1-2. Etɛ ka nyí gbɛxixɔ ɔ? Aniwu mǐ ka ɖó hudo tɔn?

EE ADAMU e nyí gbɛtɔ́ maɖóblɔ̌ é hu hwɛ gudo é ɔ, é hɛn ali e hun nú é kpo kúnkan tɔn kpo bɔ ye na nɔ gbɛ̀ kaka sɔyi é bú. Nǔ e Adamu wà nyi dò é ɖó sɔ́kɛ ǎ. Éɖesunɔ wɛ jló bo hu hwɛ. Bɔ vǐ tɔn lɛ ka ló? Ye ɖó alɔ ɖebǔ ɖò nǔ e Adamu wà nyi dò é mɛ ǎ. (Hlɔ. 5:12, 14) È ka sixu wà nǔɖe dó hwlɛn ye sín kú e tɔ́gbó yetɔn jɛxa bǐ mlɛ́mlɛ́ é sí à? Ɛɛn! Ee Adamu hu hwɛ gudo b’ɛ na nɔ zaan é ɔ, Jehovah ɖè lee é na hwlɛn gbɛtɔ́ livi mɔ̌kpan e nyí kúnkan Adamu tɔn, bo ɖu hwɛhuhu kpo kú kpo sín gǔ gbɔn é xlɛ́ kpɛɖé kpɛɖé. (Bǐb. 3:15, nwt) Hwenu e Jehovah ɖó dó é sù é ɔ, é sɛ́ Vǐ tɔn dó sín jixwé b’ɛ “sɔ́ gbɛ̀ [tɔn] jó dó xɔ gbɛ̀ nú mɛ gegě.”—Mak. 10:45; Jaan 6:51.

² Etɛ ka nyí gbɛxixɔ ɔ? Ðò Akpáxwé Biblu Tɔn E È Wlán Dó Glɛkigbe Mɛ É mɛ ɔ, gbɛxixɔ ɔ nɔ dó gesí axɔ́ e Jezu sú, bo dó vɔ́ nǔ e Adamu hɛn bú é xɔ é. (1 Kɔ. 15:22) Etɛwu mǐ ka ɖó hudo gbɛxixɔ ɔ tɔn? Ðó nǔgbododó jlɔ́jlɔ́ Jehovah tɔn e tɔ́n ɖò Sɛ́n ɔ mɛ é ɖɔ ɖɔ gbɛ̀ wɛ na sú gbɛ̀ xɔ́. (Tín. 21:23, 24) Adamu hɛn gbɛ̀ maɖóblɔ̌ e é ɖó é bú. Jezu zé gbɛ̀ maɖóblɔ̌ tɔn jó, bo na dó wà nǔ sɔgbe xá hwɛjijɔ Mawu tɔn. (Hlɔ. 5:17) Enɛ wu ɔ, é huzu “Tɔ́ Tɛgbɛ tɔn” nú mɛ ɖěɖee ɖi nǔ nú gbɛxixɔ ɔ lɛ é bǐ.—Eza. 9:5; Hlɔ. 3:23, 24.

