1. Étɛ́ ka nyí “fífá Mawu tɔn”? Ényí mǐ ɖó ɔ, nɛ̌ mǐ ka nɔ ɖu le tɔn gbɔn? (Filípunu lɛ́ 4:6, 7)

 FÍFÁ ɖé ɖe bɔ gbɛ élɔ́ tuun nǔtí d’é wú ǎ. “Fífá Mawu tɔn” wɛ; bɔ vɛ̌ e mǐ vɛ́ xá Tɔ́ mǐtɔn jǐxwé tɔn ɔ é wɛ nɔ zɔ́n bɔ mǐ nɔ ɖó fífá énɛ́. Ényí mǐ ɖó fífá Mawu tɔn ɔ, mǐ nɔ mɔ ɖɔ mǐ ɖo ayijayǐ mɛ. (Xa Filípunu lɛ́ 4:6, 7.) Mǐ nɔ zun xɔ́ntɔn vívɛ́ xá mɛ e yí wǎn n’i lɛ́ é. Gɔ́ ná ɔ, mǐ mɛ ɖokpó ɖokpó nɔ ɖu vǐví xɔ́ntɔn vívɛ́ zunzun xá “Mawu e nɔ ná fífá mɛ” é tɔn. (1 Tɛ. 5:23) Ényí mǐ tuun Tɔ́ mǐtɔn, ɖeji dó wǔ tɔn, bo nɔ lɛ́ se tónú n’i ɔ, fífá Mawu tɔn ná xo hwihwɛ́ ayi mǐtɔn e ɖo adohu adohu jí é, hwenu e mǐ ɖo tagba lɛ́ mɛ gbɔn wɛ é.

2. Étɛ́wú mǐ ka sixú kú d’é jí ɖɔ è hɛn ɔ è ná ɖó fífá Mawu tɔn?

² Ényí mǐ ɖo tagba syɛ́nsyɛ́n lɛ́, ɖi jɛmɛjí, adla, hunnyahunnya to tɔn, alǒ yadónúmɛ ɖí xwi xá wɛ ɔ, mǐ ka sixú ɖó fífá e Mawu nɔ ná mɛ é dóó a? Wǔvɛ́ syɛ́nsyɛ́n énɛ́ lɛ́ bǐ sixú zɔ́n bɔ xɛsi jɛ mǐ jí. Amɔ̌, Jezu ɖe wě élɔ́ xá ahwanvú tɔn lɛ́: “Mi ma nú ayi mitɔn gba dó ó, mi ma ɖi xɛsi ó.” (Jaan 14:27) É nyɔ́ tawun ɖɔ nɔví súnnu lɛ́ kpó nɔví nyɔ̌nu lɛ́ kpó xwedó wěɖexámɛ Jezu tɔn énɛ́. Kpó alɔdó Jexóva tɔn kpó ɔ, yě kpé wú bo ɖó awǎjijɛ hwenu e yě ɖo xwi ɖí xá tagba syɛ́nsyɛ́n lɛ́ wɛ é.

3. Nɛ̌ jɛmɛjí ka sixú xo fífá mǐtɔn yí gbɔn?

³ Jɛmɛjí sixú zɔ́n bɔ ɖo ajijimɛ ɔ, gbɛzán mɛtɔn húzú bǐ mlɛ́mlɛ́. Ð’ayi lěe Covid-19 wa nǔ dó mɛ gěgé wú gbɔn é wú. Ðo nǔkanbyɔ́mɛ ɖokpó hwenu ɔ, è mɔ ɖɔ mɛ e è kan nǔ byɔ́ lɛ́ é vlɔ̌ɖówe jɛjí wɛ ɖɔ ɖɔ émí kún nɔ sixú d’amlɔ ɖo jɛmɛjí énɛ́ hwenu ó. Jɛmɛjí ɔ zɔ́n bɔ kɛ́n mɛ ɖěɖěe nɔ ɖo adohu  adohu jí, nɔ ɖó linkpɔ́n, nɔ nu ahan syɛ́nsyɛ́n, alǒ, nyí kannumɔ nú gěe lɛ́ é tɔn jɛjí; dǎkaxixo ɖo xwédo mɛ kpó mɛɖée huhu kpó lɔ zun kwínkwín má kwín. Ényí jɛmɛjí ɖo nǔ gba wɛ ɖo fí e a nɔ nɔ é ɔ, nɛ̌ a ka sixú ɖí xwi xá adohu adohu, lobo ɖó fífá Mawu tɔn gbɔn?

