1-2. (a) Hwetɛnu wɛ mǐ ka nɔ yawǔ flín mɛvívɛ́ mǐtɔn e kú é ɖé hugǎn? (b) Tuto tɛ Jezu ka sɔ́ ɖ’ayǐ ɖò zǎn e jɛ nukɔn nú kú tɔn é mɛ?

ENYI mɛvívɛ́ mǐtɔn lɛ kú bonu é na bo tlɛ lín gbɔn ɖebǔ ɔ, mǐ nɔ kpò ɖò ye flín wɛ. Hwɛhwɛ ɔ, xwekpéxwenu kú yetɔn tɔn hwenu wɛ mǐ nɔ flín nǔ tawun tawun ɖé lɛ dó ye wu hugǎn.

² Xwewu xwewu ɔ, mǐ nɔ ɖò gbɛtɔ́ livi mɔ̌kpan e gbɔn gbɛ̀ ɔ bǐ mɛ, bo nɔ kplé nú xwekpéxwenu kú mɛ e mǐ yí wǎn na tawun é ɖé tɔn lɛ é mɛ; mɛ enɛ wɛ nyí Jezu Klisu. (1 Pi. 1:8) Mǐ nɔ kplé bo nɔ flín mɛ e sɔ́ gbɛ̀ tɔn dó savɔ̌ dó xɔ gbɛ̀ nú mǐ sín hwɛhuhu kpo kú kpo sí é. (Mat. 20:28) Nǔgbo ɔ, Jezu ba ɖɔ ahwanvu emitɔn lɛ ni nɔ flín kú emitɔn. Ðò zǎn e jɛ nukɔn nú kú tɔn é mɛ ɔ, é bló tuto gbadanu núɖuɖu bǔnɔ ɖé tɔn, lobo ɖegbe ɖɔ: “Mi nɔ bló lě, dó flín mì na.”—Luk. 22:19.

3. Etɛ lɛ jí mǐ ka na kɛnu dó ɖò xóta elɔ mɛ?

³ Mɛ klewun ɖé jɛn ɖó nukúnɖiɖó jixwé tɔn ɖò mɛ ɖěɖee nɔ yì Flǐn kú Klisu tɔn tɔn tɛnmɛ lɛ é mɛ. Amɔ̌, gbɛtɔ́ livi mɔ̌kpan e ɖó nukúnɖiɖó ayikúngban jí tɔn lɛ é lɔ nɔ wá dò tɔn mɛ. Ðò xóta elɔ mɛ ɔ, mǐ na gbéjé hwɛjijɔ e wu akpakpa nɔ sɔ́ gbɛ̌ta we enɛ lɛ bǐ dó Flǐn ɔ domɛ yiyi xwewu xwewu wu é ɖé lɛ kpɔ́n. Mǐ na lɛ́ gbéjé lee Flǐn ɔ domɛ yiyi nɔ hɛn lè wá nú mǐ gbɔn é kpɔ́n. Mi bonu mǐ ni bɛ́ kpo hwɛjijɔ e wu mɛ yí ami dó ɖè lɛ nɔ yì Flǐn ɔ domɛ é ɖé lɛ gbígbéjé kpɔ́n kpo.

