1-2. Étɛ́ ka sixú d’alɔ mǐ, bɔ mǐ ná mɔ nǔ jɛ lěe nǔ cí nú Jexóva dó cí e è kɔn dó nyǐkɔ tɔn wú é wú?

 DǑ NUKÚN nǔ élɔ́ mɛ kpɔ́n: Mɛ e nǔ tɔn nɔ ɖu ayi mɛ nú we é ɖé ɖɔ xó gblégblé ɖé dó wǔ towe. A tuun ɖɔ adingban wɛ é ɖó; amɔ̌, mɛɖé lɛ́ ɖi nǔ nú xó tɔn. Nǔ e nylá hú gǎn é wɛ nyí ɖɔ yě jɛ adingban énɛ́ fúnfún kpé jí, bɔ mɛ gěgé ɖěvo lɛ́ lɔ ɖi nǔ ná. Nɛ̌ nǔ ka ná cí nú we? Ényí nǔ mɛ ɖěvo lɛ́ tɔn nɔ ɖu ayi mɛ nú we, bɔ wi e ɖo ta towe é lɔ nɔ ɖu ayi mɛ nú we ɔ, adingban énɛ́ e fúnfún kpé dó wǔ we wɛ è ɖe é ná zɔ́n bɔ wǔ ná kú we, kabǐ?—Nǔx. 22:1.

² Nǔjlɛ́dónǔwú énɛ́ sixú d’alɔ mǐ, bɔ mǐ ná mɔ nǔ jɛ lěe nǔ cí nú Jexóva, hwenu e è kɔn cí dó nyǐkɔ tɔn wú é wú. Vǐ tɔn gbigbɔ tɔn lɛ́ ɖokpó ɖ’adingban dó kɔ tɔn nú nyɔ̌nu nukɔntɔn ɔ, Ɛvu. Nǎwe énɛ́ ɖi nǔ nú adingban ɔ. Adingban énɛ́ zɔ́n bɔ tɔ́gbó mǐtɔn nukɔntɔn lɛ́ fɔ́n gǔ dó Jexóva jí. Wǎgbɔ tɔn ɔ, hwɛhuhu kpó kú kpó sa tɔ byɔ́ kúnkan gbɛtɔ́ lɛ́ tɔn mɛ. (Bǐb. 3:1-6; Hlɔ̌. 5:12) Adingban e Satáan jɛ fúnfún fúnfún kpé jí, sín jikpá Edɛ́ni tɔn mɛ é wú wɛ tagba élɔ́ lɛ́ e mǐ nɔ mɔ ɖo gbɛ égbé tɔn mɛ é bǐ nɔ sín: kú, ahwan kpó ya kpó. Adingban mɔ̌hun lɛ́ kpó nǔ e yě ji lɛ́ é kpó ka nɔ ɖó wǔvɛ́ nú Jexóva wɛ a? Nǔxokpɔ́n ɖ’é mɛ ǎ. Amɔ̌, Jexóva nɔ ɖo akpɔ mɔ wɛ, alǒ nɔ ɖo kan ɖu wɛ ǎ. É nyɔ́ wa ɔ, “Mawu awǎjijɛnɔ ɔ” nyí wɛ é kpo ɖe.—1 Tim. 1:11.

3. Wǔjɔmɛ tɛ́ mǐ ka ɖó?

³ È jɔ wǔ mǐ bɔ mǐ ná jɔ fún dó cí klɔ́klɔ́ sín nyǐkɔ Jexóva tɔn wú mɛ, gbɔn tónúsise nú gbeɖiɖe élɔ́ e ɖo wɛn é gblamɛ: ‘Mi  sɔ́ nyǐkɔ Jexóva tɔn su.’ (Ðɛh. 113:1) Ényí mǐ nɔ ɖɔ xó ɖagbe dó Mɛ e ɖó nyǐkɔ mímɛ́ énɛ́ ɖo ta é wú hǔn, tónú se nú gbeɖiɖe énɛ́ wɛ mǐ ɖe nɛ́. Hwɛ ka ná wa mɔ̌ a? Mi nú mǐ ní gbéjé nǔ e nɔ sísɛ́ mǐ, bo ná d’alɔ mǐ bɔ mǐ ná kpa susu nú nyǐkɔ Mawu mǐtɔn tɔn kpó ayi bǐ kpó é agbɔ̌nnɔ atɔn kpɔ́n.