3. Sɔgbe xá Jaan 14:31 kpo 15:13 kpo ɔ, etɛwu Jezu ka sɔ́ jlǒ dó sɔ́ gbɛ̀ maɖóblɔ̌ tɔn dó savɔ̌?

³ Jezu sɔ́ gbɛ̀ tɔn dó savɔ̌ kpo jlǒ kpo ɖó wǎn ɖaxó e é yí nú Tɔ́ tɔn jixwé tɔn ɔ kpo mǐ kpo é wu. (Xà Jaan 14:31; 15:13.) Wanyiyi enɛ sísɛ́ ɛ, b’ɛ kánɖeji bá nɔ gbeji kaka jɛ kú, lobo wà jlǒ Tɔ́ tɔn tɔn yì fó. Mɔ̌ e é wà é zɔ́n bɔ linlin e Jehovah ɖó nú gbɛtɔ́ lɛ kpo ayikúngban ɔ kpo ɖò bǐbɛ̌mɛ é na jɛnu bǐ mlɛ́mlɛ́. Ðò xóta elɔ mɛ ɔ, mǐ na gbéjé nǔ e wu  Mawu lɔn bɔ Jezu sè wuvɛ̌ sɔmɔ̌, hwɛ̌ cobo kú é kpɔ́n. Mǐ na lɛ́ gbéjé kpɔ́ndéwú Biblu-wlantɔ́ e gbɛxixɔ ɔ sù nukún tɔn mɛ tawun é ɖé tɔn kpɔ́n klewun. Gudo mɛ ɔ, mǐ na ɖɔ xó dó lee mǐ sixu xlɛ́ ɖɔ gbɛxixɔ ɔ sù nukún mǐtɔn mɛ gbɔn é, kpo lee mǐ sixu bló bɔ gbɛ̀ e Jehovah kpo Jezu kpo xɔ nú mǐ é na sù nukún mǐtɔn mɛ d’eji gbɔn é kpo wu.

4. Tinmɛ lee Jezu kú gbɔn é.

⁴ Dǒ nukún lee nǔ lɛ yì gbɔn ɖò azǎn e gbè è hu Jezu é mɛ kpɔ́n. É hɛn ɔ, é na ko ɖɔ bɔ wɛnsagun wɔbuwɔbu lɛ na cyɔn alɔ jǐ tɔn có, é ka jó éɖée dó bɔ sɔja Hlɔma tɔn lɛ xò è dó adaka mɛ. (Mat. 26:52-54; Jaan 18:3; 19:1) Ye zán lanbá e nɔ lán wǔ nú mɛ é dó xò è. Enɛ gudo ɔ, nɛgbé tɔn e lán bǐ é wɛ è lɛ́ ɖɔ é ni sɔ́ kpò kpinkpɛn ɖé dó. Jezu dɔn kpò ɔ ɖidó fí e na hu i ɖè wɛ è ɖè é, bɔ zaanɖé kpowun ɔ, hlɔnhlɔn hwedó è; mɛɖé ɖò dindín wɛ, bɔ è zɔ́n ɛ ɖɔ é ni yí hɛn yì n’i. (Mat. 27:32) Ee Jezu wá fí e na kú ɖè wɛ é ɖè é ɔ, sɔja lɛ xwè hunjɛ́n dó alɔ tɔn lɛ kpo afɔ tɔn lɛ kpo mɛ dó atín ɔ wu. Zin Jezu tɔn zɔ́n bɔ fí e è xwè hunjɛ́n ɔ dó n’i lɛ é jɛ vúnvún jí. Xɔ́ntɔn tɔn lɛ ɖò aluwɛ mɛ, nɔ tɔn ɖò avǐ ya wɛ, amɔ̌, gǎn Jwifu lɛ tɔn lɛ ɖò kiko è wɛ. (Luk. 23:32-38; Jaan 19:25) Jezu sè wuvɛ̌ nú ganxixo gegě. Lee é ɖè ɖò atín ɔ wu é zɔ́n bɔ ayi tɔn kpo hǔn tɔn kpo ɖó na w’azɔ̌ syɛnsyɛn, bɔ é sín mɔ̌ wu bɔ gbigbɔjɛ nɔ vɛwǔ n’i. Ee gbɔjɛ tɔn kpò ɖokpo ɖokpo é ɔ, é xò ɖuɖeji sín ɖɛ gudogudo tɔn ɖé sɛ́dó Jehovah. Enɛ gudo ɔ, é dó kɔ dò, bo bɔnu. (Mak. 15:37; Luk. 23:46; Jaan 10:17, 18; 19:30) É ɖò wɛn ɖɔ é sè wuvɛ̌ tawun cobo kú, bɔ kú enɛ lɛ́ nyí winnya kú.

