1. Hwetɛ́nu mɛ e gbigbɔ mímɛ́ sɔ́ lɛ́ é bǐ ka ná yi jǐxwé dó?

 XWE ɖé lɛ́ ɖíe ɔ, togun Jexóva tɔn nɔ kanbyɔ́ éɖée ɖɔ: ‘Hwetɛ́nu wɛ klisánwun ɖěɖěe gbigbɔ mímɛ́ sɔ́ bɔ yě kpo ɖo ayǐkúngban ɔ jí lɛ́ é gǔdo gúdo tɔn ɔ ka ná yi jǐxwé?’ Mǐ nɔ lin ɖ’ayǐ ɖɔ klisánwun e gbigbɔ mímɛ́ sɔ́ é ɖé lɛ́ ná ɖibla nɔ palaɖísi ayǐkúngban jí tɔn ɔ mɛ nú hwenu ɖé ɖo ahwan Aamagedɔ́ni tɔn gúdo. Amɔ̌, ɖo Atɔxwɛ (Gungbe) 15 juillet 2013 mɛ ɔ, mǐ kplɔ́n ɖɔ mɛ e gbigbɔ mímɛ́ sɔ́ bɔ yě kpo ɖo ayǐkúngban ɔ jí lɛ́ é bǐ ná yi jǐxwé cóbɔ ahwan Aamagedɔ́ni tɔn ná bɛ́.—Mat. 24:31.

2. Étɛ́ mɛɖé lɛ́ ka sixú kanbyɔ́? Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

² Amɔ̌, mɛɖé lɛ́ sixú kan nǔ lěhun byɔ́: Étɛ́ ka ná jɛ dó Klísu sín “lɛ̌ngbɔ́ ɖěvo lɛ́,” éé ná ɖo Jexóva sɛn wɛ kpó gbejíninɔ kpó ɖo ayǐkúngban ɔ jí ɖo “wǔvɛ́ ɖaxó” ɔ hwenu lɛ́ é wú? (Jaan 10:16; Mat. 24:21) Égbé ɔ, ado sixú hu mɛɖé lɛ́ ɖɔ yě ná flú, alǒ yě ná mɔ ɖɔ è ɖe alɔ sín kan émítɔn mɛ hwenu e nɔví vívɛ́ yětɔn e gbigbɔ mímɛ́ sɔ́ lɛ́ é ná yi jǐxwé é. Mi nú mǐ ní gbéjé tan Biblu tɔn e sixú wá ayi mɛ nú yě é we kpɔ́n. Énɛ́ gúdo ɔ, mǐ ná ɖɔ xó dó hwɛjijɔ e wú ado ma ɖó ná hu mɛ ǎ é ɖé lɛ́ wú.

ÉTƐ́ MA KA NÁ JƐ DÓ LƐ̌NGBƆ́ ÐĚVO LƐ́ JÍ Ǎ?

3-4. Étɛ́ mɛɖé lɛ́ ka sixú kanbyɔ́? Aniwú?

³ Mɛɖé lɛ́ sixú nɔ kanbyɔ́ yěɖée ɖɔ hwenu e nɔví súnnu e gbigbɔ mímɛ́ sɔ́ bɔ yě ɖo Hǎgbɛ́ alixlɛ́mɛtɔ́ ɔ mɛ lɛ́ é ɖě ma sɔ́ ná ɖo fínɛ́, bo ná xlɛ́ ali lɛ̌ngbɔ́ ɖěvo lɛ́ ǎ é ɔ, lɛ̌ngbɔ́ ɖěvo lɛ́ ka ná ɖó Jexóva sinsɛn te wɛ a jí. Bóyá tan Biblu tɔn ɖé lɛ́ wɛ nɔ zɔ́n bɔ yě nɔ ɖo adohu adohu énɛ́ jí. Mi nú mǐ ní ɖɔ xó dó kpɔ́ndéwú we wú. Nukɔntɔn ɔ kunkplá vɔ̌sánúxwlémawutɔ́ ɖaxó Yexoyáda. Mawusɛntɔ́ téwúngbéjú wɛ n’i. É kpó asi tɔn Yexosaváti  kpó cyɔ́n alɔ nyaví kpɛví e nɔ nyí Joasi é jí, bo d’alɔ ɛ bɔ é húzú axɔ́sú ɖagbe gbejínɔtɔ́ ɖé. Joasi sɛn Jexóva, bo wa nǔ ɖagbe lɛ́ hwenu e Yexoyáda ɖo gbɛ é. Amɔ̌, ée Yexoyáda kú gúdo é ɔ, Joasi jɛ nǔ nyanya wa jí. É ɖótó axɔ́ví nyanya lɛ́, bo jó Jexóva dó.—2 Tan 24:2, 15-19.

