XÓTA NǓKPLƆ́NKPLƆ́N TƆN 31
HAN 12 Jexóva, Mawu ɖaxó
Nǔ e Jexóva wa bá dó hwlɛ́n mǐ sín hwɛhuhu kpó kú kpó sí é
“Mawu yí wǎn nú gbɛ ɔ sɔmɔ̌, bo ná Vǐɖokpónɔ tɔn.”—JAAN 3:16.
XÓNUSƆ́ÐÓTE
Ðo xóta élɔ́ mɛ ɔ, mǐ ná mɔ nǔ e Jexóva wa dó d’alɔ mǐ bɔ mǐ ná ɖí xwi xá hwɛhuhu, bo lɛ́ sɛn ɛ é. Mǐ ná lɛ́ mɔ tuto e é bló bónú mǐ ná nɔ gbɛ káká sɔ́yi, bo ma sɔ́ ná nyí hwɛhutɔ́ ǎ é.
1-2. (a) Étɛ́ ka nyí hwɛhuhu? Nɛ̌ mǐ ka sixú ɖu ɖo xwi e ɖí xá ɛ wɛ mǐ ɖe é jí gbɔn? (Kpɔ́n “Tínmɛ ɖé lɛ́” lɔmɔ̌.) (b) Étɛ́ lɛ́ mǐ ka ná gbéjé kpɔ́n ɖo xóta élɔ́ kpó xóta ɖěvo e ɖo Atɔxwɛ élɔ́ mɛ lɛ́ é kpó mɛ? (Kpɔ́n “Ayiɖónǔwú nú nǔxatɔ́ lɛ́” e ɖo Atɔxwɛ élɔ́ mɛ é lɔmɔ̌.)
A KA ba ná tuun lě do Jexóva Mawu yí wǎn nú we sɔ é a? Ali ɖagbe e nu a ná tuun xósin ɔ ɖe é ɖokpó ɖíe: Kplɔ́n nǔ e é wa bá dó hwlɛ́n we sín hwɛhuhu kpó kú kpó sí é. Hwɛhuhu ɔ a kɛntɔ́ baɖabaɖa ɖé wɛ, bɔ a sixú ɖí xwi xá hwiɖokpó ǎ. Mǐ bǐ wɛ nɔ hu hwɛ gbe bǐ gbe, bɔ hwɛhuhu nɔ zɔ́n bɔ gbɛtɔ́ lɛ́ bǐ nɔ kú. (Hlɔ̌. 5:12) É ɖo mɔ̌ có, wɛn ɖagbe ɖé ɖe. Kpó alɔdó Jexóva tɔn kpó ɔ, mǐ sixú ɖí xwi xá hwɛhuhu. Nǔgbó ɔ, é ɖo wɛn ɖɔ mǐ ná ɖu ɖ’é jí!
2 Sín xwe 6000 mɔ̌ ɖíe wɛ Jexóva Mawu ko ɖo alɔ dó gbɛtɔ́ lɛ́ wɛ bónú yě ná ɖí xwi xá hwɛhuhu. Étɛ́wú? Ðó é yí wǎn nú mǐ. Sín bǐbɛ́mɛ ɖokpóo wɛ é ko yí wǎn nú gbɛtɔ́ lɛ́, énɛ́ wú wɛ é ko wa nǔ gěgé bá dó d’alɔ yě ɖo ahwan énɛ́ kɔn. Mawu tuun ɖɔ hwɛhuhu nɔ dɔn mɛ yi jó nú kú, é ka ba ɖɔ mǐ ní kú ǎ. É ba ɖɔ mǐ ní nɔ gbɛ káká sɔ́yi. (Hlɔ̌. 6:23) Nǔ e ba nú we wɛ é ɖe é nɛ́. Ðo xóta élɔ́ mɛ ɔ, mǐ ná ɖɔ xó dó nǔkanbyɔ́ atɔn élɔ́ lɛ́ jí: (1) Nɛ̌ Jexóva ka ná nukúnɖíɖó gbɛtɔ́ hwɛhutɔ́ lɛ́ gbɔn? (2) Ðo Biblu sín táan mɛ ɔ, nɛ̌ gbɛtɔ́ hwɛhutɔ́ lɛ́ ka mɔ fɛ́nú Jexóva tɔn gbɔn? (3) Nɛ̌ Jezu ka wá hwlɛ́n gbɛtɔ́ hwɛhutɔ́ lɛ́ gbɔn?
