1. Étɛ́wú mǐ ka nɔ ná xósin ɖo kplé lɛ́ jí?

 ÉTƐ́WÚ mǐ ka nɔ yi kplé agun tɔn lɛ́? Nukɔntɔn, bo ná dó kpa susu nú Jexóva. (Ðɛh. 26:12; 111:1) Mǐ nɔ lɛ́ yi kplé lɛ́, bo ná dó sixú dó wǔsyɛ́n lanmɛ nú mǐɖée ɖo hwenu vɛ́ wǔ élɔ́ lɛ́ mɛ. (1 Tɛ. 5:11) Ényí mǐ zé alɔ bo ná xósin ɖo kplé lɛ́ jí hǔn, nǔ we énɛ́ lɛ́ bló wɛ mǐ ɖe mɔ̌ nɛ́.

2. Hwetɛ́lɛ́nu mǐ ka sixú nɔ ná xósin ɖo kplé lɛ́ jí?

² Ðo aklúnɔzángbla ɖokpó ɖokpó mɛ ɔ, ali ɔ nɔ hun nú mǐ bónú mǐ ná ná xósin ɖo kplé mǐtɔn lɛ́ jí. Ði kpɔ́ndéwú ɔ, ɖo aklúnɔzángbla fífó lɛ́ ɔ, mǐ sixú nɔ ná xósin ɖo Atɔxwɛ kplɔ́nkplɔ́n hwenu. Ðo kplé aklúnɔzángbla tɛ́ntin tɔn lɛ́ hwenu ɔ, mǐ sixú nɔ ná xósin ɖo Nǔ xɔ akwɛ́ Biblu tɔn lɛ́ biba, Biblu kplɔ́nkplɔ́n agun tɔn kpó akpáxwé kplé ɔ tɔn ɖěvo e mɛ kpléwátɔ́ lɛ́ nɔ ɖ’alɔ ɖe lɛ́ é kpó hwenu.

3. Étɛ́ lɛ́ ka sixú zɔ́n bɔ xósin níná ná vɛ́ wǔ nú mǐ? Nɛ̌ Eblée lɛ́ 10:24, 25 ka sixú d’alɔ mǐ gbɔn?

³ Mǐ mɛ bǐ wɛ nɔ ba ná kpa susu nú Jexóva, bo lɛ́ dó wǔsyɛ́n lanmɛ nú nǔɖitɔ́ hǎtɔ́ mǐtɔn lɛ́. Amɔ̌, xósin níná sixú nɔ vɛ́ wǔ nú mǐ. Ado sixú nɔ hu mǐ dó xósin níná wú, alǒ mǐ sixú nɔ ba vɛ́návɛ́ná bo ná ɖ’alɔ ɖo kplé lɛ́ mɛ, có è ka sixú gɔn alɔ mǐtɔn yí azɔn nabí e mǐ ba é. Étɛ́ ka sixú d’alɔ mǐ? Nǔ e Pɔ́lu wlán sɛ́dó Eblée lɛ́ é sixú d’alɔ mǐ bɔ mǐ ná mɔ xósin ɔ. Hwenu e é ɖo xó ɖɔ dó lě do kplé lɛ́ yiyi ɖo tají sɔ é jí wɛ é ɔ, é ɖɔ ɖɔ mǐ ɖó ná nɔ  sɔ́ ayi ɖó ‘kanmɛsyɛ́n níná mǐɖée’ jí. (Xa Eblée lɛ́ 10:24, 25.) Ényí mǐ tuun ɖɔ mǐ ná bo tlɛ ɖɔ xó kléwún ɖé dó ɖe nǔɖiɖi mǐtɔn xlɛ́ ɔ, é ná dó wǔsyɛ́n lanmɛ nú mɛ ɖěvo lɛ́ ɔ, ado sɔ́ ná hu mǐ dó alɔ sísɔ́ bo ná xósin wú ǎ. Gɔ́ ná ɔ, ényí è ma nɔ yí alɔ mǐtɔn hwɛhwɛ lěe ba gbɔn wɛ mǐ ɖe é ǎ ɔ, xomɛ sixú hun mǐ ɖɔ ali ná hun nú mɛ ɖěvo lɛ́ ɖo agun ɔ mɛ bɔ yě lɔmɔ̌ ná ná xósin.—1 Pi. 3:8.

