A KA ɖ’ayi wú ɖɔ mɛ e ɖo gbɛ ɔ mɛ lɛ́ é gěgé nɔ lin ɖɔ émí jɛxá wǔjɔmɛ bǔnɔ lɛ́, acɛ bǔnɔ lɛ́, alǒ é jɛxá ɖɔ è ní wa nǔ xá émí ɖo ali bǔnɔ nu a? Yě ná bo ko ɖó nǔ gbɔn ɖěbǔ ɔ, yě nɔ lin ɖɔ émí lɛ́ jɛxá hú mɔ̌. Cejɛ́nnábínɔ wɛ gbɛtɔ́ e nɔ lin nǔ gbɔn mɔ̌ lɛ́ é nyí, bɔ nǔ e yě ɖó lɛ́ é nɔ su nukún yětɔn mɛ ǎ. Lěe Biblu ɖɔ mɛ lɛ́ ná cí ɖo azǎn gǔdo gúdo tɔn lɛ́ mɛ é nɛ́.—2 Tim. 3:2.

É ɖo wɛn ɖɔ, cejɛ́nnábí kún nyí nǔ yɔ̌yɔ́ ó. Adámu kpó Ɛvu kpó wá gbeta nǔ e nyí nǔ ɖagbe é kpó nǔ e nyí nǔ nyanya é kpó tɔn kɔn nú yěɖée, bɔ mǐ bǐ nɔ se wǔvɛ́ ɖó gbeta e kɔn yě wá é wú. Xwe kanweko mɔ̌kpán gúdo ɔ, Judáa xɔ́sú Oziyási lin ɖɔ émí jɛxá bo ná xwlé zǎlínkpɔ́n ɖo tɛ́npli mɛ, amɔ̌, nǔ nyanya ɖésú wɛ nyí énɛ́ bɔ é lin. (2 Tan 26:18, 19) Mɔ̌ ɖokpó ɔ, Falizyɛn lɛ́ kpó Saduseɛn lɛ́ kpó lin ɖɔ émí jɛxá fɛ́nú bǔnɔ Mawu tɔn, ɖó yě nyí kúnkan Ablaxámu tɔn kpowun wútu.—Mat. 3:9.

Gbɛtɔ́ cejɛ́nnábínɔ lɛ́ tɛ́ntin wɛ mǐ ɖe, bɔ nǔwalɔ yětɔn sixú vun blá mǐ. (Ga. 5:26) Mǐ sixú jɛ linlin jí ɖɔ mǐ jɛxá wǔjɔmɛ bǔnɔ ɖé, alǒ é jɛxá ɖɔ è ní wa nǔ xá mǐ ɖo ali bǔnɔ ɖé nu. Nɛ̌ mǐ ka sixú nyi alɔ nú nǔ lin gbɔn mɔ̌ gbɔn? Jɛ nukɔn hwɛ̌ ɔ, mǐ ɖó ná tuun linlin Jexóva tɔn dó xó ɔ wú. Nǔgbódodó Biblu tɔn we ná d’alɔ mǐ.

Jexóva wɛ nyí mɛ e nɔ wá gbeta nǔ e jɛxá mǐ é tɔn kɔn é. Kpɔ́ndéwú ɖé lɛ́ ɖíe.

• Ðo xwédo mɛ ɔ, asú ɖé ɖó ná mɔ ɖɔ asi émítɔn nɔ ɖó sísí nú émí, bɔ asi ɔ ɖó ná mɔ  ɖɔ asú émítɔn yí wǎn nú émí. (Efɛ́. 5:33) Mɛ e è da é kɛ́ɖɛ́ wɛ è ɖó ná ɖe wǎnyíyí e nɔ nɔ asú kpó asi kpó tɛ́ntin é xlɛ́. (1 Kɔ. 7:3) Acɛ mɛjitɔ́ lɛ́ tɔn wɛ é nyí ɖɔ yě ní ɖó nukún ɖɔ vǐ yětɔn lɛ́ ní se tónú nú yě, bɔ é sɔgbe ɖɔ vǐ lɛ́ ní ɖó nukún ɖɔ nǔ émítɔn ní nɔ ɖu ayi mɛ nú mɛjitɔ́ émítɔn lɛ́, bo nɔ lɛ́ xlɛ́ ɖɔ émí yí wǎn nú émí.—2 Kɔ. 12:14; Efɛ́. 6:2.

• Ðo agun ɔ mɛ ɔ, é jɛxá ɖɔ mǐ ní ɖó sísí nú mɛxó agun tɔn azɔ̌syɛ́nsyɛ́nwatɔ́ lɛ́. (1 Tɛ. 5:12) É ɖo mɔ̌ có, yě ɖó acɛ bo ná kpa acɛ dó nɔví súnnu kpó nɔví nyɔ̌nu kpó yětɔn lɛ́ jí ǎ.—1 Pi. 5:2, 3.

• Mawu ná acɛ acɛkpikpa lɛ́ bɔ yě ná byɔ́ takwɛ́ ɖo toví yětɔn lɛ́ sí; gɔ́ ná ɔ, toví lɛ́ ɖó ná nɔ lɛ́ wlí yɛ̌yi nú yě.—Hlɔ̌. 13:1, 6, 7.

