Mɛsɛ́dó Pɔ́lu wlán nǔ élɔ́ sɛ́dó klisánwun e ɖo Tɛsaloníki lɛ́ é: “Ényí mɛ ɖěbǔ ma ka nɔ se tónú nú xó e mǐ ɖɔ gbɔn wěmasɛ́dómɛ élɔ́ gblamɛ lɛ́ é ǎ hǔn, mi ɖó kɛ́n mɛ énɛ́ jí.” (2 Tɛ. 3:14) Ð’ayǐ ɔ, mǐ ɖɔ ɖɔ mɛxó agun tɔn lɛ́ wɛ wěɖexámɛ énɛ́ kan. Ényí mɛxó agun tɔn lɛ́ gb’akpá nú mɛɖé azɔn gěgé, có é ka kpo ɖo ya wɔn nú nǔgbódodó Biblu tɔn lɛ́ wɛ ɔ, yě sixú xwlé xóɖiɖɔ akpágbanúmɛ tɔn ɖé agun ɔ. Énɛ́ gúdo ɔ, wɛnjlátɔ́ e ɖo agun ɔ mɛ lɛ́ é ɖě sɔ́ ná nɔ dó gbɛ̌ xá ɛ ǎ.

Amɔ̌, é byɔ́ ɖɔ è ní bló hǔzúhúzú ɖé. É ɖo wɛn ɖɔ nǔ e klisánwun ɖokpó ɖokpó ɖó ná wa ɖo ninɔmɛ ɖé lɛ́ mɛ é xó ɖɔ wɛ wěɖexámɛ Pɔ́lu tɔn ɖe. Énɛ́ wú ɔ, é byɔ́ ɖɔ mɛxó agun tɔn lɛ́ ní xwlé xóɖiɖɔ akpágbanúmɛ tɔn ɖé mɛ ǎ. Étɛ́wú è ka bló hǔzúhúzú énɛ́? Mǐ ní gbéjé ninɔmɛ e mɛ Pɔ́lu ɖe wě ɔ xá mɛ ɖe é kpɔ́n.

Pɔ́lu ɖ’ayi wú ɖɔ mɛɖé lɛ́ ɖo agun énɛ́ mɛ bo “nɔ zán gbɛ hannyahannya.” Yě ɖo nǔ wa sɔgbe xá wě e Mawu sɔ́ d’ayi mɛ nú mɛ, bɔ è ɖe xá yě lɛ́ é wɛ ǎ. Hwenu e é ba agun ɔ kpɔ́n wá yi é ɔ, é ɖe gbe élɔ́ nú yě: “Ényí mɛ ɖěbǔ ma jló ná w’azɔ̌ ǎ hǔn, mɛ ɔ ní bo ma ɖu nǔ ó.” É ɖo mɔ̌ có, mɛɖé lɛ́ hɛn ɔ, yě ná w’azɔ̌, có yě gbɛ́ azɔ̌ wa bá kpé nukún dó yěɖée wú. Gɔ́ ná ɔ, yě nɔ ɖo nu dó mɛ ɖěvo lɛ́ sín xó mɛ wɛ. Nɛ̌ klisánwun lɛ́ ka ɖó ná nɔ wa nǔ xá mɛ énɛ́ lɛ́ e nɔ zán gbɛ hannyahannya lɛ́ é gbɔn?—2 Tɛ. 3:6, 10-12.

Pɔ́lu ɖɔ: “Mi ɖó kɛ́n mɛ énɛ́ jí.” Xógbe Glɛ̌kigbe tɔn énɛ́ sín tínmɛ wɛ nyí è ní sɔ́ ayi ɖó mɛ énɛ́ jí ɖo ali bǔnɔ ɖé nu. Agun ɔ bǐ wɛ Pɔ́lu ɖe wě énɛ́ xá, é nyí mɛxó agun tɔn lɛ́ kɛ́ɖɛ́ ǎ. (2 Tɛ. 1:1; 3:6) Énɛ́ wú ɔ, klisánwun ɖokpó ɖokpó sixú ɖó kɛ́n klisánwun hǎtɔ́, éé ma nɔ se tónú nú wěɖexámɛ Biblu tɔn lɛ́ ǎ é ɖé jí, bo wá gbeta ɔ kɔn bo “sɔ́ [ná] nɔ dó gbɛ̌ xá” mɛ énɛ́ e nɔ zán gbɛ hannyahannya é ɖě ǎ.

