1. Axɔ́su Davidi ɖɔhun ɔ, etɛ mǐ mɛ ɖé lɛ ka sixu kanbyɔ?

MǏ BǏ wɛ nɔ ba na vo, bo lɛ́ ɖó fífá ɖò gbɛ̀ mɛ. Mɛ ɖebǔ nɔ ba na nɔ adohu adohu jí ǎ. É ɖò mɔ̌ có, hweɖelɛnu ɔ, mǐ sixu ɖí xwi xá adohu adohu. Nǔgbo ɔ, mɛsɛntɔ́ Jehovah tɔn ɖé lɛ sixu kan nǔ elɔ byɔ Jehovah, Axɔ́su Davidi ɖɔhun: “Kaka hwetɛnu un na ɖò nǔ lin kpɔ́n wɛ, bɔ aɖi na nɔ ɖò ɖiɖó mì wɛ ayihɔngbe ayihɔngbe yì jɛ?”—Ðɛh. 13:2.

2. Etɛ lɛ jí mǐ ka na ɖɔ xó dó ɖò xóta elɔ mɛ?

² Ado sixu gɔn huhu mǐ bǐ mlɛ́mlɛ́ ǎ có, mǐ ka sixu wà nǔ gegě dó ɖí xwi xá. Ðò xóta elɔ mɛ ɔ, mǐ na tó ɖɔ xó dó ninɔmɛ ɖěɖee sixu ɖó adohu adohu nú mǐ é ɖé lɛ jí hwɛ̌. Enɛ gudo ɔ, mǐ na ɖɔ xó dó ali e nu mǐ sixu kpò ɖò fífá ayi mɛ tɔn ɖó wɛ, hwenu e mǐ na ɖò xwi ɖí xá tagba mǐtɔn lɛ wɛ é ɖè é ayizɛ́n jí.

3. Etɛ lɛ ka nɔ ɖó adohu adohu nú mǐ? Bǎ tɛ mɛ mǐ ka ɖó acɛ dó ye jí yì ɖó?

³ Mǐ sixu ɖó acɛ kpɛɖé alǒ gɔn ɖebǔ ɖó dó ninɔmɛ ɖěɖee nɔ ɖó adohu adohu nú mǐ lɛ é jí. Ði kpɔ́ndéwú ɔ, mǐ sixu ɖɔ nabi lě wɛ nǔɖuɖu, avɔ kpo xɔ kpo na nyí xwewu xwewu ǎ; mǐ ka sixu lɛ́ ɖɔ azɔn nabi e azɔ̌watɔ́gbɛ́ alǒ wemaxɔmɛvígbɛ́ mǐtɔn lɛ na tɛ́n kpɔ́n bá dɔn mǐ dó adingbanɖiɖó alǒ nǔbliblíwiwa mɛ é ǎ. Mǐ sixu lɛ́ ɖó nǔ nyanya e nɔ jɛ lɛlɛ̌ dó mǐ lɛ é te ǎ. Mǐ nɔ gbɔn wuvɛ̌ enɛ lɛ mɛ ɖó mǐ ɖò gbɛ̀ nɔ wɛ ɖò gbɛ̀ e mɛ linlin mɛ gegě tɔn ma nɔ jinjɔn nǔgbododó Biblu tɔn lɛ jí ǎ é mɛ wutu. Satáan, mawu gbɛ̀ elɔ tɔn tuùn ɖɔ  mɛɖé lɛ na jó “gbɛ̀ mɛ fí sín tagba lɛ” dó bɔ ye na glɔ́n ali nú ye bonu ye na sɛn Jehovah. (Mat. 13:22; 1 Jaan 5:19) É kpaca mǐ ǎ ɖɔ gbɛ̀ ɔ gɔ́ nú ninɔmɛ e nɔ ɖó adohu adohu nú mɛ lɛ é sɔmɔ̌!

