1. Etɛ lɛ wu Jehovah ka nɔ ɖ’ayi ɖò togun tɔn wu?

JEHOVAH MAWU ‘yí wǎn nú togun tɔn.’ (2 Tan 2:10) Enɛ nɔ dó awǎjijɛ nú mǐ tawun. Jehovah nɔ ɖó ayi jijɔ ɖagbe mǐtɔn lɛ wu; é nɔ ɖ’ayi nǔwukpíkpé mǐtɔn lɛ wu, bo nɔ lɛ́ dɔn mǐ sɛkpɔ́ éɖée. Enyi mǐ nɔ gbeji n’i ɔ, é na nɔ akpá mǐtɔn hwebǐnu.—Jaan 6:44.

2. Etɛwu é ka nɔ vɛwǔ nú mɛɖé lɛ ɖɔ ye ni ɖi ɖɔ Jehovah yí wǎn nú ye?

² Mɛɖé lɛ sixu ɖɔ, ‘Un tuùn ɖɔ Jehovah yí wǎn nú togun tɔn blebu, amɔ̌, nɛ̌ un ka sixu wà gbɔn bo tuùn ɖɔ nyiɖesunɔ mɛtún ɔ xɔ akwɛ n’i?’ Etɛ ka sixu zɔ́n bɔ mɛɖé kan nǔ enɛ byɔ? Nǔ nyanya e mɛ ɖevo lɛ nɔ ɖɔ dó mɛ wu é zɔ́n bɔ Oksana * sè wuvɛ̌ tawun ɖò agbaza kpo lee nǔ nɔ cí nú mɛ é kpo linu, é ɖɔ: “É víví nú mì tawun hwenu e un bló baptɛm, bo huzu gbexosin-alijitɔ́ é. Amɔ̌, xwè 15 gudo ɔ, un lɛ́vɔ jɛ nǔ baɖabaɖa e xá mì hwenu e un ɖò vǔ lɛ é flín jí. Un ɖɔ nú nyiɖée ɖɔ nǔ ce kún sɔ́ nyɔ́ Jehovah nukúnmɛ ó, bɔ un kún sɔ́ jɛxa b’ɛ na yí wǎn nú mì ó.” Yua e nyí nɔví nyɔnu gbexosin-alijitɔ́ ɖé é lɔ sè wuvɛ̌ ɖò ali ɖokpo ɔ nu, é ɖɔ: “Un zé nyiɖée jó nú Jehovah ɖó un jló ɖɔ é ni j’awǎ wutu. Amɔ̌, un kúdeji ɖɔ é kún sixu yí wǎn nú mì gbeɖé ó.”

3. Etɛ lɛ jí mǐ ka na ɖɔ xó dó ɖò xóta elɔ mɛ?

³ Klisanwun gbejinɔtɔ́ e xó mǐ ɖɔ wá yì lɛ é ɖɔhun ɔ, a yí wǎn nú Jehovah tawun, amɔ̌, a sixu nɔ xò nǔ kpɔ́n ɖɔ é ka yí wǎn nú we à jí. Etɛwu é ka ɖò taji ɖɔ a ni kúdeji ɖɔ Jehovah nɔ kpé nukún dó wǔ we nǔgbo nǔgbo? Enyi a lin ɖɔ Jehovah kún sɔ́ yí wǎn nú we ó ɔ, etɛ ka sixu d’alɔ we? Mǐ na ɖɔ xó dó xósin nǔkanbyɔ enɛ lɛ tɔn jí.

