun tɔn gbɛ̌ yetɔn lɛ gbɔn tóɖiɖó ye ganji gblamɛ. Enɛ ɖò taji titewungbe hwenu e mɛxo agun tɔn lɛ kplé bo na kɛnu dó nǔ taji lɛ jí é. Etɛwu? Ðǒ ayi nǔ e Atɔxwɛ (Flansegbe) 1^er octobre 1988 tɔn ɖɔ é wu: “Mɛxo agun tɔn lɛ ɖó na tuùn ɖɔ Klisu sixu zán gbigbɔ mímɛ́ dó xlɛ́ ali mɛxo agun tɔn e ɖò kplékplé mɛxo lɛ tɔn mɛ é ɖebǔ, bonu é na ɖɔ nǔgbododó Biblu tɔn e sín hudo ye ɖó bo na ɖeɖɛ ninɔmɛ ɖé alǒ wá gbeta taji ɖé kɔn é.” (Mɛ. 15:6-15) Mɛxo agun tɔn ɖě jí wɛ gbigbɔ mímɛ́ nɔ nɔ ɖò kplékplé mɛxo lɛ tɔn mɛ ǎ.

6. Nɛ̌ mɛxo agun tɔn lɛ ka sixu nɔ bǔ bo wà azɔ̌ ɖó kpɔ́ gbɔn? Enyi ye wà mɔ̌ ɔ, nɛ̌ agun ɔ ka nɔ ɖu lè tɔn gbɔn?

⁶ Mɛxo agun e nɔ ɖó sísí nú mɛxo gbɛ̌ tɔn lɛ é nɔ tɛ́n kpɔ́n bo na nɔ ɖɔ xó jɛ nukɔn hwebǐnu ɖò kplé mɛxo lɛ tɔn jí ǎ. É nɔ ɖò xó ɖɔ wɛ gbɛmɛ, bo nɔ mɔ ɖɔ linlin emitɔn jɛn sɔgbe hwebǐnu ǎ. É nyɔ́ wà ɔ, é nɔ ɖɔ linlin tɔn kpo mɛɖéesɔ́hwe kpo. É nɔ ɖótó xó mɛ ɖevo lɛ tɔn kpo sɔxwixwe kpo. Taji bǐ ɔ, akpakpa nɔ sɔ́ ɛ dó nǔgbododó Biblu tɔn lɛ mímá, kpo alixlɛ́mɛ “[deví] gbejinɔtɔ́, ayiɖotenanɔ” ɔ tɔn lɛ xwixwedó kpo wu. (Mat. 24:45-47) Enyi  mɛxo agun tɔn lɛ ɖè wanyiyi kpo sísí kpo xlɛ́ yeɖée, hwenu e ye kplé bo ɖò xó ɖɔ ɖó kpɔ́ wɛ é ɔ, gbigbɔ mímɛ́ na nɔ kpɔ́ xá ye, bo xlɛ́ ali ye bɔ ye na wá gbeta e na hɛn agun ɔ lidǒ lɛ é kɔn.—Ja. 3:17, 18.

7. Linlin tɛ Jezu ka nɔ ɖó dó tlɛnmɛninɔ wu?

⁷ Asú kpo asì kpo lɛ, gɔ́ nú xwédo lɛ ɖò agun lɛ mɛ égbé. É ɖò mɔ̌ có, nɔví e ma wlí alɔ ǎ lɛ é gegě lɛ́ ɖò agun lɛ mɛ. Nukún tɛ mǐ ka ɖó na nɔ sɔ́ dó kpɔ́n tlɛnnɔ enɛ lɛ na? Mǐ ni kpɔ́n linlin e Jezu nɔ ɖó dó tlɛnmɛninɔ wu é. Jezu da asì ɖò sinsɛnzɔ́ tɔn ayikúngban jí tɔn ɔ hwenu ǎ. É nɔ tlɛnmɛ, bo sɔ́ éɖée bǐ jó nú azɔ̌ e è zɔ́n ɛ é. Jezu kplɔ́n mɛ gbeɖé ɖɔ dandan mɛ ɔ, Klisanwun lɛ ɖó na nɔ tlɛnmɛ alǒ wlí alɔ ǎ. É ɖò mɔ̌ có, é ɖɔ ɖɔ Klisanwun ɖé lɛ na wá gbeta ɔ kɔn bo na nɔ tlɛnmɛ. (Mat. 19:11, 12) Jezu nɔ ɖó sísí nú mɛ e ma ko wlí alɔ ǎ lɛ é. É nɔ kpɔ́n tlɛnnɔ lɛ dó mɔ mɛ e ma hwɛ́n nǔɖe alǒ mɛ e nǔɖe hwedó ɖò ali ɖé nu lɛ é ǎ.

