1. Etɛ lɛ è ka ko kplɔ́n we dó Gbɛɖotɔ́ mǐtɔn wu?

ENYI xwédo Kúnnuɖetɔ́ Jehovah tɔn lɛ tɔn ɖé mɛ wɛ a sù ɖè ɔ, enɛ xlɛ́ ɖɔ sín vǔ ɖokpóo wɛ a sixu ko ɖò nǔ kplɔ́n dó Jehovah wu wɛ nɛ. È kplɔ́n we ɖɔ é wɛ nyí Gbɛɖotɔ́ ɔ, bo ɖó jijɔ ɖaaɖagbe lɛ, lobo lɛ́ ba na sɔ́ ayikúngban ɔ dó huzu palaɖisi ɖé.—Bǐb. 1:1; Mɛ. 17:24-27.

2. Etɛ mɛɖé lɛ ka nɔ lin dó mɛ e ɖi nǔ ɖɔ Gbɛɖotɔ́ ɖé tíìn lɛ é wu?

² Mɛ gegě ɖi nǔ ɖɔ Mawu tíìn lɔ kaka bonu è na wá ɖɔ ɖɔ é wɛ nyí Gbɛɖotɔ́ ɔ ǎ. É nyɔ́ wà ɔ, ye ɖi ɖɔ gbɛ̀ ɔ jɔ nú éɖée, bɔ nǔɖogbɛ kpɛví kpɛví lɛ ɖò huzuhuzu wɛ dɛ̌dɛ̌ dɛ̌dɛ̌ kaka bo wá na nǔɖogbɛ ɖaxó lɛ. Wemasetɔ́ ɖaxó ɖaxó lɛ ɖò mɛ e nɔ ɖɔ mɔ̌ lɛ é mɛ. Ye nɔ ɖɔ ɖɔ nǔnywɛ xwitixwiti ɖexlɛ́ ɖɔ Biblu kún sɔgbe ó, lé mɛ e ma sè wema ǎ lɛ é, mɛ e ma bí ǎ lɛ é, alǒ xlonɔ lɛ wɛ nɔ ɖi ɖɔ Gbɛɖotɔ́ ɖé tíìn.

3. Etɛwu é ka ɖò taji ɖɔ mǐ ni hɛn nǔɖiɖi mǐɖesunɔ tɔn lidǒ?

³ Nǔ e wemasetɔ́ ɖaxó ɖaxó ɖé lɛ nɔ ɖɔ é na zɔ́n bɔ mǐ na xò nǔ kpɔ́n ɖɔ Jehovah wɛ nyí Gbɛɖotɔ́ wanyiyinɔ mǐtɔn à jí wɛ à? Nǔ e wu mǐ ɖi nǔ ɖɔ Jehovah wɛ nyí Gbɛɖotɔ́ mǐtɔn é wu wɛ é na sín, bɔ nǔ na nyí mɔ̌, alǒ gbɔ. È ɖɔ nú mǐ ɖɔ mǐ ni ɖi nǔ ɖɔ Jehovah wɛ nyí Gbɛɖotɔ́ ɔ wu wɛ mǐ ɖi nǔ à? Alǒ, mǐɖesu wɛ zán hwenu bo gbéjé kúnnuɖenú lɛ kpɔ́n. (1 Kɔ. 3:12-15) Mǐ na bo tlɛ ko nyí Kúnnuɖetɔ́ Jehovah tɔn sín hwenu línlín ɖíe ɔ, mǐ bǐ wɛ ɖó na kpò ɖò nǔɖiɖi mǐtɔn hɛn lidǒ wɛ. Mɔ̌ wiwa na zɔ́n bɔ mǐ na lɔn bonu gbɛtɔ́ lɛ na zé “mɛblɛblɛ́xó, xómaɖixó” e ye nɔ ɖɔ b’ɛ ma sɔgbe xá Biblu ǎ lɛ é dó flú mǐ ǎ. (Kolo. 2:8; Ebl. 11:6) Bo na dó d’alɔ mǐ ɔ, xóta elɔ na ɖɔ xó dó nǔ elɔ lɛ jí: (1) nǔ e wu mɛ gegě ma ɖi nǔ ɖɔ Gbɛɖotɔ́ ɖé tíìn ǎ é, (2) lee a sixu bló gbɔn bɔ nǔ e a ɖi nú Jehovah e nyí Gbɛɖotɔ́ towe é na lidǒ é (3) lee a sixu kpò ɖò nǔɖiɖi enɛ hɛn lidǒ wɛ gbɔn é.

