1. Tínmɛ nǔ e jɛ hwenu e Jezu bló nǔjíwǔ tɔn nukɔntɔn ɔ é.

 DǑ NUKÚN nǔ e jɛ ɖo vivɔnu xwe 29 H.M. tɔn, ɖo sinsɛnzɔ́ Jezu tɔn sín bǐbɛ́mɛ é mɛ kpɔ́n. È ylɔ́ Jezu, nɔ tɔn Mali, gɔ́ nú ahwanvú tɔn ɖé lɛ́ wá alɔwlíwlí sín agɔ̌ ɖé domɛ ɖo Kana; gletoxo ɖé wɛ bo ɖo totaligbé nú Nazalɛ́ti, toxo e mɛ è ji Jezu ɖe é. Mɛ e ylɔ́ alɔwlíwlígɔ́ ɔ lɛ́ é sín xɔ́ntɔn lɛ́ ɖokpó wɛ nú Mali, bɔ é cí ɖɔ é ɖo alɔ dó yě wɛ bónú yě ná yí jǒnɔ lɛ́ ɖɔhun. Amɔ̌, ɖo agɔ̌ ɔ hwenu ɔ, nǔɖé jɛ bo sixú zɔ́n bɔ xwédo ɔ, gɔ́ nú asú kpó asi kpó yɔ̌yɔ́ ɔ ná flú tawun; vɛ̌ɛn yětɔn vɔ. b Vlafo mɛ nabí e wá agɔ̌ ɔ tɛnmɛ é sukpɔ́ hú mɛ nabí e yě ɖó nukún é. Mali yá wǔ yi vǐ tɔn gɔ́n bo ɖɔ n’i ɖɔ: “Yě sɔ́ ɖó vɛ̌ɛn ɖě ǎ.” (Jaan 2:1-3) Étɛ́ Jezu ka wa? É bló nǔjíwǔ ɖé; é sɔ́ sin dó húzú “vɛ̌ɛn ɖagbe” ná.—Jaan 2:9, 10.

2-3. (a) Nǔjíwǔ tɛ́ lɛ́ mɔ̌ Jezu ka bló? (b) Le tɛ́ nǔjíwǔ Jezu tɔn lɛ́ gbígbéjé kpɔ́n ka sixú hɛn wá nú mǐ?

² Jezu lɛ́ bló nǔjíwǔ gěgé ɖěvo lɛ́ ɖo sinsɛnzɔ́ tɔn hwenu. c Jezu zán hlɔ̌nhlɔ́n e é nɔ dó bló nǔjíwǔ lɛ́ ná é dó d’alɔ gbɛtɔ́ afatɔ́n donu mɔ̌kpán. Ði kpɔ́ndéwú ɔ, ɖo nǔjíwǔ e Jezu bló lɛ́ é we kpowun, énɛ́ wɛ nyí nǔjíwǔ e é bló bo ná nǔɖuɖu súnnu 5000 é, gɔ́ nú nǔjíwǔ e é wá bló bo ná nǔɖuɖu súnnu 4000 é hwenu ɔ, gbɛtɔ́ 27000 jɛjí wɛ ɖu nǔ, ényí è xa nyɔ̌nu kpó vǐ kpó e ɖo nǔjíwǔ lɛ́ ɖokpó ɖokpó domɛ é d’é mɛ ɔ nɛ́. (Mat. 14:15- 21; 15:32-38) Ðo nǔjíwǔ we énɛ́ lɛ́ bǐ hwenu ɔ, Jezu lɛ́ gbɔ azɔn nú mɛ gěgé. (Mat. 14:14; 15:30, 31) Dǒ nukún lěe é ná ko kpácá ahwan ɔ sɔ ɖɔ Jezu bló nǔjíwǔ bo gbɔ azɔn nú yě, bo lɛ́ ná nǔɖuɖu yě é mɛ kpɔ́n.

³ Nǔjíwǔ e Jezu bló lɛ́ é sixú kplɔ́n nǔ gěgé mǐ ɖo égbé. Ðo xóta élɔ́ mɛ ɔ, mǐ ná ɖɔ xó dó nǔ ɖěɖěe hɛn nǔɖiɖi mɛtɔn lí dǒ, bɔ nǔjíwǔ énɛ́ lɛ́ sixú kplɔ́n mǐ é ɖé lɛ́ wú. Mǐ ná lɛ́ ɖɔ xó dó lěe mǐ sixú nɔ sɔ́ mǐɖée hwe, bo nɔ lɛ́ se wǔvɛ́ xá mɛ, lěe Jezu bló gbɔn ɖo nǔjíwǔ tɔn lɛ́ hwenu é gbɔn é wú.

