1. Aniwú mǐ ka ɖó ali e Jexóva nɔ xlɛ́ mǐ é sín hudó? Jlɛ̌ dó nǔɖé wú.

 DǑ NUKÚN mɛ kpɔ́n ɖɔ a bú ɖo zungbó ɖé mɛ. Awǒvinú lěhun lɛ́ lɛ́ lɛ̌ dó we: gběkanlin lɛ́, nǔvínúví kpó ama kpó aɖǐnɔ lɛ́; a sixú lɛ́ zɔn do mɛ. Ényí a mɔ alixlɛ́mɛtɔ́ e tuun fí e awǒvinú lɛ́ ɖe é, bo ná d’alɔ we bɔ a ná nyi alɔ nú yě é ɖé ɔ, é ná su nukún towe mɛ tawun! Gbɛ élɔ́ cí zungbó énɛ́ ɖɔhun. Awǒvinú gěgé wɛ ɖ’é mɛ, tají ɔ, ɖěɖěe nɔ sɔ́ ganjíninɔ mǐtɔn ɖo gbigbɔ lixo ɖ’axɔ́ nu lɛ́ é. Amɔ̌, mǐ ɖó Alixlɛ́mɛtɔ́ e ma ɖó blɔ̌ ǎ é ɖé, é wɛ nyí Jexóva. É nɔ kplá mǐ gbɔn zɔ nú awǒvinú lɛ́ xwe fí e mǐ xwe é, énɛ́ wɛ nyí gbɛ mavɔmavɔ ɔ mɛ, ɖo gbɛ yɔ̌yɔ́ ɔ mɛ.

2. Nɛ̌ Jexóva ka nɔ xlɛ́ ali mǐ gbɔn?

² Nɛ̌ Jexóva ka nɔ xlɛ́ ali mǐ gbɔn? Nukɔntɔn, é nɔ zán Xó tɔn Biblu ɔ. Amɔ̌, é nɔ lɛ́ zán gbɛtɔ́ lɛ́. Ði kpɔ́ndéwú ɔ, é nɔ zán “mɛsɛntɔ́ gbejínɔtɔ́ ayiɖotenánɔ” ɔ dó ná mǐ nǔɖuɖu gbigbɔ tɔn e ná d’alɔ mǐ bɔ mǐ ná nɔ wá gbeta e nǔnywɛ́ kpé lɛ́ é kɔn é. (Mat. 24:45) Jexóva nɔ lɛ́ zán súnnu nǔwúkpétɔ́ ɖěvo lɛ́ dó xlɛ́ ali mǐ. Ði kpɔ́ndéwú ɔ, nukúnkpénǔwútɔ́ lɛ̌dó tɔn lɛ́ kpó mɛxó agun tɔn lɛ́ kpó nɔ dó wǔsyɛ́n lanmɛ nú mǐ, lobo nɔ lɛ́ ɖe wě ɖěɖěe ná d’alɔ mǐ ɖo hwenu vɛ́ wǔ lɛ́ mɛ lɛ́ é xá mǐ. Wěɖexámɛ ɖejidéwú énɛ́ lɛ́ e mǐ nɔ mɔ ɖo azǎn gǔdo gúdo tɔn vɛ́ wǔ élɔ́ lɛ́ mɛ é nɔ su nukún mǐtɔn mɛ tawun. Yě nɔ d’alɔ mǐ bɔ nǔ mǐtɔn nɔ kpo ɖo Jexóva nukúnmɛ nyɔ́ wɛ, bɔ mǐ nɔ kpo ɖo gbɛ li ɔ jí.

3. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

³ Amɔ̌, hweɖélɛ́nu ɔ, é sixú vɛ́ wǔ nú mǐ bɔ mǐ ná xwedó wěɖexámɛ Jexóva tɔn, tají ɔ, ényí gbɛtɔ́ hwɛhutɔ́ lɛ́ wɛ ɖe wě ɔ xá mǐ ɔ nɛ́. Aniwú? Mǐ sixú gɔn wǎn yí nú wě e yě ɖe xá mǐ é.  Alǒ, é sixú cí nú mǐ ɖɔ nǔnywɛ́ kún kpé wě e è ɖe xá mǐ é ó ɖɔhun, lobɔ mǐ ná wá gbeta ɔ kɔn ɖɔ wěɖexámɛ ɔ kún gosín Jexóva gɔ́n ó. Hwe énɛ́ lɛ́ nu ɔ, é byɔ́ tawun ɖɔ mǐ ní ɖeji ɖɔ Jexóva wɛ nyí mɛ e ɖo ali xlɛ́ togun tɔn wɛ é, bɔ wěɖexámɛ tɔn lɛ́ xwixwedó nɔ tɔ́n kɔ dó nyɔ̌ná gěgé mɛ. Bo ná dó d’alɔ mǐ bónú mǐ ná ná hlɔ̌nhlɔ́n jiɖiɖe mǐtɔn ɔ, xóta élɔ́ ná ɖɔ xó dó nǔ atɔn élɔ́ lɛ́ wú: (1) lěe Jexóva xlɛ́ ali togun tɔn ɖo hwexónu gbɔn é, (2) lěe é ɖo ali xlɛ́ mǐ wɛ ɖo égbé gbɔn é kpó (3) lěe mǐ nɔ ɖu le wěɖexámɛ tɔn lɛ́ xwixwedó tɔn gbɔn é kpó.

LĚE JEXÓVA XLƐ́ ALI TOGUN IZLAYƐ́LI TƆN Ɔ GBƆN É

4-5. Nɛ̌ Jexóva ka xlɛ́ ɖɔ émí ɖo Mɔyízi zán dó xlɛ́ ali Izlayɛ́li ví lɛ́ wɛ gbɔn? (Kpɔ́n ɖiɖe ɔ.)

⁴ Jexóva sɔ́ Mɔyízi bónú é ná kplá Izlayɛ́li ví lɛ́ sín Ejípu. Gɔ́ ná ɔ, é ná kúnnuɖenú e jɛ wě lɛ́ é Izlayɛ́li ví lɛ́ ɖɔ émí wɛ ɖo ali xlɛ́ yě wɛ gbɔn Mɔyízi jí. Ði kpɔ́ndéwú ɔ, é zán akpɔ́kpɔ́ ɖo kéze, bo zán myɔ ɖo zǎnmɛ. (Tín. 13:21) Mɔyízi xwedó ali e è xlɛ́ ɛ é, bɔ énɛ́ zɔ́n bɔ é kpó Izlayɛ́li ví lɛ́ kpó jɛ Xu vɔvɔ ɔ kɔn. Togun ɔ ɖi xɛsi hwenu e é mɔ ɖɔ émí ján cí xu ɔ kpó ahwankpá Ejípu tɔn e ɖo émí gúdo é kpó tɛ́ntin é. Yě lin ɖɔ kplá e Mɔyízi kplá émí wá Xu vɔvɔ ɔ kɔn é ɔ, nǔ wɛ é wa nyi do. Amɔ̌, é wa nǔ ɖě nyi do ǎ. Jexóva wɛ gbɔn Mɔyízi jí bo kplá togun tɔn wá fínɛ́. (Tín. 14:2) Énɛ́ gúdo ɔ, Mawu hwlɛ́n yě ɖo ali e jí wǔ tawun é ɖé nu.—Tín. 14:26-28.

⁵ Ðo xwe 40 gúdo ɔ, Mɔyízi lɛ́ kpo ɖo jiɖe ɖó wɛ ɖɔ Jexóva wɛ ɖo akpɔ́kpɔ́ zán dó xlɛ́ ali togun tɔn wɛ ɖo gbětótló mɛ. a Nú hwenu ɖé ɔ, Jexóva bló bɔ akpɔ́kpɔ́ ɔ nɔ nɔ Mɔyízi sín goxɔ tanu, bɔ fí e é ɖe é ɔ, Izlayɛ́li ví lɛ́ bǐ sixú mɔ. (Tín. 33:7, 9, 10) Jexóva nɔ nɔ akpɔ́kpɔ́ ɔ mɛ bo nɔ ɖɔ xó nú Mɔyízi, bɔ éyɛ́ nɔ wá yi ɖɔ nǔ e Jexóva ɖɔ n’i lɛ́ é nú togun ɔ. (Ðɛh. 99:7) Izlayɛ́li ví lɛ́ sixú mɔ nyi wɛn ɖɔ Jexóva wɛ ɖo Mɔyízi zán dó xlɛ́ ali yě wɛ.