5. Nú Jezu ɔ, etɛ ka nyla hugǎn lee è hu i gbɔn é?

⁵ Nú Jezu ɔ, lee è hu i gbɔn é wɛ nyí wuvɛ̌ e é sè b’ɛ nyla hugǎn ɖò mɛtɛnkpɔn tɔn hwenu é ǎ. Nǔ e gbà ayi tɔn dó hugǎn é wɛ nyí nǔ e jí ye zɔ́n dó dó hu i é. È dóhwɛ agɔ ɛ ɖɔ é nyí nunyladómawuwutɔ́; enɛ wɛ nyí ɖɔ é kún nɔ ɖó sísí nú Mawu alǒ nyikɔ Mawu tɔn ó. (Mat. 26:64-66) Linlin enɛ gbà ayi dó nú Jezu kaka bɔ é jló ɖɔ Tɔ́ emitɔn ni sɛ̀ mɛɖekpo enɛ dó zɔ nú emi. (Mat. 26:38, 39, 42) Etɛwu Jehovah ka lɔn bɔ Vǐ vívɛ́ná tɔn sè wuvɛ̌ bo kú? Mi nú mǐ ni gbéjé hwɛjijɔ atɔn kpɔ́n.

6. Etɛwu é ka byɔ ɖɔ è ni xwè Jezu dó yatín ɖé jí?

⁶ Nukɔntɔn ɔ, è ɖó na xwè Jezu dó atín ɖé wu, bo na dó xɔ Jwifu lɛ sín nudómɛ ɖé sí. (Ga. 3:10,13) Ye yí gbè ɖɔ emi na setónú nú Sɛ́n Mawu tɔn, amɔ̌, ye sɔ́ bló ɖ’eji ǎ. Enɛ wu ɔ, ɖó Adamu ví lɛ wɛ ye nyí wutu ɔ, ye jɛxa kú, amɔ̌, nudómɛ enɛ lɛ́ wá xú jí. (Hlɔ. 5:12) Sɛ́n e Mawu dó nú Izlayɛli é ɖɔ ɖɔ enyi mɛɖé hu hwɛ e jɛxa kú é ɖé ɔ, è ɖó na hu i. Enɛ gudo ɔ, è sixu sɔ́ cyɔ tɔn kplá dó atín ɖé wu. * (Sɛ́n. 21:22, 23; 27:26) Enɛ wu ɔ, gbɔn xwè e è xwè Jezu dó yatín wu é gblamɛ ɔ, é hun ali nú akɔta Jwifu lɛ tɔn e gbɛ́ ɛ é, bonu ye na ɖu lè vɔsisa tɔn tɔn.

7. Ðɔ hwɛjijɔ wegɔ́ e wu Mawu lɔn bɔ Vǐ tɔn sè wuvɛ̌ é.

⁷ Mǐ ni kpɔ́n hwɛjijɔ wegɔ́ e wu Mawu yí gbè bɔ Vǐ tɔn mɔ wuvɛ̌ é. Nǔ sɔ́ nú vǐ tɔn wɛ é ɖè mɔ̌ nú Vɔsanúxwlémawutɔ́ Ðaxó sín azɔ̌ e é na wá wà ɖò nukɔnmɛ é. Jezu mɔ lee è ni ɖò mɛtɛnkpɔn syɛnsyɛn lɛ glɔ́ cobo ka setónú nú Mawu vɛwǔ sɔ é. Wuvɛ̌ tɔn syɛn sɔmɔ̌ bɔ é xoɖɛ, bo byɔ alɔdó  “kpodo xósúsú kpo, kpodo ɖasin kpo.” Ðó Jezu ko mɔ wuvɛ̌ kpɔ́n ɖò lee nǔ nɔ cí nú mɛ é linu wutu ɔ, é nɔ mɔ nukúnnú jɛ hudo mǐtɔn lɛ mɛ, bo “hɛn ɔ, é na dó alɔ [mǐ]” hwenu e mǐ ɖò “tɛnkpɔn lɛ” mɛ é. É sù nukún mǐtɔn mɛ tawun ɖɔ Jehovah sɔ́ Vɔsanúxwlémawutɔ́ Ðaxó nǔblawukúnúmɛtɔ́ ee sixu “jiya xá mǐ ɖò gǎnmaɖó mǐtɔn lɛ mɛ” é ɖó mǐ nu!—Ebl. 2:17, 18; 4:14-16; 5:7-10.

