XÓTA NǓKPLƆ́NKPLƆ́N TƆN 19
Nǎ hlɔ̌nhlɔ́n nǔ e a ɖi nú akpá gbɛ yɔ̌yɔ́ ɔ tɔn e Jexóva dó é
“Nǔ e [Jexóva] ɖɔ ɔ, é ná bló ɖ’é jí ǎ cé?”—KƐ́N. 23:19.
HAN 142 Mǐ ní zunfán nukúnɖíɖó mǐtɔn
XÓNUSƆ́ÐÓTE a
1-2. Ée mǐ ná ɖo te kpɔ́n gbɛ yɔ̌yɔ́ ɔ é ɔ, étɛ́ mǐ ka ɖó ná nɔ wa?
AKPÁ e Jexóva dó bo ná sɔ́ gbɛ yɔ̌yɔ́ e mɛ nǔjlɔ́jlɔ́wiwa ná ɖe é dó ɖyɔ́ gbɛ élɔ́ ná é nɔ su nukún mǐtɔn mɛ tawun. (2 Pi. 3:13) Mǐ tuun hwenu e nǔ ná nyí mɔ̌ é pɛ́pɛ́pɛ́ ǎ có, kúnnuɖenú lɛ́ xlɛ́ ɖɔ azǎn káká ɖé kún sɔ́ kpo ɖo gban jí ó.—Mat. 24:32-34, 36; Mɛ. 1:7.
2 Din hwɛ̌ ɔ, ényí mǐ ɖo nǔgbó ɔ mɛ ɔ, é ná bo tlɛ lín gbɔn ɖěbǔ ɔ, mǐ bǐ ɖó ná kpo ɖo hlɔ̌nhlɔ́n ná nǔ e mǐ ɖi nú akpá énɛ́ é wɛ. Aniwú? Ðó nǔɖiɖi mǐtɔn ná bo syɛ́n gbɔn ɖěbǔ ɔ, é sixú wá vɔ́ da. Nǔgbó ɔ, “hwɛhuhu e é ma vɛ́ wǔ ná ɖɔ é ní tɛ́ dó mǐ wú ǎ é,” wɛ mɛsɛ́dó Pɔ́lu ylɔ́ nǔɖiɖi ma ɖó ɖɔ. (Ebl. 12:1) Bónú nǔɖiɖi mǐtɔn ma ná vɔ́ da ǎ ɔ, mǐ ɖó ná nɔ gbéjé kúnnuɖenú e xlɛ́ ɖɔ gbɛ yɔ̌yɔ́ ɔ ná wá ɖo malínmálín mɛ lɛ́ é kpɔ́n hwɛhwɛ.—Ebl. 11:1.
3. Étɛ́ lɛ́ mǐ ka ná gbéjé kpɔ́n ɖo xóta élɔ́ mɛ?
3 Ðo xóta élɔ́ mɛ ɔ, mǐ ná gbéjé ali e nu mǐ sixú ná hlɔ̌nhlɔ́n nǔ e mǐ ɖi nú gbɛ yɔ̌yɔ́ e sín akpá Jexóva dó nú mǐ é ɖe é atɔn élɔ́ lɛ́ kpɔ́n: (1) tamɛ linlin dó gbɛxixɔ ɔ jí, (2) tamɛ linlin dó hlɔ̌nhlɔ́n Jexóva tɔn jí, (3) hwenu zínzán dó nǔ e mǐ nɔ wa dó sɛn Mawu lɛ́ é takúnmɛ. Énɛ́ gúdo ɔ, mǐ ná gbéjé lěe nǔ e Jexóva ɖɔ nú Xabakúku é nɔ ná hlɔ̌nhlɔ́n nǔɖiɖi mǐtɔn égbé gbɔn é kpɔ́n. Amɔ̌, jɛ nukɔn hwɛ̌ ɔ, mi nú mǐ ní gbéjé ninɔmɛ ɖěɖěe mɛ mǐ sixú gbɔn din, bɔ é ná byɔ́ ɖɔ mǐ ní ɖó nǔɖiɖi syɛ́nsyɛ́n nú gbɛ yɔ̌yɔ́ e ja bɔ Mawu d’akpá tɔn nú mǐ é ɖé lɛ́ kpɔ́n.
