Sinsɛnví Katolíka tɔn akowunká lɛ́ wɛ papá kpó mamáa kpó nyí. Amɔ̌, ée yě kplɔ́n ɖo Biblu mɛ ɖɔ nyǐkɔ Mawu tɔn nɔ nyí Jexóva é ɔ, yě húzú Kúnnuɖetɔ́ Jexóva tɔn kanɖódónǔwútɔ́ lɛ́. Papá sɔ́ nɔ bló ɖiɖe Jezu tɔn ɖě ǎ. É nyɔ́ wa ɔ, é zán nǔwúkpíkpé e é ɖó ɖo xwlɛkpikpa linu é dó jlá xɔ mǐtɔn e ɖo do é ɖó b’ɛ húzú kpléxɔ Axɔ́súɖuto ɔ tɔn nukɔntɔn ɔ ɖo San Juan del Monte. Xá Manila e nyí azinkan Philippines tɔn é tɔn ɖé wɛ.

Ée è ji mì ɖo 1952 gúdo é ɔ, mɛjitɔ́ ce lɛ́ jɛ nǔ kplɔ́n mì dó Jexóva wú jí lěe yě kplɔ́n fofó ce ɛnɛ lɛ́ kpó dadá ce atɔn lɛ́ kpó gbɔn é. Ée un ɖo susu wɛ é ɔ, papá ce dó wǔsyɛ́n lanmɛ nú mì ɖɔ nyi ní nɔ xa wěmata Biblu tɔn ɖokpó gbe ɖokpó, bo kplɔ́n wěma tutoblónúnǔ ɔ tɔn gěgé xá mì. Hweɖélɛ́nu ɔ, mɛjitɔ́ ce lɛ́ nɔ byɔ́ nukúnkpénǔwútɔ́ tomɛyitɔ́ lɛ́ kpó afɔsɔ́ɖótetɔ́ alaxɔ tɔn lɛ́ kpó ɖɔ yě ní wá nɔ xwé mǐtɔn gbe. Nǔ e nɔví énɛ́ lɛ́ mɔ kpɔ́n bo má xá mǐ lɛ́ é dó awǎjijɛ nú mǐ tawun, bo lɛ́ dó wǔsyɛ́n lanmɛ nú mǐ ɖésú, bo sísɛ́ mǐ mɛ bǐ, bɔ mǐ sɔ́ sinsɛnzɔ́ ɔ ɖó tɛn nukɔntɔn ɔ mɛ ɖo gbɛzán mǐtɔn mɛ.

Mɛjitɔ́ ce lɛ́ jó nǔɖiɖi sín gǔ ɖé dó nú mì. Ée nɔ vívɛ́ ce kú ɖó azɔn ɖé wú gúdo é ɔ, nyi kpó papá ce kpó bɛ́ gběxosín-alijítɔ́zɔ́ ɖó kpɔ́ ɖo 1971. Amɔ̌, énɛ́ gúdo ɖo 1973 hwenu e un ɖo xwe 20 ɖó wɛ é ɔ, tɔ́ ce kú. Kú e mɛjitɔ́ ce lɛ́ kú é kú wǔ nú mǐ tawun bɔ un mɔ ɖɔ un zun nyiɖokpó. Amɔ̌, nukúnɖíɖó e “ɖó jiɖe bo lɛ́ lí dǒ” bɔ Biblu ná mɛ é d’alɔ mì bɔ un kpo ɖo linlin ɖagbe ɖó wɛ, bo ɖó linkpɔ́n zɛ xwé wú ǎ, bo lɛ́ kpo ɖo vǐvɛ́ xá Jexóva wɛ. (Ebl. 6:19) Ée tɔ́ ce kú bɔ é ná nɔ zaan é ɔ, un yí gbe bo ná nyí gběxosín-alijítɔ́ titewungbe ɖo tɔtɛ́ntinto Coron tɔn e jɛ zɔ é ɖé mɛ, ɖo tokpɔn Palawan tɔn mɛ.