4. Etɛwu é ka nyla ɖɔ mǐ ni xò nǔ kpɔ́n dó wǎn e Jehovah yí nú mǐ é wu?

⁴ Wanyiyi ɖó hlɔnhlɔn tawun, bo nɔ sísɛ́ mɛ bɔ è nɔ wà nǔ. Enyi mǐ kúdeji ɖɔ Jehovah yí wǎn nú mǐ, bo lɛ́ ɖò gudo nú mǐ ɔ, enɛ na sísɛ́ mǐ bɔ mǐ na sɛn ɛ kpo ayi bǐ kpo, mǐ na bo tlɛ ɖò wuvɛ̌ ɖebǔ mɔ wɛ ɖò gbɛ̀ mɛ ɔ nɛ. Ðò alɔ ɖevo mɛ ɔ, enyi mǐ xò nǔ kpɔ́n dó bo e Mawu nɔ wlí nú mǐ é wu ɔ, ‘hlɔnhlɔn na hwedó mǐ.’ (Nǔx. 24:10) Enyi awakanmɛ kú mǐ, bɔ mǐ lin ɖɔ Mawu kún sɔ́ yí wǎn nú mǐ ó ɔ, Satáan na yawǔ kpé mǐ wu.—Efɛ. 6:16.

5. Nɛ̌ nǔ xixo kpɔ́n dó wanyiyi Mawu tɔn wu ka wà nǔ dó mɛɖé lɛ wu gbɔn?

⁵ Nǔxokpɔ́n ko zɔ́n bɔ Klisanwun gbejinɔtɔ́ hwe mǐtɔn nu tɔn ɖé lɛ ko vɔ́da ɖò gbigbɔ lixo. Mɛxo agun tɔn e nɔ nyí James é ɖɔ: “Un ɖò sinsɛnzɔ́ wà wɛ ɖò Betɛli, bo lɛ́ ɖò wɛnɖagbe ɔ jijla sín vivǐ ɖu wɛ ɖò agun e nɔ dó jonɔgbe é mɛ có, un nɔ kanbyɔ nyiɖée ɖɔ Jehovah ka nɔ yí gbè nú vɔ̌ e sá wɛ un ɖè lɛ é dóo à jí. É wá sù hweɖenu bɔ un tlɛ wá jɛ kinkanbyɔ nyiɖée jí ɖɔ Jehovah ka nɔ ɖótó ɖɛ ce lɛ à jí.” Eva ɖesu ɖò sinsɛnzɔ́ hwebǐnu tɔn mɛ; é ɖɔ: “Un mɔ ɖɔ nǔ xixo kpɔ́n dó wǎn e Jehovah yí nú mǐ é wu nyla, ɖó é nɔ wà nǔ dó sɛn e sɛn ɛ wɛ mǐ ɖè é wu. É nɔ wà nǔ dó nǔ gbigbɔ tɔn lɛ sín jlǒ e mǐ nɔ ɖó é wu, lobo nɔ lɛ́ zɔ́n bɔ mǐ nɔ ba awǎjijɛ kpò ɖò Jehovah sinsɛn mɛ.” Michael e nyí gbexosin-alijitɔ́, bo lɛ́ nyí mɛxo agun tɔn ɖé é ɖɔ: “Enyi a ma ɖi nǔ ɖɔ Mawu nɔ kpé nukún dó wǔ we ǎ ɔ, a na jɛ zɔ n’i.”

6. Enyi mǐ jɛ nǔ xò kpɔ́n dó wanyiyi e Mawu ɖó nú mǐ é wu jí ɔ, etɛ mǐ ka ɖó na wà?

⁶ Kpɔ́ndéwú enɛ lɛ xlɛ́ ɖɔ enyi mǐ nɔ lin ɖɔ Jehovah kún yí wǎn nú mǐ ó ɔ, linlin nyanya mɔ̌hun sixu wà nǔ dó nǔɖiɖi mǐtɔn wu tawun. Amɔ̌, enyi mǐ jɛ nǔ xò kpɔ́n dó wǎn e Jehovah yí nú mǐ é wu jí ɔ, etɛ mǐ ka ɖó na wà? Mǐ ɖó na nya ye dó gbě afɔjiafɔji. Byɔ̌ Jehovah bonu é d’alɔ we bonu a na sɔ́ “fífá . . . tɔn e hugǎn nukúnnúmɔjɛnǔmɛ gbɛtɔ́ tɔn bǐ ɔ” dó ɖyɔ linlin e nɔ ɖó adohu adohu nú we lɛ é. (Fili. 4:6, 7) Flín ɖɔ emi kún ɖò emiɖokpo ó. Nɔví sunnu kpo nɔví nyɔnu kpo gbejinɔtɔ́ ɖevo lɛ ɖò xwi ɖí xá linlin masɔgbe lɛ wɛ. Mɛsɛntɔ́ Jehovah tɔn hwexónu tɔn lɛ lɔ tlɛ ɖí xwi xá linlin mɔ̌hun lɛ. Mǐ ni kpɔ́n nǔ e kpɔ́ndéwú mɛsɛ́dó Pɔlu tɔn sixu kplɔ́n mǐ é.

