XÓTA NǓKPLƆ́NKPLƆ́N TƆN 33
Jexóva nɔ kpé nukún dó togun tɔn wú
‘Jexóva sín nukún nɔ ɖo mɛ e nɔ nɔ gbejí n’i lɛ́ jí.’—ÐƐH. 33:18.
HAN 4 ‘Jexóva wɛ nyí Lɛ̌ngbɔ́nyitɔ́ ce’
XÓNUSƆ́ÐÓTE *
1. Étɛ́wú Jezu ka byɔ́ Jexóva ɖɔ é ní kpé nukún dó ahwanvú émítɔn lɛ́ wú?
ÐO ZǍN e jɛ nukɔn nú kú Jezu tɔn é mɛ ɔ, é byɔ́ nǔ tají ɖé Tɔ́ tɔn jǐxwé tɔn ɔ. É byɔ́ Jexóva ɖɔ é ní kpé nukún dó ahwanvú émítɔn lɛ́ wú. (Jaan 17:15, 20) É ɖo wɛn ɖɔ hwebǐnu wɛ nukún Jexóva tɔn nɔ ɖo togun tɔn jí, énɛ́ wɛ nyí ɖɔ é nɔ kpé nukún dó wǔ tɔn, bo nɔ lɛ́ cyɔ́n alɔ jǐ tɔn. É ɖo mɔ̌ có, Jezu tuun ɖɔ gbe e Satáan ná klán xá ahwanvú émítɔn lɛ́ é ɔ, é kún ko klán mɔ̌hun xá yě kpɔ́n ó. Jezu lɛ́ tuun ɖɔ yě ná ɖó alɔdó Jexóva tɔn sín hudó, bo ná dó gbí dɔn ɖo ahwantɔ́nmɛ Awǒvi tɔn lɛ́ nukɔn.
2. Sɔgbe xá Ðɛhan 33:18-20 ɔ, étɛ́wú mǐ ma ka ɖó ná ɖi xɛsi nú wǔvɛ́ lɛ́ ǎ?
2 Gbɛ élɔ́ e nu kp’acɛ dó wɛ Satáan ɖe é nɔ dɔn wǔvɛ́ gěgé wá nú klisánwun nǔgbó lɛ́ ɖo égbé. Mǐ nɔ mɔ wǔvɛ́ ɖěɖěe sixú kú awakanmɛ nú mǐ, bo tlɛ sixú tɛ́n gbejí e mǐ ɖe nú Jexóva é kpɔ́n lɛ́ é. Amɔ̌, mǐ ná mɔ ɖo xóta élɔ́ mɛ ɖɔ mǐ kún ɖó ná ɖi xɛsi nú nǔ ɖěbǔ ó. Nukún Jexóva tɔn ɖo mǐ jí, énɛ́ wɛ nyí ɖɔ é nɔ mɔ wǔvɛ́ e ɖí xwi xá wɛ mǐ ɖe lɛ́ é, bo ɖo gbesisɔmɛ bo ná d’alɔ mǐ bɔ mǐ ná ɖí xwi xá yě. Mi nú mǐ ní gbéjé kpɔ́ndéwú Biblu tɔn e xlɛ́ ɖɔ Jexóva “sín nukún nɔ ɖo mɛ e nɔ nɔ gbejí n’i lɛ́ jí” é we kpɔ́n.—Xa Ðɛhan 33:18-20.
HWENU E MǏ MƆ ÐƆ MǏ ÐO MǏÐOKPÓ É
3. Hwe tɛ́ lɛ́ nu mǐ ka sixú nɔ mɔ ɖɔ mǐ ɖo mǐɖokpó?
3 Mǐ ɖo xwédo ɖaxó e mɛ mɛsɛntɔ́ Jexóva tɔn lɛ́ ɖe é mɛ có, mǐ sixú nɔ mɔ hweɖélɛ́nu ɖɔ mǐ ɖo mǐɖokpó. Ði kpɔ́ndéwú ɔ, mɛ wínnyáwínnyá lɛ́ sixú nɔ mɔ ɖɔ yě ɖo yěɖokpó hwenu e yě ɖo nǔ e yě ɖi nǔ ná lɛ́ é tínmɛ wɛ ɖo wěmaxɔmɛvígbɛ́ yětɔn lɛ́ nukɔn ɖo wěmaxɔmɛ é, alǒ hwenu e yě sɛ tɛn yi agun yɔ̌yɔ́ ɖé mɛ é. Ényí mǐ lin ɖɔ mǐ ɖó ná ɖí xwi xá linlin énɛ́ lɛ́ mǐɖokpó ɔ, mǐ mɛ ɖé lɛ́ sixú blá wǔ, alǒ awakanmɛ ná kú mǐ. Mǐ sixú xo nǔ kpɔ́n dó xó ɖiɖɔ nú mɛ ɖěvo lɛ́ dó lěe nǔ cí nú mǐ é wú wú, ɖó ado sixú hu mǐ ɖɔ yě kún ná mɔ nǔ jɛ mɛ ó. Gɔ́ ná ɔ, hweɖélɛ́nu ɔ, mǐ tlɛ sixú nɔ kanbyɔ́ mǐɖée ɖɔ mɛɖé ka ɖo mǐtɔn ɖɔ wɛ dóó a jí. Nú é ná bo tlɛ nyí hwɛjijɔ ɖěbǔ wú wɛ mǐ mɔ ɖɔ mǐ ɖo mǐɖokpó ɔ, hweɖélɛ́nu ɔ, mǐ sixú nɔ lɛ́ mɔ ɖɔ mǐ kún ɖó alɔgɔ́númɛtɔ́ ɖé ó, bɔ ado sixú lɛ́ hu mǐ. Jexóva nɔ ba gbeɖé ɖɔ nǔ ní cí mɔ̌ nú mǐ ǎ. Étɛ́wú mǐ ka sixú ɖɔ mɔ̌?