4. Sɔgbe xá Eblée lɛ 11:1 ɔ, etɛ jí wɛ nǔɖiɖi adodwé ɔ ka jinjɔn?

⁴ Mɛɖé lɛ nɔ lin ɖɔ è ni ɖó nǔɖiɖi sín tinmɛ wɛ nyí è ni ɖeji dó nǔɖe wu, bo ka gɔn kúnnuɖenú e kúnkplá nǔ ɔ lɛ é ɖó. Amɔ̌, sɔgbe xá Biblu ɔ, nǔɖiɖi adodwé ɔ nɛ ǎ. (Xà Eblée lɛ 11:1.) Ðǒ ayi wu ɖɔ nǔɖiɖi ɖiɖó nú nǔ e tíìn, bɔ è ma nɔ mɔ ǎ lɛ é, ɖi Jehovah, Jezu kpo Axɔ́suɖuto jixwé tɔn ɔ kpo nɔ byɔ ɖɔ è ni ɖó kúnnuɖenú e xlɛ́ ɖɔ nǔ enɛ lɛ tíìn nǔgbo é. (Ebl. 11:3) Nǔnywɛ xwitixwitizɔ́watɔ́ e huzu Kúnnuɖetɔ́ é ɖé ɖɔ: “Nǔ ɖěɖee Kúnnuɖetɔ́ Jehovah tɔn lɛ ɖi nǔ na lɛ é jinjɔn nǔɖe jí. Ye nɔ wɔn ya nú nǔgbo e nǔnywɛ xwitixwiti ɖɔ lɛ é ǎ.”

5. Etɛwu mɛ gegě ka nɔ lin ɖɔ Gbɛɖotɔ́ ɖé kún dá nǔ lɛ ó?

⁵ Mǐ sixu nɔ kanbyɔ mǐɖée ɖɔ, ‘Enyi kúnnuɖenú ɖejid’ewu e xlɛ́ ɖɔ Gbɛɖotɔ́ ɖé tíìn lɛ é ɖè ɔ, aniwu mɛ gegě ka nɔ ɖi ɖɔ Mawu kún dá nǔ e ɖò gbɛ̀ ɔ mɛ lɛ é ɖě ó?’ Mɛɖé lɛ tíìn bo ko gbéjé kúnnuɖenú lɛ kpɔ́n gbeɖé ǎ. Robert ee nyí Kúnnuɖetɔ́ Jehovah tɔn ɖé dìn é ɖɔ: “Ðó è ma kplɔ́n mì ɖò azɔ̌ mɛ gbeɖé ɖɔ dǎ wɛ è dá nǔ lɛ ǎ wutu ɔ, un lin ɖɔ è kún dá nǔ ɖě ó. Un ko ɖó xwè 22 cobo ɖɔ xó xá Kúnnuɖetɔ́ Jehovah tɔn lɛ, bo wá sè ɖɔ Biblu ɖɔ kúnnuɖenú ɖejid’ewu e xlɛ́ ɖɔ Mawu wɛ dá nǔ lɛ bǐ é xó.” *—Kpɔ́n gbǎví “ Gbehwan E È Nyi Sɛ́dó Mɛjitɔ́ lɛ É.”

