Etɛwu táan klewun ɖé jɛ nukɔn nú kú Jezu tɔn ɔ, é ka ɖè xó sín xó ɖěɖee Davidi ɖɔ b’ɛ ɖò Ðɛhan 22:2 mɛ lɛ é mɛ?

Xó ɖěɖee è wlán dó Matie 27:46 mɛ lɛ é ɖò xó gudogudo tɔn e Jezu ɖɔ jɛ nukɔn nú kú tɔn lɛ é mɛ; finɛ ɖɔ: “Mawu ce, Mawu ce, nɛ̌ ka gbɔn bɔ a jó mì dó?” Mɔ̌ e Jezu ɖɔ é zɔ́n bɔ xó ɖěɖee Davidi wlán bɔ é ɖò Ðɛhan 22:2 mɛ lɛ é jɛnu. (Mak. 15:34) É na nyla ɖɔ è ni ɖɔ ɖɔ kanmɛ wɛ gbɔjɔ Jezu alǒ nǔɖiɖi wɛ hwedó è wɛ zɔ́n bɔ é ɖè xó sín ɖɛhan enɛ mɛ. Jezu mɔ nǔ jɛ nǔ e wu é byɔ ɖɔ é ni kú é mɛ bǐ mlɛ́mlɛ́, bo ka wà mɔ̌ kpo jlǒ kpo. (Mat. 16:21; 20:28) É lɛ́ tuùn ɖɔ ɖò kú emitɔn hwenu ɔ, Jehovah kún na “cyɔn alɔ” ɖě emi jí ó. (Jɔb. 1:10) Enɛ wu ɔ, Jehovah sɔ́ cyɔn alɔ Jezu jí ǎ, bonu é na mɔ tɛn dó xlɛ́ ɖɔ wuvɛ̌ lɛ na bo tlɛ syɛn gbɔn ɖebǔ ɖò kú emitɔn hwenu ɔ, emi na nɔ gbeji hwebǐnu.—Mak. 14:35, 36.

Amɔ̌, etɛwu Jezu ka ɖè xó sín Ðɛhan enɛ mɛ? Mǐ sixu ɖɔ bo t’afɔ jí ǎ có, mǐ ka na gbéjé hwɛjijɔ ɖěɖee wu é sixu ko ɖɔ mɔ̌ lɛ é ɖé lɛ kpɔ́n. *

Gbɔn xó enɛ lɛ e Jezu ɖɔ lɛ é gblamɛ ɔ, ɖɛ̌ tɛ jí wɛ é ka ɖè ɖɔ Jehovah kún d’alɔ ɛ ɖò kú tɔn hwenu ó à? É byɔ ɖɔ Jezu ni sɔ́ gbɛ̀ tɔn dó savɔ̌, alɔdó Jehovah tɔn mɛvo. Gbɛtɔ́ wɛ n’i, bɔ é byɔ ɖɔ “é ni kú dó gbɛtɔ́ lɛ bǐ tamɛ.”—Ebl. 2:9.

Gbɔn xó klewun e Jezu ɖè sín ɖɛhan enɛ mɛ é gblamɛ ɔ, ayi mɛ lɛ tɔn dɔn wá ɖɛhan ɔ bǐ jí wɛ é ka ɖè à? Ðò kpaa mɛ ɖò  hwenɛnu ɔ, Jwifu lɛ nɔ tuùn ɖɛhan lɛ gegě dó tamɛ. Enyi ye sè wemafɔ ɖɛhan ɖé tɔn ɖokpo ɔ, tɛn tɔn mɛ jɛn ye nɔ jɛ tamɛ lin dó ɖɛhan ɔ bǐ jí jí ɖè. Enyi nǔ mɔ̌hun wɛ ɖò Jezu sín ayi mɛ hǔn, é d’alɔ ahwanvu tɔn Jwifu lɛ, bɔ ye flín nǔɖɔɖ’ayǐ e ɖò ɖɛhan enɛ mɛ, bo na jɛ lobo kúnkplá kú tɔn lɛ é gegě. (Ðɛh. 22:8, 9, 16, 17, 19, 25) Gɔ́ na ɔ, wemafɔ gudogudo tɔn ɖɛhan enɛ tɔn lɛ sɔ́ Jehovah sù, bo tinmɛ ɖɔ é wɛ nyí axɔ́su gbɛ̀ ɔ bǐ tɔn.—Ðɛh. 22:28-32.

Gbɔn xó e Jezu ɖè sín xó ɖěɖee Davidi ɖɔ lɛ é mɛ é gblamɛ ɔ, ɖiɖɔ wɛ é ka ɖè ɖɔ emi nyí xomɛvɔnɔ à? Cobonu Jezu na kú ɔ, é dɛ ɖò nǔagɔwaxámɛ mɛ e mɔ ɛ dó mɔ nunyladómawuwutɔ́ lɛ é tɔn ɖé nu. (Mat. 26:65, 66) Mɛ e ɖò Hwɛɖɔxɔsa Ðaxó Jwifu lɛ tɔn mɛ lɛ é yawǔ xò yeɖée kplé zǎnxwete, bo ɖɔ hwɛ e ye na dó è é, enɛ ka sɔgbe xá sɛ́n ǎ. (Mat. 26:59; Mak. 14:56-59) Kan e Jezu kanbyɔ ɖɔ “Mawu ce, Mawu ce, nɛ̌ ka gbɔn bɔ a jó mì dó?” é ɔ, é sixu nyí ayi mɛ lɛ tɔn dɔn wá jí wɛ é ɖè ɖɔ emi kún wà nǔ e na zɔ́n bɔ ye na dɔn tó mɔ̌hun nú emi é ɖebǔ ó.

