A ka xà Atɔxwɛ yaɖeyaɖe e tɔ́n wá yì lɛ é ganji à? É nyɔ́, kpɔ́n ɖɔ a ka sixu na xósin nú nǔkanbyɔ elɔ lɛ à jí:

Nɛ̌ mǐ ka ɖó na wà nǔ xá Klisanwun e gbigbɔ ɖè lɛ é gbɔn?

Gbejininɔ yetɔn nɔ sù nukún mǐtɔn mɛ; amɔ̌, mǐ ɖó na nɔ sɔ́ ye sù zɛ xwé wu ǎ. Mǐ ɖó na nɔ kan nǔ e kúnkplá yeɖesunɔ lɛ é byɔ ye dó nukúnɖiɖó yetɔn wu ǎ.—w20.01, wex. 29.

Nɛ̌ a ka sixu kúdeji ɖɔ Jehovah nɔ ɖ’ayi hwiɖesunɔ mɛtún ɔ wu gbɔn?

Biblu xlɛ́ ɖɔ é ko ɖó ayi wǔ we cobɔ è tlɛ wá jì we. É nɔ lɛ́ sè ɖɛ towe lɛ. É tuùn linlin towe lɛ kpo nǔ e ɖò ayi towe mɛ lɛ é kpo, bɔ nǔwiwa towe lɛ sixu hun xomɛ nú Jehovah alǒ vɛ́ n’i. (1 Tan. 28:9; Nǔx. 27:11) É dɔn we wá gɔ̌n tɔn.—w20.02, xwe. 12.

Kpɔ́ndéwú tɛ lɛ ka xlɛ́ hwenu e mǐ ɖó na ɖɔ xó dó é kpo hwenu e mǐ na nɔ abwɛ dó é kpo?

Kpo xomɛhunhun kpo wɛ mǐ nɔ ɖɔ xó dó Jehovah wu. Enyi mǐ mɔ bɔ mɛɖé ɖò ali nyanya ɖé mlɛ́ wɛ ɔ, mǐ nɔ kɛnu. Mɛxo agun tɔn lɛ nɔ ɖɔ xó dó ɖè wě xá mɛ, enyi é byɔ ɖó mɔ̌ ɔ nɛ. Mǐ nɔ ba na tuùn gǒflɛ́mɛ e kúnkplá azɔ̌ mǐtɔn ɖò tò ɖěɖee mɛ è gbɛ́ azɔ̌ ɔ ɖè é ǎ, mǐ ka nɔ lɛ́ na ɖɔ xó dó ye wu ǎ. Mǐ nɔ ɖè kpáxó lɛ gbà ǎ.—w20.03, wex. 20-21.

Nɛ̌ nǔvínúvíhwan e xó è ɖɔ ɖò Jowɛli wemata 2 mɛ lɛ é ka gbɔn vo nú ee xó Nǔɖexlɛ́mɛ wemata 9 ɖɔ lɛ é gbɔn?

Jowɛli 2:20-29 ɖɔ ɖɔ Mawu nya nǔvínúvíhwan ɔ dó zɔ, bo na sú nǔ e ye hɛn gblé lɛ é sín axɔ́. Enɛ gudo ɔ, Mawu na gbà gbigbɔ mímɛ́ tɔn kɔn dó mɛ jí. Akpáxwé nǔɖɔɖ’ayǐ ɔ tɔn enɛ jɛnu, hwenu e Babilɔnunu lɛ wá vunbla togun Izlayɛli tɔn é, bo lɛ́ wá jɛnu ɖò nukɔnmɛ. Nǔɖexlɛ́mɛ 9:1-11 ɖɔ xó dó nǔvínúnúhwan ɔ wu ɖò ali ɖé bɔ ye cí mɛ yí ami dó ɖè égbé tɔn lɛ e ɖò hwɛɖónúmɛ Mawu tɔn jlá wɛ sɔ́ta gbɛ̀ nyanya elɔ lɛ é ɖɔhun. Wɛn enɛ nɔ zɔ́n bɔ mɛ e ɖò gudo nú tuto gbɛ̀ ɔ tɔn lɛ é nɔ vo ɖebǔ ǎ.—w20.04, wex. 3-6.

Mɛ̌ ka nyí axɔ́su totaligbé tɔn ɔ égbé?

