1-2. Ninɔmɛ tɛ lɛ ka nɔ kpannukɔn mɛ gegě ɖò togun Jehovah tɔn mɛ? Nǔ tɛ lɛ enɛ ka sixu wà dó ye wu?

KPƆ́N ninɔmɛ atɔn elɔ lɛ: È mɔ azɔn baɖabaɖa ɖé nú nɔví sunnu winnyawinnya ɖé. Azɔ̌ gblé dó nɔví sunnu azɔ̌syɛnsyɛnwatɔ́ e ko ɖó xwè 50 jɛji é ɖé, b’ɛ wà nǔ e wu é kpé é bǐ bo ba azɔ̌ ɖevo có, é ka mɔ ǎ. Nɔví nyɔnu mɛxomɔ gbejinɔtɔ́ ɖé sɔ́ sixu nɔ wà nǔ gegě lee é ko nɔ wà gbɔn ɖ’ayǐ ɖò sinsɛnzɔ́ Jehovah tɔn mɛ é ǎ.

² Enyi ninɔmɛ e xó mǐ ɖɔ wá yì lɛ é ɖě mɛ wɛ a ɖè ɔ, a sixu mɔ ɖɔ emi kún sɔ́ hwɛ́n nǔɖe ó. Ninɔmɛ enɛ lɛ sixu xò awǎjijɛ towe yí, kɔ́n wi sín ta nú we, bo na lɛ́ ɖó dogbó nú kancica e ɖò hwi kpo mɛ ɖevo lɛ kpo tɛntin é.

3. Linlin tɛ Satáan kpo mɛ e nɔ wà nǔ éɖɔhun lɛ é kpo ka nɔ ɖó dó gbɛ̀ gbɛtɔ́ tɔn wu?

³ Gbɛ̀ elɔ nɔ ɖè linlin e Satáan nɔ ɖó dó gbɛ̀ wu é xlɛ́. Hwebǐnu wɛ Satáan nɔ wà nǔ xá gbɛtɔ́ lɛ cí nǔ ɖɔ ye kún xɔ akwɛ ó ɖɔhun. É xwlé mɛɖéekannuninɔ sín ali ɖé Ɛvu dó acɛ jí, é ka tuùn ganji ɖɔ kú wɛ tónúmase nú Mawu na dɔn wá. Satáan wɛ nɔ nɔ gudo nú tutoblonunu ajɔ̌wiwa, toxóɖiɖɔ kpo sinsɛn kpo tɔn gbɛ̀ elɔ tɔn lɛ hwebǐnu. Enɛ wu ɔ, é kpaca mǐ ǎ ɖɔ ajɔ̌tɔ́, toxóɖɔtɔ́ kpo nukɔntɔ́ sinsɛn tɔn kpo gegě nɔ ɖó sísí nú gbɛ̀ gbɛtɔ́ tɔn ǎ, bo nɔ lɛ́ kɔn wi gbɛtɔ́ tɔn.

4. Etɛ lɛ jí mǐ ka na ɖɔ xó dó ɖò xóta elɔ mɛ?

⁴ Ðò ali ɖevo nu ɔ, Jehovah nɔ jló ɖɔ mǐ ni nɔ ɖó linlin ɖagbe dó mǐɖée wu, bo nɔ lɛ́ nɔ gudo nú mǐ hwenu e mǐ ɖò  ninɔmɛ e sixu bló bɔ mǐ mɔ ɖɔ mǐ kún xɔ akwɛ ó lɛ é mɛ é. (Ðɛh. 136:23; Hlɔ. 12:3) Xóta elɔ na ɖɔ xó dó lee Jehovah nɔ d’alɔ mǐ ɖò ninɔmɛ elɔ lɛ mɛ gbɔn é jí: (1) Hwenu e mǐ ɖò azɔn jɛ wɛ é, (2) hwenu e mǐ ɖò akwɛyózó mɛ é, kpo (3) hwenu e mɛxoxwe zɔ́n bɔ mǐ mɔ ɖɔ mǐ kún sɔ́ ɖó nǔ xɔ akwɛ ɖě, bo na na Jehovah ɖò sinsɛnzɔ́ tɔn mɛ ó é kpo. Amɔ̌, mǐ ni tó ɖɔ xó dó nǔ e wu mǐ sixu ɖeji ɖɔ ɖokpo ɖokpo mǐtɔn xɔ akwɛ nú Jehovah é wu hwɛ̌.