8. Ðɔ hwɛjijɔ atɔngɔ́ e wu Jehovah lɔn bɔ è tɛ́n Jezu kpɔ́n sɔmɔ̌ é.

⁸ Atɔngɔ́ ɔ, Jehovah lɔn bɔ Jezu sè wuvɛ̌ syɛnsyɛn bo na dó na xósin nú nǔkanbyɔ taji elɔ: Gbɛtɔ́ lɛ ka sixu nɔ gbeji nú Mawu, é na bo tlɛ nyí hwenu e ye ɖò wuvɛ̌ syɛnsyɛn sè wɛ é à? Satáan ɖɔ nǔ kún sixu nyí mɔ̌ ó! É ɖɔ ɖɔ cejɛnnabi wu wɛ gbɛtɔ́ lɛ nɔ sɛn Mawu. É nɔ lɛ́ ɖi ɖɔ tɔ́gbó yetɔn Adamu ɖɔhun ɔ, ye kún yí wǎn nú Jehovah ó. (Jɔb. 1:9-11; 2:4, 5) Ðó Jehovah ɖeji dó gbejininɔ Jezu tɔn wu wutu ɔ, é yí gbè bɔ è tɛ́n Vǐ tɔn kpɔ́n kaka jɛ bǎ gudo tɔn e mɛ gbɛtɔ́ sixu dɛ yì ɖó é. Jezu nɔ gbeji, bo xlɛ́ ɖɔ Satáan nyí adingbannɔ.

9. Kpɔ́ndéwú tɛ mɛsɛ́dó Jaan ka zé ɖ’ayǐ nú mǐ?

⁹ Nǔkplɔnmɛ e kúnkplá gbɛxixɔ ɔ é ko hɛn nǔɖiɖi Klisanwun gegě tɔn lidǒ. Gbeklánxámɛ lɛ nɔ ɖò finɛ có, ye nɔ ɖò Mawuxó ɖɔ wɛ, bo nɔ lɛ́ dɛ ɖò mɛtɛnkpɔn alɔkpa lɛ bǐ nu ɖò gbɛzán yetɔn mɛ. Mǐ ni kpɔ́n kpɔ́ndéwú mɛsɛ́dó Jaan tɔn. Xwè 60 jɛji wɛ é sixu ko jlá nǔgbo e kúnkplá Klisu kpo gbɛxixɔ ɔ kpo é na kpo gbejininɔ kpo. Ðibla yì xwè 100 ɖó wɛ é ɖè có, acɛkpikpa Hlɔma tɔn mɔ ɖɔ é nyí dakaxotɔ́ bo sú i dó gankpá mɛ ɖò tɔtɛntinto Patimɔsi tɔn mɛ. Etɛ é ka wà nyi dò? É “jlá Mawuxó ɔ, bo ɖekúnnu nú Jezu.” (Nǔɖe. 1:9) Kpɔ́ndéwú nǔɖiɖi kpo didɛ kpo tɔn nukúnɖeji tɛ ɖíe!

10. Nɛ̌ nǔ e Jaan wlán lɛ é ka xlɛ́ ɖɔ gbɛxixɔ ɔ sù nukún tɔn mɛ gbɔn?

¹⁰ Ðò wema e Mawu sɔ́ d’ayi mɛ nú mɛsɛ́dó Jaan b’ɛ wlán é mɛ ɔ, é ɖè lě dò é yí wǎn nú Jezu bɔ gbɛxixɔ ɔ lɛ́ sù nukún tɔn mɛ sɔ é xlɛ́. Azɔn 100 jɛji wɛ é ɖɔ xó dó gbɛxixɔ ɔ, alǒ nǔ ɖagbeɖagbe e sín ali gbɛxixɔ ɔ hun lɛ é jí. Ði kpɔ́ndéwú ɔ, Jaan wlán ɖɔ: “Enyi mɛɖé ka hu hwɛ ɔ, mǐ ɖó ɖɛ̌mɛnu ɖokpo ɖò Tɔ́ ɔ gɔ́n; é wɛ nyí Jezu Klisu hwɛjijɔnɔ ɔ.” (1 Jaan 2:1, 2) Nǔ ɖěɖee Jaan wlán lɛ é lɛ́ tɛɖɛ̌ jí ɖɔ ‘kúnnuɖiɖe dó Jezu wu’ ɖò taji. (Nǔɖe. 19:10) É ɖò wɛn ɖɔ gbɛxixɔ ɔ sù nukún Jaan tɔn mɛ tawun. Nɛ̌ mǐ ka sixu ɖexlɛ́ ɖɔ nǔ nɔ cí mɔ̌ nú mǐ lɔ gbɔn?

