1-2. Ninɔmɛ tɛ́ lɛ́ ka sixú d’avǐ nu nú mǐ?

 MǏ MƐ bǐ wɛ ko kun ɖasin ɖo ninɔmɛ ɖé, alǒ ɖěvo mɛ kpɔ́n. Ényí mǐ ɖo ninɔmɛ ɖěɖěe zɔ́n bɔ mǐ ɖó awǎjijɛ tawun lɛ́ é mɛ ɔ, mǐ sixú kun ɖasin awǎjijɛ tɔn lɛ́. Bóyá, a sú xó hwenu e nǔ tají, alǒ nǔ bǔnɔ ɖé jɛ dó jǐ we é; ɖi kpɔ́ndéwú ɔ, hwenu e asi towe ji vǐ é, hwenu e a flín nǔ ɖaaɖagbe ɖé é, alǒ hwenu e a dó doo nú xɔ́ntɔn vívɛ́ e a ma sɔ́ mɔ ǎ bɔ xwe ko jɛ é ɖé é.

² É ɖo mɔ̌ có, hwɛhwɛ ɔ, nú mǐ mɛ bǐ ɔ, avǐ e mǐ nɔ ya lɛ́ é nɔ ɖe wǔvɛ́ e se wɛ mǐ ɖe ɖo ayi gɔngɔn mǐtɔn mɛ é xlɛ́. Ði kpɔ́ndéwú ɔ, mǐ sixú ya avǐ hwenu e mɛɖé dó awakanmɛ kú nú mǐ tawun é. Mǐ sixú ya avǐ hwenu e mǐ ɖo wǔvɛ́ syɛ́nsyɛ́n ɖé se wɛ, ɖó azɔn jɛmagbɔ ɖé wú é, alǒ hwenu e mǐ ɖo aluwɛ mɛ ɖó mɛ vívɛ́ná mǐtɔn ɖé kú wútu é. Ðo hwe mɔ̌hun lɛ́ nu ɔ, lěe nǔ cí nú gbeyíɖɔ Jelemíi hwenu e Babilɔ́nunu lɛ́ ɖu ɖo Jeluzalɛ́mu jí é sixú cí nú mǐ lɔ. Jelemíi ɖɔ: “Ðasin nɔ gosín nukún ce jí, bo nɔ sa tɔ ɖɔhun . . . Nukún ce lɛ́ gbɔ bo húzú tɔjɔtɛn, ɖasin jɛ́n nɔ ɖo sisa sín nukún ce jí wɛ hwebǐnu; gbɔjɛ ɖěbǔ ɖ’é mɛ ǎ.”—Gbɛ. 3:48, 49.

3. Ényí Jexóva mɔ mɛsɛntɔ́ tɔn lɛ́ bónú yě ɖo wǔvɛ́ se wɛ ɔ, nɛ̌ é ka nɔ cí n’i? (Ezayíi 63:9)

³ Jexóva tuun ɖasin nabí e mǐ kun, ɖó ninɔmɛ e nɔ ɖó linkpɔ́n nú mɛ lɛ́ é wú é. Biblu ná jiɖe mǐ ɖɔ é tuun ninɔmɛ ɖěbǔ  e nɔ ɖó wǔvɛ́ nú mɛsɛntɔ́ tɔn lɛ́ é, bɔ ényí mǐ sú xó ylɔ́ ɛ bo byɔ́ alɔdó ɔ, é nɔ se. (Ðɛh. 34:16) Amɔ̌, Jexóva nɔ wa nǔ hú mimɔ mǐ kpó tó ɖíɖó mǐ kpó kpowun. Mɛjitɔ́ wǎnyíyínɔ ɖé ɖɔhun ɔ, ényí é mɔ vǐ tɔn lɛ́ bónú yě ɖo avǐ ya wɛ ɔ, é nɔ byɔ́ lanmɛ n’i tawun, bɔ é nɔ ba ná yá wǔ d’alɔ yě.—Xa Ezayíi 63:9.

4. Étɛ́ kpɔ́ndéwú Biblu tɔn ɖé lɛ́ ka sixú kplɔ́n mǐ dó linlin Jexóva tɔn wú?