NINƆMƐ ÐĚÐĚE SIXÚ BYƆ́ NǓÐIÐI SYƐ́NSYƐ́N É ÐÉ LƐ́
4. Gbeta tɛ́ lɛ́ kɔn wíwá ka nɔ byɔ́ ɖɔ mǐ ní ɖó nǔɖiɖi adodwé?
4 Gbe bǐ gbe wɛ mǐ nɔ wá gbeta e nɔ byɔ́ ɖɔ mǐ ní ɖó nǔɖiɖi syɛ́nsyɛ́n lɛ́ é kɔn. Ði kpɔ́ndéwú ɔ, mǐ nɔ wá gbeta gbɛ̌ e mǐ ná dó lɛ́ é, nǔ e mǐ ná dó ɖe ayi ɖ’ayǐ ná é, bǎ e mɛ mǐ ná yi wěmaxɔmɛ yi ɖó é, mɛ e mǐ ná da é, vǐ nabí e mǐ ná jí é kpó agbazazɔ́ e mǐ ná wa é kpó tɔn kɔn. É ná nyɔ́ ɖɔ mǐ ní nɔ kan nǔ élɔ́ lɛ́ byɔ́ mǐɖée: ‘Gbeta e kɔn un nɔ wá lɛ́ é ka nɔ xlɛ́ ɖɔ un kú d’é jí ɖɔ gbɛ élɔ́ kún ná nɔ ayǐ sɔ́yi ó, bɔ malínmálín mɛ ɔ, gbɛ yɔ̌yɔ́ Mawu tɔn ná ɖyɔ́ tɛn n’i a? Alǒ, mɛ e nɔ zán gbɛ yětɔn cí nǔ ɖɔ kú wɛ nyí vivɔnu nǔ lɛ́ bǐ tɔn ɖɔhun lɛ́ é sín nǔwiwa wɛ nɔ xlɛ́ ali gbeta ce lɛ́ a?’ (Mat. 6:19, 20; Luk. 12:16-21) Ényí mǐ nɔ ná hlɔ̌nhlɔ́n nǔ e mǐ ɖi ɖɔ gbɛ yɔ̌yɔ́ ɔ ko ɖo hɔn jí é ɔ, mǐ ná nɔ wá gbeta ɖagbe hú gǎn lɛ́ kɔn.
5-6. Aniwú mǐ ka ɖó nǔɖiɖi adodwé sín hudó ɖo hwenu vɛ́ wǔ lɛ́ mɛ? Jlɛ̌ dó nǔɖé wú.
5 Wǔvɛ́ ɖé lɛ́ tíin bɔ mǐ nɔ lɛ́ mɔ bɔ é nɔ byɔ́ ɖɔ mǐ ní ɖó nǔɖiɖi adodwé. É sixú nyí ɖɔ mǐ ná dɛ ɖo yadónúmɛ, azɔn syɛ́nsyɛ́n, alǒ nǔ ɖěvo e sixú dó awakanmɛ kú nú mǐ é ɖé nu. Ðo bǐbɛ́mɛ ɔ, é sixú cí nú mǐ ɖɔ, mǐ kpé wú bá dɛ ɖo tagba mǐtɔn nu ɖɔhun. Amɔ̌ hwɛhwɛ ɔ, wǔvɛ́ mɔ̌hun lɛ́ nɔ nɔ ayǐ nú hwenu gěgé, énɛ́ wú ɔ, é ná byɔ́ ɖɔ mǐ ní ɖó nǔɖiɖi adodwé e ná zɔ́n bɔ mǐ ná dɛ bo ná kpo ɖo Jexóva sɛn wɛ kpó awǎjijɛ kpó é.—Hlɔ̌. 12:12; 1 Pi. 1:6, 7.