4. Etɛwu mɛ yí ami dó ɖè lɛ ka nɔ ɖu wɔ̌xúxú ɔ, bo nɔ lɛ́ nu vɛ̌ɛn ɔ ɖò Flǐn ɔ domɛ?

⁴ Xwewu xwewu ɔ, mɛ yí ami dó ɖè ɖěɖee nɔ yì Flǐn ɔ domɛ lɛ é nɔ ɖu wɔ̌xúxú ɔ, bo nɔ lɛ́ nu vɛ̌ɛn ɔ. Aniwu é ka sɔgbe ɖɔ ye ni ɖu wɔ̌xúxú ɔ, bo lɛ́ nu vɛ̌ɛn ɔ? Bo na dó mɔ  xósin ɔ ɔ, mi nú mǐ ni lin tamɛ dó nǔ e jɛ ɖò zǎn e jɛ nukɔn nú kú Jezu tɔn é mɛ é jí. Ee ye ɖu Dindinwayixwe ɔ gudo é ɔ, Jezu sɔ́ nǔ e è wá ylɔ́ ɖɔ Aklunɔ Sín Nǔɖuɖu ɔ é ɖ’ayǐ. É má wɔ̌xúxú kpo vɛ̌ɛn kpo nú mɛsɛ́dó tɔn gbejinɔtɔ́ 11 lɛ, bo ɖɔ nú ye ɖɔ ye ni ɖu, bo nu. Jezu ɖɔ akɔjijɛ we xó nú ye, enɛ wɛ nyí akɔjijɛ yɔyɔ̌ ɔ kpo akɔjijɛ Axɔ́suɖuto ɔ tɔn kpo. * (Luk. 22:19, 20, 28-30) Akɔjijɛ we enɛ lɛ hun ali ɔ nú mɛsɛ́dó lɛ kpo mɛ klewun ɖevo lɛ kpo bɔ ye na huzu axɔ́su lɛ kpo vɔsanúxwlémawutɔ́ lɛ kpo ɖò jixwé. (Nǔɖe. 5:10; 14:1) Mɛ yí ami dó ɖè ɖěɖee è jɛ akɔ we enɛ lɛ xá, bɔ ye kpò ɖò ayikúngban jí lɛ é kɛɖɛ wɛ sixu ɖu wɔ̌xúxú ɔ, bo lɛ́ nu vɛ̌ɛn ɔ ɖò Flǐn ɔ domɛ.

5. Etɛ mɛ yí ami dó ɖè lɛ ka tuùn dó nǔkúnɖiɖó e è na ye é wu?

⁵ Hwɛjijɔ e wu akpakpa nɔ sɔ́ mɛ yí ami dó ɖè lɛ dó Flǐn ɔ domɛ yiyi wu é ɖevo ɖíe: Flǐn ɔ domɛ yiyi nɔ hun ali nú ye, bɔ ye nɔ dó nukún nukúnɖiɖó yetɔn mɛ kpɔ́n. Jehovah na ye nukúnɖiɖó jiwǔ ɖé, enɛ wɛ nyí ɖɔ ye na ɖu vivǐ gbɛ̀ jɔmakú e ma ɖó blǒ ɖě ǎ é tɔn ɖò jixwé, lobo na kp’acɛ xá Jezu Klisu susunɔ ɔ kpo mɛ 144 000 e kpò lɛ é kpo, taji hú bǐ ɔ, ye na lɛ́ nɔ Jehovah Mawu nukɔn cɔɔ lě. (1 Kɔ. 15:51-53; 1 Jaan 3:2) Mɛ yí ami dó ɖè lɛ tuùn ɖɔ è ko ylɔ́ emi bonu emi na ɖu vivǐ wǔjɔmɛ enɛ lɛ tɔn ɖò jixwé. Amɔ̌, cobonu ali ɔ na hun nú ye bɔ ye na yì jixwé ɔ, ye ɖó na tó nɔ gbeji kaka jɛ kú hwɛ̌. (2 Tim. 4:7, 8) Enyi mɛ yí ami dó ɖè lɛ lin tamɛ dó nukúnɖiɖó jixwé tɔn yetɔn jí ɔ, xomɛ nɔ hun ye tawun. (Titu 2:13) “Lɛngbɔ̌ ɖevo lɛ” ka lo? (Jaan 10:16) Hwɛjijɔ tɛ lɛ wu mɔ̌ ye ka nɔ yì Flǐn ɔ domɛ?