NƐ̌ JEXÓVA KA NÁ NUKÚNÐÍÐÓ GBƐTƆ́ HWƐHUTƆ́ LƐ́ GBƆN?
3. Nɛ̌ mɛjitɔ́ mǐtɔn nukɔntɔn lɛ́ ka wá húzú hwɛhutɔ́ gbɔn?
3 Hwenu e Jexóva dá súnnu nukɔntɔn ɔ kpó nyɔ̌nu nukɔntɔn ɔ kpó é ɔ, é ba ɖɔ yě ní ɖó awǎjijɛ. É ná yě xwé ɖɛkpɛ ɖɛkpɛ ɖé, alɔwlíwlí kpó azɔ̌ e sɔ́ akpakpa mɛ é kpó. Yě ná bló bɔ kúnkan yětɔn ná gɔ́ ayǐkúngban ɔ jí, bɔ planɛ́ti ɔ blěbú ná nyí palaɖísi jikpá Edɛ́ni tɔn ɖɔhun. Sɛ́n e ma vɛ́ wǔ ǎ é ɖokpó géé jɛ́n é dó nú yě. Gɔ́ ná ɔ, é gba akpá nú yě ɖɔ ényí yě t’afɔ sɛ́n énɛ́ jí gbɔn gbeta ɔ kɔn wíwá bo fɔ́n gǔ dó émí jí gblamɛ ɔ, yě ná kú. Mǐ tuun nǔ e jɛ é. Wɛnsagun nyanya e ma yí wǎn nú Mawu, alǒ gbɛtɔ́ lɛ́ ǎ é ɖé tɛ́n Adámu kpó Ɛvu kpó kpɔ́n bónú yě ná tlí tó nú Mawu. Adámu kpó Ɛvu kpó wa nǔ e wɛnsagun nyanya énɛ́, é wɛ nyí Satáan jló é. Ðó yě ma ɖeji dó Tɔ́ yětɔn wǎnyíyínɔ ɔ wú ǎ wútu ɔ, yě hu hwɛ. Lěe mǐ tuun gbɔn é ɔ, xó e Jexóva ɖɔ é jɛ. Sín gbe nɛ́ gbe ɖidó ɔ, yě ɖó ná se xɔxɔ nǔ e tónúmase yětɔn ji lɛ́ é tɔn: yě jɛ kpikpo jí, bɔ wǎgbɔ tɔn ɔ, yě wá kú.—Bǐb. 1:28, 29; 2:8, 9, 16-18; 3:1-6, 17-19, 24; 5:5.
4. Étɛ́wú Jexóva ka nɔ gbɛ́ wǎn nú hwɛhuhu bo nɔ d’alɔ mǐ bɔ mǐ nɔ ɖí xwi xá? (Hlɔ̌manu lɛ́ 8:20, 21)
4 Jexóva bló bɔ è wlán tan wǔbláblá tɔn énɛ́ ɖ’ayǐ nú le mǐtɔn. Énɛ́ d’alɔ mǐ bɔ mǐ mɔ nukúnnú jɛ nǔ e wú é gbɛ́ wǎn nú hwɛhuhu sɔmɔ̌ é mɛ. Hwɛhuhu nɔ dɔn mǐ dó zɔ nú Tɔ́ mǐtɔn, bo nɔ dɔn mǐ yi jó nú kú. (Eza. 59:2) Nǔ e wú Satáan, éé nyí nǔɖíɖó gbigbɔ tɔn gǔfɔ́ntɔ́ e dɔn nǔ énɛ́ lɛ́ bǐ nyi ayǐ é yí wǎn nú hwɛhuhu, bo nɔ flɔ́ zo dó glɔ̌ ná é nɛ́. É sixú ko lin ɖɔ émí ɖó ɖu ɖ’é jí ɖaxó ɖé ɖo Edɛ́ni. Amɔ̌, é mɔ nukúnnú jɛ lě do Jexóva yí wǎn nú mɛ sɔ é mɛ ǎ. Mawu húzú linlin e é ɖó dó kúnkan Adámu kpó Ɛvu kpó tɔn wú é gbeɖé ǎ. É yí wǎn nú gbɛtɔ́ lɛ́, énɛ́ wú ɔ, afɔjíafɔjí jɛ́n é ná nukúnɖíɖó yě bǐ. (Xa Hlɔ̌manu lɛ́ 8:20, 21.) Jexóva tuun ɖɔ mɛ e ɖo kúnkan yětɔn mɛ é ɖé lɛ́ ná wá gbeta ɔ kɔn bo ná yí wǎn nú émí, bo lɛ́ ba alɔdó émítɔn dó ɖí xwi xá hwɛhuhu. Gɔ́ ná ɔ, ɖó é wɛ nyí Tɔ́ yětɔn, bo lɛ́ nyí Gbɛɖótɔ́ yětɔn wútu ɔ, é ná hun ali ɖé nú yě, bɔ yě ná jɛ yěɖée sí sín hwɛhuhu sí, bo sɛkpɔ́ ɛ. Étɛ́ Jexóva ka ná wa bɔ nǔ énɛ́ lɛ́ bǐ ná jɛnu?