11. Etɛ ka sixu d’alɔ mǐ bɔ mǐ na gbí dɔn ɖò mɛtɛnkpɔn lɛ nukɔn?

¹¹ Gbǐ dɔn ɖò mɛtɛnkpɔn e na dɔn we dó hwɛhuhu mɛ lɛ é nukɔn. Enyi gbɛxixɔ ɔ sù nukún mǐtɔn mɛ nǔgbo nǔgbo ɔ, mǐ na nyi alɔ nú linlin lěhun: ‘Enyi mɛtɛnkpɔn ɖé kpannukɔn mì ɔ, é byɔ ɖɔ má dó gǎn bo nyi alɔ nú hwɛhuhu ǎ. Un sixu wà nǔ nyanya ɖé bɔ enɛ gudo ɔ, un na byɔ hwɛsɔ́kɛ.’ É nyɔ́ wà ɔ, enyi é wá byɔ ɖɔ mǐ ni wà nǔ nyanya ɔ, mǐ na ɖɔ: ‘Eǒ! Kpo nǔ e Jehovah kpo Jezu kpo wà nú mì lɛ é bǐ kpo ɔ, nɛ̌ un ka sixu wà nǔ mɔ̌hun gbɔn?’ Kpo enɛ kpo ɔ, mǐ sixu byɔ Jehovah ɖɔ é ni na mǐ hlɔnhlɔn, bo savo n’i ɖɔ: ‘Ma lɔn nú ma jɛ tɛnkpɔn mɛ ó.’—Mat. 6:13.

12. Nɛ̌ mǐ ka sixu zán wěɖexámɛ e ɖò 1 Jaan 3:16-18 mɛ é gbɔn?

¹² Yǐ wǎn nú nɔví sunnu kpo nɔví nyɔnu kpo towe lɛ. Enyi mǐ nɔ ɖè wanyiyi mɔ̌hun  xlɛ́ ɔ, mǐ nɔ lɛ́ xlɛ́ ɖɔ gbɛxixɔ ɔ sù nukún mǐtɔn mɛ. Etɛwu? Ðó mǐ kɛɖɛ sín takúnmɛ wɛ Jezu zé gbɛ̀ tɔn jó dó ǎ, loɔ, é lɛ́ zé jó dó nɔví mǐtɔn lɛ takúnmɛ. Enyi Jezu ɖò gbesisɔmɛ bo sɔ́ gbɛ̀ tɔn jó dó ta yetɔn mɛ ɔ, é ɖò wɛn ɖɔ ye xɔ akwɛ tawun ɖò nukún tɔn mɛ. (Xà 1 Jaan 3:16-18.) Mǐ nɔ ɖè wǎn e mǐ yí nú nɔví mǐtɔn lɛ é xlɛ́ gbɔn lee mǐ nɔ wà nǔ xá ye gbɔn é gblamɛ. (Efɛ. 4:29, 31-5:2) Ði kpɔ́ndéwú ɔ, enyi ye ɖò azɔn jɛ wɛ, alǒ ɖò xwi ɖí xá wuvɛ̌ syɛnsyɛn lɛ wɛ, ɖi adla lɛ mɔ̌ ɔ, mǐ nɔ d’alɔ ye. Amɔ̌, enyi nǔɖitɔ́ hatɔ́ ɖé wà, alǒ ɖɔ nǔɖe b’ɛ dó xomɛsin nú mǐ ɔ, etɛ mǐ ka ɖó na wà?

