1. Étɛ́ mɛ e hwɛ tɔn lɛ́ vɛ́ ná é ɖé ka nɔ wa?

 ÉNYÍ mǐ wa nǔ nyanya ɖé ɔ, é ɖo tají ɖɔ hwɛ mǐtɔn ní vɛ́ nú mǐ. Ðo Biblu mɛ ɔ, mɛ e hwɛ tɔn lɛ́ vɛ́ ná é nɔ húzú linlin e é ɖó dó nǔwalɔ ɖé wú é, nɔ ɖó nǔ wiwa gbɔn mɔ̌ te, bo nɔ kán ɖ’é jí bo sɔ́ ná bló ɖě ǎ.—Kpɔ́n Xógbe ɖé lɛ́ sín tínmɛ: “Hwɛvɛ́númɛ.”

2. Étɛ́wú é ka byɔ́ ɖɔ mǐ bǐ ní kplɔ́n nǔ dó hwɛvɛ́númɛ wú? (Nɛɛmíi 8:9-11)

² Gbɛtɔ́ lɛ́ bǐ ɖó ná kplɔ́n nǔ dó hwɛvɛ́númɛ wú. Aniwú? Ðó mǐ mɛ bǐ wɛ nɔ hu hwɛ gbe bǐ gbe. Ðó mǐ nyí kúnkan Adámu kpó Ɛvu kpó tɔn wútu ɔ, mǐ mɛ bǐ wɛ ɖu hwɛhuhu kpó kú kpó sín gǔ. (Hlɔ̌. 3:23; 5:12) Mǐ ɖě yi ɖ’é mɛ ǎ. Mɛ e tlɛ ɖó nǔɖiɖi syɛ́nsyɛ́n ɖi mɛsɛ́dó Pɔ́lu ɖɔhun lɛ́ é ɖí xwi xá hwɛhuhu. (Hlɔ̌. 7:21-24) Xlɛ́xlɛ́ wɛ énɛ́ ɖe ɖɔ wǔ ɖó ná nɔ kú mǐ hwebǐnu ɖó hwɛhuhu mǐtɔn lɛ́ wú a? Éǒ, nǔbláwǔkúnúmɛtɔ́ wɛ Jexóva nyí, bɔ é ba ɖɔ mǐ mɛ bǐ ní ɖó awǎjijɛ. Lin tamɛ dó kpɔ́ndéwú Jwifu e nɔ gbɛ ɖo Nɛɛmíi sín hwenu lɛ́ é tɔn jí. (Xa Nɛɛmíi 8:9-11.) Jexóva ba ɖɔ wǔ ní kú yě zɛ xwé wú ɖó hwɛ e yě hu wá yi lɛ́ é wú ǎ, loɔ, é ba ɖɔ yě ní sɛn émí kpó awǎjijɛ kpó. Jexóva tuun ɖɔ hwɛvɛ́númɛ nɔ zɔ́n bɔ è nɔ ɖó awǎjijɛ. Énɛ́ wú ɔ, é kplɔ́n nǔ mǐ dó hwɛvɛ́númɛ wú. Ényí hwɛ mǐtɔn lɛ́ vɛ́ nú mǐ ɔ, mǐ sixú kú d’é jí ɖɔ Tɔ́ mǐtɔn nǔbláwǔkúnúmɛtɔ́ ɔ ná sɔ́ hwɛ mǐtɔn lɛ́ kɛ mǐ.

3. Étɛ́ wú mǐ ka ná ɖɔ xó dó ɖo xóta élɔ́ mɛ?

³ Mi nú mǐ ní kplɔ́n nǔ dó hwɛvɛ́númɛ wú d’é jí. Ðo xóta élɔ́ mɛ ɔ, mǐ ná ɖɔ xó dó hwɛvɛ́númɛ wú ɖo ali vovo atɔn nu. Nukɔntɔn ɔ, mǐ ná ɖɔ xó dó nǔ e Jexóva kplɔ́n Izlayɛ́li ví lɛ́ dó hwɛvɛ́númɛ wú é jí. Énɛ́ gúdo ɔ, mǐ ná sɔ́ ayi ɖó lěe Jexóva  d’alɔ hwɛhutɔ́ lɛ́, bɔ hwɛ yětɔn lɛ́ vɛ́ nú yě gbɔn é jí. Ðo vivɔnu ɔ, mǐ ná ɖɔ xó dó nǔ e ahwanvú Jezu tɔn lɛ́ kplɔ́n dó hwɛvɛ́númɛ wú é jí.