5. Hwetɛ́nu Jexóva ka ná nukúnɖíɖó gbɛtɔ́ hwɛhutɔ́ lɛ́ azɔn nukɔntɔn? Tínmɛ. (Bǐbɛ́mɛ 3:15)
5 Xa Bǐbɛ́mɛ 3:15, nwt. Afɔjíafɔjí ɔ, Jexóva ɖɔ ɖɔ émí ná sú kún dó nú Satáan, bo ná nukúnɖíɖó gbɛtɔ́ lɛ́ bǐ. Mawu ɖɔ ɖɔ “kúnkan” ɖé ná tíin, bo ná hwlɛ́n gbɛtɔ́ lɛ́ gán. Kúnkan énɛ́ ná wá sú kún dó nú Satáan, bo ná bló nǔ e é hɛn gblé ɖo Edɛ́ni mɛ lɛ́ é bǐ ɖó. (1 Jaan 3:8) Amɔ̌, kúnkan énɛ́ ná se wǔvɛ́ cóbá kpé wú. Satáan ná xú aɖǔ i, énɛ́ wɛ nyí ɖɔ é ná bló b’ɛ ná kú. Énɛ́ ná dó wǔvɛ́ nú Jexóva titewungbe. Amɔ̌, Jexóva ɖo gbesisɔmɛ bá se wǔvɛ́, bo lɛ́ yí gbe bɔ kúnkan ɔ ná se wǔvɛ́ bá dó hwlɛ́n gbɛtɔ́ lɛ́ sín hwɛhuhu kpó kú kpó sí!
NƐ̌ GBƐTƆ́ HWƐHUTƆ́ E NƆ GBƐ ÐO BIBLU SÍN TÁAN MƐ LƐ́ É KA MƆ FƐ́NÚ JEXÓVA TƆN GBƆN?
6. Étɛ́ súnnu gbejínɔtɔ́ lɛ́, ɖi Abɛ́li kpó Nɔwée kpó ka wa bá dó sɛkpɔ́ Jexóva?
6 Ðo xwe kanweko e bɔ d’é wú lɛ́ é mɛ ɔ, Jexóva bló bɔ dɛ̌dɛ̌ dɛ̌dɛ̌ ɔ, lěe gbɛtɔ́ hwɛhutɔ́ lɛ́ sixú sɛkpɔ́ ɛ gbɔn é za wě d’é jí. Abɛ́li e nyí Adámu kpó Ɛvu kpó sín vǐ wegɔ́ ɔ é wɛ nyí mɛ nukɔntɔn e ɖó nǔɖiɖi nú Jexóva ɖo gǔfínfɔ́n Edɛ́ni mɛ tɔn gúdo é. Ðó Abɛ́li yí wǎn nú Jexóva, bo ba ná nyɔ́ ɖo así tɔn, lobo lɛ́ sɛkpɔ́ ɛ wútu ɔ, é xwlé vɔ̌sánú ɖé è. Lɛ̌ngbɔ́nyitɔ́ wɛ Abɛ́li nyí, énɛ́ wú ɔ, é sɔ́ lɛ̌ngbɔ́ wínnyáwínnyá tɔn ɖé lɛ́, bo hu yě, lobo sá vɔ̌ nú Jexóva. Nɛ̌ Jexóva ka wa nǔ gbɔn? É “sɔ́ nukún ɖagbe dó kpɔ́n Abɛ́li kpó vɔ̌sánú tɔn kpó.” (Bǐb. 4:4) Vɔ̌ e mɛ ɖěvo e yí wǎn nú Jexóva, bo ɖeji dó wǔ tɔn Nɔwée ɖɔhun lɛ́ é sá lɛ́ é nyɔ́ nukún tɔn mɛ. (Bǐb. 8:20, 21) Jexóva yí gbe nú vɔ̌sísá mɔ̌hun lɛ́ dó xlɛ́ ɖɔ gbɛtɔ́ hwɛhutɔ́ lɛ́ sixú mɔ fɛ́nú émítɔn, bo lɛ́ sɛkpɔ́ émí. b
7. Étɛ́ gbesisɔmɛ e Ablaxámu ɖe bá sɔ́ vǐ éɖésúnɔ tɔn dó sá vɔ̌ é ka kplɔ́n mǐ?