Xwe 21 wɛ un ɖó hwenu e un wá Coron é. Ðó toxo hun nukún mɛ wɛ un su ɖe wútu ɔ, é kpácá mì ɖɔ lɛtlíki, sin zinzin alǒ zokɛkɛ́ kpó mɔ̌to  kpó káká ɖé kún ɖo tɔtɛ́ntinto ɖé mɛ ó. Nǔgbó wɛ ɖɔ nɔví kwínwe ɖé ɖo fínɛ́, amɔ̌, un ɖó gběxosín-alijítɔ́ hǎtɔ́ ɖě ǎ, bɔ hweɖélɛ́nu ɔ, un ɖó ná ɖɔ mawuxó nyiɖokpó. Ðo sun nukɔntɔn ɔ mɛ ɔ, un jɛ xwédo ce kpó xɔ́ntɔn ce lɛ́ kpó sín do tawun. Zǎnmɛ ɔ, un nɔ bɔ nukún nyi sunví e ɖo jǐxwé lɛ́ é wú bo nɔ ɖo kpínkpɔ́n wɛ, bɔ ɖasin nɔ ɖo sisa sín nukún ce lɛ́ jí wɛ. Azɔ̌ ce jíjódó bo lɛ́ kɔ yi xwé jɛ́n nɔ jló mì.

Ðo hwe énɛ́ lɛ́ e nu un nɔ mɔ ɖɔ un ɖo nyiɖokpó é ɔ, un nɔ hun ayi ce nú Jexóva. Un nɔ flín linlin wǔsyɛ́n dó lanmɛ nú mɛ tɔn ɖěɖěe un xa ɖo Biblu kpó wěma mǐtɔn lɛ́ kpó mɛ lɛ́ é. Ðɛhan 19:15 wɛ nɔ wá ayi ce mɛ hwɛhwɛ. Un ɖ’ayi wú ɖɔ Jexóva ná nyí “sósyɛ́n ce, bo nyí mɛhwlɛ́ngántɔ́ ce,” ényí un nɔ lin tamɛ dó nǔ ɖěɖěe nɔ nyɔ́ nukún tɔn mɛ, ɖi nǔ ɖěɖěe é wa lɛ́ é kpó jijɔ tɔn lɛ́ kpó jí ɔ nɛ́. Xóta Atɔxwɛ tɔn e nyí “Vous n’etes jamais seuls” a é d’alɔ mì tawun. Un xa azɔn mɔ̌kpán. Ðo ali ɖé nu ɔ, nyi kpó Jexóva kpó kɛ́ɖɛ́ wɛ ɖo kpɔ́ ɖo hwe mɔ̌hun lɛ́ nu, bɔ énɛ́ hun ali ɖaaɖagbe lɛ́ nú mì bɔ un nɔ xo ɖɛ, kplɔ́n nǔ, bo nɔ lɛ́ lin tamɛ.

Un wá Coron é ɔ, é lín káká ɖé có è sɔ́ mì mɛxó agun tɔn ǎ. Ðó nyiɖokpónɔ wɛ nyí mɛxó agun tɔn wútu ɔ, un jɛ nukún kpé dó kplé élɔ́ lɛ́ e è nɔ bló ɖo aklúnɔzángbla ɔ mɛ é wú jí: Wěmaxɔmɛ sinsɛnzɔ́ Axɔ́súɖuto ɔ tɔn, kplé sinsɛnzɔ́ tɔn, Oplọn Agunwe kpó Atɔxwɛ kplɔ́nkplɔ́n kpó. Un nɔ lɛ́ xwlé xóɖiɖɔ nú mɛ bǐ mɛ ɖo aklúnɔzángbla lɛ́ bǐ mɛ. Un sɔ́ wá ɖó hwenu ɖě bo ná mɔ ɖɔ un ɖo nyiɖokpó ǎ!