6. Nɛ̌ Izlayɛ́li ví lɛ́ ka wa nǔ gbɔn hwenu e Jexóva xlɛ́ ali yě é? (Kɛ́nsísɔ́ 14:2, 10, 11)

⁶ É blá wǔ ɖɔ Izlayɛ́li ví gěgé gbɛ́ kúnnuɖenú e jɛ wě bo xlɛ́ ɖɔ Jexóva wɛ ɖo Mɔyízi zán dó xlɛ́ ali yě wɛ lɛ́ é. (Xa Kɛ́nsísɔ́ 14:2, 10, 11.) Azɔn mɔ̌kpán wɛ yě gbɛ́ ɖɔ émí kún ná yí gbe ɖɔ Jexóva wɛ ɖo Mɔyízi zán dó xlɛ́ ali émí wɛ ó. Wǎgbɔ tɔn ɔ, Jexóva ná tɛn jijimɛ énɛ́ bónú é yi Akpádídó yíkúngban ɔ jí ǎ.—Kɛ́n. 14:30.

7. Nǎ kpɔ́ndéwú mɛ ɖěɖěe xwedó Jexóva sín wěɖexámɛ lɛ́ é tɔn ɖé lɛ́. (Kɛ́nsísɔ́ 14:24) (Kpɔ́n diɖe ɔ lɔmɔ̌.)

⁷ É ɖo mɔ̌ có, Izlayɛ́li ví ɖé lɛ́ xwedó wěɖexámɛ Jexóva tɔn. Ði kpɔ́ndéwú ɔ, Jexóva ɖɔ: “Kalɛ́bu ɔ, ayi ɖo xomɛ nú éyɛ́, bɔ é nɔ gbejí nú mì.” (Xa Kɛ́nsísɔ́ 14:24.) Mawu dó ajɔ Kalɛ́bu, bo tlɛ yí gbe n’i bɔ é sɔ́ fí e jló è é ɖo Akpádídó yíkúngban ɔ jí. (Joz. 14:12-14) Jijimɛ Izlayɛ́li ví lɛ́ tɔn e bɔ d’é wú é lɔ sɔ́ kpɔ́ndéwú ɖagbe ɖ’ayǐ ɖo tónúsise nú wěɖexámɛ Jexóva tɔn lɛ́ kpáxwé. Ée è sɔ́ Jozuwée bɔ é jɛ Mɔyízi domɛ bo jɛ ali xlɛ́ Izlayɛ́li ví lɛ́ jí é ɔ, “yě ɖó sísí n’i ɖo gbɛzán tɔn bǐ mɛ.” (Joz. 4:14) Wǎgbɔ tɔn ɔ, Jexóva kɔn nyɔ̌ná tɔn dó yě jí, bo kplá yě yi ayǐkúngban e sín akpá é dó nú yě é jí.—Joz. 21:43, 44.

8. Tínmɛ lěe Jexóva xlɛ́ ali togun tɔn ɖo axɔ́sú lɛ́ hwenu gbɔn é. (Kpɔ́n ɖiɖe ɔ lɔmɔ̌.)

⁸ Xwe ɖé lɛ́ gúdo ɔ, Jexóva sɔ́ hwɛɖɔtɔ́ ɖé lɛ́ bónú yě ná xlɛ́ ali togun tɔn. Énɛ́ gúdo ɔ, ɖo axɔ́sú lɛ́ sín hwenu ɔ, Jexóva sɔ́ gbeyíɖɔ lɛ́ bónú yě ná xlɛ́ ali togun tɔn. Axɔ́sú gbejínɔtɔ́ lɛ́ xwedó wě e gbeyíɖɔ lɛ́ ɖe xá yě lɛ́ é. Ði kpɔ́ndéwú ɔ, axɔ́sú Davídi sɔ́ éɖée hwe bo yí gbe nú nǔ e gbeyíɖɔ Natáan gbɛ́ n’i é. (2 Sam. 12:7, 13; 1 Tan 17:3, 4) Axɔ́sú Jozafáti xwedó wě e  gbeyíɖɔ Yaxaziyɛ́li ɖe xá ɛ é, bo dó wǔsyɛ́n lanmɛ nú togun Judáa tɔn ɔ ɖɔ é ní “ɖeji dó gbeyíɖɔ [Mawu] tɔn lɛ́ wú.” (2 Tan 20:14, 15, 20) Hwenu e axɔ́sú Ezekiyási ɖo aluwɛ mɛ é ɔ, é yi ba alɔdó ɖo gbeyíɖɔ Ezayíi gɔ́n. (Eza. 37:1-6) Hweɖébǔnu e axɔ́sú lɛ́ xwedó wěɖexámɛ Jexóva tɔn é ɔ, é nɔ kɔn nyɔ̌ná dó yě jí bɔ togun ɔ nɔ nɔ ayijayǐ mɛ. (2 Tan 20:29, 30; 32:22) Mɛ lɛ́ bǐ ɖó ná ko nɔ mɔ vaan ɖɔ Jexóva ɖo gbeyíɖɔ tɔn lɛ́ zán dó xlɛ́ ali togun tɔn wɛ. Amɔ̌, axɔ́sú gěgé káká jɛ togun ɔ ɖésú jí, gbɛ́ gbeyíɖɔ Jexóva tɔn lɛ́.—Jel. 35:12-15.