5. Etɛ lɛ ka xlɛ́ we ɖɔ gbɛtɔ́ lɛ xɔ akwɛ nú Jehovah?

⁵ Kɔ́ wɛ è dó bló mǐ na có, mǐ ka xɔ akwɛ hugǎn kɔ́ alɔgogo ɖokpo flaflá tɔn. (Bǐb. 2:7) Kpɔ́n hwɛjijɔ e wu mǐ tuùn ɖɔ mǐ xɔ akwɛ nú Jehovah é ɖé lɛ. É ɖó gbɛtɔ́ lɛ kpo nǔwukpíkpé ɔ kpo bɔ ye na nɔ ɖè jijɔ tɔn lɛ xlɛ́. (Bǐb. 1:27) Mɔ̌ mɛ ɔ, é bló bɔ mǐ hugǎn nǔ ɖevo e é dá ɖò ayikúngban ɔ jí lɛ é bǐ, bo lɛ́ sɔ́ ayikúngban ɔ kpo kanlin lɛ kpo dó acɛ mǐtɔn mɛ.—Ðɛh. 8:5-9.

6. Hwɛjijɔ ɖevo tɛ wu mi ka tuùn ɖɔ gbɛtɔ́ hwɛhutɔ́ lɛ xɔ akwɛ nú Jehovah?

⁶ Adamu hu hwɛ gudo có, gbɛtɔ́ lɛ kpó ɖò akwɛ xɔ nú Jehovah wɛ. Mǐ xɔ akwɛ n’i sɔmɔ̌ bɔ é sɔ́ Vǐɖokponɔ tɔn Jezu jó, bɔ é xɔ gbɛ̀ nú mǐ. (1 Jaan 4:9, 10) Jehovah na wà nǔ sɔgbe xá lè gbɛxixɔ ɔ tɔn lɛ bo na fɔ́n mɛ e kú ɖó hwɛhuhu Adamu tɔn wu lɛ é; é na fɔ́n “mɛ ɖagbe lɛ, kpodo mɛ nyanya lɛ kpo.” (Mɛ. 24:15) Xó Tɔn xlɛ́ mǐ ɖɔ nú mǐ na bo tlɛ ɖò azɔn jɛ wɛ, nyí wamamɔnɔ, alǒ ko kpò ɔ, mǐ xɔ akwɛ n’i.—Mɛ. 10:34, 35.

7. Hwɛjijɔ ɖevo tɛ lɛ mɛsɛntɔ́ Mawu tɔn lɛ ka ɖó, bo nɔ ɖi ɖɔ emi xɔ akwɛ nú Jehovah?

⁷ Mǐ ɖó hwɛjijɔ ɖevo lɛ, bo na ɖi ɖɔ mǐ xɔ akwɛ nú Jehovah. É bló bɔ mǐ sɛkpɔ́ ɛ, bo lɛ́ ɖó ayi lee mǐ yí wɛnɖagbe ɔ gbɔn é wu. (Jaan 6:44) Enyi mǐ jɛ sisɛkpɔ́ Jehovah jí ɔ, é lɔ nɔ sɛkpɔ́ mǐ. (Ja. 4:8) Jehovah nɔ lɛ́ zán hwenu kpo hlɔnhlɔn kpo dó kplɔ́n nǔ mǐ, bo nɔ gbɔn mɔ̌ mɛ xlɛ́ ɖɔ mǐ xɔ akwɛ n’i. É tuùn mɛ alɔkpa e mǐ nyí dìn é, kpo mɛ alɔkpa e mǐ sixu nyí sɔ é kpo. É nɔ lɛ́ gbɛ́ nǔ nú mǐ, ɖó é yí wǎn nú mǐ. (Nǔx. 3:11, 12) Kúnnuɖenú agbɔ̌nnɔ e xlɛ́ ɖɔ mǐ xɔ akwɛ nú Jehovah é tɛ ɖíe!

