1. Nɛ̌ mɛ gegě ka ɖò gǎn dó wɛ bo na wà nǔ gegě d’eji ɖò sinsɛnzɔ́ Jehovah tɔn mɛ gbɔn?

 AZƆ̌ gegě wɛ mǐ ɖó bo na wà dìn e vivɔnu gbɛ̀ elɔ tɔn ko sɛkpɔ́ bǐ é. (Mat. 24:14; Luk. 10:2; 1 Pi. 5:2) Mǐ bǐ wɛ ba na sɛn Jehovah lee mǐ kpéwú gbɔn é. Mɛ gegě ɖò kan vlɔ́n nú sinsɛnzɔ́ yetɔn wɛ. Mɛɖé lɛ ɖò linlin wɛ na huzu gbexosin-alijitɔ́. Mɛ ɖevo lɛ ɖò biba wɛ bo na w’azɔ̌ ɖò Betɛli, alǒ ɖ’alɔ ɖò xɔ yɛhwexɔ́suɖuto ɔ tɔn lɛ gbigbá mɛ. Gɔ́ na ɔ, nɔví sunnu gegě ɖò gǎn dó wɛ bá jɛxa bo na nyí devízɔ́watɔ́ sinsɛnzɔ́wiwa tɔn, alǒ mɛxo agun tɔn. (1 Tim. 3:1, 8) Kpɔ́n lě dò xomɛ ɖó na ko hun Jehovah sɔ, ɖó jlǒ enɛ e togun tɔn nɔ ɖó é wu é!—Ðɛh. 110:3, nwt; Eza. 6:8.

2. Enyi mǐ ma kpé nǔ e gbé nya wɛ mǐ ɖè ɖò gbigbɔ lixo lɛ é ɖé lɛ wu ǎ ɔ, nɛ̌ mǐ ka sixu wà nǔ gbɔn?

² Enyi táan gegě ko wá yì bɔ mǐ ma ka ko kpé nǔ e gbé nya wɛ mǐ ɖè ɖò gbigbɔ lixo é ɖé lɛ wu ǎ ɔ, awakanmɛ sixu jɛ mǐ kú jí. Alǒ, é sín mɛxoxwe, abǐ nǔ ɖevo lɛ wu bɔ mǐ ma sixu kpé nǔɖe lɛ wu bo wà ǎ ɔ, awakanmɛ sixu kú mǐ. (Nǔx. 13:12) Nǔ e xá Melissa é nɛ. * É ba na yì Betɛli, alǒ yì Wemaxɔmɛ nú Wɛnɖagbejlatɔ́ Axɔ́suɖuto ɔ Tɔn Lɛ. Amɔ̌, é ɖɔ: “Xwè ce ko zɛ nabi e è na ɖó cobo yì é wu. Wǔjɔmɛ enɛ lɛ nɔ cí dlɔ̌ ɖɔhun nú mì dìn. Hweɖelɛnu ɔ, awakanmɛ nɔ kú mì.”