LĚE JEXÓVA XLƐ́ ALI KLISÁNWUN BǏBƐ́MƐ TƆN LƐ́ GBƆN É

9. Mɛ̌ mɛ̌ e Jexóva ka zán dó xlɛ́ ali klisánwun xwe kanweko nukɔntɔn ɔ tɔn lɛ́? (Kpɔ́n ɖiɖe ɔ lɔmɔ̌.)

⁹ Ðo xwe kanweko nukɔntɔn H.M. tɔn ɔ, Jexóva ɖó agun klisánwun tɔn ayǐ. Nɛ̌ é ka xlɛ́ ali klisánwun bǐbɛ́mɛ tɔn énɛ́ lɛ́ gbɔn? É sɔ́ Jezu bɔ é nyí ta nú agun ɔ. (Efɛ́. 5:23) Amɔ̌, Jezu ɖésúnɔ wɛ nɔ xlɛ́ ali ahwanvú lɛ́ ɖokpó ɖokpó ǎ. É zán mɛsɛ́dó lɛ́ kpó mɛxó agun tɔn e ɖo Jeluzalɛ́mu lɛ́ é kpó bɔ yě nɔ nukɔn nú nǔ lɛ́. (Mɛ. 15:1, 2) Gɔ́ ná ɔ, è lɛ́ sɔ́ mɛxó agun tɔn lɛ́ bɔ yě nɔ xlɛ́ ali agun lɛ́.—1 Tɛ. 5:12; Ti. 1:5.

10. (a) Nɛ̌ klisánwun xwe kanweko nukɔntɔn ɔ tɔn lɛ́ gěgé ka yí wě e è ɖe xá yě lɛ́ é gbɔn? (Mɛsɛ́dó 15:30, 31) (b) Aniwú mɛ e nɔ gbɛ ɖo hwexónu é ɖé lɛ́ ma ka kpé wú bo yí gbe nú mɛ e sɔ́ Jexóva sín afɔ ɖó te lɛ́ é ǎ? (Kpɔ́n gbǎví “ Nǔ e wú mɛɖé lɛ́ gbɛ́ kúnnuɖenú e ɖo wɛn lɛ́ é é.”)

¹⁰ Klisánwun xwe kanweko nukɔntɔn ɔ tɔn lɛ́ ka yí gbe nú ali e è xlɛ́ yě é a? Kpó xomɛhunhun kpó wɛ yě mɛ gěgé xwedó wě e è ɖe xá yě lɛ́ é. Nǔgbó ɔ, “yě j’awǎ, ɖó wǔsyɛ́n dó lanmɛ nú mɛ xó” e è ɖɔ nú yě lɛ́ é wú. (Xa Mɛsɛ́dó 15:30, 31.) Amɔ̌, nɛ̌ Jexóva ka ɖo ali xlɛ́ togun tɔn wɛ ɖo égbé gbɔn?

