1. Táan kléwún ɖé jɛ nukɔn nú kú Jezu tɔn ɔ, étɛ́ é ka ɖɔ nú dǎnúwatɔ́ e ɖo akpá tɔn lɛ́ é ɖokpó? (Luk. 23:39-43)

 JEZU kpó dǎnúwatɔ́ we e è xwe nyi atín wú ɖo akpá tɔn lɛ́ é kpó ɖo wǔvɛ́ se wɛ, hwenu e gbɔjɛ yětɔn ɖo xwixwɛ wɛ é. (Luk. 23:32, 33) Dǎnúwatɔ́ we lɛ́ bǐ wɛ ɖo xó nyanya ɖɔ dó Jezu wú wɛ, bɔ énɛ́ xlɛ́ nyi wɛn ɖɔ yě kún nyí ahwanvú tɔn lɛ́ ó. (Mat. 27:44; Mak. 15:32) Amɔ̌, mɛ ɖokpó ɖo yě mɛ bo húzú linlin. É ɖɔ: “Jezu, flín mì hwenu e a ná byɔ́ Axɔ́súɖuto towe mɛ é.” Jezu ɖɔ: “Má ɖɔ nǔgbó nú we égbé, a ná nɔ kpɔ́ xá mì ɖo palaɖísi mɛ.” (Xa Luki 23:39-43.) Nǔ ɖěbǔ xlɛ́ ɖɔ dǎnúwatɔ́ énɛ́ yí gbe nú wɛn e ɖɔ xó dó “Axɔ́súɖuto jǐxwé tɔn” wú, bɔ Jezu jlá ɖo sinsɛnzɔ́ tɔn hwenu é ǎ. Gɔ́ ná ɔ, Jezu ɖɔ gbeɖé nú nya ɔ ɖɔ é ná nɔ Axɔ́súɖuto énɛ́ mɛ ɖo jǐxwé ǎ. (Mat. 4:17) Palaɖísi sɔgúdo tɔn e ná tíin ɖo ayǐkúngban jí é xó ɖɔ wɛ é ɖe. Aniwú mǐ ka sixú ɖɔ mɔ̌?

2. Étɛ́ ka xlɛ́ ɖɔ dǎnúwatɔ́ e hwɛ tɔn lɛ́ vɛ́ ná é nyí Jwifu?

² É cí ɖɔ Jwifu wɛ nú dǎnúwatɔ́ e hwɛ tɔn lɛ́ vɛ́ ná é ɖɔhun. Dǎnúwatɔ́ énɛ́ ɖɔ nú wegɔ́ tɔn ɖɔ: “Hwɛ nɔ ɖi xɛsi nú Mawu ɖěbǔ ǎ wɛ a? Hwɛ ɖokpó ɔ wɛ è ɖó nú hwi lɔmɔ̌ sín?” (Luk. 23:40) Jwifu lɛ́ ɔ, Mawu ɖokpó wɛ yě nɔ sɛn, amɔ̌, akɔta ɖě lɛ́ ɔ, Mawu gěgé wɛ yě ɖi nǔ ná. (Tín. 20:2, 3; 1 Kɔ. 8:5, 6) Ényí dǎnúwatɔ́ we énɛ́ lɛ́ ko nyí Kosi wɛ ɔ, nǔ e é ná ko kanbyɔ́ é wɛ nyí: “Hwɛ nɔ ɖi xɛsi nú mawu lɛ́ ɖěbǔ ǎ wɛ a?” Gɔ́ ná ɔ, “togun Izlayɛ́li tɔn e cí lɛ̌ngbɔ́ búbú ɖɔhun é” gbé mɛ wɛ è sɛ́ Jezu dó, é nyí dó Kosi lɛ́ gbé mɛ ǎ. (Mat. 15:24) Mawu bló bɔ Izlayɛ́li ví lɛ́ tuun ɖɔ é ná fɔ́n mɛkúkú lɛ́. Dǎnúwatɔ́ ɔ, ée hwɛ tɔn lɛ́ vɛ́ ná é sixú ko tuun xó énɛ́, bɔ lěe xó éɖésúnɔ tɔn lɛ́ xlɛ́ gbɔn é ɔ, Jexóva ná fɔ́n Jezu bɔ é ná kp’acɛ dó Axɔ́súɖuto Mawu tɔn nu. É cí ɖɔ nya ɔ ɖo nukún ɖó wɛ ɖɔ Mawu ná fɔ́n émíɖésúnɔ sín kú ɖɔhun.