6 Ényí mǐ ɖo wǔvɛ́ ɖé mɔ wɛ ɔ, mǐ sixú lin ɖɔ gbɛ yɔ̌yɔ́ Jexóva tɔn kún ná wá gbeɖé ó. Xlɛ́xlɛ́ wɛ énɛ́ ka ɖe ɖɔ nǔɖiɖi mǐtɔn vɔ́ da a? É nyí mɔ̌ dandan ǎ. Nǔjlɛ́dónǔwú ɖé ɖíe: Ényí mǐ ɖo avivɔhwenu, bónú jɔhɔn wá syɛ́n bǐ ɔ, é sixú cí nú mǐ ɖɔ yǒzo kún sɔ́ ná gbɛ́ gbeɖé ó ɖɔhun. É ɖo mɔ̌ có, yǒzo ka nɔ wá gbɛ́. Ali ɖokpó ɔ nu ɔ, ényí awakanmɛ kú mǐ tawun ɔ, é sixú cí nú mǐ ɖɔ gbɛ yɔ̌yɔ́ ɔ kún sɔ́ ná wá gbeɖé ó ɖɔhun. Amɔ̌, ényí nǔɖiɖi mǐtɔn lí dǒ ɔ, mǐ nɔ tuun ɖɔ akpá e Mawu dó lɛ́ é ná jɛnu. (Ðɛh. 94:3, 14, 15; Ebl. 6:17-19) Ényí mǐ ɖó gǎnjɛwú mɔ̌hun ɔ, mǐ hɛn ɔ, mǐ ná kpo ɖo Jexóva sinsɛn sɔ́ ɖó tɛn nukɔntɔn mɛ wɛ ɖo gbɛzán mǐtɔn mɛ.
7. Étɛ́ wú mǐ ka ɖó ná cɔ́ mǐɖée dó?
7 Mǐ lɛ́ ɖó hudó nǔɖiɖi adodwé tɔn bo ná dó jlá wɛn ɖagbe ɔ. Mɛ ɖěɖěe mǐ nɔ jlá wɛn ɖagbe ɔ lɛ́ é gěgé nɔ lín ɖɔ “wɛn ɖagbe” e kúnkplá gbɛ yɔ̌yɔ́ Mawu tɔn e já é mɛ́ sin dín bá nyí nǔgbó. (Mat. 24:14; Ezek. 33:32) Mǐ ɖó ná cɔ́ mǐɖée bo ma wá jɛ nǔ xo kpɔ́n dó nǔ e Jexóva kplɔ́n mǐ lɛ́ é wú jí lěe yě nɔ wa gbɔn é ó. Bónú nǔ mɔ̌hun ma ná wá jɛ ǎ ɔ, mǐ ɖó ná kpo ɖo blǒbló wɛ bɔ nǔɖiɖi mǐtɔn ná ɖo dǒ lí d’é jí wɛ. Mǐ ní gbéjé ali e nu mǐ sixú wa mɔ̌ ɖe é atɔn kpɔ́n.
NƆ LIN TAMƐ DÓ GBƐXIXƆ Ɔ JÍ
8-9. Nɛ̌ tamɛ linlin dó gbɛxixɔ ɔ jí ka sixú ná hlɔ̌nhlɔ́n nǔɖiɖi mǐtɔn gbɔn?
8 Ali e nu mǐ sixú bló bɔ nǔɖiɖi mǐtɔn ná lí dǒ ɖe é ɖokpó wɛ nyí ɖɔ mǐ ná nɔ lin tamɛ dó gbɛxixɔ ɔ jí. Gbɛxixɔ ɔ ná mǐ gǎnjɛwú ɖɔ akpá Mawu tɔn lɛ́ ná jɛnu. Ényí mǐ nɔ lin tamɛ dó nǔ e wú è xɔ gbɛ nú mǐ é kpó lě do Jexóva sá vɔ̌ sɔ é kpó jí ɔ, mǐ nɔ bló bɔ nǔ e mǐ ɖi ɖɔ akpá e Mawu dó ɖɔ mǐ ná ɖu gbɛ e nyɔ́ hú gǎn é sín vǐví káká sɔ́yi é ná jɛnu é nɔ lí dǒ. Aniwú mǐ ka sixú ɖɔ mɔ̌?