6. Aniwu lɛngbɔ̌ ɖevo lɛ ka nɔ yì Flǐn ɔ domɛ xwewu xwewu?

⁶ Lɛngbɔ̌ ɖevo lɛ nɔ yì Flǐn ɔ domɛ bo na dó ɖu wɔ̌xúxú ɔ, lobo nu vɛ̌ɛn ɔ wu ǎ; é ɖò mɔ̌ có, xomɛ nɔ hun ye ɖɔ ye wá dò tɔn mɛ. 1938 wɛ è ylɔ́ mɛ ɖěɖee ɖó nukúnɖiɖó ayikúngban jí tɔn ɔ lɛ é azɔn nukɔntɔn bɔ ye wá Flǐn ɔ domɛ. Atɔxwɛ (Glɛnsigbe) 1^er mars 1938 tɔn ɖɔ xó elɔ: “É sɔgbe tawun, bo lɛ́ jɛxa ɖɔ [lɛngbɔ̌ ɖevo lɛ] ni wá kplé mɔ̌hun domɛ, lobo kpɔ́n lee nǔ lɛ nɔ yì gbɔn é. . . . Awǎjijɛ sín hwenu ɖé wɛ é ɖó na nyí nú ye lɔmɔ̌.” Kpo xomɛhunhun kpo wɛ mɛ ɖěɖee è ylɔ́ wá alɔwliwli ɖé domɛ lɛ é na kpɔ́n lee nǔ lɛ na yì gbɔn ɖò alɔwliwli ɔ domɛ é. Mɔ̌ ɖokpo ɔ, kpo xomɛhunhun kpo wɛ lɛngbɔ̌ ɖevo lɛ nɔ wá Flǐn ɔ domɛ, bo na dó kpɔ́n lee nǔ lɛ na yì gbɔn é.

7. Etɛwu xóɖiɖɔ Flǐn tɔn ɔ sise ka nɔ sɔ́ akpakpa lɛngbɔ̌ ɖevo lɛ?

⁷ Lɛngbɔ̌ ɖevo lɛ lɔ nɔ dó nukún nukúnɖiɖó yetɔn mɛ kpɔ́n. Akpakpa nɔ ɖò ye sɔ́ wɛ dó xóɖiɖɔ Flǐn ɔ tɔn sise wu, ɖó akpáxwé gegě nɔ kɛnu dó nǔ e Klisu kpo mɛ 144 000 e na kp’acɛ xá ɛ lɛ é kpo na wà nú gbɛtɔ́ gbejinɔtɔ́ lɛ ɖò Axɔ́suɖuɖu Xwè Afatɔ́n tɔn ɔ hwenu é wu. Ðò hwenu e Axɔ́su Jezu Klisu na ɖò acɛ kpa wɛ é ɔ, mɛ ɖěɖee na kp’acɛ xá ɛ sín jixwé lɛ é na d’alɔ bɔ ayikúngban ɔ bǐ na huzu palaɖisi, lobo lɛ́ d’alɔ gbɛtɔ́ lɛ bonu ye na huzu mɛ maɖóblɔ̌. Enyi gbɛtɔ́ livi mɔ̌kpan e ɖò lɛngbɔ̌ ɖevo lɛ mɛ lɛ é yì Flǐn ɔ domɛ, lobo dó nukún sɔgudo yetɔn mɛ kpɔ́n, hwenu e nǔɖɔɖ’ayǐ Biblu tɔn lɛ na ɖò jijɛnu wɛ é ɔ, enɛ na sɔ́ akpakpa ye kpɔ́n! Nǔɖɔɖ’ayǐ  enɛ lɛ ɖé lɛ ɖò Ezayíi 35:5, 6; 65:21-23 kpo Nǔɖexlɛ́mɛ 21:3, 4 kpo mɛ. Enyi ye dó nukún gbɛ̀ yɔyɔ̌ ɔ mɛ kpɔ́n, bɔ ye kpo mɛvívɛ́ yetɔn lɛ kpo ɖò kpɔ́ ɔ, enɛ na hɛn nukúnɖiɖó sɔgudo tɔn yetɔn lidǒ, lobo lɛ́ na hlɔnhlɔn kán e ye kánɖeji, bo ma na jó Jehovah sinsɛn dó kpɔ́n gbeɖé ǎ é.—Mat. 24:13; Ga. 6:9.