4. Nɛ̌ mǐ ka sixu wà nǔ gbɔn ɖò ninɔmɛ syɛnsyɛn lɛ mɛ?

⁴ Ninɔmɛ syɛnsyɛn lɛ sixu zɔ́n bɔ adohu adohu na ɖí bú mǐ bǐ. Ði kpɔ́ndéwú ɔ, ado sixu hu mǐ ɖɔ mǐ kún na mɔ akwɛ e na kpé mǐ bɔ mǐ na sú hudo mǐtɔn lɛ sín dò é ó, alǒ ɖɔ mǐ sixu wlí azɔn bo gɔn azɔ̌mɛ abǐ azɔ̌ tlɛ sixu gblé dó mǐ. Ado sixu lɛ́ hu mǐ ɖɔ nú mǐ jɛ mɛtɛnkpɔn e na zɔ́n bɔ mǐ na gbà sɛ́n Mawu tɔn é ɖé mɛ ɔ, mǐ kún na nɔ gbeji ó. Zaanɖé dìn ɔ, Satáan na sísɛ́ mɛ ɖěɖee ɖò acɛ tɔn glɔ́ lɛ é bɔ ye na tɔ́n ahwan togun Mawu tɔn, enɛ wu ɔ, ado sixu hu mǐ dó lee mǐ na wà nǔ gbɔn ɖò ahwantɔ́nmɛ enɛ nukɔn é wu. Mǐ sixu kanbyɔ mǐɖée ɖɔ: “É ka nyla ɖɔ ado kpɛɖé ni hu mì dó nǔ enɛ wu wɛ à?”

5. Etɛ ɖɔ gbé Jezu ka ja bo ɖɔ: ‘Ado ni ma hu mi ó’?

⁵ Mǐ tuùn ɖɔ Jezu ɖɔ nú ahwanvu tɔn lɛ ɖɔ: ‘Ado ni ma hu mi ó.’ (Mat. 6:25) Ðiɖɔ wɛ é ka ɖè ɖɔ ado kún ɖó na hu mǐ ɖebǔ lálá ó à? É ɖò wɛn ɖɔ é kún nyí mɔ̌ ó! Ado hu mɛsɛntɔ́ Jehovah tɔn gbejinɔtɔ́ hwexónu tɔn ɖé lɛ có, Jehovah ka gbɛ́ ye ɖó mɔ̌ wu ǎ. * (1 Axɔ́. 19:4; Ðɛh. 6:4) Ganjɛwu na mǐ wɛ Jezu ɖè. É ba ɖɔ ado ni hu mǐ dó lee mǐ na kpé nukún dó mǐɖée wu gbɔn é wu kaka bonu enɛ ni wà nǔ dó Mawu sinsɛn mǐtɔn wu ǎ. Nɛ̌ mǐ ka sixu ɖí xwi xá adohu adohu gbɔn lo?—Kpɔ́n gbǎví “ Lee È Sixu Bló Gbɔn É.”

6. Sɔgbe xá Filipunu lɛ 4:6, 7 ɔ, enyi mǐ ɖò linkpɔ́n mɛ ɔ, etɛ ka sixu xò hwihwɛ́ mǐ?

⁶ (1) Nɔ xoɖɛ hwɛhwɛ. Enyi Klisanwun e ɖò ninɔmɛ syɛnsyɛn mɛ lɛ é xoɖɛ vívɛ́ sɛ́dó Jehovah ɔ, ye sixu mɔ kɔ dó sà fún i. (1 Pi. 5:7) “Fífá Mawu tɔn e hugǎn nukúnnúmɔjɛnǔmɛ gbɛtɔ́ tɔn bǐ ɔ” sixu nyí sinkɔn ɖɛ towe lɛ tɔn. (Xà Filipunu lɛ 4:6, 7.) Jehovah nɔ zán gbigbɔ mímɛ́ tɔn hlɔnhlɔnnɔ ɔ dó xò hwihwɛ́ mǐ hwenu e mǐ ɖò linkpɔ́n mɛ é.—Ga. 5:22.