4. Nǔ atɔn tɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

⁴ Ðo xóta élɔ́ mɛ ɔ, mǐ ná tó ɖɔ xó dó lěe mǐ sixú dó wǔsyɛ́n lanmɛ nú mǐɖée ɖo agun e mɛ gbɛtɔ́ nabí ɖé ma ɖe ǎ, bɔ kɛ́n xósinnátɔ́ lɛ́ tɔn hwe ɖe é gbɔn é jí. Énɛ́ gúdo ɔ, mǐ ná gbéjé lěe mǐ sixú dó wǔsyɛ́n lanmɛ nú mǐɖée ɖo agun e mɛ gbɛtɔ́ sukpɔ́ ɖe, bɔ mɛ gěgé nɔ sɔ́ alɔ bá ná xósin ɖe é gbɔn é kpɔ́n. Gǔdo mɛ ɔ, mǐ ná ɖɔ xó dó ali ɖěɖěe nu mǐ sixú bló bɔ nǔ e mǐ nɔ ɖɔ ɖo xósin mǐtɔn lɛ́ mɛ é ná dó wǔsyɛ́n lanmɛ nú mɛ ɖěvo lɛ́ nǔgbó nǔgbó ɖe lɛ́ é jí.

5. Ényí mǐ ɖo agun e mɛ gbɛtɔ́ nabí ɖé ma ɖe ǎ é ɔ, nɛ̌ mǐ ka sixú nɔ dó wǔsyɛ́n lanmɛ nú mǐɖée gbɔn?

⁵ Ðo agun e mɛ gbɛtɔ́ nabí ɖé ma ɖe ǎ é, kabǐ ɖo kánɖó ɖé mɛ ɔ, xósinnátɔ́ nabí ɖé nɔ ɖo fínɛ́ káká bónú mɛ e ɖo nukún kpé dó akpáxwé kplé ɔ tɔn wú wɛ é ná sɔ́ ɖ’é mɛ ǎ. Hweɖélɛ́nu ɔ, é sixú byɔ́ ɖɔ é ní nɔ te kpɛɖé cóbónú mɛɖé ná sɔ́ alɔ bá ná xósin. Kplé ɔ sixú cí nǔ e ci mɛ é ɖɔhun, bɔ énɛ́ ka nɔ dó wǔsyɛ́n lanmɛ nú mɛ ǎ. Étɛ́ a ka sixú wa? Ðo gbesisɔmɛ bo ná nɔ sɔ́ alɔ hwɛhwɛ. Ényí a nɔ wa mɔ̌ ɔ, énɛ́ sixú sísɛ́ mɛ ɖěvo lɛ́ bɔ yě lɔmɔ̌ ná nɔ ba ná ná xósin hwɛhwɛ hú lěe yě ko nɔ wa gbɔn é.

6-7. Étɛ́ mǐ ka sixú wa bɔ ado ma sɔ́ ná nɔ hu mǐ sɔmɔ̌ dó xósin níná wú ǎ?

⁶ Ényí ado nɔ hu we dó xósin níná wú ɔ, nɛ̌ a ka sixú wa nǔ gbɔn? Nǔ nɔ cí mɔ̌ nú mɛ gěgé. É ɖo mɔ̌ có, bo ná dó dó wǔsyɛ́n lanmɛ nú nɔví towe lɛ́ ganjí ɔ, a ɖó ná ba ali ɖěɖěe nu a ná ɖu ɖo adohu adohu towe jí, bo ná nɔ ná xósin ɖe lɛ́ é. Nɛ̌ a ka sixú wa mɔ̌ gbɔn?