13. Etɛwu mǐ ka ɖó na nɔ sɔ́ hwɛ kɛ mɛ?

¹³ A nɔ mɔ ɖɔ é nɔ vɛwǔ nú emi hweɖelɛnu, bonu emi na sɔ́ hwɛ kɛ nɔví sunnu, alǒ nɔví nyɔnu ɖé wɛ à? (Lev. 19:18) Enyi mɔ̌ hǔn, xwedó wěɖexámɛ elɔ: “Mi nɔ mɔ miɖée gbɔ; enyi mɛɖé wà nǔ nyi dò nú mɛɖé ɖò mi mɛ hweɖebǔnu hǔn, mi nɔ sɔ́ kɛ miɖée. Mi ɖó na nɔ sɔ́ hwɛ kɛ miɖée lee Aklunɔ sɔ́ kɛ mi é ɖɔhun.” (Kolo. 3:13) Hweɖebǔnu e mǐ sɔ́ hwɛ kɛ nɔví mǐtɔn lɛ é ɔ, mǐ nɔ xlɛ́ Tɔ́ mǐtɔn jixwé tɔn ɔ ɖɔ gbɛxixɔ ɔ sù nukún mǐtɔn mɛ nǔgbo nǔgbo. Nɛ̌ mǐ ka sixu bló gbɔn bɔ nǔnina Mawu tɔn enɛ na kpò ɖò nukún mǐtɔn mɛ sù wɛ?

14. Ðɔ ali e nu mǐ sixu bló bɔ gbɛxixɔ ɔ na sù nukún mǐtɔn mɛ ɖè é ɖokpo.

¹⁴ Nɔ dókú nú Jehovah ɖó gbɛxixɔ ɔ wu. Nɔví nyɔnu ɖé nɔ nyí Joanna bo nɔ nɔ Inde, bo ɖó xwè 83; é ɖɔ: “Un mɔ ɖɔ é ɖò taji ɖɔ má nɔ ɖɔ xó dó gbɛxixɔ ɔ wu gbè bǐ gbè ɖò ɖɛ ce lɛ mɛ, bo lɛ́ dókú nú Jehovah ɖó enɛ wu.” Gbè bǐ gbè ɔ, enyi hwiɖokpo ɖò ɖɛ xò wɛ hǔn, nɔ ɖɔ nǔ e a wà nyi dò lɛ é nú Jehovah, bo lɛ́ byɔ ɛ hwɛsɔ́kɛ. Nǔgbo ɔ, enyi hwɛ syɛnsyɛn ɖé wɛ a hu ɔ, a ɖó na lɛ́ yì byɔ alɔdó mɛxo agun tɔn lɛ tɔn. Ye na ɖótó we, bo na ɖè wě xá we kpo wanyiyi kpo sín Mawuxówema ɔ mɛ. Ye na xoɖɛ ɖó kpɔ́ xá we, bo na byɔ Jehovah ɖɔ é ni sɔ́ hwɛ kɛ we, “bonu azɔn [ee jɛ wɛ a ɖè ɖò gbigbɔ lixo é] na gbɔ.”—Ja. 5:14-16.

15. Etɛwu mǐ ka ɖó na nɔ ba hwenu bo na nɔ xà nǔ dó gbɛxixɔ ɔ wu, lobo lɛ́ lin tamɛ d’eji?

¹⁵ Nɔ lin tamɛ dó gbɛxixɔ ɔ jí. Nɔví nyɔnu e nɔ nyí Rajamani bo ɖó xwè 73 é ɖɔ: “Enyi un ɖò nǔ xà dó wuvɛ̌ e Jezu mɔ lɛ é wu wɛ ɔ, nukún ce lɛ nɔ ja ɖasin.” Enyi  hwi lɔ lin tamɛ dó lě dò Vǐ Mawu tɔn sè wuvɛ̌ sɔ é jí ɔ, é sixu byɔ lanmɛ nú we tawun. Amɔ̌, lě dò a lin tamɛ dó vɔ̌ e Jezu sá é jí sɔ é ɔ, mɔ̌ dò wɛ wǎn e a yí nú é kpo Tɔ́ tɔn kpo é na jɛji sɔ. Bo na dó d’alɔ we bonu a na nɔ lin tamɛ dó gbɛxixɔ ɔ jí ɔ, a sixu bló tuto nǔkplɔnkplɔn bǔnɔ ɖé tɔn dó xóta mɔ̌hun jí.