8. Nɛ̌ xó e ɖò Ðɛhan 18:28-30 mɛ é ka sixu d’alɔ mǐ ɖò lee mǐ na kpɔ́n wuvɛ̌ mǐtɔn lɛ gbɔn é mɛ gbɛn?

⁸ Mɛɖé lɛ nɔ mɔ ɖɔ Axɔ́su Davidi kún xɔ akwɛ ó có, éyɛ ka tuùn ɖɔ Jehovah yí wǎn nú emi, bo nɔ gudo nú emi. Enɛ wà ɖagbe nú linlin e Davidi nɔ ɖó dó ninɔmɛ tɔn wu é. (2 Sam. 16:5-7) Hwenu e mǐ ɖò linkpɔ́n mɛ alǒ adǎn ɖò mǐ gbò wɛ é ɔ, Jehovah sixu d’alɔ mǐ bɔ mǐ na nɔ kpɔ́n nǔ lɛ ɖò ali ɖevo nu, bo sixu lɛ́ d’alɔ mǐ bɔ mǐ na ɖu ɖò nǔ e nɔ glɔ́n ali nú mǐ lɛ é bǐ jí. (Xà Ðɛhan 18:28-30.) Enyi Jehovah ɖò gudo nú mǐ ɔ, nǔ ɖě sixu ɖó mǐ te, bɔ mǐ na gɔn sinsɛn ɛ kpo awǎjijɛ kpo ǎ. (Hlɔ. 8:31) Dìn ɔ, mǐ ni kpɔ́n ninɔmɛ e mɛ é byɔ tawun ɖɔ mǐ ni flín ɖɔ Jehovah yí wǎn nú mǐ, bɔ mǐ lɛ́ xɔ akwɛ n’i ɖè é taji atɔn.

9. Nɛ̌ azɔn ka sixu wà nǔ dó lee mǐ nɔ kpɔ́n mǐɖée gbɔn é wu gbɛn?

⁹ Azɔn sixu wà nǔ dó lee nǔ nɔ cí nú mǐ é wu, bo na bló b’ɛ na cí nú mǐ ɖɔ mǐ kún sɔ́ sixu nyɔ́ zán nú mɛɖé gbeɖé ó ɖɔhun. Enyi mɛ lɛ ɖó ayi dogbó mǐtɔn lɛ wu, alǒ nú é byɔ ɖɔ mɛ ɖevo lɛ jɛn mǐ na ɖó nukún cobo mɔ alɔdó ɔ, winnya sixu hu mǐ. Enyi mɛ ɖevo lɛ ma tlɛ tuùn ɖɔ mǐ ɖò azɔn jɛ wɛ ǎ ɔ, mǐ sixu ɖí xwi xá akpɔmimɔ ɖó mǐ sɔ́ sixu wà nǔ e mǐ nɔ wà  ɖ’ayǐ é ɖé lɛ ǎ wutu. Ðò hwenu vɛwǔ enɛ lɛ mɛ ɔ, Jehovah nɔ sɔ́ mǐ site. Gbɔn nɛ̌ é?

10. Sɔgbe xá Nǔnywɛxó 12:25 ɔ, etɛ ka sixu d’alɔ mǐ hwenu e mǐ ɖò azɔn jɛ wɛ é?

¹⁰ Enyi mǐ ɖò azɔn jɛ wɛ ɔ, “xó ɖagbe” sixu dó wusyɛn lanmɛ nú mǐ. (Xà Nǔnywɛxó 12:25.) Jehovah ɖɔ xó ɖagbe gegě ɖò Biblu mɛ bɔ ye flín mǐ ɖɔ enyi mǐ na bo ɖò azɔn jɛ wɛ ɔ, mǐ xɔ akwɛ n’i. (Ðɛh. 31:20; 41:4) Enyi mǐ nɔ xà xó enɛ lɛ e Jehovah sɔ́ d’ayi mɛ nú mɛ lɛ é, bo tlɛ nɔ lɛ́vɔ xà ɔ, é na d’alɔ mǐ bɔ mǐ na ɖí xwi xá linlin masɔgbe e azɔn mǐtɔn dɔn wá lɛ é.