3. Afɔ tɛ lɛ é ka sixu byɔ ɖɔ mɛɖé lɛ ni ɖè, cobo na jɛxa wǔjɔmɛ ɖé lɛ?

³ É sixu byɔ ɖɔ mɛ winnyawinnya e ɖò ganji ɖò agbaza mɛ é ɖé lɛ ni zin, bo sɔnǔ nú jijɔ ɖé lɛ cobo sixu jɛxa wǔjɔmɛ ɖevo lɛ. Ði kpɔ́ndéwú ɔ, mɛɖé lɛ sixu ɖó nǔnywɛ, bo nɔ lɛ́ ɖò gbesisɔmɛ bá w’azɔ̌. Amɔ̌, é sixu byɔ ɖɔ ye ni kplɔ́n bo na nɔ ɖó suúlu hugǎn, w’azɔ̌ yetɔn lɛ ganji hugǎn, lobo na nɔ lɛ́ sí mɛ ɖevo lɛ ganji hugǎn. Enyi a nɔ sɔ́ ayi ɖó jijɔ ɖěɖee é byɔ ɖɔ a ni  sɔnǔ na lɛ é jí ɔ, wǔjɔmɛ sinsɛnzɔ́ tɔn ɖé sín ali sixu hun nú we hwenu a ma ɖó nukún tɔn dó ǎ é. Ð’ayi kpɔ́ndéwú Nick tɔn wu. Ee é ɖó xwè 20 bɔ è ma sɔ́ ɛ, b’ɛ nyí devízɔ́watɔ́ sinsɛnzɔ́wiwa tɔn ɖé ǎ é ɔ, awakanmɛ kú i tawun. É ɖɔ: “Un mɔ ɖɔ xó ɖé ɖò wǔ yè.” Amɔ̌, Nick jó gbè ǎ. É wà nǔ e wu é kpé é bǐ ɖò agun ɔ kpo Mawuxóɖiɖɔzɔ́ ɔ kpo mɛ. Égbé dìn ɔ, é ɖò Wěɖegbɛ́ Alaxɔ tɔn ɖé mɛ.

4. Etɛ lɛ jí mǐ ka na ɖɔ xó dó ɖò xóta elɔ mɛ?

⁴ Awakanmɛ kú we ɖó a ko kpé nǔ e gbé nya wɛ a ɖè ɖò gbigbɔ lixo lɛ é ɖé lɛ wu ǎ wutu wɛ à? Enyi mɔ̌ hǔn, ɖɔ lee nǔ cí nú we é nú Jehovah. (Ðɛh. 37:5-7) Gɔ́ na ɔ, byɔ̌ nɔví sunnu e ko mɔ nǔ kpɔ́n lɛ é ɖɔ ye ni ɖè wě xá we dó lee a sixu bló gbɔn, bɔ lee sɛn Mawu gbɔn wɛ a ɖè é na lɛ́ kpɔ́n te d’eji gbɔn é wu, enɛ gudo hǔn, wà nǔ e wu a kpé é bǐ bo xwedó wěɖexámɛ yetɔn. Enyi a wà mɔ̌ ɔ, a sixu kpéwú bo ɖó wǔjɔmɛ enɛ, alǒ jɛ nǔ enɛ e gbé nya wɛ a ɖè é kɔn. Amɔ̌, lee é nyí gbɔn nú Melissa e xó mǐ ɖɔ wá yì é ɔ, vlafo ɔ, nǔ e ba na wà nú Jehovah wɛ a ɖè é sixu nɔ ma nyɔ́ bló dìn. Enyi mɔ̌ ɔ, nɛ̌ a ka sixu kpò ɖò awǎjijɛ ɖó wɛ gbɔn? Bo na dó na xósin nú nǔkanbyɔ enɛ ɔ, mǐ na ɖɔ xó dó nǔ elɔ lɛ jí ɖò xóta elɔ mɛ: (1) nǔ e sixu na we awǎjijɛ lɛ é, (2) lee a sixu bló gbɔn bɔ awǎjijɛ towe na jɛji é, (3) nǔ ɖěɖee gbé a sixu nya bɔ ye na gɔ́ sò nú awǎjijɛ towe lɛ é.

5. Bo na dó ɖó awǎjijɛ ɔ, etɛ lɛ jí mǐ ka ɖó na sɔ́ ayi ɖó? (Nǔnywɛtɔ́xó 6:9)

⁵ Nǔnywɛtɔ́xó 6:9 tinmɛ nǔ e sixu d’alɔ mǐ bɔ mǐ na ɖ’awǎjijɛ é. (Xà.) Mɛ e nukún tɔn ɖò ‘nǔ e é ɖó ɔ wu’ bɔ é víví n’i, ɖi nǔ e é ɖó dìn lɛ é ɔ, nǔ e é ɖó ɔ nɔ kpé è. Amɔ̌, mɛ e nukún tɔn nɔ ɖò nǔ e é jló ɔ wu é nɔ ɖò nǔ e wu é ma sixu kpé gbeɖé ǎ é ba wɛ. Etɛ enɛ ka sixu kplɔ́n mǐ? Bo na dó ɖó awǎjijɛ ɔ, mǐ ɖó na sɔ́ ayi ɖó nǔ e mǐ ɖó lɛ é kpo nǔ e mǐ sixu kánɖeji ɖɔ mǐ na ɖó lɛ é kpo jí.