NǓ E JEXÓVA KPLƆ́N IZLAYƐ́LI VÍ LƐ́ DÓ HWƐVƐ́NÚMƐ WÚ É

4. Étɛ́ Jexóva ka kplɔ́n akɔta Izlayɛ́li tɔn ɔ dó hwɛvɛ́númɛ wú?

⁴ Hwenu e Jexóva bló tuto nú Izlayɛ́li ví lɛ́ bɔ yě húzú akɔta ɖé é ɔ, é jɛ akɔ ɖé xá yě, bɔ yě dó akpá ɖɔ émí ná se tónú ná. Ényí yě nyi sɛ́n tɔn lɛ́ ɔ, é ná nya xɛ ɖo yě jí, bo ná kɔn nyɔ̌ná dó yě jí. É ɖɔ nǔ élɔ́ nú yě dó sɛ́n tɔn lɛ́ wú: “Nǔ e Mawu zɔ́n mi, bɔ un ɖo ɖiɖɔ nú mi wɛ égbé din ɔ hú gǎn mi ǎ; blǒbló tɔn gló mi ǎ.” (Sɛ́n. 30:11, 16) Amɔ̌, ényí yě fɔ́n gǔ dó jǐ tɔn, ɖi kpɔ́ndéwú ɔ, gbɔn gbeta ɔ kɔn wíwá bo sɛn nǔmɛsɛn ɖěvo lɛ́ gblamɛ ɔ, é ná ɖe alɔ sín kan yětɔn mɛ bɔ yě ná se wǔvɛ́. Amɔ̌, nú nǔ ná bo tlɛ nyí mɔ̌ ɔ, yě sixú lɛ́ mɔ fɛ́nú Mawu tɔn. Yě sixú ‘lɛ́ kɔ wá Jexóva, Mawu yětɔn gɔ́n, bo ná lɛ́ se tónú n’i.’ (Sɛ́n. 30:1-3, 17-20) Ðo xógbe ɖěvo mɛ ɔ, hwɛ yětɔn sixú vɛ́ nú yě. Mɔ̌ mɛ ɔ, Jexóva kpó yě kpó ná vɛ́, bɔ é ná lɛ́ kɔn nyɔ̌ná dó yě jí.

5. Nɛ̌ Jexóva ka ɖe xlɛ́ ɖɔ émí kún jó gbe dó togun émítɔn wú ó gbɔn? (2 Axɔ́sú lɛ́ 17:13, 14)

⁵ Togun e Jexóva sɔ́ é fɔ́n gǔ dó jǐ tɔn azɔn mɔ̌kpán. Gbɔn vo nú bǒcyɔ e yě nɔ sɛn é ɔ, yě nɔ lɛ́ wa nǔ baɖabaɖa ɖěvo lɛ́. Wǎgbɔ tɔn ɔ, yě se wǔvɛ́. Amɔ̌, Jexóva jó gbe dó togun tɔn tótlítɔ́ ɔ wú ǎ. É sɛ́ gbeyíɖɔ lɛ́ dó azɔn mɔ̌kpán bónú yě ná ɖɔ nú togun tɔn ɖɔ hwɛ tɔn lɛ́ ní vɛ́ n’i bónú é ní lɛ́ kɔ wá gɔ̌n tɔn.—Xa 2 Axɔ́sú lɛ́ 17:13, 14.

