Ðo xóta énɛ́ mɛ ɔ, mǐ kplɔ́n ɖɔ xó tají tawun ɖokpó kan gbɛtɔ́ lɛ́ kpó wɛnsagun lɛ́ kpó, énɛ́ wɛ nyí mǐmɛ́jíninɔ nyǐkɔ ɖaxó Jexóva tɔn tɔn. Xó tají e ɖo atɛ jí é sín akpáxwé ɖokpó wɛ nyí Nǔbǐwúkpétɔ́ e Jexóva nyí é, énɛ́ wɛ nyí acɛ e é ɖó bo ná kp’acɛ ɖo ali ɖagbe hú gǎn ɔ nu é. Xó tají e ɖo atɛ jí é sín akpáxwé ɖěvo wɛ nyí gbejíninɔ gbɛtɔ́ lɛ́ tɔn xó ɔ.

Aniwú mǐ ka dó zǒgbe jí din ɖɔ nyǐkɔ Jexóva tɔn kpó mǐmɛ́jíninɔ nyǐkɔ énɛ́ tɔn kpó wɛ nyí xó tají e ɖo atɛ jí é? Mi nú mǐ ní gbéjé hwɛjijɔ e wú wɛ é atɔn kpɔ́n.

Nukɔntɔn, nyǐkɔ Jexóva tɔn, alǒ mɛ alɔkpa e é nyí é wú wɛ Satáan mɔ xó ɖɔ dó, ɖo jikpá Edɛ́ni tɔn mɛ. Nǔ e Satáan zán sísɛ́ dó kanbyɔ́ Ɛvu é ɖo xíxlɛ́ wɛ ɖɔ Jexóva kún nyí Mawu alɔhundónánǔmɛtɔ́ ó, bɔ sɛ́n e é lɛ́ dó nú Adámu kpó Ɛvu kpó é kún ɖo jlɛ̌ jí ó. Énɛ́ gúdo ɔ, Satáan ɖɔ flíjɛ xó ɖěɖěe Jexóva ɖɔ lɛ́ é tɔn tlɔlɔ, bɔ mɔ̌ mɛ ɔ, é ylɔ́ Jexóva ɖɔ adingbannɔ. Énɛ́ wú ɔ, é kɔn cí dó nyǐkɔ Jexóva tɔn wú. É húzú “Awǒvi,” bɔ tínmɛ nyǐkɔ énɛ́ tɔn nyí “jidómɛtɔ́.” (Jaan 8:44) Ðó Ɛvu ɖi nǔ nú adingban e Satáan ɖó lɛ́ é wútu ɔ, é tlí tó nú Mawu, bo fɔ́n gǔ dó Nǔbǐwúkpétɔ́ e é nyí é jí. (Bǐb. 3:1-6) Satáan kpo ɖo cí kɔn dó nyǐkɔ Mawu tɔn wú wɛ káká jɛ égbé, bo nɔ fúnfún adingbanxó lɛ́ kpé dó mɛ alɔkpa e Jexóva nyí é wú. É cí ɖɔ tónúsise nú Jexóva kún nɔ sɔ xú mɛ ɖěɖěe nɔ ɖi nǔ nú adingban mɔ̌hun lɛ́ é ó ɖɔhun. Énɛ́ wú ɔ, nú togun Mawu tɔn ɔ, cí kɔn dó nyǐkɔ mímɛ́ Jexóva tɔn wú wɛ nyí nǔagɔwiwa e nylá hú bǐ é. Hwɛjijɔ tají e wú mǐ ɖo wǔvɛ́ se wɛ, bɔ nǔnyanyawiwa lɛ́ kpé gbɛ ɔ mɛ é nɛ́.