7. Etɛ lɛ mǐ ka ɖó na hɛn d’ayi mɛ hwenu e mǐ ɖò ɖɛ xò sɛ́dó Mawu wɛ é?

⁷ Nɔ ɖɔ xomɛ nú Jehovah hwenu e a ɖò ɖɛ xò sɛ́dó è wɛ é. Nɔ nɔ tlɔlɔ. Ðɔ tagba e wɛ é n’i, bo lɛ́ ɖɔ lee nǔ cí nú we d’ewu é n’i. Enyi è sixu ɖeɖɛ tagba ɔ wɛ ɔ, byɔ ɛ nǔnywɛ kpo hlɔnhlɔn kpo e a na dó ɖeɖɛ na é. Enyi tagba e è ma sixu ɖeɖɛ ǎ é ɖé wɛ ɔ, byɔ Jehovah ɖɔ é ni d’alɔ we bonu ado e ma ɖò dandan ǎ é ni hu we d’ewu ó. Enyi a nɔ nɔ tlɔlɔ ɖò ɖɛ towe lɛ mɛ ɔ, lee Jehovah na sinkɔn nú ye gbɔn é na zawě nú we hugǎn ɖò nukɔnmɛ. Enyi a ma mɔ sinkɔn nú ɖɛ towe lɛ tlolo ǎ hǔn, ma jó gbè ó. Jehovah ba ɖɔ a ni nɔ nɔ tlɔlɔ ɖò ɖɛ towe lɛ mɛ, bo lɛ́ ba ɖɔ a ni ɖókan dó ɖɛxixo wu.—Luk. 11:8-10.

8. Etɛ lɛ mǐ ka ɖó na nɔ sɔ́ dó ɖɛ mǐtɔn lɛ mɛ?

⁸ Enyi a ɖò linkpɔ́n towe lɛ zlɔ́n dó Jehovah jí wɛ hǔn, mɔ nǔ jɛ wu ɖɔ emi lɛ́ dókú n’i. Enyi mǐ na bo ɖò ninɔmɛ e vɛwǔ tawun lɛ é mɛ gbɔn dín wɛ ɔ, nyɔna e mǐ nɔ mɔ lɛ é sín kɛ́n sísɔ́ nɔ wà ɖagbe nú mǐ. Hweɖelɛnu ɔ, enyi a ma nɔ kpéwú bo nɔ mɔ xógbe e sɔgbe lɛ é dó ɖɔ lee nǔ cí nú we tawun é ǎ hǔn, flín ɖɔ Jehovah nɔ na sinkɔn nú ɖɛ e mɛ è tlɛ ɖɔ ‘kɛnklɛn d’alɔ mì’ ɖè kpowun lɛ é!—2 Tan 18:31; Hlɔ. 8:26.

9. Nɛ̌ è ka sixu nɔ ayijayǐ mɛ nǔgbo nǔgbo gbɔn?

 ⁹ (2) Nɔ ganjɛ nǔnywɛ Jehovah tɔn wu, ni ma nyí dó hwiɖesunɔ tɔn wu ó. Ðò xwè kanweko tantɔngɔ́ J.H.M. tɔn mɛ ɔ, Asilíinu lɛ dó xɛsi togun Judáa tɔn. Togun Judáa tɔn jló ɖɔ Asilíinu lɛ ni ɖu ɖò ye jí ǎ, enɛ wu ɔ, ye yì ba alɔdó ɖò Ejipunu lɛ gɔ́n. (Eza. 30: 1, 2) Jehovah gb’akpá nú ye ɖɔ ali nyanya e ye mlɛ́ é na dɔn awě wá nú ye. (Eza. 30:7, 12, 13) Jehovah gbɔn Ezayíi jí bo ɖɔ lee togun ɔ sixu nɔ ayijayǐ mɛ nǔgbo nǔgbo gbɔn é. Gbeyiɖɔ ɔ ɖɔ: ‘Hlɔnhlɔn ɖokpo e na kpò nú mi ɔ wɛ nyí ɖɔ mi na cí xwíi, bo na ɖeji’ dó Jehovah wu.—Eza. 30:15b.