4. Mɛ̌ mɛ̌ e wú nǔjíwǔ ɖěɖěe Jezu bló bɔ é hɛn nǔɖiɖi mɛtɔn lí dǒ lɛ́ é ka kplɔ́n nǔ mǐ dó?

⁴ Nǔjíwǔ e Jezu bló lɛ́ é kplɔ́n nǔ e sixú ná hlɔ̌nhlɔ́n nǔɖiɖi mǐtɔn é gěgé mǐ, dó é kpó Tɔ́ tɔn kpó wú. È ná ɖɔ ɔ, Jexóva wɛ nyí Jɔtɛn nǔjíwǔ énɛ́ lɛ́ tɔn. Mɛsɛ́dó 10:38 ɖɔ nú mǐ ɖɔ: “Mawu sɔ́ [Jezu] gbɔn gbigbɔ mímɛ́ gblamɛ, bo ná ɛ hlɔ̌nhlɔ́n. Mɔ̌ mɛ ɔ, é nɔ ɖo yiyi wɛ, bo nɔ ɖo nǔ ɖagbe lɛ́ wa wɛ, lobo nɔ ɖo azɔn gbɔ nú mɛ ɖěɖěe gbídí kɔ ná wɛ Awǒvi ɖe lɛ́ é bǐ wɛ, ɖó Mawu ɖo kpɔ́ xá ɛ.” Lɛ̌ flín ɖɔ ɖo nǔ e Jezu nɔ ɖɔ lɛ́ é kpó nǔ e é nɔ wa lɛ́ é kpó bǐ mɛ, káká jɛ nǔjíwǔ ɖěɖěe é bló lɛ́ é jí ɔ, linlin e Tɔ́ tɔn nɔ ɖó é wɛ é nɔ ɖe xlɛ́, bo nɔ lɛ́ ɖe lěe nǔ nɔ cí n’i é xlɛ́ bɔ nǔ bǐ nɔ vɔ ɖ’é wú. (Jaan 14:9) Mi nú mǐ ní ɖɔ xó dó nǔ e nǔjíwǔ e Jezu bló lɛ́ é sixú kplɔ́n mǐ lɛ́ é atɔn wú.

5. Étɛ́ ka sísɛ́ Jezu bɔ é bló nǔjíwǔ lɛ́? (Matíe 20:30-34)

⁵ Nukɔntɔn, Jezu kpó Tɔ́ tɔn kpó yí wǎn nú mǐ tawun. Hwenu e Jezu ɖo ayǐkúngban jí é ɔ, é xlɛ́ ɖɔ émí yí wǎn nú gbɛtɔ́ lɛ́ tawun, gbɔn hlɔ̌nhlɔ́n e é nɔ zán dó bló nǔjíwǔ ná é zínzán dó d’alɔ yě gblamɛ. Ðo ninɔmɛ ɖé mɛ ɔ, nukúntɔ́nnɔ we byɔ́ Jezu ɖɔ é ní d’alɔ émí. (Xa Matíe 20:30-34.) Ð’ayi wú ɖɔ “nǔ yětɔn blá wǔ nú Jezu,” bɔ énɛ́ gúdo ɔ, é gbɔ azɔn nú yě. Xógbe Glɛ̌kigbe tɔn e è tínmɛ bɔ é nyí “nǔ yětɔn blá wǔ nú” é nɔ dó gesí wǔvɛ́ syɛ́nsyɛ́n e mɛɖé nɔ se xá mɛ ɖo agbaza mɛ é. Wǔvɛ́ syɛ́nsyɛ́n énɛ́ e Jezu se xá mɛ é ɔ, xlɛ̌ wǎnyíyí tɔn ɖé wɛ, bɔ énɛ́ wɛ lɛ́ sísɛ́ ɛ bɔ é ná nǔɖuɖu mɛ e xovɛ́ sin lɛ́ é, bo lɛ́ gbɔ azɔn nú gudunɔ ɖokpó. (Mat. 15:32; Mak. 1:41) Mǐ sixú kú d’é jí ɖɔ Jexóva, Mawu ‘nǔbláwǔkúnúmɛtɔ́ ɔ’ kpó Vǐ tɔn kpó yí wǎn nú mǐ tawun, bɔ ényí mǐ ɖo wǔvɛ́ se wɛ ɔ, yě lɔmɔ̌ nɔ se wǔvɛ́. (Luk. 1:78; 1 Pi. 5:7) Akpakpa ɖo yě sɔ́ wɛ bónú yě ná ɖe tagba e nɔ wa nǔ dó gbɛtɔ́ lɛ́ wú lɛ́ é bǐ síin.