6. Nɛ̌ Jexóva ka zán gbeyíɖɔ tɔn lɛ́ dó kplɔ́n lě do hwɛvɛ́númɛ ɖo tají sɔ é togun tɔn gbɔn? (Kpɔ́n ɖiɖe ɔ lɔmɔ̌.)

⁶ Hwɛhwɛ wɛ Jexóva nɔ sɛ́ gbeyíɖɔ tɔn lɛ́ dó bónú yě ná gba akpá nú togun tɔn, bo lɛ́ gbɛ́ nǔ n’i. Ði kpɔ́ndéwú ɔ, Jexóva ɖɔ xó élɔ́ gbɔn Jelemíi jí: ‘Izlayɛ́li gbejímanɔtɔ́! Lɛ̌ kɔ wá. Un ná sɔ́ nukún nyanya dó kpɔ́n we ǎ. Un nɔ kú nǔbláwǔ nú mɛ. Un ná nɔ xomɛsin jí káká sɔ́yi ǎ. Vɛ̌ ko tuun kpowun ɖɔ émí hu hwɛ; tuun ɖɔ émí kún nɔ gbejí nú nyɛ Jexóva ó.’ (Jel. 3:12, 13) Jexóva ɖɔ xó élɔ́ gbɔn  Jowɛ́li jí: “Mi lɛ́ kɔ wá gɔ̌n ce kpó ayixa mitɔn bǐ kpó.” (Jowɛ́. 2:12, 13) É ɖɔ nú Ezayíi ɖɔ é ní ɖɔ: “Mi slá wǔ, mi ma sɔ́ xo dǎka ɖě ɖo nukún ce mɛ ó, mi jó nǔnyanyawiwa dó.” (Eza. 1:16-19) Gɔ́ ná ɔ, Jexóva gbɔn Ezekiyɛ́li jí bo kanbyɔ́ ɖɔ: “Nǔ e ba wɛ un ɖe tawun ɔ wɛ nyí ɖɔ mɛdídá ní kú wɛ mi vɛdó a? Nǔ e ba [wɛ] nyɛ Aklúnɔ Mavɔmavɔ ɖe ɔ wɛ nyí ɖɔ mɛdídá ní húzú walɔ bo nɔ gbɛ. . . . Un ba gbeɖé ɖɔ mɛɖé ní kú ǎ; hǔn mi bo vɔ́ jɔ bo nɔ gbɛ.” (Ezek. 18:23, 32) Ényí Jexóva mɔ mɛ lɛ́ bónú hwɛ yětɔn vɛ́ nú yě ɔ, é nɔ víví n’i, ɖó é ba ɖɔ yě ní nɔ gbɛ, énɛ́ wɛ nyí ɖɔ yě ní nɔ gbɛ káká sɔ́yi! Énɛ́ wú ɔ, Jexóva nɔ ɖo te kpowun nǔɖé ma wa bónú hwɛhutɔ́ lɛ́ ní húzú jijɔ hwɛ̌ cóbónú é ná d’alɔ yě ǎ. Mi nú mǐ ní kpɔ́n kpɔ́ndéwú énɛ́ tɔn ɖěvo lɛ́.

7. Étɛ́ Jexóva ka zán tan gbeyíɖɔ Ozée kpó asi tɔn kpó tɔn dó kplɔ́n togun tɔn?

