ÐO MERCREDI 18 janvier 2023 ɔ, ɖɔnúese bǔnɔ ɖé tɔ́n ɖo jw.org jí, bo ɖɔ ɖɔ è sɔ́ nɔví Gage Fleegle kpó Jeffrey Winder kpó, bɔ yě ná nɔ Hǎgbɛ́ alixlɛ́mɛtɔ́ Kúnnuɖetɔ́ Jexóva tɔn lɛ́ tɔn mɛ. Nɔví we énɛ́ lɛ́ bǐ ko wa sinsɛnzɔ́ nú Jexóva kpó gbejíninɔ kpó, nú hwenu línlín.

Mɛjitɔ́ e nɔ ɖó sísí nú Mawu lɛ́ é wɛ kpé nukún dó nɔví Fleegle wú b’ɛ su, ɖo gbadahwe jí Pennsylvanie tɔn, ɖo États-Unis. Hwenu e é ɖo wǐnnyáwínnyá mɛ é ɔ, xwédo tɔn sɛ tɛn yi gletoxo kpɛví e mɛ hudó sukpɔ́ ɖe é ɖé mɛ. Hwenu kpɛɖé ɖo énɛ́ gúdo ɔ, é bló batɛ́mu ɖo 20 novembre 1988.

Hwebǐnu wɛ mɛjitɔ́ nɔví Fleegle tɔn lɛ́ nɔ dó wǔsyɛ́n lanmɛ n’i ɖɔ é ní byɔ́ sinsɛnzɔ́ hwebǐnu tɔn mɛ. Hwɛhwɛ wɛ yě nɔ yí nukúnkpénǔwútɔ́ lɛ̌dó tɔn lɛ́ kpó mɛ e nɔ w’azɔ̌ ɖo Betɛ́li lɛ́ é kpó dó xwé yětɔn gbe; énɛ́ zɔ́n bɔ nɔví Fleegle mɔ lěe nɔví énɛ́ lɛ́ ɖó awǎjijɛ sɔ é. É bló batɛ́mu é ɔ, é sɔ́ lín cóbónú é bɛ́ gběxosín-alijítɔ́ hwebǐnu tɔn sín azɔ̌ ɖo 1^er septembre 1989 ǎ. Xwe we gúdo ɔ, é kpé nǔ e gbé é jɛ nyinya jí hwenu e é ɖó xwe 12 é wú, énɛ́ wɛ nyí, sinsɛnzɔ́wiwa ɖo Betɛ́li. É bɛ́ sinsɛnzɔ́ tɔn ɖo Betɛ́li Brooklyn tɔn ɖo octobre 1991.

Ðo Betɛ́li ɔ, nɔví Fleegle w’azɔ̌ ɖo wěmabláɖókpɔ́xɔsá nú xwe tántɔn, bɔ énɛ́ gúdo ɔ, è wá sɛ́ ɛ dó Azɔ̌xɔsá sinsɛnzɔ́ tɔn. Hwenɛ́nu ɔ, é nɔ agun e nɔ dó Russie-gbe é mɛ nú xwe yɔywɛ ɖé. Ðo 2006 ɔ, é wlí alɔ xá Nadia, bɔ é lɔ wá gɔ́ n’i ɖo Betɛ́li. Yě nɔ kpɔ́ bo wa sinsɛnzɔ́ ɖo agun e nɔ dó Portugal-gbe é mɛ, bɔ nú xwe wǒ jɛjí ɔ, yě wa sinsɛnzɔ́ ɖo agun e nɔ dó Espagne-gbe é mɛ. Ée nɔví Fleegle nɔ Azɔ̌xɔsá sinsɛnzɔ́ tɔn nú xwe gěgé gúdo é ɔ, è sɔ́ ɛ b’ɛ w’azɔ̌ ɖo Wěɖegbɛ́ mɛkplɔ́nkplɔ́n tɔn sín azɔ̌xɔsá, bɔ ɖo nukɔnmɛ ɔ, é wá w’azɔ̌ ɖo Wěɖegbɛ́ sinsɛnzɔ́ tɔn sín azɔ̌xɔsá. Ðo mars 2022 ɔ, è sɔ́ ɛ b’ɛ nyí alɔgɔ́tɔ́ nú Wěɖegbɛ́ sinsɛnzɔ́ tɔn Hǎgbɛ́ alixlɛ́mɛtɔ́ ɔ tɔn.