6. Lǒ tɛ mǐ ka na gbéjé kpɔ́n dìn? Etɛ lɛ lǒ enɛ ka na kplɔ́n mǐ?

⁶ Nǔ e è ko ɖó lɛ é ka sixu kpé mɛ dóo à? Mɛ gegě lin ɖɔ é kún sixu nyɔ́ bló ó. Ðó ɖò jɔwamɔ linu ɔ, enyi hwenu ɖò yiyi wɛ ɔ, mǐ nɔ ba na kplɔ́n lee è nɔ wà nǔ yɔyɔ̌ lɛ gbɔn é. Amɔ̌, é sixu nyɔ́ bló ganji. Nǔ e mǐ ɖó dìn lɛ é sixu d’awǎjijɛ nú mǐ nǔgbo. Gbɔn nɛ̌ é? Mi nú mǐ ni kpɔ́n lee nǔ sixu nyí mɔ̌ gbɔn é ɖò lǒ e Jezu dó dó sikágankwɛ wu, b’ɛ ɖò Matie 25:14-30 mɛ é mɛ. Mǐ na mɔ nǔ e lǒ enɛ sixu kplɔ́n mǐ dó lee nyɔna e mɔ wɛ mǐ ɖè dìn lɛ é sixu d’awǎjijɛ nú mǐ, bo tlɛ lɛ́ bló bɔ awǎjijɛ mǐtɔn na jɛji gbɔn é wu.

7. Sɛ̀ sin xwè nú lǒ e Jezu dó dó sikágankwɛ lɛ wu é ɖò klewun mɛ.

⁷ Ðò lǒ ɔ mɛ ɔ, nya ɖé xwè tomɛ. Cobonu é na yì ɔ, é ylɔ́ mɛsɛntɔ́ tɔn lɛ bo sɔ́ sikágankwɛ ɖé lɛ nú ye mɛ ɖokpo ɖokpo nú ye na dó w’ajɔ̌ na. * Nya ɔ tuùn nǔwukpíkpé mɛsɛntɔ́ tɔn lɛ ɖokpo ɖokpo tɔn, enɛ wu ɔ, é sɔ́ sikágankwɛ atɔ́ɔ́n nú mɛ ɖě, we nú mɛ ɖevo, bo sɔ́ ɖokpo nú mɛ atɔngɔ́ ɔ. Mɛsɛntɔ́ we nukɔntɔn lɛ w’azɔ̌ syɛnsyɛn, bɔ akwɛ e gǎn yetɔn zé nú ye é jì vǐ. Amɔ̌, mɛsɛntɔ́ atɔngɔ́ ɔ sɔ́ akwɛ tɔn dó wà nǔɖe ǎ, enɛ zɔ́n bɔ gǎn ɔ nya ɛ.

8. Etɛwu mɛsɛntɔ́ nukɔntɔn e xó è ɖɔ ɖò lǒ ɔ mɛ é ka na ko j’awǎ?

⁸ Mɛsɛntɔ́ nukɔntɔn ɔ ɖó na ko mɔ ɖɔ wǔ ɖaxó ɖé wɛ gǎn emitɔn jɔ emi, bo sɔ́ sikágankwɛ atɔ́ɔ́n d’así nú emi. Akwɛ ɖaxó wɛ, bɔ enɛ xlɛ́ ɖɔ gǎn tɔn ɖeji dó wǔ tɔn tawun! Bɔ mɛsɛntɔ́ wegɔ́ ɔ ka lo? Kanmɛ sixu ko gbɔjɔ ɛ ɖó sikágankwɛ e é yí é sɔ mɛsɛntɔ́ nukɔntɔn ɔ tɔn ǎ wutu. Amɔ̌, nɛ̌ é ka wà nǔ gbɔn?