Un ɖu vǐví sinsɛnzɔ́ e ná sínsɛ́n é tɔn ɖo Coron, énɛ́ wɛ nyí ɖɔ Biblu kplɔ́ntɔ́ ce ɖé lɛ́ wá bló batɛ́mu. Amɔ̌, un lɛ́ mɔ wǔvɛ́ ɖé lɛ́. Hweɖélɛ́nu ɔ, un nɔ zun zɔnlin nú kéze ɔ sín vlɔ̌ɖówe cóbó nɔ yi fí e ná jlá mawuxó ɖe wɛ un ɖe é, bɔ ényí un ka jɛ dɔ̌n ɔ, un nɔ tuun fí e ná dɔ́ wɛ un ɖe é ǎ. Tɔtɛ́ntinto kpɛví kpɛví gěgé lɛ́ ɖo fí e agun ɔ nɔ ɖɔ mawuxó gbɔn lɛ́ é. Hwɛhwɛ ɔ, un nɔ dó batóo gbɔn xu e ɖo adǎn jí lɛ́ é jí bo nɔ yi yě gɔ́n, un ka tlɛ tuun lěe è nɔ lin tɔ gbɔn é ǎ. Ðo hwenu vɛ́ wǔ énɛ́ lɛ́ bǐ mɛ ɔ, Jexóva nya xɛ ɖo jǐ ce, bo lɛ́ kpé nukún dó wǔ ce. Nukɔnmɛ ɔ, un wá ɖ’ayi wú ɖɔ nǔ sɔ́ nú mì wɛ Jexóva ɖe nú tagba e ná syɛ́n hú gǎn ɖo azɔ̌ e ná wá sɔ́ d’así nú mì wɛ è ɖe é mɛ lɛ́ é.

Ðo 1978 ɔ, è sɛ́ mì dó Papouasie-Nouvelle-Guinée ɖo totaligbé Australie tɔn. Sókanmɛto ɖé wɛ Papouasie-Nouvelle-Guinée nyí, bo ɖibla kló sɔ Espagne. É jí wǔ nú mì ɖɔ mɛ lǐvi atɔn mɔ̌ e ɖo to ɔ mɛ lɛ́ é nɔ dó gbe 800 jɛjí. É nyɔ́ tawun ɖɔ gěgé mɛ lɛ́ tɔn sixú dó Pidgin Mélanésien ée è nɔ ylɔ́ ɖɔ Tok Pisin ɖo kpaa mɛ é.

È sɛ́ mì dó agun e nɔ dó Glɛ̌nsigbe bo ɖo azinkan to ɔ tɔn e nɔ nyí Port Moresby é mɛ nú hwenu ɖé. Amɔ̌, énɛ́ gúdo ɔ, un jɛ agun e nɔ dó Tok Pisin é mɛ bo nɔ yi klási nyɔ̌wlán nyɔ̌xa tɔn yětɔn. Un nɔ zán nǔ e kplɔ́n wɛ un ɖe ɖo klási ɔ lɛ́ é ɖo sinsɛnzɔ́ ɔ mɛ. Énɛ́ d’alɔ mì bɔ un yá wǔ kplɔ́n gbe ɔ hú gǎn. É sɔ́ lín ǎ bɔ un kpé wú bo xwlé xóɖiɖɔ nú mɛ bǐ ɖé mɛ dó Tok Pisin mɛ. Ée un wá Papouasie-Nouvelle-Guinée é ɔ, é kpé xwe ɖokpó ǎ, bɔ ajijimɛ kpowun ɔ, è sɔ́ azɔ̌ d’así nú mì bɔ un ná wa nukúnkpénǔwútɔ́ lɛ̌dó tɔn sín azɔ̌ ɖo agun e nɔ dó Tok Pisin lɛ́ é mɛ ɖo tokpɔn ɖaxó gěgé mɛ.