⁴ Kpɔ́ndéwú e bɔ d’é wú é wɛ nyí klisánwun xwe kanweko wegɔ́ ɔ tɔn lɛ́ tɔn. Mɛsɛ́dó gǔdo gúdo tɔn e kú é wɛ nyí Jaan; hwenu e é kpo ɖo gbɛ é ɔ, é d’alɔ klisánwun gěgé bɔ yě nɔ gbejí nú Jexóva. (3 Jaan 4) Nú hwenu ɖé ɔ, Jaan kpó mɛsɛ́dó gbejínɔtɔ́ Jezu tɔn ɖěvo lɛ́ kpó liza tawun xá gǔfɔ́ndómawují e ɖo kan vun wɛ hwe ɔ nu é. (1 Jaan 2:18; 2 Tɛ. 2:7.) Amɔ̌, ée Jaan kú gúdo é ɔ, gǔfɔ́ndómawují lɛ́ gba kpé tawun ɖo agun ɔ mɛ. Ðo xwe e bɔ d’é wú lɛ́ é mɛ ɔ, agun klisánwun tɔn ɔ wá blí bǐ.

5. Gbeta tɛ́ lɛ́ kɔn mǐ ma ka ɖó ná wá dó tan we énɛ́ lɛ́ wú ǎ?

⁵ Xlɛ́xlɛ́ wɛ tan Biblu tɔn we énɛ́ lɛ́ ka ɖe ɖɔ nǔ mɔ̌hun ná jɛ dó lɛ̌ngbɔ́ Klísu tɔn lɛ́ jí hwenu e klisánwun ɖěɖěe gbigbɔ mímɛ́ sɔ́ lɛ́ é ná ko yi jǐxwé é a? Hwenɛ́nu ɔ, klisánwun gbejínɔtɔ́ lɛ́ ka ná jó nǔ e è kplɔ́n yě lɛ́ é dó Joasi ɖɔhun, alǒ húzú gǔfɔ́ndómawujítɔ́ klisánwun xwe kanweko wegɔ́ H.M. tɔn lɛ́ gěgé ɖɔhun wɛ a? Xósin ɔ wɛ nyí éǒ! Mǐ sixú kú d’é jí ɖɔ hwenu e mɛ e gbigbɔ ɔ sɔ́ lɛ́ é ná ko gosín ayǐkúngban jí gúdo é ɔ, è ná kpé nukún dó lɛ̌ngbɔ́ ɖěvo lɛ́ wú ganjí, bɔ yě ná su ɖo gbigbɔ lixo. Étɛ́wú mǐ ka sixú kú d’é jí ɖɔ nǔ ná nyí mɔ̌?

NǓ KWÍJI ÐĚ NÁ VA DÓ MAWUSINSƐN NǓGBÓ Ɔ WÚ Ǎ

6. Hwenu atɔn tɛ́ lɛ́ mǐ ka ná gbéjé kpɔ́n ɖo kléwún mɛ?

⁶ Étɛ́wú mǐ ka sixú kú d’é jí ɖɔ é ná bo tlɛ nyí ɖo hwenu vɛ́ wǔ e ɖo nukɔn ja lɛ́ é mɛ ɔ, nǔ kwíji ɖěbǔ kún ná va dó mawusinsɛn nǔgbó ɔ wú ó? Nǔ e mǐ kplɔ́n ɖo Biblu mɛ dó hwenu e nɔ gbɛ ɖe wɛ mǐ ɖe é wú é wɛ zɔ́n. Hwenu e mǐ ɖe din é gbɔn vo tawun nú hwenu e Izlayɛ́li ví lɛ́ nɔ gbɛ é kpó hwenu e klisánwun xwe kanweko wegɔ́ ɔ tɔn lɛ́ nɔ gbɛ é kpó. Énɛ́ wú ɔ, mi nú mǐ ní gbéjé hwenu atɔn élɔ́ lɛ́ kpɔ́n kpó sɔxwixwe kpó: (1) Hwenu e Izlayɛ́li ví lɛ́ nɔ gbɛ é, (2) hwenu e bɔ dó kú mɛsɛ́dó lɛ́ tɔn wú é kpó (3) hwe mǐtɔn nu, éé ɖo ‘nǔ lɛ́ bǐ jíjláɖó sín hwenu’ ɔ nyí wɛ é kpó.—Mɛ. 3:21.