10. Ninɔmɛ tɛ lɛ mɛ mɔ̌ mǐ ka sixu ɖeji dó Jehovah wu ɖè?

¹⁰ Nɛ̌ mǐ ka sixu xlɛ́ ɖɔ mǐ ɖeji dó Jehovah wu gbɔn? Kpɔ́ndéwú ɖé lɛ ɖíe. Mǐ ni ɖɔ ɖɔ è xwlé azɔ̌ e kpé kwɛ ganji é ɖé we. Amɔ̌, é na byɔ ɖɔ a ni nɔ zán hwenu gegě ɖ’ékɔn, bo ka na lɛ́ zɔ́n bɔ aca gbigbɔ tɔn towe lɛ na xò akpa. Alǒ, mǐ ni ɖɔ nǔ towe jɛ mɛ e ɖò azɔ̌ towe mɛ é ɖé tɔn jí, amɔ̌, é ka nyí Mawu sɛntɔ́ e bló baptɛm é ɖé ǎ. Abǐ, enyi mɛ e vɛ́ nú we ɖò xwédo towe mɛ é ɖé sin adǎn nú we bo ɖɔ: “Ðò nyi kpo Mawu towe kpo tɛntin ɔ, a ɖó na sɔ́ ɖokpo” ɔ ka lo? Ðò ninɔmɛ enɛ lɛ ɖokpo ɖokpo mɛ ɔ, gbeta ɖé kɔn wíwá sixu vɛwǔ, amɔ̌, Jehovah na na we alixlɛ́mɛ e sín hudo a ɖó é ɖò ninɔmɛ ɖokpo ɖokpo mɛ. (Mat. 6:33; 10:37; 1 Kɔ. 7:39) Nǔkanbyɔ ɔ dìn wɛ nyí ɖɔ a ka na ɖeji dó Jehovah wu, bo setónú nú alixlɛ́mɛ tɔn à?

11. Tan Biblu tɔn tɛ lɛ mǐ ka sixu kplɔ́n bo na sixu kpò ɖò xwíi cí wɛ ɖò gbeklánxámɛ nukɔn?

¹¹ (3) Nǔ kpɔ́ndéwú ɖagbe lɛ kpo nyanya lɛ kpo ni kplɔ́n nǔ we. Tan gegě ɖò Biblu mɛ bo xlɛ́ ɖɔ é ɖò taji tawun ɖɔ mǐ ni cí xwíi, bo ɖeji dó Jehovah wu. Ee a na ɖò tan enɛ lɛ gbéjé kpɔ́n wɛ é ɔ, ɖ’ayi nǔ e d’alɔ mɛsɛntɔ́ Mawu tɔn lɛ bɔ ye cí xwíi hwenu e mɛ ɖevo lɛ klán gbè xá ye syɛnsyɛn é wu. Ði kpɔ́ndéwú ɔ, hwenu e hwɛɖɔxɔsa ɖaxó Jwifu lɛ tɔn ɖegbe nú mɛsɛ́dó lɛ ɖɔ ye ni ma sɔ́ ɖɔ Mawuxó ɖě ó é ɔ, xɛsi ɖi ye ǎ. É nyɔ́ wà ɔ, ye ɖɔ kpo akɔ́nkpinkpan kpo ɖɔ: “È ɖó na setónú nú Mawu; é nyɔ́ hú è setónú nú gbɛtɔ́.” (Mɛ. 5:29) È xò mɛsɛ́dó lɛ có, xɛsi ɖi ye ǎ. Etɛwu? Ðó ye tuùn ɖɔ Jehovah ɖò akpá emitɔn xwé. Nǔ yetɔn nyɔ́ nukún tɔn mɛ. Enɛ wu ɔ, ye kpò ɖò wɛnɖagbe ɔ jlá wɛ. (Mɛ. 5:40-42) Mɔ̌ ɖokpo ɔ, hwenu e è ja Etyɛni hu gbé é ɔ, é ɖó fífá ayi mɛ tɔn sɔmɔ̌ bɔ nukún tɔn mɛ “cí wɛnsagun Mawu tɔn lɛ sín nukúnmɛ ɖɔhun.” (Mɛ. 6:12-15) Etɛwu? Ðó é ɖeji ɖɔ nǔ emitɔn nyɔ́ Jehovah nukúnmɛ wutu.