Wegɔ́ ɔ, Jexóva ná bló bɔ nyǐkɔ tɔn ná nyí nǔ mímɛ́, bo klɔ́ cí sín wǔ tɔn nú ɖagbe nǔɖíɖó lɛ́ bǐ tɔn. Nǔ e ɖo tají hú gǎn nú Jexóva é nɛ́. Énɛ́ wú wɛ é ɖɔ xó élɔ́ lɛ́: “Dandan mɛ ɔ, un ná bló bɔ nyǐkɔ ce ɖaxó e wú è kɔn cí dó ɖo akɔta lɛ́ mɛ é ná nyí nǔ mímɛ́.” (Ezek. 36:23, nwt) Gɔ́ ná ɔ, Jezu ɖɔ xó élɔ́ lɛ́ dó ɖe nǔ tají hú gǎn e mɛsɛntɔ́ gbejínɔtɔ́ Jexóva tɔn lɛ́ bǐ ɖó ná nɔ byɔ́ ɖo ɖɛ yětɔn lɛ́ mɛ é xlɛ́ nyi wɛn: “Nyǐkɔ towe ní nyí nǔ mímɛ́.” (Mat. 6:9) Azɔn mɔ̌kpán wɛ Biblu dó zǒgbe lě do susu kpikpa nú nyǐkɔ Jexóva tɔn ɖo tají sɔ é jí. Kpɔ́ndéwú tɔn ɖé lɛ́ ɖíe: ‘Mi sɔ́ Jexóva nyíkɔ su.’ (1 Tan 16:29; Ðɛh. 96:8) “Mi ɖɔ xó lómílómí dó sɔ́ nyǐkɔ tɔn su dó han mɛ.” (Ðɛh. 66:2) “Un ná nɔ kpa susu nú nyǐkɔ towe káká sɔ́yi.” (Ðɛh. 86:12) Azɔn mɔ̌kpán wɛ Jexóva ɖésúnɔ mɛtún ɔ ɖɔ xó sín jǐxwé; ɖo ninɔmɛ ɖé mɛ ɔ, tɛ́npli Jeluzalɛ́mu tɔn mɛ fí e Jezu ɖɔ xó élɔ́ lɛ́ ɖe é wɛ è se gbe tɔn ɖe: “Tɔ́, sɔ́ nyǐkɔ towe su.” Jexóva ka yí gbe n’i ɖɔ: “Un ko sɔ́ su, bo ka ná lɛ́ sɔ́ su.”—Jaan 12:28. a

Atɔngɔ́ ɔ, linlin Jexóva tɔn lɛ́ nɔ cá kan xá nyǐkɔ tɔn, alǒ mɛ alɔkpa e é nyí é hwebǐnu. Lin tamɛ dó nǔ élɔ́ wú: Ényí Axɔ́súɖuɖu xwe afatɔ́n tɔn Klísu tɔn fó, bónú mɛtɛ́nkpɔ́n gǔdo tɔn ɔ lɔ wá yi gúdo ɔ, étɛ́ ka ná jɛ túnu tɔn? Nɛ̌ nǔ ka ná cí nú gbɛtɔ́ lɛ́ kpó wɛnsagun lɛ́ kpó bǐ dó nyǐkɔ Jexóva  tɔn wú hwenɛ́nu? Bo ná dó d’alɔ mǐ bónú mǐ ná mɔ xósin nǔkanbyɔ́ énɛ́ tɔn ɔ, mi nú mǐ ní flín akpáxwé xó tají e ɖo atɛ jí é tɔn we lɛ́: gbejíninɔ gbɛtɔ́ lɛ́ tɔn kpó Nǔbǐwúkpétɔ́ e Jexóva nyí é kpó. Hwenɛ́nu ɔ, é sɔ́ ná byɔ́ ɖɔ gbɛtɔ́ lɛ́ ní xlɛ́ ɖɔ émí ɖo gbejí ǎ, yě ná ko nyí mɛ maɖóblɔ̌, bɔ è ná ko lɛ́ tɛ́n yě kpɔ́n ɖo ali bǐ nu. Yě ná ko mɔ ajɔ gbɛ mavɔmavɔ tɔn yětɔn yí. Nǔbǐwúkpétɔ́ e Mawu nyí bo ná kp’acɛ gbɔn gbɛ ɔ bǐ mɛ é xó ɔ ka sɔ́ ná kpo ɖo atɛ jí, lobo tlɛ ná kpo ɖo kínklán dɔn wá nǔɖíɖó lɛ́ tɛ́ntin wɛ wɛ a? Éǒ. Hwenɛ́nu ɔ, nǔ e ɖo jǐxwé lɛ́ é kpó nǔ e ɖo ayǐkúngban jí lɛ́ é kpó bǐ ná ɖo bǔ, bo ná yí gbe nú acɛkpikpa tɔn. Nyǐkɔ Jexóva tɔn ka sɔ́ ná kpo ɖo nǔ tají hú gǎn ɔ nyí nú togun tɔn wɛ a?