6. Acɛ tɛ́ Mawu ka ná Jezu?

⁶ Wegɔ́, Mawu ná hlɔ̌nhlɔ́n Jezu bónú é ná ɖe ɖɛ tagba gbɛtɔ́ lɛ́ tɔn lɛ́ bǐ. Gbɔn nǔjíwǔ e Jezu bló lɛ́ é gblamɛ ɔ, é xlɛ́ ɖɔ émí ɖó hlɔ̌nhlɔ́n bo ná ɖe wǔvɛ́ e mǐ ma sixú ɖe síin mǐɖésúnɔ gbeɖé ǎ lɛ́ é bǐ síin. Ði kpɔ́ndéwú ɔ, é ɖó hlɔ̌nhlɔ́n bo ná tún kan nú mǐ sín nǔ e wú tagba mǐtɔn lɛ́ nɔ sín é sí, énɛ́ wɛ nyí hwɛhuhugú e mǐ ɖu é; é ná lɛ́ tún kan nú mǐ sín nǔ e é nɔ ji lɛ́ é sí, káká jɛ azɔn kpó kú kpó jí. (Mat. 9:1-6; Hlɔ̌. 5:12, 18, 19) Nǔjíwǔ e é bló lɛ́ é xlɛ́ ɖɔ é sixú gbɔ azɔn “tɛnmɛ tɛnmɛ bǐ,” bo tlɛ lɛ́ fɔ́n mɛ sín kú. (Mat. 4:23; Jaan 11:43, 44) Gɔ́ ná ɔ, é ɖó acɛ bo sixú ɖó jɔhɔn syɛ́nsyɛ́n lɛ́ te, lobo lɛ́ nya gbigbɔ nyanya lɛ́ sín mɛ lɛ́ jí. (Mak. 4:37-39; Luk. 8:2) Tuun e mǐ tuun ɖɔ Jexóva sɔ́ acɛ énɛ́ d’alɔ mɛ nú Vǐ tɔn é ná gǎnjɛwú mǐ kpɔ́n!

7-8. (a) Gǎnjɛwú tɛ́ nǔjíwǔ Jezu tɔn lɛ́ ka ná mǐ? (b) Nǔjíwǔ tɛ́ ɖó nukún wɛ a ka ɖe tawun ɖo gbɛ yɔ̌yɔ́ ɔ mɛ?

⁷ Atɔngɔ́, mǐ sixú ɖeji bǐ mlɛ́mlɛ́ ɖɔ nyɔ̌ná sɔgúdo tɔn ɖěɖěe Axɔ́súɖuto Mawu tɔn ná hɛn wá lɛ́ é kún ná gblá ó. Nǔjíwǔ ɖěɖěe Jezu bló hwenu e é ɖo ayǐkúngban jí lɛ́ é kplɔ́n mǐ ɖɔ hwenu e é ná wá húzú Axɔ́sú nú Axɔ́súɖuto Mawu tɔn ɖo jǐxwé é ɔ, ayǐkúngban ɔ bǐ jí wɛ é ná bló nǔjíwǔ énɛ́ lɛ́ gbɔn. Ð’ayi nǔ ɖěɖěe sín  vǐví mǐ ná ɖu ɖo malínmálín mɛ, hwenu e Klísu ná kp’acɛ dó ayǐkúngban ɔ jí lɛ́ é wú. Mǐ ná ɖó lanmɛ syɛ́n hunsin ɖagbe, ɖó é ná ɖe azɔn tɛnmɛ tɛnmɛ kpó wɔ̌nzɔn tɛnmɛ tɛnmɛ kpó e nɔ ɖó wǔvɛ́ nú gbɛtɔ́ lɛ́ é bǐ síin. (Eza. 33:24; 35:5, 6; Nǔɖe. 21:3, 4) Xovɛ́ sɔ́ ná sin mǐ gbeɖé ǎ, mǐ ka sɔ́ ná se wǔvɛ́ ɖě ɖó adla lɛ́ wú ǎ. (Eza. 25:6; Mak. 4:41) Kpó awǎjijɛ ɖaxó kpó wɛ mǐ ná dó doo nú mɛ vívɛ́ná mǐtɔn ɖěɖěe ná fɔ́n sín “yɔdo mɛ” lɛ́ é. (Jaan 5:28, 29) Nǔjíwǔ tɛ́ ɖó nukún wɛ a ka ɖe tawun ɖo gbɛ yɔ̌yɔ́ ɔ mɛ?