ÉNYÍ MǏ NƆ KPA SUSU NÚ NYǏKƆ JEXÓVA TƆN Ɔ, MǏ NƆ DÓ XOMƐHUNHUN N’I

4. Aniwú susu e mǐ nɔ kpa nú Jexóva é ka nɔ dó xomɛhunhun n’i? Jlɛ̌ dó nǔɖé wú. (Kpɔ́n fɔtóo ɔ lɔmɔ̌.)

⁴ Mǐ nɔ dó xomɛhunhun nú Tɔ́ mǐtɔn jǐxwé tɔn ɔ, hwenu e mǐ kpa susu nú nyǐkɔ tɔn é. (Dɛh. 69:31, 32) Amɔ̌, xlɛ́xlɛ́ wɛ énɛ́ ka ɖe ɖɔ Mawu Nǔbǐwúkpétɔ́ ɔ cí hwɛhutɔ́ ɖěɖěe nɔ ba ɖɔ è ní kpa susu nú yě, ɖó yě ɖó hudó wǔsyɛ́n dó lanmɛ nú mɛ tɔn wútu lɛ́ é ɖɔhun a? Éǒ. Nǔjlɛ́dónǔwú ɖé ɖíe. Vǐ nyɔ̌nu kpɛví ɖé kpl’así kɔ nú tɔ́ tɔn kpó wǎnyíyí kpó, bo ɖɔ: “Hwi wɛ nyí tɔ́ ɖagbe hú gǎn e ɖo gbɛ ɔ mɛ é!” Tɔ́ ɔ ko nǔ, bɔ xomɛ lɛ́ hun i tawun. Étɛ́wú? Mǐ ka ná ɖɔ ɖɔ é ɖó hudó wǔsyɛ́n dó lanmɛ nú mɛ kpó mɛ kpikpa kpó vǐ nyɔ̌nu tɔn tɔn wútu wɛ a? Éǒ. É nyɔ́ wa ɔ, mǐ kú d’é jí ɖɔ vǐtɔ́ e ɖó hlɔ̌nhlɔ́n, bɔ xomɛ nɔ hun i ɖɔ é ní mɔ bónú vǐ nyɔ̌nu tɔn ní ɖe wǎnyíyí kpó nǔsumɛnukúnmɛ kpó xlɛ́ é ɖé wɛ n’i. É tuun ɖɔ jijɔ mɔ̌hun lɛ́ ná zɔ́n bɔ awǎjijɛ vǐ ɔ tɔn ná lɛ́ jɛjí, ée é ná ɖo susu wɛ é. Ðó hwɛjijɔ mɔ̌hun lɛ́ wú ɔ, xomɛ nɔ hun Jexóva e nyí Tɔ́ ɖaxó hú gǎn ɔ é, hwenu e mǐ kpa susu n’i é.

5. Ényí mǐ nɔ kpa susu nú nyǐkɔ Mawu tɔn ɔ, adingban tɛ́ mǐ ka sixú d’alɔ bɔ è ná flí xwe?

⁵ Ényí mǐ kpa susu nú Tɔ́ mǐtɔn jǐxwé tɔn ɔ ɔ, mǐ nɔ flí adingban e è ɖó, bɔ é kan mǐɖésúnɔ é xwe. Satáan ɖɔ ɖɔ gbɛtɔ́ ɖěbǔ kún sixú jɛ hun dó nyǐkɔ Mawu tɔn jí kpó gbejíninɔ kpó ó. Nú éyɛ́ ɔ, mǐ mɛ ɖěbǔ ɖo gbejí ǎ. É ɖɔ ɖɔ mǐ bǐ wɛ ná dó gǔdo Mawu, ényí mǐ lin ɖɔ mɔ̌ wiwa wɛ ná hɛn le wá nú mǐ hú gǎn ɔ nɛ́. (Jɔb. 1:9-11; 2:4) Amɔ̌, gbejínɔtɔ́ Jɔbu xlɛ́ ɖɔ Satáan ɔ, adingbannɔ wɛ n’i. Hwi lɔ ka ná nɔ gbejí nú Mawu a? Mǐ mɛ ɖokpó ɖokpó sixú wá gbeta ɔ kɔn, bo ná jɛ hun dó Tɔ́ mǐtɔn sín nyǐkɔ jí, lobo lɛ́ dó awǎjijɛ n’i, gbɔn sinsɛn ɛ kpó gbejíninɔ kpó gblamɛ. (Nǔx. 27:11) Wǔjɔmɛ ɖé wɛ mɔ̌ wiwa nyí.