⁷ Wěɖexámɛ e ɖo Atɔxwɛ e ko wá yi lɛ́ é mɛ é ɖé lɛ́ vívɔ́ gbéjé kpɔ́n sixú d’alɔ we. b Ði kpɔ́ndéwú ɔ, nɔ sɔ́ nǔ ganjí. (Nǔx. 21:5) Lě do nǔ e ɖo nǔ e kplɔ́n wɛ è ɖe é mɛ é má mɛ sɔ é ɔ, mɔ̌ do wɛ alɔ sísɔ́ bo ná xósin nɔ bɔ wǔ nú mɛ sɔ. Gɔ́ ná ɔ, xósin towe lɛ́ ní nɔ nɔ kléwún. (Nǔx. 15:23; 17:27) Ényí xósin towe lɛ́ ɖo kléwún ɔ, ado sɔ́ ná nɔ hu we sɔmɔ̌ dó nǐná tɔn wú ǎ. Xósin kléwún ɖé, vlafo xósin e è ná kpó nukɛgbe ɖokpó, alǒ we kpó é mɛ mimɔ nukúnnú jɛ tlɛ sixú bɔ wǔ nú nɔví lɛ́ hú xósin gaga e mɛ è ɖɔ nǔ gěgé ɖe é níná. Ényí a nɔ ná xósin kléwún ɖé ɖo xógbe hwiɖésúnɔ tɔn lɛ́ mɛ ɔ, a ná xlɛ́ ɖɔ émí sɔ́ nǔ ganjí, bo lɛ́ mɔ nǔ jɛ nǔ e kplɔ́n wɛ è ɖe é mɛ céɖécéɖé.

8. Ényí mǐ ɖo nǔ e wú mǐ kpé é bǐ wa wɛ ɔ, nɛ̌ nǔ ka nɔ cí nú Jexóva?

⁸ Ényí a tɛ́n wěɖexámɛ énɛ́ lɛ́ kpɔ́n, bɔ ado ka lɛ́ kpo ɖo huhu we wɛ tawun dó xósin níná hú ɖokpó, alǒ we wú ɔ ka lo? Ðeji ɖɔ gǎn e dó wɛ a ɖe bo ná wa nǔ e wú a kpé é ná su Jexóva nukúnmɛ. (Luk. 21:1-4) Jexóva nɔ byɔ́ mǐ ɖɔ mǐ ní wa nǔ zɛ nǔ e wú mǐ kpé é wú ǎ. (Filí. 4:5, nwt) Sɔ́ kɛ́n nǔ e wú a sixú kpé é ɖé lɛ́ tɔn, bo tɛ́n kpɔ́n bo nya gbě yětɔn; gɔ́ ná ɔ, xo ɖɛ bo byɔ́ fífá ayi mɛ tɔn. Nǔ e gbé a sixú nya jɛ nukɔn é wɛ nyí ɖɔ a ní tó ná xósin kléwún ɖokpó hwɛ̌.

9. Étɛ́wú xósin níná ka sixú vɛ́ wǔ ɖo agun e mɛ gbɛtɔ́ sukpɔ́ ɖe lɛ́ é?

⁹ Ényí wɛnjlátɔ́ gěgé ɖo agun towe mɛ ɔ, wǔvɛ́ vo wɛ a sixú mɔ. Vlafo nɔví lɛ́ gěgé nɔ sɔ́  alɔ bá ná xósin, bɔ énɛ́ nɔ zɔ́n bɔ è nɔ yá wǔ mɔ alɔ towe ǎ. Ði kpɔ́ndéwú ɔ, Danielle nɔ ɖu vǐví xósin lɛ́ níná ɖo kplé lɛ́ jí tɔn hwebǐnu. c É nɔ mɔ ɖɔ xósin e émí nɔ ná lɛ́ é ɔ, akpáxwé mawusinsɛn tɔn ɖé wɛ, bo lɛ́ nyí ali e nu émí sixú gbɔn dó dó wǔsyɛ́n lanmɛ nú mɛ ɖěvo lɛ́, bo lɛ́ ná hlɔ̌nhlɔ́n nǔ e émí ɖi nú nǔkplɔ́nmɛ Biblu tɔn lɛ́ é. Amɔ̌, hwenu e é sɛ tɛn yi agun e mɛ gbɛtɔ́ sukpɔ́ ɖe é ɔ, é sɔ́ nɔ ná xósin mɔ̌ ǎ; hweɖélɛ́nu ɔ, é tlɛ nɔ ná xósin ɖokpó vɔ́vɔ́ ɖo kplé ɔ blěbú hwenu ǎ. É ɖɔ: “Un flú; é nɔ cí nú mì ɖɔ un ba wǔjɔmɛ ɖé kpo wɛ ɖɔhun. Ényí é jɛ mɔ̌ cí jí ɔ, è sixú jɛ kinkanbyɔ́ mɛɖée jí ɖɔ nukúnkpénǔwútɔ́ ɔ ka nɔ tuun cóbó nɔ gɔn alɔ mɛtɔn yí wɛ a jí.”