⁸ Jezu sɔ́ éɖée hwe tawun, bo lɛ́ se wǔvɛ́ xá mɛ titewungbe tɔn hwenu e é ɖo nǔjíwǔ lɛ́ bló wɛ é; mǐ lɔmɔ̌ ɖó ná nɔ wa nǔ éɖɔhun. Mi nú mǐ ní ɖɔ xó dó kpɔ́ndéwú we wú. Mǐ ná bɛ́sín tan e kúnkplá alɔwlíwlígɔ́ Kana tɔn é jí.

9. Aniwú Jezu ka bló nǔjíwǔ ɖé ɖo alɔwlíwlígɔ́ ɔ domɛ? (Jaan 2:6-10)

⁹ Xa Jaan 2:6-10. Ée vɛ̌ɛn vɔ ɖo alɔwlíwlígɔ́ ɔ hwenu é ɔ, dandan wɛ Jezu ka ná wa nǔɖé a? Éǒ. Nǔɖɔɖayǐ ɖě ɖɔ ɖɔ Mɛsíya ɔ ná bló vɛ̌ɛn ɖo nǔjíwǔ linu ǎ. Amɔ̌, ényí ahan vɔ ɖo alɔwlíwlí hwiɖésúnɔ tɔn domɛ ɔ, dǒ nukún lěe nǔ ná cí nú we é mɛ kpɔ́n. É cí ɖɔ Jezu se wǔvɛ́ xá xwédo ɔ, tají ɔ, asú kpó asi kpó yɔ̌yɔ́ ɔ ɖɔhun, bo ba ɖɔ nǔɖé ní ɖó adohu adohu nú yě ǎ. Énɛ́ wú ɔ, lěe mǐ ko ɖɔ gbɔn wá yi é ɔ, é bló nǔjíwǔ ɖé. É zé sin lǐtli 390 mɔ̌ dó húzú vɛ̌ɛn ɖagbe ná. Bóyá, é bló vɛ̌ɛn sukpɔ́ sɔmɔ̌ bónú yě ná lɛ́ zán hweɖévonu, alǒ asú kpó asi kpó yɔ̌yɔ́ ɔ sixú sa bɔ é ná d’alɔ yě ɖo akwɛ́zínzán  linu. É ɖo wɛn ɖɔ, é ná ko su asú kpó asi kpó yɔ̌yɔ́ ɔ nukúnmɛ tawun.

10. Ðɔ gǒflɛ́mɛ tají tan e ɖo Jaan wěmata 2​gɔ́ ɔ mɛ é tɔn ɖé lɛ́. (Lɛ̌ kpɔ́n ɖiɖe ɔ.)