6. Nɛ̌ mǐ ka sixú wa nǔ axɔ́sú Davídi kpó Levíi ví lɛ́ kpó ɖɔhun gbɔn? (Nɛɛmíi 9:5)

⁶ Wǎn yí nú Mawu nɔ sísɛ́ gbejínɔtɔ́ lɛ́, bɔ yě nɔ kpa susu nú nyǐkɔ tɔn kpó ayi yětɔn bǐ kpó. Axɔ́sú Davídi wlán ɖɔ: ‘Lǐndɔ̌n ce ní kpa susu nú Jexóva; nǔ e ɖo wǔ ce é bǐ ní sɔ́ nyǐkɔ mímɛ́ tɔn su.’ (Ðɛh. 103:1) Davídi mɔ nukúnnú jɛ mɛ ɖɔ susu kpikpa nú nyǐkɔ Jexóva tɔn wɛ nyí ɖɔ è ní kpa susu nú Jexóva ɖésú mɛtún ɔ. Ényí mǐ se nyǐkɔ Jexóva tɔn ɔ, mǐ nɔ  lin tamɛ dó mɛ alɔkpa e é nyí é, jijɔ tɔn ɖaaɖagbe lɛ́ bǐ kpó nǔjíwǔ e é ko bló lɛ́ é bǐ kpó jí. Davídi ba ná hɛn nyǐkɔ Tɔ́ tɔn tɔn ɖó mǐmɛ́ jí, lobo lɛ́ kpa susu ná. É ba ná wa mɔ̌ kpó “nǔ e ɖo wǔ [tɔn] lɛ́ é bǐ” kpó, énɛ́ wɛ nyí, kpó ayi tɔn bǐ kpó. Ðo ali ɖokpó ɔ nu ɔ, Levíi ví lɛ́ nɔ nɔ nukɔn ɖo susu kpikpa nú Jexóva mɛ. Yě yí gbe kpó mɛɖéesɔ́hwe kpó ɖɔ xó émítɔn lɛ́ kún sixú ɖe susu kpikpa nú nyǐkɔ mímɛ́ Jexóva tɔn xlɛ́ bǐ mlɛ́mlɛ́ gbeɖé ó. (Xa Nɛɛmíi 9:5.) É ɖo wɛn ɖɔ susu énɛ́ e yě nɔ kpa nú Jexóva kpó mɛɖéesɔ́hwe kpó, lobo nɔ lɛ́ wa mɔ̌ kpó ayi yětɔn bǐ kpó é nɔ hɛn xomɛ hun Jexóva.

7. Nɛ̌ mǐ ka sixú kpa susu nú Jexóva ɖo sinsɛnzɔ́ ɔ mɛ, bo lɛ́ wa mɔ̌ ɖo gbɛzínzán gbe bǐ gbe tɔn mǐtɔn mɛ gbɔn?

⁷ Égbé ɔ, mǐ sixú dó xomɛhunhun nú Jexóva, gbɔn xó ɖiɖɔ dó wǔ tɔn kpó akpakpa sɔ́ mɛ kpó, kpó nǔsumɛnukúnmɛ kpó, kpódó wǎnyíyí kpán gblamɛ. Ényí mǐ ɖo sinsɛnzɔ́ ɔ mɛ ɔ, mǐ nɔ hɛn d’ayi mɛ ɖɔ nǔ tají e gbé nya wɛ mǐ ɖe é wɛ nyí ɖɔ mǐ ná dɔn mɛ lɛ́ wá Jexóva gɔ́n, lobo d’alɔ yě bɔ yě ná nɔ ɖó linlin e mǐ nɔ ɖó dó Tɔ́ mǐtɔn wǎnyíyínɔ ɔ wú é. (Ja. 4:8) Akpakpa nɔ sɔ́ mǐ dó nǔ élɔ́ lɛ́ wú: lěe Biblu ɖɔ xó dó Jexóva wú gbɔn é ɖiɖexlɛ́ mɛ ɖěvo lɛ́, wǎnyíyí tɔn, hwɛjijɔ tɔn, nǔnywɛ́ tɔn, hlɔ̌nhlɔ́n tɔn kpó jijɔ tɔn ɖěvo e dɔn mɛ lɛ́ é kpó ɖiɖexlɛ́ yě. Mǐ nɔ lɛ́ kpa susu nú Jexóva, bo nɔ lɛ́ dó xomɛhunhun n’i, gbɔn tíntɛ́nkpɔ́n bo wa nǔ éɖɔhun gblamɛ. (Efɛ́. 5:1) Ényí mǐ wa mɔ̌ ɔ, mǐ nɔ gbɔn vo bǐ mlɛ́mlɛ́ ɖo gbɛ nyanya élɔ́ mɛ. Mɛ lɛ́ sixú ɖ’ayi wú ɖɔ mǐ gbɔn vo, bo sixú kan nǔ e wú wɛ é byɔ́ yěɖée. (Mat. 5:14-16) Ée mǐ ná ɖo nǔ wa ɖó kpɔ́ xá yě wɛ ɖo gbɛzínzán gbe bǐ gbe tɔn mǐtɔn mɛ é ɔ, mǐ sixú kpé wú bo tínmɛ nǔ e wú mǐ nɔ wa nǔ gbɔn mɔ̌ é nú yě. Énɛ́ nɔ zɔ́n bɔ ayijlɔ́jlɔ́nɔ lɛ́ nɔ mɔ ɖɔ Mawu mǐtɔn dɔn émí. Ényí mǐ nɔ kpa susu nú Jexóva ɖo ali énɛ́ lɛ́ nu ɔ, xomɛhunhun dó n’i wɛ mǐ ɖe mɔ̌ nɛ́.—1 Tim. 2:3, 4.