7. Wuvɛ̌ tɛ lɛ Pɔlu ka mɔ?

⁷ A nɔ lin hweɖelɛnu ɖɔ azɔ̌ gegě ɖò kɔ jí nú we, bɔ é vɛwǔ bɔ a na wà bǐ wɛ à? Enyi mɔ̌ wɛ ɔ, a sixu mɔ nǔ jɛ ninɔmɛ Pɔlu tɔn mɛ. Enyi agun ɖokpo kpowun sín nǔ wɛ nɔ ɖò hǔn mɛ n’i ǎ, loɔ, “agun lɛ bǐ” sín nǔ wɛ ɖò hǔn mɛ n’i. (2 Kɔ. 11:23-28) Azɔn jɛmagbɔ ɖé jɛ wɛ a ɖè, bɔ é ɖò awǎjijɛ towe xò yí wɛ à? “Wun ɖé [ɖò] lanmɛ nú” Pɔlu, bɔ é ɖò wuvɛ̌ tɔn sè wɛ; é sixu ko nyí azɔn syɛnsyɛn ɖé, bɔ é ɖò biba wɛ ɖɔ azɔn enɛ ni gbɔ. (2 Kɔ. 12:7-10, nwt) Awakanmɛ ka nɔ wá kú we hweɖelɛnu dó nǔwanyido towe lɛ wu wɛ à? Nǔ nɔ cí mɔ̌ nú Pɔlu hweɖelɛnu. É ɖɔ ɖɔ “gbɛ̀ [emitɔn] blawǔ,” ɖó ahwan e fun wɛ é nɔ ɖè magbokɔ, bo na ɖu ɖò nǔwanyido tɔn lɛ jí é wu.—Hlɔ. 7:21-24.

8. Etɛ ka d’alɔ Pɔlu, bɔ é ɖí xwi xá wuvɛ̌ tɔn lɛ?

⁸ Pɔlu mɔ mɛtɛnkpɔn gegě, bo lɛ́ gbɔn ninɔmɛ e kú awakanmɛ nú mɛ lɛ é gegě mɛ có, é ka kpò ɖò Jehovah sɛn wɛ. Etɛ ka na ɛ hlɔnhlɔn b’ɛ wà mɔ̌? É mɔ nǔ jɛ nǔwanyido tɔn lɛ wu céɖécéɖé có, é ka ɖó nǔɖiɖi e ma sɛ̀ dò ǎ é nú gbɛxixɔ ɔ. É lɛ́ tuùn akpá Jezu tɔn e ɖɔ ɖɔ ‘mɛ e na ɖi nǔ nú [Jezu] lɛ é bǐ na mɔ gbɛ̀ mavɔmavɔ’ é. (Jaan 3:16; Hlɔ. 6:23) É ɖò wɛn ɖɔ Pɔlu ɖò mɛ ɖěɖee ɖi nǔ nú gbɛxixɔ ɔ lɛ é mɛ. É kúdeji ɖɔ Jehovah ɖò gbesisɔmɛ bo na sɔ́ hwɛ kɛ mɛ ɖěɖee tlɛ hu hwɛ syɛnsyɛn dó è lɛ é, enyi ye lɛkɔ sín hwɛ yetɔn lɛ gudo ɔ nɛ.—Ðɛh. 86:5.