¹⁰ Mi nú mǐ ní ɖɔ xó dó gǒflɛ́mɛ tají tan e ɖo Jaan wěmata 2​gɔ́ ɔ mɛ é tɔn ɖé lɛ́ wú. A ka ɖ’ayi wú ɖɔ Jezu kún bló bónú sin gɔ́ zɛ̌n lɛ́ mɛ ó a? É dɔn ayi mɛ lɛ́ tɔn wá éɖée jí ǎ, é nyɔ́ wa ɔ, é ɖɔ nú mɛsɛntɔ́ lɛ́ bɔ yě dun sin dó zɛ̌n lɛ́ mɛ. (Wěmafɔ 6, 7) Gɔ́ ná ɔ, ée Jezu bló bɔ sin ɔ húzú vɛ̌ɛn gúdo é ɔ, éɖésúnɔ wún vɛ̌ɛn ɔ kpɛɖé bo sɔ́ yi jó nú mɛ e ɖo nukún kpé dó alɔwlíwlígɔ́ ɔ wú wɛ é ǎ. É nyɔ́ wa ɔ, é ɖɔ nú mɛsɛntɔ́ lɛ́ ɖɔ yě ní wún yi jó n’i. (Wěmafɔ 8) É ɖo wɛn ɖɔ, Jezu kún wún vɛ̌ɛn ɔ dó kɔ́fu ɖokpó mɛ, bo yi jɛ jǒnɔ lɛ́ nukɔn bo ɖɔ xó lěhun ɖé dó jlá ajɔ̌ nú éɖée ó: ‘Mi vɛ́ ɖɔ́ vɛ̌ɛn élɔ́ e un bló din tlóló é kpɔ́n nú mì.’

11. Étɛ́ nǔjíwǔ e Jezu bló é ka sixú kplɔ́n mǐ?

¹¹ Étɛ́ nǔjíwǔ e Jezu bló bo sɔ́ sin dó húzú vɛ̌ɛn é ka sixú kplɔ́n mǐ? É kplɔ́n nǔɖé mǐ dó mɛɖéesɔ́hwe wú. Jezu bló nǔjíwǔ énɛ́ dó jlá ajɔ̌ nú éɖée ǎ; nǔgbó ɔ, é jlá ajɔ̌ nú éɖée gbeɖé ɖó nǔ e é wa lɛ́ é ɖě wú ǎ. É nyɔ́ wa ɔ, kpó mɛɖéesɔ́hwe kpó wɛ é nɔ sɔ́ susu ɔ bǐ jó nú Tɔ́ tɔn hwebǐnu. (Jaan 5:19, 30; 8:28) Ényí mǐ nɔ ɖó linlin e ɖo jlɛ̌ jí é dó mǐɖée wú Jezu ɖɔhun ɔ, mǐ ná jlá ajɔ̌ nú mǐɖée ɖó nǔ e mǐ nɔ wa lɛ́ é ɖě wú ǎ. Mǐ ná bo tlɛ wa nǔ ɖěbǔ ɖo sinsɛnzɔ́ Jexóva tɔn mɛ ɔ, mi nú mǐ ní nɔ gó ɖó wǔjɔmɛ e mǐ ɖó bo ɖo Mawu mǐtɔn e ma kpé we ǎ é sɛn wɛ é wú, é ní ma nyí ɖó mǐɖée wú ó. (Jel. 9:23, 24) Mi nú mǐ ní nɔ sɔ́ susu e jɛxá ɛ é n’i. È ná ɖɔ ɔ, nǔ ɖagbe tɛ́ mǐ ka sixú wa alɔdó Jexóva tɔn mɛvo?—1 Kɔ. 1:26-31.