ÉNYÍ MǏ NƆ KPA SUSU NÚ NYǏKƆ JEXÓVA TƆN Ɔ, MǏ NƆ DÓ XOMƐHUNHUN NÚ JEZU

8. Nɛ̌ Jezu ka nɔ nukɔn ɖo susu kpikpa nú nyǐkɔ Jexóva tɔn mɛ gbɔn?

⁸ Ðo nǔɖíɖó nǔnywɛ́tɔ́ e ɖo jǐxwé kpó ayǐkúngban jí kpó lɛ́ é bǐ mɛ ɔ, mɛ ɖěbǔ tuun Tɔ́ ɔ sɔ Vǐ ɔ ǎ. (Mat. 11:27) Jezu yí wǎn nú Tɔ́ tɔn, bo nɔ nukɔn ɖo susu kpikpa nú nyǐkɔ Jexóva tɔn mɛ. (Jaan 14:31) Ðo ɖɛ e é xo sɛ́dó Tɔ́ tɔn, ɖo zǎn e jɛ nukɔn nú kú tɔn é ɖé mɛ ɔ, é sɛ sin xwe nú sinsɛnzɔ́ tɔn ayǐkúngban jí tɔn ɔ gbɔn lě: “Un bló bɔ yě tuun nyǐkɔ towe.” (Jaan 17:26) Ani ɖɔ wɛ é ka ɖe tawun?

9. Nǔjlɛ́dónǔwú tɛ́ Jezu ka zán dó ɖe mɛ alɔkpa e Tɔ́ tɔn nyí é xlɛ́ ɖo ali e za wě hú gǎn é nu?

⁹ Jezu wa nǔ hú ɖiɖɔ nú mɛ lɛ́ kpowun ɖɔ nyǐkɔ Mawu tɔn wɛ nyí Jexóva. Jwifu e Jezu kplɔ́n nǔ lɛ́ é ko tuun nyǐkɔ Mawu tɔn. Amɔ̌, Jezu nɔ nukɔn bo “ɖe mɛ alɔkpa e é nyí é xlɛ́.” (Jaan 1:17, 18) Ði kpɔ́ndéwú ɔ, Nǔwlánwlán mímɛ́ Ebléegbe tɔn lɛ́ ɖe xlɛ́ ɖɔ Jexóva nɔ kú nǔbláwǔ nú mɛ, bo nɔ lɛ́ se wǔvɛ́ xá mɛ. (Tín. 34:5-7) Jezu ɖe énɛ́ xlɛ́ vaan hú lěe è ko mɔ nukúnnú jɛ mɛ gbɔn ɖ’ayǐ é ɖo lǒ e é dó dó vǐ ɖuvanɔ ɖé kpó tɔ́ tɔn kpó wú é mɛ. Ée mǐ xa ɖɔ tɔ́ ɔ mɔ vǐ tɔn e hwɛ tɔn lɛ́ vɛ́ ná é “kpo ɖo zɔ” sɛ́dó, kán wezun bo yi kpl’así kɔ n’i, lobo sɔ́ hwɛ tɔn lɛ́ kɛ ɛ kpó ayi tɔn bǐ kpó é ɔ, mǐ mɔ lě do Jexóva nɔ kú nǔbláwǔ nú mɛ, lobo nɔ lɛ́ se wǔvɛ́ xá mɛ sɔ é. (Luk. 15:11-32) Jezu ɖe mɛ alɔkpa e Tɔ́ tɔn nyí nǔgbó nǔgbó é xlɛ́.

