1. Wǔjɔmɛ tɛ sín vivǐ ɖu wɛ mǐ ka ɖè?

WǓJƆMƐ ɖaxó ɖé wɛ é nyí ɖɔ mǐ ɖò agun Jehovah tɔn mɛ! Mǐ ɖò palaɖisi gbigbɔ tɔn e mɛ fífá kpo gbɛtɔ́ awǎjijɛnɔ lɛ kpo ɖè é ɖé mɛ. Tɛn tɛ mɛ a ka ɖè ɖò agun ɔ mɛ?

2. Nǔjlɛdonǔwu tɛ mɛsɛ́dó Pɔlu ka zán ɖò wema-sɛ́dó-mɛ tɔn lɛ gegě mɛ?

² Nǔjlɛdonǔwu e mɛsɛ́dó Pɔlu zán ɖò wema-sɛ́dó-mɛ tɔn lɛ gegě mɛ é sixu kplɔ́n nǔ gegě mǐ dó xó enɛ wu. Ðò wema tɔn enɛ lɛ ɖokpo ɖokpo mɛ ɔ, Pɔlu jlɛ́ agun ɔ dó agbaza gbɛtɔ́ tɔn wu. É lɛ́ sɔ́ mɛ e ɖò agun ɔ mɛ lɛ é ɖokpo ɖokpo jlɛ́ dó wǔjɔnú agbaza tɔn lɛ wu.—Hlɔ. 12:4-8; 1 Kɔ. 12:12-27; Efɛ. 4:16.

3. Nǔ atɔn tɛ lɛ mǐ ka na gbéjé kpɔ́n ɖò xóta elɔ mɛ?

³ Ðò xóta elɔ mɛ ɔ, mǐ na gbéjé nǔ e nǔjlɛdonǔwu Pɔlu tɔn sixu kplɔ́n mǐ é taji atɔn kpɔ́n. Nukɔntɔn ɔ, mǐ na kplɔ́n ɖɔ mǐ mɛ ɖokpo ɖokpo ɖó tɛn * ɖé ɖò agun Jehovah tɔn mɛ. Wegɔ́ ɔ, mǐ na ɖɔ xó dó nǔ e mǐ sixu wà é jí, enyi é nɔ vɛwǔ nú mǐ bonu mǐ na mɔ tɛn e mǐ ɖó ɖò agun ɔ mɛ é ɔ nɛ. Atɔngɔ́ ɔ, mǐ na ɖɔ xó dó nǔ e wu mǐ ɖó na hɛn alɔnu mǐtɔn ján bo wà azɔ̌ e nyí mǐtɔn ɖò agun Mawu tɔn mɛ é jí.

4. Etɛ Hlɔmanu lɛ 12:4, 5 ka kplɔ́n mǐ?

⁴ Nǔ nukɔntɔn e nǔjlɛdonǔwu Pɔlu tɔn sixu kplɔ́n mǐ é wɛ nyí ɖɔ mǐ mɛ ɖokpo ɖokpo wɛ ɖó tɛn taji ɖé ɖò xwédo Jehovah tɔn mɛ. Pɔlu bɛ́ nǔjlɛdonǔwu tɔn gbɔn lě: “Wǔjɔnú gegě wɛ ɖò agbaza mǐ mɛ ɖokpo ɖokpo tɔn wu, bɔ ye bǐ ɖó azɔ̌ vovo bo nɔ wà. Mɔ̌ ɖokpo ɔ, lě dò e mǐ sukpɔ́ sɔ ɔ, agbaza ɖokpo géé wɛ mǐ nyí ɖò bǔ e mǐ ɖè xá Klisu é mɛ, bɔ mǐ bǐ cá dó mǐɖée wu wǔjɔnú e ɖò agbaza ɖokpo wu lɛ ɖɔhun.” (Hlɔ. 12:4, 5) Etɛ ɖɔ gbé Pɔlu ka ja? Mǐ mɛ ɖokpo ɖokpo ɖó azɔ̌ vovo ɖò agun ɔ mɛ có, mǐ bǐ wɛ ka xɔ akwɛ.

5. Ðɔ “nǔnina” e Jehovah na agun ɔ é.