9. Etɛ Jezu ma ka ɖɔ ɖò lǒ ɔ mɛ dó mɛsɛntɔ́ wegɔ́ ɔ wu ǎ? (Matie 25:22, 23)

 ⁹ Xà Matie 25:22, 23. Jezu ɖɔ ɖɔ mɛsɛntɔ́ wegɔ́ ɔ sin xomɛ, alǒ hɛn mɛ dó xomɛ ɖó sikágankwɛ we kpowun e é yí é wu ǎ. Gɔ́ na ɔ, Jezu ɖɔ ɖɔ mɛsɛntɔ́ ɔ jɛ gbɛ̀ vo sà jí gbɔn lě ǎ: ‘Ee è sɔ́ nú nyɛ é bǐ ɖíe à? Mɛsɛntɔ́ e yí sikágankwɛ atɔ́ɔ́n é kpo nyi kpo bǐ jɛn ka ɖó nǔwukpíkpé ɖokpo ɔ nɛ. Enyi gǎn ce lin ɖɔ un kún nyí azɔ̌watɔ́ ɖagbe ɖé ó ɔ, un sixu kun dò, bo bɛ́ sikágankwɛ we lɛ d’emɛ, bo nya nǔ nyiɖesunɔ tɔn lɛ gbé.’

10. Etɛ mɛsɛntɔ́ wegɔ́ ɔ ka sɔ́ sikágankwɛ tɔn lɛ dó wà?

¹⁰ Mɛsɛntɔ́ nukɔntɔn ɔ ɖɔhun ɔ, mɛsɛntɔ́ wegɔ́ ɔ wà nǔ e wu é kpé é bǐ bo kpé nukún dó nǔ e è sɔ́ d’así n’i é wu, bo w’azɔ̌ syɛnsyɛn dó sɛn gǎn tɔn. Wǎgbɔ tɔn ɔ, sikágankwɛ we e gǎn tɔn sɔ́ n’i é jì vǐ, bo huzu sikágankwɛ ɛnɛ. Gǎn ɔ d’ajɔ mɛsɛntɔ́ ɔ ɖó azɔ̌ syɛnsyɛn tɔn wu. Xomɛ hun gǎn ɔ tawun, b’ɛ lɛ́ dó azɔ̌ azɔ̌ jí nú mɛsɛntɔ́ ɔ.

11. Nɛ̌ mǐ ka sixu bló gbɔn bɔ awǎjijɛ mǐtɔn na jɛji?

¹¹ Mɔ̌ ɖokpo ɔ, enyi mǐ lɔ nɔ zé mǐɖée bǐ jó nú azɔ̌ e è sɔ́ d’así nú mǐ ɖò sinsɛnzɔ́ Jehovah tɔn mɛ é ɔ, awǎjijɛ mǐtɔn sixu jɛji. ‘Jǒ hwiɖée nú’ Mawuxóɖiɖɔzɔ́ ɔ, bo nɔ lɛ́ wà agunzɔ́ ɖevo lɛ bǐ mlɛ́mlɛ́. (Mɛ. 18:5; Ebl. 10:24, 25) Nɔ sɔnǔ ganji nú kplé lɛ, enɛ ɔ, a sixu na xósin e dó wusyɛn lanmɛ nú mɛ lɛ é. Nɔ wlíbo nú azɔ̌ ɖebǔ e è sɔ́ d’así nú we ɖò kplé aklunɔzán gblamɛ tɛntin tɔn hwenu lɛ é ganji. Enyi è byɔ we ɖɔ a ni kpé nukún dó azɔ̌ ɖebǔ wu ɖò agun ɔ mɛ hǔn, nɔ nɔ ganmɛ jí, bo lɛ́ nyí mɛ ɖejid’ewu. È sɔ́ azɔ̌ ɖebǔ d’así nú we hǔn, ma nɔ mɔ ɖɔ azɔ̌ enɛ  kún nyí azɔ̌ bɔ emi na gú hwenu ɖ’ékɔn ó ó. Tɛ́n kpɔ́n bo bló bonu nǔwukpíkpé towe lɛ ni kpɔ́n te d’eji. (Nǔx. 22:29) Enyi a nɔ kpé nukún dó azɔ̌ gbigbɔ tɔn e è sɔ́ d’así nú we lɛ é wu ganji ɔ, blewun jɛn a na yì nukɔn, bɔ awǎjijɛ towe na lɛ́ jɛji tawun. (Ga. 6:4) A na lɛ́ mɔ ɖɔ awǎjijɛ xá mɛ ɖevo lɛ hwenu e ye ɖó wǔjɔmɛ e ba wɛ hwɛ ɖè bo na ɖó, bo ma ka ko ɖó ǎ é na bɔwǔ nú we tawun.—Hlɔ. 12:15; Ga. 5:26.

