É KO cí nú we ɖɔ a ɖo xwi ɖí xá tagba towe lɛ́ wɛ hwiɖokpónɔ kpɔ́n a? “Hwenu e syɛ́n bo vɛ́ wǔ bɔ è ná ɖí xwi xá lɛ́ é” nɔ gbɛ ɖe wɛ mǐ ɖe, bo sixú zɔ́n bɔ awakanmɛ kú mǐ, bɔ mǐ lɛ́ mɔ ɖɔ mǐ zun mǐɖokpó. (2 Tim. 3:1) Amɔ̌, é byɔ́ ɖɔ mǐ ní ɖí xwi xá gbɛ mɛ tagba lɛ́ mǐɖóɖó ǎ. Biblu tɛ ɖɛ̌ lěe xɔ́ntɔn jɔ xɔ́ntɔn lɛ́ ɖíɖó xɔ akwɛ́ ɖo “awěxomɛzángbe” sɔ é jí.—Nǔx. 17:17, nwt.

Mɛsɛ́dó Pɔ́lu ɖu le xɔ́ntɔn e é zun xá tomɛyitɔ́gbɛ́ tɔn lɛ́ é tɔn. (Koló. 4:7-11) Hwenu e è sú Pɔ́lu ɖo Hlɔ̌ma é ɔ, xɔ́ntɔn tɔn lɛ́ wa azɔ̌ e éɖésúnɔ ma sixú kpé wú bo wa ǎ lɛ́ é. Ði kpɔ́ndéwú ɔ, Epaflodíti sɔ́ nǔ ɖěɖěe sín hudó Pɔ́lu ɖó bɔ nɔví súnnu kpó nɔví nyɔ̌nu kpó e ɖo Filípu lɛ́ é sɛ́ dó è lɛ́ é yi jó n’i. (Filí. 4:18) Ticíku sɔ́ wěmasɛ́dómɛ Pɔ́lu tɔn lɛ́ yi jó nú agun vovo lɛ́. Gǔdo e xɔ́ntɔn Pɔ́lu tɔn lɛ́ nɔ n’i é zɔ́n bɔ é ɖo glɔ̌nglɔ́n ɖo xwé ɖé gbe, alǒ é ɖo éɖokpó ɖo ganxó có, é ka kpé sinsɛnzɔ́ tɔn wú bo wa. Nɛ̌ a ka sixú nyí xɔ́ntɔn jɔ xɔ́ntɔn ɖé ɖo égbé gbɔn?

Kpɔ́ndéwú égbé tɔn gěgé xlɛ́ lěe xɔ́ntɔn jɔ xɔ́ntɔn ɖé nyínyí xɔ akwɛ́ sɔ é. Lin tamɛ dó nɔví nyɔ̌nu e xlɛ́ ɖɔ émí nyí xɔ́ntɔn nú Elisabet e nyí gběxosín-alijítɔ́ hwebǐnu tɔn ɖo Espagne é jí. Hwenu e è mɔ kansɛ́ɛzɔn e ma sɔ́ sixú gbɔ ǎ é nú Elisabet sín nɔ é ɔ, nɔví nyɔ̌nu ɔ zán wěmafɔ Biblu tɔn ɖé lɛ́ dó wlán wǔsyɛ́n dó lanmɛ nú mɛ sín xó gěgé sɛ́dó è. Elisabet ɖɔ: “Wěmasɛ́dómɛ énɛ́ lɛ́ ná hlɔ̌nhlɔ́n mì bɔ un nɔ dɛ ɖo azǎn ɖokpó ɖokpó nu, bo sɔ́ nɔ mɔ ɖɔ un ɖo nyiɖokpó ǎ.”—Nǔx. 18:24.

Mǐ sixú ná hlɔ̌nhlɔ́n xɔ́ntɔn e mǐ zun xá nǔɖitɔ́ hǎtɔ́ mǐtɔn lɛ́ é gbɔn alɔ dídó yě bónú yě ná yi kúnnuɖegbé kpó kplé lɛ́ kpó gblamɛ. Ði kpɔ́ndéwú ɔ, a ka sixú sɔ́ hwiɖée jó bo ná nɔ sɔ́ nɔví súnnu mɛxómɔ ɖé alǒ nɔví nyɔ̌nu mɛxómɔ ɖé yi kplé lɛ́, alǒ yi kúnnuɖegbé a? Ényí a nɔ wa mɔ̌ ɔ, é ɖo wɛn ɖɔ a ná dó wǔsyɛ́n lanmɛ nú yě, bɔ yě lɔ ná dó wǔsyɛ́n lanmɛ nú we. (Hlɔ̌. 1:12) Amɔ̌, klisánwun ɖé lɛ́ tíin bo nɔ sixú kpé wú bo gosín xwé yětɔn lɛ́ gbe ǎ. Nɛ̌ mǐ ka sixú nyí xɔ́ntɔn jɔ xɔ́ntɔn nú yě gbɔn?