3. Étɛ́ ka sixú ko wá dǎnúwatɔ́ e hwɛ tɔn lɛ́ vɛ́ ná é sín ayi mɛ hwenu e Jezu ɖɔ palaɖísi xó é? Tínmɛ. (Bǐbɛ́mɛ 2:15)

 ³ Ðó Jwifu wɛ dǎnúwatɔ́ énɛ́ e hwɛ tɔn lɛ́ vɛ́ ná é nyí wútu ɔ, é ná ko tuun nǔ dó Adámu kpó Ɛvu kpó, gɔ́ nú palaɖísi e mɛ Jexóva sɔ́ yě ɖó é wú. Hǔn, dǎnúwatɔ́ ɔ sixú ko tuun ɖɔ palaɖísi e xó ɖɔ wɛ Jezu ɖe é ɔ, jikpá ɖaaɖagbe ɖé xó ɖɔ wɛ é ná ko ɖe.—Xa Bǐbɛ́mɛ 2:15.

4. Étɛ́ xó e Jezu ɖɔ nú dǎnúwatɔ́ lɛ́ ɖokpó é ka ɖó ná sísɛ́ mǐ bɔ mǐ ná wa?

⁴ Xó e Jezu ɖɔ nú dǎnúwatɔ́ ɔ é ɖó ná sísɛ́ mǐ bɔ mǐ ná lin tamɛ dó lěe gbɛ ná cí ɖo palaɖísi mɛ é wú. Din hwɛ̌ ɔ, acɛ e axɔ́sú Salomɔ́ɔ kpa ɖo fífá mɛ é sixú kplɔ́n nǔ tají ɖé mǐ dó palaɖísi wú. Gɔ́ ná ɔ, mǐ sixú ɖó nukún ɖɔ Jezu e hú gǎn Salomɔ́ɔ é, kpó mɛ e ná kp’acɛ xá ɛ lɛ́ é kpó ná bló bɔ mǐ ná nɔ ninɔmɛ ɖagbe mɛ ɖo ayǐkúngban jí. (Mat. 12:42) É ɖo wɛn ɖɔ, “lɛ̌ngbɔ́ ɖěvo lɛ́” ná ba ná tuun nǔ e yě ná wa, bá jɛxá bo ná nɔ gbɛ káká sɔ́yi ɖo palaɖísi mɛ é.—Jaan 10:16.

5. Nɛ̌ a ka lin ɖɔ gbɛ ná cí ɖo palaɖísi mɛ?

⁵ Ényí a ɖo tamɛ lin dó lěe gbɛ ná cí ɖo palaɖísi mɛ é jí wɛ ɔ, étɛ́ ka nɔ wá ayi mɛ nú we? Jikpá ɖɛkpɛ ɖɛkpɛ ɖé, ɖi jikpá Edɛ́ni tɔn mɔ̌ sixú ko nɔ wá ayi mɛ nú we. (Bǐb. 2:7-9) A sixú nɔ flín nǔɖɔɖayǐ e Micée wlán, bo ɖɔ ɖɔ mɛ e ɖo togun Mawu tɔn mɛ lɛ́ é “ɖokpó ɖokpó ná vo ɖo vǐwuntín tɔn kpó fígitín tɔn kpó sá” é. (Micée 4:3, 4) É ka sixú lɛ́ nyí ɖɔ e Biblu ɖɔ ɖɔ nǔɖuɖu ná tíin kɔn nyi kpɔ́ é wɛ nɔ wá ayi mɛ nú we. (Ðɛh. 72:16; Eza. 65:21, 22) Énɛ́ wú ɔ, a sixú mɔ hwiɖée sɛ́dó ɖo jikpá ɖɛkpɛ ɖɛkpɛ ɖé mɛ, bo ɖo ayǐjínjɔ́n ɖo távo tó, bɔ nǔɖuɖu víví gbɔn kámɛ gomɛ. A sixú dó nukún wǎn ɖaaɖagbe e atín lɛ́ kpó folówa lɛ́ kpó ná nɔ ɖe é mɛ kpɔ́n. Gɔ́ ná ɔ, a sixú nɔ lɛ́ dó nukún lěe xwédo towe, xɔ́ntɔn towe lɛ́ kpó mɛ e fɔ́n sín kú lɛ́ é kpó ɖo kpɔ́, bo ɖo nǔ ko wɛ, lobo lɛ́ ɖo hwenu zán ɖó kpɔ́ wɛ é mɛ kpɔ́n. Nǔ énɛ́ lɛ́ ɖě nyí dlɔ̌ ǎ. Nǔxokpɔ́n ɖ’é mɛ ǎ; nǔ énɛ́ lɛ́ ná wá jɛ ɖo ayǐkúngban ɔ jí. Amɔ̌, è ná lɛ́ w’azɔ̌ e ná jɛmɛ nú mɛ lɛ́ é ɖo palaɖísi mɛ.

