É ɖo mɔ̌ có, Jexóva nɔ ɖó nukún ɖɔ mǐ ní ɖó suúlu bo nɔ te kpɔ́n émí bónú émí ná wa nǔ dó hwetɔnnu. Aniwú Jexóva ka nɔ ɖó nukún ɖɔ mǐ ní nɔ te? Étɛ́ ka sixú d’alɔ mǐ bɔ mǐ ná ɖ’awǎjijɛ hwenu e mǐ ɖo te é?

ANIWÚ JEXÓVA KA NƆ ÐÓ NUKÚN ÐƆ MǏ NÍ NƆ TE?

Biblu ɖɔ: ‘Jexóva ɖó jlǒ bo ná wa ɖagbe nú mi. É ná sí te bo ná kú nǔbláwǔ nú mi, ɖó Jexóva ɔ, Mawu hwɛjijɔnɔ wɛ. Nǔ nyɔ́ nú mɛ e ɖo nukún ɖó è wɛ lɛ́ bǐ.’ (Eza. 30:18) Jwifu gǔfɔ́ntɔ́ lɛ́ wɛ è ɖɔ xó Ezayíi tɔn énɛ́ lɛ́ ná ɖo bǐbɛ́mɛ. (Eza. 30:1) Amɔ̌, mɛɖé lɛ́ ɖo Jwifu énɛ́ lɛ́ mɛ bo nɔ gbejí, bɔ xó énɛ́ lɛ́ ná nukúnɖíɖó yě. Xó énɛ́ lɛ́ ɖokpó ɔ nɔ lɛ́ ná nukúnɖíɖó Jexóva sɛntɔ́ gbejínɔtɔ́ lɛ́ ɖo égbé.

Énɛ́ wú ɔ, mǐ ɖó ná ɖó suúlu bo nɔ te, ɖó Jexóva ɖó suúlu bo ɖo te wútu. É ko ɖó hwenu ɖé bo ná ɖó nǔ gbɛ élɔ́ nú, bo ɖo te kpɔ́n azǎn énɛ́ kpó gan ɔ mɛ kpó. (Mat. 24:36) Hwenɛ́nu ɔ, é ná wá jɛ wě bǐ ɖɔ hwɛ ɖěɖěe awǒvi dó Jexóva kpó mɛ Tɔn lɛ́ kpó é ɔ, nǔvú wɛ. É ná ɖe Satáan kpó mɛ ɖěbǔ e ɖo ahwan tɔn mɛ é kpó síin, amɔ̌, É “ná kú nǔbláwǔ nú [mǐ].”

Din hwɛ ɔ, Jexóva sixú nɔ ma ɖe mɛtɛ́nkpɔ́n mǐtɔn lɛ́ síin, amɔ̌, é ná mǐ gǎnjɛwú ɖɔ mǐ sixú ɖ’awǎjijɛ ée mǐ ná ɖo te é. Lěe Ezayíi ɖɔ gbɔn é ɔ, mǐ sixú ɖ’awǎjijɛ hwenu e mǐ ɖo nukún ɖó nǔ ɖagbe ɖé sín jijɛ wɛ é. (Eza. 30:18) a Nɛ̌ mǐ ka sixú ɖó awǎjijɛ énɛ́ gbɔn? Nǔ ɛnɛ élɔ́ lɛ́ sixú d’alɔ mǐ.

LĚE MǏ SIXÚ Ð’AWǍJIJƐ GBƆN HWENU E MǏ ÐO TE É

Sɔ́ ayi ɖó nǔ ɖagbe lɛ́ jí. Axɔ́sú Davídi mɔ nǔnyanyawiwa gěgé ɖo gbɛhwenu tɔn. (Ðɛh. 37:35) É ɖo mɔ̌ có, é wlǎn ɖɔ: ‘Tin xwíí ɖo Jexóva nukɔn, bo nɔ te kpɔ́n ɛ, ma hwlɛ́n dó ó. Ma sin xomɛ dó mɛ e lɛ́n nǔɖé ɔ, é nɔ kpé wú ɔ ó.’ (Ðɛh. 37:7) Davídi ɖésúnɔ hɛn wěɖexámɛ énɛ́ ayi mɛ gbɔn ayi sísɔ́ ɖó hwlɛngán e ɖó nukún wɛ é ɖe é jí gblamɛ. É lɛ́ sɔ́ kɛ́n nyɔ̌ná e é mɔ ɖo Jexóva gɔ́n lɛ́ é bǐ tɔn. (Ðɛh. 40:6) Ényí mǐ lɔmɔ̌ nɔ sɔ́ ayi ɖó ninɔmɛ mǐtɔn sín akpáxwé ɖagbe lɛ́ jí, bo ma nɔ lɔn nú  nǔ nyanya e ɖo jijɛ lɛ́ lɛ̌ dó mǐ wɛ lɛ́ é nɔ wa nǔ dó mǐ wú ǎ ɔ, é ná bɔ wǔ nú mǐ hú gǎn bɔ mǐ ná nɔ te kpɔ́n Jexóva.