Hwenɛ́nu ɔ, mɛ lɛ́ bǐ ná tuun nǔgbó ɔ dó Jexóva wú, bɔ nyǐkɔ tɔn ná lɛ́ nyí nǔ mímɛ́ bǐ mlɛ́mlɛ́. É ɖo mɔ̌ có, nyǐkɔ Jexóva tɔn ná kpo ɖo nǔ tají hú gǎn ɔ nyí nú mɛsɛntɔ́ tɔn lɛ́ bǐ wɛ, ɖo jǐxwé kpó ayǐkúngban jí kpó. Aniwú? Ðó yě ná mɔ ɖɔ Jexóva kpo ɖo nǔjíwǔ lɛ́ wa wɛ. Ðó Jezu ná sɔ́ acɛkpikpa ɔ jó nú Jexóva kpó mɛɖéesɔ́hwe kpó, bɔ Mawu ná nyí “nǔ bǐ nú mɛ bǐ.” (1 Kɔ. 15:28) Énɛ́ gúdo ɔ, mɛ ɖěɖěe ɖo ayǐkúngban ɔ jí lɛ́ é bǐ ná ɖu “mɛɖéesíjijɛ susunɔ vǐ Mawu tɔn lɛ́ tɔn” sín vǐví. (Hlɔ̌. 8:21) Gɔ́ ná ɔ, Jexóva ná bló bɔ linlin tɔn e nyí ɖɔ é ná xo nǔɖíɖó e ɖo jǐxwé kpó éé ɖo ayǐkúngban ɔ jí lɛ́ é kpó bǐ kplé, bɔ yě ná húzú xwédo e ɖo bǔ é ɖokpó é ná jɛnu bǐ dégbédégbé.—Efɛ́. 1:10.

Nǔ énɛ́ lɛ́ bǐ jɛ wá yi ɔ, nɛ̌ nǔ ka ná cí nú xwédo Jexóva tɔn e ɖo jǐxwé é kpó éé ɖo ayǐkúngban jí é kpó? É ɖo wɛn ɖɔ, mǐ ná kpo ɖo biba wɛ vɛ́návɛ́ná, bo ná kpa susu nú nyǐkɔ Jexóva tɔn. Mawu sɔ́ d’ayi mɛ nú ɖɛhanwlántɔ́ Davídi bɔ é wlán ɖɔ: ‘Jɛlijɛli nú Jexóva. Jɛlijɛli nú nyǐkɔ tɔn káká sɔ́yi.’ (Ðɛh. 72:18, 19) Mǐ ná kpo ɖo hwɛjijɔ e wú mǐ ná wa mɔ̌ lɛ́ é yɔ̌yɔ́ e sɔ́ akpakpa mɛ lɛ́ é mɔ wɛ káká yi káká sá.

È ná ɖɔ ɔ, nǔ e kunkplá Jexóva lɛ́ é bǐ wɛ nyǐkɔ Jexóva tɔn nɔ te ná. Ényí mǐ lin tamɛ dó nyǐkɔ Jexóva tɔn jí ɔ, é nɔ flín mǐ wǎnyíyí tɔn. (1 Jaan 4:8) Hwebǐnu wɛ mǐ ná nɔ flín ɖɔ wǎn e Jexóva yí nú mǐ é wɛ zɔ́n bɔ é dá mǐ, bo lɛ́ xɔ gbɛ nú mǐ; gɔ́ ná ɔ, hwebǐnu wɛ mǐ ná nɔ lɛ́ flín ɖɔ lěe é nɔ kp’acɛ gbɔn é sɔgbe, bo lɛ́ nyí kpó wǎnyíyí kpó. Amɔ̌, mǐ ná kpo ɖo vǐví wǎnyíyí e Jexóva nɔ ɖe xlɛ́ nǔɖíɖó tɔn lɛ́ é tɔn ɖu wɛ. Mǐ ná ɖó hwɛjijɔ e wú mǐ ná vɛ́ kpó Tɔ́ mǐtɔn kpó, bo ná nɔ lɛ́ ji han dó kpa susu nú nyǐkɔ jí wǔ tɔn káká sɔ́yi lɛ́ é gěgé.—Ðɛh. 73:28.