8. Ðɔ hwɛjijɔ ɖevo e wu lɛngbɔ̌ ɖevo lɛ nɔ yì Flǐn ɔ domɛ é.

⁸ Kpɔ́n hwɛjijɔ ɖevo e wu lɛngbɔ̌ ɖevo lɛ nɔ yì Flǐn ɔ domɛ é. Ye nɔ jló na xlɛ́ mɛ yí ami dó ɖè lɛ ɖɔ emi yí wǎn nú ye, lobo lɛ́ jló na nɔ gudo nú ye. Xó Mawu tɔn ɖɔ ɖ’ayǐ ɖɔ kancica syɛnsyɛn ɖé na ɖò mɛ yí ami dó ɖè lɛ kpo mɛ ɖěɖee ɖó nukúnɖiɖó ayikúngban jí tɔn lɛ é kpo tɛntin. Gbɔn nɛ̌ é? Mi nú mǐ ni ɖɔ xó dó kpɔ́ndéwú klewun ɖé lɛ jí.

9. Etɛ nǔɖɔɖ’ayǐ e ɖò Zakalíi 8:23 mɛ é ka ɖexlɛ́ dó lee nǔ nɔ cí nú lɛngbɔ̌ ɖevo lɛ dó mɛ yí ami dó ɖè lɛ wu é wu?

⁹ Xà Zakalíi 8:23. Nǔɖɔɖ’ayǐ enɛ tinmɛ lee nǔ nɔ cí nú lɛngbɔ̌ ɖevo lɛ dó nɔví sunnu kpo nɔví nyɔnu kpo yetɔn yí ami dó ɖè lɛ wu é. Mɛ ɖokpo ɔ lɛ dó gesí wɛ xógbe “Jwifu ɖokpo” kpo xókwín “mi” ɔ kpo ɖè, enɛ wɛ nyí mɛ yí ami dó ɖè e kpò ɖò ayikúngban jí lɛ é. (Hlɔ. 2:28, 29) ‘Jonɔ wǒ e ye mɛ ɖokpo ɖokpo nɔ dó gbè vovo lɛ é’ nɔte nú lɛngbɔ̌ ɖevo lɛ. Ye “hɛn . . . majomajo,” enɛ wɛ nyí ye tɛ́dó mɛ yí ami dó ɖè lɛ wu kpo gbejininɔ kpo, bo gɔ́ nú ye bonu ye na nɔ kpɔ́, bo sɛn Mawu lee é ba gbɔn é. Enɛ wɛ zɔ́n bɔ lɛngbɔ̌ ɖevo lɛ nɔ yì Flǐn ɔ domɛ dó ɖexlɛ́ ɖɔ ye tɛ́dó mɛ yí ami dó ɖè lɛ wu gbánwúngbánwún.