6. Étɛ́ mǐ ka ná wa ɖo palaɖísi mɛ? (Kpɔ́n ɖiɖe ɔ.)

⁶ Jexóva dá mǐ bɔ mǐ ná nɔ ɖu vǐví azɔ̌ e mǐ nɔ wa é tɔn. (Nǔt. 2:24) Alɔnu mǐtɔn ná ján tawun ɖo Axɔ́súɖuɖu xwe afatɔ́n tɔn Klísu tɔn hwenu. Mɛ e ná xo wǔvɛ́ ɖaxó ɔ zlɛ́ lɛ́ é, káká jɛ mɛ lǐvi mɔ̌kpán e è ná fɔn sín kú lɛ́ é jí ná ɖó hudó nǔzínzán, nǔɖuɖu kpó fí e yě ná nɔ dɔ́ é kpó tɔn. Bo ná dó sú hudó énɛ́ lɛ́ sín do ɔ, é ná byɔ́ ɖɔ mǐ ní w’azɔ̌ e ná hun xomɛ nú mǐ lɛ́ é gěgé. Lěe é byɔ́ ɖɔ Adámu kpó Ɛvu kpó ní kpé nukún dó jikpá e nyí xwé yětɔn é wú gbɔn é ɔ, è ná jɔ wǔ mǐ lɔ bɔ mǐ ná kpé nukún dó palaɖísi ɔ wú. È ná kplɔ́n nǔ gbɛtɔ́ lǐvi mɔ̌kpán e è ná fɔ́n sín kú, bɔ yě ma tuun nǔ káká ɖé dó Jexóva kpó linlin tɔn lɛ́  kpó wú ǎ lɛ́ é; è ná lɛ́ d’alɔ gbejínɔtɔ́ e ko kú xóxó cóbɔ Jezu wá ayǐkúngban jí lɛ́ é, bɔ yě ná kplɔ́n nǔ gěgé. Dǒ nukún lěe azɔ̌ énɛ́ ná víví sɔ é mɛ kpɔ́n!

7. Gǎnjɛwú tɛ́ mǐ ka sixú ɖó? Aniwú?

⁷ Mǐ sixú ɖeji ɖɔ ɖo palaɖísi mɛ ɔ, mǐ ná nɔ fífá mɛ, bo ná mɔ nǔ e sín hudó mǐ ɖó lɛ́ é bǐ, lobɔ nǔ lɛ́ bǐ ná lɛ́ ɖo tuto jí. Aniwú? Ðó Jexóva ko xlɛ́ lěe gbɛ ná cí ɖo acɛkpikpa Vǐ tɔn tɔn glɔ́ é mǐ. Kpɔ́ndéwú tɔn wɛ nyí tan e kúnkplá acɛ e axɔ́sú Salomɔ́ɔ kpa é.

8. Nɛ̌ xó e ɖo Ðɛhan 37:10, 11, 29 mɛ lɛ́ é ka jɛnu ɖo hwexónu gbɔn? (Kpɔ́n “Nǔ e nǔxatɔ́ lɛ́ kanbyɔ́ lɛ́ é” ɖo Atɔxwɛ élɔ́ mɛ.)