4. Étɛ́wú gbeyíɖɔ Elíi ka ɖɔ: “Nyɛɖokpónɔ géé wɛ kpo”?
4 Mǐ ní gbéjé kpɔ́ndéwú Elíi e nyí nya gbejínɔtɔ́ ɖé é tɔn kpɔ́n. Jezabɛ́li ɖɔ émí ná hú i, énɛ́ wú ɔ, é hɔn dó gbɛ tɔn jí nú azǎn 40 jɛjí. (1 Axɔ́. 19:1-9) Gǔdo mɛ, hwenu e éɖokpónɔ wá ɖo só ɖé xomɛ é ɔ, é sú xó sɛ́dó Jexóva ɖɔ: “Nyɛɖokpónɔ géé wɛ [nyí gbeyíɖɔ e] kpo” é. (1 Axɔ́. 19:10) Gbeyíɖɔ ɖěvo lɛ́ lɛ́vɔ́ kpo ɖo to ɔ mɛ; Ovadiahu dó gǎn, bo hwlɛ́n gbeyíɖɔ 100 sín Jezabɛ́li e nyí mɛhutɔ́ é lɔ mɛ. (1 Axɔ́. 18:7, 13) Bɔ étɛ́wú Elíi ka mɔ ɖɔ émí ɖo émíɖokpó sɔmɔ̌? É ka vɛdó ɖɔ gbeyíɖɔ e Ovadiahu hwlɛ́n lɛ́ é lɔ bǐ ko kú din wɛ a? Mɛ ɖě ka sɔ́ wá gɔ́ n’i bo jɛ Jexóva sɛn xá ɛ jí, hwenu e Jexóva ko xlɛ́ gúdo ɖɔ émí nyí Mawu nǔgbó ɔ é ǎ wɛ zɔ́n bɔ é mɔ ɖɔ émí ɖo émíɖokpó a? Vlafo é mɔ ɖɔ mɛɖé kún tuun lě do gbɛ émítɔn ɖo axɔ́ nu sɔ é ó, alǒ kinkanbyɔ́ éɖée wɛ é ná ko ɖe ɖɔ nǔ émítɔn kún nɔ ɖu ayi mɛ nú mɛɖé ó wɛ zɔ́n a? Tan ɔ tínmɛ lěe nǔ cí nú Elíi é bǐ mlɛ́mlɛ́ ǎ. Amɔ̌, é ɖo gaan ɖɔ Jexóva mɔ nǔ jɛ nǔ e wú Elíi mɔ ɖɔ émí ɖo émíɖokpó é mɛ, bo tuun lěe é ná d’alɔ ɛ gbɔn é pɛ́ɛ.
Ényí mǐ mɔ ɖɔ mǐ ɖo mǐɖokpó ɔ, étɛ́ lěe Jexóva d’alɔ Elíi gbɔn é ka sixú kplɔ́n mǐ? (Kpɔ́n akpáxwé 5-6)