10. Bo na dó bló bɔ nǔɖɔɖ’ayǐ e ɖò Ezekiyɛli 37:15-19, 24, 25 mɛ é na jɛnu ɔ, etɛ Jehovah ka wà?

¹⁰ Xà Ezekiyɛli 37:15-19, 24, 25. Jehovah dɔn mɛ yí ami dó ɖè lɛ kpo lɛngbɔ̌ ɖevo lɛ kpo ɖó kpɔ́ bɔ ye ɖò bǔ bo lidǒ ganji, lobo gbɔn mɔ̌ mɛ bo bló bɔ nǔɖɔɖ’ayǐ enɛ lɛ jɛnu. Nǔɖɔɖ’ayǐ ɔ ɖɔ xó dó kpò we wu. Kpò “Judáa tɔn” (enɛ wɛ nyí akɔta e mɛ è nɔ sɔ́ axɔ́su Izlayɛli tɔn lɛ ɖè é) nɔte nú mɛ ɖěɖee ɖó nukúnɖiɖó jixwé tɔn lɛ é, bɔ kpò “Eflayimu tɔn” * ɔ nɔte nú mɛ ɖěɖee ɖó nukúnɖiɖó ayikúngban jí tɔn lɛ é. Jehovah na dɔn mɛ ɖěɖee ɖó nukúnɖiɖó ayikúngban jí tɔn lɛ é kpo mɛ ɖěɖee ɖó nukúnɖiɖó jixwé tɔn lɛ é kpo ɖó bǔ bonu ye na huzu “kpò ɖokpo.” Enɛ byɔ ɖɔ ye na nɔ bǔ bo sɛn Mawu ɖò Klisu Jezu ee nyí Axɔ́su ɖokpo e ye ɖó é sín acɛkpikpa glɔ́. Xwewu xwewu ɔ, mɛ yí ami dó ɖè lɛ kpo lɛngbɔ̌ ɖevo lɛ kpo nɔ nɔ kpɔ́ bo nɔ yì Flǐn ɔ domɛ “lɛngbɔ̌hwan ɖokpo” ee ɖó ‘lɛngbɔ̌nyitɔ́ ɖokpo’ é ɖɔhun.—Jaan 10:16.

11. Ðɔ ali taji e nu “lɛngbɔ̌ lɛ” e xó è ɖɔ ɖò Matie 25:31-36, 40 mɛ é nɔ nɔ gudo nú nɔví Klisu tɔn lɛ ɖè é ɖokpo.

¹¹ Xà Matie 25:31-36, 40. “Lɛngbɔ̌ lɛ” ee xó lǒ enɛ ɖɔ é nɔte nú ayijlɔjlɔ́nɔ ɖěɖee ɖò gbɛ̀ ɖò azǎn gudogudo tɔn lɛ mɛ, bo ɖó nukúnɖiɖó ayikúngban jí tɔn lɛ é; ye wɛ nyí lɛngbɔ̌ ɖevo lɛ. Ye nɔ d’alɔ nɔví Klisu tɔn yí ami dó ɖè e kpò ɖò ayikúngban ɔ jí lɛ é bonu ye na w’azɔ̌ titewungbe ɖé, enɛ wɛ nyí wɛnɖagbe ɔ jijlá kpo nǔkplɔnkplɔn mɛ lɛ bonu ye na huzu ahwanvu kpo sín azɔ̌ wiwa gbɔn gbɛ̀ ɔ bǐ mɛ; mɔ̌ mɛ ɔ, ye nɔ xlɛ́ ɖò ali ɖé nu ɖɔ emi ɖò gudo nú ye kpo gbejininɔ kpo.—Mat. 24:14; 28:19, 20.

12-13. Ali ɖevo tɛ lɛ nu mɔ̌ lɛngbɔ̌ ɖevo lɛ ka nɔ xlɛ́ ɖɔ ye ɖò gudo nú nɔví Klisu tɔn lɛ ɖè?