10. (a) Nɛ̌ mǐ ka wa gbɔn bo tuun ɖɔ Jezu zán nyǐkɔ Tɔ́ tɔn tɔn ɖésú ɔ? Nɛ̌ mǐ ka wa gbɔn bo tuun ɖɔ Jezu ba ɖɔ mɛ ɖěvo lɛ́ lɔ ní zán nyǐkɔ ɔ? (Maki 5:19) (Kpɔ́n ɖiɖe ɔ lɔmɔ̌.) (b) Étɛ́ Jezu ka ba ɖɔ mǐ ní wa ɖo égbé?

¹⁰ Jezu ka lɛ́ ba ɖɔ mɛ ɖěvo lɛ́ ní nɔ zán Tɔ́ émítɔn sín nyǐkɔ ɖésú ɔ a? Ganjí. Sinsɛngán ɖé lɛ́ sixú lin ɖɔ mɛmasí núwiwa wɛ é ná nyí ɖɔ è ní ylɔ́ nyǐkɔ Mawu tɔn, amɔ̌, Jezu lɔn gbeɖé bónú nǔkplɔ́nmɛ énɛ́ lɛ́ e ma jínjɔ́n Mawuxówéma  ɔ jí ǎ é sú ali d’è, bónú é gɔn yɛ̌yi wlí nú Tɔ́ tɔn sín nyǐkɔ ǎ. Lin tamɛ dó hwenu e Jezu gbɔ azɔn nú nya e jí awǒvi ɖe ɖo Jelazáanu lɛ́ sín xá mɛ é jí. Xɛsi jɛ mɛ lɛ́ jí, bɔ yě sa vo nú Jezu ɖɔ é ní gosín fínɛ́, énɛ́ wú ɔ, Jezu gosín xá énɛ́ mɛ. (Mak. 5:16, 17) Amɔ̌, Jezu ba ɖɔ è ní tuun nyǐkɔ Jexóva tɔn ɖo fínɛ́. Énɛ́ wú ɔ, é sɔ́ azɔ̌ d’así nú nya e é gbɔ azɔn ná é ɖɔ é ní yi ɖɔ nǔ e Jexóva wa n’i é nú mɛ lɛ́, é ní ma nyí nǔ e émí Jezu wa n’i é ó. (Xa Maki 5:19.) a Nǔ ɖokpó ɔ wɛ é nɔ lɛ́ ba ɖo égbé, énɛ́ wɛ nyí ɖɔ, è ná bló bɔ mɛ lɛ́ ná tuun Tɔ́ tɔn sín nyǐkɔ, gbɔn gbɛ ɔ bǐ mɛ! (Mat. 24:14; 28:19, 20) Ényí mǐ wa azɔ̌ e nyí mǐtɔn é ɔ, mǐ nɔ dó xomɛhunhun nú Axɔ́sú mǐtɔn, Jezu.

11. Étɛ́ tamɛ Jezu ka kplɔ́n ahwanvú tɔn lɛ́ ɖɔ yě ní nɔ xo ɖɛ dó? Sɔgbe xá Ezekiyɛ́li 36:23 ɔ, aniwú é ka ɖo tají?

¹¹ Jezu tuun ɖɔ linlin Jexóva tɔn wɛ nyí ɖɔ é ní klɔ́ cí sín nyǐkɔ Tɔn wú bǐ mlɛ́mlɛ́. Nǔ e wú Gǎn mǐtɔn kplɔ́n ɖɛ élɔ́ ahwanvú tɔn lɛ́ é nɛ́: “Tɔ́ mǐtɔn e ɖo jǐxwé é, nyǐkɔ towe ní nyí nǔ mímɛ́.” (Mat. 6:9) Jezu tuun ɖɔ xó tají e ɖo atɛ jí bo kan nǔɖíɖó lɛ́ bǐ é nɛ́. (Xa Ezekiyɛ́li 36:23.) Nǔɖíɖó nǔnywɛ́tɔ́ e ɖo wɛ̌kɛ́ ɔ mɛ lɛ́ é ɖěbǔ ko kpé wú bo klɔ́ cí sín nyǐkɔ Jexóva tɔn wú sɔ Jezu ǎ. Amɔ̌, hwenu e kɛntɔ́ Jezu tɔn lɛ́ ɖ’alɔ jǐ tɔn é ɔ, étɛ́ sín hwɛ yě ka dó è? È ɖɔ é nylá nu dó Mawu wú. É ɖo wɛn ɖɔ Jezu mɔ ɖɔ nu nylánylá alǒ cí kinkɔn dó Tɔ́ tɔn sín nyǐkɔ mímɛ́ ɔ wú wɛ nyí hwɛ e nylá hú bǐ é. Hwɛ e è dó è ɖɔ é nylá nu dó Mawu wú é gba ayi dó n’i tawun. Énɛ́ sixú ko nyí hwɛjijɔ tají e wú “wǔvɛ́ e se wɛ [Jezu] ɖe é syɛ́n sɔmɔ̌” ɖo ganxixo e jɛ nukɔn nú hwenu e è wlí i é mɛ lɛ́ é.—Luk. 22:41-44.