Klisánwun hǎtɔ́ ɖé lɛ́ tíin, bɔ é sín azɔn, alǒ ninɔmɛ ɖěvo lɛ́ wú bɔ yě nɔ sixú kpé wú bo wá kplé lɛ́ cɔɔ lě ǎ. Lin tamɛ dó kpɔ́ndéwú David e è mɔ kansɛ́ɛzɔn ná é tɔn jí. È kpé nukún dó wǔ tɔn nú sun ayizɛ́n jɛjí ɖó kansɛ́ɛzɔn tɔn wú. Ðo táan e mɛ è ɖo nukún kpé dó David wú wɛ é ɔ, é kpó asi tɔn Lidia kpó nɔ bló kplé lɛ́ gbɔn kan jí.

Alɔ tɛ́ xɔ́ntɔn yětɔn e ɖo agun ɔ mɛ lɛ́ é ka dó yě? Ðo kplé ɖokpó ɖokpó gúdo ɔ, mɛ e ɖo kpléxɔ Axɔ́súɖuto ɔ tɔn mɛ é ɖé lɛ́ nɔ tɛ́n kpɔ́n bo  nɔ ɖɔ xó xá David kpó Lidia kpó gbɔn kan nu. Gɔ́ ná ɔ, ényí David kpó Lidia kpó ná xósin ɔ, nǔɖitɔ́ hǎtɔ́ yětɔn lɛ́ nɔ wlán nǔ sɛ́dó yě dó dó wǔsyɛ́n lanmɛ nú yě ɖo nukɔnmɛ. Étɛ́ mɛ é ka tɔ́n kɔ dó? David kpó Lidia kpó sɔ́ nɔ mɔ ɖɔ émí ɖo émíɖokpó dín ǎ.

A sixú bló tito bo ná nɔ ɖɔ mawuxó xá mɛ ɖěɖěe ma sixú nɔ gosín xwégbe ǎ lɛ́ é. Kpó hǔzúhúzú kléwún ɖé lɛ́ kpó ɔ, mǐ sixú xlɛ́ ɖɔ mǐ kún wɔn mɛ ɖěɖěe ɖo xwi ɖí xá dogbó mɔ̌hun lɛ́ wɛ é ó. (Nǔx. 3:27) Étɛ́wú a ma ka ná bló tuto bo zán hwenu ɖé lɛ́ ɖó kpɔ́ xá yě bɔ mi ná ɖɔ mawuxó gbɔn wěmasɛ́dómɛ gblamɛ, alǒ gbɔn alǒkan jí ǎ? Mɛ ɖěɖěe ma sixú nɔ kpé wú bo nɔ gosín xwégbe ǎ lɛ́ é sixú nɔ wá kplé kúnnuɖegbé tɔn lɛ́ domɛ gbɔn kan nu. Tuto énɛ́ su David kpó Lidia kpó nukúnmɛ tawun. David tínmɛ ɖɔ: “Kplékplé ɖó kpɔ́ kpowun xá nɔví súnnu lɛ́ kpó nɔví nyɔ̌nu lɛ́ kpó nú xóɖɔɖókpɔ́ kléwún ɖé kpó ɖɛ kpó dó wǔsyɛ́n lanmɛ nú mǐ tawun.” Gɔ́ ná ɔ, ényí ninɔmɛ lɛ́ yí gbe ná bɔ è ná nɔ ayijayǐ mɛ, b’ɛ lɛ́ jɛxá ɖɔ è ní wa mɔ̌ ɔ, a ka ná sixú bló tuto bo kplá Biblu kplɔ́ntɔ́ ɖé yi wɛnjlátɔ́ e ma sixú nɔ gosín xwégbe ǎ é ɖé xwé bɔ mi ná nɔ kplɔ́n nǔ sín hweɖénu jɛ hweɖénu a?