Ðó agun lɛ́ ɖě lín dó ɖě tawun wútu ɔ, un ɖó ná bló tuto kpléɖókpɔ́ lɛ̌dó tɔn gěgé tɔn, bo ná lɛ́ bló mɛbakpɔ́n gěgé. Ðo bǐbɛ́mɛ ɔ, un mɔ ɖɔ  un zun nyiɖokpó ɖó nǔ élɔ́ lɛ́ bǐ wɛ nyí nǔ yɔ̌yɔ́ nú mì: To yɔ̌yɔ́, gbe yɔ̌yɔ́ kpó nǔwalɔ yɔ̌yɔ́ lɛ́ kpó. Un nɔ sixú gbɔn ali jí sín agun ɖé mɛ jɛ ɖěvo mɛ ǎ, ɖó sókan lɛ́ kpó awǐnnya kajǎ lɛ́ kpó wútu. Énɛ́ wú ɔ, ɖibla nyí aklúnɔzángbla lɛ́ bǐ mɛ wɛ un nɔ dó jɔmɛhún. Hweɖélɛ́nu ɔ, nyiɖokpó wɛ nɔ dó jɔmɛhún kpɛví e nǔ gbɛ́ dó tawun é. Tomɛyiyi énɛ́ lɛ́ nɔ ɖó linkpɔ́n nú mì lěe batóo dídó nɔ ɖó nú mì gbɔn é.

Mɛ nabí ɖé ɖó alǒkan ǎ, énɛ́ wú ɔ, wěmasɛ́dómɛ gblamɛ wɛ un nɔ ɖɔ xó xá agun lɛ́ gbɔn. Hwɛhwɛ ɔ, un nɔ ko yi jɛ nukɔn nú wěmasɛ́dómɛ ce lɛ́, bo ɖó ná kan fí e Kúnnuɖetɔ́ lɛ́ ɖe lɛ́ é byɔ́ ayǐ ɔ jí nu lɛ́. Amɔ̌, ényí un mɔ nɔví lɛ́ hweɖébǔnu ɔ, yě nɔ yí mì kpó nǔsumɛnukúnmɛ kpó, bɔ énɛ́ nɔ flín mì nǔ e wú un ɖo gǎn énɛ́ lɛ́ bǐ dó wɛ é. Jexóva nɔ gǔdo nú mì ɖo ali gěgé nu, bɔ énɛ́ zɔ́n bɔ xɔ́ntɔn e un zun xá ɛ é lɛ́ lí dǒ tawun.

Azɔn nukɔntɔn e un bló kplé ɖo tɔtɛ́ntinto e nɔ nyí Bougainville é mɛ é ɔ, asú kpó asi kpó ɖé sɛkpɔ́ mì, bo ɖo nǔ ko wɛ, bo kanbyɔ́ mì ɖɔ: “A ka flín mǐ din a?” Un flín ɖɔ un ɖɔ mawuxó nú asú kpó asi kpó énɛ́ hwenu e un wá Port Moresby azɔn nukɔntɔn é. Un bɛ́ Biblu kplɔ́nkplɔ́n xá yě, cóbó wá sɔ́ yě jó nú nɔví súnnu xá ɔ mɛ tɔn ɖé. Yě mɛ we lɛ́ bǐ wɛ ko bló batɛ́mu din! Nyɔ̌ná tootóbú e un mɔ ɖo xwe atɔn e un bló ɖo Papouasie-Nouvelle-Guinée mɛ lɛ́ é ɖokpó nɛ́.

Cóbónú un ná gosín Coron ɖo 1978 ɔ, un xo go nɔví nyɔ̌nu ɖɛkpɛ ɖɛkpɛ e nɔ sɔ́ éɖée dó sá vɔ̌ dó mɛ ɖěvo lɛ́ tamɛ é ɖé, bɔ è nɔ ylɔ́ ɛ ɖɔ Adel. Gběxosín-alijítɔ́ hwebǐnu tɔn wɛ n’i, b’ɛ ka lɛ́ ɖo nukún kpé dó vǐ we wú wɛ, Samuel kpó Shirley kpó. Ðo hwe ɖokpó ɔ nu ɔ, é nɔ lɛ́ kpé nukún dó nɔ tɔn e ko nyí mɛxómɔ é wú. Ðo mai 1981 ɔ, un lɛ́ kɔ yi Philippines bo ná wlí alɔ xá Adel. Ée mǐ wlí alɔ gúdo é ɔ, mǐ nɔ wa gběxosín-alijítɔ́ hwebǐnu tɔn sín azɔ̌, bo nɔ lɛ́ kpé nukún dó xwédo ɔ wú ɖó kpɔ́.