⁵ Enyi a ɖò tamɛ lin dó mɛ ɖěɖee ɖó tɛn ɖé ɖò agun ɔ mɛ lɛ é jí wɛ ɔ, ayi towe sixu yawǔ yì mɛ e nɔ nɔ nukɔn nú nǔ lɛ é jí. (1 Tɛ. 5:12; Ebl. 13:17) Nǔgbo ɔ, Jehovah gbɔn Jezu jí, bo “na sunnu lɛ bɔ ye nyí nǔnina” nú agun Tɔn. (Efɛ. 4:8, nwt) Mɛ e ɖò Hagbɛ̌ Alixlɛ́mɛtɔ́ ɔ mɛ lɛ é, alɔgɔtɔ́ yetɔn lɛ, mɛ e ɖò Wěɖegbɛ́ Alaxɔ tɔn mɛ lɛ é, nukúnkpénuwutɔ́ lɛdo tɔn lɛ, wemaxɔmɛ yɛhwexɔ́suɖuto ɔ tɔn lɛ sín mɛ̌si lɛ, mɛxo lɛ kpo devízɔ́watɔ́ lɛ kpo ɖò ‘sunnu enɛ lɛ e nyí nǔnina é’ mɛ. Gbigbɔ mímɛ́ wɛ sɔ́ sunnu enɛ lɛ bǐ bonu ye na kpé nukún dó lɛngbɔ̌ xɔ akwɛ Jehovah tɔn lɛ wu, bo lɛ́ hɛn agun ɔ lidǒ.—1 Pi. 5:2, 3.

6. Sɔgbe xá 1 Tɛsalonikinu lɛ 2:6-8 ɔ, etɛ nɔví sunnu e gbigbɔ mímɛ́ sɔ́ lɛ é ka nɔ tɛ́n kpɔ́n bo nɔ wà?

⁶ Gbigbɔ mímɛ́ sɔ́ nɔví sunnu lɛ bonu ye na kpé nukún dó azɔ̌ vovo lɛ wu. Wǔjɔnú agbaza tɔn vovo lɛ, ɖi alɔ kpo afɔ kpo nɔ w’azɔ̌ nú lè agbaza ɔ bǐ tɔn. Mɔ̌ ɖokpo ɔ, nɔví sunnu e gbigbɔ mímɛ́ sɔ́ lɛ é nɔ w’azɔ̌ syɛnsyɛn nú lè agun ɔ bǐ tɔn. Ye nɔ ba susu yeɖesunɔ tɔn ǎ. É nyɔ́ wà ɔ, ye nɔ tɛ́n kpɔ́n bo nɔ hɛn nɔví sunnu kpo nɔví nyɔnu kpo yetɔn lɛ lidǒ. (Xà 1 Tɛsalonikinu lɛ 2:6-8.) Mǐ dókú nú Jehovah nú sunnu gbigbɔ tɔn enɛ lɛ e ma nyí cejɛnnabinɔ ǎ bɔ é na mǐ lɛ é.

7. Nyɔna tɛ lɛ sín vivǐ sinsɛnzɔ́watɔ́ hwebǐnu tɔn lɛ gegě ka nɔ ɖu?

⁷ È sixu sɔ́ mɛɖé lɛ bɔ ye na nyí mɛsɛ́dó, gbexosin-alijitɔ́ titewungbe, alǒ gbexosin-alijitɔ́ hwebǐnu tɔn ɖò agun ɔ mɛ. Nǔgbo ɔ, nɔví e gbɔn gbɛ̀ ɔ bǐ mɛ lɛ é sɔ́ wɛnjijlazɔ́ ɔ kpo nǔkplɔnkplɔn mɛ lɛ bonu ye na huzu ahwanvu sín azɔ̌ ɔ kpo dó ɖó azɔ̌ yetɔn hwebǐnu tɔn. Mɔ̌ mɛ ɔ, ye d’alɔ mɛ gegě bɔ ye huzu ahwanvu Klisu Jezu tɔn. Hwɛhwɛ ɔ, wɛnɖagbejlatɔ́ hwebǐnu tɔn enɛ lɛ nɔ ɖó nǔ kaka ɖé ɖò agbaza lixo ǎ, amɔ̌, Jehovah ka nɔ dó nú ye, bɔ nyɔna nɔ gɔ́ gbɛzán yetɔn mɛ. (Mak. 10:29, 30) Mǐ yí wǎn nú nɔví vívɛ́ enɛ lɛ, bɔ é nɔ lɛ́ sù nukún mǐtɔn mɛ ɖɔ ye ɖò agun ɔ mɛ.