⁴ Jexóva ɖe lěe é wa nǔ gbɔn hwenu e mɛsɛntɔ́ tɔn lɛ́ kun ɖasin é xlɛ́ ɖo Xó tɔn mɛ. Kpɔ́ndéwú Ana, Davídi kpó Ezekiyási kpó tɔn gbígbéjé kpɔ́n sixú ɖe énɛ́ xlɛ́ mǐ. Étɛ́ ka zɔ́n bɔ yě ya avǐ? Nɛ̌ Jexóva ka wa nǔ gbɔn hwenu e yě sú xó dó byɔ́ alɔdó é? Gɔ́ ná ɔ, nɛ̌ kpɔ́ndéwú yětɔn ka sixú dó gbɔ nú mǐ hwenu e mǐ kun ɖasin ɖó aluwɛ, mɛ flúflú, alǒ awakanmɛ kú mɛ wú é gbɔn?

ÐASIN ALUWƐ TƆN

5. Nɛ̌ ninɔmɛ Ana tɔn ka zɔ́n bɔ nǔ cí n’i?

⁵ Ana ɖí xwi xá tagba gěgé, bɔ énɛ́ zɔ́n bɔ é kun ɖasin aluwɛ tɔn lɛ́. Wǔvɛ́ e é mɔ lɛ́ é ɖokpó wɛ nyí ɖɔ asú tɔn da nyɔ̌nu ɖěvo, bɔ nyɔ̌nu ɖěvo e asú tɔn da b’ɛ nyí Penína é gbɛ́ wǎn n’i. É ka ko fó ɖó fínɛ́ ǎ, Ana ɖó vǐ ɖě ǎ, Penína ka ɖó vǐ. (1 Sam. 1:1, 2) Penína nɔ ɖo cícá nú Ana wɛ magbokɔ, ɖó wɛnsinɔ e é nyí é wú. Ényí hwi wɛ ɖo tɛn tɔn mɛ ɔ, nɛ̌ nǔ ka ná ko cí nú we? Xomɛ sin Ana tawun, bɔ é nɔ “ɖo avǐ ya wɛ, bo gbɛ́ nǔ ɖu,” bɔ ‘akpɔ lɛ́ ɖó è ɖésú.’—1 Sam. 1:6, 7, 10.

6. Étɛ́ Ana ka wa bá dó mɔ gbɔdónúmɛ?

⁶ Étɛ́ ka dó gbɔ nú Ana? Nǔ e d’alɔ ɛ é ɖokpó wɛ nyí ɖɔ é yi hɔ̌nkan mawusinsɛn mímɛ́ ɔ tɔn, énɛ́ wɛ nyí goxɔ ɔ mɛ. Bóyá, fí ɖé wɛ bo ɖo malínmálín dó fí e è nɔ gbɔn bo nɔ yi kɔ́xota goxɔ ɔ tɔn é, bɔ “é xo ɖɛ kpó avǐ kpó.” É sa vo nú Jexóva bo ɖɔ: “Nyi kɔ kpɔ́n wǔvɛ́ e mɔ wɛ nyɛ mɛsɛntɔ́ towe ɖe ɔ, . . . flín mì.” (1 Sam. 1:10b, 11) Ana ɖɔ lěe nǔ cí n’i é nú Jexóva ɖo ɖɛ mɛ. Kpɔ́n lěe nǔ ɖó ná ko cí nú Jexóva hwenu e é mɔ vǐ nyɔ̌nu vívɛ́ná tɔn sín ɖasin lɛ́ é!

7. Ée Ana ɖɔ nǔ e ɖo ayi tɔn mɛ é nú Jexóva gúdo é ɔ, gbɔdónúmɛ tɛ́ é ka mɔ?