5. Jexóva ná gǎnjɛwú Elíi ɖɔ é kún ɖo éɖokpó ó. Gbɔn nɛ̌ é?
5 Jexóva d’alɔ Elíi ɖo ali gěgé nu. É dó wǔsyɛ́n lanmɛ nú Elíi ɖɔ é ní ɖɔ xó. Azɔn we wɛ É kanbyɔ́ Elíi ɖɔ: “Étɛ́ wa wɛ a ɖe ɖo fí?” (1 Axɔ́. 19:9, 13) Ðo ninɔmɛ énɛ́ lɛ́ ɖokpó ɖokpó mɛ ɔ, Jexóva ɖótó Elíi hwenu e é ɖo lěe nǔ cí n’i é ɖɔ wɛ é. Jexóva ná xósin Elíi gbɔn xlɛ́ e é xlɛ́ ɖɔ émí ɖo akpá tɔn, bo lɛ́ ɖó hlɔ̌nhlɔ́n tawun é gblamɛ. É lɛ́ ná gǎnjɛwú Elíi ɖɔ, é lɛ́ kpo mawusɛntɔ́ gbɛ̌ tɔn gěgé ɖěvo lɛ́. (1 Axɔ́. 19:11, 12, 18) É ɖo wɛn ɖɔ, agbɔ̌n Elíi tɔn jɛ do hwenu e é ɖɔ lěe nǔ cí n’i é nú Jexóva, bo lɛ́ ɖótó xósin Jexóva tɔn gúdo é. Jexóva sɔ́ azɔ̌ tají gěgé d’así nú Elíi. É byɔ́ ɛ ɖɔ é ní kɔn ami dó ta nú Hazayɛ́li, bo sɔ́ ɛ Silíi xɔ́sú, bo kɔn ami dó ta nú Jehu, bo sɔ́ ɛ Izlayɛ́li xɔ́sú, lobo sɔ́ Elizée gbeyíɖɔ. (1 Axɔ́. 19:15, 16) Jexóva sɔ́ azɔ̌ énɛ́ lɛ́ d’así nú Elíi dó d’alɔ ɛ bónú é ná sɔ́ ayi tɔn ɖó nǔ ɖagbe lɛ́ jí. Mawu lɛ́ ná ɛ azɔ̌gbɛ́ ɖokpó, bɔ é kpó é kpó vɛ́ tawun; Elizée wɛ é nɔ nyí. Ényí a nɔ mɔ ɖɔ émí ɖo émíɖokpó ɔ, nɛ̌ a ka sixú mɔ alɔdó Jexóva tɔn gbɔn?
6. Ényí a nɔ mɔ ɖɔ émí ɖo émíɖokpó ɔ, étɛ́ lɛ́ takúnmɛ a ka sixú nɔ xo ɖɛ dó? (Ðɛhan 62:9)
6 Jexóva byɔ́ we ɖɔ hwi ní nɔ xo ɖɛ sɛ́dó émí. É nɔ mɔ wǔvɛ́ e ɖí xwi xá wɛ a ɖe lɛ́ é, bo ná we gǎnjɛwú ɖɔ émí ná nɔ ɖótó ɖɛ towe lɛ́ hwelɛ́bǐnu. (1 Tɛ. 5:17) Xomɛ nɔ hun i dó tó ɖíɖó mɛsɛntɔ́ tɔn lɛ́ wú. (Nǔx. 15:8) Ényí a nɔ mɔ ɖɔ émí ɖo émíɖokpó ɔ, étɛ́ lɛ́ takúnmɛ a ka sixú nɔ xo ɖɛ dó? Nɔ ɖɔ lěe nǔ cí nú we é nú Jexóva, Elíi ɖɔhun. (Xa Ðɛhan 62:9.) Nɔ ɖɔ nǔ e ɖo adohu adohu ɖó nú we wɛ lɛ́ é kpó lěe nǔ nɔ cí nú we dó yě wú é kpó n’i. Nɔ byɔ́ Jexóva ɖɔ é ní d’alɔ we bónú a ná tuun nǔ e a ná wa hwenu e a mɔ ɖɔ a ɖo hwiɖokpó, alǒ wǔ kú we é. Ði kpɔ́ndéwú ɔ, ényí a nɔ mɔ ɖɔ émí ɖo émíɖokpó, alǒ xɛsi nɔ ɖi we dó kúnnuɖiɖe ɖo wěmaxɔmɛ wú hǔn, nɔ byɔ́ Jexóva ɖɔ é ní ná we akɔ́nkpinkpan e sín hudó a ɖó bo ná ɖɔ xó é. A tlɛ sixú lɛ́ byɔ́ ɛ nǔnywɛ́ bo ná dó tínmɛ nǔ e a ɖi nǔ ná lɛ́ é kpó nǔnywɛ́ kpó. (Luk. 21:14, 15) Ényí a ɖo xwi ɖí xá linlin masɔgbe lɛ́ wɛ hǔn, byɔ̌ Jexóva ɖɔ é ní d’alɔ we bónú a ní ɖɔ xó xá klisánwun e zin é ɖé. A sixú byɔ́ Jexóva ɖɔ é ní d’alɔ mɛ e ɖɔ xó ná gbé wɛ a ja é bónú é ní ɖótó we bo mɔ nǔ jɛ lěe nǔ cí nú we é mɛ. Nɔ ɖɔ lěe nǔ cí nú we é nú Jexóva, bo nɔ ɖó ayi lěe é nɔ ná xósin nú ɖɛ towe lɛ́ gbɔn é wú, lobo nɔ lɛ́ yí gbe nú alɔdó mɛ ɖěvo lɛ́ tɔn, énɛ́ ɔ, a sɔ́ ná nɔ mɔ ɖɔ émí ɖo émíɖokpó dín ǎ.