¹² Xwewu xwewu ɔ, ɖò aklunɔzán gbla e nɔ jɛ nukɔn nú Flǐn ɔ lɛ é mɛ ɔ, lɛngbɔ̌  ɖevo lɛ nɔ ɖ’alɔ ɖò nǔjlajlá e gbɔn gbɛ̀ ɔ bǐ mɛ é ɖé mɛ mlɛ́mlɛ́, bo nɔ ylɔ́ mɛ e jló lɛ é nú Flǐn ɔ, lobo nɔ xlɛ́ gbɔn mɔ̌ ɖɔ emi ɖò gudo nú nɔví Klisu tɔn lɛ. (Kpɔ́n gbǎví “ A ka Ðò Nǔ Sɔ́ Ð’ayǐ nú Flǐn Sín Táan ɔ Wɛ À?”) Gɔ́ na ɔ, agun gegě tíìn bo ɖó nɔví yí ami dó ɖè ɖě ǎ có, lɛngbɔ̌ ɖevo lɛ ka nɔ wà nǔ e wu ye kpé é bǐ bonu Flǐn ɔ na dó sixu yì ganji ɖò agun lɛ bǐ mɛ, gbɔn gbɛ̀ ɔ bǐ mɛ. Kpo xomɛhunhun kpo wɛ lɛngbɔ̌ ɖevo lɛ nɔ nɔ gudo nú nɔví Klisu tɔn lɛ ɖò ali enɛ lɛ nu. Lɛngbɔ̌ enɛ lɛ tuùn ɖɔ Jezu nɔ kpɔ́n nǔ e ye ɖò wiwa nú nɔví yí ami dó ɖè tɔn lɛ wɛ é dó mɔ nǔ e ye ɖò wiwa nú emiɖesunɔ mɛtún ɔ wɛ lɛ é.—Mat. 25:37-40.

¹³ Enyi mǐ na bo tlɛ ɖó nukúnɖiɖó ɖebǔ ɔ, hwɛjijɔ ɖevo tɛ lɛ wu mɔ̌ mǐ bǐ ka nɔ yì Flǐn ɔ domɛ?

14. Nɛ̌ Jehovah kpo Jezu kpo ka ɖexlɛ́ ɖɔ emi yí wǎn ɖaxó nú mǐ gbɔn?

¹⁴Wanyiyi e Jehovah kpo Jezu kpo ɖexlɛ́ mǐ é nɔ sù nukún mǐtɔn mɛ. Jehovah ɖexlɛ́ ɖɔ emi yí wǎn nú mǐ ɖò ali gegě nu, amɔ̌, ali enɛ lɛ ɖokpo tíìn bo hugǎn ɖě lɛ bǐ. Mawu mǐtɔn sɛ́ Vǐ vívɛ́ná tɔn dó, b’ɛ jiya bo kú dó ta mǐtɔn mɛ; mɔ̌ mɛ ɔ, Mawu xlɛ́ mǐ ɖɔ emi ɖó wanyiyi e ma ɖó cejɛnnabi ǎ é nú mǐ. (Jaan 3:16) Mǐ tuùn ɖɔ Jezu ɖesunɔ sɔ́ jlǒ dó sɔ́ gbɛ̀ tɔn jó dó ta mǐtɔn mɛ dó xlɛ́ ɖɔ emi yí wǎn nú mǐ. (Jaan 15:13) Mǐ sixu sú wanyiyi e Jehovah kpo Jezu kpo ɖexlɛ́ mǐ é sín axɔ́ ye gbeɖé ǎ. Amɔ̌, mǐ sixu gbɔn lee mǐ nɔ zán gbɛ̀ gbɔn ayihɔngbe ayihɔngbe e sín yɛkan mɛ dó xlɛ́ ɖɔ nǔ e ye wà é sù nukún mǐtɔn mɛ. (Kolo. 3:15) Gɔ́ na ɔ, mǐ nɔ yì Flǐn ɔ domɛ ɖó mǐ jló na lin tamɛ dó wanyiyi e ye ɖexlɛ́ mǐ é jí, bo lɛ́ ba na ɖè wanyiyi enɛ xlɛ́ ye lɔmɔ̌.