Flínflín mɛ ɖevo lɛ wɛ Jezu ka lɛ́ ɖè ɖɔ Mawu tin bɔ Davidi e wlán ɖɛhan enɛ é mɔ wuvɛ̌ có, nǔ Davidi tɔn kpò ɖò Jehovah nukúnmɛ nyɔ́ wɛ à? Nǔ e Davidi kanbyɔ é xlɛ́ ɖɔ é kún sɔ́ kpò ɖò nǔ ɖi nú Mawu wɛ ó ǎ. Ee é kan nǔ ɔ byɔ gudo é ɔ, é ɖè jiɖe e é ɖó dó hlɔnhlɔn mɛhwlɛngán tɔn Jehovah tɔn wu é xlɛ́, bo lɛ́ ɖexlɛ́ ɖɔ Jehovah kpò ɖò nyɔna kɔn dó emi jí wɛ. (Ðɛh. 22:24, 25, 28) Mɔ̌ ɖokpo ɔ, Jezu “Davidi ví” ɔ sè wuvɛ̌ ɖò yatín jí có, enɛ wɛ xlɛ́ ɖɔ nǔ tɔn kún sɔ́ kpò ɖò Jehovah nukúnmɛ nyɔ́ wɛ ó ǎ.—Mat. 21:9.

Alɔ e Jehovah ma sɔ́ cyɔn Jezu jí ǎ, bonu é na mɔ tɛn dó ɖè gbeji e é ɖè é xlɛ́ bǐ mlɛ́mlɛ́ é wɛ zɔ́n bɔ é ɖè wuvɛ̌ syɛnsyɛn e é mɔ é xlɛ́ à? Linlin bǐbɛ̌mɛ tɔn e Jehovah ɖó é wɛ nyí ɖɔ Vǐ tɔn ni sè wuvɛ̌, bo kú ǎ. Hwenu e Adamu kpo Ɛvu kpo tlitó gudo é wɛ é byɔ ɖɔ nǔ ni nyí mɔ̌. Jezu wà nǔ ɖebǔ nyi dò ǎ, amɔ̌, é byɔ ɖɔ é ni sè wuvɛ̌ bo kú, bo na dó na xósin nú nǔkanbyɔ ɖěɖee Satáan fɔ́n nyite lɛ é, bo lɛ́ sú gbɛxixɔ ɔ sín axɔ́ e ɖò dandan é, lobo lɛ́ vɔ́ nǔ e Adamu hɛn bú é xɔ. (Mak. 8:31; 1 Pi. 2:21-24) Enyi Jehovah ma ɖè alɔ e é cyɔn Jezu jí é síìn nú táan ɖé azɔn nukɔntɔn ɔ ɖò gbɛzán tɔn mɛ ǎ ɔ, nǔ enɛ sixu nyɔ́ bló ǎ.

Tintɛnkpɔn wɛ Jezu ɖè bá d’alɔ ahwanvu tɔn lɛ bonu ye ni sɔ́ ayi ɖó hwɛjijɔ e wu Jehovah yì gbè bɔ é kú gbɔn mɔ̌ é jí à? * Jezu tuùn ɖɔ kú enɛ e emi kú gbɔn mɔ̌ ɖò yatín jí é na nyí afɔklɛ́nnú nú mɛ gegě. (1 Kɔ. 1:23) Enyi ahwanvu tɔn lɛ sɔ́ ayi ɖó hwɛjijɔ taji e wu é kú é jí ɔ, ye na mɔ nukúnnú jɛ tinmɛ e é ɖó é wu. (Ga. 3:13, 14) Mɔ̌ mɛ ɔ, ye na tuùn ɖɔ Mɛhwlɛngántɔ́ ɖé wɛ n’i, é nyí dakaxotɔ́ ɖé ǎ.

É na bo nyí nǔ ɖebǔ wu wɛ zɔ́n bɔ Jezu ɖɔ xó enɛ lɛ ɔ, é tuùn ɖɔ jlǒ Jehovah tɔn wà wɛ emi ɖè. Ee Jezu ɖè xó sín ɖɛhan enɛ mɛ, b’ɛ na nɔ zaan é ɔ, é ɖɔ: “Nǔ bǐ fó!” (Jaan 19:30; Luk. 22:37) Nǔgbo ɔ, alɔ e Jehovah ma sɔ́ cyɔn Jezu jí ǎ nú táan ɖé é zɔ́n bɔ é wà nǔ e wu é wá ayikúngban jí é bǐ mlɛ́mlɛ́. É bló bɔ nǔ e è wlán dó wǔ tɔn ‘ɖò Mɔyizi sín sɛ́n ɔ mɛ, bo wlán dó wǔ tɔn ɖò gbeyiɖɔ Mawu tɔn lɛ sín wema mɛ, bo lɛ́ wlán dó wǔ tɔn ɖò Ðɛhanwema lɛ mɛ ɔ’ bǐ jɛnu.—Luk. 24:44.