12. Ali ɖěvo tɛ́ nu mǐ ka sixú xwedó kpɔ́ndéwú mɛɖéesɔ́hwe tɔn Jezu tɔn ɖe? Jlɛ̌ dó nǔɖé wú.

¹² Mi nú mǐ ní ɖɔ xó dó ali ɖěvo e nu mǐ sixú xwedó kpɔ́ndéwú mɛɖéesɔ́hwe tɔn Jezu tɔn ɖe é wú. Dǒ nukún nǔ élɔ́ mɛ kpɔ́n: Mɛxó agun tɔn ɖokpó zán hwenu gěgé dó d’alɔ devízɔ́watɔ́ sinsɛnzɔ́wiwa tɔn dɔ̌nkpɛvú ɖé, bɔ é sɔ́ nǔ nú xóɖiɖɔ nú mɛ bǐ tɔn nukɔntɔn ɔ. Wǎgbɔ tɔn ɔ, nɔví súnnu dɔ̌nkpɛvú ɔ xwlé xóɖiɖɔ e dó wǔsyɛ́n lanmɛ nú mɛ é ɖé mɛ, bɔ agun ɔ bǐ ɖu vǐví tɔn. Ðo kplé ɔ gúdo ɔ, mɛɖé yi mɛxó agun tɔn ɔ gɔ́n bo ɖɔ n’i ɖɔ: ‘Nɔví súnnu lě sín xóɖiɖɔ nyɔ́ tawun, kabǐ?’ É ka byɔ́ ɖɔ mɛxó agun tɔn ɔ ní ɖɔ xó lěhun a?: ‘Ɛɛn, hwenu gěgé wɛ é ka ɖu nú mì mɛ.’ Alǒ é ná ɖɔ kpó mɛɖéesɔ́hwe kpó ɖɔ: ‘Ɛɛn, nǔgbó wɛ. Un nɔ gó ɖó wǔ tɔn tawun.’ Ényí mǐ nɔ sɔ́ mǐɖée hwe ɔ, mǐ ná nɔ xɔ susu nú mǐɖée ɖó ɖagbe e mǐ wa nú mɛ ɖěvo lɛ́ é wú ǎ. Tuun e mǐ tuun ɖɔ Jexóva nɔ mɔ nǔ e mǐ nɔ wa lɛ́ é, bɔ yě nɔ lɛ́ xɔ akwɛ́ ɖo nukún tɔn mɛ é ko kpé mǐ. (Sɔ́ jlɛ́ dó Matíe 6:2-4 wú; Ebl. 13:16) É ɖo wɛn ɖɔ, ényí mǐ nɔ sɔ́ mǐɖée hwe Jezu ɖɔhun ɔ, nǔ mǐtɔn nɔ nyɔ́ Jexóva nukúnmɛ.—1 Pi. 5:6.

13. Étɛ́ Jezu ka mɔ hwenu e é ɖo sisɛkpɔ́ toxo Nayínu tɔn wɛ é? Étɛ́ é ka wa? (Luki 7:11-15)

¹³ Xa Luki 7:11-15. Dǒ nukún nǔ élɔ́ e jɛ ɖo xwe 31 H.M. tɔn é mɛ kpɔ́n. Jezu yi Nayínu; toxo Galilée tɔn ɖé wɛ bo ɖo malínmálín dó Cunɛ́mu, fí e gbeyíɖɔ Elizée fɔ́n nǎwe ɖé sín vǐ súnnu ɖe, xwe 900 mɔ̌ ɖíe é. (2 Axɔ́. 4:32-37) Ée Jezu ɖo toxo ɔ sɛkpɔ́ wɛ é ɔ, é mɔ bɔ è sɔ́ cyɔ ɖé sín toxo ɔ mɛ. Nǔ ɔ blá wǔ tawun, vǐɖokpónɔ asúkúsi ɖé tɔn wɛ kú. Amɔ̌, nǎwe e ɖo aluwɛ mɛ ɖó vǐ tɔn kú é wútu é ɖo éɖokpónɔ ǎ; ahwan ɖaxó ɖé gosín toxo ɔ mɛ bo ɖo kpɔ́ xá ɛ. Jezu ɖó mɛ e hɛn cyɔ ɔ lɛ́ é te, bo bló nǔjíwǔ ɖé nú nǎwe e ɖo aluwɛ mɛ é; é fɔ́n vǐ súnnu tɔn sín kú. Ðo mɛ atɔn e Jezu fɔ́n sín kú bɔ è ɖɔ xó yětɔn ɖo Wɛnɖagbewéma lɛ́ mɛ lɛ́ é mɛ ɔ, vǐ énɛ́ wɛ nyí mɛ nukɔntɔn ɔ.

14. Ðɔ gǒflɛ́mɛ tají tan e ɖo Luki wěmata 7​gɔ́ ɔ mɛ é tɔn ɖé lɛ́. (Lɛ̌ kpɔ́n ɖiɖe ɔ.)