8. Sɔgbe xá 1 Kɔlɛntinu lɛ 7:7-9 ɔ, etɛ Pɔlu ka dó wusyɛn lanmɛ nú Klisanwun lɛ ɖɔ ye ni lin tamɛ d’eji?

⁸ Jezu ɖɔhun ɔ, tlɛnnɔ wɛ nú mɛsɛ́dó Pɔlu hwenu e é wà sinsɛnzɔ́ tɔn é. Pɔlu kplɔ́n mɛ gbeɖé ɖɔ é nyla ɖɔ Klisanwun ɖé ni wlí alɔ ǎ. É tuùn ɖɔ gbeta mɛɖesunɔ tɔn wɛ. É ɖò mɔ̌ có, Pɔlu dó wusyɛn lanmɛ nú Klisanwun lɛ ɖɔ ye ni kpɔ́n ɖɔ ye sixu nɔ tlɛnmɛ bo sɛn Jehovah à jí. (Xà 1 Kɔlɛntinu lɛ 7:7-9.) É ɖò wɛn ɖɔ Pɔlu kún nɔ sɔ́ nukún kpɛví dó kpɔ́n Klisanwun tlɛnnɔ lɛ ó. Nǔgbo ɔ, Timɔtée e nyí nɔví sunnu tlɛnnɔ ɖé é wɛ é sɔ́ b’ɛ na kpé nukún dó azɔ̌ kpinkpɛn ɖé lɛ wu. * (Fili. 2:19-22) É ɖò wɛn ɖɔ enyi è zɔn dó alɔ e nɔví ɖé wlí alǒ ma wlí ǎ é kɛɖɛ wu, bo lin ɖɔ é jɛxa azɔ̌ lě hugǎn alǒ é kún jɛxa azɔ̌ lě ó ɔ, é sɔgbe ǎ.—1 Kɔ. 7:32-35; 1 Kɔ. 7:38, nwt.

9. Etɛ mǐ ka sixu ɖɔ dó alɔwliwli kpo tlɛnmɛninɔ kpo wu?

⁹ Jezu kpo Pɔlu kpo ɖě kplɔ́n mɛ ɖɔ Klisanwun lɛ ɖó na wlí alɔ alǒ nɔ tlɛnmɛ ǎ. Enɛ wu ɔ, etɛ mǐ ka sixu ɖɔ dó alɔwliwli kpo tlɛnmɛninɔ kpo wu? Atɔxwɛ (Flansegbe) 1^er octobre 2012 tɔn ɖɔ xó ɖaaɖagbe elɔ: “Nǔgbo ɔ, [alɔwliwli kpo tlɛnmɛninɔ] kpo bǐ wɛ è sixu ylɔ́ ɖɔ nǔnina Mawu tɔn. . . . Jehovah nɔ  kpɔ́n tlɛnmɛninɔ dó mɔ winnyanú alǒ nǔblanɔwu ɖé ǎ.” Enɛ wu ɔ, mǐ ɖó na ɖó sísí nú nɔví sunnu kpo nɔví nyɔnu kpo tlɛnnɔ lɛ ɖò agun ɔ mɛ.