A ka ɖo ali ɖěɖěe nu a ná gbló ada nú sinsɛnzɔ́ towe, bo lɛ́ w’azɔ̌ ɖó kpɔ́ xá mɛ ɖěvo lɛ́ ɖe é ba wɛ a? (Kpɔ́n akpáxwé 7)
7. Étɛ́ kpɔ́ndéwú Mauricio tɔn ka kplɔ́n we?
7 Jexóva sɔ́ azɔ̌ tají ɖé d’así nú mǐ mɛ ɖokpó ɖokpó. A sixú ɖeji ɖɔ é nɔ ɖ’ayi gǎn e a nɔ dó bo nɔ wa azɔ̌ e è ɖe nú we ɖo agun ɔ mɛ lɛ́ é kpó alɔ e a nɔ ɖó ɖo sinsɛnzɔ́ ɔ mɛ é kpó wú, bɔ é nɔ hun xomɛ n’i tawun. (Ðɛh. 110:3, nwt) Ényí a nɔ mɔ ɖɔ émí ɖo émíɖokpó ɔ, nɛ̌ alɔnu towe hinhɛn ján ɖo azɔ̌ énɛ́ kɔn ka sixú wa ɖagbe nú we gbɔn? Mǐ ní gbéjé kpɔ́ndéwú nɔví súnnu wínnyáwínnyá e nɔ nyí Mauricio é tɔn kpɔ́n. * Ée Mauricio bló batɛ́mu bɔ é ná nɔ zaan é ɔ, xɔ́ntɔn vívɛ́ tɔn lɛ́ ɖokpó jɛ nǔgbó ɔ jó dó jí kpɛɖé kpɛɖé. Mauricio ɖɔ: “Ée un mɔ bɔ é jó Jexóva dó é ɔ, un sɔ́ nɔ ɖeji dó nyiɖée wú ǎ. Un nɔ kanbyɔ́ nyiɖée ɖɔ un ka ná sixú kpé wú bo ɖe akpá e un dó nú Jexóva é, lobo kpo ɖo xwédo tɔn mɛ a jí. Un nɔ mɔ ɖɔ un ɖo nyiɖokpó, bɔ mɛ ɖěbǔ kún ka sixú mɔ nǔ jɛ lěe nǔ cí nú mì é mɛ ó.” Étɛ́ ka d’alɔ Mauricio? É ɖɔ: “Un gbló ada nú sinsɛnzɔ́ ce. Énɛ́ d’alɔ mì bɔ un sɔ́ nɔ sɔ́ ayi ɖó nyiɖée kpó lěe nǔ nɔ cí nú mì é kpó kɛ́ɖɛ́ jí ǎ. Ényí un ɖo azɔ̌ wa xá mɛ ɖěvo lɛ́ wɛ ɖo sinsɛnzɔ́ ɔ mɛ ɔ, un nɔ ɖó awǎjijɛ, bo sɔ́ nɔ mɔ ɖɔ un ɖo nyiɖokpó dín ǎ.” Nǔgbó wɛ ɖɔ ényí mǐ ma tlɛ sixú ɖɔ Mawuxó xá nǔɖitɔ́ hǎtɔ́ mǐtɔn lɛ́ cɔɔ lěe ǎ ɔ, mǐ kpó yě kpó ka nɔ nɔ kpɔ́ bó nɔ ɖ’alɔ ɖo azɔ̌ énɛ́ mɛ gbɔn wěma wínwlán sɛ́dó mɛ kpó kúnnuɖiɖe gbɔn alǒkan jí kpó gblamɛ, bɔ énɛ́ nɔ ná hlɔ̌nhlɔ́n mǐ. Nǔ ɖěvo tɛ́ ka lɛ́ d’alɔ Mauricio? É ɖɔ gɔ́ ná ɖɔ: “Un lɛ́ hɛn alɔnu ce ján ɖo agun ɔ mɛ. Un nɔ wa nǔ e wú un kpé é bǐ bo nɔ sɔ́ nǔ nú wěmaxɔmɛví sín azɔ̌ ce lɛ́, lobo nɔ lɛ́ xwlé yě mɛ ganjí. Azɔ̌ énɛ́ lɛ́ e un nɔ wa é nɔ zɔ́n bɔ un mɔ ɖɔ nǔ ce nɔ nyɔ́ Jexóva kpó mɛ ɖěvo lɛ́ kpó nukúnmɛ.”
JEXÓVA NƆ D’ALƆ MǏ HWENU E AWAKANMƐ KÚ MǏ É
8. Ényí mǐ mɔ wǔvɛ́ syɛ́nsyɛ́n lɛ́ ɔ, nɛ̌ nǔ ka nɔ cí nú mǐ?