6. Etɛwu mɛɖé lɛ ma ka nɔ ɖi nǔ ɖɔ Gbɛɖotɔ́ ɖé tíìn ǎ?

⁶ Mɛɖé lɛ ɖi nǔ ɖɔ Gbɛɖotɔ́ ɖé tíìn ǎ, ɖó ye nɔ ɖɔ ɖɔ nǔ e emi mɔ é jɛn emi sixu ɖi nǔ na. Amɔ̌, è na ɖɔ xó jɔ xó ɔ, nǔɖe lɛ tíìn bɔ ye nɔ mɔ ǎ bo ka ɖi nǔ na, ɖó ye ɖó kúnnuɖenú ɔ ɖɔ ye tíìn nǔgbo wutu. Kpɔ́ndéwú tɔn ɖokpo  wɛ nyí jɔhɔn. Nǔɖiɖi e xó Biblu ɖɔ é nɔ byɔ ɖɔ è ni ɖó kúnnuɖenú nǔ ɖěɖee ‘è ma nɔ mɔ ǎ, bɔ ye ka tíìn lɛ é tɔn.’ (Ebl. 11:1) É nɔ byɔ hwenu kpo gǎndidó kpo cobɔ mǐɖesunɔ na gbéjé kúnnuɖenú lɛ kpɔ́n; mɛ gegě ka nɔ ba na wà mɔ̌ ǎ. Enyi mɛɖé ma gbéjé kúnnuɖenú lɛ kpɔ́n éɖesunɔ ǎ ɔ, é sixu wá gbeta ɔ kɔn ɖɔ Mawu ɖě kún tíìn ó.

7. Wemasetɔ́ ɖaxó ɖaxó lɛ bǐ jɛn ka nɔ gbɛ́ ɖɔ é kún nyí Mawu wɛ ɖó wɛkɛ ɔ ó à? Tinmɛ.

⁷ Ee nǔnywɛ xwitixwitizɔ́watɔ́ ɖé lɛ gbéjé kúnnuɖenú lɛ kpɔ́n gudo é ɔ, ye kúdeji ɖɔ Mawu wɛ ɖó wɛkɛ ɔ. * Robert e xó mǐ wá yì é ɖɔhun ɔ, mɛɖé sixu ɖɔ ɖɔ Gbɛɖotɔ́ ɖě kún ɖè ó, ɖó è nɔ kplɔ́n mɛ gbeɖé ɖò kplɔnyiji-alavɔ ɖɔ dǎ wɛ è dá nǔ lɛ ǎ wutu. É ɖò mɔ̌  có, nǔnywɛ xwitixwitizɔ́watɔ́ gegě ko wá tuùn Jehovah, bo yí wǎn n’i. Nǔnywɛ xwitixwitizɔ́watɔ́ enɛ lɛ ɖɔhun ɔ, mǐ mɛ bǐ ɖó na bló bɔ nǔ e mǐ ɖi nú Jehovah é na lidǒ, enyi mǐ na bo tlɛ sè wema gbɔn ɖebǔ ɔ nɛ. Mɛ ɖebǔ sixu bló ɖó tɛn mǐtɔn mɛ ǎ.

8-9. (a) Nǔkanbyɔ tɛ jí mǐ ka na ɖɔ xó dó dìn? (b) Lè tɛ nǔ kplɔnkplɔn dó nǔɖiɖó lɛ wu ka na hɛn wá nú we?

⁸ Nɛ̌ a ka sixu bló gbɔn bɔ nǔ e a ɖi ɖɔ Gbɛɖotɔ́ ɖé tíìn é na lidǒ? Mǐ ni kpɔ́n lee mǐ sixu wà mɔ̌ gbɔn é ɖò ali ɛnɛ nu.