9. Etɛ xó e Pɔlu ɖɔ, bɔ è wlán dó Galatinu lɛ 2:20 mɛ é ka sixu kplɔ́n mǐ?

⁹ Pɔlu lɛ́ ɖi nǔ ɖɔ Mawu yí wǎn nú emi tawun, ɖó é tuùn ɖɔ é sɛ́ Jezu dó bɔ é wá kú dó ta emitɔn mɛ. (Xà Galatinu lɛ 2:20.) Ðǒ ayi ganjɛwuxó e ɖò vivɔnu wemafɔ ɔ tɔn é wu. Pɔlu ɖɔ: ‘Mawu ví ɔ yí wǎn nú mì, bo kú dó ta ce mɛ.’ Pɔlu lin ɖɔ emi nyí mɛ nyanya sɔmɔ̌ bɔ Mawu kún sixu yí wǎn nú emi ó ǎ. É lin nǔ lěhun ǎ: ‘Un mɔ nǔ e wu Jehovah sixu yí wǎn nú nɔví ce lɛ é, amɔ̌, é sixu yí wǎn nú nyɛ ǎ.’ Pɔlu flín nǔ elɔ Hlɔmanu lɛ: “Hwenu e mǐ kpò ɖò hwɛhutɔ́ nyí wɛ ɔ wɛ Klisu kú dó ta mǐtɔn mɛ.” (Hlɔ. 5:8) Nǔ ɖebǔ sixu ɖó dogbó nú wǎn e Mawu yí nú mǐ é ǎ.

10. Etɛ Hlɔmanu lɛ 8:38, 39 ka sixu kplɔ́n mǐ?

¹⁰ Xà Hlɔmanu lɛ 8:38, 39. Pɔlu tuùn lě dò wanyiyi Mawu tɔn ɖó hlɔnhlɔn sɔ é. É wlán ɖɔ nǔ ɖebǔ kún “sixu ɖè mǐ ɖó vo nú wanyiyi e Mawu ɖexlɛ́ mǐ” é ó. Pɔlu  tuùn lee Jehovah ɖó suúlu, bo wà nǔ xá togun Izlayɛli tɔn gbɔn é. É lɛ́ tuùn lee Jehovah kú nǔblawu nú éɖesunɔ gbɔn é. Mǐ sixu sɛ̀ sin xwè nú linlin Pɔlu tɔn gbɔn lě: ‘Ðó Jehovah sɛ́ Vǐɖokponɔ tɔn dó, bɔ é wá kú dó ta ce mɛ wu ɔ, un ka lɛ́ ɖó hwɛjijɔ ɖé, bá xò nǔ kpɔ́n dó wanyiyi tɔn wu à?’—Hlɔ. 8:32.