LĚE JEXÓVA NƆ XLƐ́ ALI MǏ ÐO ÉGBÉ GBƆN É

11. Nǎ kpɔ́ndéwú e xlɛ́ lěe Jexóva ɖo ali xlɛ́ mɛ ɖěɖěe ɖo nukɔn nú nǔ lɛ́ ɖo hwe mǐtɔn nu gbɔn é tɔn ɖokpó.

¹¹ Jexóva kpo ɖo ali xlɛ́ togun tɔn wɛ ɖo égbé. É ɖo mɔ̌ wa wɛ gbɔn Xó tɔn kpó Vǐ tɔn e nyí ta nú agun ɔ é kpó gblamɛ. Mǐ ka sixú mɔ kúnnuɖenú e xlɛ́ ɖɔ Mawu lɛ́ kpo ɖo gbɛtɔ́ lɛ́ zán wɛ ɖo hwe mǐtɔn nu lɛ́ é a? Ganjí. Ði kpɔ́ndéwú ɔ, lin tamɛ dó nǔ e jɛ ɖo 1870 gúdo é wú. Charles Taze Russell kpó gbɛ̌ tɔn lɛ́ kpó jɛ nukúnnú mɔ jɛ mɛ jí ɖɔ xwe 1914 ná nyí xwe tají ɖé nú Axɔ́súɖuto Mawu tɔn. (Dan. 4:29, 30) Nǔɖɔɖayǐ Biblu tɔn lɛ́ jí wɛ yě zɔn dó dó wá  gbeta énɛ́ kɔn. Jexóva ka ɖo ali xlɛ́ yě wɛ ɖo do e ba nú nǔ wɛ yě ɖe dó Biblu jí é kɔn wɛ a? É ɖo wɛn ɖɔ nǔ nyí mɔ̌. Nǔ ɖěɖěe jɛ ɖo 1914 lɛ́ é dó zǒgbe jí ɖɔ Axɔ́súɖuto Mawu tɔn jɛ acɛ kpa jí. Wɛ̌kɛ́hwan Itɔn ɔ bɛ́, bɔ jɛmɛjí lɛ́, ayǐkúngban dánwǔ lɛ́ kpó nǔɖuɖu hwedó mɛ kpó xo kpóɖó ná. (Luk. 21:10, 11) É ɖo wɛn ɖɔ Jexóva ɖo ali xlɛ́ klisánwun ayijlɔ́jlɔ́nɔ énɛ́ lɛ́ wɛ, bɔ yě ɖo alɔ dó togun tɔn wɛ.

12-13. Tuto tɛ́ lɛ́ è ka bló bónú wɛnɖagbejíjlá kpó nǔkplɔ́nkplɔ́n mɛ lɛ́ kpó sín azɔ̌ ɔ ná gba kpé ɖo Wɛ̌kɛ́hwan IIgɔ́ ɔ hwenu?

¹² Lɛ̌ ɖ’ayi nǔ e jɛ ɖo Wɛ̌kɛ́hwan IIgɔ́ ɔ hwenu é wú. Ée nɔví e ɖo hɔ̌nkan gbɛ ɔ tɔn lɛ́ é gbéjé Nǔɖexlɛ́mɛ 17:8 kpɔ́n gúdo é ɔ, yě ɖ’ayi wú ɖɔ ahwan ɔ kún ná tɔ́n kɔ dó Aamagedɔ́ni mɛ ó, loɔ, hwenu fífá tɔn enyíi e ná hun ali lɛ́ nú mɛ bɔ è ná jlá wɛn ɖagbe ɔ hú gǎn é ɖé wɛ ná jɛ túnu tɔn. Nǔ énɛ́ cí nǔ e ma xwe ali ǎ é ɖé ɖɔhun có, nɔví ɖěɖěe ɖo nukɔn nú nǔ lɛ́ é ɖó wěmaxɔmɛ Galádi tɔn ayǐ, bo nɔ kplɔ́n azɔ̌ mɛsɛ́dó lɛ́ bónú yě ná jlá wɛn ɖagbe ɔ, lobo lɛ́ kplɔ́n nǔ mɛ lɛ́ gbɔn awa vovo gbɛ ɔ tɔn lɛ́ bǐ xwé. Ahwan ɔ tlɛ kpo ɖo yiyi wɛ có, è sɛ́ mɛsɛ́dó lɛ́ dó fí lɛ́. Gɔ́ ná ɔ, mɛsɛntɔ́ gbejínɔtɔ́ ɔ bló tuto wěmaxɔmɛ bǔnɔ ɖé tɔn, b bo ná dó kplɔ́n azɔ̌ mɛ e ɖo agun ɔ mɛ lɛ́ é bǐ bónú alɔ ná lɛ́ bí nú yě d’é jí ɖo wɛnɖagbejíjlá kpó nǔkplɔ́nkplɔ́n mɛ lɛ́ bónú yě ná húzú ahwanvú kpó sín azɔ̌ ɔ kɔn. Mɔ̌ mɛ ɔ, nǔ sɔ́ nú togun Mawu tɔn wɛ è ɖe mɔ̌, nú azɔ̌ e ɖo nukɔn jawě é.