Jexóva nɔ ná nǔ mǐ kpó wǎnyíyí kpó hú nǔ e mǐ jɛxá é flaflá tɔn. Ðó mǐ nyí gbɛtɔ́ hwɛhutɔ́ wútu ɔ, kú kɛ́ɖɛ́ wɛ mǐ jɛxá. (Hlɔ̌. 6:23) É ɖo mɔ̌ có, Jexóva nyɔ́ xomɛ dó mǐ wú, bo kɔn nyɔ̌ná gěgé dó mǐ jí. (Ðɛh. 103:10, 11) Nyɔ̌ná ɖěbǔ, alǒ wǔjɔmɛ ɖěbǔ e mǐ mɔ sín gɔ̌n tɔn é ɔ, xomɛnyínyɔ́ tɔn e mǐ ma jɛxá ǎ é wú wɛ.—Hlɔ̌. 12:6-8; Efɛ́. 2:8.

Cɔ́ hwiɖée dó linlin gbɛ ɔ tɔn wú. Mǐ sixú jɛ linlin jí ɖɔ mǐ jɛxá nǔɖé lɛ́ hú mɛ ɖěvo lɛ́, bo ka ná ko tuun lɔ ǎ. Jezu zán nǔjlɛ́dónǔwú azɔ̌watɔ́ e è sú deníye ɖokpó ɖokpó lɛ́ é tɔn, dó xlɛ́ lěe linlin mɔ̌hun sixú yá wǔ wá xwetɔ́n gbɔn é. Azɔ̌watɔ́ ɖé lɛ́ bɛ́ azɔ̌ zǎnzǎn tɛɛn, bo wa azɔ̌ ɖo kéze ɔ bǐ mɛ ɖo hwesivɔ́ syɛ́nsyɛ́n nu; mɛ ɖěvo lɛ́ ka wa azɔ̌ nú ganxixo ɖokpó kpowun. Mɛ e bɛ́ azɔ̌ zǎnzǎn tɛɛn lɛ́ é lin ɖɔ émí jɛxá azɔ̌kwɛ́ e tlí hú gǎn é, ɖó azɔ̌ e yě wa é wú. (Mat. 20:1-16) Jezu tínmɛ nǔjlɛ́dónǔwú énɛ́, bo xlɛ́ ahwanvú tɔn lɛ́ ɖɔ nǔ e jló Mawu bɔ é ná yě é ɖó ná kpé yě.

Nǔ ní nɔ su nukún towe mɛ, bónú a ní ma nɔ ɖó nukún nǔ ɖo mɛ ɖěvo lɛ́ sí ó. (1 Tɛ. 5:18) Wa nǔ mɛsɛ́dó Pɔ́lu ɖɔhun; é tlɛ ɖó acɛ bo ná byɔ́ nɔví e ɖo Kɔlɛ́nti lɛ́ é ɖɔ yě ní nɔ gǔdo nú émí ɖo agbaza lixo có, é ka wa mɔ̌ ǎ. (1 Kɔ. 9:11-14) Nyɔ̌ná ɖěbǔ e mǐ mɔ é ɖó ná su nukún mǐtɔn mɛ, bɔ mǐ ɖó ná nyi alɔ nú nǔ ɖíɖó nukún ɖo mɛ ɖěvo lɛ́ sí.

Nɔ sɔ́ hwiɖée hwe. Ényí mɛɖé nɔ sɔ́ ayi ɖó éɖée jí zɛ xwé wú ɔ, hwɛhwɛ ɔ, é nɔ jɛ mimɔ jí  ɖɔ émí jɛxá nǔ hú ée émí ɖó ó. Flíjɛ linlin baɖabaɖa mɔ̌hun tɔn wɛ mɛɖéesɔ́hwe nyí.

Gbeyíɖɔ Daniyɛ́li sɔ́ kpɔ́ndéwú ɖagbe ɖé ɖ’ayǐ ɖo mɛɖéesɔ́hwe kpáxwé. Xwédo e mɛ é gosín é, ɖɛkpɛ tɔn, bǐbí tɔn kpó nǔwúkpíkpé tɔn lɛ́ kpó sixú ko zɔ́n bɔ é ná lin ɖɔ é jɛxá ɖɔ è ní wa nǔ xá émí ɖo ali bǔnɔ nu, bo lɛ́ zé wǔjɔmɛzɔ́ bǔnɔ lɛ́ d’así nú émí. (Dan. 1:3, 4, 19, 20) Nǔ ɖo mɔ̌ có, Daniyɛ́li nɔ sɔ́ éɖée hwe, bɔ jijɔ énɛ́ zɔ́n bɔ é xɔ akwɛ́ ɖo Jexóva nukúnmɛ.—Dan. 2:30; 10:11, 12.

Mi nú mǐ ní nyi alɔ nú gbigbɔ cejɛ́nnábí tɔn e gba kpé tawun ɖo gbɛ ɔ mɛ ɖo égbé é. Mi nú nyɔ̌ná ɖěbǔ e Jexóva gbɔn xomɛnyínyɔ́ tɔn e mǐ ma jɛxá ǎ é gblamɛ, bo ná mǐ é ní kpo ɖo awǎjijɛ dó nú mǐ wɛ.