7 Jexóva byɔ́ Ablaxámu e nyí nya nǔɖitɔ́ nukúnɖéjí ɖé é ɖɔ é ní wa nǔ e vɛ́ wǔ tawun é ɖé, énɛ́ wɛ nyí ɖɔ é ná sɔ́ vǐ éɖésúnɔ tɔn Izáki dó sá vɔ̌. Énɛ́ ɖó ná ko ɖó linkpɔ́n nú Ablaxámu tawun. Amɔ̌, é se tónú nú Jexóva. Vǐ ɔ ná hu wɛ Ablaxámu ɖe kɛ́ɖɛ́, bɔ Mawu ɖó è te. É ɖo mɔ̌ có, kpɔ́ndéwú énɛ́ kplɔ́n nǔgbó tají ɖé nǔɖitɔ́ lɛ́ bǐ, énɛ́ wɛ nyí ɖɔ Jexóva ná ɖo gbesisɔmɛ bo ná sɔ́ Vǐ súnnu vívɛ́ná tɔn dó sá vɔ̌. Jexóva yí wǎn nú gbɛtɔ́ lɛ́ tawun.—Bǐb. 22:1-18.
8. Étɛ́ kanlin lɛ́ sín vɔ̌ ɖěɖěe Sɛ́n ɔ ná gbe tɔn bɔ è nɔ sá lɛ́ é ka kplɔ́n mǐ? (Levíi ví lɛ́ 4:27-29; 17:11)
8 Hwenu e Jexóva ná Sɛ́n ɔ Izlayɛ́li ví lɛ́ é ɔ, é ɖɔ nú yě ɖɔ yě ní nɔ sɔ́ kanlin lɛ́ dó sá vɔ̌, bónú è ná sɔ́ hwɛ yětɔn lɛ́ kɛ yě. (Xa Levíi ví lɛ́ 4:27-29; 17:11.) Vɔ̌sísá énɛ́ lɛ́ xlɛ́ ɖɔ Jexóva ná sá vɔ̌ e nyɔ́ hú gǎn bo ná hwlɛ́n gbɛtɔ́ lɛ́ sín hwɛhuhu sí bǐ mlɛ́mlɛ́ é ɖé. Mawu ɖɔ nú gbeyíɖɔ tɔn lɛ́ ɖɔ yě ní wlán nǔ dó kúnkan e sín akpá è dó é wú. Yě tínmɛ ɖɔ Vǐ Mawu tɔn nukúnɖéjí ɖé ɖó ná ji ya bɔ è ná hu i. É ná cí lɛ̌ngbɔ́ e è dó sá vɔ̌ ná é ɖé ɖɔhun. (Eza. 53:1-12) Dǒ nukún mɛ kpɔ́n: Jexóva ná bló tito bɔ è ná sɔ́ Vǐ súnnu vívɛ́ná tɔn dó sá vɔ̌, bá dó hwlɛ́n gbɛtɔ́ lɛ́, káká jɛ hwiɖésúnɔ jí, sín hwɛhuhu kpó kú kpó sí!
NƐ̌ JEZU KA WÁ HWLƐ́N MƐ GBƆN?