7. Étɛ́wú awakanmɛ ma ka kú Izlayɛ́li ví gbejínɔtɔ́ lɛ́ hwenu e togun ɔ kpó axɔ́sú lɛ́ kpó wlí ali nyanya é ǎ?

⁷ Hwenu e Izlayɛ́li ví lɛ́ nɔ gbɛ é. Hwenu kpɛɖé jɛ nukɔn nú kú Mɔyízi tɔn ɔ, é ɖɔ nú Izlayɛ́li ví lɛ́ ɖɔ: “Un tuun ɖɔ jí un kú ɔ, mi ná lɛ́ kɔ sín ali e un ɖe nú mi é jí, bo ná jɛ hwɛ hu jí.” (Sɛ́n. 31:29) Mɔyízi lɛ́ gb’akpá nú Izlayɛ́li ví lɛ́ ɖɔ nú yě fɔ́n gǔ ɔ, è ná sɛ́ yě dó kannumɔgbénu. (Sɛ́n. 28:35, 36) Xó énɛ́ lɛ́ ka jɛnu a? Ganjí. Nú xwe kanweko mɔ̌kpán ɔ, axɔ́sú gěgé wá gbeta ɔ kɔn bo wa nǔ e nylá é, lobo dɔn togun Mawu tɔn yi bú. Énɛ́ wɛ zɔ́n bɔ Jexóva gbɛ́ togun nyanya énɛ́, bo sɔ́ yí gbe nú Izlayɛ́li xɔ́sú lɛ́ kp’acɛ dó yě jí ɖě ǎ. (Ezek. 21:30-32) Amɔ̌, hwenu e Izlayɛ́li ví gbejínɔtɔ́ lɛ́ mɔ ɖɔ xó e Jexóva ɖɔ lɛ́ é jɛnu é ɔ, énɛ́ zɔ́n bɔ yě kpankɔ́n, bo kpo ɖo Jexóva sɛn wɛ kpó gbejíninɔ kpó.—Eza. 55:10, 11.

8. É ka ɖó ná kpácá mǐ ɖɔ agun klisánwun tɔn xwe kanweko wegɔ́ ɔ tɔn blí wɛ a? Tínmɛ.

⁸ Hwenu e bɔ dó kú mɛsɛ́dó lɛ́ tɔn wú é. É ka ɖó ná kpácá mǐ ɖɔ agun klisánwun tɔn xwe kanweko wegɔ́ ɔ tɔn blí wɛ a? Ðěbǔ ǎ. Jezu ɖɔ ɖ’ayǐ ɖɔ gǔfɔ́ndómawují ɖaxó ná wá tíin. (Mat. 7:21-23; 13:24-30, 36-43) Mɛsɛ́dó Pɔ́lu, Piyɛ́ɛ kpó Jaan kpó bǐ dó zǒgbe jí ɖɔ nǔɖɔɖayǐ Jezu tɔn énɛ́ ko jɛ jijɛnu jí sín xwe kanweko nukɔntɔn H.M. tɔn mɛ. (2 Tɛ. 2:3, 7; 2 Pi. 2:1; 1 Jaan 2:18) Agun klisánwun tɔn wá blí ɖo xwe kanweko wegɔ́ H.M. tɔn mɛ. Klisánwun ɖé lɛ́ húzú gǔfɔ́ndómawujítɔ́, bo byɔ́ Babilɔ́nu ɖaxó ɔ éé nyí kplékplé sinsɛn nǔvú e gbɔn  gbɛ ɔ bǐ mɛ lɛ́ é tɔn mɛ. Nǔ e Jezu ɖɔ ɖ’ayǐ é ko lɛ́ jɛnu nɛ́.

9. Nɛ̌ hwenu e nɔ gbɛ ɖe wɛ mǐ ɖe din é ka gbɔn vo nú hwenu e Izlayɛ́li ví lɛ́ nɔ gbɛ é kpó hwenu e klisánwun xwe kanweko wegɔ́ ɔ tɔn lɛ́ nɔ gbɛ é kpó gbɔn?