9 Vɔ̌sísá tɛ́ lɛ́ gbɛxixɔ ɔ ka byɔ́? Jexóva sɛ́ nukɔngbéví tɔn e é yí wǎn ná bɔ é kpó é kpó vɛ́ tawun é dó sín jǐxwé bɔ è ji i, lobɔ é húzú gbɛtɔ́ maɖóblɔ̌. Hwenu e Jezu ɖo ayǐkúngban jí é ɔ, é dɛ ɖo wǔvɛ́ syɛ́nsyɛ́n alɔkpa lɛ́ bǐ nu. Énɛ́ gúdo ɔ, é ji ya, bo wá kú wǔvɛ́ kú. Axɔ́ ɖaxó wɛ Jexóva sú. Mawu wǎnyíyínɔ mǐtɔn ná yí gbe bɔ Vǐ tɔn ná se wǔvɛ́ bo kú, ɖó é ba ɖɔ mǐ ní ɖu gbɛ e nyɔ́ hú gǎn é sín vǐví nú hwenu kléwún ɖé kpowun wútu gbeɖé ǎ. (Jaan 3:16; 1 Pi. 1:18, 19) Ðó Jexóva sɛ́ Vǐ vívɛ́ná tɔn dó bónú é ná dó alɔ mǐ wútu ɔ, é ná wa nǔ e wú é kpé é bǐ bɔ mǐ ná nɔ gbɛ káká sɔ́yi ɖo gbɛ yɔ̌yɔ́ ɔ mɛ.
NƆ LIN TAMƐ DÓ HLƆ̌NHLƆ́N JEXÓVA TƆN JÍ
10. Sɔgbe xá Efɛ́zinu lɛ́ 3:20 ɔ, étɛ́ Jexóva ka sixú wa?
10 Ali wegɔ́ e nu mǐ sixú ná hlɔ̌nhlɔ́n nǔɖiɖi mǐtɔn ɖe é wɛ nyí gbɔn tamɛ linlin dó hlɔ̌nhlɔ́n Jexóva tɔn jí gblamɛ. É ɖó nǔwúkpíkpé ɔ, bo ná bló bɔ akpá e é dó lɛ́ é bǐ ná jɛnu. Akpá gbɛ ninɔ káká sɔ́yi ɖo gbɛ yɔ̌yɔ́ ɔ mɛ tɔn sín jijɛnu sixú cí nǔ e ma sixú nyɔ́ bló ǎ é ɖɔhun ɖo gbɛtɔ́ nukúnmɛ. Amɔ̌ hwɛhwɛ ɔ, nǔ e gbɛtɔ́ lɛ́ ma sixú bló gbeɖé gbéɖé ǎ lɛ́ é sín akpá wɛ Jexóva nɔ dó. Mawu Nǔbǐwúkpétɔ́ wɛ n’i. (Jɔb. 42:2; Mak. 10:27) Énɛ́ wú ɔ, ényí é dó nǔ e jí wǔ lɛ́ é sín akpá ɔ, é sɔ́ nɔ kpácá mǐ ǎ.—Xa Efɛ́zinu lɛ́ 3:20.
11. Nǎ kpɔ́ndéwú akpá jí wǔ e Jexóva dó lɛ́ é tɔn ɖokpó. (Kpɔ́n gbǎví “ Akpá jí wǔ e Jexóva dó bɔ yě jɛnu é ɖé lɛ́.”)
11 Mi nú mǐ ní gbéjé nǔ e é cí ɖɔ yě kún sixú jɛ ó, bɔ Jexóva d’akpá yětɔn nú togun tɔn ɖo hwexónu é ɖé lɛ́ kpɔ́n. É ná gǎnjɛwú Ablaxámu kpó Sala kpó ɖɔ yě ná ji vǐ, có yě ka ko nyí mɛxó. (Bǐb. 17:15-17) É lɛ́ ɖɔ nú Ablaxámu ɖɔ émí ná ná Kanáa to ɔ kúnkan tɔn. Ðo xwe mɔ̌kpán e kúnkan Ablaxámu tɔn, énɛ́ wɛ nyí Izlayɛ́li ví lɛ́ bló ɖo kannumɔgbénu ɖo Ejípu é mɛ ɔ, é sixú cí ɖɔ akpá énɛ́ kún ná jɛnu gbeɖé ó ɖɔhun. Amɔ̌, é wá jɛnu. Nukɔnmɛ ɔ, Jexóva ɖɔ ɖɔ Elizabɛ́ti e ko nyí mɛxó é ná ji vǐ. É lɛ́ ɖɔ nú Mali e ɖo alɔjí é ɖɔ, é ná ji vǐ súnnu émítɔn; énɛ́ ná zɔ́n bɔ akpá e Jexóva dó sín xwe afatɔ́n mɔ̌kpán ɖíe ɖo jikpá Edɛ́ni tɔn mɛ é ná jɛnu.—Bǐb. 3:15, nwt.