Un ɖó xwédo có, ɖo 1983 ɔ, è lɛ́ sɔ́ mì gběxosín-alijítɔ́ titewungbe, bo sɛ́ mì dó tɔtɛ́ntinto Linapacan tɔn mɛ, ɖo tokpɔn Palawan tɔn mɛ. Xwédo ɔ blěbú sɛ tɛn yi jɛ xá énɛ́ e mɛ Kúnnuɖetɔ́ ɖěbǔ ma ɖe ǎ é mɛ. Xwe ɖokpó mɔ̌ gúdo ɔ, Adel sín nɔ kú. É ɖo mɔ̌ có, mǐ kpo ɖo alɔnu mǐtɔn hɛn ján wɛ ɖo sinsɛnzɔ́ ɔ mɛ, bɔ énɛ́ d’alɔ mǐ bɔ mǐ dɛ ɖo aluwɛ mǐtɔn nu. Mǐ bɛ́ Biblu kplɔ́nkplɔ́n e ɖo nukɔn yi wɛ é gěgé ɖo Linapacan, b’ɛ sɔ́ lín ǎ bɔ mǐ ɖó kpléxɔ Axɔ́súɖuto ɔ tɔn kpɛví ɖé sín hudó. Énɛ́ wú ɔ, mǐɖésúnɔ gbá ɖokpó. Ée mǐ wá fínɛ́ b’ɛ bló xwe atɔn gúdo é ɔ, é víví nú mǐ ɖɔ mɛ 110 wá kú Klísu tɔn flínflín domɛ; mɛ énɛ́ lɛ́ gěgé yi nukɔn bo bló batɛ́mu ée mǐ gosín fínɛ́ gúdo é.

Ðo 1986 ɔ, è sɛ́ mì dó tɔtɛ́ntinto Culion tɔn mɛ, fí e mɛ e ɖo guduzɔn jɛ wɛ lɛ́ é sín gbɛ̌ta ɖé ɖe é. Énɛ́ gúdo ɔ, è sɔ́ Adel lɔmɔ̌, bɔ é húzú gběxosín-alijítɔ́ titewungbe. Ðo bǐbɛ́mɛ ɔ, ado hu mǐ dó mawuxó ɖiɖɔ nú gudunɔ lɛ́ wú. Amɔ̌, wɛnjlátɔ́ ayǐ ɔ jí nu lɛ́ ná mǐ gǎnjɛwú ɖɔ mɛ e ɖo azɔn mɔ̌hun jɛ wɛ lɛ́ é ɔ, è ɖo nukún kpé dó yě wú wɛ, b’ɛ kún ná bɔ wǔ mɔ̌ bɔ è ná sɔ́ azɔn ɔ ó. Azinzɔnnɔ énɛ́ lɛ́ ɖé lɛ́ nɔ wá kplé lɛ́ ɖo nɔví nyɔ̌nu ɖé xwé. É sɔ́ lín ǎ bɔ mǐ húzú sɔgbe xá ninɔmɛ ɔ, b’ɛ nyɔ́ tawun ɖɔ mǐ nɔ má nukúnɖíɖó jínjɔ́n Biblu jí mǐtɔn xá mɛ ɖěɖěe nɔ mɔ ɖɔ Mawu kpó gbɛtɔ́ lɛ́ kpó gbɛ́ émí lɛ́ é. Ényí  è mɔ mɛ ɖěɖěe ɖo azɔn syɛ́nsyɛ́n jɛ wɛ lɛ́ é, bɔ nukúnɖíɖó e yě ɖó ɖɔ gbe ɖokpó ɔ, émí ná ɖó lanmɛ syɛ́n hunsin ɖagbe é dó awǎjijɛ nú yě ɔ, é nɔ víví tawun.—Luk. 5:12, 13.