⁹ ‘Nǔ lɛ́ bǐ jíjláɖó sín hwenu’ ɔ. Hwenu e nɔ gbɛ ɖe wɛ mǐ ɖe é gbɔn vo nú hwenu e Izlayɛ́li ví lɛ́ nɔ gbɛ é kpó hwenu e gǔfɔ́ndómawují jínjɔ́n ayǐ ɖo xwe kanweko wegɔ́ H.M tɔn mɛ é kpó. Nɛ̌ è ka nɔ ylɔ́ hwenu e nɔ gbɛ ɖe wɛ mǐ ɖe é ɖɔ? “Azǎn gǔdo gúdo tɔn” gbɛ nyanya élɔ́ tɔn “lɛ́” wɛ mǐ nɔ yá wǔ ylɔ́ ɖɔ. (2 Tim. 3:1) Amɔ̌, Biblu lɛ́ ɖɔ hwenu gaga e ɖo tají hú gǎn é ɖé xó bɔ é lɔmɔ̌ bɛ́ ɖo hwe ɖokpó ɔ nu kpó azǎn gǔdo gúdo tɔn lɛ́ kpó. Hwenu énɛ́ ná kpo ɖo te káká jɛ hwenu e Axɔ́súɖuto Mɛsíya ɔ tɔn ná bló bɔ gbɛtɔ́ lɛ́ ná húzú mɛ maɖóblɔ̌, lobo lɛ́ bló bɔ ayǐkúngban ɔ ná húzú palaɖísi é. È ylɔ́ hwenu énɛ́ ɖɔ ‘nǔ lɛ́ bǐ jíjláɖó sín hwenu.’ (Mɛ. 3:21) Hwe énɛ́ nu bɛ́ ɖo 1914. Étɛ́ è ka jlá ɖó lo? È sɔ́ Jezu Axɔ́sú ɖo jǐxwé. Mɔ̌ mɛ ɔ, Jexóva lɛ́ ɖó acɛkpatɔ́ e ná sɔ́ afɔ tɔn ɖó te é, énɛ́ wɛ nyí gǔɖutɔ́ axɔ́sú Davídi gbejínɔtɔ́ ɔ tɔn. Amɔ̌, acɛkpikpa énɛ́ wɛ nyí nǔ ɖokpó e Jexóva jlá ɖó é ǎ. Énɛ́ gúdo zaan ɔ, è jɛ mawusinsɛn nǔgbó ɔ vɔ́ ɖó ayǐ jí! (Eza. 2:2-4; Ezek. 11:17-20) Nǔ blíblí ɖě ka ná lɛ́ wá va d’é wú wɛ a?

10. (a) Étɛ́ Biblu ka ɖɔ ɖ’ayǐ dó mawusinsɛn nǔgbó ɔ wú ɖo hwe mǐtɔn nu? (Ezayíi 54:17) (b) Étɛ́wú nǔɖɔɖayǐ mɔ̌hun lɛ́ ka vɔ́ gǎnjɛwú ná mɛ?

¹⁰ Xa Ezayíi 54:17. Lin tamɛ dó nǔɖɔɖayǐ élɔ́ jí: “Alyánnú e è ná tun bo ná sɔ́ dó jǐ we ɔ ɖě ná wa nǔtí nú we ǎ.” Xó énɛ́ lɛ́ e Mawu sɔ́ d’ayi mɛ nú mɛ bɔ è wlán lɛ́ é ɖo jijɛnu wɛ ɖo égbé. Gbɔdónúmɛxó élɔ́ lɛ́ lɔ kan hwe mǐtɔn nu: “Un ná kplɔ́n nǔ vǐ towe lɛ́ bǐ; yě bǐ ná vo bɔ nǔ ná nyɔ́ nú yě tawun. A ná nɔ xwedó hwɛjijɔ dó wa nǔ; . . . a sɔ́ ná ɖi xɛsi nú nǔɖé ǎ; mɛ ɖěbǔ sɔ́ ná nɔ dó adohuhu nú we ǎ, ado sɔ́ ná hu we ǎ.” (Eza. 54:13, 14) Satáan e nyí “mawu gbɛ élɔ́ tɔn é” ɖésú tlɛ ɖó agbɔ̌n e ná ɖó azɔ̌ e wa wɛ togun Jexóva tɔn ɖe, bo ɖo nǔ kplɔ́n mɛ ɖěvo lɛ́ wɛ dó Jexóva wú é te ǎ. (2 Kɔ. 4:4) È ko lɛ́ vɔ́ mawusinsɛn nǔgbó ɔ ɖó ayǐ, bɔ nǔ blíblí ɖě sɔ́ ná va d’é wú gbeɖé ǎ. É ná nɔ ayǐ káká sɔ́yi mavɔmavɔ. Alyánnú e yě ná tun, bo ná sɔ́ dó mǐ jí é ɖě ná wa nǔtí nú mǐ ǎ!