4. Aniwú nǔ e Jezu ɖɔ ɖ’ayǐ dó azǎn gǔdo gúdo tɔn lɛ́ wú é tuuntuun ka nɔ ná mǐ fífá?

⁴ Jezu ɖɔ ɖ’ayǐ ɖɔ ɖo azǎn gǔdo gúdo tɔn lɛ́ mɛ ɔ, jɛmɛjí ná tíin “sín fí ɖé jɛ fí ɖěvo.” (Luk. 21:11) Nɛ̌ énɛ́ tuuntuun ka nɔ zɔ́n bɔ mǐ nɔ ɖó fífá gbɔn? Jɛmɛjí e ɖo nǔ gba wɛ lɛ́ é nɔ kpácá mǐ ǎ. Mǐ ɖ’ayi wú ɖɔ nǔ lɛ́ ɖo jijɛ wɛ, lěe Jezu ɖɔ é ná nyí gbɔn é. Énɛ́ wú ɔ, wě e Jezu ɖe xá mɛ e ná nɔ gbɛ ɖo vivɔnu gbɛ élɔ́ tɔn lɛ́ é ɔ, mǐ ɖó hwɛjijɔ e wú mǐ ná xwedó lɛ́ é; é ɖɔ: “Mi ma nú ayi mitɔn gba dó ó.”—Mat. 24:6.

5. (a) Sɔgbe xá Filípunu lɛ́ 4:8, 9 ɔ, étɛ́ mǐ ka ɖó ná byɔ́ ɖo ɖɛ mɛ hwenu e mǐ ɖo xwi ɖí xá jɛmɛjí wɛ é? (b) Nɛ̌ tó ɖíɖó xóyídókanjí Biblu tɔn lɛ́ ka sixú hɛn le wá nú we gbɔn?

⁵ Jɛmɛjí ɖé sixú zɔ́n bɔ mǐ ɖó linkpɔ́n tawun, bɔ xɛsi lɛ́ jɛ mǐ jí. Nǔ e xá nɔví nyɔ̌nu e nɔ nyí Desi é nɛ́. b Hwenu e ataví tɔn, atagán tɔn sín vǐ kpó dotóo ɖokpó kpó kú ɖó Covid-19 wú é ɔ, xɛsi ɖi i ɖɔ é lɔmɔ̌ ná wá sɔ́ azɔnkwín ɔ, bo ná wá dó nɔ tɔn e ko nyí mɛxómɔ é. Jɛmɛjí ɔ lɛ́ zɔ́n bɔ ado ɖo huhu i wɛ ɖɔ azɔ̌ ná wá gblé dó è; énɛ́ wú ɔ, é nɔ ɖo lěe é ná bló gbɔn bo xɔ nǔɖuɖu, lobo lɛ́ sú xɔkwɛ́ é lin wɛ. Ado hu i dó nǔ énɛ́ lɛ́ wú káká bɔ é sɔ́ sixú nɔ d’amlɔ zǎnmɛ ǎ. Amɔ̌, Desi lɛ́ wá ɖó fífá. Gbɔn nɛ̌ é? É nɔ xo ɖɛ sɛ́dó Jexóva ɖɔ é ní d’alɔ émí bónú agbɔ̌n émítɔn ní jɛ do, lobo lɛ́ ɖó linlin ɖagbe lɛ́. (Xa Filípunu lɛ́ 4:8, 9.) Jexóva nɔ “ɖɔ xó” n’i gbɔn xóyídókanjí Biblu tɔn lɛ́ e é nɔ ɖótó é gblamɛ. É ɖɔ: “Gbe fífá e nǔxatɔ́ lɛ́ nɔ zán é nɔ xo hwihwɛ́ ayi ce, bo nɔ flín mì ɖɔ Jexóva ɖo nukún kpé dó wǔ ye wɛ.”—Ðɛh. 94:19.