12. Nɛ̌ Jezu ka klɔ́ cí sín Tɔ́ tɔn sín nyǐkɔ wú ɖo ali e gbló ada hú gǎn é ɖé nu gbɔn?

¹² Bónú Jezu ná dó klɔ́ cí sín Tɔ́ tɔn sín nyǐkɔ wú ɔ, é dɛ ɖo wǔvɛ́, zun kpó cí e è kɔn dó nyǐkɔ tɔn wú lɛ́ é kpó bǐ nu. É tuun ɖɔ émí se tónú nú Tɔ́ émítɔn ɖo nǔ bǐ mɛ; winnyá hu i ɖó nǔɖé wú ǎ. (Ebl. 12:2) É lɛ́ tuun ɖɔ ahwan tɔ́n émí wɛ Satáan ɖe tlɔlɔ ɖo ganxixo d’ablu énɛ́ lɛ́ mɛ. (Luk. 22:2-4; 23:33, 34) Satáan ba vɛ́návɛ́ná bo ná bló bɔ Jezu ná gɔn gbejí nɔ, amɔ̌, é xo kpo bǐ mlɛ́mlɛ́! Jezu xlɛ́ nyi wɛn ɖɔ Satáan ɔ, adingbannɔ ɖaxó wɛ, bɔ Jexóva ɖó mɛsɛntɔ́ gbejínɔtɔ́ ɖěɖěe nɔ nɔ gbejí n’i lɛ́ é,  é ná bo tlɛ nyí ɖo ninɔmɛ e vɛ́ wǔ tawun lɛ́ é mɛ ɔ nɛ́!

13. Nɛ̌ a ka sixú dó xomɛhunhun nú Axɔ́sú towe e ɖo acɛ kpa wɛ é gbɔn?

¹³ A ka ba ná dó xomɛhunhun nú Axɔ́sú towe e ɖo acɛ kpa wɛ é a? Kpo ɖo susu kpa nú nyǐkɔ Jexóva tɔn wɛ, bo nɔ lɛ́ d’alɔ mɛ ɖěvo lɛ́ bónú yě ní tuun nǔ bǐ dó jijɔ ɖaaɖagbe Mawu mǐtɔn tɔn lɛ́ wú. Ényí a nɔ wa mɔ̌ hǔn, afɔ sɔ́ dó afɔdo Jezu tɔn lɛ́ mɛ wɛ a ɖe nɛ́. (1 Pi. 2:21) Jezu ɖɔhun ɔ, xomɛhunhun dó nú Jexóva wɛ a ɖe, bo lɛ́ ɖo xlɛ́xlɛ́ wɛ ɖɔ kɛntɔ́ Tɔn Satáan ɔ adingbanɖótɔ́ e winnyá ma nɔ hu ǎ é wɛ n’i.

ÉNYÍ MǏ NƆ KPA SUSU NÚ NYǏKƆ JEXÓVA TƆN Ɔ, MǏ NƆ D’ALƆ BƆ È NƆ HWLƐ́N GBƐ MƐ LƐ́ TƆN GÁN

14-15. Ényí mǐ kplɔ́n nǔ mɛ lɛ́ dó Jexóva wú ɔ, nǔ ɖaaɖagbe tɛ́ lɛ́ ka sixú jɛ?