⁸ Mawu sɔ́ dó ayi mɛ nú axɔ́sú Davídi bɔ é wlán nǔ dó lěe gbɛ ná cí hwenu e axɔ́sú sɔgúdo tɔn e nyí nǔnywɛ́tɔ́, bo lɛ́ nyí gbejínɔtɔ́ é ná kp’acɛ é wú. (Xa Ðɛhan 37:10, 11, 29.) Hwɛhwɛ wɛ mǐ nɔ xa Ðɛhan 37:11 nú mɛ ɖěvo lɛ́, hwenu e mǐ ɖo xó ɖɔ nú yě dó palaɖísi e ja é jí wɛ é. Mǐ ɖó hwɛjijɔ ɖagbe e wú mǐ ná wa mɔ̌ é, ɖó Jezu ɖe xó sín wěmafɔ énɛ́ mɛ ɖo Mawuxóɖiɖɔ só jí tɔn tɔn hwenu, dó ɖo ɖiɖexlɛ́ wɛ ɖɔ é ná wá jɛnu ɖo sɔgúdo. (Mat. 5:5) Amɔ̌, xó e Davídi ɖɔ lɛ́ é lɛ́ xlɛ́ lěe gbɛ ná cí ɖo axɔ́sú Salomɔ́ɔ hwenu é. Hwenu e Salomɔ́ɔ kp’acɛ ɖo Izlayɛ́li é ɔ, togun Mawu tɔn ɖu vǐví fífá kpó vivomɛninɔ kpó bǔnɔ ɖé tɔn, ɖo to e mɛ “anɔ̌sin kpódó wǐin kpó gɔ́” é. Mawu ɖɔ: “Ényí mi nɔ nyi sɛ́n ce lɛ́ ɔ, . . . un ná bló bɔ ayi ná j’ayǐ nú mi ɖo to ɔ mɛ. Nú mi dɔ́ amlɔ zǎnmɛ ɔ, mɛ ɖěbǔ ná wá dó tagba nú mi ǎ.” (Lev. 20:24; 26:3, 6) Akpá énɛ́ lɛ́ jɛnu hwenu e Salomɔ́ɔ ɖo acɛ kpa wɛ é. (1 Tan 22:9; 29:26-28) Gɔ́ ná ɔ, Mawu d’akpá ɖɔ mɛ nyanya ɖěɖěe nɔ sɛn mawu ɖěvo lɛ́ é ‘kún sɔ́ ná ɖe ó.’ (Ðɛh. 37:10) Énɛ́ wú ɔ, xó e è ɖɔ ɖo Ðɛhan 37:10, 11, 29 mɛ lɛ́ é ko jɛnu wá yi, bo ka ná lɛ́ jɛnu ɖo sɔgúdo.

9. Étɛ́ axɔ́si Saba tɔn ka ɖɔ dó axɔ́sú Salomɔ́ɔ sín acɛkpikpa wú?

⁹ Axɔ́si Saba tɔn se fífá kpó vivomɛninɔ kpó e sín vǐví ɖu wɛ akɔta Izlayɛ́li tɔn ɖe ɖo acɛkpikpa Salomɔ́ɔ tɔn glɔ́ é. Énɛ́ wú ɔ, é gosín to línlín e mɛ é ɖe é káká bo wá Jeluzalɛ́mu  bá kpɔ́n nǔ lɛ́ kpó nukún kpó. (1 Axɔ́. 10:1) Ée axɔ́si ɔ kpɔ́n lěe yi gbɔn wɛ nǔ lɛ́ ɖe ɖo axɔ́súɖuto Salomɔ́ɔ tɔn mɛ é céɖécéɖé gúdo é ɔ, é ɖɔ: “Nǔ e un ka wá mɔ ɖo fí din lɛ́ ɔ, un se vlɔ̌ɖówe cóbó wá fí ǎ. . . . Nǔ nyɔ́ nú mɛ towe lɛ́, nǔ nyɔ́ nú mɛsɛntɔ́ towe lɛ́; yě nɔ ɖo nukɔn towe hwebǐnu, bo nɔ ɖo nǔnywɛ́ yí ɖo así towe wɛ.” (1 Axɔ́. 10:6-8) Amɔ̌, lěe nǔ lɛ́ yi gbɔn ɖo acɛkpikpa Salomɔ́ɔ tɔn glɔ́ é ɔ, xlɛ̌ nǔ e Jexóva ná wá nú gbɛtɔ́ lɛ́ ɖo acɛkpikpa Vǐ tɔn Jezu tɔn glɔ́ é tɔn kpowun wɛ.