⁹ Nɔ kplɔ́n nǔ dó nǔɖiɖó lɛ wu. Enyi a nɔ xwè sɔ dó kpɔ́n kanlin lɛ, atín lɛ kpo sunví lɛ kpo ɔ, a sixu bló bɔ nǔ e a ɖi ɖɔ Gbɛɖotɔ́ ɖé tíìn é na lidǒ. (Ðɛh. 19:2; Eza. 40:26) Lě dò a kplɔ́n nǔ dó nǔ enɛ lɛ wu sɔ é ɔ, mɔ̌ dò wɛ a na kánɖeji ɖɔ Jehovah wɛ nyí Gbɛɖotɔ́ ɔ sɔ é nɛ. Hwɛhwɛ ɔ, xóta ɖěɖee nɔ tinmɛ gǒflɛ́mɛ lɛ dó nǔɖiɖó lɛ wu lɛ é nɔ tɔ́n ɖò wema mǐtɔn lɛ mɛ. Enyi nukúnnú mimɔ jɛ ye mɛ na bo tlɛ nɔ vɛwǔ nú we hǔn, ma nɔ gɔn ye xà ó. Kplɔ́n xóta enɛ lɛ lee a kpéwú gbɔn é. Nɔ lɛ́ kpɔ́n video ɖaaɖagbe ɖěɖee ɖɔ xó dó nǔɖiɖó lɛ wu, bɔ mǐ kpɔ́n ɖò kpléɖókpɔ́ ɖaxó mǐtɔn lɛ jí agaɖanu dìn, b’ɛ ɖò tɛn Ɛntɛnɛti tɔn mǐtɔn jw.org jí lɛ é.

10. Nǎ kpɔ́ndéwú e xlɛ́ ɖɔ Gbɛɖotɔ́ ɖé tíìn é ɖokpo. (Hlɔmanu lɛ 1:20)

¹⁰ Enyi a ɖò nǔ kplɔ́n dó nǔɖiɖó lɛ wu wɛ hǔn, nɔ ɖ’ayi nǔgbo e ye nɔ ɖexlɛ́ dó Gbɛɖotɔ́ mǐtɔn wu lɛ é wu ganji. (Xà Hlɔmanu lɛ 1:20.) Ði kpɔ́ndéwú ɔ, hwesivɔ nɔ na yǒzo kpo weziza kpo e sín hudo mǐ ɖó bá nɔ gbɛ̀ ɖò ayikúngban jí é mǐ. Amɔ̌, gǎ e hwe nɔ da é ɖé lɛ sixu wà nǔ dó mǐ wu. É byɔ ɖɔ è ni cyɔn alɔ mǐ jí, bonu gǎ enɛ lɛ ni ma wà nǔ dó mǐ wu ó. Nǔ ka nɔ nyí mɔ̌ nǔgbo. Gbɔn nɛ̌ é? Nǔ azizɔ ɖɔhun ɖé lɛ lɛlɛ̌ dó ayikúngban ɔ, bo nɔ cyɔn alɔ mǐ jí bɔ gǎ e hwe nɔ da lɛ é nɔ wà nǔ dó mǐ wu ǎ. Enyi gǎ e nɔ wà nǔ dó mɛ wu bɔ hwe nɔ da lɛ é ɖò syɛnsyɛn wɛ ɔ, azizɔ e lɛlɛ̌ dó ayikúngban ɔ é lɔ nɔ ɖò jijɛji wɛ. Mɛɖé wɛ ɖó na ko bló nǔ enɛ lɛ, bo lɛ́ nyí Gbɛɖotɔ́ wanyiyinɔ e ɖó nǔnywɛ é à cé?

11. Fitɛ a ka sixu mɔ nǔgbo e kúnkplá nǔɖiɖó lɛ, bo sixu hɛn nǔɖiɖi mɛtɔn lidǒ lɛ é ɖè? (Kpɔ́n gbǎví “ Nǔ E Nɔ Hɛn Nǔɖiɖi Mɛtɔn Lidǒ É ɖé Lɛ.”)