⁷ Ée Ana hun ayi tɔn nú Jexóva ɖo ɖɛ mɛ, bɔ vɔ̌sánúxwlémawutɔ́ ɖaxó Eli ná gǎnjɛwú i gúdo é ɔ, nɛ̌ nǔ ka cí n’i? Tan ɔ ɖɔ: “É yi bo ɖu nǔ, bɔ nukún tɔn mɛ jɛ ayǐ.” (1 Sam. 1:17, 18) Ninɔmɛ e ɖo ayimɛya dó nú Ana wɛ é ko húzú ǎ có, ayi tɔn ka j’ayǐ. É zlɔ́n wǔvɛ́ e mɔ wɛ é ɖe ɖo lěe nǔ nɔ cí nú mɛ é linu é sín agban ɖó Jexóva jí. Jexóva mɔ aluwɛ e mɛ é ɖe é, se avǐ e ya wɛ é ɖe é, bɔ ɖo nukɔnmɛ ɔ, é kɔn nyɔ̌ná dó jǐ tɔn gbɔn blǒbló bɔ é mɔ xo gblamɛ.—1 Sam. 1:19, 20; 2:21.

8-9. Sɔgbe xá Eblée lɛ́ 10:24, 25 ɔ, étɛ́wú mǐ ka ɖó ná nɔ wa nǔ e wú mǐ kpé é bǐ bo ná nɔ yi kplé klisánwun tɔn lɛ́? (Eblée lɛ́ 10:24, 25)? (Kpɔ́n ɖiɖe ɔ lɔmɔ̌.)

⁸ Nǔ e é kplɔ́n mǐ lɛ́ é. A ɖo ninɔmɛ syɛ́nsyɛ́n ɖé ɖí xwi xá wɛ, bɔ é zɔ́n bɔ wǔ kú we tawun wɛ a? Bóyá, a ɖo aluwɛ mɛ, ɖó mɛ e ɖo xwédo  towe mɛ é ɖé kú, alǒ xɔ́ntɔn towe ɖé kú wútu. Ðo ninɔmɛ mɔ̌hun lɛ́ mɛ ɔ, nǔ e è nɔ ba kpowun é wɛ nyí ɖɔ è ní nɔ mɛɖokpó. Amɔ̌, lěe Ana mɔ gbɔdónúmɛ kpó wǔsyɛ́n dó lanmɛ nú mɛ kpó hwenu e é yi goxɔ ɔ mɛ gbɔn é ɖɔhun ɔ, hwi lɔ sixú mɔ gbɔdónúmɛ gbɔn kplé klisánwun tɔn lɛ́ yiyi gblamɛ, ényí nǔ na bo tlɛ ci kɔ nú we, bɔ wǔ lɛ́ kú we ɔ nɛ́. (Xa Eblée lɛ́ 10:24, 25.) Ée mǐ ná ɖo tó ɖó wěmafɔ gbɔdónúmɛ tɔn lɛ́ wɛ ɖo kplé lɛ́ jí é ɔ, Jexóva sixú d’alɔ mǐ bɔ mǐ ná sɔ́ linlin ɖagbe lɛ́ dó ɖyɔ́ linlin nyanya lɛ́ ná. Énɛ́ sixú d’alɔ mǐ bɔ mǐ ná ɖu ɖo mǐɖée jí, ényí ninɔmɛ mǐtɔn ná bo ma tlɛ ɖyɔ́ afɔjíafɔjí ǎ ɔ nɛ́.

⁹ Ðo kplé mǐtɔn lɛ́ jí ɔ, mǐ sixú lɛ́ ɖu gbɛ̌ dídó ɖaaɖagbe lɛ́ sín vǐví xá nǔɖitɔ́ hǎtɔ́ mǐtɔn e nɔ se wǔvɛ́ xá mɛ lɛ́ é, bɔ xó ɖěɖěe yě nɔ ɖɔ dó ɖe xlɛ́ ɖɔ nǔ mǐtɔn nɔ ɖu ayi mɛ nú yě, bɔ yě lɛ́ yí wǎn nú mǐ lɛ́ é sixú bló bɔ mǐ mɔ mǐɖée mɛ. (1 Tɛ. 5:11, 14) Lin tamɛ dó ninɔmɛ nɔví súnnu gběxosín-alijítɔ́ titewungbe e asi tɔn kú é ɖé tɔn jí. É ɖɔ: “Un kpo ɖo avǐ tɔn ya wɛ. Hweɖélɛ́nu ɔ, un nɔ jínjɔ́n zwe mɛ fí ɖé bo nɔ ɖo avǐ ya wɛ kpowun. Amɔ̌, jɔtɛn jɔ jɔtɛn wǔsyɛ́n dó lanmɛ nú mɛ tɔn ɖé wɛ kplé mǐtɔn lɛ́ nyí. Xó ɖaaɖagbe ɖěɖěe nɔví súnnu kpó nɔví nyɔ̌nu kpó ce lɛ́ nɔ ɖɔ lɛ́ é nɔ dó gbɔ nú mì tawun. Ényí un na bo ɖó linkpɔ́n gbɔn ɖěbǔ, alǒ ényí ado na bo tlɛ hu mì gbɔn ɖěbǔ cóbónú un wá kplé lɛ́ jí ɔ, hwebǐnu wɛ un nɔ mɔ nyiɖée mɛ hú gǎn ɖo fínɛ́.” Jexóva sixú zán nɔví súnnu kpó nɔví nyɔ̌nu kpó mǐtɔn lɛ́ dó d’alɔ mǐ ɖo kplé mǐtɔn lɛ́ jí.