ÉTƐ́ KA NÁ JƐ?

11. Étɛ́ ka ná mǐ gǎnjɛwú ɖɔ ényí mɛ e gbigbɔ mímɛ́ sɔ́ lɛ́ é yi jǐxwé gúdo ɔ, mɛ wɔ̌búwɔ́bú ɔ kún ná mɔ ɖɔ è ɖe alɔ sín kan émítɔn mɛ ó?

¹¹ Ényí mɛ e gbigbɔ ɔ sɔ́ lɛ́ é yi jǐxwé ɔ, étɛ́ ka ná jɛ? Flín ɖɔ Jezu wɛ nyí lɛ̌ngbɔ́nyitɔ́ mǐtɔn. É wɛ nyí ta nú agun klisánwun tɔn. Jezu ɖɔ nyi wɛn ɖɔ: “Nukɔntɔ́ ɖokpó wɛ mi ɖó, é wɛ  nyí Klísu.” (Mat. 23:10) Axɔ́sú mǐtɔn e ɖo acɛ kpa wɛ é ná gɔn azɔ̌ e nyí étɔn é wa gbeɖé ǎ. Ðó Klísu wɛ ɖo ali xlɛ́ mɛ e ɖo ayǐkúngban jí fí lɛ́ é wɛ wútu ɔ, é byɔ́ ɖɔ yě ní ɖi xɛsi nú nǔɖé ǎ. É ɖo wɛn ɖɔ mǐ kún tuun gǒflɛ́mɛ lɛ́ bǐ dó lěe Klísu ná xlɛ́ ali togun tɔn gbɔn, ɖo hwenɛ́nu é wú ó. Énɛ́ wú ɔ, mi nú mǐ ní gbéjé kpɔ́ndéwú Biblu tɔn e sixú vɔ́ gǎnjɛwú ná mǐ é ɖé lɛ́ kpɔ́n.

12. Nɛ̌ Jexóva ka kpé nukún dó togun tɔn wú (a) ɖo kú Mɔyízi tɔn gúdo gbɔn? (b) hwenu e è sɔ́ azɔ̌ ɖěvo d’así nú Elíi gúdo é gbɔn? (Kpɔ́n ɖiɖe ɔ lɔmɔ̌.)

¹² Mɔyízi ko kú cóbɔ Izlayɛ́li ví lɛ́ yi Akpádídó yíkúngban ɔ jí. Étɛ́ ka jɛ dó togun Mawu tɔn jí? Jexóva ɖó alɔ dídó togun tɔn te ɖo kú nya gbejínɔtɔ́ énɛ́ tɔn gúdo wɛ a? Éǒ. Ée yě nɔ gbejí é ɔ, Jexóva kpé nukún dó yě wú. Cóbónú Mɔyízi ná kú ɔ, Jexóva ɖɔ n’i ɖɔ é ní sɔ́ azɔ̌ d’así nú Jozuwée bónú é ná nɔ nukɔn nú togun ɔ. Mɔyízi kplɔ́n azɔ̌ Jozuwée nú xwe mɔ̌kpán. (Tín. 33:11; Sɛ́n. 34:9) Gɔ́ ná ɔ, súnnu e kpé nǔ wú é gěgé ɖěvo lɛ́ nɔ nukɔn nú yě; yě wɛ nyí mɛ e ɖo gbɛtɔ́ afatɔ́n, kanweko, kanɖé wǒ kpó wǒ kpó nu lɛ́ é. (Sɛ́n. 1:15) È kpé nukún dó togun Mawu tɔn wú ganjí. Kpɔ́ndéwú énɛ́ ɖɔhun ɖěvo wɛ nyí Elíi tɔn. É nɔ nukɔn nú mawusinsɛn nǔgbó ɔ ɖo togun Izlayɛ́li tɔn mɛ nú xwe mɔ̌kpán. Amɔ̌, hwe ɔ nu wá su bɔ Jexóva sɛ́ ɛ dó azɔ̌ ɖěvo gbé mɛ ɖo tofɔligbé Judáa tɔn. (2 Axɔ́. 2:1; 2 Tan 21:12) È ɖe alɔ sín gbejínɔtɔ́ e ɖo axɔ́súɖuto wǒ Izlayɛ́li tɔn mɛ lɛ́ é kan mɛ wɛ a? Éǒ. Elíi ko kplɔ́n azɔ̌ Elizée nú xwe mɔ̌kpán. “Gbeyíɖɔ” e è kplɔ́n azɔ̌ lɛ́ é lɔ ɖo fínɛ́. (2 Axɔ́. 2:7) Mɔ̌ mɛ ɔ, súnnu gbejínɔtɔ́ gěgé ɖo fínɛ́, bo ná d’alɔ bɔ è ná xlɛ́ ali togun Mawu tɔn. Jexóva kpo ɖo blǒbló wɛ bɔ linlin tɔn ɖo jijɛnu wɛ, bɔ é lɛ́ kpé nukún dó mɛsɛntɔ́ tɔn gbejínɔtɔ́ lɛ́ wú.