11. Nɛ̌ Jehovah ka d’alɔ nɔví sunnu ɖé gbɔn?

¹¹ Mǐ ni kpɔ́n kpɔ́ndéwú Jorge tɔn. Dɔnkpɛvu ɖé wɛ nú Jorge bɔ é bɛ́ azɔn baɖabaɖa e yawǔ jɛ syɛnsyɛn jí é ɖé, enɛ zɔ́n bɔ é mɔ ɖɔ emi kún xɔ akwɛ ó. Jorge ɖɔ: “Un sɔnǔ ɖ’ayǐ nú lee azɔn ce zɔ́n bɔ nǔ nɔ cí nú mì é alǒ akpɔ e nɔ ɖó mì ɖó kpɔ́n e mɛ lɛ nɔ kpɔ́n mì é wu ǎ. Azɔn ce jɛ nylanylá d’eji jí, bɔ un lin tamɛ dó lee gbɛ̀ ce na ɖyɔ gbɔn é jí. Un flú bǐ, bo savo nú Jehovah bo byɔ alɔdó.” Nɛ̌ Jehovah ka d’alɔ ɛ gbɔn? “Ðó ayi ce ma sɔ́ nɔ nɔ nǔ jí ǎ wutu ɔ, è dó wusyɛn lanmɛ nú mì ɖɔ má nɔ xà akpáxwé klewun klewun e xlɛ́ ɖɔ Jehovah nɔ kpé nukún dó mɛsɛntɔ́ tɔn lɛ wu é ɖò Ðɛhan mɛ. Un nɔ xà, bo nɔ lɛ́vɔ xà wemafɔ klewun klewun enɛ lɛ gbè bǐ gbè, bɔ ye dó gbɔ nú mì, lobo vɔ́ ganjɛwu na mì. É sɔ́ lín ǎ bɔ mɛ lɛ jɛ mimɔ jí ɖɔ un nɔ ko nǔ hugǎn. Ye tlɛ nɔ ɖɔ ɖɔ awǎjijɛ ce dó wusyɛn lanmɛ nú emi. Un mɔ ɖɔ Jehovah na sinkɔn nú ɖɛ ce lɛ. É d’alɔ mì bɔ un ɖyɔ linlin e un nɔ ɖó dó nyiɖée wu é. Un jɛ ayi sɔ́ ɖó nǔ e Xó tɔn ɖɔ dó lee é nɔ kpɔ́n nyɛ mɛ e tlɛ nyí azinzɔnnɔ é gbɔn é wu é jí.”

12. Enyi a ɖò xwi ɖí xá azɔn ɖé wɛ ɔ, etɛ a ka sixu bló bɔ Jehovah na d’alɔ we?

 ¹² Enyi a ɖò xwi ɖí xá azɔn ɖé wɛ hǔn, kúdeji ɖɔ Jehovah tuùn nǔ e mɛ gbɔn dín wɛ a ɖè é. Savo n’i ɖɔ é ni d’alɔ emi bonu emi na sixu sɔnǔ nú linlin e sɔgbe é dó ninɔmɛ emitɔn wu. Enɛ gudo hǔn, ba wɛn gbɔdónúmɛ tɔn e Jehovah ko sɔnǔ na nú we lɛ é ɖò Biblu mɛ. Sɔ́ ayi ɖó wemafɔ e xlɛ́ lě dò mɛsɛntɔ́ Jehovah tɔn lɛ xɔ akwɛ n’i sɔ́ é jí. Enyi a nɔ wà mɔ̌ ɔ, a na mɔ ɖɔ Jehovah nɔ nyɔ́ xomɛ dó mɛ e nɔ sɛn ɛ kpo gbejininɔ kpo lɛ é bǐ wu.—Ðɛh. 84:12.

13. Nɛ̌ nǔ ka sixu cí nú tatɔ́ xwédo tɔn e azɔ̌ gblé dó é ɖé?

¹³ Tatɔ́ xwédo tɔn lɛ bǐ wɛ nɔ ba na kpéwú bo sú dandannú gbɛmɛ tɔn xwédo yetɔn tɔn lɛ sín dò. Amɔ̌, mǐ ni ɖɔ ɖɔ nɔví ɖé wà nǔ ɖě nyi dò ǎ bɔ azɔ̌ ka gblé dó è. É dó gǎn e wu é kpé lɛ é bǐ bá mɔ ɖevo có, é kpa ɛ ǎ. Ðò ninɔmɛ mɔhun lɛ mɛ ɔ, é sixu mɔ ɖɔ emi kún xɔ akwɛ ó. Nɛ̌ ayi sísɔ́ ɖó akpá e Jehovah dó lɛ é jí ka sixu d’alɔ ɛ gbɔn?

14. Hwɛjijɔ tɛ lɛ wu Jehovah ka nɔ ɖè akpá tɔn lɛ?

¹⁴ Jehovah nɔ ɖè akpá tɔn lɛ hwebǐnu. (Joz. 21:45; 23:14) É nɔ wà mɔ̌ ɖó hwɛjijɔ gegě wu. Nukɔntɔn ɔ, ɖó é kúnkplá nyikɔ ɖagbe tɔn wutu. Jehovah d’akpá ɖɔ emi na kpé nukún dó mɛsɛntɔ́ gbejinɔtɔ́ emitɔn lɛ wu, bo nɔ lɛ́ mɔ ɖɔ mɔ̌ wiwa ɖò dandan. (Ðɛh. 31:2-4) Gɔ́ na ɔ, Jehovah tuùn ɖɔ enyi emi ma kpé nukún dó mɛ e ɖò xwédo emitɔn mɛ lɛ é wu ǎ ɔ, ye na flú bǐ. É d’akpá ɖɔ emi na sú hudo agbaza kpo gbigbɔ kpo tɔn mǐtɔn lɛ sín dò bɔ nǔ ɖebǔ na ɖó è te bonu é na gɔn akpá enɛ ɖè ǎ!—Mat. 6:30-33; 24:45.