¹¹ Enyi a kpɔ́n Index des publications de la Société Watch Tower mɛ, alǒ, ba dò nú nǔ ɖò jw.org jí ɔ, a sixu mɔ nǔgbo e kúnkplá nǔɖiɖó lɛ, bo hɛn nǔɖiɖi mɛtɔn lidǒ lɛ é gegě. A sixu bɛ́ kpo xóta, gɔ́ nú video e ɖò akpáxwé “Dǎ Wɛ È Dá À?” glɔ́ lɛ é kpo. Zǐn “Nǔkplɔnmɛ Biblu Tɔn Lɛ,” enɛ gudo hǔn, kpɔ́n akpáxwé “Nǔnywɛ Xwitixwiti kpo Biblu Kpo” mɛ. Xóta kpɛví kpɛví lɛ wɛ ye nyí bo nɔ ɖɔ nǔgbo klewun klewun e jiwǔ lɛ é dó kanlin lɛ kpo nǔ ɖevo e è dá lɛ é kpo wu. Kpɔ́ndéwú e xlɛ́ lee nǔnywɛ xwitixwitizɔ́watɔ́ lɛ tɛ́n kpɔ́n gbɔn, bo kpɔ́n dó nǔ e ye mɔ ɖò gbɛ̀ ɔ mɛ lɛ é wu, bo vɔ́ nǔ ɖevo lɛ bló é tɔn lɔ ɖò xóta enɛ lɛ mɛ.

12. Enyi mǐ ɖò Biblu kplɔ́n wɛ ɔ, etɛ lɛ mǐ ka ɖó na hɛn d’ayi mɛ?

¹² Nɔ kplɔ́n Biblu. Nǔnywɛ xwitixwitizɔ́watɔ́ e xó mǐ ɖɔ wá yì é gbɛ́ ɖò bǐbɛ̌mɛ ɖɔ Gbɛɖotɔ́ ɖě kún tíìn ó. Amɔ̌, hwenu ɖò yiyi wɛ é ɔ, é wá ɖi nǔ. É ɖɔ: “Nǔɖiɖi ce jinjɔn nǔ e un kplɔ́n ɖò nǔnywɛ xwitixwiti linu lɛ é kɛɖɛ jí ǎ. É lɛ́ jinjɔn Biblu e un xwè sɔ bo kplɔ́n é jí.” Vlafo a ko ɖó nukúnnúmɔjɛnǔmɛ e sɔgbe é dó nǔkplɔnmɛ Biblu tɔn lɛ wu. É ɖò mɔ̌ có, bonu nǔɖiɖi e a ɖó ɖɔ Gbɛɖotɔ́ ɖé tíìn é na lidǒ ɔ, a ɖó na kpò ɖò Xó Mawu tɔn kplɔ́n wɛ. (Joz. 1:8; Ðɛh. 119:97) Ð’ayi lee Biblu tinmɛ gǒflɛ́mɛ e kúnkplá nǔ e jɛ ɖò hwexónu lɛ é gbɔn é wu. Lin tamɛ dó nǔɖɔɖ’ayǐ e ɖ’emɛ lɛ é kpo lee ye cá kan xá yeɖée gbɔn é kpo jí. Mɔ̌ wiwa na na hlɔnhlɔn nǔɖiɖi e a ɖó ɖɔ Gbɛɖotɔ́ wanyiyinɔ e ɖó nǔnywɛ é ɖé wɛ bló mǐ, bɔ  Xó tɔn wɛ lɛ́ ɖò Biblu ɔ mɛ é. *—2 Tim. 3:14; 2 Pi. 1:21.