9. Étɛ́ Jaan Batɛ́mublónúmɛtɔ́ ɔ ka ɖɔ dó Jezu wú? (Eblée lɛ́ 9:22; 10:1-4, 12)
9 Ðo xwe kanweko nukɔntɔn H.M. tɔn mɛ ɔ, mɛsɛntɔ́ Mawu tɔn Jaan Batɛ́mublónúmɛtɔ́ ɔ dlɛ́n alɔ dó Jezu Nazalɛ́tinu ɔ bo ɖɔ: “Mi kpɔ́n! Lɛ̌ngbɔ́ví Mawu tɔn e ná ɖe hwɛ gbɛ ɔ tɔn síin é ɖíe!” (Jaan 1:29) Xó énɛ́ lɛ́ xlɛ́ ɖɔ Jezu wɛ nyí kúnkan e sín akpá è dó sín hwenu línlín ɖíe é. Jezu ná sɔ́ gbɛ tɔn dó sá vɔ̌. Kúnkan Jexóva tɔn wá wá, bá hwlɛ́n gbɛtɔ́ lɛ́ sín hwɛhuhu sí bǐ mlɛ́mlɛ́ lo.—Xa Eblée lɛ́ 9:22; 10:1-4, 12.
10. Nɛ̌ Jezu ka xlɛ́ ɖɔ hwɛhutɔ́ lɛ́ “ylɔ́ gbé” wɛ émí tɔ́n bo wá gbɔn?
10 Jezu sɔ́ ayi bǔnɔ ɖé ɖó mɛ ɖěɖěe hwɛgban ɖo kpinkpɛn wɛ lɛ́ é jí, bo byɔ́ yě ɖɔ yě ní wá nyí ahwanvú émítɔn lɛ́. É tuun ɖɔ hwɛhuhu wɛ nyí azɔn e jɛ wɛ gbɛtɔ́ lɛ́ ɖe lɛ́ é sín ɖɔ. Énɛ́ wú ɔ, é ba súnnu kpó nyɔ̌nu kpó e è tuun ɖɔ yě nyí hwɛhutɔ́ lɛ́ é mɔ. É zán nǔjlɛ́dónǔwú ɖé, bo tínmɛ ɖɔ: “Mɛ e sín lanmɛ ɖo ganjí lɛ́ é ɖó hudó dotóo tɔn ǎ, amɔ̌, mɛ e ɖo azɔn jɛ wɛ lɛ́ é ɖó hudó tɔn.” É ɖɔ gɔ́ ná ɖɔ: “Nǔjlɔ́jlɔ́watɔ́ lɛ́ ylɔ́ gbé wɛ un tɔ́n bo wá ǎ, loɔ, hwɛhutɔ́ lɛ́ wɛ.” (Mat. 9:12, 13) Jezu zán gbɛ sɔgbe xá xó énɛ́ lɛ́. Jezu nyɔ́ xomɛ, bo sɔ́ hwɛ kɛ nǎwe e súnsún afɔ tɔn lɛ́ kpó ɖasin tɔn kpó é. (Luk. 7:37-50) Jezu tuun ɖɔ nyɔ̌nu Samalíinu ɔ nɔ zán gbɛ blíblí cóbó ka kplɔ́n ɛ nǔgbó tají lɛ́ ɖo dotɔ nu. (Jaan 4:7, 17-19, 25, 26) Mawu tlɛ ná acɛ Jezu b’ɛ ná sú kún dó nú nǔ e mɛ hwɛhuhu bǐ nɔ tɔ́n kɔ dó é, énɛ́ wɛ nyí kú. Gbɔn nɛ̌ é? Jezu fɔ́n mɛ lɛ́ sín kú, súnnu kpó nyɔ̌nu kpó, yɔkpɔ́vú kpó mɛxó kpó.—Mat. 11:5.
11. Étɛ́wú gbɛtɔ́ hwɛhutɔ́ lɛ́ ka sɛkpɔ́ Jezu?
11 Mǐ sixú mɔ nukúnnú jɛ nǔ e wú mɛ e nɔ wa nǔ nyanya lɛ́ é nɔ vo ɖo Jezu kpá é mɛ. É nɔ mɔ nukúnnú jɛ lěe nǔ cí nú yě é mɛ, bo nɔ nyɔ́ xomɛ dó yě wú. Yě nɔ vo fɛɛ bo nɔ sɛkpɔ́ ɛ. (Luk. 15:1, 2) Gɔ́ ná ɔ, Jezu kpa mɛ mɔ̌hun lɛ́ ɖó nǔ e yě ɖi n’i é wú, bo lɛ́ wa nǔ xá yě kpó xomɛnyínyɔ́ kpó. (Luk. 19:1-10) Jezu nɔ kú nǔbláwǔ nú mɛ Tɔ́ tɔn ɖɔhun. (Jaan 14:9) Xó tɔn kpó nǔwiwa tɔn lɛ́ kpó xlɛ́ ɖɔ Tɔ́ tɔn nǔbláwǔkúnúmɛtɔ́ e nɔ lɛ́ se wǔvɛ́ xá mɛ é yí wǎn nú gbɛtɔ́ lɛ́, bo ba ná d’alɔ yě mɛ ɖokpó ɖokpó bɔ yě ná ɖu ɖo xwi e ɖí xá hwɛhuhu wɛ yě ɖe é jí. Jezu d’alɔ gbɛtɔ́ hwɛhutɔ́ lɛ́, bónú yě ná ba ná húzú lěe yě nɔ wa nǔ gbɔn é bá xwed’è.—Luk. 5:27, 28.