16. Nɛ̌ nǔ kplɔnkplɔn mɛ ɖevo lɛ dó gbɛxixɔ ɔ wu ka sixu hɛn lè wá nú mǐ gbɔn? (Kpɔ́n ɖiɖe e ɖò akpa ɔ jí é.)

¹⁶ Nɔ kplɔ́n nǔ mɛ ɖevo lɛ dó gbɛxixɔ ɔ wu. Hweɖebǔnu e mǐ ɖɔ xó nú mɛ ɖevo lɛ dó gbɛxixɔ ɔ wu é ɔ, lee é sù nukún mǐtɔn mɛ gbɔn é na lɛ́ jɛji. Mǐ ɖó azɔ̌wanú tewungbeju ɖé lɛ bo nɔ zán dó kplɔ́n nǔ mɛ ɖevo lɛ dó nǔ e wu Jezu kú dó ta mǐtɔn mɛ é wu. Ði kpɔ́ndéwú ɔ, mǐ sixu zán nǔkplɔnkplɔn 4gɔ́ alɔnuwema Wɛnɖagbe ɖé Sín Mawu Gɔ́n! tɔn. Xóta nǔkplɔnkplɔn enɛ tɔn wɛ nyí “Mɛ̌ ka Nyí Jezu Klisu?” Alǒ, mǐ sixu zán wemata 5gɔ́ wema Etɛ Biblu ka Sixu Kplɔ́n Mǐ? tɔn. Xóta wemata enɛ tɔn wɛ nyí “Gbɛxixɔ ɔ: Nǔnina Mawu Tɔn E Xɔ Akwɛ Hugǎn É.” Xwewu xwewu ɔ, mǐ nɔ ɖè lee gbɛxixɔ ɔ sù nukún mǐtɔn mɛ gbɔn é xlɛ́ gbɔn Flǐn kú Jezu tɔn tɔn domɛ yiyi, kpo mɛ ɖevo lɛ yiylɔ́ wá dò tɔn mɛ kpo gblamɛ. Wǔ tɛ ɖíe Jehovah ka jɔ mǐ bɔ mǐ na kplɔ́n nǔ mɛ ɖevo lɛ dó Vǐ tɔn wu è!

17. Etɛwu gbɛxixɔ ɔ ka nyí nǔnina ɖaxó hugǎn e Mawu na gbɛtɔ́ lɛ é?

¹⁷ É ɖò wɛn ɖɔ, mǐ ɖó hwɛjijɔ ɖaaɖagbe e wu gbɛxixɔ ɔ na sù nukún mǐtɔn mɛ d’eji, bo na lɛ́ fɔ́n bo kpò ɖò nukún mǐtɔn mɛ sù d’eji wɛ lɛ é. Ðó gbɛxixɔ ɔ wu ɔ, mǐ nyí hwɛhutɔ́ có, mǐ ka hɛn ɔ, mǐ na zun xɔ́ntɔn vívɛ́ xá Jehovah. Ðó gbɛxixɔ ɔ wu ɔ, è na sú Awoví sín nǔwiwa lɛ bǐ sín kún dó. (1 Jaan 3:8) Ðó gbɛxixɔ ɔ wu ɔ, linlin e Jehovah ɖó nú ayikúngban ɔ sín dò é na jɛnu mlɛ́mlɛ́. Ayikúngban ɔ bǐ na huzu palaɖisi. Mɛ e mǐ na nɔ mɔ hwe ɔ nu lɛ é bǐ wɛ na yí wǎn nú Jehovah bo na nɔ sɛn ɛ. Enɛ wu ɔ, gbè bǐ gbè ɔ, mi nú mǐ ni nɔ ba ali e nu mǐ na ɖexlɛ́ ɖɔ gbɛxixɔ ɔ, ee nyí nǔnina ɖaxó hugǎn e Mawu na gbɛtɔ́ lɛ é sù nukún mǐtɔn mɛ ɖè é!