¹⁴ Ényí mǐ nɔ kpa susu nú nyǐkɔ Jexóva tɔn ɔ, mǐ nɔ d’alɔ bɔ è nɔ hwlɛ́n gbɛ mɛ lɛ́ tɔn gán. Gbɔn nɛ̌ é? Satáan “va nukún” nú ‘nǔmaɖitɔ́ lɛ́ sín ayi.’ (2 Kɔ. 4:4) Wǎgbɔ tɔn ɔ, yě nɔ wá ɖi nǔ nú adingban Satáan tɔn lěhun lɛ́: Mawu ɖě ɖe ǎ, Mawu lín dó gbɛtɔ́ lɛ́ bɔ nǔ yětɔn nɔ ɖu ayi mɛ n’i ǎ, Mawu ɔ dǎkaxotɔ́ wɛ bo nɔ ɖo ya dó nú nǔnyanyawatɔ́ lɛ́ wɛ káká sɔ́yi. Satáan ɖó adingban énɛ́ lɛ́ bǐ ɖó é ba ná kɔn cí dó nyǐkɔ Jexóva tɔn wú, lobo ná bló bɔ mɛ lɛ́ sɔ́ ná ba ná sɛkpɔ́ ɛ ǎ. Amɔ̌, azɔ̌ mǐtɔn nɔ sú ali dó Satáan, b’ɛ nɔ kpé nǔ énɛ́ e gbé nya wɛ é ɖe é wú ǎ. Mǐ nɔ kplɔ́n nǔgbó e kunkplá Tɔ́ mǐtɔn kpó susu kpikpa nú nyǐkɔ mímɛ́ tɔn kpó é mɛ lɛ́. Étɛ́ mɛ é ka nɔ tɔ́n kɔ dó?

¹⁵ Nǔgbó ɖěɖěe ɖo Xó Mawu tɔn mɛ lɛ́ é ɖ’agbɔ̌n b’ɛ vɛ́ jlɛ́. Ényí mǐ nɔ kplɔ́n nǔ mɛ lɛ́ dó Jexóva kpó mɛ alɔkpa e é nyí nǔgbó nǔgbó é kpó wú ɔ, mǐ nɔ mɔ bɔ nǔjíwǔ ɖé nɔ jɛ. Nǔ e cyɔ́n yɛ adingban Satáan tɔn lɛ́ jí é nɔ jɛ kínkɔ́n jí kpɛɖé kpɛɖé, bɔ mɛ énɛ́ lɛ́ nɔ jɛ linlin e mǐ nɔ ɖó dó Tɔ́ mǐtɔn wǎnyíyínɔ ɔ wú é ɖó jí. Hlɔ̌nhlɔ́n ma ɖó dogbó tɔn nɔ jí wǔ nú yě tawun. (Eza. 40:26) Yě nɔ kplɔ́n bo nɔ ɖeji dó wǔ tɔn, ɖó hwɛ jlɔ́jlɔ́ wɛ é nɔ ɖɔ. (Sɛ́n. 32:4) Nǔnywɛ́ aditi e é ɖó é nɔ kplɔ́n nǔ gěgé yě. (Eza. 55:9; Hlɔ̌. 11:33) Kplɔ́n e yě nɔ kplɔ́n ɖɔ wǎnyíyí wɛ é nyí é lɔ nɔ dó gbɔ nú yě. (1 Jaan 4:8) Ée yě ɖo Jexóva sɛkpɔ́ wɛ é ɔ, nukúnɖíɖó e yě ɖó bá nɔ gbɛ káká sɔ́yi é nɔ wá ɖó jiɖe. Wǔjɔmɛ jí wǔ ɖé wɛ mǐ ɖó bo ná d’alɔ  mɛ lɛ́, bɔ yě ná vɛ́ xá Tɔ́ yětɔn! Ényí mǐ wa mɔ̌ ɔ, Jexóva ná mɔ mǐ dó mɔ “azɔ̌watɔ́gbɛ́” tɔn lɛ́.—1 Kɔ. 3:5, 9.

16. Ényí mɛ lɛ́ se nyǐkɔ Mawu tɔn ɔ, nɛ̌ nǔ ka nɔ cí nú yě mɛ ɖé lɛ́? Nǎ kpɔ́ndéwú ɖé lɛ́.