10. Nɛ̌ mǐ ka sixú xwedó kpɔ́ndéwú Ana tɔn hwenu e mǐ ɖo aluwɛ ɖaxó ɖé mɛ é gbɔn?

¹⁰ Ana lɛ́ mɔ gbɔdónúmɛ gbɔn lěe nǔ cí n’i é ɖiɖɔ nú Jexóva ɖo ɖɛ mɛ gblamɛ. Hwi lɔ sixú “zlɔ́n linkpɔ́n towe lɛ́ bǐ ɖó [Jexóva jí],” bo ɖeji ɖɔ é ná ɖótó we. (1 Pi. 5:7) Nɔví nyɔ̌nu e ajotɔ́ lɛ́ hu asú tɔn é ɖé flín nǔ élɔ́: “É cí ɖɔ ayi ce gba hánnyá bɔ un kún sɔ́ sixú mɔ nyiɖée mɛ gbeɖé ó wɛ ɖɔhun. Ðɛ xixo sɛ́dó Tɔ́ ce jǐxwé tɔn wǎnyíyínɔ ɔ Jexóva dó gbɔ nú mì. Hweɖélɛ́nu ɔ, un nɔ sixú mɔ xókwín e jɛxá lɛ́ é ǎ, amɔ̌, é nɔ mɔ nukúnnú jɛ ninɔmɛ ce mɛ. Ényí wǔ kú mì tawun ɔ, un nɔ xo ɖɛ dó byɔ́ fífá. Énɛ́ gúdo tlóló ɔ, ayi ce nɔ jɛ do, bɔ un hɛn ɔ, un ná wa nǔ e ná wa wɛ un ɖe ɖo kéze ɔ mɛ é.” Ényí a ɖɔ nǔ e ɖo hǔn mɛ nú we lɛ́ é nú Jexóva ɔ, ɖasin aluwɛ tɔn e kun wɛ a ɖe lɛ́ é nɔ byɔ́ lanmɛ n’i tawun, bɔ é nɔ mɔ nǔ jɛ wǔvɛ́ e se wɛ a ɖe ɖo ayi mɛ é wú. Ényí nǔ e zɔ́n bɔ a ɖo adohu adohu jí é ná bo tlɛ kpo ɖo ayǐ ɔ, Jexóva hɛn ɔ, é ná xo hwihwɛ́ ayi towe, bo ná d’alɔ we bɔ a ná ɖó fífá ɖó bǎ ɖé mɛ. (Ðɛh. 94:19; Filí. 4:6, 7) É ná lɛ́ d’ajɔ we ɖó dɛ e dɛ wɛ a ɖe kpó gbejíninɔ kpó é wú.—Ebl. 11:6.