8 Mǐ nɔ ɖó nukún ɖɔ mǐ ná mɔ wǔvɛ́ ɖo azǎn gǔdo gúdo tɔn élɔ́ lɛ́ mɛ. (2 Tim. 3:1) É ɖo mɔ̌ có, wǔvɛ́ ɖé lɛ́ sixú wá fyán mǐ. Bóyá wǔvɛ́ lěhun lɛ́ sixú wá fyán mǐ: akwɛ́yózo, azɔn syɛ́nsyɛ́n, alǒ kú mɛvívɛ́ ɖé tɔn. Ðo ninɔmɛ mɔ̌hun lɛ́ mɛ ɔ, mǐ sixú flú bǐ, bo lɛ́ mɔ ɖɔ é hú gǎn mǐ, tají ɔ, ényí é cí ɖɔ wǔvɛ́ lɛ́ nɔ wá ɖěbɔdóɖěwú, alǒ yě nɔ wá zɛ̌ɛ́n ɔ nɛ́. Amɔ̌, flín ɖɔ Jexóva ɖo nukún kpé dó mǐ wú wɛ, bɔ kpó alɔdó tɔn kpó ɔ, mǐ sixú ɖí xwi xá wǔvɛ́ ɖěbǔ kpó jiɖiɖe kpó.
9. Ðɔ wǔvɛ́ e Jɔbu mɔ é ɖé lɛ́.
9 Lin tamɛ dó lěe Jexóva d’alɔ nya gbejínɔtɔ́ Jɔbu gbɔn é wú. Ðo táan kléwún ɖé mɛ ɔ, é mɔ wǔvɛ́ syɛ́nsyɛ́n gěgé. Ðo azǎn ɖokpó jí ɔ, Jɔbu se nǔ e sɛ hǔn d’aga é gěgé; é ba kanlinkpó tɔn bǐ kpo, è hu mɛsɛntɔ́ tɔn lɛ́, bɔ nylá hú ɔ wɛ nyí ɖɔ vǐ vívɛ́ná tɔn lɛ́ bǐ kú. (Jɔb. 1:13-19) Jɔbu kpo ɖo xɔxɔ wǔvɛ́ syɛ́nsyɛ́n énɛ́ lɛ́ tɔn se wɛ cóbó lɛ́ bɛ́ azɔn syɛ́nsyɛ́n. (Jɔb. 2:7) Ninɔmɛ e mɛ Jɔbu ɖe é syɛ́n sɔmɔ̌ bɔ é ɖɔ: “É kpé mì lo! Un sɔ́ ɖo nǎ kú wɛ gbeɖé ǎ wɛ a?”—Jɔb. 7:16.
Jexóva ɖɔ xó nú Jɔbu dó ali ɖěɖěe nu é nɔ kpé nukún dó nǔɖíɖó tɔn lɛ́ wú ɖe é gěgé wú, dó ná ɛ jiɖe ɖɔ émí ná kpé nukún dó wǔ tɔn kpó wǎnyíyí kpó (Kpɔ́n akpáxwé 10)
10. Jexóva ná Jɔbu nǔ e sín hudó é ɖó bo ná sixú dɛ ɖo wǔvɛ́ tɔn lɛ́ nu é. Gbɔn nɛ̌ é? (Kpɔ́n ɖiɖe e ɖo akpa ɔ jí é.)
10 Nukún Jexóva tɔn ɖo Jɔbu jí. Ðó Jexóva yí wǎn nú Jɔbu wútu ɔ, É ná ɛ nǔ e sín hudó é ɖó bo ná mɔ tɛn dó dɛ ɖo wǔvɛ́ tɔn lɛ́ nu, bo kpo ɖo gbejí lɛ́ é. Jexóva ɖɔ xó nú Jɔbu, bo flín i ɖɔ nǔnywɛ́ Émítɔn gɔ́ nú nukún e Émí nɔ kpé dó nǔɖíɖó émítɔn lɛ́ wú kpó wǎnyíyí kpó é kún ɖó dogbó ó. É ɖɔ xó n’i dó kanlin e jí wǔ lɛ́ é gěgé wú. (Jɔb. 38:1, 2; 39:9, 13, 19, 27; 40:15; 40:25, 26) Jexóva lɛ́ gbɔn nya gbejínɔtɔ́ e nɔ nyí Elihu é jí bo dó wǔsyɛ́n lanmɛ nú Jɔbu lobo lɛ́ dó gbɔ n’i. Elihu ná ɛ gǎnjɛwú ɖɔ Jexóva nɔ kɔn nyɔ̌ná dó mɛsɛntɔ́ Tɔn lɛ́ jí hwebǐnu, ɖó didɛ yětɔn wútu. Amɔ̌, Jexóva lɛ́ sísɛ́ Elihu bɔ é ɖe wě ɖé lɛ́ xá Jɔbu kpó wǎnyíyí kpó. Elihu flín Jɔbu ɖɔ mǐ kún sɔ atɛ́n ɖo Jexóva e nyí Gbɛɖótɔ́ mǐtɔn é kpá ó, dó d’alɔ ɛ bónú é ma sɔ́ nɔ sɔ́ ayi ɖó éɖée jí zɛ xwé wú ó. (Jɔb. 37:14) Jexóva lɛ́ sɔ́ azɔ̌ ɖé d’así nú Jɔbu; é ɖó ná xo ɖɛ dó xɔ́ntɔn tɔn atɔn e wa nǔ nyi do lɛ́ é sín tamɛ. (Jɔb. 42:8-10) Nɛ̌ Jexóva ka nɔ d’alɔ mǐ ɖo wǔvɛ́ mǐtɔn lɛ́ mɛ ɖo égbé gbɔn?