12. Sɔgbe xá 1 Piyɛ́ɛ 3:14 kpo 4:14 kpo ɔ, etɛwu mǐ ka sixu j’awǎ hwenu e è dóya nú mǐ é?

¹² Mɛsɛ́dó lɛ mɔ kúnnuɖenú e xlɛ́ nyi wɛn ɖɔ Jehovah ɖò kpɔ́ xá emi lɛ é. É na hlɔnhlɔn ye bɔ ye bló nǔjiwǔ lɛ. (Mɛ. 5:12-16; 6:8) Nǔ ka sɔ́ nyí mɔ̌ nú mǐdɛɛ lɛ ɖò égbé ǎ. Nǔ ɖò mɔ̌ có, Jehovah na jiɖe mǐ gbɔn Xó tɔn gblamɛ ɖɔ enyi è dóya nú mǐ ɖó nǔjlɔjlɔwiwa wutu ɔ, mǐ sixu j’awǎ, ɖó nǔ mǐtɔn nɔ nyɔ́ nukún tɔn mɛ, bɔ gbigbɔ mímɛ́ tɔn nɔ lɛ́ ɖò mǐ jí. (Xà 1 Piyɛ́ɛ 3:14; 4:14.) Enɛ wu ɔ, ado ɖó na hu mǐ dó nǔ e mǐ na wà, enyi è dóya nú mǐ ɖò sɔgudo é wu ǎ. É nyɔ́ wà ɔ, mǐ ɖó na wà nǔ e wu mǐ kpé é bǐ bo na na hlɔnhlɔn jiɖe e mǐ ɖó ɖɔ Jehovah sixu nɔ gudo nú mǐ, bo lɛ́ hwlɛn mǐ é. Lee ahwanvu bǐbɛ̌mɛ tɔn enɛ lɛ bló gbɔn é ɖɔhun ɔ, mǐ ɖó na ɖeji dó akpá Jezu tɔn elɔ wu: “Un na sɔ́ xó e mi na ɖɔ é kpodo nǔnywɛ e mi na zán é kpan bǐ dó ayi mɛ nú mi, bɔ kɛntɔ́ mitɔn lɛ ɖebǔ na sixu mɔ xó ɖé, bo dó gbà mitɔn ɔ na ǎ.”  Jezu d’akpá nú mǐ, bo ɖɔ: “Enyi mi . . . dɛ ɖò ya enɛ lɛ nu ɔ, Mawu na hwlɛn mi gán.” (Luk. 21:12-19) Mǐ ɖó na nɔ flín hwebǐnu ɖɔ Jehovah tuùn nǔ e kúnkplá mɛsɛntɔ́ tɔn e nɔ gbeji bo kú lɛ é bǐ hlɛ́nhlɛ́n, bo sixu fɔ́n ye wá gbɛ̀.

13. Nɛ̌ kpɔ́ndéwú mɛ ɖěɖee ma kpéwú bo cí xwíi, lobo ɖeji dó Jehovah wu ǎ lɛ é tɔn gbígbéjé kpɔ́n ka sixu hɛn lè wá nú mǐ gbɔn?

¹³ Kpɔ́ndéwú mɛ ɖěɖee ma kpéwú bo cí xwíi, lobo ɖeji dó Jehovah wu ǎ lɛ é tɔn lɔ sixu kplɔ́n nǔ mǐ. Kpɔ́ndéwú nyanya enɛ lɛ gbígbéjé kpɔ́n na d’alɔ mǐ bɔ mǐ na nyi alɔ nú nǔ ɖokpo ɔ lɛ wiwa nyi dò. Ði kpɔ́ndéwú ɔ, hwenu e Axɔ́su Asa jɛ acɛ kpa jí ɖò Judáa tlolo é ɔ, é ganjɛ Jehovah wu hwenu e ahwankpá wɔbuwɔbu ɖé wá tɔ́n ahwan ɛ é, bɔ Jehovah dó n’i, b’ɛ ɖu ɖò jǐ tɔn. (2 Tan 14:8-11) Amɔ̌, ɖò nukɔnmɛ hwenu e Axɔ́su Izlayɛli tɔn Baeca wá tɔ́n ahwan Asa kpo ahwankpá kpɛví ɖé kpo é ɔ, é sɔ́ ɖeji dó Jehovah wu bonu é na hwlɛn ɛ lee é bló gbɔn wá yì é ǎ. É nyɔ́ wà ɔ, é sú axɔ́ Silíinu lɛ, bonu ye na fun ahwan xá ɛ. (2 Tan 16:1-3) Hwenu e é wlí azɔn syɛnsyɛn ɖé bo ja kúkú gbé é ɔ, é ganjɛ Jehovah wu nú é na d’alɔ ɛ ǎ.—2 Tan 16:12.