10. Ali tɛ́ lɛ́ nu Jezu ka hú gǎn Salomɔ́ɔ ɖe?

¹⁰ Jezu hú gǎn Salomɔ́ɔ ɖo ali lɛ́ bǐ nu. Salomɔ́ɔ ɔ, gbɛtɔ́ hwɛhutɔ́ wɛ n’i, bɔ é hu hwɛ syɛ́nsyɛ́n gěgé; nǔ énɛ́ lɛ́ e é wa lɛ́ é dɔn togun Mawu tɔn dó hɔzɔ mɛ. Amɔ̌ Jezu ɔ, Acɛkpatɔ́ e ma ɖó blɔ̌ ǎ, bo ma ka nɔ lɛ́ wa nǔ nyi do ǎ é wɛ n’i. (Luk. 1:32; Ebl. 4:14, 15) Satáan tɛ́n Jezu kpɔ́n syɛ́nsyɛ́n có, Jezu ka nɔ gbejí nú Mawu. Klísu ko xlɛ́ ɖɔ émí kún ná hu hwɛ, alǒ wa nǔɖé bɔ é ná dɔn toví Axɔ́súɖuto ɔ tɔn gbejínɔtɔ́ lɛ́ dó hɔzɔ mɛ gbeɖé ó. Axɔ́sú ɖagbe hú gǎn e mǐ sixú ɖó é wɛ n’i.

11. Mɛ̌ mɛ̌ e ka ná kp’acɛ xá Jezu?

¹¹ Jezu kpó mɛ 144000 e ná kp’acɛ xá ɛ lɛ́ é kpó ná kpé nukún dó gbɛtɔ́ lɛ́ wú, bo ná bló bɔ linlin e Mawu ɖó nú ayǐkúngban ɔ é ná jɛnu. (Nǔɖe. 14:1-3) Mɛ énɛ́ lɛ́ dɛ ɖo mɛtɛ́nkpɔ́n gěgé kpó wǔvɛ́ gěgé kpó nu hwenu e yě nɔ gbɛ ɖo ayǐkúngban ɔ jí é, énɛ́ wú ɔ, yě ná mɔ nukúnnú jɛ wǔvɛ́ e se wɛ mɛ e ɖo ayǐkúngban ɔ jí lɛ́ é ɖe é wú. Étɛ́ mɛ énɛ́ lɛ́ e ná kp’acɛ xá Jezu é ka ná wa tawun?

12. Azɔ̌ tɛ́ Jexóva ka sɔ́ d’así nú mɛ 144000 lɛ́?

¹² Azɔ̌ e è sɔ́ d’así nú Jezu kpó mɛ e ná kp’acɛ xá ɛ lɛ́ é kpó é zɛ ée è sɔ́ d’así nú Salomɔ́ɔ é wú flaflá tɔn. Mɛ lǐvi mɔ̌kpán e ɖo to ɖokpó kpowun mɛ é wú jɛ́n Izlayɛ́li xɔ́sú énɛ́ ná kpé nukún dó. Amɔ̌, mɛ ɖěɖěe ɖo acɛ kpa wɛ ɖo Axɔ́súɖuto Mawu tɔn mɛ lɛ́ é ná d’alɔ bɔ è ná kpé nukún dó gbɛtɔ́ lǐva mɔ̌kpán wú gbɔn gbɛ ɔ bǐ mɛ. Wǔjɔmɛ jí wǔ ɖé wɛ nyí énɛ́ bɔ Jexóva sɔ́ d’así nú mɛ 144000 lɛ́!