⁷ Ðǒ ayi nǔ e Jexóva kplɔ́n togun tɔn gbɔn gbeyíɖɔ Ozée kpó asi tɔn Gomɛ́ɛ kpó gblamɛ é wú. Ée Gomɛ́ɛ dó afɔ gbě gúdo é ɔ, é jó Ozée dó bo jɛ súnnu ɖěvo lɛ́ tɔ́n xá jí. É sɔ́ jɛxá alɔdó ǎ wɛ a? Jexóva e sixú mɔ nǔ jɛ ayi mɛ é ɖɔ nú Ozée ɖɔ: ‘Lɛ̌ vɔ́ yí wǎn nú nyɔ̌nu énɛ́ ɔ e ɖó asú cóbó ka lɛ́ ɖo aga lɛ wɛ é. Yǐ wǎn n’i lěe nyɛ Jexóva ɔ yí wǎn nú Izlayɛ́li ví lɛ́ gbɔn é. Yě jó mì dó, bo ɖo vodún lɛ́ sɛn wɛ.’ (Oz. 3:1; Nǔx. 16:2) Ðǒ ayi wú ɖɔ Ozée sín asi kpo ɖo hwɛ syɛ́nsyɛ́n hu wɛ. É ɖo mɔ̌ có, Jexóva ɖɔ nú Ozée ɖɔ é ní yi ba ɛ mɔ, sɔ́ hwɛ kɛ ɛ bo dó hwɛ gbɔ xá ɛ. a Ðo ali ɖokpó ɔ nu ɔ, Jexóva jó gbe dó togun tɔn tasyɛ́ntɔ́ ɔ wú ǎ. Yě kpo ɖo nǔ e nylá tawun lɛ́ é wa wɛ có, é kpo ɖo wǎn yí nú yě wɛ. É nɔ sɛ́ gbeyíɖɔ tɔn lɛ́ dó bónú yě ná d’alɔ yě, nú hwɛ yětɔn lɛ́ ná vɛ́ nú yě, lobonú yě ná bló hǔzúhúzú lɛ́ ɖo gbɛzán yětɔn mɛ. Xlɛ́xlɛ́ wɛ kpɔ́ndéwú énɛ́ ka ɖe ɖɔ Jexóva e nɔ gbéjé ayi gbɛtɔ́ lɛ́ tɔn kpɔ́n é ná ba mɛ e kpo ɖo hwɛ syɛ́nsyɛ́n hu wɛ é ɖé mɔ, bo tɛ́n kpɔ́n bo d’alɔ ɛ bɔ hwɛ tɔn ná vɛ́ n’i a? (Nǔx. 17:3) Mǐ ní kpɔ́n.

LĚE JEXÓVA NƆ D’ALƆ HWƐHUTƆ́ LƐ́ BƆ HWƐ YĚTƆN LƐ́ NƆ VƐ́ NÚ YĚ GBƆN É

8. Étɛ́ Jexóva ka wa dó d’alɔ Kanyɛ́ɛ bónú hwɛ tɔn lɛ́ ná vɛ́ n’i? (Bǐbɛ́mɛ 4:3-7) (Kpɔ́n ɖiɖe ɔ lɔmɔ̌.)

⁸ Kanyɛ́ɛ wɛ nyí nukɔnví Adámu kpó Ɛvu kpó tɔn. É ɖu hwɛhuhugú ɖo mɛjitɔ́ tɔn lɛ́ gɔ́n. Gɔ́ ná ɔ, Biblu ɖɔ dó wǔ tɔn ɖɔ: “Éyɛ́ wa nǔ nyanya.” (1 Jaan 3:12) Bóyá énɛ́ wú wɛ Jexóva “ɖe kɔ dó Kanyɛ́ɛ kpódó vɔ̌sánú tɔn kpó” hwenu e é xwlé è vɔ̌sísá ɖé é. Nǔ ɖo ganjí wɛ ɔ, Kanyɛ́ɛ ɖó ná lɛ́ kɔ sín nǔ e wa wɛ é ɖe é gúdo, amɔ̌, “nǔ énɛ́ ɔ sin xomɛ nú Kanyɛ́ɛ ɖésú, bɔ é nylá nukúnmɛ.” Étɛ́ Jexóva ka wa bɔ d’é wú? É ɖɔ xó nú Kanyɛ́ɛ. (Xa Bǐbɛ́mɛ 4:3-7.) Ðǒ ayi wú ɖɔ Jexóva zɔ́n tamɛ lin Kanyɛ́ɛ kpó xomɛnyínyɔ́ kpó bɔ mɔ̌ mɛ ɔ, é ná ɛ nukúnɖíɖó bo lɛ́ gba akpá n’i dó awǒvinú e ɖo hwɛhuhu mɛ é wú. É blá wǔ ɖɔ, Kanyɛ́ɛ kún ɖótó Jexóva ó. É yí gbe nú Jexóva ná d’alɔ ɛ nú hwɛ tɔn ná vɛ́ n’i ǎ. Ðó Kanyɛ́ɛ ma ɖótó Mawu ǎ wútu ɔ, Jexóva wá gbeta ɔ kɔn ɖɔ émí kún sɔ́ ná d’alɔ mɛɖé bónú hwɛ tɔn lɛ́ ná vɛ́ n’i ó wɛ a? É ɖo wɛn ɖɔ é kún nyí mɔ̌ ó!