HWENU E MƐ E WÚ A ÐEJI DÓ É ÐÉ FLÚ WE É

11. Nɛ̌ ninɔmɛ e nɔ gba ayi dó nú mɛ bɔ Davídi gbɔn mɛ lɛ́ é ka zɔ́n bɔ nǔ cí n’i?

¹¹ Ðo gbɛzán Davídi tɔn mɛ ɔ, é dɛ ɖo ninɔmɛ syɛ́nsyɛ́n gěgé nu, bɔ yě dó avǐ nu n’i. Mɛ ɖěvo lɛ́ gbɛ́ wǎn n’i, bɔ mɛ ɖěɖěe wú é ɖeji dó lɛ́ é tlɛ flú i. (1 Sam. 19:10, 11; 2 Sam. 15:10-14, 30) Hweɖénu wá su bɔ é wlán ɖɔ: “Un wɛn azɔn káká bɔ nǔ ci kɔ nú mì. Zǎn mɛ tɛgbɛ ɔ, zan ce bǐ wɛ nɔ nyí ɖasin, ɖasin wɛ nɔ fá adɔ̌zan ce bǐ.” Étɛ́wú nǔ ka cí mɔ̌ nú Davídi? É tínmɛ ɖɔ: “Kɛntɔ́ wɛ ɖo ya dó nú mì wɛ sɔmɔ̌.” (Ðɛh. 6:7, 8) Nǔ nyanya e mɛ ɖěvo lɛ́ wa nú Davídi é zɔ́n bɔ é se wǔvɛ́ mɔ̌hun e zɔ́n bɔ é ya avǐ tawun é.

12. Sɔgbe xá Ðɛhan 56:9 ɔ, étɛ́ jí Davídi ka kú dó?

¹² Davídi mɔ wǔvɛ́ gěgé có, é ka kú d’é jí ɖɔ Jexóva yí wǎn nú émí. É wlán ɖɔ: ‘Jexóva se  avǐ e ya wɛ un ɖe é.’ (Ðɛh. 6:9) Ðo ninɔmɛ ɖěvo mɛ ɔ, Davídi wlán xó ɖaaɖagbe e mǐ mɔ ɖo Ðɛhan 56:9 mɛ lɛ́ é. (Xa.) Xó énɛ́ lɛ́ ɖe lěe Jexóva nɔ kpé nukún dó mɛ wú kpó wǎnyíyí kpó gbɔn é xlɛ́, b’ɛ byɔ́ lanmɛ tawun. É cí nú Davídi ɖɔ Jexóva ɖo ɖasin tɔn lɛ́ yí dó go ɖé mɛ wɛ ɖɔhun, alǒ ɖo wlǎnwlán dó wěma ɖé mɛ wɛ ɖɔhun. Davídi kú d’é jí ɖɔ Jexóva nɔ ɖ’ayi wǔvɛ́ émítɔn wú, bo nɔ flín. Davídi kú d’é jí ɖɔ é kún nyí tuun kɛ́ɖɛ́ wɛ Tɔ́ émítɔn jǐxwé tɔn wǎnyíyínɔ ɔ tuun wǔvɛ́ e mɛ gbɔn dín wɛ émí ɖe lɛ́ é ó, loɔ, é lɛ́ tuun nǔ e yě wa dó émí wú lɛ́ é.

13. Ényí mɛ ɖěvo lɛ́ dó awakanmɛ kú nú mǐ ɔ, fítɛ́ mǐ ka sixú mɔ gbɔdónúmɛ ɖe? (Kpɔ́n ɖiɖe ɔ lɔmɔ̌.)