6. Nɛ̌ nǔkplɔ́nkplɔ́n mɛɖésúnɔ tɔn kpó kplé lɛ́ kpó ka ná d’alɔ we gbɔn?

⁶ Jɛmɛjí ɖé hwenu ɔ, a sixú nɔ kpé wú bo nɔ wa nǔ e a nɔ wa ɖ’ayǐ lɛ́ é bǐ ǎ, amɔ̌, ma lɔn nú énɛ́ wa nǔ dó nǔkplɔ́nkplɔ́n mɛɖésúnɔ tɔn towe kpó kplé lɛ́ yiyi kpó wú ó. Nǔ e jɛ nǔgbó ɖo gbɛzán mɛɖé lɛ́ tɔn mɛ, bo ɖo wěma kpó video kpó mǐtɔn lɛ́ mɛ é ná flín we ɖɔ wǔvɛ́ mɔ̌hun lɛ́ ɖo fínɛ́ có, nɔví mǐtɔn lɛ́ ɖo gbejí nɔ wɛ. (1 Pi. 5:9) Kplé lɛ́ ná d’alɔ we bɔ a ná nɔ lin tamɛ dó xó wǔsyɛ́n dó lanmɛ nú mɛ tɔn e ɖo Biblu mɛ lɛ́ é jí. Yě ná lɛ́ hun ali nú we bɔ a ná dó wǔsyɛ́n lanmɛ nú mɛ ɖěvo lɛ́, bɔ yě lɔ ná dó wǔsyɛ́n lanmɛ nú we. (Hlɔ̌. 1:11, 12) Ényí a ɖo tamɛ lin dó lěe Jexóva d’alɔ mɛsɛntɔ́ tɔn lɛ́ hwenu e yě ɖo azɔn jɛ wɛ, ɖo xɛsi ɖi wɛ, alǒ ɖo yěɖokpónɔ gbɔn  é jí ɔ, énɛ́ ná ná hlɔ̌nhlɔ́n nǔɖiɖi towe bɔ a ná kú d’é jí ɖɔ é ná d’alɔ hwi lɔmɔ̌.

7. Étɛ́ kpɔ́ndéwú mɛsɛ́dó Jaan tɔn ka sixú kplɔ́n we?

⁷ Dǒ gǎn, bo nɔ ɖɔ xó ɖó kpɔ́ xá nɔví towe lɛ́. Jɛmɛjí ɖé sixú byɔ́ ɖɔ avla ɖé ní gbo mǐ kpó mɛ ɖěvo lɛ́ kpó; é ná bo tlɛ nyí hwenu e mǐ ɖo kpɔ́ xá nǔɖitɔ́ hǎtɔ́ mǐtɔn lɛ́ ɔ nɛ́. Ðo ninɔmɛ mɔ̌hun mɛ ɔ, lěe nǔ cí nú mɛsɛ́dó Jaan é sixú cí mɔ̌ nú hwi lɔ. É ba ná mɔ xɔ́ntɔn tɔn Gayiwúsi kpó nukún kpó. (3 Jaan 13, 14) Amɔ̌, Jaan tuun ɖɔ nú hwenu ɖé ɔ, émí kún sixú mɔ Gayiwúsi ó. Énɛ́ wú ɔ, Jaan tɛ́n kpɔ́n bo wlán wěma sɛ́dó Gayiwúsi. Ényí é ma nyɔ́ bló hwebǐnu bónú a ná nɔ yi ba nɔví towe lɛ́ kpɔ́n ǎ hǔn, tɛ́n kpɔ́n bo nɔ ylɔ́ yě gbɔn alǒkan jí, nɔ bló apɛ́lu video xá yě, alǒ nɔ wlán nǔ sɛ́dó yě. Ényí a kpo ɖo xó ɖɔ ɖó kpɔ́ xá klisánwun hǎtɔ́ towe lɛ́ wɛ ɔ, a ná ɖó ayijayǐ hú gǎn, bo lɛ́ nɔ fífá mɛ. Ényí a mɔ ɖɔ émí ɖó linkpɔ́n hǔn, ylɔ̌ mɛxó agun tɔn lɛ́, lobo yí gbe nú wǔsyɛ́n e yě ná dó lanmɛ nú we kpó wǎnyíyí kpó é.—Eza. 32:1, 2.