¹³ Égbé ɔ, mǐ sixú mɔ vaan ɖɔ Jexóva ɖo ali xlɛ́ togun tɔn wɛ ɖo hwenu vɛ́ wǔ élɔ́ mɛ. Sín Wɛ̌kɛ́hwan IIgɔ́ ɔ hwenu ɔ, mɛsɛntɔ́ Jexóva tɔn e ɖo awa vovo gbɛ ɔ tɔn lɛ́ xwé lɛ́ é gěgé ɖu fífá kpó mɛɖésúsíninɔ kpó sín vǐví ɖó bǎ ɖé mɛ, ée yě ɖo wɛnɖagbejíjlázɔ́ ɔ wa wɛ é. Nǔgbó ɔ, è jlá wɛn ɖagbe ɔ gbɔn fí lɛ́ bǐ.

14. Étɛ́wú mǐ ka sixú ɖeji dó ali e xlɛ́ mǐ wɛ tutoblónúnǔ Jexóva tɔn kpó mɛxó agun tɔn lɛ́ kpó ɖe é wú? (Nǔɖexlɛ́mɛ 2:1) (Kpɔ́n fɔtóo ɔ lɔmɔ̌.)

 ¹⁴ Égbé ɔ, mɛ e ɖo Hǎgbɛ́ alixlɛ́mɛtɔ́ ɔ mɛ lɛ́ é kpo ɖo wěɖexámɛ ba wɛ ɖo Klísu gɔ́n. Yě nɔ ba ɖɔ ali e émí nɔ xlɛ́ nɔví lɛ́ é ní nɔ ɖe linlin e Jexóva kpó Jezu kpó nɔ ɖó dó nǔ lɛ́ wú é xlɛ́. Wǎgbɔ tɔn ɔ, nukúnkpénǔwútɔ́ lɛ̌dó tɔn lɛ́ kpó mɛxó agun tɔn lɛ́ kpó nɔ ɖe wě xá agun lɛ́. c Mɛxó agun tɔn e gbigbɔ mímɛ́ sɔ́ lɛ́ é ɖo Klísu sín ‘alɔ ɖisí’ ɔ mɛ. (Xa Nǔɖexlɛ́mɛ 2:1.) É ɖo wɛn ɖɔ mɛxó agun tɔn énɛ́ lɛ́ ɔ, hwɛhutɔ́ wɛ nú yě, bɔ yě nɔ wa nǔ nyi do. Mɔyízi kpó Jozuwée kpó wa nǔ nyi do hweɖélɛ́nu, bɔ mɔ̌ wɛ nǔ nyí gbɔn nú mɛsɛ́dó lɛ́ lɔmɔ̌. (Kɛ́n. 20:12; Joz. 9:14, 15; Hlɔ̌. 3:23) Amɔ̌, Klísu kpo ɖo ali xlɛ́ mɛsɛntɔ́ gbejínɔtɔ́ ɔ kpó mɛxó agun tɔn lɛ́ kpó wɛ kpó sɔxwixwe kpó, bo ná lɛ́ kpo ɖo mɔ̌ wa wɛ “káká jɛ azǎn gǔdo gúdo tɔn gbɛ élɔ́ tɔn lɛ́ mɛ.” (Mat. 28:20) Nǔgbó ɔ, mǐ ɖó hwɛjijɔ lɛ́ bǐ bo ná ɖeji dó ali e xlɛ́ mǐ wɛ é ɖe gbɔn mɛ e é sɔ́ ɖó nukɔn nú nǔ lɛ́ é jí é wú.