13. Nǎ kpɔ́ndéwú nǔnywɛ e è nɔ mɔ ɖò Xó Mawu tɔn mɛ é tɔn ɖokpo.

¹³ Enyi a ɖò Xó Mawu tɔn kplɔ́n wɛ hǔn, nɔ ɖ’ayi lě dò wěɖexámɛ e ɖ’emɛ lɛ é nyɔ́ zán sɔ é wu. Ði kpɔ́ndéwú ɔ, é ko bló xwè gegě dìn bɔ Biblu gb’akpá nú mɛ ɖɔ wǎn yí nú akwɛ nɔ wà nǔ dó mɛ wu, bo nɔ zɔ́n bɔ è nɔ “dɔn nǔgbomɛ gegě dó kɔ.” (1 Tim. 6:9, 10; Nǔx. 28:20, nwt; Mat. 6:24) Akpágbánúmɛ enɛ ka lɛ́ kpò ɖò taji égbé à? Wema e ɖɔ xó dó lee mɛ lɛ nɔ wà nǔ gbɔn ɖò hwe mǐtɔn nu é wu é ɖé ɖɔ: “Nú è má ɖó zɛ̌nzɛ̌n ɔ, mɛ e jɛ dɔkun lɛ é nɔ ɖ’awǎjijɛ sɔmɔ̌ ǎ, bo ka nɔ lɛ́ ɖó linkpɔ́n. Mɛ ɖěɖee tlɛ ba vɛ́návɛ́ná bo na jɛ dɔkun lɛ é nɔ jɛ azɔn ɖò taglomɛ; ye nɔ lɛ́ jɛ azɔn ɖevo lɛ.” Akpá e Biblu gbà nú mɛ ɖɔ è kún ɖó na yí wǎn nú akwɛ ó é d’alɔ mɛ tawun! A ka sixu lɛ́ lin tamɛ dó nǔgbododó Biblu tɔn ɖevo e d’alɔ we lɛ é jí à? Lě dò wěɖexámɛ Biblu tɔn lɛ sù nukún mǐtɔn mɛ sɔ é ɔ, mɔ̌ dò wɛ mǐ na nɔ ganjɛ nǔnywɛ e nyɔ́ zán hwebǐnu bɔ Gbɛɖotɔ́ mǐtɔn na mǐ lɛ é wu sɔ é nɛ. (Ja. 1:5) Wǎgbɔ tɔn ɔ, mǐ na lɛ́ ɖ’awǎjijɛ hugǎn ɖò gbɛzán mǐtɔn mɛ.—Eza. 48:17, 18.

14. Etɛ Biblu kplɔnkplɔn ka na d’alɔ we bɔ a na tuùn dó Jehovah wu?

¹⁴ Jehovah tuùntuùn ni nyí nǔ e gbé a na nya ɖò nǔkplɔnkplɔn towe hwenu é. (Jaan 17:3) Ee a na ɖò Biblu kplɔ́n wɛ é ɔ, a na ɖ’ayi mɛ alɔkpa e Jehovah nyí é kpo jijɔ tɔn lɛ kpo wu; jijɔ enɛ lɛ ɖokpo ɔ wɛ lɛ́ tɔ́n ɖò nǔ e é dá lɛ é mɛ. Nǔ kplɔnkplɔn dó jijɔ Jehovah tɔn enɛ lɛ wu nɔ zɔ́n bɔ mǐ nɔ kánɖeji ɖɔ Jehovah tíìn nǔgbo. (Tín. 34:6, 7; Ðɛh. 145:8, 9) Ee a na fɔ́n bo na ɖò Jehovah tuùn d’eji wɛ é ɔ, nǔɖiɖi e a ɖó n’i é na jɛji, wanyiyi e a ɖó n’i é na gɔ́ngɔ́n, bɔ kancica e ɖò hwi kpo é kpo tɛntin é na syɛn d’eji.