8. Nɛ̌ adla ɖé ka sixú wa nǔ dó fífá e mɛ a ɖe é wú gbɔn?

⁸ Ényí tɔgbamɛ, ayǐkúngban dán wǔ, alǒ sin ɖa nǔ ko wa nǔ dó wǔ we kpɔ́n ɔ, a sixú ɖó linkpɔ́n tawun hwenu e nǔ lɛ́ ko jɛ gúdo é. Ényí mɛ e a yí wǎn ná é ɖé kú, alǒ nǔɖókan towe lɛ́ gblé ɔ, a sixú jɛ aluwɛ mɛ, ba nukúnɖíɖó kpo, bo tlɛ sixú nɔ lɛ́ sin xomɛ. Énɛ́ ko xlɛ́ ɖɔ a kún nyí gbɛtɔ́ gbigbɔ tɔn ó, alǒ ɖɔ a kún ɖó nǔɖiɖi ó ǎ. Ninɔmɛ vɛ́ wǔ mɛ gbɔn wɛ a ɖe, bɔ mɛɖé lɛ́ sixú ɖó nukún ɖɔ nǔ ná cí mɔ̌ nú we. (Jɔb. 1:11) Amɔ̌, a sixú kpo ɖo fífá ɖó wɛ. Gbɔn nɛ̌ é?

9. Nɛ̌ Jezu ka sɔ́ nǔ nú mǐ nú adla lɛ́ gbɔn?

⁹ Flín nǔ e Jezu ɖɔ ɖ’ayǐ é. Mɛɖé lɛ́ nɔ lin ɖɔ adla kún sixú wa nǔ dó émí wú kpɔ́n ó. Amɔ̌, mǐ tuun ɖɔ adla gěgé ná tíin ɖo hwe mǐtɔn nu, bɔ ɖé lɛ́ sixú wa nǔ dó mǐ wú. Jezu ɖɔ nú ahwanvú tɔn lɛ́ ɖɔ “ayǐkúngban ná dán wǔ syɛ́nsyɛ́n,” bɔ adla ɖěvo lɛ́ ná lɛ́ j’ayǐ, cóbɔ gbɛ ɔ ná vɔ. (Luk. 21:11) Jezu lɛ́ ɖɔ ɖ’ayǐ ɖɔ “sɛ́ngbigba ná ɖo jijɛjí wɛ”; nǔ e ka ɖo jijɛ wɛ ɖo égbé é nɛ́. Ði kpɔ́ndéwú ɔ, mǐ nɔ mɔ dǎnúwiwa kpó wɔ̌nxixogbɛwú kpó. (Mat. 24:12) Jezu ɖɔ gbeɖé ɖɔ mɛ ɖěɖěe Jexóva jó dó lɛ́ é kɛ́ɖɛ́ wú wɛ nǔ mɔ̌hun lɛ́ ná wa nǔ dó ǎ. Nǔgbó ɔ, mɛsɛntɔ́ gbejínɔtɔ́ Jexóva tɔn gěgé wɛ ko se adla wúvɛ́. (Eza. 57:1; 2 Kɔ. 11:25) Jexóva sixú bló nǔjíwǔ bo xɔ mǐ ɖo adla énɛ́ lɛ́ bǐ sí ǎ, amɔ̌, é ná ná mǐ nǔ ɖěbǔ e sín hudó mǐ ɖó, bo ná kpo ɖo fífá ɖó wɛ é.

10. Étɛ́wú nǔ sísɔ́ ɖ’ayǐ din nú adla e ná wá j’ayǐ é ɖé ka nyí xlɛ̌ nǔɖiɖi tɔn? (Nǔnywɛ́xó 22:3)