11. Gbɔ tɛ́ Biblu ka nɔ dó nú mǐ ɖo wǔvɛ́ mǐtɔn lɛ́ hwenu?
11 Jexóva sɔ́ nɔ ɖɔ xó nú mǐ lěe é ɖɔ nú Jɔbu gbɔn é ǎ, amɔ̌, é nɔ ɖɔ xó nú mǐ gbɔn Xó tɔn Biblu ɔ gblamɛ. (Hlɔ̌. 15:4) É nɔ dó gbɔ nú mǐ gbɔn nukúnɖíɖó sɔgúdo tɔn e é ná mǐ é gblamɛ. Mǐ ní gbéjé linlin e ɖo Biblu mɛ, bo sixú dó gbɔ nú mǐ hwenu e mǐ ɖo wǔvɛ́ lɛ́ mɔ wɛ é ɖé lɛ́ kpɔ́n kléwún. Jexóva ná mǐ gǎnjɛwú ɖo Biblu mɛ ɖɔ nǔ ɖěbǔ káká jɛ wǔvɛ́ syɛ́nsyɛ́n lɛ́ jí “kún sixú ɖe mǐ ɖó vo nú wǎnyíyí tɔn ó.” (Hlɔ̌. 8:38, ) É lɛ́ ná mǐ gǎnjɛwú ɖɔ émí “ɖo kpɔ́ xá mɛ e nɔ sú xó ylɔ́ [émí ɖo ɖɛ mɛ] lɛ́ bǐ.” ( 39Ðɛh. 145:18) Jexóva ɖɔ nú mǐ ɖɔ ényí mǐ gán jɛ émí wú ɔ, mǐ sixú dɛ ɖo wǔvɛ́ ɖěbǔ nu, bɔ ényí mǐ ná bo tlɛ ɖo wǔvɛ́ se wɛ ɔ, mǐ sixú ɖ’awǎjijɛ. (1 Kɔ. 10:13; Ja. 1:2, 12) Xó Mawu tɔn lɛ́ flín mǐ ɖɔ wǔvɛ́ mǐtɔn lɛ́ ɔ, kpɛɖé wɛ yě nyí, bo lɛ́ nyí nú hwenu ɖé, ényí è sɔ́ jlɛ́ dó gbɛ mavɔmavɔ e sín ajɔ ná dó mǐ wɛ è ɖe é wú ɔ nɛ́. (2 Kɔ. 4:16-18) Jexóva ná mǐ nukúnɖíɖó ɖejidéwú ɔ ɖɔ émí ná sú kún dó nú mɛ ɖěɖěe nyí ɖɔ wǔvɛ́ mǐtɔn lɛ́ bǐ tɔn é; yě wɛ nyí Satáan Awǒvi kpó mɛ ɖěɖěe nɔ wa nǔ nyanya éɖɔhun lɛ́ é kpó. (Ðɛh. 37:10) A ka hɛn wěmafɔ Biblu tɔn e nɔ dó gbɔ nú mɛ é ɖé lɛ́ ayi mɛ, bónú yě ná d’alɔ we bɔ a nǎ dɛ ɖo wǔvɛ́ sɔgúdo tɔn lɛ́ nu a?
12. Ényí mǐ ná ɖu le Xó Jexóva tɔn tɔn bǐ mlɛ́mlɛ́ ɔ, étɛ́ é ka nɔ ɖó nukún ɖɔ mǐ ní wa?
12 Jexóva nɔ ɖó nukún ɖɔ mǐ ní nɔ ba hwenu bo nɔ kplɔ́n Biblu hwɛhwɛ, bo nɔ lɛ́ lin tamɛ dó nǔ ɖěɖěe mǐ xa lɛ́ é jí ganjí. Ényí mǐ nɔ zán nǔ e mǐ kplɔ́n lɛ́ é ganjí ɔ, nǔɖiɖi mǐtɔn nɔ lí dǒ, bɔ mǐ nɔ lɛ́ sɛkpɔ́ Tɔ́ mǐtɔn jǐxwé tɔn ɔ hú gǎn. Wǎgbɔ tɔn ɔ, mǐ nɔ lɛ́ mɔ hlɔ̌nhlɔ́n bo nɔ dɛ ɖo wǔvɛ́ mǐtɔn lɛ́ nu. Jexóva nɔ lɛ́ ná gbigbɔ mímɛ́ tɔn mɛ ɖěɖěe nɔ gán jɛ Xó tɔn wú lɛ́ é. Gɔ́ ná ɔ, gbigbɔ énɛ́ sixú ná mǐ “hlɔ̌nhlɔ́n aditi” ɔ, bɔ é ná zɔ́n bɔ mǐ ná dɛ ɖo wǔvɛ́ ɖěbǔ nu.—2 Kɔ. 4:7-10.