15. Nɛ̌ nǔ e a ɖi nǔ na lɛ é mímá xá mɛ ɖevo lɛ ka na hɛn lè wá nú we gbɔn?

¹⁵ Mǎ nǔ e a ɖi nǔ na dó Mawu wu lɛ é xá mɛ ɖevo lɛ. Mɔ̌ wiwa na zɔ́n bɔ nǔɖiɖi hwiɖesunɔ mɛtún ɔ tɔn na lidǒ. Enyi mɛ e ɖɔ Mawuxó na wɛ a ɖè é kanbyɔ we ɖɔ Mawu ka tíìn à jí, bɔ a ma tuùn nǔ e a na ɖɔ é ǎ ɔ ka ló? Tɛ́n kpɔ́n bo ba xósin e Biblu na nú nǔkanbyɔ enɛ é ɖé ɖò wema mǐtɔn lɛ ɖě mɛ, lobo má xá mɛ ɔ. (1 Pi. 3:15) A sixu lɛ́ byɔ alɔdó Kúnnuɖetɔ́ ɖevo e ko mɔ nǔ kpɔ́n é ɖé tɔn. Mɛ ɔ yí gbè nú xósin e Biblu na é kpo é gbɔ kpo ɔ, dò e a ba nú nǔ é na lá we ǎ. Nǔɖiɖi towe na lidǒ d’eji. Wǎgbɔ tɔn ɔ, mɛblɛblɛ́xó e nǔnywɛtɔ́ kpo wemasetɔ́ ɖaxó ɖaxó kpo enyíì lɛ nɔ ɖɔ bo ɖɔ Gbɛɖotɔ́ ɖě kún tíìn ó é sɔ́ na wà nǔ dó wǔ we ǎ.

16. Enyi mǐ ma kpò ɖò nǔɖiɖi mǐtɔn hɛn lidǒ wɛ ǎ ɔ, etɛ ka sixu jɛ?

¹⁶ Mǐ na bo tlɛ ko ɖò Jehovah sɛn wɛ sín xwè mɔ̌kpan ɖíe ɔ, mǐ ɖó na kpò ɖò nǔɖiɖi mǐtɔn hɛn lidǒ wɛ. Aniwu? Ðó enyi mǐ ma cɔ́ mǐɖée ǎ ɔ, nǔɖiɖi mǐtɔn sixu vɔ́da. Flín ɖɔ nǔɖiɖi nɔ byɔ ɖɔ è ni ɖó kúnnuɖenú nǔ ɖěɖee tíìn, bɔ è ma nɔ mɔ ǎ lɛ é tɔn. Blewun jɛn mǐ sixu wɔn nǔ e mǐ ma sixu mɔ ǎ lɛ é. Enɛ wu ɔ, Pɔlu ylɔ́ “hwɛhuhu e é ma vɛwǔ . . . ɖɔ é ni tɛ́ dó mǐ wu ǎ é” ɖɔ nǔɖiɖi hwedó mɛ. (Ebl. 12:1) Nɛ̌ mǐ ka sixu nyi alɔ nú mɔ enɛ gbɔn?—2 Tɛ. 1:3.

17. Etɛ ka sixu d’alɔ mǐ bɔ mǐ na kpò ɖò nǔɖiɖi mǐtɔn hɛn lidǒ wɛ?

¹⁷ Nukɔntɔn, nɔ byɔ Jehovah ɖɔ é ni na we gbigbɔ mímɛ́ tɔn, bo ka nɔ wà mɔ̌ hwɛhwɛ. Aniwu? Ðó nǔ e gbigbɔ mímɛ́ nɔ na mɛ ɔ  mɛ wɛ nǔɖiɖi ɖè. (Ga. 5:22, 23) Alɔdó gbigbɔ mímɛ́ ɔ tɔn mɛvo ɔ, mǐ sixu kpò ɖò nǔɖiɖi e mǐ ɖó ɖɔ Gbɛɖotɔ́ mǐtɔn tíìn é hɛn lidǒ wɛ ǎ. Enyi mǐ kpò ɖò gbigbɔ mímɛ́ byɔ Jehovah wɛ ɔ, é na na mǐ. (Luk. 11:13) Mǐ tlɛ sixu xoɖɛ ɖɔ: “Dǒ nǔɖiɖi nǔɖiɖi jí nú mǐ.”—Luk. 17:5.