13. Nǔ e vɔ́ gǎnjɛwú ná mɛ é tɛ́ ka ɖo Eblée lɛ́ 13:5b mɛ? (Kpɔ́n fɔtóo ɔ lɔmɔ̌.)

¹³ Kpó kpɔ́ndéwú énɛ́ lɛ́ kpó ɖo ayi mɛ ɔ, étɛ́ a ka lin ɖɔ é ná jɛ hwenu e mɛ gǔdo tɔn e ɖo klisánwun ɖěɖěe gbigbɔ mímɛ́ sɔ́ lɛ́ é mɛ é ná yi jǐxwé é? É byɔ́ ɖɔ ado ní hu mǐ ǎ. Biblu ɖɔ nǔgbó élɔ́ e ɖo wɛn, bo ka vɔ́ gǎnjɛwú ná mɛ é: Jexóva ná ɖe alɔ sín togun tɔn e ɖo ayǐkúngban jí é kanmɛ gbeɖé ǎ. (Xa Eblée lɛ́ 13:5b.) Mɔyízi kpó Elíi kpó ɖɔhun ɔ, gbɛ̌ta kpɛví klisánwun e gbigbɔ mímɛ́ sɔ́, bɔ yě ɖo nukɔn nú nǔ lɛ́ ɖo égbé é tɔn mɔ nǔ jɛ lě do azɔ̌ kplɔ́nkplɔ́n mɛ ɖěvo lɛ́ ɖo tají sɔ é mɛ. Nú xwe mɔ̌kpán ɔ, nɔví súnnu e ɖo Hǎgbɛ́ alixlɛ́mɛtɔ́ ɔ mɛ lɛ́ é ko kplɔ́n azɔ̌ nɔví súnnu e ɖo lɛ̌ngbɔ́ ɖěvo lɛ́ mɛ lɛ́ é bónú yě ná nɔ nukɔn nú nǔ lɛ́. Ði kpɔ́ndéwú ɔ, yě bló tuto wěmaxɔmɛ gěgé tɔn bo ná dó kplɔ́n azɔ̌ mɛxó agun tɔn lɛ́,  nukúnkpénǔwútɔ́ lɛ̌dó tɔn lɛ́, mɛ e ɖo wěɖegbɛ́ alaxɔ tɔn mɛ lɛ́ é, nukúnkpénǔwútɔ́ e ɖo Betɛ́li lɛ́ é kpó mɛ ɖěvo lɛ́ kpó. Hǎgbɛ́ alixlɛ́mɛtɔ́ ɔ ɖésúnɔ ko kplɔ́n azɔ̌ alɔgɔ́tɔ́ e ɖo wěɖegbɛ́ Hǎgbɛ́ alixlɛ́mɛtɔ́ ɔ tɔn vovo lɛ́ mɛ lɛ́ é. Alɔgɔ́tɔ́ énɛ́ lɛ́ ko ɖo azɔ̌ kpinkpɛn e è sɔ́ d’así nú yě lɛ́ é wa wɛ kpó gbejíninɔ kpó din. È ko sɔ́ nǔ nú yě ganjí bónú yě ná gbɛ kan dó nukún kpíkpé dó Klísu sín lɛ̌ngbɔ́ lɛ́ wú ɔ nu.

14. Étɛ́ ka nyí nǔ tají e mǐ ná hɛn ɖo xóɖɔɖókpɔ́ mǐtɔn mɛ é?