8. Etɛwu wɛnɖagbejlatɔ́ lɛ bǐ ka xɔ akwɛ nú Jehovah?

⁸ Nɔví sunnu e gbigbɔ sɔ́ lɛ é kpo mɛ ɖěɖee ɖò sinsɛnzɔ́ hwebǐnu tɔn mɛ lɛ é kpo kɛɖɛ wɛ ɖó tɛn ɖé ɖò agun ɔ mɛ à? Ðebǔ ǎ! Wɛnɖagbejlatɔ́ lɛ bǐ wɛ xɔ akwɛ nú Mawu kpo agun ɔ kpo. (Hlɔ. 10:15; 1 Kɔ. 3:6-9) Nǔgbo ɔ, nǔ taji hugǎn e gbé nya wɛ agun ɔ ɖè é ɖokpo wɛ nyí nǔ kplɔnkplɔn mɛ lɛ bonu ye na huzu Aklunɔ mǐtɔn Jezu Klisu sín ahwanvu lɛ. (Mat. 28:19, 20; 1 Tim. 2:4) Wɛnjlatɔ́ e ɖò agun ɔ mɛ lɛ é bǐ, ee ko bló baptɛm lɛ é kpo ee ma ko bló ǎ lɛ é kpo bǐ wɛ nɔ tɛ́n kpɔ́n bo nɔ sɔ́ azɔ̌ enɛ ɖó tɛn nukɔntɔn mɛ.—Mat. 24:14.

9. Etɛwu nɔví nyɔnu lɛ ka xɔ akwɛ nú mǐ?

 ⁹ Jehovah sɔ́ nɔví nyɔnu lɛ ɖó tɛn e ɖó yɛ̌yi é ɖé mɛ ɖò agun ɔ mɛ. Asì, nɔ, asúkúsi kpo nɔví nyɔnu tlɛnnɔ kpo ee ɖò sinsɛn ɛ wɛ kpo gbejininɔ kpo lɛ é xɔ akwɛ n’i. Hwɛhwɛ ɔ, Biblu nɔ ɖɔ xó dó nyɔnu nukúnɖeji e sín nǔ nyɔ́ Mawu nukúnmɛ lɛ é wu. È kpa ye ɖɔ ye zé kpɔ́ndéwú ɖagbe nǔnywɛ, nǔɖiɖi, kanɖodónǔwu, akɔ́nkpinkpan, alɔhundónanǔmɛ kpo azɔ̌ ɖagbe wiwa kpo tɔn ɖ’ayǐ. (Luk. 8:2, 3; Mɛ. 16:14, 15; Hlɔ. 16:3, 6; Fili. 4:3; Ebl. 11:11, 31, 35) Mǐ dókú nú Jehovah tawun ɖó nɔví nyɔnu e ɖó jijɔ ɖaaɖagbe mɔ̌hun lɛ é ɖò agun mǐtɔn lɛ mɛ wu.

10. Etɛwu mɛxomɔ lɛ ka xɔ akwɛ nú mǐ?

¹⁰ Nǔ lɛ́ nyɔ́ nú mǐ, ɖó mǐ ɖó mɛxomɔ gegě wutu. Agun ɖé lɛ ɖó nɔví mɛxomɔ e ko sɔ́ gbɛzán yetɔn bǐ dó sɛn Jehovah kpo gbejininɔ kpo lɛ é gegě. Mɛxomɔ ɖevo lɛ sixu ko kplɔ́n nǔgbo ɔ ɖò agaɖanu dìn. Ðebǔ wɛ é na bo nyí ɔ, mɛxomɔ mǐtɔn lɛ sixu ko ɖò xwi ɖí xá azɔn vovo lɛ wɛ ɖó xwè yetɔn ko sɛyi wutu. Tagba enɛ lɛ sixu ɖó dogbó nú nǔ e ye sixu wà ɖò agun ɔ kpo wɛnjijlazɔ́ ɔ kpo mɛ é. É ɖò mɔ̌ có, mɛxomɔ lɛ nɔ wà nǔ e wu ye kpé é bǐ ɖò Mawuxóɖiɖɔzɔ́ ɔ mɛ, bo nɔ lɛ́ zán hlɔnhlɔn yetɔn bǐ dó dó wusyɛn lanmɛ nú mɛ ɖevo lɛ, lobo lɛ́ kplɔ́n azɔ̌ ye! Mǐ nɔ ɖu lè nǔ e ye ko mɔ kpɔ́n lɛ é tɔn. Ye nyɔ́ ɖɛkpɛ nǔgbo nǔgbo nú Jehovah kpo mǐ kpo.—Nǔx. 16:31, nwt.