15. (a) Wuvɛ̌ tɛ Klisanwun xwè kanweko nukɔntɔn ɔ tɔn lɛ ka mɔ? (b) Jiɖiɖe tɛ Ðɛhan 37:18, 19 ka na mǐ?

 ¹⁵ Enyi mǐ flín nǔ e wu Jehovah nɔ ɖè akpá tɔn lɛ é ɔ, mǐ sixu ɖí xwi xá akwɛyózó kpo jiɖiɖe kpo. Kpɔ́n kpɔ́ndéwú Klisanwun xwè kanweko nukɔntɔn ɔ tɔn lɛ tɔn. Hwenu e è jɛ ya dó nú agun e ɖò Jeluzalɛmu é jí syɛnsyɛn é ɔ, “ye bǐ gbakpé” amɔ̌, “mɛsɛ́dó lɛ kɛɖɛ jɛn ma hɔn yì ɖě ǎ.” (Mɛ. 8:1) Kpɔ́n nǔ e mɛ enɛ na ko tɔ́n kɔ dó é. Akwɛyózó! Klisanwun lɛ sixu ko hɛn xwé yetɔn lɛ bú, bɔ azɔ̌ sixu ko lɛ́ gblé dó ye. É ɖò mɔ̌ có, Jehovah jó ye dó ǎ, ye ka lɛ́ hɛn awǎjijɛ yetɔn bú ǎ. (Mɛ. 8:4; Ebl. 13:5, 6; Ja. 1:2, 3) Jehovah d’alɔ Klisanwun gbejinɔtɔ́ lɛ, é na lɛ́ d’alɔ mǐ lɔ.—Xà Ðɛhan 37:18, 19.

16. Ninɔmɛ tɛ lɛ ka sixu zɔ́n bɔ mǐ na jɛ linlin jí ɖɔ sinsɛnzɔ́ mǐtɔn kún sɔ́ xɔ akwɛ nú Jehovah ó?

¹⁶ Enyi mǐ jɛ kpikpo jí ɔ, mǐ sixu jɛ mimɔ jí ɖɔ mǐ kún sɔ́ ɖó nǔ gegě bo na na Jehovah ó. Linlin mɔhun lɛ ɖó adohu adohu nú Axɔ́su Davidi hwenu é jɛ kpikpo jí é. (Ðɛh. 71:9) Nɛ̌ Jehovah ka sixu d’alɔ mǐ gbɔn?

17. Etɛ nǔ e mɛ nɔví nyɔnu Jheri gbɔn dín é ka sixu kplɔ́n mǐ?

¹⁷ Mǐ ni kpɔ́n ninɔmɛ elɔ e mɛ nɔví nyɔnu Jheri gbɔn dín é. È ylɔ́ ɛ nú nǔjlajlaɖó sín azɔ̌ kpinkplɔn mɛ ɖé ɖò Kpléxɔ Axɔ́suɖuto ɔ tɔn mɛ, amɔ̌ é ka jló na yì ǎ. É ɖɔ: “Un kpò, un nyí asúkúsi, un ɖó nǔwukpíkpé ɖě bɔ Jehovah sixu zán ǎ. Un lɛ́ hwɛ́n nǔɖe ǎ.” Ðò zǎn e jɛ nukɔn nú kplé ɔ é mɛ ɔ, é ɖɔ nǔ e ɖò ayi tɔn mɛ é nú Jehovah ɖò ɖɛ mɛ. Ayihɔngbe tɔn hwenu e é wá Kpléxɔ Axɔ́suɖuto ɔ tɔn mɛ é ɔ, é kpó ɖò nǔ e wu é wá finɛ é kanbyɔ éɖée wɛ. Ðò  tuto ɔ hwenu ɔ, xóɖɔtɔ́ lɛ ɖokpo tɛɖɛ̌ jí ɖɔ nǔwukpíkpé taji hugǎn e mǐ ɖó é wɛ nyí jlǒ e mǐ ɖó ɖɔ Jehovah ni kplɔ́n nǔ mǐ é. Jheri ɖɔ: “Un lin nǔ gbɔn lě, ‘Un ɖó nǔwukpíkpé enɛ!’ Ðó un mɔ ɖɔ Jehovah na sinkɔn nú ɖɛ ce lɛ wutu ɔ, un jɛ avǐ ya jí. Jehovah ɖò ganjɛwu na mì wɛ ɖɔ un ɖó nǔ xɔ akwɛ ɖé bo na na, bɔ é lɛ́ jló na kplɔ́n nǔ mì.” Jheri kpɔ́n gudo sɛ́dó bo ɖɔ: “Hwenu e un wá kplé ɔ tɛnmɛ é ɔ, xɛsi ɖò ɖiɖi mì wɛ, awakanmɛ kú mì bɔ un lɛ́ mɔ ɖɔ un kún hwɛ́n nǔɖe ó. Amɔ̌, ee un tɔ́n sín xɔ ɔ mɛ é ɔ, un ɖeji, un mɔ ɖɔ è dó wusyɛn lanmɛ nú mì, un xɔ akwɛ.”