12. Gǎnjɛwú tɛ́ Jozuwée 23:14 kpó Ezayíi 55:10, 11 kpó ka ná mǐ dó hlɔ̌nhlɔ́n Jexóva tɔn wú?
12 Ényí mǐ nɔ lin tamɛ dó akpá Jexóva tɔn e è wlán ɖ’ayǐ lɛ́ é kpó jijɛnu yětɔn kpó jí ɔ, énɛ́ nɔ ná hlɔ̌nhlɔ́n nǔ e mǐ ɖi ɖɔ Jexóva ɖó hlɔ̌nhlɔ́n bo ná bló bɔ gbɛ yɔ̌yɔ́ ɔ ná wá é. (Xa Jozuwée 23:14; Ezayíi 55:10, 11.) Nǔɖiɖi syɛ́nsyɛ́n énɛ́ nɔ d’alɔ mǐ bɔ mǐ nɔ sɔ́ nǔ nú mǐɖée ganjí, bo nɔ d’alɔ mɛ ɖěvo lɛ́ bɔ yě nɔ mɔ nukúnnú jɛ mɛ ɖɔ akpá gbɛ yɔ̌yɔ́ ɔ tɔn e Mawu dó é kún nyí dlɔ̌ ó, é kún ka lɛ́ nyí xɛxó ó. Jexóva ɖésú tlɛ ɖɔ xó élɔ́ dó jǐnukúnsin yɔ̌yɔ́ ɔ kpó ayǐkúngban yɔ̌yɔ́ ɔ kpó wú: “Xó nǔgbó wɛ nyí xó énɛ́ lɛ́, bo nyí xó e wú è ná ɖeji dó lɛ́” é.—Nǔɖe. 21:1, 5.
NƆ WA NǓ ÐĚÐĚE NÁ ZƆ́N BƆ HWI KPÓ JEXÓVA KPÓ NÁ VƐ́ LƐ́ É
KPLÉ AGUN TƆN LƐ́
Nɛ̌ kplé lɛ́ ka sixú ná hlɔ̌nhlɔ́n nǔɖiɖi towe gbɔn? (Kpɔ́n akpáxwé 13)
13. Nɛ̌ kplé agun tɔn lɛ́ ka sixú ná hlɔ̌nhlɔ́n nǔɖiɖi mǐtɔn gbɔn?
13 Ali atɔngɔ́ e nu mǐ sixú ná hlɔ̌nhlɔ́n nǔɖiɖi mǐtɔn ɖe é wɛ nyí hwenu zínzán dó nǔ ɖěɖěe mǐ nɔ wa dó sɛn Mawu lɛ́ é takúnmɛ. Ði kpɔ́ndéwú ɔ, ɖ’ayi lěe mǐ nɔ ɖu vǐví kplé agun tɔn mǐtɔn lɛ́ tɔn gbɔn é wú. Anna e bló xwe mɔ̌kpán ɖo sinsɛnzɔ́ hwebǐnu tɔn sín akpáxwé vovo lɛ́ mɛ é ɖɔ: “Kplé lɛ́ d’alɔ mì bɔ nǔɖiɖi ce lí dǒ. Ényí nǔkplɔ́nmɛtɔ́ ɔ ná bo ma nyí nǔkplɔ́nmɛtɔ́ alɔsekpɛ́nnánɔ káká ɖé, alǒ ɖɔ nǔ yɔ̌yɔ́ ɖé ǎ ɔ, hwebǐnu wɛ un nɔ se nǔ e ná d’alɔ mì bɔ un ná mɔ nukúnnú jɛ nǔgbó Biblu tɔn ɖé mɛ d’é jí, bo lɛ́ ná hlɔ̌nhlɔ́n nǔɖiɖi ce é.” b É ɖo wɛn ɖɔ, xósin e nɔ ná hlɔ̌nhlɔ́n nǔɖiɖi mɛtɔn bɔ mɛ e nɔ wá kplé lɛ́ é nɔ ná lɛ́ é nɔ su nukún mǐ lɔ tɔn mɛ.—Hlɔ̌. 1:11, 12; 10:17.