11-12. Nɛ̌ mɛ winnyawinnya e ɖò agun towe mɛ lɛ é ka ko dó wusyɛn lanmɛ nú we gbɔn?

¹¹ Lɛ̌ lin tamɛ dó mɛ winnyawinnya mǐtɔn lɛ jí. Ðó ye ɖò susu wɛ ɖò gbɛ̀ elɔ e jí Satáan Awoví kp’acɛ dó, bɔ tamɛ-núkplɔnmɛ tɔn nyanya lɛ gbakpé é mɛ wu ɔ, ye nɔ mɔ wuvɛ̌ gegě. (1 Jaan 5:19) É ɖò mɔ̌ có, enyi mǐ mɔ bɔ mɛ winnyawinnya mǐtɔn lɛ ɖò xósin na wɛ ɖò kplé lɛ jí, ɖò Mawuxó ɖɔ wɛ, bo lɛ́ ɖò hun jɛ dó nǔ e ye ɖi nǔ na lɛ é jí wɛ kpo akɔ́nkpinkpan kpo ɔ, é nɔ dó wusyɛn lanmɛ nú mǐ bǐ. Mɛ winnyawinnya lɛ è mi, mi ɖó tɛn taji ɖé ɖò agun Jehovah tɔn mɛ!—Ðɛh. 8:3.

 ¹² Amɔ̌, é nɔ vɛwǔ nú nɔví sunnu kpo nɔví nyɔnu kpo ɖé lɛ bɔ ye na ɖi ɖɔ emi ɖó tɛn taji ɖé ɖò agun ɔ mɛ. Etɛ ka sixu d’alɔ mǐ bɔ mǐ na mɔ ɖɔ mǐ mɛ ɖokpo ɖokpo ɖó tɛn ɖé ɖò agun ɔ mɛ? Mǐ ni kpɔ́n.

13-14. Etɛwu mɛɖé lɛ ka sixu mɔ ɖɔ emi kún xɔ akwɛ ɖò agun ɔ mɛ ó?

¹³ Ðǒ ayi nǔ wegɔ́ e nǔjlɛdonǔwu Pɔlu tɔn sixu kplɔ́n mǐ é wu. Pɔlu dɔn ayi mɛ lɛ tɔn wá tagba e mɛ gegě nɔ mɔ ɖò égbé é ɖé jí; é wɛ nyí ɖɔ é nɔ vɛwǔ nú ye bɔ ye na ɖi ɖɔ emi xɔ akwɛ ɖò agun ɔ mɛ. Pɔlu wlán ɖɔ: “Enyi afɔ ɖɔ: ‘Ee un ma nyí alɔ ǎ wutu ɔ, un nyí agbaza tɔn ǎ’; enɛ ɔ wɛ na zɔ́n bɔ é na gɔn wǔjɔnú agbaza tɔn nyí à? Enyi tó ka ɖɔ: ‘Ee un ma nyí nukún ǎ wutu ɔ, un nyí agbaza tɔn ǎ’; enɛ ɔ wɛ na zɔ́n bɔ é na gɔn wǔjɔnú agbaza tɔn nyí à?” (1 Kɔ. 12:15, 16) Etɛ kplɔ́n mǐ gbé Pɔlu ka ja?

¹⁴ Enyi a nɔ sɔ́ hwiɖée jlɛ́ dó mɛ ɖevo lɛ wu ɖò agun ɔ mɛ ɔ, enɛ sixu zɔ́n bɔ a sɔ́ na tuùn ɖɔ emi xɔ akwɛ ǎ. Mɛɖé lɛ ɖò agun ɔ mɛ bɔ alɔ sè kpɛ́n nú ye ɖò nǔ kplɔnkplɔn mɛ, tito biblo nú nǔ lɛ alǒ lɛngbɔ̌ lɛ nyinyi sín ali nu. Bɔya a nɔ mɔ ɖɔ nǔwukpíkpé emitɔn kún sɔ yetɔn ó. Enɛ xlɛ́ ɖɔ a nɔ sɔ́ hwiɖée hwe, bo lɛ́ tuùn dogbó towe lɛ. (Fili. 2:3) Amɔ̌, nɔ acéjí. Enyi a nɔ sɔ́ hwiɖée jlɛ́ dó mɛ enɛ lɛ e ɖó nǔwukpíkpé nukúnɖeji lɛ é wu magbokɔ ɔ, awakanmɛ na wá kú we. Lee Pɔlu ɖɔ gbɔn é ɔ, a tlɛ sixu mɔ ɖɔ emi kún ɖó tɛn ɖě ɖò agun ɔ mɛ lɔ ó. Etɛ ka sixu d’alɔ we bɔ a na ɖí xwi xá linlin mɔ̌hun lɛ?