18. Nɛ̌ Biblu ka xlɛ́ ɖɔ enyi mǐ na bo tlɛ ɖò kpikpo wɛ ɔ, sinsɛnzɔ́ mǐtɔn nɔ kpó ɖò akwɛ xɔ nú Jehovah wɛ gbɔn?

¹⁸ Enyi mǐ ɖò kpikpo wɛ ɔ, mǐ sixu kúdeji ɖɔ azɔ̌ kpó ɖò Jehovah sí bɔ mǐ sixu wà. (Ðɛh. 92:13-16) Jezu kplɔ́n mǐ ɖɔ enyi nǔwukpíkpé mǐtɔn lɛ na bo tlɛ ɖó dogbó alǒ gǎndidó mǐtɔn lɛ na bo tlɛ cí nǔ e hwe gbɔn ɖebǔ é ɖɔhun nú mǐ ɔ, nǔ ɖebǔ e mǐ sixu bló ɖò sinsɛnzɔ́ Jehovah tɔn mɛ é nɔ xɔ akwɛ n’i. (Luk. 21:2-4) Enɛ wu ɔ, nɔ sɔ́ ayi ɖó nǔ e a sixu wà é jí. Ði kpɔ́ndéwú, a sixu ɖɔ xó nú mɛ ɖevo lɛ dó Jehovah wu, xoɖɛ dó nɔví towe lɛ tamɛ, bo lɛ́ dó wusyɛn lanmɛ nú mɛ ɖevo lɛ bonu ye na nɔ gbeji. Nǔ e a nɔ kpéwú bo nɔ wà lɛ é wutu wɛ Jehovah nɔ kpɔ́n we dó mɔ azɔ̌watɔ́gbɛ́ tɔn ǎ, loɔ ɖó a sɔ́ jlǒ bo nɔ setónú n’i wutu wɛ.—1 Kɔ. 3:5-9.

19. Ganjɛwu tɛ Hlɔmanu lɛ 8:38, 39 ka na mǐ?

¹⁹ É sù nukún mǐtɔn mɛ tawun ɖɔ mǐ ɖò Jehovah, Mawu e mɛsɛntɔ́ tɔn lɛ nɔ xɔ akwɛ tawun ɖò nukún tɔn mɛ é sɛn wɛ! É dá mǐ bonu mǐ na wà jlǒ tɔn, bɔ sinsɛn-biblo nǔgbo ɔ wɛ ka nɔ zɔ́n bɔ gbɛzán mǐtɔn nɔ ɖó awǎjijɛ. (Nǔɖe. 4:11) Gbɛ̀ ɔ sixu nɔ kpɔ́n mǐ dó mɔ mɛ ma hwɛ́n nǔɖe, amɔ̌, Jehovah nɔ kpɔ́n mǐ gbɔn mɔ̌ ǎ. (Ebl. 11:16, 38) Enyi mǐ mɔ ɖɔ awakanmɛ kú mǐ ɖó azɔn, akwɛyózó alǒ mɛxoxwe wu hǔn, mi nú mǐ ni flín ɖɔ nǔ ɖebǔ kún sixu ɖè mǐ ɖó vo nú wanyiyi Tɔ́ mǐtɔn jixwé tɔn ɔ tɔn ó.—Xà Hlɔmanu lɛ 8:38, 39.