Nɛ̌ vǐ mǐtɔn lɛ́ ka húzú sɔgbe xá gbɛ ninɔ ɖo Culion gbɔn? Nyi kpó Adel kpó byɔ́ nɔví nyɔ̌nu wínnyáwínnyá we ɖɔ yě ní gosín Coron bo wá xo kpóɖó nú mǐ, énɛ́ ɔ, vǐ mǐtɔn lɛ́ sixú mɔ gbɛ̌ ɖagbe e yě ná dó lɛ́ é. Samuel, Shirley kpó nɔví nyɔ̌nu wínnyáwínnyá we énɛ́ lɛ́ kpó nɔ ɖu sinsɛnzɔ́ yěɖésúnɔ tɔn e ɖo sínsɛ́n ná wɛ é sín vǐví bo nɔ kplɔ́n nǔ xá vǐ gěgé, hwenu e nyi kpó Adel kpó nɔ ɖo nǔ kplɔ́n xá mɛjitɔ́ vǐ énɛ́ lɛ́ tɔn wɛ é. Nǔgbó ɔ, hweɖénu wá su bɔ xwédo e mǐ ɖo nǔ kplɔ́n xá wɛ lɛ́ é yi 11. É sɔ́ lín ǎ bɔ mǐ jɛ nǔ kplɔ́n xá mɛ gěgé jí, bɔ yě jɛ vǐvɛ́ xá Jexóva jí, lobɔ énɛ́ zɔ́n bɔ mǐ kpé wú bo ɖó agun yɔ̌yɔ́ ɖé ayǐ!

Ðo bǐbɛ́mɛ ɔ, nyiɖokpónɔ géé wɛ nyí mɛxó agun tɔn ɖo ayǐ ɔ jí. Énɛ́ wú ɔ, alaxɔ byɔ́ mì ɖɔ nyi ní nɔ kpé nukún dó kplé aklúnɔzángbla ɔ tɔn lɛ́ wú nú wɛnjlátɔ́ tántɔn e ɖo Culion lɛ́ é, bɔ énɛ́ gúdo ɔ, un ná wa nǔ ɖokpó ɔ nú wɛnjlátɔ́ tɛ́nnɛ e ɖo gletoxo e è nɔ ylɔ́ ɖɔ Marily, bɔ è dó batóo wɛ nyí ɔ, è ná bló ganxixo atɔn cóbó yi mɛ é. Ényí mǐ bló kplé lɛ́ ɖo fí énɛ́ lɛ́ gúdo ɔ, xwédo ɔ bǐ nɔ zun zɔnlin gbɔn sókan sín xá ɖé mɛ nú ganxixo mɔ̌kpán, bo nɔ yi kpé nukún dó Biblu kplɔ́nkplɔ́n lɛ́ wú ɖo gletoxo e è nɔ ylɔ́ ɖɔ Halsey é mɛ.

Wǎgbɔ tɔn ɔ, mɛ gěgé wá nǔgbó ɔ mɛ ɖo Marily kpó Halsey kpó, bɔ mǐ gbá kpléxɔ Axɔ́súɖuto ɔ tɔn lɛ́ ɖó fí we énɛ́ lɛ́ bǐ. Lěe é nyí gbɔn ɖo Linapacan é ɖɔhun ɔ, nɔví súnnu lɛ́ kpó jlǒɖótɔ́ lɛ́ kpó ná azɔ̌wanú lɛ́ gěgé, bo lɛ́ dó gǎn tawun. Kpléxɔ e ɖo Marily é hɛn ɔ, é ná hɛn mɛ 200, bɔ è hɛn ɔ, è ná lɛ́ gbló ada ná, b’ɛ nɔ hun ali nú mǐ bɔ mǐ nɔ bló kpléɖókpɔ́ lɛ̌dó tɔn lɛ́ ɖo fínɛ́.