10. Nɛ̌ mǐ ka sixu ɖè sísí xlɛ́ Klisanwun tlɛnnɔ lɛ gbɔn?

¹⁰ Nɛ̌ mǐ ka sixu ɖè sísí xlɛ́ lee nǔ nɔ cí nú Klisanwun tlɛnnɔ lɛ é kpo ninɔmɛ e mɛ ye ɖè lɛ é kpo gbɔn? Mǐ ɖó na hɛn dó ayi mɛ ɖɔ Klisanwun tlɛnnɔ ɖé lɛ ɖesu wɛ wá gbeta ɔ kɔn bo ɖò tlɛnmɛ. Klisanwun tlɛnnɔ ɖevo lɛ ka ba na wlí alɔ, amɔ̌, nǔ ɔ wɛ nyí ɖɔ ye ko mɔ mɛ e jɛxa ye é ǎ. Mɛ ɖevo lɛ ɖò tlɛnmɛ ɖó mɛ e ye da é kú. Ðebǔ wɛ é na bo nyí ɔ, é byɔ ɖɔ mɛ e ɖò agun ɔ mɛ lɛ é ni kan nǔ e wu Klisanwun tlɛnnɔ lɛ ma ko wlí alɔ ǎ é byɔ ye, alǒ ɖɔ ɖɔ emi na d’alɔ ye bonu ye na mɔ mɛ e ye na da é wɛ à? É ɖò wɛn ɖɔ Klisanwun tlɛnnɔ ɖé lɛ sixu wá byɔ ɖɔ è ni d’alɔ emi ɖò ali enɛ nu. Amɔ̌, nú nɔví tlɛnnɔ lɛ ma byɔ alɔdó ǎ, bɔ è ka wá byɔ ye ɖɔ è na d’alɔ ye ɔ, nɛ̌ nǔ ka sixu cí nú ye? (1 Tɛ. 4:11; 1 Tim. 5:13) Mǐ ni kpɔ́n nǔ e Klisanwun tlɛnnɔ gbejinɔtɔ́ ɖé lɛ ɖɔ é.

11-12. Nɛ̌ mǐ ka sixu dó awakanmɛ kú nú tlɛnnɔ lɛ gbɔn?

¹¹ Nukúnkpénuwutɔ́ tlɛnnɔ e nɔ wà azɔ̌ tɔn ganji é ɖé mɔ ɖɔ tlɛnmɛninɔ ɖó lè gegě. É ɖò mɔ̌ có, é ɖɔ ɖɔ enyi nɔví ɖěɖee ɖó linlin ɖagbe é kan nǔ elɔ byɔ mɛ ɔ, awakanmɛ sixu kú mɛ: “Etɛwu a ma ka ko wlí alɔ ǎ?” Nɔví sunnu e nɔ w’azɔ̌ ɖò alaxɔ mɛ é ɖé ɖɔ: “Hweɖelɛnu ɔ, nɔví lɛ nɔ bló bɔ é nɔ cí nú mì ɖɔ tlɛnnɔ lɛ sín gbɛ̀ blawǔ. Enɛ sixu zɔ́n bɔ é na cí ɖɔ tlɛnmɛninɔ kún sɔ́ nyí nǔnina ó, loɔ ɖɔ agban kpinkpɛn ɖé wɛ.”

¹² Nɔví nyɔnu tlɛnnɔ e nɔ w’azɔ̌ ɖò Betɛli é ɖé ɖɔ: “Wɛnjlatɔ́ ɖé lɛ nɔ lin ɖɔ tlɛnnɔ lɛ bǐ wɛ ɖò mɛ e ye na da é ba wɛ, alǒ ye bǐ wɛ nɔ kpɔ́n mɛkplékpɔ́mɛ núwiwa lɛ dó mɔ ali ɖé bo hun bɔ ye na gbɔn dó ba mɛ e ye na da é. Un yì xá ɖé mɛ ɖò tò ɔ mɛ gbadanu gbè ɖokpo ɖò kplé sín azǎn jí, ɖó Betɛli sín azɔ̌ ce wu. Nɔví nyɔnu e yí mì dó xwégbe é ɖɔ nú mì ɖɔ nɔví sunnu we ɖò agun ɔ mɛ bo ɖó xwè ce. É ɖɔ ɖɔ emi kún ɖò tintɛnkpɔn wɛ bo na ba asú nú mì ó. Amɔ̌, tlolo e mǐ byɔ Kpléxɔ ɔ mɛ é ɔ, é kplá mì yì fí e nɔví sunnu ɖě lɛ ɖè é bonu má mɔ tɛn dó mɔ ye. É byɔ ɖɔ è ni ɖɔ lɔ ǎ, ninɔmɛ ɔ hu winnya nú mǐ mɛ atɔn lɛ bǐ.”