11. Pɔlu hu hwɛ gegě, ɖi ɖěɖee xó è ɖɔ ɖò 1 Timɔtée 1:12-15 mɛ lɛ é có, etɛwu é ka kúdeji ɖɔ Mawu yí wǎn nú emi?

¹¹ Xà 1 Timɔtée 1:12-15. Nǔ e Pɔlu wà wá yì ɖò gbɛzán tɔn mɛ lɛ é sixu ko nɔ zɔ́n bɔ é nɔ sè wuvɛ̌ hweɖelɛnu. É ɖɔ ɖɔ emi “nyí hwɛhutɔ́ hú hwɛhutɔ́ lɛ bǐ,” bɔ enɛ ka nyí nǔkpacamɛ ǎ. Cobonu Pɔlu na mɔ nǔgbo ɔ ɔ, é dóya nú Klisanwun lɛ gbɔn toxo vovo lɛ mɛ, bo sɔ́ mɛɖé lɛ dó ganmɛ, lobo lɛ́ na gbè bɔ è hu mɛ ɖevo lɛ. (Mɛ. 26:10, 11) Enyi Pɔlu mɔ Klisanwun winnyawinnya e é na gbè bɔ è hu mɛjitɔ́ tɔn lɛ é ɖé ɔ, dǒ nukún lee nǔ na ko cí n’i é mɛ kpɔ́n. Nǔ e Pɔlu wà nyi dò wá yì lɛ é vɛ́ n’i, amɔ̌, é tuùn ɖɔ emi kún sixu huzu nǔ e ko jɛ wá yì lɛ é ó. É yí gbè ɖɔ Klisu kú dó ta emitɔn mɛ, bo wlán kpo jiɖiɖe kpo ɖɔ: “Gbɔn nyɔna Mawu tɔn gblamɛ ɔ, un huzu mɛ e un nyí dìn é.” (1 Kɔ. 15:3, 10) Etɛ enɛ ka kplɔ́n mǐ? Yǐ gbè ɖɔ Klisu kú dó ta towe mɛ, bo hun ali ɔ nú we bɔ a na ɖó kancica mɛɖesunɔ tɔn ɖé xá Jehovah. (Mɛ. 3:19) Nǔ e ɖò taji nú Mawu é wɛ nyí nǔ e wà wɛ mǐ ɖè dìn é kpo nǔ e mǐ na wá wà ɖò sɔgudo é kpo, enyi nǔ e mǐ wà nyi dò wá yì hwenu e mǐ ma ko nyí Kúnnuɖetɔ́ ǎ, alǒ tlɛ ko nyí fɛɛ é ǎ.—Eza. 1:18.

12. Enyi mǐ mɔ ɖɔ mǐ kún xɔ akwɛ ó, alǒ mǐ kún jɛxa bɔ è na yí wǎn nú mǐ ó ɔ, nɛ̌ xó e ɖò 1 Jaan 3:19, 20 mɛ lɛ é ka sixu d’alɔ mǐ gbɔn?

¹² Enyi a lin tamɛ dó kú e Jezu wá kú dó ta towe mɛ, bo súnsún hwɛ towe lɛ é jí ɔ, a sixu ɖɔ, ‘Un vó nǔɖe ǎ, un jɛxa yɛ̌yi  enɛ ǎ.’ Etɛwu nǔ ka sixu cí mɔ̌ nú we? Ayixa mǐtɔn sixu blɛ́ mǐ, bo na bló bɔ mǐ na mɔ ɖɔ mǐ kún xɔ akwɛ, alǒ jɛxa bɔ è na yí wǎn nú mǐ ó. (Xà 1 Jaan 3:19, 20.) Enyi mǐ jɛ nǔ mɔ̌hun lɛ lin jí ɔ, mǐ ɖó na flín ɖɔ “Mawu hugǎn ayi mǐtɔn.” Wanyiyi e Tɔ́ mǐtɔn jixwé tɔn ɔ ɖó nú mǐ é, kpo hwɛsɔ́kɛmɛ tɔn kpo hugǎn linlin agɔ ɖebǔ e mǐ sixu ɖó é flaflá tɔn. Mǐ ɖó na kplɔ́n, bo kúdeji ɖɔ Jehovah yí wǎn nú mǐ. Bo na dó kpé enɛ wu ɔ, mǐ ɖó na nɔ kplɔ́n Xó tɔn hwɛhwɛ, xoɖɛ hwɛhwɛ, bo nɔ zán hwenu ɖó kpɔ́ xá mɛ ɖěɖee nɔ sɛn ɛ lɛ é. Etɛwu nǔ enɛ lɛ wiwa ka ɖò taji sɔmɔ̌?