 ¹⁴ Mi nú mǐ ní ɖɔ xó dó gǒflɛ́mɛ tají tan e ɖo Luki wěmata 7​gɔ́ ɔ mɛ é tɔn ɖé lɛ́ wú. A ka ɖ’ayi wú ɖɔ ée Jezu “mɔ” vǐnɔ e ɖo aluwɛ mɛ é gúdo é ɔ, “nǔ tɔn blá wǔ n’i” a? (Wěmafɔ 13) Énɛ́ wú ɔ, nǔ e é mɔ é, vlafo mɔ e é mɔ bɔ vǐnɔ ɔ ɖo avǐ ya wɛ hwenu e é ɖo zɔnlin ɖi wɛ ɖo nukɔn nú vǐ tɔn sín cyɔ é blá wǔ n’i, bɔ é se wǔvɛ́ xá ɛ. Vǐnɔ ɔ sín nǔ blá wǔ nú Jezu kpowun ǎ; é lɛ́ se wǔvɛ́ xá ɛ. É ɖo wɛn ɖɔ kpó kɔnugbe e ná gǎnjɛwú mɛ é ɖé kpó wɛ Jezu ɖɔ xó élɔ́ n’i: “Ma sɔ́ ya avǐ ɖě ó.” Énɛ́ gúdo ɔ, é wa nǔɖé dó d’alɔ ɛ. É fɔ́n vǐ ɔ wá gbɛ, bo “kplá ɛ jó nú nɔ tɔn.”—Wěmafɔ 14, 15.

15. Étɛ́ nǔjíwǔ e Jezu bló é ka sixú kplɔ́n mǐ?

¹⁵ Étɛ́ nǔjíwǔ e Jezu bló, bo fɔ́n asúkúsi ɔ sín vǐ súnnu wá gbɛ é ka sixú kplɔ́n mǐ? É kplɔ́n mǐ ɖɔ mǐ ná nɔ se wǔvɛ́ xá mɛ ɖěɖěe ɖo aluwɛ mɛ lɛ́ é. É ɖo wɛn ɖɔ, mǐ kún sixú fɔ́n mɛkúkú lɛ́ Jezu ɖɔhun ó. Amɔ̌, Jezu ɖɔhun ɔ, mǐ sixú nɔ tɛ́n kpɔ́n bo nɔ se wǔvɛ́ xá mɛ ɖěɖěe ɖo aluwɛ mɛ lɛ́ é gbɔn ayi ɖíɖó te ganjí gblamɛ. Mǐ sixú nɔ ɖe afɔ nukɔntɔn ɔ, bo nɔ ɖɔ xó, lobo nɔ lɛ́ wa nǔ ɖěɖěe sixú d’alɔ yě, bo lɛ́ dó gbɔ nú yě lɛ́ é dó ɖe wǔvɛ́sexámɛ mǐtɔn xlɛ́ yě. d (Nǔx. 17:17, nwt; 2 Kɔ. 1:3, 4; 1 Pi. 3:8) Xó kléwún ɖé ɖiɖɔ kpó nǔ kléwún ɖé wiwa kpó sixú dó wǔsyɛ́n lanmɛ nú yě, bo lɛ́ dó gbɔ nú yě tawun.

16. Lěe ɖiɖe e mɛ è vɔ́ nǔ e jɛ lɛ́ é bló ɖe é ɖo xlɛ́xlɛ́ wɛ gbɔn é ɔ, étɛ́ nǔ e jɛ dó vǐnɔ e vǐ tɔn kú é wú é ka kplɔ́n we?

¹⁶ Ðǒ ayi nǔ élɔ́ e jɛ é wú. È ɖo han ji wɛ ɖo kplé agun tɔn ɖé jí ɖo xwe ɖé lɛ́ ɖíe, bɔ nɔví nyɔ̌nu ɖé ɖó ayi wú ɖɔ vǐnɔ ɖé ɖo malínmálín dó émí bo ɖo avǐ ya wɛ. È ɖɔ xó dó nukúnɖíɖó fínfɔ́n sín kú tɔn wú ɖo han ɔ mɛ; vǐnɔ énɛ́ sín vǐ nyɔ̌nu ka kú hwe ɔ nu é ɔ, é lín ǎ. Mɔ̌ e nɔví nyɔ̌nu ɔ tuun é zɔ́n bɔ é yá wǔ sɛ yi vǐnɔ ɔ kpá, bo kplá así kɔ n’i, lobo ji han e kpo é ɖó kpɔ́ xá ɛ. É wá yá é ɔ, vǐnɔ ɔ ɖɔ: “Wǎn e un yí nú nɔví lɛ́ é lɛ́ jɛjí bǐ.” É su nukún tɔn mɛ tawun ɖɔ é yi kplé ɔ domɛ. É ɖɔ: “Kpléxɔ Axɔ́súɖuto ɔ tɔn mɛ wɛ mǐ nɔ mɔ alɔdó ɖe.” Mǐ sixú kú d’é jí ɖɔ Jexóva nɔ ɖó ayi nǔ e mǐ nɔ wa dó se  wǔvɛ́ xá mɛ ɖěɖěe ɖo aluwɛ mɛ, bɔ “nǔ jɛ akɔ́n jí ná lɛ́” é wú, é ná bo tlɛ nyí nǔ kléwún ɖé wɛ ɔ nɛ́, bɔ é nɔ xɔ akwɛ́ ɖo nukún tɔn mɛ.—Ðɛh. 34:19.