9. Nɛ̌ Jexóva ka d’alɔ Davídi bɔ hwɛ tɔn lɛ́ vɛ́ n’i gbɔn?

⁹ Jexóva yí wǎn nú axɔ́sú Davídi tawun. É tlɛ ɖɔ dó wǔ tɔn ɖɔ “mɛɖé wɛ é nyí bo nɔ wa nǔ sɔgbe xá jlǒ” émítɔn. (Mɛ. 13:22) Amɔ̌, Davídi wá hu hwɛ syɛ́nsyɛ́n lɛ́, ɖi mɛsibiba kpó mɛhuhu kpó. Sɔgbe xá Mɔyízisɛ́n ɔ ɔ,  kú wɛ Davídi jɛxá. (Lev. 20:10; Kɛ́n. 35:31) Amɔ̌, Jexóva ba ná d’alɔ Davídi bónú hwɛ tɔn lɛ́ ná vɛ́ n’i. b É sɛ́ gbeyíɖɔ tɔn Natáan dó bónú é ná yi ba axɔ́sú ɔ kpɔ́n, có Davídi ka ko wa nǔ ɖěbǔ dó xlɛ́ ɖɔ hwɛ émítɔn lɛ́ vɛ́ nú émí nɛ́ ǎ. Natáan zán nǔjlɛ́dónǔwú ɖé dó d’alɔ Davídi bɔ é mɔ ɖɔ émí hu hwɛ syɛ́nsyɛ́n lɛ́. É byɔ́ lanmɛ nú Davídi tawun bɔ hwɛ tɔn lɛ́ vɛ́ n’i. (2 Sam. 12:1-14) É wlán ɖɛhan e ɖe lěe nǔ cí n’i ɖo ayi mɛ é xlɛ́ é ɖé b’ɛ xlɛ́ ɖɔ hwɛ tɔn lɛ́ vɛ́ n’i nǔgbó nǔgbó. (Ðɛh. 51: 1, 2) Ðɛhan énɛ́ dó gbɔ nú hwɛhutɔ́ gěgé bo sísɛ́ yě bɔ hwɛ yětɔn lɛ́ vɛ́ nú yě. É víví nú mǐ ɖɔ Jexóva d’alɔ mɛsɛntɔ́ vívɛ́ tɔn Davídi kpó wǎnyíyí kpó bɔ hwɛ tɔn lɛ́ vɛ́ n’i a cé?

10. Nɛ̌ lěe Jexóva nɔ ɖó suúlu dó gbɛtɔ́ hwɛhutɔ́ lɛ́ wú bo nɔ lɛ́ sɔ́ hwɛ kɛ yě hwenu e é ɖo nǔ wa xá yě wɛ é gbɔn é ka cí nú we?

¹⁰ Jexóva gbɛ́ wǎn nú hwɛhuhu alɔkpa lɛ́ bǐ. (Ðɛh. 5:5, 6) É ɖo mɔ̌ có, é tuun ɖɔ mǐ bǐ wɛ nyí hwɛhutɔ́, bɔ ɖó é yí wǎn nú mǐ wú ɔ, é nɔ wá gbeta ɔ kɔn bá d’alɔ mǐ nú mǐ ná ɖí xwi xá hwɛhuhu. Hwebǐnu wɛ é nɔ ɖo tíntɛ́nkpɔ́n wɛ bá d’alɔ hwɛhutɔ́ lɛ́, káká jɛ hwɛhutɔ́ ɖěɖěe hwɛ yětɔn lɛ́ syɛ́n tawun lɛ́ é jí bónú hwɛ yětɔn lɛ́ ná vɛ́ nú yě nú yě ná sɛkpɔ́ ɛ. Énɛ́ tuuntuun dó gbɔ nú mɛ kpɔ́n! Ée mǐ lin tamɛ dó suúlu kpó hwɛsɔ́kɛmɛ kpó Jexóva tɔn jí é ɔ, mǐ kán ɖ’é jí bo ná nɔ gbejí n’i bɔ hwɛ mǐtɔn lɛ́ ná yá wǔ vɛ́ nú mǐ hwenu e mǐ hu hwɛ é. Din ɔ, mǐ ná kplɔ́n nǔ e Jezu kplɔ́n ahwanvú tɔn lɛ́ dó hwɛvɛ́númɛ wú é.