SINSƐNZƆ́ Ɔ
Nɛ̌ mawuxóɖiɖɔ ka sixú ná hlɔ̌nhlɔ́n nǔɖiɖi towe gbɔn? (Kpɔ́n akpáxwé 14)
14. Nɛ̌ sinsɛnzɔ́ ɔ ka nɔ ná hlɔ̌nhlɔ́n nǔɖiɖi mǐtɔn gbɔn?
14 Mǐ nɔ lɛ́ ná hlɔ̌nhlɔ́n nǔɖiɖi mǐtɔn hwenu e mǐ ɖ’alɔ ɖo sinsɛnzɔ́ ɔ mɛ é. (Ebl. 10:23) Barbara e sɛn Jexóva nú xwe 70 jɛjí é ɖɔ: “Hwebǐnu wɛ un nɔ mɔ ɖɔ mawuxóɖiɖɔzɔ́ ɔ nɔ ná hlɔ̌nhlɔ́n nǔɖiɖi mɛtɔn. Lě do un ɖɔ xó nú mɛ ɖěvo lɛ́ dó akpá jí wǔ Jexóva tɔn lɛ́ wú sɔ é ɔ, mɔ̌ do wɛ nǔɖiɖi ce nɔ ɖo gbɛ, bo nɔ lɛ́ ɖó hlɔ̌nhlɔ́n sɔ.”
NǓKPLƆ́NKPLƆ́N MƐÐÉSÚNƆ TƆN
Nɛ̌ nǔkplɔ́nkplɔ́n mɛɖésúnɔ tɔn ka sixú ná hlɔ̌nhlɔ́n nǔɖiɖi towe gbɔn? (Kpɔ́n akpáxwé 15)
15. Nɛ̌ nǔkplɔ́nkplɔ́n mɛɖésúnɔ tɔn ka nɔ ná hlɔ̌nhlɔ́n nǔɖiɖi mǐtɔn gbɔn? (Lɛ̌ kpɔ́n ɖiɖe lɛ́.)
15 Nǔ ɖěvo e mǐ nɔ wa dó sɛn Mawu bɔ é nɔ ná hlɔ̌nhlɔ́n nǔɖiɖi mǐtɔn é wɛ nyí nǔkplɔ́nkplɔ́n mɛɖésúnɔ tɔn. Susan mɔ ɖɔ ényí è bló tuto bo nɔ kplɔ́n nǔ mɛɖésúnɔ ɔ, é nɔ d’alɔ tawun. É ɖɔ: “Ðo dimanche lɛ́ ɔ, un nɔ sɔ́ nǔ nú xóta Atɔxwɛ kplɔ́nkplɔ́n aklúnɔzángbla e jawě é tɔn. Ðo lundi kpó mardi kpó ɔ, un nɔ sɔ́ nǔ nú kplé aklúnɔzángbla tɛ́ntin tɔn. Azǎn e kpo lɛ́ é jí ɔ, un nɔ ɖu vǐví nǔkplɔ́nkplɔ́n mɛɖésúnɔ tɔn tɔn.” Ðó Susan nɔ xwedó nǔkplɔ́nkplɔ́n tɔn sín tuto hwebǐnu wútu ɔ, é nɔ ɖo hlɔ̌nhlɔ́n ná nǔɖiɖi tɔn wɛ. Irene e wa sinsɛnzɔ́ ɖo Hɔ̌nkan gbɛ ɔ tɔn mǐtɔn nú xwe mɔ̌kpán é mɔ ɖɔ nǔɖɔɖayǐ Biblu tɔn lɛ́ gbígbéjé kpɔ́n nɔ ná hlɔ̌nhlɔ́n nǔɖiɖi mɛtɔn. É ɖɔ: “Ényí un mɔ bónú nǔɖɔɖayǐ Jexóva tɔn lɛ́ jɛnu, káká jɛ gǒflɛ́mɛ e hwe hú gǎn lɛ́ é jí ɔ, é nɔ jí wǔ nú mì tawun.” c
“NǓ E UN ÐƆ Ɔ NÁ JƐ JƐ́N WƐ”
16. Nɛ̌ gǎnjɛwú e Jexóva ná Xabakúku é ka kan mǐ lɔ égbé gbɔn? (Eblée lɛ́ 10:36, 37)