13. Azɔ̌ bǔnɔ tɛ́ mɛ ɖěɖěe ná kp’acɛ xá Jezu lɛ́ é ka ná wa?

¹³ Jezu ɖɔhun ɔ, mɛ 144000 lɛ́ ná nyí axɔ́sú kpó vɔ̌sánúxwlémawutɔ́ kpó. (Nǔɖe. 5:10) Ðo Mɔyízisɛ́n ɔ glɔ́ ɔ, vɔ̌sánúxwlémawutɔ́ lɛ́ wɛ nyí mɛ nukɔntɔn e nɔ d’alɔ togun ɔ bɔ é nɔ nɔ ganjí ɖo agbaza mɛ, bo nɔ lɛ́ sɛkpɔ́ Jexóva é. ‘Yɛ nǔ ɖagbe e jawě lɛ́ tɔn’ wɛ Sɛ́n ɔ nyí, énɛ́ wú ɔ, é sɔgbe ɖɔ è ní wá gbeta ɔ kɔn ɖɔ mɛ e ná kp’acɛ xá Jezu lɛ́ é ná d’alɔ togun Mawu tɔn bɔ é ná nɔ ganjí ɖo agbaza mɛ, lobo lɛ́ sɛkpɔ́ Jexóva. (Ebl. 10:1) Din hwɛ̌ ɔ, mǐ tuun lěe mɛ énɛ́ lɛ́ e ná nyí axɔ́sú kpó vɔ̌sánúxwlémawutɔ́ kpó lɛ́ é ná ɖɔ xó xá toví Axɔ́súɖuto ɔ tɔn e ɖo ayǐkúngban jí lɛ́ é gbɔn é ǎ. Ðěbǔ wɛ Jexóva ná bo to nǔ lɛ́ gbɔn ɔ, mǐ sixú ɖeji ɖɔ ɖo palaɖísi e ja é mɛ ɔ, è ná xlɛ́ ali e sín hudó mɛ ɖěɖěe ɖo ayǐkúngban ɔ jí lɛ́ é ná ɖó é yě.—Nǔɖe. 21:3, 4.

14. Étɛ́ ka dɔn “lɛ̌ngbɔ́ ɖěvo lɛ́” kpó nɔví Klísu tɔn lɛ́ kpó cá?

¹⁴ Jezu nɔ ylɔ́ mɛ ɖěɖěe ná kp’acɛ xá ɛ lɛ́ é ɖɔ “lɛ̌ngbɔ́hwan kpɛví.” (Luk. 12:32) É lɛ́ ɖɔ xó dó gbɛ̌ta ɖěvo wú, bo ylɔ́ yědɛɛ lɛ́ ɖɔ “lɛ̌ngbɔ́ ɖěvo lɛ́.” Gbɛ̌ta we énɛ́ lɛ́ bǐ ná húzú lɛ̌ngbɔ́hwan ɖokpó. (Jaan 10:16) Gbɛ̌ta we énɛ́ lɛ́ ko ɖo azɔ̌ wa ɖó kpɔ́ wɛ, bo ka ná lɛ́ kpo ɖ’é wú hwenu e ayǐkúngban ɔ ná húzú palaɖísi é. Zaanɖé din ɔ, é ɖo wɛn ɖɔ “lɛ̌ngbɔ́hwan kpɛví” ɔ ná ɖo jǐxwé, bɔ mɛ ɖěɖěe nyí “lɛ̌ngbɔ́ ɖěvo lɛ́” é ná ɖó nukúnɖíɖó ɔ bá ɖu gbɛ  víví káká sɔ́yi ɖo ayǐkúngban jí. Amɔ̌, nǔɖé lɛ́ tíin bɔ “lɛ̌ngbɔ́ ɖěvo lɛ́” ɖó ná wa din, cóbá jɛxá bá nɔ gbɛ ɖo palaɖísi mɛ.

15. (a) Nɛ̌ “lɛ̌ngbɔ́ ɖěvo lɛ́” ka nɔ wa nǔ alɔ ɖo alɔ mɛ xá nɔví Klísu tɔn lɛ́ gbɔn? (b) Nɛ̌ a ka sixú wa nǔ nɔví e ɖo atínkɛ́nsatɛn ɔ é ɖɔhun gbɔn? (Kpɔ́n ɖiɖe ɔ.)