Alɔnu towe ní nɔ ján ɖo susu kpikpa nú Jexóva mɛ. Davídi e é cí ɖɔ é wɛ wlán Ðɛhan 71​gɔ́ ɔ é ɖɔ nú Jexóva ɖɔ: “Nyɛ ɔ, un ka ná ɖo te kpɔ́n we tɛgbɛ, un ná kpa susu nú we, bo ná nɔ lɛ́ kpa susu nú we.” (Ðɛh. 71:14) Nɛ̌ é ka kpa susu nú Jexóva gbɔn? É nɔ ɖɔ xó nú mɛ ɖěvo lɛ́ dó Jexóva wú, lobo nɔ lɛ́ kpa ɛ dó han mɛ. (Ðɛh. 71:16, 23) Davídi ɖɔhun ɔ, mǐ sixú ɖó awǎjijɛ hwenu e mǐ ɖo te kpɔ́n Jexóva é. Mǐ nɔ kpa susu n’i gbɔn sinsɛnzɔ́ mǐtɔn, xóɖɔɖókpɔ́ mǐtɔn gbe bǐ gbe tɔn lɛ́ kpó han e mǐ nɔ ji dó sɛn ɛ lɛ́ é kpó gblamɛ. Hweɖévonu e a ná ɖo han Axɔ́súɖuto ɔ tɔn ɖé ji wɛ é ɔ, étɛ́wú a ma ka ná sɔ́ ayi ɖó wɛn e ɖ’é mɛ bo nɔ dó awǎjijɛ nú mɛ lɛ́ é jí ǎ?

Nǔ nɔví towe lɛ́ ní nɔ dó wǔsyɛ́n lanmɛ nú we. Hwenu e Davídi ɖo tagba lɛ́ ɖí xwi xá wɛ é ɔ, é ɖɔ xó élɔ́ nú Jexóva: “Hwi wɛ un ná ɖó nukún, ɖó a nyɔ́ nú mɛ e ɖo gbejí nú we lɛ́” é. (Ðɛh. 52:11) Nɔví mǐtɔn lɛ́ sixú dó wǔsyɛ́n lanmɛ nú mǐ lɔmɔ̌ hwenu e mǐ ɖo kpɔ́ xá yě é, é ka nyí ɖo kplé mǐtɔn lɛ́ jí kpó sinsɛnzɔ́ ɔ mɛ kpó kɛ́ɖɛ́ ǎ, loɔ, ɖo mɛkplékpɔ́mɛ núwiwa lɛ́ lɔmɔ̌ hwenu.—Hlɔ̌. 1:11, 12.

Nɔ ná hlɔ̌nhlɔ́n nukúnɖíɖó towe. Ðɛhan 62:6 ɖɔ: “Mawu ɖokpónɔ géé gɔ́n wɛ un ɖó ná ba vivo ce ɖe, ɖó éɖokpó wɛ un ɖó nukún.” É ɖo tají tawun ɖɔ mǐ ní bló bónú nukúnɖíɖó mǐtɔn ní lí dó, tají ɔ, ényí vivɔnu gbɛ ɔ tɔn ma ɖo wǐwá wɛ lěe lin gbɔn wɛ mǐ ɖe é ǎ ɔ nɛ́. Mǐ ɖó ná kú d’é jí ɖɔ akpá Jexóva tɔn lɛ́ ná jɛnu, ényí é ná bo tlɛ byɔ́ ɖɔ mǐ ná nɔ te nú hwenu ɖěbǔ ɔ nɛ́. Mǐ sixú ná hlɔ̌nhlɔ́n nukúnɖíɖó mǐtɔn gbɔn Xó Mawu tɔn, énɛ́ wɛ nyí kancícá e ɖo nǔɖɔɖayǐ lɛ́ tɛ́ntin é kpó mɔjɛmɛ e Jexóva ná dó éɖésúnɔ mɛtún ɔ wú é kpó kplɔ́nkplɔ́n gblamɛ. (Ðɛh. 1:2, 3) Gɔ́ ná ɔ, é ná byɔ́ ɖɔ mǐ ní kpo ɖo “ɖɛ xo gbɔn gbigbɔ mímɛ́ gblamɛ” wɛ, bo ná dó kpo ɖo vǐvɛ́ xá Jexóva wɛ, ée mǐ ná ɖo te kpɔ́n akpá gbɛ mavɔmavɔ tɔn e é dó é sín jijɛnu wɛ é.—Ju. 20, 21.

Axɔ́sú Davídi ɖɔhun ɔ, kú d’é jí ɖɔ Jexóva ɖo xɛ nya ɖo mɛ ɖěɖěe ɖo nukún ɖó è wɛ lɛ́ é jí wɛ, bo nɔ ɖe xomɛnyínyɔ́ Tɔn xlɛ́ yě. (Ðɛh. 33:18, 22) Kpo ɖo te nɔ kpɔ́n Jexóva wɛ kpó suúlu kpó gbɔn nǔ élɔ́ lɛ́ wiwa gblamɛ: ayi sísɔ́ ɖó nǔ ɖagbe e ɖo jijɛ wɛ ɖo gbɛzán towe mɛ lɛ́ é jí, susu kpikpa nú Jexóva, gbe yíyí nú wǔsyɛ́n e nǔɖitɔ́ hǎtɔ́ towe lɛ́ nɔ dó lanmɛ nú we é kpó nukúnɖíɖó xɔ akwɛ́ towe hinhɛn lí dǒ kpó.