12. Étɛ́ Jezu ka kplɔ́n mɛ dó kú éɖésúnɔ tɔn wú?
12 Jezu tuun nǔ e ɖo te kpɔ́n ɛ é. Azɔn mɔ̌kpán wɛ é ɖɔ nú ahwanvú tɔn lɛ́ ɖɔ è ná flú émí, bo ná xwe émí nyi atín wú. (Mat. 17:22; 20:18, 19) É tuun ɖɔ vɔ̌sísá émítɔn ná ɖe hwɛ gbɛ ɔ tɔn síin lěe Jaan jlá gbɔn, bɔ gbeyíɖɔ lɛ́ ɖɔ ɖ’ayǐ gbɔn é. Jezu lɛ́ kplɔ́n mɛ ɖɔ ényí émí sɔ́ gbɛ émítɔn dó sá vɔ̌ gúdo ɔ, émí ná “dɔn gbɛtɔ́ alɔkpa lɛ́ bǐ.” (Jaan 12:32) Ényí gbɛtɔ́ hwɛhutɔ́ lɛ́ yí gbe ɖɔ Jezu wɛ nyí Aklúnɔ émítɔn, bo sɔ́ afɔ dó afɔdo tɔn lɛ́ mɛ ɔ, nǔ yětɔn sixú nyɔ́ Jexóva nukúnmɛ, bɔ è ná “ɖe [yě] sín hwɛhuhu kannu.” (Hlɔ̌. 6:14, 18, 22; Jaan 8:32) Énɛ́ wú ɔ, Jezu kpan akɔ́n, bo ɖo gbesisɔmɛ bá kú wǔvɛ́ kú dó hwlɛ́n mǐ gán.—Jaan 10:17, 18.
13. Nɛ̌ Jezu ka kú gbɔn? Étɛ́ kú tɔn ka kplɔ́n mǐ dó Jexóva Mawu wú? (Kpɔ́n ɖiɖe ɔ lɔmɔ̌.)
13 È flú Jezu, wlí i, ɖɔ nǔyá n’i, ɖɔ slamɛ wǔ tɔn, ɖó hwɛ n’i, bo tlɛ xo dǎka wǔ tɔn. Sɔ́ja lɛ́ kplá ɛ yi fí e ná hu i ɖe wɛ è ɖe é, bo xwe è nyi atín wú. Ée é ɖo didɛ wɛ ɖo wǔvɛ́ énɛ́ lɛ́ bǐ nu kpó gbejíninɔ kpó é ɔ, mɛ ɖěvo ɖe bo tlɛ lɛ́ se wǔvɛ́ hú mɔ̌. Jexóva Mawu wɛ. Jexóva ɖó hlɔ̌nhlɔ́n kpó nǔwúkpíkpé kpó bá ɖó wǔvɛ́ e mɔ wɛ Vǐ tɔn ɖe é te có, é ka wa mɔ̌ ǎ. Aniwú? Étɛ́ ka sixú sísɛ́ Tɔ́ wǎnyíyínɔ ɖé bɔ é ná wa nǔ gbɔn mɔ̌? È ná ɖɔ kpowun ɔ, wǎnyíyí wɛ. Jezu ɖɔ: “Mawu yí wǎn nú gbɛ ɔ sɔmɔ̌, bo ná Vǐɖokpónɔ tɔn, bónú mɛ ɖěbǔ e ná ɖe xlɛ́ ɖɔ émí ɖi nǔ n’i é ní ma dɔn ó, loɔ, é ní mɔ gbɛ mavɔmavɔ.”—Jaan 3:16.