13. Nɛ̌ Xó Mawu tɔn kplɔnkplɔn ka sixu d’alɔ mǐ gbɔn? (Lɛ̌ kpɔ́n gbǎví “ Lee Xó Mawu Tɔn D’alɔ Ye Gbɔn É.”)

¹³ Nɔ kplɔ́n Xó Mawu tɔn gbè bǐ gbè, enɛ ɔ, a na mɔ nukúnnú jɛ jijɔ ɖaaɖagbe Jehovah tɔn lɛ wu vaan. A na mɔ nukúnnú jɛ wu ɖɔ é yí wǎn nú we tawun. Tamɛ linlin dó akpáxwé Xó Mawu tɔn tɔn ɖé jí ayihɔngbe ayihɔngbe sixu d’alɔ we bɔ a na dó nukún nǔ lɛ mɛ kpɔ́n ganji, bɔ enɛ na lɛ́ “ɖè [nǔjɛdo]” e ɖò ayi towe mɛ lɛ é “xlɛ́.” (2 Tim. 3:16) Mɛxo agun tɔn e nɔ nyí Kevin, bo nɔ lin ɖɔ emi kún hwɛ́n nǔɖe ó é ɖɔ: “Ðɛhan 103gɔ́ ɔ xixa kpo tamɛ linlin d’eji kpo d’alɔ mì, bɔ un byɔ nyiɖée mɛ, bo mɔ nǔ jɛ nǔ e Jehovah nɔ lin dó wǔ ce nǔgbo nǔgbo é wu.” Eva e xó mǐ ɖɔ wá yì é ɖɔ: “Gbadanu lɛ ɔ, un nɔ lin tamɛ dó linlin Jehovah tɔn lɛ jí. É nɔ zɔ́n bɔ ayi ce nɔ fá, bo nɔ lɛ́ hɛn nǔɖiɖi ce lidǒ.”

14. Nɛ̌ ɖɛ ka sixu d’alɔ mǐ gbɔn?

¹⁴ Nɔ xoɖɛ hwebǐnu. (1 Tɛ. 5:17) Kancica ɖagbe ɖé ɖiɖó xá mɛɖé nɔ jinjɔn xóɖɔɖókpɔ́ hwɛhwɛ xá mɛ ɔ kpo ayi bǐ kpo jí. Nǔ ɖokpo ɔ wɛ é nyí nú kancica e mǐ ɖó xá Jehovah é. Enyi mǐ nɔ ɖɔ lee nǔ nɔ cí nú mǐ é, linlin mǐtɔn kpo nǔ e nɔ ɖu ayi mɛ nú mǐ lɛ é kpo n’i ɖò ɖɛ mɛ ɔ, mǐ nɔ ɖexlɛ́ ɖɔ mǐ ɖeji dó wǔ tɔn, bo lɛ́ tuùn ɖɔ é yí wǎn nú mǐ. (Ðɛh. 94:17-19; 1 Jaan 5:14, 15) Yua e xó mǐ ɖɔ wá yì é ɖɔ: “Enyi un ɖò ɖɛ xò wɛ ɔ, nǔ e jɛ dó jǐ ce ɖò azǎn ɔ jí lɛ é kɛɖɛ wɛ un nɔ ɖɔ nú Jehovah ǎ. Un nɔ hun ayi ce nú Jehovah, bo nɔ jó è dó bɔ é nɔ tuùn lee nǔ cí nú mì é. Kpɛɖé kpɛɖé ɔ, un wá mɔ ɖɔ Jehovah kún cí gǎn azɔ̌xwé ɖaxó ɖé tɔn ɖɔhun ó, loɔ, Tɔ́ e yí wǎn nú vǐ tɔn lɛ tawun é ɖé wɛ n’i.”—Kpɔ́n gbǎví “ A ka Ko Xà À?”