¹⁶ Ðo bǐbɛ́mɛ ɔ, nǔ e mǐ sixú kplɔ́n mɛ lɛ́ kpowun é wɛ nyí ɖɔ nyǐkɔ Mawu tɔn nɔ nyí Jexóva. Énɛ́ kɔ́kɔ́ɖɔ́kɔ́ sixú húzú gbɛzán ayijlɔ́jlɔ́nɔ ɖé tɔn. Ði kpɔ́ndéwú ɔ, ɖyɔ̌vǐ ɖé nɔ nyí Aaliyah, b bɔ sinsɛn ɖěvo mɛ wɛ é su ɖe. Amɔ̌, nǔ e sinsɛn tɔn nɔ kplɔ́n mɛ lɛ́ é ɖěbǔ nɔ jɛmɛ n’i ǎ, bɔ é ka lɛ́ mɔ ɖɔ émí kún vɛ́ kpó Mawu kpó ó. Nǔ lɛ́ húzú, hwenu e é jɛ Biblu kplɔ́n xá Kúnnuɖetɔ́ Jexóva tɔn lɛ́ jí é. É jɛ Mawu sɔ́ dó ɖó Xɔ́ntɔn tɔn jí. Bɔ ée é se ɖɔ è ɖe nyǐkɔ Mawu tɔn sín Biblu gěgé mɛ, bo sɔ́ tɛnmɛ-nyíkɔ ɖé kpowun, ɖi Aklúnɔ dó ɖyɔ́ é ɔ, é kpácá ɛ tawun. Nyǐkɔ Jexóva tɔn e é kplɔ́n é húzú gbɛzán tɔn. É ɖɔ: “Xɔ́ntɔn ɖagbe hú gǎn e un ɖó é ɖó nyǐkɔ!” Étɛ́ mɛ é ka tɔ́n kɔ dó? É ɖɔ: “Un ɖó fífá ayi mɛ tɔn din hú ɖ’ayǐ tɔn. Un nɔ mɔ ɖɔ è wlí yɛ̌yi nú mì tawun.” Nya ɖé nɔ nyí Steve bo nyí nǔxotɔ́, bo gosín xá e mɛ sinsɛn Jwifu lɛ́ tɔn sín nǔwalɔ nɔ syɛ́n ɖe tawun é ɖé mɛ. É wá ɖó wǔ zɔ nú sinsɛngbɛ́ta énɛ́, ɖó é mɔ yɛmɛnúwiwa gěgé ɖo yě gɔ́n wútu. Amɔ̌, ée nɔ tɔn kú gúdo é ɔ, é yí gbe bo ná nɔ Biblu kplɔ́nkplɔ́n e Kúnnuɖetɔ́ Jexóva tɔn ɖokpó ɖo nukún kpé d’é wú wɛ é domɛ. Nyǐkɔ Mawu tɔn e é se é byɔ́ ayi mɛ n’i tawun. É ɖɔ: “Un se Mawu sín nyǐkɔ kpɔ́n ǎ.” É ɖɔ gɔ́ ná ɖɔ: “Azɔn nukɔntɔn ɔ ɖíe bɔ un mɔ nǔ jɛ mɛ ɖɔ Mawu tíin nǔgbó! Mɛ e wú è sixú gán jɛ é ɖé wɛ. Din ɔ, un tuun ɖɔ un ɖó Xɔ́ntɔn ɖé.”

17. Étɛ́wú a ka kán ɖ’é jí bo ná kpo ɖo susu kpa nú nyǐkɔ Jexóva tɔn wɛ? (Kpɔ́n fɔtóo ɔ lɔmɔ̌.)

¹⁷ Ényí a ɖo mawuxó ɖɔ wɛ bo lɛ́ ɖo nǔ kplɔ́n mɛ lɛ́ wɛ ɔ, a ka nɔ má nyǐkɔ mímɛ́ ɔ, Jexóva xá mɛ lɛ́ a? A ka nɔ d’alɔ yě bɔ yě nɔ tuun mɛ alɔkpa e Mawu mǐtɔn nyí nǔgbó nǔgbó é a? Ényí a nɔ wa mɔ̌ hǔn, susu kpa nú nyǐkɔ Mawu tɔn wɛ a ɖe nɛ́. Kpo ɖo susu kpa nú nyǐkɔ mímɛ́ Jexóva tɔn wɛ, gbɔn alɔ dídó mɛ lɛ́ bónú yě ná tuun Mɛ e ɖó nyǐkɔ mímɛ́ énɛ́ é gblamɛ. Mɔ̌ mɛ ɔ, a ná hwlɛ́n gbɛ yětɔn gán. A ná wa nǔ sɔgbe xá ali e xlɛ́ we wɛ Axɔ́sú towe, Klísu Jezu ɖe é. Tají hú gǎn ɔ, a ná hɛn xomɛ hun Tɔ́ towe wǎnyíyínɔ ɔ, Jexóva. Énɛ́ wú ɔ, “nɔ mlá nyǐkɔ [tɔn] tɛgbɛ, bo [nɔ] mlá káká yi káká sá”!—Ðɛh. 145:2.