10. Nɛ̌ mǐ ka sixú bló gbɔn bɔ xósin níná ɖo kplé lɛ́ jí ná kpa mǐ?

¹⁰ Lěe nǔ cí nú Danielle é ka ko cí mɔ̌ nú we kpɔ́n a? Ényí mɔ̌ wɛ nǔ nɔ cí nú we ɔ, é sixú nɔ jló we ɖɔ a ní jó gbe, bo nɔ ɖótó xó kpowun ɖo kplé jí. Amɔ̌, ma jó gbe dó xósin níná wú ó. Étɛ́ a ka sixú wa? Ényí a nɔ sɔ́ nǔ nú xósin gěgé nú kplé lɛ́ ɖokpó ɖokpó ɔ, é sixú d’alɔ we. Énɛ́ ɔ, ényí è ma ylɔ́ we bónú a ná xósin ɖo bǐbɛ́mɛ nǔkplɔ́nkplɔ́n ɔ tɔn ǎ ɔ, ali ɔ ná lɛ́ hun nú we bɔ a ná ná xósin ɖo kplé ɔ hwenu. Ényí a ɖo nǔ sɔ́ nú Atɔxwɛ kplɔ́nkplɔ́n wɛ hǔn, nɔ lin tamɛ dó lěe akpáxwé lɛ́ ɖokpó ɖokpó cá kan xá xóta nǔkplɔ́nkplɔ́n ɔ tɔn gbɔn é jí. Ényí a nɔ wa mɔ̌ ɔ, a ná ɖibla mɔ xósin ɖagbe ɖěvo bo ná ɖo nǔkplɔ́nkplɔ́n ɔ hwenu. Gɔ́ ná ɔ, a sixú sɔ́ nǔ bá ná xósin ɖo akpáxwé ɖěɖěe ɖɔ xó dó nǔgbó Biblu tɔn e gɔ́ngɔ́n, bɔ é nɔ vɛ́ wǔ bɔ è ná tínmɛ lɛ́ é wú é jí. (1 Kɔ. 2:10) Aniwú? Ðó mɛ gěgé sixú gɔn alɔ sɔ́ ɖo nǔkplɔ́nkplɔ́n ɔ sín akpáxwé énɛ́. Nú a zán wěɖexámɛ énɛ́ lɛ́ bǐ, bo lɛ́ mɔ ɖɔ ɖo kplé gěgé gúdo ɔ, ali ɔ kún hun nú émí bɔ émí ná xósin ó jɛ́n wɛ ɔ ka lo? A sixú ɖɔ xó xá mɛ e nɔ kpé nukún dó akpáxwé ɔ wú é jɛ nukɔn nú kplé ɔ, bo ɖɔ nǔkanbyɔ́ e a jló ná ná xósin ná é n’i.

11. Étɛ́ Filípunu lɛ́ 2:4 ka dó wǔsyɛ́n lanmɛ nú mǐ ɖɔ mǐ ní wa?

¹¹ Xa Filípunu lɛ́ 2:4. Mawu sɔ́ d’ayi mɛ nú mɛsɛ́dó Pɔ́lu bɔ é dó wǔsyɛ́n lanmɛ nú klisánwun lɛ́ ɖɔ yě ní nɔ ba ɖagbe mɛ ɖěvo lɛ́ tɔn. Nɛ̌ mǐ ka sixú nɔ xwedó wěɖexámɛ énɛ́ ɖo kplé lɛ́ jí gbɔn? Mǐ sixú nɔ wa mɔ̌, ényí mǐ nɔ flín ɖɔ mɛ ɖěvo lɛ́ lɔ ba ná ná xósin mǐɖɔhun ɔ nɛ́.

12. Ðɔ ali ɖagbe e nu mǐ sixú dó wǔsyɛ́n lanmɛ nú mɛ ɖěvo lɛ́ ɖo kplé lɛ́ jí ɖe é ɖokpó. (Lɛ̌ kpɔ́n fɔtóo ɔ.)