15. Sɔgbe xá 1 Kɔlɛntinu lɛ 12:4-11 ɔ, etɛ mǐ ka ɖó na tuùn dó nǔwukpíkpé ɖebǔ e mǐ sixu ɖó lɛ é wu?

¹⁵ Lin tamɛ dó nǔ elɔ jí: Jehovah na nǔnina jiwǔ gbigbɔ mímɛ́ tɔn lɛ Klisanwun xwè kanweko nukɔntɔn ɔ tɔn ɖé lɛ, amɔ̌, é na nǔnina ɖokpo ɔ lɛ ye bǐ ǎ. (Xà 1 Kɔlɛntinu lɛ 12:4-11.) Jehovah na nǔnina kpo nǔwukpíkpé kpo vovo lɛ ye có, ye mɛ ɖokpo ɖokpo wɛ ka xɔ akwɛ.  Égbé ɔ, mǐ ɖó nǔnina jiwǔ gbigbɔ mímɛ́ tɔn ǎ. Amɔ̌, nǔgbododó ɔ ko ɖyɔ ǎ. Mǐ bǐ sixu nɔ ma ɖó nǔwukpíkpé ɖokpo ɔ lɛ, amɔ̌, mǐ bǐ wɛ xɔ akwɛ nú Jehovah.

16. Wěɖexámɛ mɛsɛ́dó Pɔlu tɔn tɛ mǐ ka ɖó na xwedó?

¹⁶ Mǐ ɖó na nɔ sɔ́ mǐɖée jlɛ́ dó Klisanwun ɖevo lɛ wu ǎ, é nyɔ́ wà ɔ, mǐ ɖó na nɔ xwedó wěɖexámɛ mɛsɛ́dó Pɔlu tɔn elɔ: “Mɛ ɖokpo ɖokpo ni byɔ éɖée mɛ, bo kpɔ́n nǔ e wà wɛ é ɖè lɛ; enyi nǔ e wà wɛ é ɖè lɛ sixu nyí xomɛhunhunnú n’i ɔ, é ni hun xomɛ ɖò éɖée mɛ; é ma jlɛ́ éɖée dó mɛ ɖě lɛ wu ó.”—Ga. 6:4.

17. Enyi mǐ xwedó wěɖexámɛ Pɔlu tɔn ɔ, nɛ̌ mǐ ka na ɖu lè tɔn gbɔn?

¹⁷ Enyi mǐ nɔ xwedó wěɖexámɛ mɛsɛ́dó Pɔlu tɔn, bo nɔ gbéjé nǔwiwa mǐɖesunɔ tɔn lɛ kpɔ́n ɔ, mǐ sixu jɛ mimɔ jí ɖɔ mǐ ɖó nǔwukpíkpé bǔnɔ lɛ. Ði kpɔ́ndéwú ɔ, mɛxo agun tɔn ɖé sixu nɔ ma nyɔ́ xóɖiɖɔ xwlé mɛ ganji, amɔ̌, ɖò nǔ kplɔnkplɔn mɛ bonu è na huzu ahwanvu sín azɔ̌ ɔ mɛ ɔ, alɔ sixu sè kpɛ́n n’i. Alǒ, é sixu nɔ ma nyɔ́ tito bló nú nǔ ganji sɔ mɛxo ɖevo lɛ ɖò agun tɔn mɛ, amɔ̌, è sixu tuùn i ganji ɖɔ é nyí lɛngbɔ̌nyitɔ́ wanyiyinɔ e wɛnjlatɔ́ lɛ nɔ vo bo nɔ sɛkpɔ́, b’ɛ nɔ ɖè wě ɖagbe e jinjɔn Biblu jí lɛ é xá ye é. Alǒ, è sixu tuùn i ɖɔ é nɔ yí mɛ ganji. (Ebl. 13:2, 16) Enyi mǐ tuùn nǔwukpíkpé mǐtɔn lɛ ganji ɔ, enɛ na zɔ́n bɔ xomɛ na hun mǐ dó nǔ e mǐ sixu wà dó agun ɔ takúnmɛ lɛ é wu. Mǐ ka sɔ́ na nɔ hwanwǔ nɔví e ɖó nǔwukpíkpé e gbɔn vo nú mǐtɔn lɛ é ǎ.