Jexóva se wǔvɛ́ tawun, hwenu e é yí gbe bɔ è hu Vǐ súnnu tɔn bá dó hwlɛ́n mǐ sín hwɛhuhu kpó kú kpó sí é (Kpɔ́n akpáxwé 13)
14. Étɛ́ vɔ̌sísá Jezu tɔn ka kplɔ́n we?
14 Vɔ̌sísá Jezu tɔn wɛ nyí kúnnuɖenú e d’agba hú gǎn, bo ɖe lě do Jexóva yí wǎn nú kúnkan Adámu kpó Ɛvu kpó tɔn sɔ é xlɛ́ é. É ɖe lě do Jexóva yí wǎn nú we sɔ é xlɛ́. É sɔ́ Vǐ vívɛ́ná tɔn dó sá vɔ̌, bo dɛ ɖo wǔvɛ́ gěgé nu, bá dó xɔ gbɛ nú we sín hwɛhuhu kpó kú kpó sí. (1 Jaan 4:9, 10) Ɛɛn, é ba ná d’alɔ mǐ mɛ ɖokpó ɖokpó bónú mǐ ná ɖí xwi xá hwɛhuhu bo ɖu ɖ’é jí!
15. Étɛ́ mǐ ka ɖó ná wa bá dó ɖu vɔ̌sísá gbɛxɔnúmɛ tɔn Jezu tɔn e nyí nǔníná Mawu tɔn é sín le?
15 Nǔníná Mawu tɔn, éé nyí vɔ̌sísá gbɛxɔnúmɛ tɔn Vǐɖokpónɔ tɔn tɔn é zɔ́n bɔ è ná sɔ́ hwɛ mǐtɔn lɛ́ kɛ mǐ. Amɔ̌, cóbónú Mawu ná sɔ́ hwɛ mǐtɔn lɛ́ kɛ mǐ ɔ, mǐ ɖó ná wa nǔɖé. Étɛ́ ka nyí nǔ ɔ? Jaan Batɛ́mublónúmɛtɔ́ ɔ kpó Jezu Klísu ɖésúnɔ kpó ko ná xósin ɔ bo ɖɔ: “Hwɛ mitɔn lɛ́ ní vɛ́ nú mi, ɖó Axɔ́súɖuto jǐxwé tɔn ko sɛkpɔ́.” (Mat. 3:1, 2; 4:17) Énɛ́ wú ɔ, ényí mǐ ba nǔgbó nǔgbó bo ná li za xá hwɛhuhu, lobo sɛkpɔ́ Tɔ́ mǐtɔn wǎnyíyínɔ ɔ, hwɛvɛ́númɛ ɖo tají. Amɔ̌, étɛ́ ka nɔ nyí hwɛvɛ́númɛ? Nɛ̌ é ka nɔ d’alɔ mǐ bɔ mǐ nɔ li za xá ninɔmɛ hwɛhutɔ́ tɔn mǐtɔn gbɔn? Xóta nǔkplɔ́nkplɔ́n tɔn e bɔ d’é wú é ná ná xósin ɔ.
HAN 18 Gbɛxixɔ ɔ su nukún mǐtɔn mɛ
a TÍNMƐ ÐÉ LƐ́: Ðo Biblu mɛ ɔ, xókwín “hwɛhuhu” ɔ sixú dó gesí nǔnyanyawiwa, énɛ́ wɛ nyí kpé e è ma kpé wú bo zán gbɛ sɔgbe xá, alǒ wa nǔ sɔgbe xá nǔgbódodó walɔ ɖagbe tɔn Jexóva tɔn lɛ́ ǎ é. Amɔ̌, xókwín “hwɛhuhu” ɔ sixú lɛ́ dó gesí ninɔmɛ hwɛhuhu tɔn e mǐ ɖu gǔ tɔn sín Adámu gɔ́n é. Hwɛhuhugú e mǐ ɖu é wɛ nyí hwɛjijɔ e wú mǐ bǐ nɔ kú é.
b Jexóva yí gbe nú vɔ̌ e gbɛtɔ́ gbejínɔtɔ́ énɛ́ lɛ́ sá lɛ́ é, ɖó é tuun ɖɔ ɖo sɔgúdo ɔ, Jezu Klísu ná sɔ́ gbɛ tɔn dó sá vɔ̌, bo ná hwlɛ́n gbɛtɔ́ lɛ́ bǐ sín hwɛhuhu kpó kú kpó sí bǐ mlɛ́mlɛ́.—Hlɔ̌. 3:25.