17. Étɛ́ mǐ ka kplɔ́n ɖo xóta élɔ́ mɛ?

¹⁷ Ényí mǐ kplɔ́n nǔ dó tan ɖěɖěe ɖo Biblu mɛ bo ɖɔ xó dó nǔjíwǔ e Jezu bló lɛ́ é wú ɔ, é sixú dó wǔsyɛ́n lanmɛ nú mǐ tawun. Tan énɛ́ lɛ́ nɔ kplɔ́n mǐ ɖɔ Jexóva kpó Jezu kpó yí wǎn nú mǐ tawun, ɖɔ Jezu ɖó hlɔ̌nhlɔ́n bo ná ɖe ɖɛ tagba gbɛtɔ́ lɛ́ tɔn lɛ́ bǐ; yě nɔ lɛ́ ná mǐ gǎnjɛwú bǐ mlɛ́mlɛ́ ɖɔ nyɔ̌ná ɖěɖěe xó è ɖɔ bɔ Axɔ́súɖuto e sín akpá è dó é ná hɛn wá lɛ́ é ko ɖo kɛ́nnɛ́kɛ́nnɛ́. Ényí mǐ ɖo tan énɛ́ lɛ́ gbéjé kpɔ́n wɛ ɔ, mǐ sixú lin tamɛ dó ali ɖěɖěe nu mǐ sixú ɖe jijɔ Jezu tɔn lɛ́ xlɛ́ ɖe é jí. A sixú bló tuto bo ná kplɔ́n nǔ dó nǔjíwǔ ɖěvo e Jezu bló lɛ́ é wú ɖo nǔkplɔ́nkplɔ́n mɛɖésúnɔ tɔn towe, alǒ mawusinsɛn ɖo xwédo mɛ e mitɔn hwenu. Sɔ́ nǔ ɖěɖěe yě sixú kplɔ́n we lɛ́ é sín kɛ́n, énɛ́ gúdo hǔn, mǎ nǔ e a kplɔ́n lɛ́ é xá mɛ ɖěvo lɛ́. Ényí a nɔ wa mɔ̌ ɔ, a ná kpé wú bá ɖɔ xó ɖěɖěe nɔ dó wǔsyɛ́n lanmɛ nú mɛ lɛ́ é xá mɛ gěgé.—Hlɔ̌. 1:11, 12.

18. Étɛ́ lɛ́ jí mǐ ka ná ɖɔ xó dó ɖo xóta e bɔ d’é wú é mɛ?

¹⁸ Ðo mɛ atɔn e Jezu fɔ́n sín kú bɔ è ɖɔ xó yětɔn ɖo Biblu mɛ lɛ́ é mɛ ɔ, sɛkpɔ́ vivɔnu sinsɛnzɔ́ tɔn tɔn wɛ é fɔ́n mɛ atɔngɔ́ ɔ sín kú. Amɔ̌, gayɛnu tɔn ɔ gbɔn vo, xɔ́ntɔn vívɛ́ tɔn wɛ é fɔ́n sín kú, bɔ ninɔmɛ e mɛ é lɛ́ wa mɔ̌ ɖe é gbɔn vo bǐ mlɛ́mlɛ́. Étɛ́ lɛ́ tan e ɖo Wɛnɖagbewéma lɛ́ mɛ bo ɖɔ xó dó nǔjíwǔ énɛ́ wú é ka sixú kplɔ́n mǐ? Nɛ̌ mǐ ka sixú ná hlɔ̌nhlɔ́n nǔ e mǐ ɖi nú nukúnɖíɖó fínfɔ́n sín kú tɔn é gbɔn? Mǐ ná mɔ xósin nǔkanbyɔ́ énɛ́ lɛ́ tɔn ɖo xóta e bɔ d’é wú é mɛ.