NǓ E AHWANVÚ JEZU TƆN LƐ́ KPLƆ́N DÓ HWƐVƐ́NÚMƐ WÚ É

11-12. Étɛ́ Jezu ka kplɔ́n tóɖóetɔ́ lɛ́ dó hwɛsɔ́kɛmɛ walɔ Tɔ́ tɔn tɔn wú? (Kpɔ́n ɖiɖe ɔ.)

¹¹ Ðo xwe kanweko nukɔntɔn H.M. tɔn ɔ, cóbónú Jezu ná húzú Mɛsíya ɔ ɔ, Jexóva zán Jaan Batɛ́mublónúmɛtɔ́ ɔ dó jlá wɛn ɔ togun tɔn, bo lɛ́ byɔ́ yě ɖɔ hwɛ yětɔn lɛ́ ní vɛ́ nú yě.—Mat. 3:1, 2; 4:17.

¹² Ðo sinsɛnzɔ́ Jezu tɔn bǐ hwenu ɔ, é kplɔ́n nǔ tóɖóetɔ́ lɛ́ dó hwɛsɔ́kɛmɛ walɔ Tɔ́ tɔn tɔn wú. Jezu wa mɔ̌ ɖo ali bǔnɔ ɖé nu hwenu e é ná nǔjlɛ́dónǔwú dó vǐ e bú é wú é. Dɔ̌nkpɛvú énɛ́ wá gbeta ɔ kɔn bo gosín xwégbe, bo wa nǔ e nylá tawun é ɖé lɛ́. É ɖo mɔ̌  có, é wá “byɔ́ éɖée mɛ” bo lɛ́ kɔ yi xwé. Nɛ̌ tɔ́ ɔ ka wa nǔ gbɔn? Jezu ɖɔ ɖɔ hwenu e vǐ súnnu ɔ “kpo ɖo zɔ dó xwé ɔ é ɔ, tɔ́ tɔn mɔ ɛ sɛ́dó, bɔ nǔ tɔn blá wǔ n’i. É kán wezun bo yi kpl’así kɔ n’i, lobo kí si n’i kpó wǎnyíyí kpó.” Vǐ súnnu ɔ ko ɖo linlin wɛ ɖ’ayǐ bo ná kanbyɔ́ ɖɔ émí sixú húzú mɛsɛntɔ́ tɔ́ émítɔn tɔn lɛ́ ɖokpó a jí, amɔ̌ tɔ́ tɔn ylɔ́ ɛ ɖɔ “vǐ súnnu ce élɔ́,” bo lɛ́ sɔ́ ɛ ɖó tɛn e mɛ é ɖe ɖo xwédo ɔ mɛ ɖ’ayǐ é. Tɔ́ ɔ ɖɔ: “É ko bú bɔ è ko lɛ́ mɔ ɛ.” (Luk. 15:11-32) Hwenu e Jezu ɖo jǐxwé bo ma ko wá ayǐkúngban jí ǎ é ɔ, é ɖo wɛn ɖɔ é mɔ bɔ Tɔ́ tɔn ɖe wǔvɛ́sexámɛ mɔ̌hun xlɛ́ hwɛhutɔ́ e hwɛ yětɔn lɛ́ vɛ́ ná lɛ́ é mɔ̌kpán. Tan énɛ́ e Jezu kpi nú mǐ é dó gbɔ nú mǐ nǔgbó nǔgbó, bo xlɛ́ lěe Tɔ́ mǐtɔn Jexóva nɔ kú nǔbláwǔ nú mɛ sɔ é!

13-14. Étɛ́ mɛsɛ́dó Piyɛ́ɛ ka kplɔ́n dó hwɛvɛ́númɛ wú? Étɛ́ é ka kplɔ́n mɛ ɖěvo lɛ́ d’é wú? (Kpɔ́n ɖiɖe ɔ lɔmɔ̌.)