Ényí mǐ wa azɔ̌ ɖó kpɔ́ xá nɔví súnnu kpó nɔví nyɔ̌nu kpó mǐtɔn e ma sixú nɔ tɔ́n sín xwégbe ǎ lɛ́ é bo mɔ jijɔ ɖagbe yětɔn lɛ́ ɔ, mǐ ná vɛ́ xá yě d’é jí. Ði kpɔ́ndéwú ɔ, ényí a wa azɔ̌ ɖó kpɔ́ xá wɛnjlátɔ́ mɔ̌hun lɛ́ ɖo sinsɛnzɔ́ ɔ mɛ, bo mɔ lěe yě zán Xó Mawu tɔn kpó azɔ̌tuuntuun kpó b’ɛ byɔ́ ayi mɛ nú mɛɖé gbɔn é ɔ, vɛ̌ e a vɛ́ xá yě é tlɛ ná ɖibla jɛjí. Ényí a nɔ nɔ gǔdo nú nǔɖitɔ́ hǎtɔ́ towe lɛ́ ɖo azɔ̌ gbigbɔ tɔn lɛ́ kɔn ɔ, a sixú lɛ́ zun xɔ́ntɔn ɖěvo lɛ́.—2 Kɔ. 6:13.

Pɔ́lu mɔ gbɔdónúmɛ ɖo kpɔ́ e xɔ́ntɔn tɔn Titu nɔ xá ɛ é kpáxwé. (2 Kɔ. 7:5-7) Tan énɛ́ flín mǐ ɖɔ é kún nyí xó ɖiɖɔ kpó wǔvɛ́sexámɛ kpó nú mɛ e ɖo hudó mɛ lɛ́ é kɛ́ɖɛ́ wɛ sixú dó gbɔ nú yě ó, loɔ, kpɔ́ninɔ xá yě kpó nǔ e wú mǐ kpé é wiwa bá nɔ gǔdo nú yě kpó lɔ sixú dó gbɔ nú yě.—1 Jaan 3:18.

Nɔví súnnu kpó nɔví nyɔ̌nu kpó mǐtɔn e ɖo Russie lɛ́ é sɔ́ kpɔ́ndéwú ɖagbe ɖé ɖ’ayǐ ɖo gǔdo ninɔ nú yěɖée lɛ́ kpáxwé. Ð’ayi nǔ e jɛ dó Sergey kpó asi tɔn Tatyana kpó jí é wú. Ée kponɔ lɛ́ kíjé xwé yětɔn gúdo é ɔ, è kplá yě bo ná yi kan nǔ byɔ́ yě. Tatyana wɛ è jó b’ɛ wá yi xwé jɛ nukɔn. Sergey ɖɔ: “Ée [Tatyana] wá yi xwégbe tlóló é ɔ, nɔví nyɔ̌nu akɔ́nkpantɔ́ ɖé wá ba ɛ kpɔ́n. Xɔ́ntɔn mǐtɔn gěgé wá bo wá d’alɔ bɔ è vɔ́ nǔ lɛ́ to ɖo xɔ mǐtɔn mɛ.”

Sergey ɖɔ gɔ́ ná ɖɔ: “Hwebǐnu wɛ un yí wǎn nú Nǔnywɛ́xó 17:17, éé ɖɔ xó élɔ́ é: ‘Xɔ́ntɔn jɔ xɔ́ntɔn nɔ ɖe wǎnyíyí xlɛ́ hwebǐnu, bo nyí nɔví e è nɔ mɔ ɖo awěxomɛzángbe é.’ Xó énɛ́ lɛ́ lɛ́vɔ́ wá xɔ akwɛ́ nú mì hú gǎn ɖo yadónúmɛ hwenu énɛ́ e un ma sixú kpé wú bo ɖí xwi xá nǔ lɛ́ nyiɖokpó ǎ é. Jexóva ná mì xɔ́ntɔn ɖěɖěe nɔ gǔdo nú mì ma ɖi xɛsi lɛ́ é.” a

Ée mǐ ná ɖo ninɔmɛ e tlɛ syɛ́n hú gǎn lɛ́ é mɛ gbɔn wɛ é ɔ, é ná byɔ́ ɖɔ mǐ ní ɖeji dó xɔ́ntɔn lɛ́ wú. Mǐ tlɛ ná lɛ́ ɖó hudó yětɔn hú gǎn ɖo wǔvɛ́ ɖaxó ɔ hwenu. Énɛ́ wú ɔ, mi nú mǐ ní dó gǎn e wú mǐ kpé é bǐ bá nyí xɔ́ntɔn jɔ xɔ́ntɔn din!—1 Pi. 4:7, 8.