¹⁴ Nǔ tají e mǐ ná hɛn ɖo xóɖɔɖókpɔ́ mǐtɔn mɛ é ɖíe: Ényí mɛ gǔdo tɔn e ɖo mɛ ɖěɖěe gbigbɔ mímɛ́ sɔ́ lɛ́ é mɛ é yi jǐxwé ɖo vivɔnu wǔvɛ́ ɖaxó ɔ tɔn ɔ, è ná kpo ɖo Jexóva sɛn wɛ lěe é ba gbɔn é. Nukɔn e Jezu Klísu ɖe nú mawusɛntɔ́ lɛ́ é ná zɔ́n bɔ è ná ɖó mawusinsɛn kpó gbejíninɔ kpó te gbeɖé ǎ. Nǔgbó wɛ ɖɔ, ɖo hwenɛ́nu ɔ, gbɛ̌ kplékplé akɔta lɛ́ tɔn e Biblu ylɔ́ ɖɔ Gɔ̌gu Magɔ́gi tɔn é ná tɔ́n ahwan togun Mawu tɔn. (Ezek. 38:18-20) Amɔ̌, ahwantɔ́nmɛ kléwún énɛ́ ná nyi ta fí ɖé ǎ; é ná zɔ́n bɔ togun Mawu tɔn ná ɖó Jexóva sinsɛn te ǎ. É ɖo wɛn ɖɔ Jexóva ná hwlɛ́n togun tɔn. Ðo nǔmimɔ ɖé mɛ ɔ, mɛsɛ́dó Jaan mɔ “ahwan ɖaxó ɖé”, Klísu sín lɛ̌ngbɔ́ ɖěvo lɛ́ wɛ. È ɖɔ nú Jaan ɖɔ “ahwan ɖaxó” énɛ́ “xo wǔvɛ́ ɖaxó ɔ zlɛ́.” (Nǔɖe. 7:9, 14) Ɛɛn, nǔɖé ná tɔ́n fɛn yě ǎ!

15-16. Sɔgbe xá Nǔɖexlɛ́mɛ 17:14 ɔ, étɛ́ nɔví Klísu tɔn e gbigbɔ mímɛ́ sɔ́ lɛ́ é ka ná wa ɖo ahwan Aamagedɔ́ni tɔn hwenu? Aniwú énɛ́ ka dó wǔsyɛ́n lanmɛ nú mɛ?

¹⁵ É ɖo mɔ̌ có, mɛɖé lɛ́ sixú kanbyɔ́ ɖɔ: ‘Bɔ mɛ e gbigbɔ sɔ́ lɛ́ é ka lo? Ényí yě gosín ayǐkúngban jí gúdo ɔ, étɛ́ yě ka ná wa?’ Biblu ná xósin nú nǔkanbyɔ́ énɛ́ tlɔlɔ. É ɖɔ ɖɔ acɛkpikpa gbɛ ɔ tɔn lɛ́ ná “fun ahwan xá Lɛ̌ngbɔ́ví ɔ.” É ɖo wɛn ɖɔ yě ná cí ahwan. Mǐ xa ɖɔ: “[Lɛ̌ngbɔ́ví ɔ] ná ɖu ɖo yě jí.” Bɔ mɛ̌ mɛ̌ e ka ná d’alɔ ɛ? Wěmafɔ ɔ ná xósin. Mɛ ɖěɖěe è “ylɔ́,” “sɔ́,” bɔ yě ɖo “gbe jí” lɛ́ é wɛ. (Xa Nǔɖexlɛ́mɛ 17:14.) Mɛ̌ mɛ̌ e ka wɛ? Mɛ̌ ɖěɖěe gbigbɔ mímɛ́ sɔ́ bɔ yě fɔ́n sín kú lɛ́ é wɛ! Énɛ́ wú ɔ, hwenu e mɛ gǔdo tɔn e ɖo mɛ e gbigbɔ mímɛ́ sɔ́ lɛ́ é mɛ é ná yi jǐxwé ɖibla yi vivɔnu wǔvɛ́ ɖaxó ɔ tɔn gúdo é ɔ, nǔ nukɔntɔn e ɖo nǔ e yě ná wa lɛ́ é mɛ é wɛ nyí ɖɔ yě ná fun ahwan. Azɔ̌ tají ɖé wɛ! Mɛ e gbigbɔ mímɛ́ sɔ́ lɛ́ é ɖé lɛ́ ko nyí  ahwanfuntɔ́ cóbó wá húzú Kúnnuɖetɔ́ Jexóva tɔn. Yě mɛ ɖé lɛ́ tlɛ ko nyí sɔ́ja ɖo ahwankpá gbɛ ɔ tɔn lɛ́ mɛ kpɔ́n. Amɔ̌ din ɔ, yě ko húzú klisánwun nǔgbó, bo ko kplɔ́n lěe yě ná nɔ fífá mɛ xá mɛ ɖěvo lɛ́ gbɔn é. (Ga. 5:22; 2 Tɛ. 3:16) Yě sɔ́ nɔ nɔ gǔdo nú ahwanfunfun ǎ. É ɖo mɔ̌ có, nú yě yi jǐxwé gúdo ɔ, yě ná gɔ́ nú Klísu kpó wɛnsagun mímɛ́ tɔn lɛ́ kpó, bo ná fun ahwan gǔdo tɔn ɔ xá kɛntɔ́ Mawu tɔn lɛ́.