¹³ Mɛsɛ́dó Piyɛ́ɛ kplɔ́n nǔ tají ɖé ɖo Jezu gɔ́n dó hwɛvɛ́númɛ kpó hwɛsɔ́kɛmɛ kpó wú. Hwɛhwɛ wɛ Piyɛ́ɛ nɔ ɖó hudó hwɛsɔ́kɛmɛ tɔn, bɔ Jezu ka nɔ sɔ́ kɛ ɛ faa. Ði kpɔ́ndéwú ɔ, ée Piyɛ́ɛ gbɛ́ ɖɔ émí kún tuun Aklúnɔ émítɔn ó azɔn atɔn gúdo é ɔ, nǔ e éɖésú wa nyi do é ɖó linkpɔ́n n’i tawun. (Mat. 26:34, 35, 69-75) Amɔ̌, hwenu e Jezu fɔ́n sín kú gúdo é ɔ, é sɔ́ éɖée xlɛ́ Piyɛ́ɛ, bóyá hwenu e é ɖo éɖokpó é. (Luk. 24:33, 34; 1 Kɔ. 15:3-5) É ɖo wɛn ɖɔ ɖo ninɔmɛ énɛ́ mɛ ɔ, Jezu sɔ́ hwɛ kɛ mɛsɛ́dó tɔn e hwɛ tɔn lɛ́ vɛ́ ná é kpó wǎnyíyí kpó, bo lɛ́ ná ɛ jiɖe.

¹⁴ Piyɛ́ɛ hɛn din ɔ, é ná kplɔ́n nǔ mɛ ɖěvo lɛ́ dó hwɛvɛ́númɛ kpó hwɛsɔ́kɛmɛ kpó wú, ɖó é ko jɛ dó éɖésú wú. È ɖu Pantekótuxwe ɔ, b’ɛ ná bló táan ɖé gúdo é ɔ, Piyɛ́ɛ xwlé xóɖiɖɔ ɖé Jwifu nǔmaɖitɔ́ lɛ́ sín ahwan ɖé bo tínmɛ nú yě ɖɔ yě hu Mɛsíya ɔ. É ɖo mɔ̌ có, é byɔ́ nǔ élɔ́ yě kpó wǎnyíyí kpó: “Hǔn, hwɛ mitɔn lɛ́ ní vɛ́ nú mi, bónú mi ní lɛ́ kɔ wá Mawu gɔ́n, mɔ̌ mɛ ɔ, è ná súnsún hwɛ mitɔn lɛ́, bónú kɔfánúmɛ sín hwenu lɛ́  ní dó sixú gosín Jexóva ɖésúnɔ gɔ́n wá nú mi.” (Mɛ. 3:14, 15, 17, 19) Mɔ̌ mɛ ɔ, Piyɛ́ɛ ɖe xlɛ́ ɖɔ hwɛvɛ́númɛ nɔ sísɛ́ hwɛhutɔ́ ɖé bɔ é nɔ dó gǔdofɔ, énɛ́ wɛ nyí ɖɔ é nɔ húzú lěe é nɔ lin nǔ gbɔn bo nɔ wa nǔ gbɔn b’ɛ ma sɔgbe ǎ é, bo nɔ jɛ nǔ wa jí ɖo ali yɔ̌yɔ́ ɖé nu lěe Mawu ba gbɔn é. Mɛsɛ́dó ɔ lɛ́ xlɛ́ ɖɔ Jexóva ná súnsún hwɛ yětɔn lɛ́, alǒ bló bɔ hwɛ yětɔn lɛ́ ná bú. Xwe mɔ̌kpán gúdo ɔ, Piyɛ́ɛ ná gǎnjɛwú élɔ́ klisánwun lɛ́: “Jexóva . . . ɖó suúlu dó mi wú, ɖó é jló ɖɔ è ní sú mɛ ɖěbǔ sín kún dó ǎ, loɔ, é jló ɖɔ ali ní hun nú mɛ lɛ́ bǐ, bónú hwɛ yětɔn lɛ́ ní vɛ́ nú yě.” (2 Pi. 3:9) Ényí hwɛ mǐtɔn lɛ́ vɛ́ nú mǐ ɔ, é ná bo tlɛ nyí hwɛ syɛ́nsyɛ́n lɛ́ wɛ mǐ hu ɔ, tuun e mǐ tuun ɖɔ Jexóva nɔ sɔ́ hwɛ kɛ mǐ bǐ mlɛ́mlɛ́ é nɔ dó gbɔ nú mǐ.