12. Afɔ tawun tawun tɛ lɛ Kúnnuɖetɔ́ we ka ɖè dó gɔ́ sò nú awǎjijɛ yetɔn?

¹² A ka flín nɔví nyɔnu Melissa e xó mǐ ɖɔ wá yì, b’ɛ ba na wà sinsɛnzɔ́ ɖò Betɛli, alǒ yì Wemaxɔmɛ nú Wɛnɖagbejlatɔ́ Axɔ́suɖuto ɔ Tɔn lɛ é à? Alɔ tɔn sɔ́ sixu jɛ nǔ e gbé nya wɛ é ɖè lɛ é wu ǎ có, é ɖɔ: “Un nɔ tɛ́n kpɔ́n, bo nɔ wà nǔ e wu un kpé lɛ é bǐ ɖò Mawuxóɖiɖɔzɔ́ ce mɛ. Enɛ zɔ́n bɔ un ɖ’awǎjijɛ tawun.” Bɔ nɛ̌ Nick ka kpéwú bo ɖu ɖò awakanmɛ e kú i hwenu e è ma ko sɔ́ ɛ bonu é na nyí devízɔ́watɔ́ sinsɛnzɔ́wiwa tɔn ǎ é jí gbɔn? É ɖɔ: “Un nɔ sɔ́ ayi ɖó wǔjɔmɛ e un ɖó lɛ é jí, ye wɛ nyí alɔɖiɖó ɖò sinsɛnzɔ́ ɔ mɛ kpo xósin e dó wusyɛn lanmɛ nú mɛ lɛ é nina ɖò kplé lɛ jí kpo. Un lɛ́ d’alɔ wema mɛ bo na wà sinsɛnzɔ́ ɖò Betɛli, bɔ ɖò xwè e bɔ d’ewu é mɛ ɔ, è ylɔ́ mì.”

13. Enyi a nɔ jó hwiɖée dó nú azɔ̌ e è sɔ́ d’así nú we dìn lɛ é ɔ, etɛ mɛ é ka na tɔ́n kɔ dó? (Nǔnywɛtɔ́xó 2:24)

¹³ Enyi a nɔ jó hwiɖée dó nú azɔ̌ e è nɔ sɔ́ d’así nú we dìn lɛ é bǐ mlɛ́mlɛ́ ɔ, è ka na wá sɔ́ azɔ̌ ɖevo lɛ d’así nú we ɖò nukɔnmɛ à? Nǔ sixu nyí mɔ̌ lee é nyí gbɔn nú Nick é ɖɔhun. É ma ka nyí mɔ̌ ǎ, Melissa ɖɔhun ɔ, awǎjijɛ towe sixu jɛji, bɔ nǔ e wà nú Jehovah wɛ a ɖè é na lɛ́ dó xomɛhunhun nú we tawun. (Xà Nǔnywɛtɔ́xó 2:24.) Gɔ́ na ɔ, tuùn e a tuùn ɖɔ gǎn e dó wɛ a ɖè lɛ é nɔ dó xomɛhunhun nú Gǎn mǐtɔn Jezu Klisu é na d’awǎjijɛ nú we tawun.