 ¹² Lin tamɛ dó nǔ élɔ́ jí. Ényí a ɖo xó ɖɔ xá xɔ́ntɔn towe lɛ́ wɛ ɔ, a ná ɖɔ xó káká bɔ yědɛɛ lɛ́ sɔ́ ná mɔ ali bá ɖɔ xó ɖě ǎ wɛ a? É ɖo wɛn ɖɔ a kún ná wa mɔ̌ ó. A ba ɖɔ yě lɔmɔ̌ ní ɖ’alɔ ɖo xóɖɔɖókpɔ́ ɔ mɛ. Mɔ̌ ɖokpó ɔ, mǐ nɔ ba ná ná tɛn mɛ gěgé lěe é nyɔ́ bló gbɔn é, bónú yě lɔ ná ná xósin ɖo kplé lɛ́ jí. Nǔgbó ɔ, tɛn e mǐ nɔ ná nɔví mǐtɔn lɛ́ bɔ yě nɔ ná xósin dó ɖe nǔɖiɖi yětɔn xlɛ́ é nyí ali ɖagbe hú gǎn e nu mǐ sixú dó wǔsyɛ́n lanmɛ nú yě ɖe é ɖokpó. (1 Kɔ. 10:24) Mi nú mǐ ní ɖɔ xó dó lěe mǐ sixú wa mɔ̌ gbɔn é jí.

13. Nɛ̌ mǐ ka sixú ná tɛn mɛ e nɔ wá kplé lɛ́ é gěgé bɔ yě lɔ ná nɔ ná xósin gbɔn?

¹³ Ali e nu mǐ sixú wa mɔ̌ ɖe é ɖokpó wɛ nyí ɖɔ mǐ sixú nɔ ná xósin e ɖo kléwún lɛ́ é, mɔ̌ mɛ ɔ, hwenu ná tíin hú gǎn bɔ mɛ gěgé ná ɖ’alɔ ɖo kplé ɔ mɛ. Mɛxó agun tɔn lɛ́ kpó wɛnjlátɔ́ ɖěvo e ko mɔ nǔ kpɔ́n lɛ́ é kpó sixú sɔ́ kpɔ́ndéwú ɔ ɖ’ayǐ. Ényí a na bo tlɛ ná xósin e ɖo kléwún é ɖé hǔn, nyi alɔ nú nǔ tají e ɖo akpáxwé ɔ mɛ lɛ́ é gěgé ɖiɖɔ ɖo xósin towe mɛ. Ényí a ɖɔ nǔ e ɖo akpáxwé ɔ mɛ lɛ́ é bǐ ɔ, nǔ káká ɖé sɔ́ ná kpo bónú mɛ ɖěvo lɛ́ ná ɖɔ ǎ. Ði kpɔ́ndéwú ɔ, akpáxwé élɔ́ ɖe wě we élɔ́ lɛ́ xá mǐ: Nɔ bló bónú xósin towe lɛ́ ní nɔ nɔ kléwún, bo nɔ lɛ́ nyi alɔ nú nǔ tají e ɖo akpáxwé ɔ mɛ lɛ́ é gěgé ɖiɖɔ. Ényí hwi wɛ è ylɔ́ jɛ nukɔn bónú a ná ná xósin nú akpáxwé élɔ́ ɔ, étɛ́wú a ma ka ná ɖɔ xó dó nǔ tají lɛ́ ɖokpó kpowun jí ǎ?

14. Étɛ́ ka sixú d’alɔ mǐ bɔ mǐ ná nɔ wá gbeta azɔn nabí e mǐ ná nɔ sɔ́ alɔ é tɔn kɔn? (Lɛ̌ kpɔ́n fɔtóo ɔ.)

¹⁴ Ényí a ɖo gbeta azɔn nabí e a ná nɔ sɔ́ alɔ bá ná xósin é tɔn kɔn wá wɛ hǔn, ayi towe ní ɖo te. Ényí mǐ nɔ sɔ́ alɔ dín ɔ, é sixú cí nú mɛ e ɖo nukún kpé dó nǔ ɔ wú wɛ é ɖɔ mǐ ɖo cɔcɔ dó n’i wɛ nú é ná nɔ yí alɔ mǐtɔn hwɛhwɛ, ényí ali ɔ ma tlɛ ko hun nú mɛ ɖěvo lɛ́ bónú yě lɔ ná xósin ǎ ɔ nɛ́. Énɛ́ sixú dó kpo awa mɛ nú mɛ ɖěvo lɛ́ bɔ yě ná gɔn alɔ sɔ́.—Nǔt. 3:7.