14. Etɛ nǔ e Asa wà nyi dò lɛ é ka sixu kplɔ́n mǐ?

¹⁴ Hwenu e Asa mɔ tagba lɛ ɖò bǐbɛ̌mɛ é ɔ, é ba alɔdó Jehovah tɔn. Ðò nukɔnmɛ ɔ, é sɔ́ ɖeji dó Mawu tɔn wu, bo ba alɔdó tɔn ǎ. É nyɔ́ wà ɔ, é tɛ́n kpɔ́n bo na ɖeɖɛ tagba lɛ éɖoɖó. Nú è kpɔ́n tlolo ɔ, alɔdó e Asa ba ɖò Silíinu lɛ gɔ́n bá dó fun ahwan xá Izlayɛli é cí nǔ e nyɔ́ é ɖɔhun. Amɔ̌, ɖuɖeji tɔn nɔ ayǐ vo ɖé ǎ. Jehovah ɖɔ n’i gbɔn gbeyiɖɔ ɖé jí ɖɔ: ‘A ba na ganjɛ Jehovah, Mawu towe wu ǎ, bo ganjɛ Silíi xɔ́su ɔ wu. Nǔ enɛ e a wà ɔ zɔ́n bɔ ahwangɔnu Silíi xɔ́su ɔ tɔn gló we.’ (2 Tan 16:7) Mǐ ɖó na cɔ́ mǐɖée, bo na nɔ lin ɖɔ mǐ sixu ɖeɖɛ tagba mǐtɔn lɛ mǐɖoɖó, alixlɛ́mɛ Jehovah tɔn e ɖò Xó tɔn mɛ lɛ é mɛvo ǎ. Enyi é na bo tlɛ byɔ ɖɔ mǐ ni yawǔ wá gbeta ɖé kɔn ɔ, mǐ ɖó na yì agbɔ̌n jí bo ganjɛ Jehovah wu, bɔ é na d’alɔ mǐ, lobɔ mǐ na wá gbeta ɖagbe ɔ kɔn.

15. Etɛ mǐ ka sixu nɔ wà hwenu e mǐ ɖò Biblu xà wɛ é?

¹⁵ (4) Nɔ kplɔ́n wemafɔ Biblu tɔn ɖé lɛ dó tamɛ. Enyi a ɖò Biblu xà wɛ, bo jɛ wemafɔ ɖěɖee xlɛ́ ɖɔ é ɖò taji ɖɔ è ni cí xwíi bo ganjɛ Jehovah wu lɛ é jí hǔn, tɛ́n kpɔ́n bo nɔ hɛn ye dó tamɛ. Enyi a na kpéwú bo na nɔ flín ye ɔ, é na nyɔ́ ɖɔ a ni nɔ xà ye d’aga alǒ wlán ye ɖ’ayǐ, bo nɔ lɛ́ gbɔn ye jí hwɛhwɛ. Jehovah ɖɔ nú Jozuwée ɖɔ é ni nɔ xà Sɛ́nwema ɔ ɖò gbesisɔmɛ, bo nɔ lin tamɛ d’eji bá dó sixu nɔ wà nǔ kpo nǔnywɛ kpo. Nǔ e é na xà lɛ é na d’alɔ ɛ b’ɛ na ɖi xɛsi ǎ, loɔ, é na kpankɔ́n bo xlɛ́ ali togun Mawu tɔn. (Joz. 1:8, 9) Akpáxwé gegě ɖò Xó Mawu tɔn mɛ bo sixu d’alɔ we bɔ a na ɖó fífá ayi mɛ tɔn ɖò ninɔmɛ ɖěɖee mɛ ye mɛvo ɔ, ado na hu we alǒ xɛsi na ɖi we ɖè lɛ é.—Ðɛh. 27:1-3; Nǔx. 3:25, 26.