14. Enyi mǐ ɖò tamɛ lin dó nǔ e gbé nya wɛ mǐ ɖè ɖò sinsɛnzɔ́ Jehovah tɔn mɛ lɛ é jí wɛ ɔ, etɛ mǐ ma ka ɖó na wɔn gbeɖé ǎ?

¹⁴ Ayi sísɔ́ ɖó azɔ̌ ɖěɖee è sɔ́ d’así nú mǐ dìn lɛ é jí sín tinmɛ wɛ nyí ɖɔ, mǐ kún sɔ́ na tɛ́n kpɔ́n bo wà nǔ gegě d’eji nú Jehovah ó à? Nǔ e ɖɔ wɛ xó ɔ ɖè é nɛ ǎ. Mǐ ɖó na nya nǔ e na d’alɔ mǐ bɔ wɛnɖagbe jijla kpo nǔkplɔnkplɔn mɛ lɛ kpo sín azɔ̌ ɔ na bí alɔ nú mǐ d’eji, bɔ mǐ na lɛ́ d’alɔ nɔví mǐtɔn lɛ hugǎn é gbé. Enyi mǐ nɔ wà nǔ kpo nǔnywɛ kpo, bo nɔ lɛ́ nɔ jlɛ̌ jí, lobo ma nɔ sɔ́ ayi ɖó mǐɖée jí ǎ, bɔ alɔ didó mɛ ɖevo lɛ jí wɛ mǐ nɔ sɔ́ ayi ɖó ɔ, mǐ na kpé nǔ e gbé nya wɛ mǐ ɖè lɛ é wu.—Nǔx. 11:2; Mɛ. 20:35.

15. Ðɔ nǔ ɖěɖee gbé a sixu nya bɔ awǎjijɛ towe na lɛ́ jɛji é ɖé lɛ.

¹⁵ Etɛ lɛ gbé a ka sixu nya? Byɔ̌ Jehovah ɖɔ é ni d’alɔ we bonu a na tuùn nǔ ɖěɖee gbé a sixu nya, bo na kpéwú lɛ é. (Nǔx. 16:3; Ja. 1:5) A ka sixu nya nǔ e xó è ɖɔ ɖò  akpáxwé nukɔntɔn xóta elɔ tɔn mɛ lɛ é ɖě gbé à? Ye wɛ nyí gbexosin-alijitɔ́ alɔgɔtɔ́, alǒ gbexosin-alijitɔ́ hwebǐnu tɔn, sinsɛnzɔ́ wiwa ɖò Betɛli, kabǐ alɔɖiɖó ɖò xɔ yɛhwexɔ́suɖuto ɔ tɔn lɛ gbigbá mɛ, alǒ bɔya a sixu kplɔ́n gbè yɔyɔ̌ ɖevo, abǐ tlɛ yì jlá wɛnɖagbe ɔ ɖò ayǐ ɖevo jí. Enyi a ba na tuùn nǔ gegě dó nǔ enɛ lɛ jí hǔn, xà wemata 10gɔ́ ɔ wema Tutoblonunu Ee Nɔ Wà Jlǒ Jehovah Tɔn É tɔn, bo lɛ́ ɖɔ xó xá mɛxo agun tɔn e ɖò agun towe mɛ lɛ é. * Nú a ɖò gǎn dó wɛ bo na kpé nǔ enɛ lɛ wu ɔ, nukɔnyiyi towe na zawě nú mɛ bǐ, bɔ awǎjijɛ towe na lɛ́ jɛji.

16. Enyi a ma sixu nya nǔ ɖé gbé tawun, bo kpéwú ǎ ɔ, etɛ a ka sixu wà?

 ¹⁶ Bɔ nú a ma ka sixu nya nǔ e xó mǐ ɖɔ ɖò xóta elɔ mɛ lɛ é ɖě gbé, bo kpéwú ǎ ɔ ka ló? Tɛ́n kpɔ́n bo nya nǔ e wu a sixu kpé é ɖé gbé. Nǔ mǐ ni gbéjé ali elɔ lɛ e sixu hun nú we é kpɔ́n.