¹⁶ Lin tamɛ d’é jí. Hwenu e klisánwun e gbigbɔ mímɛ́ sɔ́ lɛ́ é ɖé lɛ́ ɖo ayǐkúngban jí é ɔ, yě ko kpo, bo tlɛ ba gǎn kpo. Amɔ̌, ényí è fɔ́n yě dó jǐxwé gúdo ɔ, yě ná lɛ́ ɖó hlɔ̌nhlɔ́n, bo ná nyí nǔɖíɖó gbigbɔ tɔn jɔmakú ée è sɔ́ azɔ̌ d’así ná, bɔ yě ná nɔ kpɔ́ xá Jezu Klísu éé nyí Axɔ́sú ahwanfuntɔ́ é, bo ná fun ahwan. Ényí è fun ahwan Aamagedɔ́ni tɔn gúdo ɔ, yě ná w’azɔ̌ xá Jezu, bo ná d’alɔ gbɛtɔ́ lɛ́ bɔ yě ná húzú mɛ maɖóblɔ̌. Nǔxokpɔ́n ɖ’é mɛ ǎ, yě ná kpé wú bá wa nǔ ɖagbe gěgé nú nɔví vívɛ́ yětɔn e ɖo ayǐkúngban jí lɛ́ é hwenu e yě ná ɖo jǐxwé é hú lěe yě sixú wa gbɔn hwenu e yě kpo ɖo gbɛtɔ́ hwɛhutɔ́ kpowun nyí wɛ é!

17. Nɛ̌ mǐ ka wa gbɔn bo tuun ɖɔ mɛsɛntɔ́ Mawu tɔn lɛ́ bǐ ná nɔ ayijayǐ mɛ ɖo ahwan Aamagedɔ́ni tɔn hwenu?

¹⁷ Lɛ̌ngbɔ́ ɖěvo lɛ́ mɛ wɛ a ɖe a? Ényí mɔ̌ wɛ ɔ, étɛ́ é ka ná byɔ́ ɖɔ a ní wa hwenu e ahwan e ɖo tají hú gǎn é, énɛ́ wɛ nyí hwenu e ahwan Aamagedɔ́ni tɔn ná bɛ́ é? Nǔ ɔ kpowun ɖíe: Ðeji dó Jexóva wú, bo xwedó ali e é ná xlɛ́ we é. Étɛ́ mɔ̌ wiwa ka sixú byɔ́? Biblu ɖɔ gbɔdónúmɛxó élɔ́: “Mi yi xɔ mitɔn lɛ́ mɛ, mi dɔn hɔn mitɔn sú dó ta, bo nɔ fínɛ́ kpɛɖé, bónú xomɛsin Mawu tɔn ní wá yi.” (Eza. 26:20) Mɛsɛntɔ́ gbejínɔtɔ́ Mawu tɔn e ɖo jǐxwé, bo lɛ́ ɖo ayǐkúngban jí lɛ́ é bǐ wɛ ná nɔ ayijayǐ mɛ hwenɛ́nu. Mɛsɛ́dó Pɔ́lu ɖɔhun ɔ, mǐ kú d’é jí ɖɔ ‘acɛkpikpa lɛ́ wɛ a, nǔ e tíin din lɛ́ é wɛ a, nǔ e ná wá tíin lɛ́ é wɛ a, . . . ɖěbǔ kún sixú kpé wú bo ɖe mǐ ɖó vo nú wǎnyíyí Mawu tɔn’ ó. (Hlɔ̌. 8:38, 39) Nɔ flín hwebǐnu ɖɔ Jexóva yí wǎn nú we, bo kún ná ɖe alɔ sín kan towe mɛ gbeɖé ó!