ÉNYÍ MǏ NƆ XWEDÓ WĚ E JEXÓVA NƆ ÐE XÁ MǏ É Ɔ, MǏ NƆ ÐU LE TƆN

15-16. Étɛ́ kpɔ́ndéwú mɛ ɖěɖěe xwedó wě e Jexóva nɔ ɖe xá mɛ lɛ́ é tɔn ka kplɔ́n we?

¹⁵ Ényí mǐ nɔ xwedó wě e Jexóva nɔ ɖe xá mǐ é ɔ, mǐ tlɛ nɔ ɖu vǐví nyɔ̌ná lɛ́ tɔn din. Ði kpɔ́ndéwú ɔ, Andy kpó Robyn kpó xwedó wě e mɛsɛntɔ́ gbejínɔtɔ́ ɔ ɖe xá mɛ é, bo bló bɔ gbɛzán yětɔn bɔkun. (Mat. 6:22.) Wǎgbɔ tɔn ɔ, yě kpé wú bo nyí mɛɖéezéjótɔ́ ɖo xɔ tutoblónúnǔ ɔ tɔn lɛ́ gbígbá kpáxwé. Robyn ɖɔ: “Xɔ e hwe tawun lɛ́ é mɛ wɛ mǐ nɔ nɔ, bɔ hwɛhwɛ ɔ, yě nɔ ɖó adoxwɛsá ǎ. Gɔ́ ná ɔ, nǔgbó wɛ ɖɔ un yí wǎn nú fɔtóo ɖiɖe có, un ɖó ná sa nǔ ɖěɖěe un nɔ zán dó ɖe fɔtóo ná lɛ́ é gěgé. Un y’avǐ hwenu e un sa nǔ lɛ́ é. Amɔ̌, Ablaxámu sín asi Sala ɖɔhun ɔ, un kán ɖ’é jí bo ná sɔ́ ayi ce ɖó nǔ e ɖo nukɔn lɛ́ é jí, ényí nǔ e ko wá yi lɛ́ é jí ǎ.” (Ebl. 11:15) Le tɛ́ asú kpó asi kpó énɛ́ ka mɔ, ɖó nǔ ɖěɖěe yě sɔ́ dó sá vɔ̌ lɛ́ é wú? Robyn ɖɔ: “Tuun e mǐ tuun ɖɔ mǐ ɖo nǔ e mǐ ɖó lɛ́ é bǐ ná Jexóva wɛ é zɔ́n bɔ mǐ ɖó gbɛzán e jɛmɛ nú mǐ é. Ényí nyi kpó asú ce kpó ɖo azɔ̌ e Jexóva zɔ́n mǐ lɛ́ é wa wɛ ɔ, mǐ nɔ ɖó linlin ɖé dó lěe gbɛ ná cí ɖo gbɛ yɔ̌yɔ́ ɔ mɛ é wú.” Andy yí gbe ɖɔ: “Zǎn e mǐ nɔ zán mǐɖée bǐ mlɛ́mlɛ́ dó nǔ Axɔ́súɖuto ɔ tɔn lɛ́ takúnmɛ é zɔ́n bɔ mǐ ɖó gbɛzán e jɛmɛ nú mǐ é.”

¹⁶ Ényí mǐ kpo ɖo wěɖexámɛ Jexóva tɔn lɛ́ xwedó wɛ ɔ, ali ɖěvo tɛ́ nu mǐ ka nɔ ɖu le tɔn ɖe? Ée Marcia yí kúnnuɖewéma ɖo wěmaxɔmɛ linsinmɛ tɔn gúdo é ɔ, é ba vɛ́návɛ́ná bo ná xwedó wǔsyɛ́n e è dó lanmɛ n’i ɖɔ é ní bɛ́ gběxosín-alijítɔ́zɔ́ é. (Mat. 6:33; Hlɔ̌. 12:11) É ɖɔ: “È d’ajɔ mì bɔ un ná kplɔ́n wěma ɖo kplɔ́nyijǐ-alavɔ nú xwe ɛnɛ ma sú ɖɔ̌la. Amɔ̌, un ba ná nya nǔ gbigbɔ tɔn lɛ́ gbé. Énɛ́ wú ɔ, un wá gbeta ɔ kɔn bo ná kplɔ́n ajɔ̌ ɖé wiwa bɔ é ná d’alɔ mì bɔ un ná mɔ akwɛ́ e sín hudó un ɖó é, bá kpé sinsɛnzɔ́ hwebǐnu tɔn sín azɔ̌ ce wú bá  wa. Gbeta ɖagbe hú gǎn e kɔn un wá ɖo gbɛ ce mɛ lɛ́ é ɖokpó nɛ́. Un ɖo sinsɛnzɔ́ hwebǐnu tɔn sín vǐví ɖu wɛ din, bɔ azɔ̌ ce e ma nɔ ján alɔ nú mì sɔmɔ̌ ǎ é hun ali nú mì bɔ un nyí mɛɖéezéjótɔ́ ɖo Betɛ́li, bo nɔ ɖu vǐví wǔjɔmɛzɔ́ bǔnɔ ɖěvo lɛ́ tɔn.”