13. Nɛ̌ nǔɖuɖu gbigbɔ tɔn e “mɛsɛntɔ́ gbejínɔtɔ́ ayiɖotenánɔ” ɔ nɔ sɔ́ nǔ ná lɛ́ é ka nɔ d’alɔ mǐ bɔ mǐ nɔ dɛ ɖo wǔvɛ́ lɛ́ nu gbɔn?
13 Kpó alɔdó Jexóva tɔn kpó ɔ, “mɛsɛntɔ́ gbejínɔtɔ́ ayiɖotenánɔ” ɔ nɔ sɔ́ nǔ nú xóta, video kpó han kpó, éé sixú d’alɔ mǐ bɔ mǐ ná ɖó nǔɖiɖi syɛ́nsyɛ́n, bo lɛ́ kpo ɖo wunzɛn ɖo gbigbɔ lixo é gěgé. (Mat. 24:45) Mǐ ɖó ná nɔ ɖu le nǔ énɛ́ lɛ́ e nɔ wá dó ganmɛ é tɔn bǐ mlɛ́mlɛ́. Agaɖanu din ɔ, nɔví nyɔ̌nu e nɔ nɔ États-Unis é ɖokpó ɖɔ lěe nǔɖuɖu gbigbɔ tɔn énɛ́ lɛ́ bǐ nɔ su nukún tɔn mɛ gbɔn é. É ɖɔ: “Ðo xwe 40 e un ko sɛn Jexóva ná wá yi lɛ́ é mɛ ɔ, nǔ gěgé tɛ́n gbejíninɔ ce kpɔ́n azɔn mɔ̌kpán.” É mɔ wǔvɛ́ syɛ́nsyɛ́n gěgé: mɔ̌tokuntɔ́ e nu ahán mú é ɖokpó hu gǎn’páa tɔn, mɛjitɔ́ tɔn lɛ́ bɛ́ azɔn syɛ́nsyɛ́n bɔ wǎgbɔ tɔn ɔ, yě kú, bɔ è mɔ kansɛ́ɛzɔn nú éɖésúnɔ azɔn we. Étɛ́ ka d’alɔ ɛ bɔ é dɛ? É tínmɛ ɖɔ: “Jexóva kpé nukún dó wǔ ye hwebǐnu. Nǔɖuɖu gbigbɔ tɔn e é nɔ sɔ́ nǔ ná gbɔn mɛsɛntɔ́ gbejínɔtɔ́ ayiɖotenánɔ ɔ jí é d’alɔ mì bɔ un dɛ. Énɛ́ wú ɔ, un sixú ɖɔ Jɔbu ɖɔhun ɖɔ: ‘Káká nú un ná kú ɔ, un ná jó gbejíninɔ ce dó ǎ!’”—Jɔb. 27:5, nwt.
Nɛ̌ mǐ ka sixú d’alɔ mɛ ɖěvo lɛ́ ɖo agun ɔ mɛ gbɔn? (Kpɔ́n akpáxwé 14)
14. Nɛ̌ Jexóva ka nɔ gbɔn nǔɖitɔ́ hǎtɔ́ mǐtɔn lɛ́ jí dó d’alɔ mǐ ɖo wǔvɛ́ mǐtɔn lɛ́ hwenu gbɔn? (1 Tɛsaloníkinu lɛ́ 4:9)
14 Jexóva kplɔ́n mɛsɛntɔ́ tɔn lɛ́ ɖɔ yě ní nɔ yí wǎn nú yěɖée, bo nɔ lɛ́ dó gbɔ nú yěɖée ɖo hwenu vɛ́ wǔ lɛ́ mɛ. (2 Kɔ. 1:3, 4; xa 1 Tɛsaloníkinu lɛ́ 4:9.) Elihu ɖɔhun ɔ, akpakpa nɔ sɔ́ nɔví súnnu kpó nɔví nyɔ̌nu kpó mǐtɔn lɛ́ bónú yě ná d’alɔ mǐ, bɔ mǐ ná kpo ɖo gbejí hwenu e mǐ ɖo xwi ɖí xá wǔvɛ́ lɛ́ wɛ é. (Mɛ. 14:22) Ði kpɔ́ndéwú ɔ, mǐ ní ɖɔ xó dó lěe agun e mɛ Diane ɖe é dó wǔsyɛ́n lanmɛ n’i, bo lɛ́ d’alɔ ɛ bɔ é kpo ɖo ganjí ɖo gbigbɔ lixo hwenu e asú tɔn jɛ azɔn syɛ́nsyɛ́n ɖé gúdo é wú. É ɖɔ: “É vɛ́ wǔ nú mǐ tawun. Amɔ̌, mǐ mɔ alɔ hlɔ̌nhlɔ́nnɔ kpó wǎnyíyínɔ kpó Jexóva tɔn ɖo sun vɛ́ wǔ énɛ́ lɛ́ mɛ. Agun e mɛ mǐ ɖe é wa nǔ gěgé dó nɔ gǔdo nú mǐ. Yě nɔ wá ba mǐ kpɔ́n, nɔ kplá así kɔ nú mǐ, nɔ ylɔ́ mǐ; nǔ énɛ́ lɛ́ e yě wa nú mǐ é bǐ d’alɔ mǐ bɔ mǐ dɛ. Ðó un ma nyɔ́ mɔ̌to kun ǎ wútu ɔ, nɔví lɛ́ nɔ d’alɔ mì, bɔ un nɔ kpé wú, bo nɔ yi kplé lɛ́ kpó kúnnuɖegbé kpó hwenu e un kpé wú dó é.” Nyɔ̌ná ɖé wɛ é nyí ɖɔ mǐ ɖo xwédo gbigbɔ tɔn wǎnyíyínɔ mɔ̌hun mɛ!