Russie kpo ahwan tɔn lɛ kpo. Ye gbɛ́ wɛnjijlazɔ́ ɔ bo nɔ lɛ́ ɖexlɛ́ ɖɔ emi gbɛ́ wǎn nú Kúnnuɖetɔ́ lɛ, b’ɛ nɛ xlɛ́ ɖɔ ye tɔ́n ahwan togun Mawu tɔn tlɔlɔ. Axɔ́su totaligbé tɔn ɔ nɔ ɖò agba hwlɛn xá axɔ́su tofɔligbé tɔn ɔ wɛ.—w20.05, wex. 13.

Jijɔ tɛnnɛ e è slɛ́ dó Galatinu lɛ 5:22, 23 mɛ lɛ é kɛɖɛ jɛn ‘gbigbɔ mímɛ́ nɔ na mɛ’ à?

Eǒ. Gbigbɔ mímɛ́ nɔ d’alɔ mǐ bɔ mǐ nɔ sɔnǔ nú jijɔ ɖaaɖagbe ɖevo lɛ, ɖi nǔjlɔjlɔwiwa. (Efɛ. 5:8, 9)—w20.06, wex. 17.

Ðɔ awovínú e ɖò nǔ e kúnkplá mɛɖesunɔ lɛ é sísɔ́ ɖó tɛn Ɛntɛnɛti tɔn e jí è nɔ zun xɔ́ntɔn ɖè lɛ é jí é ɖokpo.

Nǔ e a nɔ sɔ́ ɖ’eji lɛ é sixu zɔ́n bɔ mɛ lɛ lin ɖɔ a nɔ yí nu gò, bo kún nɔ sɔ́ hwiɖée hwe ó.—w20.07, wex. 6-7.

Etɛ Klisanwun sinsɛnzɔ́watɔ́ lɛ ka sixu kplɔ́n ɖò hwehutɔ́ alɔsekpɛ́nnanɔ lɛ gɔ́n?

Ye nɔ wà azɔ̌ ɖò hwenu e ye sixu yawǔ mɔ hweví wlí é kpo fí e ye sixu yawǔ mɔ ye ɖè é kpo. Ye kplɔ́n lee ye na zán azɔ̌wanú e jɛxa lɛ gbɔn é. Ninɔmɛ lɛ na bo ɖò huzuhuzu wɛ ɔ, ye nɔ ɖò azɔ̌ wà wɛ kpo akɔ́nkpinkpan kpo. Mǐ sixu wà nǔ ɖokpo ɔ ɖò sinsɛnzɔ́ mǐtɔn mɛ. —w20.09, wex. 5.

Ðɔ ali e nu mǐ sixu d’alɔ Biblu kplɔntɔ́ mǐtɔn lɛ bɔ wanyiyi e ye ɖó nú Jehovah é na gɔ́ngɔ́n d’eji ɖè é ɖé lɛ.

Mǐ sixu dó wusyɛn lanmɛ nú ye ɖɔ ye ni nɔ xà Biblu gbè bǐ gbè, bo nɔ lin tamɛ dó nǔ e ye xà é jí. Mǐ sixu lɛ́ kplɔ́n ɖɛxixo ye.—w20.11, wex. 4.

Mɛ̌ mɛ̌ e xó elɔ lɛ ka kan: “Mɛ e ɖò bǔ xá Klisu lɛ bǐ ɔ, Mawu na fɔ́n ye sín kú”?—1 Kɔ. 15:22.

Ðiɖɔ wɛ mɛsɛ́dó Pɔlu ɖè ɖɔ è na fɔ́n mɛ lɛ bǐ sín kú ǎ. Klisanwun yí ami dó ɖè ɖěɖee ‘Mawu ylɔ́ bɔ ye ɖò bǔ xá Klisu Jezu lɛ é’ xó ɖɔ wɛ é ɖè. (1 Kɔ. 1:2; 15:18)—w20.12, wex. 5-6.

Enyi è huzu mɛ yí ami dó ɖè lɛ ɖò “nukún xwixwe ɖokpo” mɛ gudo, “hwenu e kpɛn gudogudo tɔn ɔ na ɖɔ nǔ é” ɔ, etɛ ye ka na wà?—1 Kɔ. 15:51-53.

Ye na xwedó Klisu, bo na nyí lɛngbɔ̌nyitɔ́ nú gbɛtɔ́ lɛ bɔ acɛkpikpa yetɔn na syɛn gankpo ɖɔhun. (Nǔɖe. 2:26, 27)—w20.12, wex. 12-13.