15-16. (a) Nɛ̌ mɛsɛ́dó Pɔ́lu ka kplɔ́n nǔ dó hwɛsɔ́kɛmɛ wú gbɔn? (1 Timɔtée 1:12-15) (b) Étɛ́ mǐ ka ná gbéjé kpɔ́n ɖo xóta e bɔ d’é wú é mɛ?

¹⁵ Mɛ ɖěɖěe hwɛ yětɔn lɛ́ ɖó ná vɛ́ ná, bɔ è ná lɛ́ sɔ́ hwɛ kɛ yě sɔ Sólu Táasinu ɔ lɛ́ é sukpɔ́ ǎ. Gbeklánxámɛtɔ́ akowunká ahwanvú vívɛ́ Klísu tɔn lɛ́ tɔn ɖé wɛ é nyí. Klisánwun gěgé ná ko mɔ ɛ dó mɔ mɛ e nukúnɖíɖó ɖě ma sɔ́ ɖe ná ǎ é, mɛ e è ma sixú ɖó nukún ɖɔ hwɛ tɔn lɛ́ ná vɛ́ ná ǎ é ɖé. Amɔ̌, Jezu tuun ɖɔ Sólu sixú húzú bɔ hwɛ tɔn lɛ́ ná vɛ́ n’i. É kpó Tɔ́ tɔn kpó mɔ jijɔ ɖagbe e Sólu ɖó lɛ́ é. Jezu ɖɔ: “Nya énɛ́ ɔ, alyánnú ɖé wɛ é nyí bɔ un sɔ́.” (Mɛ. 9:15) Jezu tlɛ bló nǔjíwǔ ɖé dó d’alɔ Sólu bónú hwɛ tɔn lɛ́ ná vɛ́ n’i. (Mɛ. 7:58–8:3; 9:1-9, 17-20) Ée Sólu e è wá ylɔ́ ɖo nukɔnmɛ ɖɔ mɛsɛ́dó Pɔ́lu é húzú klisánwun gúdo é ɔ, hwɛhwɛ wɛ é ɖe nǔsumɛnukúnmɛ xlɛ́ ɖó lěe è nyɔ́ xomɛ dó wǔ tɔn bo lɛ́ kú nǔbláwǔ n’i gbɔn é wú. (Xa 1 Timɔtée 1:12-15.) Pɔ́lu kplɔ́n nɔví súnnu tɔn lɛ́ kpó nɔví nyɔ̌nu tɔn lɛ́ kpó ɖɔ: “Mawu ɔ, ɖo xomɛnyínyɔ́ tɔn mɛ ɔ, tíntɛ́nkpɔ́n wɛ é ɖe bo ná d’alɔ we bónú hwɛ towe lɛ́ ná vɛ́ nú we.”—Hlɔ̌. 2:4.

¹⁶ Hwenu e Pɔ́lu se wunhínhɔ́nnú e jɛ bo kunkplá agalilɛ ɖo agun Kɔlɛ́nti tɔn mɛ é ɔ, nɛ̌ é ka ɖe ɖɛ gbɔn? É ɖe ɖɛ ɖo ali ɖé nu bɔ é kplɔ́n nǔ tají ɖé mǐ dó lěe Jexóva nɔ gbɛ́ nǔ nú mɛ kpó wǎnyíyí kpó gbɔn é wú, bo lɛ́ kplɔ́n nǔ tají ɖé mǐ dó lě do nǔbláwǔ kú nú mɛ ɖo tají sɔ é wú. Mǐ ná gbéjé tan énɛ́ kpɔ́n yi gɔngɔn mɛ ɖo xóta e bɔ d’é wú é mɛ.