13. Kpɔ́ndéwú tɛ lɛ ka dó wusyɛn lanmɛ nú nɔví nyɔnu tlɛnnɔ ɖé?

¹³ Nɔví nyɔnu tlɛnnɔ ɖevo nɔ wà azɔ̌ ɖò Betɛli bo ɖɔ: “Un tuùn mɛxomɔ tlɛnnɔ gbexosin-alijitɔ́ ɖé lɛ bɔ ye nɔ nɔ jlɛ̌ jí, tuùn nǔ e gbé nya wɛ ye ɖè tawun é, nɔ sɔ́ yeɖée dó savɔ̌, lobo lɛ́ ɖó awǎjijɛ. Ye nɔ d’alɔ agun ɔ tawun. Ye ɖó linlin e ɖò jlɛ̌ jí é dó tlɛnmɛ e ye ɖè é wu; ye nɔ mɔ ɖɔ emi hugǎn mɛ ɖevo lɛ ɖó tlɛnnɔ e emi nyí é wu ǎ, ye ka nɔ lɛ́ mɔ ɖɔ nǔɖe hwedó emi ɖó emi kún wlí alɔ bo ɖó xwédo ó wu ǎ.” Nú è ɖò agun ɖé mɛ bonu mɛ lɛ nɔ ɖó sísí nú mɛ, bɔ è nɔ lɛ́ xɔ akwɛ nú ye ɔ, é nɔ nyɔ́ tawun. Nǔwiwa yetɔn lɛ na xlɛ́ ɖɔ gbɛ̀ towe blawǔ, alǒ ye jló gbɛ̀ towe ǎ; é ka na lɛ́ xlɛ́ ɖɔ ye dóvɛ̌ nú we alǒ ye lin ɖɔ a vo hú ye ǎ. Enɛ na na we ganjɛwu ɖɔ ye yí wǎn nú we.

14. Nɛ̌ mǐ ka sixu ɖè sísí xlɛ́ tlɛnnɔ lɛ gbɛn?

¹⁴ Enyi a nɔ ɖó sísí nú nɔví sunnu kpo nɔví nyɔnu kpo tlɛnnɔ lɛ ɖó jijɔ ɖaaɖagbe yetɔn lɛ wu, bɔ gbɛ̀ yetɔn ma nɔ blawǔ nú we ɖó tlɛnmɛ e ye ɖè é wu ǎ ɔ, enɛ na sù nukún yetɔn mɛ tawun. Gbejininɔ yetɔn wɛ ɖó na nɔ sù nukún mǐtɔn mɛ, é nyí gbɛ̀ yetɔn wɛ na nɔ blawǔ nú mǐ ǎ. Mɔ̌  mɛ ɔ, nɔví sunnu kpo nɔví nyɔnu kpo tlɛnnɔ mǐtɔn lɛ na lin gbeɖé ɖɔ mǐ nɔ ɖɔ dó ye wu ɖɔ, ‘Nǔ yetɔn kún hudo mǐ ó’ ǎ. (1 Kɔ. 12:21) É nyɔ́ wà ɔ, ye na nɔ mɔ ɖɔ mǐ nɔ ɖó sísí nú ye, bɔ xomɛ nɔ lɛ́ hun mǐ ɖɔ ye ɖò agun ɔ mɛ.

15. Huzuhuzu tɛ lɛ mɛɖé lɛ ka bló bo na dó vlɔ́n kan nú sinsɛnzɔ́ yetɔn?

¹⁵ Ðò agaɖanu dìn ɔ, wɛnjlatɔ́ gegě sɔ́ gbè ɖevo kplɔnkplɔn dó ɖó nǔ e gbé ye na nya é, bo na dó sixu vlɔ́n kan nú sinsɛnzɔ́ yetɔn. Mɔ̌ wiwa ka nɔ byɔ huzuhuzu ɖé lɛ. Nɔví enɛ lɛ jó agun e mɛ è nɔ dó anɔ̌nugbe yetɔn ɖè é dó, bo yì jɛ agun e mɛ è nɔ dó gbè ɖevo ɖè bɔ hudo wɛnjlatɔ́ Axɔ́suɖuto ɔ tɔn sukpɔ́ ɖè é mɛ. (Mɛ. 16:9) Klisanwun enɛ lɛ ɖesu wɛ wá gbeta yetɔn kɔn bo na dó xò nǔ Axɔ́suɖuto ɔ tɔn lɛ sín nukɔnyiyi kan. É nɔ byɔ xwè gegě ɖò ye sí cobɔ gbè yɔyɔ̌ ɔ na má ye ganji có, ye ka nɔ d’alɔ agun ɔ ɖò ali gegě nu. Jijɔ ɖaaɖagbe yetɔn lɛ kpo nǔ e ye ko mɔ kpɔ́n lɛ é kpo nɔ hɛn agun ɔ lidǒ. Nɔví sunnu kpo nɔví nyɔnu kpo enɛ lɛ e nɔ sɔ́ yeɖée dó savɔ̌ é nɔ xɔ akwɛ nú mǐ!