18. Nɛ̌ mǐ ka sixu bló bɔ nǔwukpíkpé mǐtɔn lɛ na kpɔ́n te d’eji gbɔn?

¹⁸ Mǐ na bo ɖó tɛn ɖebǔ ɖò agun ɔ mɛ ɔ, mǐ bǐ ɖó na ba na bló bɔ sinsɛnzɔ́ mǐtɔn kpo nǔwukpíkpé mǐtɔn lɛ kpo na kpɔ́n te. Bo na dó d’alɔ mǐ ɔ, Jehovah nɔ kplɔ́n azɔ̌ mǐ gbɔn tutoblonunu tɔn jí. Ði kpɔ́ndéwú ɔ, ɖò kplé aklunɔzán gblamɛ tɛntin tɔn mǐtɔn hwenu ɔ, è nɔ na mǐ alixlɛ́mɛ lɛ dó lee sinsɛnzɔ́ mǐtɔn na lɛ́ bí alɔ nú mǐ hugǎn gbɔn é jí. A ka nɔ tɛ́n kpɔ́n bo nɔ xwedó nǔ e è nɔ kplɔ́n we ɖò kplé enɛ jí lɛ é à?

19. Nɛ̌ a ka sixu kpéwú bo yì Wemaxɔmɛ nú Wɛnɖagbejlatɔ́ Axɔ́suɖuto ɔ Tɔn Lɛ gbɔn?

¹⁹ Tuto azɔ̌kplɔnmɛ tɔn ɖaaɖagbe ɖevo wɛ nyí Wemaxɔmɛ nú Wɛnɖagbejlatɔ́ Axɔ́suɖuto ɔ Tɔn Lɛ. Nɔví sunnu kpo nɔví nyɔnu kpo e sín xwè ɖò 23 jɛ 65 vlamɛ, bo ɖò sinsɛnzɔ́ hwebǐnu tɔn mɛ lɛ é wɛ sixu yì wemaxɔmɛ enɛ. É sixu cí nú we ɖɔ a kún sixu nya wemaxɔmɛ enɛ yiyi gbé bɔ é kpa we gbeɖé ó. Ma sɔ́ kɛ́n hwɛjijɔ e wu a ma sixu yì ǎ lɛ é tɔn ó, é nyɔ́ wà hǔn, sɔ́ kɛ́n hwɛjijɔ e wu a jló na yì lɛ é tɔn. Enɛ gudo hǔn, blǒ tito e na d’alɔ we bɔ a na jɛxa bo na yì wemaxɔmɛ enɛ é. Kpo alɔdó Jehovah tɔn kpo, gɔ́ nú azɔ̌syɛnsyɛnwiwa towe ɔ, a na kpé nǔ e a lin ɖ’ayǐ ɖɔ é gló we é wu.

20. Etɛ Hlɔmanu lɛ 12:6-8 ka sixu kplɔ́n mǐ?

²⁰ Nǔ atɔngɔ́ e nǔjlɛdonǔwu mɛsɛ́dó Pɔlu tɔn sixu kplɔ́n mǐ é ɖò Hlɔmanu lɛ 12:6-8 mɛ. (Xà.) Ðò fí ɔ, Pɔlu lɛ́ xlɛ́ ɖɔ mɛ e ɖò agun ɔ mɛ lɛ é ɖó nǔnina vovo lɛ. Amɔ̌ dìn ɔ, é tɛɖɛ̌ jí ɖɔ mǐ ɖó na zán nǔwukpíkpé ɖebǔ e mǐ ɖó é dó hɛn agun ɔ lidǒ.

21-22. Etɛ kpɔ́ndéwú Robert kpo Felice kpo tɔn ka sixu kplɔ́n mǐ?