¹⁰ Ényí mǐ nɔ sɔ́ nǔ nú nǔ e mǐ ná wa hwenu e ajijimɛnú ɖé ná wá jɛ é ɔ, é ná bɔ wǔ nú mǐ hú gǎn bɔ mǐ ná ɖó fífá ɖo ayi mɛ. Amɔ̌, nǔ sísɔ́ ɖ’ayǐ xlɛ́ ɖɔ mǐ kún ɖi nǔ nú Jexóva ó wɛ a? Ðěbǔ lɔ ǎ. Nǔgbó ɔ, ényí mǐ sɔ́ nǔ ɖ’ayǐ nú adla hǔn, xlɛ́xlɛ́ wɛ é ɖe ɖɔ mǐ ɖeji dó nǔwúkpíkpé e Jexóva ɖó bo ná kpé nukún dó mǐ wú é wú. Gbɔn nɛ̌ é? Xó Mawu tɔn dó wǔsyɛ́n lanmɛ nú mǐ ɖɔ mǐ ní sɔ́ nǔ ɖ’ayǐ nú adla e ná j’ayǐ lɛ́ é. (Xa Nǔnywɛ́xó 22:3.) Gɔ́ ná ɔ, tutoblónúnǔ Mawu tɔn nɔ gbɔn xóta e nɔ tɔ́n ɖo xójláwéma lɛ́ mɛ lɛ́ é, kplé agun tɔn lɛ́ kpó gbeɖíɖó e nɔ wá dó gan mɛ lɛ́ é kpó sín yɛkan mɛ, bo nɔ dó wǔsyɛ́n lanmɛ nú mǐ hwɛhwɛ ɖɔ mǐ ní nɔ sɔ́ nǔ ɖ’ayǐ nú ajijimɛnú lɛ́. c Mǐ ka nɔ ɖeji dó Jexóva wú a? Ényí mǐ nɔ wa mɔ̌ ɔ, mǐ ná xwedó wěɖexámɛ énɛ́ din, cóbɔ adla ɖé ná wá j’ayǐ.

11. Étɛ́ kpɔ́ndéwú Margaret tɔn ka kplɔ́n we?

¹¹ Ð’ayi nǔ e jɛ dó nɔví nyɔ̌nu e nɔ nyí  Margaret wú é wú. È byɔ́ ɛ ɖɔ é ní gosín xwé tɔn gbe hwenu e sin ɖa nǔ ɖo xá tɔn mɛ é. Ðó mɛ gěgé ɖo tíntɛ́nkpɔ́n wɛ bo ná hɔn ɖo hwe ɖokpó ɔ nu wútu ɔ, ali ɔ ján, bɔ mɛɖé sɔ́ sixú sɛ tɛn ǎ. Azɔ gɔ́ jɔhɔn mɛ bǐ, bɔ Margaret sɔ́ sixú tɔ́n sín mɔ̌to tɔn mɛ ǎ nú hwenu ɖé. Amɔ̌, é gán ɖ’é mɛ ɖó é ko sɔ́ nǔ ɖ’ayǐ wútu. É hɛn wuntun to tɔn e ná d’alɔ ɛ bɔ é ná tuun ali e é ná gbɔn dó hɔn é ɖokpó dó sáki kpɛví tɔn mɛ. É tlɛ ko gbɔn ali ɔ jí kpɔ́n; mɔ̌ e é wa é zɔ́n bɔ é bɔ wǔ n’i bɔ é gbɔn jí hwenu e ajijimɛnú ɖé jɛ é. Nǔ e Margaret sɔ́ ɖ’ayǐ é zɔ́n bɔ é gán ɖo nǔ e jɛ é hwenu.

12. Étɛ́wú mǐ ka nɔ xwedó ali e mɛxó agun tɔn lɛ́ nɔ xlɛ́ mǐ bónú mǐ ná nɔ ayijayǐ mɛ é?