16. Enyi mɛxo agun tɔn lɛ ja nɔví sunnu ɖé sɔ́ gbé bonu é na nyí mɛxo agun tɔn alǒ devízɔ́watɔ́ ɔ, etɛ lɛ jí ye ka na zɔn dó?

¹⁶ Ðó nɔví sunnu ɖé ma nɔ dó gbè e è nɔ dó ɖò agun ɔ mɛ é ganji ǎ wutu kpowun wɛ na zɔ́n bɔ kplékplé mɛxo lɛ tɔn ɖé na gbɛ́ ɖɔ é kún sixu nyí mɛxo agun tɔn alǒ devízɔ́watɔ́ sinsɛnzɔ́wiwa tɔn ó ǎ. Nǔ ɖěɖee Biblu byɔ ɖò mɛxo agun tɔn lɛ kpo devízɔ́watɔ́ lɛ kpo sí é jí wɛ mɛxo agun tɔn lɛ na zɔn dó dó gbéjé nǔwukpíkpé nɔví sunnu ɖé tɔn kpɔ́n, é na nyí lee é nɔ dó agun ɔ sín gbè ganji gbɔn é ǎ.—1 Tim. 3:1-10, 12, 13; Ti. 1:5-9.

17. Enyi xwédo ɖé sɛ̀ tɛn yì tò ɖevo mɛ ɔ, nǔkanbyɔ tɛ lɛ ye ka ɖó na gbéjé kpɔ́n?

¹⁷ Xwédo Klisanwun tɔn ɖé lɛ sɛ̀ tɛn yì tò ɖevo mɛ bo na dó ba bibɛtɛn alǒ mɔ azɔ̌. Ðò ninɔmɛ mɔ̌hun lɛ mɛ ɔ, vǐ yetɔn lɛ sixu kplɔ́n gbè taji tò yɔyɔ̌ ɔ tɔn ɖò wemaxɔmɛ. É sixu lɛ́ byɔ ɖɔ mɛjitɔ́ lɛ ni kplɔ́n gbè taji tò yɔyɔ̌ ɔ tɔn bo na dó mɔ azɔ̌. Enyi agun ɖé ɖò xá ɔ mɛ alǒ kánɖó ɖé ɖò finɛ bɔ è nɔ dó anɔ̌nugbe yetɔn ɖ’emɛ ɔ ka lo? Agun tɛ mɛ ye ka na yì? Agun e mɛ è nɔ dó gbè taji tò yɔyɔ̌ ɔ tɔn ɖè é ɖé wɛ ye ɖó na yì à, alǒ agun e mɛ è nɔ dó anɔ̌nugbe xwédo ɔ tɔn ɖè é ɖé?

18. Sɔgbe xá Galatinu lɛ 6:5 ɔ, nɛ̌ mǐ ka sixu ɖè sísí xlɛ́ gbeta e kɔn tatɔ́ xwédo tɔn ɖé wá é gbɔn?

¹⁸ Tatɔ́ xwédo ɔ tɔn wɛ ɖó na ɖɔ agun e mɛ xwédo ɔ na yì é. Ðó gbeta mɛɖesunɔ tɔn ɖé wɛ wu ɔ, é ɖó na lin tamɛ dó nǔ e na nyɔ́ hugǎn nú xwédo tɔn é jí. (Xà Galatinu lɛ 6:5.) Mǐ ɖó na ɖó sísí nú gbeta e kɔn tatɔ́ xwédo ɔ tɔn wá é. É na bo wá gbeta ɖebǔ kɔn ɔ, mi nú mǐ ni yí gbè na,  bo yí xwédo ɔ dó agun mǐtɔn mɛ, lobo ɖè wanyiyi xlɛ́ ye.—Hlɔ. 15:7.