17. Ényí mǐ nɔ xwedó wě e Jexóva nɔ ɖe xá mǐ é ɔ, nyɔ̌ná ɖěvo tɛ́ lɛ́ sín le mǐ ka nɔ ɖu? (Ezayíi 48:17, 18)

¹⁷ Hweɖélɛ́nu ɔ, è nɔ ɖe wě ɖěɖěe nɔ xɔ mǐ ɖo nǔɖókan lɛ́ xixokplé kpó nǔ ɖěɖěe sixú zɔ́n bɔ mǐ ná t’afɔ sɛ́n Mawu tɔn lɛ́ jí lɛ́ é sí é xá mǐ. Ðo akpá énɛ́ lɔ xwé ɔ, ényí mǐ nɔ xwedó wě ɖěɖěe Jexóva nɔ ɖe xá mǐ lɛ́ é ɔ, mǐ ná ɖu le tɔn. Mǐ nɔ kpo ɖo ayixa mímɛ́ ɖé ɖó wɛ, bo nɔ sɛ linkpɔ́n e ma ɖo dandan ǎ lɛ́ é dó zɔ nú mǐɖée. (1 Tim. 6:9, 10) Wǎgbɔ tɔn ɔ, mǐ sixú sɛn Jexóva kpó ayi bǐ kpó, bɔ énɛ́ ná ná mǐ awǎjijɛ, fífá, gɔ́ nú gbɛzán e jɛmɛ nú mɛ é.—Xa Ezayíi 48:17, 18.

18. Étɛ́wú a ka kán ɖ’é jí bo ná nɔ xwedó ali e Jexóva nɔ xlɛ́ we é?

¹⁸ É ɖo wɛn ɖɔ Jexóva ná kpo ɖo gbɛtɔ́ lɛ́ zán dó xlɛ́ ali mǐ wɛ, ɖo wǔvɛ́ ɖaxó ɔ kpó Axɔ́súɖuɖu xwe afatɔ́n tɔn ɔ kpó hwenu. (Ðɛh. 45:17) Mǐ ka ná kpo ɖo ali e è ná xlɛ́ mǐ é xwedó wɛ ényí mɔ̌ wiwa ná bo tlɛ byɔ́ ɖɔ mǐ ní xo nǔjlómɛ mǐtɔn lɛ́ nyi kɛ́n ɔ a? Ényí mǐ nɔ xwedó ali e xlɛ́ mǐ wɛ Jexóva ɖe din é ɔ, mɔ̌ wiwa ná bɔ wǔ nú mǐ hú gǎn. Énɛ́ wú ɔ, mi nú mǐ ní nɔ xwedó ali e Jexóva nɔ xlɛ́ mǐ é hwebǐnu, káká jɛ ée súnnu e è sɔ́ bɔ yě nɔ nɔ nukɔn nú mǐ lɛ́ é nɔ xlɛ́ mǐ lɛ́ é jí. (Eza. 32:1, 2; Ebl. 13:17) Gɔ́ ná ɔ, mǐ sixú xwedó Alixlɛ́mɛtɔ́ mǐtɔn Jexóva kpó jiɖiɖe kpó, ɖó é nɔ kplá mǐ gbɔn zɔ nú nǔ ɖěbǔ e sixú d’akpa xɔ́ntɔn e mǐ zun xá ɛ é wú é, lobo ɖo ali xlɛ́ mǐ wɛ xwe fí e mǐ xwe é, énɛ́ wɛ nyí gbɛ mavɔmavɔ ɔ mɛ, ɖo gbɛ yɔ̌yɔ́ ɔ mɛ.