16 Mɛsɛntɔ́ Jexóva tɔn ɖé lɛ́ ɖo nukún ɖó hwenu e gbɛ élɔ́ ná vɔ dó é wɛ sín hwenu línlín ɖíe. Ényí è kpɔ́n nǔ lěe gbɛtɔ́ nɔ kpɔ́n gbɔn é ɔ, è sixú lin ɖɔ nǔɖɔɖayǐ Mawu tɔn sín jijɛnu ko ɖo lǐnlín wɛ. Amɔ̌, Jexóva tuun lěe nǔ nɔ cí nú mɛsɛntɔ́ tɔn lɛ́ é. Nǔgbó ɔ, é ná gǎnjɛwú élɔ́ gbeyíɖɔ Xabakúku: “Nǔɖexlɛ́mɛ wɛ é nyí, bɔ è ko ɖó hwenu e é ná jɛ dó é. Hwe ɔ nu ko ɖo susu wɛ, bɔ é ka ná gblá ǎ. Nú hwe ɔ nu ná bo ɖo lǐnlín wɛ hǔn, nɔ te kpɔ́n, ɖó nǔ e un ɖɔ ɔ ná jɛ jɛ́n wɛ.” (Xab. 2:3) Xabakúku kɛ́ɖɛ́ wɛ ka ná ɖu le gǎnjɛwú énɛ́ e Mawu ná ɛ é tɔn a? Alǒ xó énɛ́ lɛ́ kan mǐ lɔmɔ̌ égbé wɛ a? Mawu sɔ́ d’ayi mɛ nú mɛsɛ́dó Pɔ́lu bɔ é zán xógbe énɛ́ lɛ́ nú klisánwun e ɖo nukún ɖó gbɛ yɔ̌yɔ́ ɔ wɛ kpó akpakpa sɔ́ mɛ kpó lɛ́ é. (Xa Eblée lɛ́ 10:36, 37.) Ɛɛn, mǐ sixú kú d’é jí ɖɔ ényí mǐ lin ɖɔ akpá e Mawu dó bo ná hwlɛ́n mǐ gán é sín jijɛnu ná bo ɖo lǐnlín wɛ ɔ, ‘é kún ná gblá ó, é ná jɛnu jɛ́n wɛ.’
17. Nɛ̌ nɔví nyɔ̌nu ɖokpó ka wa nǔ sɔgbe xá wě e Jexóva ɖe xá Xabakúku é gbɔn?
17 Mɛsɛntɔ́ Jexóva tɔn gěgé wa nǔ sɔgbe xá wěɖexámɛ Jexóva tɔn e ɖɔ ɖɔ è ní ‘ɖo te nɔ kpɔ́n’ wɛ é; yě tlɛ wa mɔ̌ nú xwe mɔ̌kpán. Ði kpɔ́ndéwú ɔ, Louise jɛ Jexóva sɛn jí ɖo 1939. É ɖɔ: “Hwenɛ́nu ɔ, un lin ɖɔ Aamagedɔ́ni ná wá cóbɔ un ná fó wěmaxɔmɛ linsinmɛ tɔn. Nǔ ka sɔ́ wá nyí mɔ̌ ǎ. Ée xwe lɛ́ ɖo yiyi wɛ é ɔ, tan Biblu tɔn e ɖɔ xó dó mɛ e nɔ te kpɔ́n Jexóva bónú é ná ɖe akpá tɔn lɛ́ é wú é xixa d’alɔ mì bɔ un nɔ te kpɔ́n Jexóva bónú é ná ɖe akpá tɔn lɛ́. Un xa nǔ dó Nɔwée, Ablaxámu, Jozɛ́fu kpó mɛ ɖěvo e nɔ te nú hwenu línlín cóbó mɔ ajɔ e sín akpá Jexóva dó nú yě lɛ́ é yí é wú. Kú e un nɔ kú d’é jí hwebǐnu ɖɔ akpá lɛ́ ná jɛnu é d’alɔ nyi kpó mɛ ɖěvo lɛ́ kpó, bɔ mǐ ɖó gǎnjɛwú ɖɔ gbɛ yɔ̌yɔ́ ɔ ná wá ɖo malínmálín mɛ.” Mɛ ɖěvo e ɖo Jexóva sɛn wɛ sín xwe mɔ̌kpán ɖíe lɛ́ é lɔ yí xó nú xó énɛ́.