15. (a) Ényí è ma ylɔ́ mǐ bónú mǐ ná xósin ǎ ɔ, nɛ̌ mǐ ka ɖó ná wa nǔ gbɔn? (b) Nɛ̌ mɛ ɖěɖěe nɔ kpé nukún dó akpáxwé lɛ́ wú lɛ́ é ka ɖó ná nɔ xlɛ́ ɖɔ nǔ mɛ lɛ́ bǐ tɔn nɔ ɖu ayi mɛ nú émí gbɔn? (Kpɔ́n gbǎví “ Nú mɛ e ɖo nukún kpé dó nǔkplɔ́nkplɔ́n ɔ wú wɛ é.”)

 ¹⁵ Ényí wɛnjlátɔ́ gěgé nɔ sɔ́ alɔ ɖo nǔkplɔ́nkplɔ́n ɖé hwenu ɔ, mǐ sixú gɔn xósin ná hwɛhwɛ lěe mǐ ba gbɔn é. É sixú wá jɛ bɔ mɛ e ɖo nukún kpé dó akpáxwé ɔ wú wɛ é ná kpé wú bo yí alɔ mǐtɔn ɖěbǔ ǎ. Énɛ́ sixú gɔn nukún mǐtɔn mɛ nyɔ́, amɔ̌, mǐ ɖó ná tɛ́n kpɔ́n bɔ alɔ mǐtɔn e è ma yí ǎ é ɖó ná dó xomɛsin nú mǐ ǎ.—Nǔt. 7:9.

16. Nɛ̌ mǐ ka sixú nɔ dó wǔsyɛ́n lanmɛ nú mɛ ɖěvo e nɔ ná xósin lɛ́ é gbɔn?

¹⁶ Ényí a ma sixú nɔ kpé wú bo nɔ ná xósin hwɛhwɛ lěe a jló gbɔn é ǎ ɔ, étɛ́wú a ma ka ná nɔ ɖótó xósin mɛ ɖěvo lɛ́ tɔn kpó sɔxwixwe kpó, bɔ ɖo kplé ɔ gúdo ɔ, a ná nɔ kpa yě ɖó xósin yětɔn wú ǎ? Kpa e a ná kpa nɔví towe lɛ́ é ná dó wǔsyɛ́n lanmɛ nú yě, xósin e a ná ko ná é ɖɔhun. (Nǔx. 10:21) Ali ɖěvo e nu a sixú dó wǔsyɛ́n lanmɛ nú mɛ ɖěvo lɛ́ ɖe é wɛ nyí ɖɔ a ní nɔ kpa yě.

17. (a) Nɛ̌ mɛjitɔ́ lɛ́ ka sixú d’alɔ vǐ yětɔn lɛ́ bɔ yě ná nɔ sɔ́ nǔ nú xósin e sɔgbe xá xwe yětɔn lɛ́ é gbɔn? (b) Sɔgbe xá video ɔ ɔ, afɔ ɛnɛ tɛ́ lɛ́ è ka sixú ɖe hwenu e è ɖo nǔ sɔ́ nú xósin ɖé wɛ é? (Kpɔ́n tínmɛ e ɖo do é.)

¹⁷ Ali ɖěvo tɛ́ nu mǐ ka sixú dó wǔsyɛ́n lanmɛ nú mǐɖée ɖo kplé lɛ́ jí ɖe? Ényí mɛjitɔ́ ɖé wɛ nú we hǔn, nɔ d’alɔ vǐ towe lɛ́ bónú yě ní nɔ sɔ́ nǔ  nú xósin e sɔgbe xá xwe yětɔn lɛ́ é. (Mat. 21:16) Hweɖélɛ́nu ɔ, mǐ nɔ kplɔ́n xóta ɖé lɛ́ bɔ yě nɔ syɛ́n kpɛɖé; yě sixú ɖɔ xó dó tagba e asú kpó asi kpó lɛ́ nɔ mɔ lɛ́ é, alǒ nǔ e kúnkplá walɔ ɖagbe lɛ́ é wú. Amɔ̌, akpáxwé ɖokpó, alǒ we mɔ̌ ná ɖibla ɖ’é mɛ bɔ yɔkpɔ́vú lɛ́ sixú ná xósin ɖo fínɛ́. Gɔ́ ná ɔ, lɛ̌ d’alɔ vǐ towe lɛ́ bónú yě ní mɔ nǔ jɛ nǔ e wú é ma nyí hwenu e yě sɔ́ alɔ é bǐ jɛ́n è ná yí alɔ yětɔn ǎ é wú. Énɛ́ sixú zɔ́n bɔ ényí è ma yí alɔ yětɔn ǎ bo yí mɛ ɖěvo lɛ́ tɔn ɔ, awakanmɛ sɔ́ ná kú yě ǎ.—1 Tim. 6:18. d