¹³ Nǔ e é kplɔ́n mǐ lɛ́ é. A ka ɖo wǔvɛ́ se wɛ ɖo ayi mɛ, ɖó mɛ e wú a ɖeji dó é ɖé d’awakanmɛ kú nú we tawun, alǒ flú we wútu wɛ a? Bóyá, a ɖo wǔvɛ́ se wɛ ɖo ayi mɛ, ɖó mɛ e lin ná da wɛ a ɖe é jó we dó, alǒ mɛ e a ko da é gbɛ́ we ɖo ajijimɛ, kabǐ mɛ e a yí wǎn ná é ɖé ɖó Jexóva sinsɛn te wútu. Nɔví súnnu e asi tɔn d’afɔ gbě bo jó è dó é ɖé ɖɔ: “Un sixú ɖi ɖɔ nǔ mɔ̌hun ná xá mì ǎ. Un mɔ ɖɔ un kún vó nǔɖé ó, wǔ kú mì, bɔ xomɛ lɛ́ sin mì.” Ényí a ɖo xwi ɖí xá gbejímanɔ, alǒ awakanmɛ kú mɛ wɛ ɔ, tuuntuun ɖɔ Jexóva kún ná jó we dó gbeɖé ó ná dó gbɔ nú we. Nɔví súnnu ɔ ɖɔ: “Un wá mɔ nǔ jɛ wú ɖɔ mɛ ɖěvo lɛ́ sixú gɔn gbejí nɔ nú mǐ hwebǐnu, amɔ̌, Jexóva wɛ nyí Só mǐtɔn. Nǔ ɖěbǔ ná bo jɛ ɔ, é nɔ ɖo fínɛ́ hwebǐnu. É ná jó gbejínɔtɔ́ tɔn lɛ́ dó ǎ.” (Ðɛh. 37:28) Lɛ̌ flín ɖɔ wǎnyíyí Jexóva tɔn hú gǎn gbɛtɔ́ ɖěbǔ tɔn. Gbejí e mɛɖé ma nɔ nú we ǎ é sixú ɖó wǔvɛ́ nú we tawun, amɔ̌, wǔvɛ́ énɛ́ sixú fɔn ta te lě do Jexóva nɔ kpé nukún dó wǔ we sɔ é ǎ. (Hlɔ̌. 8:38, 39) Nǔ tají ɔ ɖíe: Ényí è na bo wa nǔ xá we gbɔn ɖěbǔ ɔ, Tɔ́ towe jǐxwé tɔn ɔ yí wǎn nú we.

14. Gǎnjɛwú tɛ́ Ðɛhan 34:19 ka ná mǐ?

¹⁴ Ényí a ɖo xwi ɖí xá gbejímanɔ wɛ ɔ, gǎnjɛwúxó Davídi tɔn e ɖo Ðɛhan 34:19 mɛ lɛ́ é sixú lɛ́ dó gbɔ nú we. (Xa.) Wěma alɔdlɛ́ndónǔ tɔn ɖé ɖɔ ɖɔ “mɛ ɖěɖěe nǔ jɛ akɔ́n jí ná lɛ́ é” sixú dó gesí “mɛ ɖěɖěe ma sɔ́ ɖo nǔ ɖagbe ɖěbǔ ɖó nukún wɛ ǎ é.” Nɛ̌ nǔ ka nɔ cí nú Jexóva dó mɛ ɖěɖěe nǔ cí mɔ̌ ná ɖó è flú yě dó nǔjɔnǔ mɛ wútu lɛ́ é wú? Lěe mɛjitɔ́ wǎnyíyínɔ ɖé nɔ hɛn vǐ tɔn e ɖo aluwɛ mɛ é bo nɔ dó gbɔ n’i gbɔn é ɔ, Jexóva “ɖo kpɔ́ xá” mǐ, bo tlɛ nɔ se wǔvɛ́ xá mǐ, bo ɖo gbesisɔmɛ bo ná d’alɔ mǐ hwenu e mɛɖé gɔn gbejí nɔ nú mǐ, alǒ mɛɖé kú dó mǐ bɔ mǐ ɖo aluwɛ tɔn mɛ é. É ɖo gbesisɔmɛ bo ná dó gbɔ nú mǐ, ényí ayi mǐtɔn gba dó, alǒ mǐ mɔ ɖɔ mǐ kún vó nǔɖé ó ɔ nɛ́. Gɔ́ ná ɔ, é ná nǔ e mǐ ná ɖó nukún, b’ɛ ná zɔ́n bɔ mǐ ná dɛ ɖo tagba e ɖí  xwi xá wɛ mǐ ɖe din lɛ́ é nu é gěgé mǐ.—Eza. 65:17.