²¹ Kpɔ́n kpɔ́ndéwú nɔví sunnu e mǐ na ylɔ́ ɖɔ Robert é tɔn. Ee é wà sinsɛnzɔ́ ɖò tò ɖevo mɛ gudo é ɔ, è sɛ́ ɛ dó tò tɔn mɛ bɔ é na w’azɔ̌ ɖò Betɛli. È vɔ́ ganjɛwu na ɛ  ɖɔ é kún nyí nǔɖe wɛ é wà nyi dò wɛ zɔ́n bɔ è ɖyɔ azɔ̌ n’i ó có, é ɖɔ: “Linlin masɔgbe e un ɖó dó nyiɖée wu ɖɔ un hwedó nǔ wu é nɔ ayǐ nú sun gegě. É nɔ wá jɛ hweɖelɛnu bɔ un nɔ ba na jó sinsɛnzɔ́wiwa ɖò Betɛli dó.” Nɛ̌ é ka wà gbɔn bo lɛ́ wá ɖó awǎjijɛ? Mɛxo agun tɔn gbɛ̌ tɔn ɖé flín i ɖɔ Jehovah nɔ kplɔ́n azɔ̌ mǐ ɖò azɔ̌ e è sɔ́ d’así nú mǐ ɖ’ayǐ lɛ é kɔn, bonu azɔ̌ e è sɔ́ d’así nú mǐ dìn lɛ é na má mǐ ganji. Robert wá mɔ ɖɔ emi ɖó na ɖó ayi sísɔ́ dó nǔ e ko wá yì lɛ é jí te, bo na jɛ ayi sɔ́ ɖó nǔ e emi sixu wà dìn lɛ é jí jí.

²² Nɔví Felice Episcopo mɔ wuvɛ̌ ɖokpo ɔ lɛ. É kpo asì tɔn kpo yí kúnnuɖewema Galadi tɔn ɖò 1956, bo wà nukúnkpénuwutɔ́zɔ́ ɖò Bolivie. Ðò 1964 ɔ, ye jì vǐ sunnu ɖokpo. Felice ɖɔ: “É vɛwǔ nú mǐ bɔ mǐ na jó azɔ̌ enɛ e mǐ yí wǎn na é dó. Un na ɖɔ xó jɔ xó ɔ, awakanmɛ kú mì nú xwè ɖokpo. Kpo alɔdó Jehovah tɔn kpo ɔ, un ɖyɔ linlin ce, bo sɔ́ ayi ɖó mɛjitɔ́zɔ́ ce jí.” Lee nǔ cí nú Robert alǒ Felice é ɖɔhun wɛ nǔ cí nú we à? Awakanmɛ kú we ɖó wǔjɔmɛ sinsɛnzɔ́ tɔn e a ɖó dìn lɛ é gbɔn vo nú ɖ’ayǐ tɔn lɛ wutu wɛ à? Enyi mɔ̌ hǔn, ɖyɔ linlin towe, bo sɔ́ ayi ɖó nǔ e a sixu wà dìn, bo na sɛn Jehovah lobo d’alɔ nɔví lɛ é jí, enɛ ɔ, a na ɖó awǎjijɛ hugǎn. Hɛn alɔnu towe ján, bo zán nǔwukpíkpé towe lɛ dó d’alɔ mɛ ɖevo lɛ, enɛ ɔ, a na ɖó awǎjijɛ hwenu e a na ɖò agun ɔ hɛn lidǒ wɛ é.

23. Etɛ mǐ ka ɖó na nɔ zán hwenu dó wà? Etɛ lɛ jí mǐ ka na ɖɔ xó dó ɖò xóta e bɔ d’ewu é mɛ?

²³ Mǐ mɛ ɖokpo ɖokpo wɛ xɔ akwɛ nú Jehovah. É ba ɖɔ mǐ ni nɔ xwédo emitɔn mɛ. Enyi mǐ zán hwenu dó lin tamɛ dó nǔ e mǐ sixu wà dó hɛn nɔví lɛ lidǒ é jí, bɔ enɛ gudo ɔ, mǐ dó gǎn bo wà mɔ̌ ɔ, é na vɛwǔ bɔ mǐ na mɔ ɖɔ mǐ kún xɔ akwɛ ɖò agun ɔ mɛ ó. Amɔ̌, linlin tɛ mǐ ka nɔ ɖó dó mɛ ɖevo lɛ wu ɖò agun ɔ mɛ? Nɛ̌ mǐ ka sixu xlɛ́ ɖɔ ye xɔ akwɛ nú mǐ gbɔn? Ðò xóta e bɔ d’ewu é mɛ ɔ, mǐ na gbéjé nǔ taji enɛ lɛ kpɔ́n.