17. Sɔgbe xá 1 Timɔtée 4:13, 15 ɔ, nɛ̌ nɔví sunnu ɖé ka sixu bló gbɔn, bo na huzu nǔkplɔnmɛtɔ́ alɔsekpɛ́nnanɔ ɖé?

¹⁷ Xà 1 Timɔtée 4:13, 15. Enyi nɔví sunnu e ko bló baptɛm é ɖé wɛ nú we ɔ, a sixu bló bɔ nǔwukpíkpé xóɖiɖɔ kpo mɛkplɔnkplɔn kpo tɔn towe na kpɔ́n te d’eji. Etɛwu? Ðó nú a dó gǎn bo huzu nǔxatɔ́ ɖagbe, xóɖɔtɔ́ ɖagbe, kpo nǔkplɔnmɛtɔ́ ɖagbe ɖé kpo ɔ, a na kpéwú hugǎn bo d’alɔ mɛ ɖěɖee ɖò tó ɖó we wɛ lɛ é. Tɛ́n kpɔ́n bo bló tuto bo gbéjé nǔwukpíkpé xóɖiɖɔ tɔn ɖěɖee xó è ɖɔ ɖò nǔkplɔnkplɔn alɔnuwema Ðǒkan Dó Nǔxixa kpo Mɛkplɔnkplɔn kpo Wu ɔ tɔn mɛ lɛ é ɖokpo ɖokpo kpɔ́n, bo lɛ́ zán ye. Sín hweɖenu jɛ hweɖenu hǔn, nɔ sɔ́ nǔwukpíkpé enɛ lɛ ɖokpo ɖokpo, bo ba dò nú nǔ d’ewu, nɔ w’azɔ̌ d’eji ɖò xwégbe ganji, lobo nɔ tɛ́n kpɔ́n bo nɔ ɖexlɛ́ ɖò xóɖiɖɔ towe lɛ mɛ. Nɔ ba wěɖexámɛ ɖò wěɖexámɛtɔ́ alɔgɔtɔ́ ɔ, alǒ, mɛxo agun tɔn ɖevo e “nɔ ɖókan dó Mawuxóɖiɖɔ kpodo Mawuxó kplɔ́n mɛ kpo wu lɛ” é gɔ́n. * (1 Tim. 5:17) Ma zé ayi ɖó nukúnnú mimɔ jɛ nǔ e a mɔ ɖò alɔnuwema ɔ mɛ lɛ é zinzán kɛɖɛ jí ó. É nyɔ́ wà hǔn, d’alɔ tóɖówetɔ́ lɛ bonu ye ni na hlɔnhlɔn nǔɖiɖi yetɔn, alǒ, blǒ bonu akpakpa ni sɔ́ ye bonu ye ni zán nǔ e ye kplɔ́n lɛ é. Enyi a nɔ wà mɔ̌ ɔ, awǎjijɛ hwi kpo ye kpo tɔn na lɛ́ jɛji.