¹⁵ Ali ɔ hun nú dǎnúwatɔ́ e hwɛ tɔn lɛ́ vɛ́ ná é, nú é ná ɖe xlɛ́ ɖɔ nǔ e Klísu wa nú émí é su nukún émítɔn mɛ cóbó kú ǎ. Amɔ̌, mǐ mɛ e nyí lɛ̌ngbɔ́ ɖěvo lɛ́” é tɔn nyí mɔ̌ ǎ; ali gěgé wɛ hun nú mǐ din, bɔ mǐ ná ɖe lěe nǔ cí nú mǐ dó Jezu wú é xlɛ́. Ði kpɔ́ndéwú ɔ, mǐ nɔ xlɛ́ ɖɔ mǐ yí wǎn n’i gbɔn lěe mǐ nɔ d’alɔ nɔví lɛ́ gbɔn é gblamɛ. Jezu ɖɔ ɖɔ lěe lɛ̌ngbɔ́ lɛ́ nɔ gǔdo nú nɔví émítɔn lɛ́ gbɔn é wú wɛ émí ná zɔn dó, dó ɖɔ hwɛ xá yě. (Mat. 25:31-40) Ényí mǐ nɔ d’alɔ nɔví Klísu tɔn lɛ́ kpó kanɖódónǔwú kpó ɖo wɛnɖagbejíjlá kpó nǔ kplɔ́nkplɔ́n mɛ lɛ́ bónú yě ná húzú ahwanvú kpó sín azɔ̌ ɔ mɛ hǔn, gǔdo nɔ nú yě wɛ mǐ ɖe mɔ̌ nɛ́. (Mat. 28:18-20) Énɛ́ wú wɛ mǐ jló ná zán azɔ̌wanú Biblu kplɔ́nkplɔ́n tɔn e è sɔ́ nǔ ná nú mǐ lɛ́ é ganjí; wěma Ðu gbɛ víví káká sɔ́yi! ɖo yě mɛ. Ényí a ma ko ɖo nukún kpé dó Biblu kplɔ́nkplɔ́n ɖé wú wɛ ǎ hǔn, tɛ́n kpɔ́n bo xwlé Biblu kplɔ́nkplɔ́n mɛ gěgé lěe a kpé wú gbɔn é.

16. Étɛ́ lɛ́ mǐ ka sixú wa din bo ná dó sɔ́ nǔ ɖ’ayǐ bá nɔ gbɛ ɖo palaɖísi mɛ?

¹⁶ Mǐ ɖó ná nɔ te káká bo jɛ palaɖísi mɛ, cóbó ná húzú mɛ alɔkpa e Jexóva ba ɖɔ mǐ ní nyí é ǎ. Din hwɛ̌ ɔ, mǐ sixú nɔ dó gǎn, bo nɔ ɖɔ nǔgbó ɖo xó mǐtɔn lɛ́ kpó nǔwiwa mǐtɔn lɛ́ kpó mɛ, lobo nɔ lɛ́ nɔ jlɛ̌ jí ɖo lěe mǐ nɔ zán gbɛ gbɔn é linu. Gɔ́ ná ɔ, mǐ sixú nɔ gbejí nú Jexóva, mɛ e mǐ da é kpó klisánwun hǎtɔ́ lɛ́ kpó. Ényí mǐ nɔ se tónú nú Jexóva ɖo gbɛ nyanya élɔ́ mɛ din ɔ, é ná bɔ wǔ nú mǐ bɔ mǐ ná se tónú n’i ɖo palaɖísi mɛ. Mǐ sixú lɛ́ sɔ́ nǔ nú jijɔ kpó nǔwúkpíkpé kpó e ná nyɔ́ zán ɖo gbɛ yɔ̌yɔ́ ɔ mɛ é ɖé lɛ́. Kpɔ́n xóta “A ka ɖo gbesisɔmɛ bo ná ‘ɖu gǔ ayǐkúngban ɔ tɔn’ a?” éé ɖo Atɔxwɛ élɔ́ mɛ é.