¹² Bónú mǐ kpó mɛ ɖěvo lɛ́ kpó ná dó nɔ ayijayǐ mɛ ɔ, acɛkpikpa lɛ́ sixú byɔ́ mǐ ɖɔ mǐ ní se tónú nú dogbó ɖé lɛ́, sɛ tɛn, alǒ ɖe afɔ tawun tawun ɖěvo lɛ́. É nɔ vɛ́ wǔ nú mɛ ɖé lɛ́ bónú yě ná yá wǔ se tónú, alǒ yě nɔ ɖó nǎ nǎ nú mɔ̌ wiwa ɖó yě jló ná jó nǔ e yě ɖó lɛ́ é dó ǎ wútu. Nɛ̌ klisánwun lɛ́ ka nɔ wa nǔ gbɔn? Biblu ɖɔ nú mǐ ɖɔ: “Mi hwíhwɛ́ miɖée dó acɛkpikpa gbɛtɔ́ lɛ́ tɔn bǐ glɔ́, ɖó Aklúnɔ wú: mi hwíhwɛ́ miɖée dó dadá e kpa acɛ nú mɛ bǐ ɔ glɔ́.” (1 Pi. 2:13, 14) Tutoblónúnǔ Mawu tɔn lɔmɔ̌ nɔ xlɛ́ ali mǐ dó lěe mǐ ná nɔ ayijayǐ mɛ gbɔn é wú. Hwɛhwɛ wɛ è nɔ flín mǐ ɖɔ mǐ ní nɔ ná alǒkankɛ́n mǐtɔn e ɖo azɔ̌ wa wɛ din lɛ́ é mɛxó agun tɔn lɛ́. A ka ko wa mɔ̌ a? È sixú lɛ́ ɖɔ fí e mǐ ná nɔ é nú mǐ; é sixú nyí xwé mǐtɔn gbe alǒ fí ɖěvo. È sixú lɛ́ xlɛ́ ali mǐ dó lěe mǐ ná mɔ sɔhɛnmɛ sín nǔ lɛ́ gbɔn é, alǒ lěe mǐ ná d’alɔ mɛ ɖěvo lɛ́ gbɔn é kpó hwenu e mǐ ná wa mɔ̌ é kpó wú. Ényí mǐ ma se tónú ǎ ɔ, mǐ sixú sɔ́ gbɛ mǐtɔn kpó mɛxó agun tɔn lɛ́ kpó tɔn ɖó axɔ́ nu. Flín ɖɔ súnnu gbejínɔtɔ́ énɛ́ lɛ́ ɖo nukún kpé dó mǐ wú wɛ. (Ebl. 13:17) Margaret ɖɔ: “Un kú d’é jí bǐ mlɛ́mlɛ́ ɖɔ ali e mɛxó agun tɔn lɛ́ kpó tutoblónúnǔ ɔ kpó nɔ xlɛ́ mɛ é wɛ xɔ gbɛ nú mì.”

13. Étɛ́ ka ná awǎjijɛ kpó fífá kpó klisánwun ɖěɖěe sɛ tɛn lɛ́ é gěgé?

¹³ Nɔví súnnu kpó nɔví nyɔ̌nu kpó gěgé sɛ tɛn, ɖó adla, ahwan, alǒ hunnyahunnya to tɔn wútu. É ɖo mɔ̌ có, yě wa nǔ e wú yě kpé é bǐ bo húzú sɔgbe xá ninɔmɛ yětɔn yɔ̌yɔ́ ɔ, bo lɛ́ jɛ alɔ ɖó ɖo Axɔ́súɖuto ɔ sín nǔ lɛ́ mɛ jí tlóló tlóló. Klisánwun xwe kanweko nukɔntɔn ɔ tɔn ɖěɖěe hɔn ɖó yadónúmɛ wútu lɛ́ é ɖɔhun ɔ, yě nɔ kpo ɖo “wɛn ɖagbe jlá wɛ.” (Mɛ. 8:4) Wɛnɖagbejíjlázɔ́ ɔ nɔ d’alɔ yě  bɔ yě nɔ sɔ́ ayi ɖó Axɔ́súɖuto ɔ jí, b’ɛ nɔ nyí dó ninɔmɛ yětɔn jí ǎ. Wǎgbɔ tɔn ɔ, yě nɔ kpo ɖo awǎjijɛ kpó fífá kpó e yě ko ɖó ɖ’ayǐ é ɖó wɛ.

14. Nɛ̌ yadónúmɛ ka sixú d’avaja fífá e mǐ ɖó é mɛ gbɔn?

¹⁴ Yadónúmɛ sixú xo nǔ e nɔ ná mǐ fífá ayǐvɔ̌gbe lɛ́ é yí sín mǐ sí. Ényí mǐ nɔ kplé ɖó kpɔ́ ɖo vivo mɛ, nɔ ɖɔ Mawuxó gbɔn fí bǐ, lobo nɔ lɛ́ wa nǔ e mǐ nɔ wa gbe bǐ gbe lɛ́ é, bo ma nɔ ɖi xɛsi ɖɔ è ná wlí mǐ ǎ ɔ, mǐ nɔ ɖ’awǎjijɛ bɔ gbɛzán mǐtɔn nɔ lɛ́ jɛ mɛ nú mǐ. Ényí mǐ ma sɔ́ ɖó vivo ɖo ali énɛ́ lɛ́ nu ǎ ɔ, ado sixú jɛ mǐ hu jí, bɔ mǐ ná jɛ xɛsi ɖi dó nǔ e ná wá jɛ lɛ́ é wú jí. Nǔ hɛn ɔ, é ná cí mɔ̌ nú mɛ. Amɔ̌, mǐ ɖó ná nɔ acéjí. Jezu ɖɔ ɖɔ yadónúmɛ sixú zɔ́n bɔ ahwanvú émítɔn lɛ́ ná klɛ́n afɔ. (Jaan 16:1, 2) Énɛ́ wú ɔ, ényí è ɖo ya dó nú mǐ wɛ ɔ, nɛ̌ mǐ ka sixú kpo ɖo fífá ɖó wɛ gbɔn?