ÐASIN E È NƆ KUN HWENU E È MA SƆ́ ÐÓ NUKÚNÐÍÐÓ ÐĚ Ǎ É

15. Ninɔmɛ tɛ́ mɛ Ezekiyási ka gbɔn b’ɛ zɔ́n b’ɛ ya avǐ?

¹⁵ Hwenu e Judáa xɔ́sú Ezekiyási ɖo xwe 39 ɖó wɛ é ɔ, é wlí azɔn e nɔ kplá mɛ yi kú é ɖé. Gbeyíɖɔ Ezayíi dó wɛn Jexóva tɔn Ezekiyási, bo ɖɔ n’i ɖɔ é kún ná gán ɖo azɔn e jɛ wɛ é ɖe é mɛ ó. (2 Axɔ́. 20:1) É cí ɖɔ nukúnɖíɖó ɖě kún sɔ́ ɖe nú Ezekiyási ó ɖɔhun. Wɛn e Ezekiyási se é zɔ́n bɔ wǔ kú i tawun, bɔ é ya avǐ dó nǔjɔnǔ mɛ. É xo ɖɛ vívɛ́ sɛ́dó Jexóva.—2 Axɔ́. 20:2, 3.

16. Nɛ̌ Jexóva ka wa nǔ gbɔn hwenu e Ezekiyási sa vo kpó avǐ kpó é?

¹⁶ Vo e Ezekiyási sa kpó avǐ kpó é byɔ́ lanmɛ nú Jexóva, b’ɛ ɖɔ n’i kpó xomɛnyínyɔ́ kpó ɖɔ: “Un se ɖɛ towe, bo mɔ avǐ e ya wɛ a ɖe é. Kpɔ́n, un ná gbɔ azɔn nú we.” Jexóva se wǔvɛ́ xá ɛ, bo gbɔn Ezayíi jí bo ɖɔ n’i ɖɔ émí ná dó azǎn gbɛzán tɔn jí, bo ná hwlɛ́n Jeluzalɛ́mu sín Asilíinu lɛ́ lɔ mɛ.—2 Axɔ́. 20:4-6.

17. Ényí mǐ ɖo lanmɛzɔn syɛ́nsyɛ́n lɛ́ ɖí xwi xá wɛ ɔ, nɛ̌ Jexóva ka nɔ d’alɔ mǐ gbɔn? (Ðɛhan 41:4) (Kpɔ́n ɖiɖe ɔ lɔmɔ̌.)

¹⁷ Nǔ e é kplɔ́n mǐ lɛ́ é. A ka ɖo xwi ɖí xá lanmɛzɔn ɖé wɛ, b’ɛ cí ɖɔ nukúnɖíɖó ɖě kún sɔ́ ɖe ó wɛ a? Xo ɖɛ sɛ́dó Jexóva, é ná bo tlɛ nyí kpó avǐ kpó ɔ nɛ́. Biblu ná gǎnjɛwú mǐ ɖɔ é nyí “Tɔ́ e nɔ kú nǔbláwǔ ɖaxó nú mɛ é, bo lɛ́ nyí Mawu e nɔ dó gbɔ nú mɛ ɖo ali bǐ nu é;” é ná dó gbɔ nú mǐ ɖo tagba mǐtɔn lɛ́ bǐ mɛ. (2 Kɔ. 1:3, 4) Mǐ sixú ɖó nukún ɖo égbé ɖɔ Jexóva ná ɖe tagba mǐtɔn lɛ́ bǐ síin ǎ, amɔ̌, mǐ sixú ɖeji dó wǔ tɔn ɖɔ é ná d’alɔ mǐ. (Xa Ðɛhan 41:4.) Jexóva nɔ gbɔn gbigbɔ mímɛ́ tɔn gblamɛ bo nɔ ná mǐ hlɔ̌nhlɔ́n, nǔnywɛ́ kpó fífá ayi mɛ tɔn kpó bónú mǐ ná dó ɖí xwi xá. (Nǔx. 18:14; Filí. 4:13) É nɔ lɛ́ d’alɔ mǐ gbɔn nukúnɖíɖó jínjɔ́n Biblu jí e mǐ ɖó ɖɔ azɔn alɔkpa lɛ́ bǐ sín xó ná fó é gblamɛ.—Eza. 33:24.

18. Wěmafɔ tɛ́ a ka mɔ ɖɔ é nɔ dó gbɔ nú we hwenu e a ɖo ninɔmɛ syɛ́nsyɛ́n ɖé ɖí xwi xá wɛ é? (Kpɔ́n gbǎví “ Gbɔdónúmɛxó ɖěɖěe sixú súnsún ɖasin nú mǐ lɛ́ é.”)