LĚE JEXÓVA NƆ KPÉ NUKÚN MǏ WÚ KPÓ WǍNYÍYÍ KPÓ GBƆN É NƆ SU NUKÚN MǏTƆN MƐ
15. Étɛ́wú mǐ ka sixú ɖeji ɖɔ mǐ sixú ɖí xwi xá wǔvɛ́ mǐtɔn lɛ́?
15 Mǐ mɛ bǐ wɛ ná mɔ wǔvɛ́ ɖé lɛ́. É ɖo mɔ̌ có, lěe mǐ ko kplɔ́n gbɔn é ɔ, mǐ ná ɖí xwi xá wǔvɛ́ lɛ́ mǐɖokpónɔ gbeɖé ǎ. Tɔ́ wǎnyíyínɔ ɖé ɖɔhun ɔ, Jexóva nɔ kpé nukún dó mǐ wú hwebǐnu. É ɖo akpá mǐtɔn, bo ɖo gbesisɔmɛ bo ná ɖótó xó e mǐ nɔ sú sɛ́ dó è dó byɔ́ ɛ alɔdó é, bɔ akpakpa lɛ́ ɖo sísɔ́ ɛ wɛ bɔ é ná nɔ gǔdo nú mǐ. (Eza. 43:2) Mǐ kú d’é jí ɖɔ mǐ sixú ɖí xwi xá wǔvɛ́ mǐtɔn lɛ́, ɖó Jexóva nɔ hun alɔ dó ná nǔ e sín hudó mǐ ɖó bá dɛ ɖo yě nu lɛ́ é bǐ mǐ wútu. É jɔ wǔ mǐ bɔ mǐ ná nɔ xo ɖɛ sɛ́dó è, bo ná mǐ Biblu, nǔɖuɖu gbigbɔ tɔn e túnflá lɛ́ é, gɔ́ nú kplékplé nɔví lɛ́ tɔn wǎnyíyínɔ ɖé, bɔ é ná nɔ d’alɔ mǐ hwenu e mǐ ɖo hudó mɛ é.
16. Étɛ́ mǐ ka sixú wa, bo ná kpo ɖo nukún e Jexóva nɔ kpé dó mǐ wú kpó wǎnyíyí kpó é sín le ɖu wɛ?
16 Xomɛ nɔ hun mǐ tawun ɖɔ mǐ ɖó Tɔ́ jǐxwé tɔn e nɔ kpé nukún dó mǐ wú é! “É wɛ zɔ́n bɔ xomɛ mǐtɔn bǐ gba wɔ̌.” (Ðɛh. 33:21) Mǐ sixú xlɛ́ Jexóva ɖɔ nukún e é nɔ kpé dó mǐ wú kpó wǎnyíyí kpó é nɔ su nukún mǐtɔn mɛ, ényí mǐ nɔ ɖu nǔ e é sɔ́ nǔ ná bo ná dó d’alɔ mǐ lɛ́ é bǐ sín vǐví ganjí ɔ nɛ́. Mǐ lɔ ɖó nǔɖé bo ná wa, bo ná dó sixú kpo ɖo vǐví nukún e Mawu nɔ kpé dó mǐ wú é tɔn ɖu wɛ. Ðo xógbe ɖěvo mɛ ɔ, ényí mǐ kpo ɖo nǔ e wú mǐ kpé é bǐ wa wɛ, bo nɔ se tónú nú Jexóva, lobo nɔ lɛ́ wa nǔ e sɔgbe ɖo nukún tɔn mɛ lɛ́ é ɔ, é ná nɔ kpé nukún mǐ wú tɛgbɛ.—1 Pi. 3:12.
HAN 30 Tɔ́ ce, Mawu ce, xɔ́ntɔn ce