18. Etɛ lɛ ka sixu d’alɔ we bɔ a na kpé nǔ e gbé nya wɛ a ɖè ɖò Mawuxóɖiɖɔ linu lɛ é wu?

 ¹⁸ Wɛn ɔ jijla kpo alɔdidó mɛ lɛ bonu ye na huzu ahwanvu kpo sín azɔ̌ ɔ, mǐ bǐ wɛ è sɔ́ d’así na. (Mat. 28:19, 20; Hlɔ. 10:14) A ka ba ɖɔ nǔwukpíkpé towe ni kpɔ́n te d’eji ɖò azɔ̌ taji enɛ kɔn à? Nya nǔ tawun tawun lɛ gbé hwenu e a na ɖò alɔnuwema Mɛkplɔnkplɔn ɔ kplɔ́n wɛ, bo na lɛ́ ɖò nǔ e a kplɔ́n ɖ’emɛ lɛ é zán wɛ é. A sixu lɛ́ mɔ wěɖexámɛ ɖevo e na d’alɔ we lɛ é ɖò Gbɛzán Klisanwun Tɔn kpo Sinsɛnzɔ́ Mǐtɔn Kpo: Kplé Sín Azɔ̌wema ɔ mɛ. Gɔ́ na ɔ, wěɖexámɛ ɖěɖee ɖò xóɖɔɖókpɔ́ sín video e è nɔ xlɛ́ ɖò kplé aklunɔzán gblamɛ tɛntin tɔn hwenu lɛ é lɔ sixu d’alɔ we. Tɛ́n wlɛnwín vovo e a mɔ ɖò nǔ enɛ lɛ mɛ lɛ é kpɔ́n, bo kpɔ́n ee na w’azɔ̌ hugǎn ɖò fí e a nɔ ɖɔ Mawuxó ɖè é é. Enyi a nɔ zán wěɖexámɛ enɛ lɛ ɔ, a na huzu nǔkplɔnmɛtɔ́ alɔsekpɛ́nnanɔ ɖé, bɔ enɛ na zɔ́n bɔ awǎjijɛ towe na jɛji.—2 Tim. 4:5.

19. Nɛ̌ a ka sixu sɔnǔ nú jijɔ Klisanwun tɔn lɛ gbɔn?

¹⁹ Ee a na ɖò tamɛ lin dó nǔ e gbé a na nya lɛ é jí wɛ é ɔ, nǔ taji hugǎn ɖokpo ɖíe bɔ a ɖó na wɔn ǎ: Nǔ sísɔ́ nú jijɔ Klisanwun tɔn lɛ. (Ga. 5:22, 23; Kolo. 3:12; 2 Pi. 1:5-8) Nɛ̌ a ka sixu kpé enɛ wu gbɔn? Mǐ ni ɖɔ ɖɔ a ba na bló bɔ nǔɖiɖi towe na syɛn d’eji. A sixu xà xóta ɖěɖee ɖò wema mǐtɔn lɛ mɛ, bo ɖè wě tawun tawun lɛ xá mǐ dó lee mǐ sixu bló bɔ nǔɖiɖi mǐtɔn na lidǒ gbɔn é wu lɛ é. É ɖò wɛn ɖɔ a na ɖu lè Televiziɔn JW Tɔn^® sín akpáxwé klewun klewun lɛ kpinkpɔn tɔn. Video enɛ lɛ xlɛ́ lee nɔví mǐtɔn lɛ ɖè nǔɖiɖi nukúnɖeji xlɛ́ hwenu e ye ɖò xwi ɖí xá mɛtɛnkpɔn vovo lɛ wɛ é gbɔn é. Enɛ gudo hǔn, lin tamɛ dó lee a sixu xwedó kpɔ́ndéwú nǔɖiɖi tɔn yetɔn ɖò gbɛzán towe mɛ gbɔn é jí.

20. Nɛ̌ mǐ ka sixu gɔ́ sò nú awǎjijɛ mǐtɔn, bo ɖè kan kpò nú awakanmɛkúmɛ gbɔn?

²⁰ É ɖò wɛn ɖɔ mǐ bǐ wɛ nɔ ba na wà nǔ gegě nú Jehovah, hugǎn lee wà gbɔn wɛ mǐ ɖè dìn é. Ðò gbɛ̀ yɔyɔ̌ ɔ mɛ ɔ, mǐ na kpéwú bo na sɛn Mawu bǐ mlɛ́mlɛ́. Dìn hwɛ̌ ɔ, enyi mǐ ɖò nǔ e wu mǐ kpé é bǐ wà wɛ ɔ, mǐ sixu gɔ́ sò nú awǎjijɛ mǐtɔn, lobo lɛ́ bló bɔ awakanmɛ e nɔ kú mǐ é na ɖekpo. Taji hugǎn ɔ, mǐ na wlí yɛ̌yi nú Jehovah, “Mawu awǎjijɛnɔ” mǐtɔn, bo lɛ́ kpa susu n’i. (1 Tim. 1:11, nwt) Hǔn, mi nú mǐ ni bló bonu wǔjɔmɛ e mǐ ɖó lɛ é ni nɔ dó awǎjijɛ nú mǐ!