18. Sɔgbe xá Ðɛhan 1:2, 3 ɔ, wǔjɔmɛ tɛ sín vivǐ mǐ ka sixu ɖu?

¹⁸ Wegɔ́, nɔ kplɔ́n Xó Mawu tɔn hwɛhwɛ. (Xà Ðɛhan 1:2, 3.) Hwenu e è wlán Ðɛhan enɛ é ɔ, Izlayɛli-ví klewun ɖé jɛn ɖó Mawusɛ́n e è wlán é blebu. É ɖò mɔ̌ có, sɛ́nwema lɛ ɖò axɔ́su ɔ kpo vɔsanúxwlémawutɔ́ lɛ kpo gɔ́n, bɔ ɖò xwè tɛnwe mɛ tɛgbɛ ɔ, è bló tuto bɔ è na xà Mawusɛ́n ɔ, bɔ “mɛxo sunnu kpo mɛxo nyɔnu kpo, kpo yɔkpɔvu kpo” gɔ́ nú toɖevomɛnu e ɖò Izlayɛli lɛ é na ɖótó. (Sɛ́n. 31:10-12) Ðò Jezu hwenu ɔ, mɛ kpɛɖé jɛn ɖó wema mlámlá lɛ. Kplɔ́ngbasá lɛ wɛ è ka nɔ mɔ ɖè hugǎn. Amɔ̌ égbé ɔ, ɖibla nyí mɛ lɛ bǐ wɛ ɖó Xó Mawu tɔn. Wǔjɔmɛ ɖaxó ɖé wɛ enɛ nyí. Nɛ̌ mǐ ka sixu xlɛ́ ɖɔ wǔ e è jɔ mǐ bɔ mǐ ɖó Biblu é sù nukún mǐtɔn mɛ gbɔn?

19. Enyi mǐ na kpò ɖò nǔɖiɖi mǐtɔn hɛn lidǒ wɛ ɔ, etɛ mǐ ka ɖó na wà?

¹⁹ Mǐ sixu xlɛ́ ɖɔ wǔ e è jɔ mǐ bɔ mǐ ɖó Xó Mawu tɔn é sù nukún mǐtɔn mɛ, enyi mǐ nɔ xà gbè bǐ gbè ɔ nɛ. Mǐ ɖó na bló tuto nú nǔkplɔnkplɔn mɛɖesunɔ tɔn mǐtɔn, b’ɛ na nyí hwenu e mǐ vo dó é kpowun wɛ mǐ na nɔ kplɔ́n ǎ. Enyi mǐ nɔ kplɔ́n nǔ ɖò gbesisɔmɛ ɔ, mǐ sixu kpò ɖò nǔɖiɖi mǐtɔn hɛn lidǒ wɛ.

20. Etɛ mǐ ka ɖó na kánɖeji bá wà?

²⁰ Mǐ cí “nukúnnúmɔjɛnǔmɛtɔ́ lɛ kpodo nǔnywɛtɔ́ lɛ kpo” gbɛ̀ elɔ tɔn lɛ ɖɔhun ǎ, ɖó kúnnuɖenú e ɖò Xó Mawu tɔn mɛ lɛ é jí wɛ nǔɖiɖi mǐtɔn jinjɔn. (Mat. 11:25, 26) Biblu tinmɛ nǔ e wu nǔ lɛ fɔ́n bo ɖò nylanylá wɛ ɖò ayikúngban ɔ jí é kpo nǔ e Jehovah na wà dó ɖeɖɛ nǔ enɛ lɛ é kpo nú mǐ. Enɛ wu ɔ, mi nú mǐ ni kánɖeji, bo na hlɔnhlɔn nǔɖiɖi mǐtɔn, bo lɛ́ d’alɔ mɛ gegě bonu ye ni ɖi nǔ ɖɔ Gbɛɖotɔ́ ɖé tíìn. (1 Tim. 2:3, 4) Gɔ́ na ɔ, mi nú mǐ ni kpò ɖò nukún ɖó hwenu e mɛ e ɖò ayikúngban ɔ jí lɛ é bǐ na vɔ́ xó elɔ lɛ e ɖò Nǔɖexlɛ́mɛ 4:11 mɛ é ɖɔ é: “Aklunɔ mǐtɔn, Mawu mǐtɔn, susu . . . jɛxa we, ɖó a bló nǔ bǐ.”