Xlɛ́xlɛ́ wɛ énɛ́ ɖe ɖɔ yě nɔ wa nǔ xá mɛ ɔ mɛ e è sɔ́ ɖó kɛ́n nú agun ɔ é ɖé ɖɔhun a? Éǒ, ɖó Pɔ́lu ɖɔ gɔ́ ná ɖɔ: “Mi kpo ɖo wě ɖe xá ɛ wɛ nɔví ɖɔhun.” Énɛ́ wú ɔ, klisánwun lɛ́ ɖokpó ɖokpó ná kpo ɖo kplé lɛ́ bló ɖó kpɔ́ xá mɛ énɛ́ e jí è ɖó kɛ́n é wɛ, bo ná nɔ lɛ́ w’azɔ̌ ɖó kpɔ́ xá ɛ ɖo sinsɛnzɔ́ ɔ mɛ; amɔ̌, yě ná wá gbeta ɔ kɔn bo sɔ́ ná nɔ wa nǔ ɖó kpɔ́ xá ɛ ɖo mɛkplékpɔ́mɛ núwiwa lɛ́, alǒ ayiɖeɖayǐ lɛ́ hwenu ɖě ǎ. Étɛ́wú? Pɔ́lu ɖɔ: “Bónú winnyá ní dó sixú hu i.” Ényí è ma sɔ́ nɔ dó gbɛ̌ xá ɛ ɖě ǎ ɔ, winnyá sixú hu i, bɔ é ná ɖyɔ́ walɔ.—2 Tɛ. 3:14, 15.

Nɛ̌ klisánwun lɛ́ ka sixú zán wěɖexámɛ énɛ́ gbɔn ɖo égbé? Jɛ nukɔn hwɛ̌ ɔ, mǐ ɖó ná kú d’é jí ɖɔ mɛ ɔ nɔ zán “gbɛ hannyahannya” nǔgbó nǔgbó, lěe Pɔ́lu ɖɔ gbɔn é. É ɖo xó ɖɔ dó mɛ e ma nɔ ɖó linlin ɖokpó ɔ dó nǔ lɛ́ wú mǐɖɔhun ǎ, alǒ ma nɔ jló nǔ ɖokpó ɔ lɛ́ mǐɖɔhun ǎ lɛ́ é wú wɛ ǎ. É ka lɛ́ ɖo xó ɖɔ dó mɛ ɖěɖěe dó xomɛsin nú mǐ kpowun lɛ́ é wú wɛ ǎ. É nyɔ́ wa ɔ, mɛ ɖěɖěe nɔ sɔ́ jlǒ dó tlí tó nú wěɖexámɛ Mawu tɔn, éé ɖo wɛn lɛ́ é xó ɖɔ wɛ Pɔ́lu ɖe.

Égbé ɔ, ényí mǐ ɖ’ayi klisánwun hǎtɔ́ ɖé wú, bɔ é nɔ tlí tó nú wěɖexámɛ e ɖo Xó Mawu tɔn mɛ lɛ́ é ɔ, a mǐ ná wá gbeta ɔ kɔn mǐɖésúnɔ bo sɔ́ ná nɔ dó gbɛ̌ xá ɛ ɖo mɛkplékpɔ́mɛ núwiwa lɛ́, alǒ ayiɖeɖayǐ lɛ́ domɛ ɖě ǎ. Ðó gbeta mɛɖésúnɔ tɔn ɖé wɛ énɛ́ nyí wútu ɔ, mǐ ná ɖɔ xó d’é wú xá mɛ e ma ɖo xwédo mǐtɔn mɛ ǎ lɛ́ é ǎ. Gɔ́ ná ɔ, mǐ ná kpo ɖo kplé lɛ́ bló ɖó kpɔ́ xá ɛ wɛ, bo ná kpo ɖo azɔ̌ wa ɖó kpɔ́ xá ɛ wɛ ɖo sinsɛnzɔ́ ɔ mɛ. Ényí é húzú walɔ ɔ, mǐ ná lɛ́ jɛ nǔ wa ɖó kpɔ́ xá ɛ jí lěe é ɖó ná nyí gbɔn é.