Ðo 1993, hwenu e vǐ lɛ́ ko su gúdo é ɔ, nyi kpó Adel kpó lɛ́ bɛ́ lɛ̌dózɔ́ ɖo Philippines. Énɛ́ gúdo ɖo 2000 ɔ, un yi Wěmaxɔmɛ devízɔ́ kplɔ́nkplɔ́n tɔn, bónú è ná kplɔ́n mì lěe un ná nyí mɛ̌si ɖo wěmaxɔmɛ énɛ́ gbɔn é. Un nɔ mɔ ɖɔ un kún kpé nǔ wú bo ná wa azɔ̌ ɔ ó, amɔ̌, Adel nɔ dó wǔsyɛ́n lanmɛ nú mì hwebǐnu. É nɔ flín mì ɖɔ Jexóva ná ná mì hlɔ̌nhlɔ́n bɔ nyi ná wa azɔ̌ yɔ̌yɔ́ énɛ́. (Filí. 4:13) Nǔ e Adel mɔ kpɔ́n lɛ́ é wɛ zɔ́n bɔ é nɔ ɖɔ mɔ̌, ɖó é nɔ ɖo xwi ɖí xá lanmɛzɔn wɛ cóbó ka nɔ ɖo azɔ̌ tɔn wa wɛ.

 Ðo 2006 hwenu e un ɖo nǔkplɔ́nmɛtɔ́zɔ́ wa wɛ é ɔ, è mɔ kanmɛzɔn e è nɔ ylɔ́ ɖɔ Parkinson é nú Adel. É hɛn hǔn nú mǐ tawun! Hwenu e un ɖo linlin wɛ ɖɔ mǐ ná ɖó sinsɛnzɔ́ mǐtɔn te, bɔ un ná kpé nukún dó Adel wú é ɔ, é ɖɔ nú mì ɖɔ: “Kɛnklɛ́n ba dotóo e sixú d’alɔ mì ɖo lanmɛzɔn ce kɔn é nú mì, un tuun ɖɔ Jexóva ná d’alɔ mǐ bɔ mǐ ná kpo ɖ’é wú.” Ðo xwe ayizɛ́n e bɔ d’é wú lɛ́ é mɛ ɔ, Adel kpo ɖo sinsɛnzɔ́ wa nú Jexóva wɛ, ma sa xwexwe. Ée é ma sɔ́ sixú nɔ zun zɔnlin ǎ é ɔ, é nɔ jínjɔ́n afɔtɔ́nɔ lɛ́ sín kɛkɛ́ví tɔn mɛ bo nɔ ɖɔ mawuxó. Ée xó ɖiɖɔ zun kpɛtɛ n’i é ɔ, é nɔ zán xógó ɖokpó alǒ we dó ná xósin ɖo kplé lɛ́ jí. Káká jɛ hwenu e Adel kú ɖo 2013 é ɔ, hwɛhwɛ wɛ mɛ lɛ́ nɔ wlán nǔ sɛ́dó è dó ɖe nǔsumɛnukúnmɛ xlɛ́ ɖó kpɔ́ndéwú didɛ tɔn ɖaaɖagbe e é sɔ́ ɖ’ayǐ é wú. Xwe 30 jɛjí wɛ un zán ɖó kpɔ́ xá Adel, asi ce gbejínɔtɔ́ kpó wǎnyínámɔ kpó ɔ, énɛ́ wú ɔ, hwenu e é kú é ɔ, aluwɛ kpó mɛɖokpónɔ ninɔ kpó nɔ lɛ́ vun blá mì.