17. Hwɛ e mǐ hu wá yi lɛ́ é ɖó ná nyí agban bo ɖo mǐ kpɛn wɛ wɛ a? Tínmɛ.

¹⁷ Mǐ ɖó ná lɛ́ zlɔ́n hwɛ syɛ́nsyɛ́n e mǐ hu wá yi, bɔ agban tɔn ɖo mǐ kpɛn wɛ lɛ́ é. É ɖo wɛn ɖɔ mǐ kún ná gán jɛ vɔ̌sísá gbɛxɔnúmɛ tɔn ɔ  kan mɛ, bo ‘sɔ́ jlǒ dó hu hwɛ’ ó. (Ebl. 10:26-31) Amɔ̌, mǐ sixú kú d’é jí ɖɔ ényí mǐ lɛ́ kɔ sín hwɛ syɛ́nsyɛ́n e mǐ hu é ɖé gúdo nǔgbó nǔgbó, byɔ́ alɔdó Jexóva kpó mɛxó agun tɔn lɛ́ kpó tɔn, lobo húzú lěe zán gbɛ gbɔn wɛ mǐ ɖe é ɔ, é ná sɔ́ hwɛ kɛ mǐ bǐ mlɛ́mlɛ́. (Eza. 55:7; Mɛ. 3:19) Flín xó élɔ́ e Jezu ɖɔ nú Falizyɛn lɛ́ é: “Nǔjlɔ́jlɔ́watɔ́ lɛ́ ylɔ́ gbé wɛ un tɔ́n bo wá ǎ, loɔ, hwɛhutɔ́ lɛ́ wɛ.” (Mat. 9:13) Vɔ̌sísá gbɛxɔnúmɛ tɔn ɔ ɖó hlɔ̌nhlɔ́n tawun, bo ná cyɔ́n nǔ dó nǔwanyido mǐtɔn lɛ́ bǐ.

18. Étɛ́ jí a ka ba ná ɖɔ xó dó xá dǎnúwatɔ́ e nɔ Jezu kpá bo kú é?

¹⁸ Dǒ nukún mɛ kpɔ́n ɖɔ a ɖo xó ɖɔ xá dǎnúwatɔ́ e ɖɔ xó nú Jezu é wɛ ɖo palaɖísi mɛ. É ɖo wɛn ɖɔ mi mɛ we lɛ́ bǐ ná ɖe lěe vɔ̌sísá Jezu tɔn su nukún mitɔn mɛ sɔ é xlɛ́. A sixú byɔ́ ɛ ɖɔ é ní ɖɔ xó kpɛɖé nú we dó nǔ e jɛ ɖo ganxixo gǔdo tɔn e Jezu bló ɖo ayǐkúngban jí é kpó lěe nǔ cí n’i dó xósin e Jezu ná ɛ é wú é kpó wú. Ðo alɔ ɖěvo mɛ ɔ, éyɛ́ sixú kan nǔ byɔ́ we dó lěe gbɛ ninɔ vɛ́ wǔ sɔ ɖo azǎn gǔdo gúdo tɔn gbɛ Satáan tɔn mɛ é wú. Wǔjɔmɛ ɖé wɛ é ná nyí ɖɔ è ní kplɔ́n Xó Mawu tɔn xá nya énɛ́ ɖɔhun lɛ́.—Efɛ́. 4:22-24.

19. Étɛ́wú gbɛ ninɔ káká sɔ́yi ɖo palaɖísi mɛ ka ná víví? (Kpɔ́n ɖiɖe e ɖo akpa ɔ jí é.)

¹⁹ Gbɛ ninɔ ɖo palaɖísi mɛ ná víví kpɔ́n! Hwebǐnu wɛ mǐ ná nɔ xo go mɛ ɖagbe lɛ́, bo ná nɔ lɛ́ wa azɔ̌ e jɛmɛ nú mǐ lɛ́ é. Ée nyɔ́ hú bǐ é wɛ nyí ɖɔ, mǐ ná nɔ ɖo Tɔ́ mǐtɔn jǐxwé tɔn ɔ tuun d’é jí wɛ ayǐhɔ́ngbe ayǐhɔ́ngbe, bo ná nɔ lɛ́ ɖu vǐví nǔ e é sɔ́ nǔ ná nú mǐ lɛ́ é tɔn. Hwebǐnu wɛ mǐ ná nɔ ɖo nǔ gěgé kplɔ́n dó Jexóva wú wɛ, bo ná lɛ́ ɖo nǔ gěgé kplɔ́n dó nǔɖíɖó tɔn lɛ́ wú wɛ. Lě do mǐ nɔ gbɛ sɔ é ɔ, mɔ̌ do wɛ mǐ ná ɖo nǔ kplɔ́n dó Mawu wú wɛ sɔ. É su nukún mǐtɔn mɛ tawun ɖɔ Jexóva kpó Jezu kpó d’akpá nú mǐ ɖɔ mǐ sixú nɔ gbɛ káká sɔ́yi ɖo palaɖísi mɛ!