15. Étɛ́wú mǐ ma ka ɖó ná ɖi xɛsi nú yadónúmɛ ǎ? (Jaan 15:20; 16:33)

¹⁵ Xó Mawu tɔn ɖɔ nú mǐ ɖɔ: “Mɛ e jló ná zán gbɛ yětɔn nú Mawu kpó sísí kpó, ɖo bǔ e yě ɖe xá Klísu Jezu é mɛ ɔ bǐ wɛ è ná tlɛ dó ya ná lɔ.” (2 Tim. 3:12) Hwenu e è gbɛ́ azɔ̌ mǐtɔn ɖo nɔví súnnu e nɔ nyí Andrei é sín to mɛ é ɔ, é vɛ́ wǔ n’i b’ɛ ná ɖi ɖɔ è sixú dó ya nú mɛsɛntɔ́ Jexóva tɔn lɛ́ bǐ. É lin nǔ gbɔn lě: ‘Kúnnuɖetɔ́ e ɖo fí lɛ́ é sukpɔ́ dín. Nɛ̌ mɛ e ɖo tɛn acɛkpikpa tɔn mɛ lɛ́ é ka sixú wlí mǐ mɛ bǐ gbɔn?’ Linlin énɛ́ e Andrei ɖó é zɔ́n bɔ é ɖó fífá ayi mɛ tɔn ǎ, é nyɔ́ wa ɔ, é nɔ ɖo adohu adohu jí hwebǐnu. Nɔví ɖěvo lɛ́ tuun ɖɔ è sixú wá wlí émí có, yě ɖo adohu adohu jí Andrei ɖɔhun ǎ. É nyɔ́ wa ɔ, yě ɖeji dó Jexóva wú. Wǎgbɔ tɔn ɔ, Andrei wá gbeta ɔ kɔn bá wa nǔ yěɖɔhun, bo ɖeji dó Jexóva wú bǐ mlɛ́mlɛ́. Tagba lɛ́ ɖ’ayǐ có, é sɔ́ lín cóbónú é ɖó fífá ǎ, bɔ din ɔ, é lɛ́ ɖó awǎjijɛ. Nǔ sixú nyí mɔ̌ nú mǐ lɔmɔ̌. Hwenu e Jezu ɖɔ nú mǐ ɖɔ mǐ ní ɖó nukún yadónúmɛ é ɔ, é lɛ́ ná gǎnjɛwú mǐ ɖɔ mǐ sixú kpo ɖo gbejí nɔ wɛ.—Xa Jaan 15:20; 16:33.

16. Ényí è ɖo ya dó nú mǐ wɛ ɔ, wěɖexámɛ tɛ́ lɛ́ mǐ ka ɖó ná se tónú ná?

¹⁶ Ényí è gbɛ́ azɔ̌ mǐtɔn, alǒ ɖó dogbó syɛ́nsyɛ́n ná ɔ, alaxɔ kpó mɛxó agun tɔn lɛ́ kpó sixú ɖe wě ɖé lɛ́ xá mǐ. Hwɛjijɔ élɔ́ lɛ́ wú wɛ yě nɔ wa mɔ̌: bo ná dó cyɔ́n alɔ mǐ jí, ná nǔɖuɖu gbigbɔ tɔn mǐ, lobo d’alɔ mǐ bónú mǐ  ná kpo ɖo wɛnɖagbejíjlázɔ́ ɔ wa wɛ. Wa nǔ e wú a kpé é bǐ bo xwedó wě e yě ɖe xá we é, nú a ma tlɛ mɔ nǔ jɛ wě e yě ɖe xá we é mɛ ganjí ǎ ɔ nɛ́. (Ja. 3:17) Gɔ́ ná ɔ, ma ɖɔ kpáxó e kúnkplá nɔví lɛ́, alǒ agun ɔ sín azɔ̌ lɛ́ é nú mɛ ɖěɖěe é ma kan ǎ lɛ́ é gbeɖé ó.—Nǔt. 3:7.