18. Ényí mǐ ɖo xósin ná wɛ ɔ, nɛ̌ mǐ ka sixú nyi alɔ nú ayi mɛ ɖěvo lɛ́ tɔn dindɔn wá mǐɖée jí gbɔn? (Nǔnywɛ́xó 27:2)

¹⁸ Mǐ mɛ bǐ sixú sɔ́ nǔ nú xósin ɖěɖěe nɔ ná kanmɛsyɛ́n mɛ, bo nɔ kpa susu nú Jexóva, lobo nɔ lɛ́ dó wǔsyɛ́n lanmɛ nú klisánwun hǎtɔ́ mǐtɔn lɛ́ é. (Nǔx. 25:11) Nǔgbó wɛ ɖɔ é sixú jɛ hweɖélɛ́nu bɔ mǐ ná ɖɔ nǔ e jɛ dó mǐɖésúnɔ jí é kléwún, amɔ̌, mǐ ɖó ná nyi alɔ nú xó gěgé ɖiɖɔ dó mǐɖée wú. (Xa Nǔnywɛ́xó 27:2; 2 Kɔ. 10:18) Mǐ ɖó ná dó gǎn bo ná nɔ sɔ́ ayi ɖó Jexóva, Xó tɔn kpó togun tɔn blěbú kpó jí. (Nǔɖe. 4:11) É ɖo wɛn ɖɔ, ényí nǔkanbyɔ́ ɖé byɔ́ mǐ ɖɔ mǐ ní ná xósin mɛɖésúnɔ tɔn ɖé ɔ, é sɔgbe ɖɔ mǐ ní wa mɔ̌. Kpɔ́ndéwú tɔn ɖokpó ɖo akpáxwé e bɔ d’é wú é mɛ.

19. (a) Ényí mɛ e nɔ wá kplé lɛ́ é bǐ sín nǔ nɔ ɖu ayi mɛ nú mǐ ɔ, étɛ́ mɛ é ka ná tɔ́n kɔ dó? (Hlɔ̌manu lɛ́ 1:11, 12) (b) Étɛ́ a ka nɔ yí wǎn ná tawun dó xósin níná ɖo kplé lɛ́ jí wú?

¹⁹ Nǔgbó wɛ ɖɔ è dó sɛ́n lɛ́ gbɛ́ɖɛ́ɖɛ́ dó lěe mǐ ná nɔ ná xósin gbɔn é wú ǎ, é ɖo mɔ̌ có, mǐ mɛ bǐ wɛ sixú dó gǎn bo ná xósin e dó wǔsyɛ́n lanmɛ nú mɛ ɖěvo lɛ́ é. Énɛ́ sixú nɔ byɔ́ ɖɔ è ní ma sɔ́ nɔ ná xósin sɔ lěe è ko nɔ ná gbɔn ɖ’ayǐ é ó. Alǒ, énɛ́ sixú lɛ́ byɔ́ ɖɔ ali e nɔ hun nú mǐ bɔ mǐ nɔ ná xósin é ní nɔ su nukún mǐtɔn mɛ, bónú xomɛ ní nɔ lɛ́ hun mǐ dó wǔ e è jɔ mɛ ɖěvo lɛ́ bɔ yě nɔ ná xósin mǐɖɔhun é wú. Ényí mǐ nɔ sɔ́ ayi ɖó nǔ e ná wa ɖagbe nú mɛ ɖěvo lɛ́ é jí ɖo kplé agun tɔn lɛ́ hwenu ɔ, mǐ mɛ bǐ sixú ɖu vǐví ‘akɔ́nkpinkpan e mǐ nɔ ná mǐɖée é tɔn.’—Xa Hlɔ̌manu lɛ́ 1:11, 12.