16. Nɛ̌ Jehovah ka nɔ zán agun ɔ dó d’alɔ mǐ, bonu mǐ na cí xwíi bo ɖeji dó wǔ tɔn gbɔn?

¹⁶ (5) Nɔ dó gbɛ̌ xá mɛsɛntɔ́ Mawu tɔn lɛ. Jehovah nɔ zán nɔví sunnu kpo nɔví nyɔnu kpo mǐtɔn lɛ dó d’alɔ mǐ bonu mǐ na cí xwíi, bo ɖeji dó wǔ tɔn. Ðò kplé mǐtɔn lɛ jí ɔ, mǐ nɔ ɖu lè xóɖiɖɔ lɛ, xósin e kpléwatɔ́ lɛ nɔ na lɛ é, gɔ́ nú xó wusyɛn dó lanmɛ nú mɛ tɔn e mǐ nɔ ɖɔ ɖó kpɔ́ xá nɔví sunnu kpo nɔví nyɔnu kpo mǐtɔn lɛ é tɔn. (Ebl. 10:24, 25) Enyi mǐ ɖɔ nǔ e ɖò ado hu nú mǐ wɛ lɛ é nú xɔ́ntɔn vívɛ́ mǐtɔn e ɖò agun ɔ mɛ lɛ é ɔ, enɛ lɔ sixu dó wusyɛn lanmɛ nú mǐ tawun. “Xó  ɖagbe” e xɔ́ntɔn ɖé na ɖɔ nú mǐ é sixu d’alɔ bɔ linkpɔ́n mǐtɔn na ɖekpo.—Nǔx. 12:25.

17. Sɔgbe xá Eblée lɛ 6:19 ɔ, enyi ninɔmɛ lɛ na bo vɛwǔ ɔ, nɛ̌ nukúnɖiɖó Axɔ́suɖuto ɔ tɔn mǐtɔn ka sixu d’alɔ mǐ bɔ mǐ na lidǒ gbɔn?

¹⁷ (6) Hɛn nukúnɖiɖó towe ɖó gbɛ̀. Nukúnɖiɖó Axɔ́suɖuto ɔ tɔn mǐtɔn “nɔ hɛn lindɔ̌n mǐtɔn syɛnsyɛn, lee gandótɔnu nɔ hɛn tɔjihun syɛnsyɛn ɖó te gbɔn é,” bo nɔ zɔ́n bɔ mǐ nɔ lidǒ, enyi ninɔmɛ lɛ na bo vɛwǔ alǒ mǐ ɖò linkpɔ́n mɛ ɔ nɛ. (Xà Eblée lɛ 6:19.) Nɔ lin tamɛ dó nǔ ɖěɖee sín akpá Mawu dó dó sɔgudo wu lɛ é jí. Hwe enɛ ɔ nu ɔ, nǔ ɖebǔ sɔ́ na hu ado nú mɛɖé ǎ. (Eza. 65:17) Kpɔ́n hwiɖée sɛ́dó ɖò gbɛ̀ e mɛ fífá ɖè bɔ nǔ nyanya ɖebǔ ma sɔ́ na ɖè ǎ é. (Micée 4:4) Enyi a nɔ ɖɔ xó dó gbɛ̀ yɔyɔ̌ ɔ wu xá mɛ ɖevo lɛ ɔ, a na hɛn nukúnɖiɖó towe lidǒ. Nɔ wà nǔ e wu a kpé é bǐ ɖò wɛnɖagbejijla kpo nǔ kplɔnkplɔn mɛ lɛ bonu ye ni huzu ahwanvu kpo sín azɔ̌ ɔ kɔn. Nú a wà mɔ̌ “kaka sɔyi vivɔnu” ɔ, a sixu ɖeji ɖɔ “nǔ e ɖó nukún wɛ [a] ɖè ɔ na jɛ.”—Ebl. 6:11.

18. Wuvɛ̌ tɛ lɛ mǐ ka sixu ɖó nukún ɖò sɔgudo? Nɛ̌ mǐ ka sixu ɖí xwi xá ye gbɔn?

¹⁸ Ee gbɛ̀ elɔ na ɖò vivɔnu wá wɛ é ɔ, mǐ na lɛ́ mɔ wuvɛ̌ e sixu ɖó linkpɔ́n nú mǐ lɛ é gegě. Xóta xwè 2021 tɔn mǐtɔn sixu d’alɔ mǐ bɔ mǐ na cí xwíi bo kpannukɔn tagba enɛ lɛ. Mǐ na wà mɔ̌ kpo hlɔnhlɔn mǐɖesunɔ tɔn kpo ǎ, loɔ, jiɖe e mǐ na ɖó dó Jehovah wu é wɛ na d’alɔ mǐ. Ðò xwè elɔ mɛ ɔ, mi nú nǔwiwa mǐtɔn lɛ ni nɔ ɖexlɛ́ ɖɔ mǐ ɖeji dó akpá elɔ e Jehovah dó é wu: ‘Hlɔnhlɔn ɖokpo e na kpò nú mi ɔ wɛ nyí ɖɔ mi na cí xwíi, bo na ɖeji dó wǔ ce.’—Eza. 30:15.