15. Etɛwu nǔnina gbɛxɔnúmɛ tɔn ɔ ka nɔ sù mɛ yí ami dó ɖè lɛ kpo lɛngbɔ̌ ɖevo lɛ kpo nukúnmɛ tawun?

¹⁵Nǔnina gbɛxɔnúmɛ tɔn ɔ nɔ sù nukún mǐtɔn mɛ tawun. (Mat. 20:28) Gbɛxixɔ ɔ nɔ sù nɔví yí ami dó ɖè lɛ nukúnmɛ tawun, ɖó é wɛ zɔ́n bɔ ye ɖó nukúnɖiɖó ɖaaɖagbe yetɔn. Ðó ye ɖó nǔɖiɖi nú vɔsisa Klisu tɔn wutu ɔ, Jehovah ylɔ́ ye ɖɔ hwɛjijɔnɔ, bo sɔ́ ye dó ɖó vǐ. (Hlɔ. 5:1; 8:15-17, 23) Gbɛxixɔ ɔ nɔ sù lɛngbɔ̌ ɖevo lɛ lɔ nukúnmɛ. Nǔɖiɖi e ye ɖó nú vɔsisa Klisu tɔn é zɔ́n bɔ ye nyí mɛ mímɛ́ ɖò Mawu nukɔn, bo sixu sɛn ɛ ɖò ali e mɛ́ é ɖé nu, lobo lɛ́ ɖó nukúnɖiɖó ɔ, bo na xò “ya ɖaxó ɔ” zlɛ́. (Nǔɖe. 7:13-15) Ali e nu mɛ yí ami dó ɖè lɛ kpo lɛngbɔ̌ ɖevo lɛ kpo bǐ nɔ xlɛ́ ɖɔ gbɛxixɔ ɔ sù nukún emitɔn mɛ ɖè é ɖokpo wɛ nyí ɖɔ ye nɔ yì Flǐn ɔ domɛ xwewu xwewu.

16. Ðɔ hwɛjijɔ ɖevo e wu mǐ nɔ yì Flǐn ɔ domɛ é.

¹⁶ Hwɛjijɔ e wu mǐ nɔ yì Flǐn ɔ domɛ é ɖevo wɛ nyí ɖɔ mǐ jló na setónú nú Jezu. Mǐ na bo ɖó nukúnɖiɖó sɔgudo tɔn ɖebǔ ɔ, mǐ bǐ nɔ sɔ́ jlǒ dó setónú nú gbè elɔ e Jezu ɖè hwenu e é sɔ́ Flǐn ɔ núwiwa ɖ’ayǐ gbadanu enɛ é: “Mi na nɔ bló gbɔn lě dó flín mì na.”—1 Kɔ. 11:23, 24.

17. Nɛ̌ Flǐn ɔ domɛ yiyi ka nɔ d’alɔ mǐ bɔ mǐ nɔ sɛkpɔ́ Jehovah gbɔn?

¹⁷Mǐ nɔ sɛkpɔ́ Jehovah. (Ja. 4:8) Lee mǐ ko mɔ gbɔn é ɔ, Flǐn ɔ nɔ hun ali nú mǐ bɔ mǐ nɔ lin tamɛ dó nukúnɖiɖó e Jehovah na mǐ é kpo wanyiyi ɖaxó e é ɖexlɛ́ mǐ é kpo jí. (Jel. 29:11; 1 Jaan 4:8-10) Enyi mǐ nɔ lin tamɛ dó nukúnɖiɖó sɔgudo tɔn mǐtɔn e ɖó jiɖe é kpo wanyiyi e ma nɔ vɔ́  gbeɖé ǎ bɔ Mawu ɖó nú mǐ é kpo jí ɔ, wanyiyi e mǐɖesunɔ ɖó nú Jehovah é nɔ syɛn d’eji, bɔ mǐ kpo é kpo nɔ lɛ́ vɛ́.—Hlɔ. 8:38, 39.