18. Nɛ̌ nǔɖíɖó Jexóva tɔn lɛ́ kpínkpɔ́n ka nɔ ná hlɔ̌nhlɔ́n nǔ e mǐ ɖi ɖɔ gbɛ yɔ̌yɔ́ ɔ ná wá é gbɔn?
18 Nǔgbó wɛ ɖɔ gbɛ yɔ̌yɔ́ ɔ kún ko wá din ó. Amɔ̌, ɖ’ayi nǔ e ko tíin din é ɖé lɛ́ wú: Sunví lɛ́, atín lɛ́, kanlin lɛ́ kpó nɔzo towe lɛ́ kpó. Mɛ ɖěbǔ sixú ɖɔ ɖɔ nǔ énɛ́ lɛ́ kún tíin ó ǎ, ényí é ná bo tlɛ nyí ɖɔ ɖo hweɖénu ɔ, nǔ énɛ́ lɛ́ ma tíin ǎ ɔ nɛ́. Yě wá tíin, ɖó Jexóva dá yě wútu. (Bǐb. 1:1, 26, 27) Mawu mǐtɔn lɛ́vɔ́ d’akpá gbɛ yɔ̌yɔ́ ɖé tɔn. É ná ɖe akpá énɛ́. Ðo gbɛ yɔ̌yɔ́ énɛ́ mɛ ɔ, gbɛtɔ́ lɛ́ ná ɖó lanmɛ syɛ́n hunsin ɖagbe, lobo ná ɖu gbɛ víví káká sɔ́yi. Mǐ sixú kú d’é jí ɖɔ gbɛ yɔ̌yɔ́ énɛ́ ná wá hwenu e Mawu ɖó dó é.—Eza. 65:17; Nǔɖe. 21:3, 4.
19. Nɛ̌ a ka sixú ná hlɔ̌nhlɔ́n nǔɖiɖi towe gbɔn?
19 Din hwɛ̌ ɔ, zǎn ali e hun nú we lɛ́ é bǐ dó ná hlɔ̌nhlɔ́n nǔɖiɖi towe. Gbɛxixɔ ɔ ní nɔ su nukún towe mɛ hwebǐnu. Nɔ lin tamɛ dó hlɔ̌nhlɔ́n Jexóva tɔn jí. Nɔ wa nǔ ɖěɖěe ná zɔ́n bɔ hwi kpó Jexóva kpó ná vɛ́ lɛ́ é. Ényí a ɖo mɔ̌ wa wɛ ɔ, hwi lɔ sixú nɔ mɛ e “ɖi nǔ bo ɖó sɔxwixwe, bo nɔ mɔ nǔ e sín akpá Mawu dó ɔ yí, ɖó énɛ́ wú lɛ́ é” mɛ.—Ebl. 6:11, 12; Hlɔ̌. 5:5.
HAN 139 Kpɔ́n hwiɖée sɛ́dó ɖo gbɛ yɔ̌yɔ́ ɔ mɛ
a Égbé ɔ, mɛ gěgé nɔ xo nǔ kpɔ́n dó akpá gbɛ yɔ̌yɔ́ ɔ tɔn e Biblu dó é wú. Yě nɔ lin ɖɔ dlɔ̌ kpowun wɛ, lé xó énɛ́ lɛ́ mɛ́ sin dín bo ná nyí nǔgbó. Amɔ̌, mǐ kú d’é jí ɖɔ akpá Jexóva tɔn lɛ́ bǐ ná jɛnu. É ná bo tlɛ nyí mɔ̌ ɔ, mǐ ɖó ná dó gǎn, bá kpo ɖo hlɔ̌nhlɔ́n ná nǔɖiɖi mǐtɔn wɛ. Gbɔn nɛ̌ é? Xóta élɔ́ ná tínmɛ.
b È ɖyɔ́ nyǐkɔ ɖé lɛ́.
c È sixú mɔ xóta e ɖɔ xó dó nǔɖɔɖayǐ Biblu tɔn lɛ́ wú é gěgé ɖo xótala “Prophétie” glɔ́ ɖo Index des publications des témoins de Jéhovah mɛ. Ði kpɔ́ndéwú ɔ, kpɔ́n xóta “Dọdai Jehovah Tọn lẹ Nọ Mọ Hẹndi” ɖo Atɔxwɛ (Gungbe) 1er janvier 2008 mɛ.