15. Nɛ̌ Jehovah ka ɖexlɛ́ ɖɔ nǔ mǐtɔn nɔ ɖu ayi mɛ nú emi gbɔn?

¹⁵ Dǒ gbɛ̌ xá xɔ́ntɔn gbejinɔtɔ́ lɛ; nǔnina Jehovah tɔn ɖé wɛ ye nyí. (Ja. 1:17) Tɔ́ mǐtɔn jixwé tɔn ɔ na mǐ xwédo gbigbɔ tɔn e mɛ nɔví sunnu lɛ kpo nɔví nyɔnu lɛ kpo  ɖè é ɖé, bo na dó xlɛ́ mǐ ɖɔ nǔ mǐtɔn nɔ ɖu ayi mɛ nú emi. Nɔví enɛ lɛ nɔ “ɖè wanyiyi xlɛ́ [mǐ] hwebǐnu.” (Nǔx. 17:17, nwt) Ðò wema e Pɔlu sɛ́dó Kolosinu lɛ é mɛ ɔ, é ɖɔ Klisanwun e nɔ gudo n’i é ɖé lɛ xó, bo ɖɔ ɖɔ ye “dó wusyɛn lanmɛ nú emi ɖesu.” (Kolo. 4:10, 11) Jezu ɖesunɔ tlɛ ɖó hudo alɔdó tɔn, bɔ alɔ e xɔ́ntɔn tɔn lɛ, enɛ wɛ nyí wɛnsagun lɛ kpo gbɛtɔ́ lɛ kpo dó è é sù nukún tɔn mɛ.—Luk. 22:28, 43.

16. Nɛ̌ xɔ́ntɔn gbejinɔtɔ́ lɛ ka sixu d’alɔ mǐ bɔ mǐ na sɛkpɔ́ Jehovah d’eji gbɔn?

¹⁶ A ka ɖò xɔ́ntɔn gbejinɔtɔ́ e Jehovah na we lɛ é sín lè ɖu wɛ bǐ mlɛ́mlɛ́ à? Nǔ e ɖò ayi mɛ ɖu nú we wɛ lɛ é ɖiɖɔ nú xɔ́ntɔn e zin é ɖé nyí wuntun gǎnmaɖó tɔn ǎ; é sixu hwlɛn we. Ðǒ ayi nǔ e James e xó mǐ ɖɔ wá yì é ɖɔ é wu: “Xɔ́ntɔn ɖagbe e un zun xá Klisanwun e zin lɛ é d’alɔ mì tawun. Enyi linlin masɔgbe lɛ ɖí bú mì ɔ, ye nɔ ɖótó mì kpo sɔxwixwe kpo, bo nɔ flín mì ɖɔ ye yí wǎn nú mì. Nǔwiwa yetɔn lɛ nɔ xlɛ́ mì ɖɔ Jehovah yí wǎn nú mì, bo nɔ lɛ́ kpé nukún dó wǔ yè.” É ɖò taji tawun ɖɔ mǐ ni sɔnǔ nú kancica syɛnsyɛn ɖé xá nɔví gbigbɔ tɔn mǐtɔn lɛ, bo lɛ́ lébe na.

17-18. Mɛ̌ mǐ ka ɖó na ɖótó? Etɛwu?

¹⁷ Satáan jló ɖɔ mǐ ni jó ahwan e fun wɛ mǐ ɖè bá wà nǔ ɖagbe é dó. É ba ɖɔ mǐ ni lin ɖɔ Jehovah kún yí wǎn nú mǐ ó, lé mǐ kún nyí mɛ ɖagbe sɔmɔ̌ bɔ é na hwlɛn mǐ ó. Amɔ̌, lee mǐ ko mɔ gbɔn é ɔ, nǔ ɖebǔ sixu ɖè mǐ ɖó vo nú nǔgbo ɔ ǎ.

¹⁸ Jehovah yí wǎn nú we. Dɔkun xɔ akwɛ ɖé wɛ a nyí ɖò nukún tɔn mɛ. Enyi a setónú n’i ɔ, a na “nɔ wanyiyi tɔn mɛ” kaka sɔyi, Jezu ɖɔhun. (Jaan 15:10) Enɛ wu ɔ, ma ɖótó Satáan, alǒ ayi towe e ɖò hwɛ dó we wɛ é ó. É nyɔ́ wà hǔn, nɔ ɖótó Jehovah e nɔ ɖ’ayi jijɔ ɖaaɖagbe mǐ mɛ ɖokpo ɖokpo tɔn lɛ wu é. Kúdeji ɖɔ é “yí wǎn nú togun tɔn” kaka jɛ hwi lɔ jí.