18. Etɛ tamɛ linlin dó kpɔ́ndéwú Jezu tɔn jí ka nɔ sísɛ́ mǐ bɔ mǐ nɔ wà?

¹⁸Kpɔ́ndéwú Jezu tɔn xwixwedó nɔ sɔ́ akpakpa mǐ. (1 Pi. 2:21) Ðò azǎn e jɛ nukɔn nú Flǐn ɔ lɛ é jí ɔ, mǐ nɔ sɔ́ ayi ɖó tan Biblu tɔn e kúnkplá aklunɔzán gbla gudogudo tɔn e Jezu bló ɖò ayikúngban jí é, kú tɔn kpo fínfɔ́n sín kú tɔn kpo xixa jí. Enɛ gudo ɔ, xoɖiɖɔ Flǐn ɔ tɔn nɔ wá flín mǐ ɖɔ Jezu yí wǎn nú mǐ. (Efɛ. 5:2; 1 Jaan 3:16) Ee mǐ na ɖò nǔ xà dó kpɔ́ndéwú mɛɖée sɔ́ dó savɔ̌ tɔn Jezu tɔn jí wɛ, bo na lɛ́ ɖò tamɛ lin d’eji wɛ é ɔ, mǐ na mɔ ɖɔ é ɖò dandan ɖɔ mǐ ni ‘zán gbɛ̀ lee éɖesunɔ zán gbɛ̀ tɔn gbɔn é.’—1 Jaan 2:6.

19. Nɛ̌ mǐ ka sixu hɛn mǐɖée ɖò wanyiyi Mawu tɔn mɛ gbɔn?

¹⁹Mǐ tlɛ nɔ lɛ́ kánɖeji hugǎn bo na hɛn mǐɖée ɖò wanyiyi Mawu tɔn mɛ. (Judi 20, 21) Mǐ nɔ wà nǔ e wu mǐ kpé é bǐ dó setónú nú Mawu, bló bɔ nyikɔ tɔn na nyí nǔ mímɛ́, lobo lɛ́ hɛn xomɛ hun i dó hɛn mǐɖée ɖò wanyiyi tɔn mɛ. (Nǔx. 27:11; Mat. 6:9; 1 Jaan 5:3) Flǐn ɔ domɛ yiyi nɔ sísɛ́ mǐ bɔ mǐ nɔ kánɖeji hugǎn bo na zán gbɛ̀ ayihɔngbe ayihɔngbe ɖò ali ɖé nu b’ɛ na cí ɖɔ mǐ ɖò xó elɔ ɖɔ nú Jehovah wɛ ɖɔhun: ‘Un jló na hɛn nyiɖée ɖò wanyiyi towe mɛ kaka sɔyi!’

20. Hwɛjijɔ ɖaaɖagbe tɛ lɛ mǐ ka ɖó bo na yì Flǐn ɔ domɛ?

²⁰ Mǐ na bo ɖó nukúnɖiɖó ɔ bo na nɔ gbɛ̀ kaka sɔyi ɖò jixwé, alǒ ɖò ayikúngban jí ɔ, mǐ ɖó hwɛjijɔ ɖaaɖagbe gegě bo na yì Flǐn ɔ domɛ. Enyi mǐ kplé xwewu xwewu ɖò azǎn enɛ jí ɔ, mǐ nɔ flín kú mɛ e mǐ yí wǎn na tawun é ɖé tɔn, enɛ wɛ nyí Jezu Klisu. Hugǎn bǐ ɔ, mǐ nɔ flín wanyiyi-núwiwa ɖaxó bǐ ɔ, enɛ wɛ nyí wanyiyi e Jehovah ɖexlɛ́ mǐ, bo sɛ́ Vǐ tɔn dó b’ɛ xɔ gbɛ̀ nú mǐ é. Ðò xwè elɔ mɛ ɔ, vendredi 15 avril 2022 gbadanu wɛ mǐ na bló Flǐn ɔ. Mǐ yí wǎn nú Jehovah kpo Vǐ tɔn kpo, enɛ wu ɔ, ɖò xwekpéxwenu kú Jezu tɔn tɔn ɔ, nǔ ɖebǔ sixu ɖò taji hugǎn nú mǐ hú Flǐn ɔ domɛ yiyi ǎ.