Gbe ɖokpó ɔ, nɔví nyɔ̌nu e nɔ nɔ Nouvelle-Zélande é ɖokpó kpɔ́n video “Mì ‘Tindo Mẹtọnhopọn . . . Na Ode Awetọ’”; video ɔ ɖe xlɛ́ ɖɔ Jexóva kún nɔ se wǔvɛ́ xá mɛ kpowun ó, loɔ, é nɔ lɛ́ ɖe xlɛ́. (Eza. 63:7-9) Nɔví nyɔ̌nu ɔ wá gbeta ɔ kɔn bo ná zán nǔ e é kplɔ́n é gbɔn ali ɖěɖěe nu é ná d’alɔ mɛɖé ɖe lɛ́ é biba gblamɛ. Nukɔnmɛ ɖo azǎn énɛ́ jí ɔ, é yi axi xwlé gbé bo xo go nǎwe e ma ɖó xɔ ɖo ta ǎ é ɖé, bo kanbyɔ́ ɛ ɖɔ émí sixú xɔ nǔɖé n’i, bɔ é ná ɖu a jí. Nǎwe ɔ yí gbe. Ée nɔví nyɔ̌nu ɔ hɛn nǔɖuɖu ɔ wá é ɔ, é gbɔn yɛdo énɛ́ mɛ bo zán tláti Wǔvɛ́ mimɔ ka ná wá nɔ te a? dó ɖɔ xó kléwún ɖé n’i dó Jexóva wú.

Nǎwe ɔ bɛ́ avǐ. É tínmɛ ɖɔ Kúnnuɖetɔ́ wɛ émí nyí bo ka ko jó nǔgbó ɔ dó sín xwe mɔ̌kpán ɖíe. Amɔ̌, agaɖanu din ɔ, émí xo ɖɛ sɛ́dó Jexóva bo byɔ́ ɛ ɖɔ é ní d’alɔ émí bónú émí ná lɛ́ kɔ wá gɔ̌n tɔn. Nɔví nyɔ̌nu ɔ ná Biblu ɖokpó nǎwe ɔ, bo bló tuto bá jɛ Biblu kplɔ́n xá ɛ jí. a

Mǐ sixú xwedó kpɔ́ndéwú Jexóva tɔn, bo nɔ se wǔvɛ́ xá mɛ lɛ́, káká jɛ hɛ̌nnumɔ mǐtɔn lɛ́, gɔ́ nú nɔví súnnu kpó nɔví nyɔ̌nu kpó mǐtɔn lɛ́ jí. Gɔ́ ná ɔ, mǐ sixú ɖe wǔvɛ́sexámɛ xlɛ́ gbɔn ali ɖěɖěe nu mǐ ná gbɔn dó ɖe kúnnu nú mɛ ɖěvo lɛ́ é biba gblamɛ.