Adel ba ɖɔ má kpo ɖo sinsɛnzɔ́ ce wa wɛ, bɔ nǔ e un ka wa é nɛ́. Un hɛn alɔnu ce ján, bɔ énɛ́ d’alɔ mì bɔ un ɖí xwi xá mɛɖokpónɔ ninɔ. Sín 2014 jɛ 2017 ɔ, è sɔ́ azɔ̌ d’así nú mì bónú má yi ba agun ɖěɖěe nɔ dó Tagalog gbe bo ɖo to ɖěɖěe mɛ è ɖó dogbó nú azɔ̌ mǐtɔn ɖe lɛ́ é mɛ é kpɔ́n. Énɛ́ gúdo ɔ, un yi ba agun ɖěɖěe nɔ dó Tagalog gbe bo ɖo Taïwan, États-Unis kpó Canada kpó lɛ́ é kpɔ́n. Ðo 2019 ɔ, un kplɔ́n nǔ mɛ ɖo Wěmaxɔmɛ nú wɛnɖagbejlátɔ́ Axɔ́súɖuto ɔ tɔn lɛ́ dó Glɛ̌nsigbe mɛ ɖo Inde kpó Thaïlande kpó. Azɔ̌ énɛ́ lɛ́ bǐ d’awǎjijɛ nú mì tawun. Ényí un hɛn alɔnu ce ján bǐ mlɛ́mlɛ́ ɖo sinsɛnzɔ́ Jexóva tɔn mɛ ɔ, nǔ ɖě sɔ́ nɔ d’awǎjijɛ nú mì hú mɔ̌ ǎ.

Ényí è sɔ́ azɔ̌ yɔ̌yɔ́ ɖé d’así nú mì hweɖébǔnu ɔ, nɔví súnnu kpó nɔví nyɔ̌nu kpó e un xo go lɛ́ é kpó nyi kpó nɔ vɛ́ tawun, sɔmɔ̌ bɔ jǐjó yě dó nɔ zun kpɛtɛ nú mì. Ðo hwe mɔ̌hun lɛ́ nu ɔ, un kplɔ́n bo ɖeji dó Jexóva wú bǐ mlɛ́mlɛ́. Hwɛhwɛ wɛ un ɖu le gǔdo e é nɔ nú mì é tɔn, bɔ énɛ́ d’alɔ mì bɔ un nɔ yí gbe nú hǔzúhúzú ɖěbǔ e nɔ wá é kpó ayi bǐ kpó. Gběxosín-alijítɔ́ titewungbe wɛ un nyí din ɖo Philippines. Un vo ɖo agun ce yɔ̌yɔ́ ɔ mɛ; é nɔ nɔ gǔdo nú mì, bo nɔ lɛ́ kpé nukún dó wǔ ce xwédo ɖé ɖɔhun. Un nɔ lɛ́ gó, ɖó mɔ e un mɔ bɔ Samuel kpó Shirley kpó ɖo nɔ yětɔn sín nǔɖiɖi sín kpɔ́ndéwú xwedó wɛ é wú.—3 Jaan 4.

Nǔgbó ɔ, un mɔ mɛtɛ́nkpɔ́n gěgé ɖo gbɛzán ce mɛ, káká jɛ mɔ e un mɔ bɔ asivɛ́ ce se wǔvɛ́ bo kú ɖó azɔn baɖabaɖa ɖé wú é jí. É lɛ́ byɔ́ ɖɔ má húzú sɔgbe xá ninɔmɛ yɔ̌yɔ́ gěgé. É ɖo mɔ̌ có, un mɔ ɖɔ Jexóva kún “lín dó ɖokpó ɖokpó mǐtɔn” ó. (Mɛ. 17:27) È na bo tlɛ ɖo xá e jɛ zɔ lɛ́ é mɛ ɔ, alɔ Jexóva tɔn “hwegli” bónú é ná gɔn gǔdo nɔ nú mɛsɛntɔ́ tɔn lɛ́, bo lɛ́ gɔn hlɔ̌nhlɔ́n ná yě ǎ. (Eza. 59:1) Jexóva Só ce ɔ, nɔ gǔdo nú mì ɖo gbɛzán ce bǐ mɛ, b’ɛ nɛ́ nɔ su nukún ce mɛ tawun. Un nɔ nyiɖokpó gbeɖé ǎ.