 Nɔví Winder su ɖo Murrieta ɖo Californie, ɖo États-Unis. Mɛjitɔ́ tɔn lɛ́ kplɔ́n ɛ bɔ é su dó nǔgbó ɔ mɛ; é bló batɛ́mu ɖo 29 mars 1986. Ðo sun e bɔ d’é wú tlóló é mɛ ɔ, é nyí gběxosín-alijítɔ́ alɔgɔ́tɔ́. É ɖu vǐví tɔn tawun, bo lɛ́ ba ná gbɛ kan d’é nu. É wa gběxosín-alijítɔ́ alɔgɔ́tɔ́ sín azɔ̌ nú sun mɔ̌kpán gúdo é ɔ, é bɛ́ gběxosín-alijítɔ́ hwebǐnu tɔn sín azɔ̌, ɖo 1^er octobre 1986.

Hwenu e nɔví Winder ɖo wǐnnyáwínnyá mɛ é ɔ, fofó tɔn we ɖo azɔ̌ wa wɛ ɖo Betɛ́li hwe ɔ nu, bɔ é yi ba yě kpɔ́n. Ba énɛ́ e é yi ba yě kpɔ́n é flɔ́ zo dó glɔ̌ nú jlǒ e é ɖó bá d’alɔ wěma mɛ bo ná wa sinsɛnzɔ́ ɖo Betɛ́li, hwenu e é ná su é. Bɔ ɖo mai 1990 ɔ, è ylɔ́ ɛ bónú é ná wa sinsɛnzɔ́ ɖo Betɛ́li ɖo Wallkill.

Nɔví Winder wa sinsɛnzɔ́ ɖo azɔ̌xɔsá vovo ɖo Betɛ́li, é w’azɔ̌ ɖo Azɔ̌xɔsá ayǐjíjláɖó tɔn, Azɔ̌xɔsá gle tɔn kpó Azɔ̌xɔsá Betɛ́li tɔn kpó. Ðo 1997 ɔ, é wlí alɔ xá Angela, bɔ yě ɖo sinsɛnzɔ́ wa wɛ ɖo Betɛ́li sín hwenɛ́nu. Ðo 2014 ɔ, è sɛ́ yě dó Warwick, bɔ nɔví Winder ɖ’alɔ ɖo hɔ̌nkan gbɛ ɔ tɔn mǐtɔn sín xɔ lɛ́ gbígbá mɛ ɖo fínɛ́. Ðo 2016 ɔ, yě sɛ tɛn yi nɔtɛn wěma kplɔ́nkplɔ́n tɔn Watchtower tɔn ɖo Patterson, bɔ nɔví Winder w’azɔ̌ ɖo Azɔ̌xɔsá xóyídókanjí kpó video kpó tɔn ɖo fínɛ́. Xwe ɛnɛ gúdo ɔ, yě lɛ́ lɛ́ kɔ yi Warwick, bɔ è byɔ́ nɔví Winder ɖɔ é ní w’azɔ̌ ɖo Wěɖegbɛ́ nukúnkpémɛwú tɔn sín azɔ̌xɔsá. Ðo mars 2022 ɔ, è sɔ́ ɛ bɔ é nyí alɔgɔ́tɔ́ nú Wěɖegbɛ́ nukúnkpémɛwú tɔn Hǎgbɛ́ alixlɛ́mɛtɔ́ ɔ tɔn.

Mǐ nɔ xo ɖɛ ɖɔ Jexóva ní kɔn nyɔ̌ná dó ‘súnnu énɛ́ lɛ́ e nyí nǔníná é’ jí bónú é ní túnflá, hwenu e yě ná ɖo azɔ̌ syɛ́nsyɛ́n wa dó Axɔ́súɖuto ɔ sín nǔ lɛ́ tamɛ wɛ é.—Efɛ́. 4:8.