¹⁸ Xó Jexóva tɔn lɛ́ dó gbɔ nú Ezekiyási. Mǐ lɔ sixú mɔ gbɔdónúmɛ ɖo Xó Mawu tɔn mɛ. Ényí mǐ ɖo linkpɔ́n mɛ ɔ, Xó Jexóva tɔn ɖěɖěe ɖo Biblu mɛ lɛ́ é sixú dó gbɔ nú mǐ, bo lɛ́ d’alɔ mǐ bɔ agbɔ̌n mǐtɔn ná jɛ do. (Hlɔ̌. 15:4) Hwenu e è mɔ kansɛ́ɛzɔn nú nɔví nyɔ̌nu e nɔ nɔ Gbadahwe jí Aflíka tɔn é ɖé é ɔ, é nɔ ɖo avǐ ya wɛ hwebǐnu. É ɖɔ: “Wěmafɔ e dó gbɔ nú mì tawun é ɖokpó wɛ nyí Ezayíi 26:3. Mǐ nɔ sixú ɖyɔ́ ninɔmɛ mǐtɔn ɖo ninɔmɛ gěgé mɛ ǎ có, wěmafɔ énɛ́ d’akpá ɖɔ Jexóva hɛn ɔ, é ná bló bɔ ayi mǐtɔn ná jɛ do, bo ná lɛ́ d’alɔ mǐ bɔ mǐ ná dɛ ɖo tagba ɖěbǔ nu.” Wěmafɔ ɖé ka ɖe, bɔ a mɔ ɖɔ é nɔ dó gbɔ nú we tawun hwenu e a ɖo ninɔmɛ ɖěɖěe é cí ɖɔ fí gbɔn tɔ́n ɖě kún sɔ́ ɖe ó é mɛ é a?

19. Sɔgúdo tɛ́ ka ɖo te kpɔ́n mǐ?

 ¹⁹ Mǐ ko sɛ yi nukɔn tawun ɖo azǎn gǔdo gúdo tɔn lɛ́ mɛ, bo nɔ ɖó nukún ɖɔ nǔ ɖěɖěe ná zɔ́n bɔ mǐ ná kun ɖasin lɛ́ é ná fɔ́n bo ná ɖo jijɛjí wɛ. Amɔ̌, lěe mǐ mɔ gbɔn ɖo kpɔ́ndéwú Ana, Davídi kpó Ezekiyási kpó tɔn mɛ é ɔ, Jexóva nɔ mɔ ɖasin e mǐ nɔ kun lɛ́ é, bɔ yě nɔ byɔ́ lanmɛ n’i tawun. Ðasin mǐtɔn lɛ́ nɔ xɔ akwɛ́ n’i ɖésú. Énɛ́ wú ɔ, ényí mǐ ɖo ninɔmɛ e nɔ gba ayi dó nú mɛ lɛ́ é mɛ gbɔn wɛ ɔ, é ɖo wɛn ɖɔ mǐ nɔ ba ná hun ayi mǐtɔn nú Jexóva. Mi nú mǐ ní ma ɖó wǔ zɔ nú nɔví súnnu kpó nɔví nyɔ̌nu kpó wǎnyíyínɔ mǐtɔn e ɖo agun ɔ mɛ lɛ́ é gbeɖé ó. Mi nú xó gbɔdónúmɛ tɔn ɖěɖěe ɖo Biblu mɛ lɛ́ é ní kpo ɖo gbɔ dó nú mǐ wɛ. Mǐ sixú kú d’é jí ɖɔ ényí mǐ kpo ɖo didɛ wɛ kpó gbejíninɔ kpó ɔ, Jexóva ná d’ajɔ mǐ. Akpá ɖaaɖagbe e é dó ɖɔ hwetɔnnu su ɔ, émí ná súnsún ɖasin aluwɛ, gbejímanɔ kpó nukúnɖíɖó ma ɖó kpó tɔn bǐ sín nukún mǐtɔn mɛ lɛ́ é lɔ ɖo ajɔ énɛ́ mɛ. (Nǔɖe. 21:4) Énɛ́ gúdo ɔ, ɖasin awǎjijɛ tɔn kɛ́ɖɛ́ wɛ mǐ ná nɔ kun.