17. Mɛsɛ́dó e nɔ gbɛ ɖo xwe kanweko nukɔntɔn ɔ mɛ lɛ́ é ɖɔhun ɔ, étɛ́ mǐ ka kán ɖ’é jí bá wa?

¹⁷ Hwɛjijɔ tají e wú Satáan nɔ tɔ́n ahwan togun Mawu tɔn é ɖokpó wɛ nyí ɖɔ mǐ ‘nɔ ɖe kúnnu dó Jezu wú.’ (Nǔɖe. 12:17, nwt) Ma jó Satáan kpó gbɛ tɔn kpó dó nú yě dó xɛsi we ó. Mawuxóɖiɖɔ kpó nǔkplɔ́nkplɔ́n mɛ lɛ́ kpó sín azɔ̌ ɔ nɔ zɔ́n bɔ mǐ nɔ ɖ’awǎjijɛ hwenu e è ɖo gbe klán xá mǐ wɛ é. Hwenu e acɛkpatɔ́ Jwifu lɛ́ tɔn lɛ́ ɖe gbe nú mɛsɛ́dó lɛ́ ɖo xwe kanweko nukɔntɔn ɔ mɛ ɖɔ yě ní ɖó Mawuxóɖiɖɔzɔ́ ɔ te é ɔ, súnnu gbejínɔtɔ́ énɛ́ lɛ́ wá gbeta ɔ kɔn bo ná se tónú nú Mawu. Yě kpo ɖo Mawuxó ɖɔ wɛ, bɔ azɔ̌ énɛ́ zɔ́n bɔ yě ɖ’awǎjijɛ. (Mɛ. 5:27-29, 41, 42) Nǔgbó ɔ, ényí è ɖó dogbó nú azɔ̌ mǐtɔn ɔ, mǐ ɖó ná ɖó ayi te hwenu e mǐ ɖo wɛn ɖagbe ɔ jlá wɛ é. (Mat. 10:16) Amɔ̌, ényí mǐ wa nǔ e wú mǐ kpé é bǐ ɔ, mǐ ná ɖó fífá e è nɔ ɖó, ɖó nǔ mɛtɔn nyɔ́ Jexóva nukúnmɛ, bɔ è lɛ́ ɖo alɔ ɖó ɖo wɛn gbɛhwlɛ́ngán tɔn ɔ mɛ wɛ é wútu é.

18. Étɛ́ mǐ ka ɖó ná tuun dó mɛ e nyí Jɔtɛn fífá e sín hudó mǐ ɖó é tɔn é wú?

¹⁸ Kú d’é jí ɖɔ ényí mǐ ná bo tlɛ ɖo ninɔmɛ e vɛ́ wǔ tawun lɛ́ é mɛ gbɔn wɛ ɔ, mǐ sixú ɖó fífá. Ðo ninɔmɛ mɔ̌hun lɛ́ mɛ ɔ, mǐ ɖó ná flín ɖɔ fífá Mawu tɔn, énɛ́ wɛ nyí fífá e Jexóva ɖokpónɔ jɛ́n sixú ná mǐ é sín hudó wɛ mǐ ɖó. Ényí a ɖo xwi ɖí xá jɛmɛjí, adla, alǒ yadónúmɛ wɛ hǔn, ɖeji dó Jexóva wú. Tɛ́ dó tutoblónúnǔ tɔn wú. Sɔ́ ayi ɖó sɔgúdo jí wǔ e ɖo te kpɔ́n we é jí. Ényí a nɔ wa mɔ̌ ɔ, “Mawu e nɔ ná fífá mǐ ɔ ná nɔ kpɔ́ xá [we].” (Filí. 4:9) Ðo xóta e bɔ d’é wú é mɛ ɔ, mǐ ná ɖɔ xó dó lěe mǐ sixú d’alɔ klisánwun hǎtɔ́ mǐtɔn ɖěɖěe ɖo xwi ɖí xá wǔvɛ́ syɛ́nsyɛ́n lɛ́ wɛ é, bɔ yě ná ɖó fífá Mawu tɔn gbɔn é jí.