19. Etɛ jí tatɔ́ xwédo tɔn lɛ ka ɖó na lin tamɛ dó ganji lobo xoɖɛ dó?

¹⁹ Ðò alɔ ɖevo mɛ ɔ, xwédo ɖé lɛ sixu nɔ yì agun e mɛ è nɔ dó anɔ̌nugbe yetɔn ɖè é, amɔ̌, vǐ lɛ sixu nɔ ma nɔ dó gbè enɛ ganji. Enyi agun ɔ ɖò xá e mɛ è nɔ dó gbè taji tò yɔyɔ̌ ɔ tɔn ɖè é ɖé mɛ ɔ, é sixu vɛwǔ nú vǐ lɛ bɔ ye na mɔ nǔ jɛ nǔ lɛ mɛ ɖò kplé lɛ jí; ye na lɛ́ yì nukɔn ɖò gbigbɔ lixo ǎ. Etɛwu? Ðó wemaxɔmɛ e è nɔ dó gbè taji tò yɔyɔ̌ ɔ tɔn ɖè é wɛ vǐ lɛ nɔ yì, é nyí ee è nɔ dó anɔ̌nugbe yetɔn ɖè é ǎ. Ðò ninɔmɛ mɔ̌hun lɛ mɛ ɔ, tatɔ́ xwédo tɔn lɛ ɖó na lin tamɛ kpɔ́n ganji bo xoɖɛ bo byɔ nǔnywɛ bá dó tuùn nǔ e ye ɖó na wà dó d’alɔ vǐ lɛ, bonu ye na sɛkpɔ́ Jehovah kpo togun tɔn kpo é. É na byɔ ɖɔ ye ni d’alɔ vǐ yetɔn lɛ bonu anɔ̌nugbe yetɔn ni má ye ganji, alǒ é na byɔ ɖɔ ye ni jɛ agun e mɛ è nɔ dó gbè e vǐ lɛ sè ganji é ɖè é ɖé mɛ. Tatɔ́ xwédo ɔ tɔn na bo wá gbeta ɖebǔ kɔn ɔ, nɔví ɖěɖee ɖò agun e mɛ ye jɛ é ɖó na ɖè sísí xlɛ́ é kpo xwédo tɔn kpo.

20. Nɛ̌ mǐ ka sixu ɖè sísí xlɛ́ nɔví mǐtɔn e ɖò gbè yɔyɔ̌ ɖé kplɔ́n wɛ lɛ é gbɔn?

²⁰ Kpo hwɛjijɔ e xó mǐ ɖɔ wá yì lɛ é kpo ɔ, nɔví sunnu kpo nɔví nyɔnu kpo gegě wɛ ɖò agun gegě mɛ bo ɖò gǎn dó wɛ bo na kplɔ́n gbè yɔyɔ̌ ɖé. É sixu vɛwǔ nú ye bonu ye na ɖɔ linlin yetɔn lɛ. É ɖò mɔ̌ có, enyi mǐ kpɔ́n nǔ zɛ gbè e ye ma nyɔ́ dó ganji ǎ é wu ɔ, mǐ na mɔ wanyiyi e ye ɖó nú Jehovah é kpo jlǒ e ye ɖó bo na sɛn ɛ é kpo. Enyi mǐ mɔ jijɔ ɖaaɖagbe enɛ lɛ ɔ, ye na xɔ akwɛ nú mǐ bɔ mǐ na lɛ́ ɖó sísí e gɔ́ngɔ́n é nú ye. Mǐ na kpɔ́n dó gbè mǐtɔn e ye ma sè ganji ǎ é wutu kpowun bo ɖɔ dó ye wu ɖɔ, ‘Nǔ yetɔn kún hudo mǐ ó’ ǎ.

21-22. Wǔjɔmɛ jiwǔ tɛ mǐ ka ɖó?

²¹ Jehovah jɔwǔ mǐ ɖò ali jiwǔ ɖé nu, bo sɔ́ mǐ dó tɛn ɖé mɛ ɖò agun tɔn mɛ. Sunnu wɛ mǐ nyí à alǒ nyɔnu, tlɛnnɔ wɛ mǐ nyí à alǒ mǐ ko wlí alɔ, mɛ winnyawinnya wɛ mǐ nyí à alǒ mɛxo, mǐ nyɔ́ gbè ɖé dó ganji wɛ à alǒ ɖɛ̌ wɛ mǐ nɔ fán dó ɔ, mǐ xɔ akwɛ nú Jehovah bo lɛ́ xɔ akwɛ nú mǐɖée.—Hlɔ. 12:4, 5; Kolo. 3:10, 11.

²² Mi nú mǐ ni kpò ɖò nǔ ɖaaɖagbe ɖěɖee nǔjlɛdonǔwu Pɔlu tɔn e kúnkplá agbaza gbɛtɔ́ tɔn é kplɔ́n mǐ lɛ é xwedó wɛ. Mɔ̌ mɛ ɔ, mǐ na ba ali e na hun nú mǐ lɛ é bǐ dó xlɛ́ ɖɔ tɛn e mɛ mǐ kpo mɛ ɖevo lɛ kpo ɖè ɖò agun ɔ mɛ é xɔ akwɛ nú mǐ.