1. Nɛ̌ mǐ ka sixu zán hwenu ɖó kpɔ́ xá Jehovah gbɔn?

MǏ NƆ yí wǎn nú hwenu zinzán ɖó kpɔ́ xá mɛ e mǐ yí wǎn na lɛ é. Nǔɖe sɔ́ nɔ víví nú asú kpo asì kpo awǎjijɛnɔ ɖé hú ɖɔ ye ni zán hwenu ɖagbe ɖó kpɔ́ ganji ɖò gbadanu ɖé ǎ. Mɛ winnyawinnya lɛ nɔ ɖu vivǐ nǔwiwa ɖó kpɔ́ xá xɔ́ntɔn yetɔn lɛ tɔn. Gɔ́ na ɔ, mǐ mɛ bǐ wɛ hwenu zinzán ɖó kpɔ́ xá nǔɖitɔ́ hatɔ́ mǐtɔn lɛ nɔ víví na. Amɔ̌, taji hugǎn ɔ, mǐ nɔ yí wǎn nú hwenu zinzán ɖó kpɔ́ xá Mawu. Mǐ sixu wà mɔ̌ gbɔn ɖɛ xixo sɛ́dó è, Xó tɔn xixa, tamɛ linlin dó linlin tɔn lɛ kpo jijɔ tɔn ɖaaɖagbe lɛ kpo jí gblamɛ. Nǔgbo ɔ, hwenu e mǐ nɔ zán ɖó kpɔ́ xá Jehovah é nɔ xɔ akwɛ tawun!—Ðɛh. 139:17.

2. Wuvɛ̌ tɛ mǐ ka nɔ mɔ?

² Nǔgbo wɛ ɖɔ mǐ nɔ ɖu vivǐ hwenu zinzán ɖó kpɔ́ xá Jehovah tɔn, amɔ̌, é ka nɔ bɔwǔ hwebǐnu ǎ. Alɔnu mǐtɔn nɔ wá ján sɔmɔ̌, b’ɛ nɔ vɛwǔ bɔ mǐ na mɔ hwenu nú nǔ gbigbɔ tɔn lɛ. Agbazazɔ́, xwédo kpo nǔ tawun tawun ɖevo lɛ kpo sixu zɔ́n bɔ mǐ na mɔ ɖɔ mǐ kún sɔ́ ɖó hwenu bo na xoɖɛ, kplɔ́n nǔ, alǒ lin tamɛ ó.

3. Nǔ ɖevo tɛ ka nɔ lɛ́ xò hwenu mǐtɔn yí?

³ Nǔ ɖevo tíìn bo sixu lɛ́ xò hwenu mǐtɔn yí. Nǔɖe lɛ tíìn bo nyla ǎ, amɔ̌, enyi ayi mǐtɔn ma ɖò te ǎ ɔ, ye sixu xò hwenu e mǐ na zán dó vɛ́ kpo Jehovah kpo é yí ɖò mǐ sí. Kpɔ́ndéwú tɔn ɖokpo nɛ nyí ayiɖeɖayǐ nɛ. Mǐ mɛ bǐ wɛ nɔ ba na ɖè ayi ɖ’ayǐ hweɖelɛnu. Amɔ̌, ayiɖeɖayǐ lɛ sixu nyí ɖagbe có, ye sixu ɖu hwenu mǐtɔn bǐ, bɔ hwenu kpɛɖé jɛn na kpò nú nǔ gbigbɔ tɔn lɛ. É byɔ ɖɔ mǐ ni zé ayiɖeɖayǐ ɖó tɛn e jɛxa é mɛ.—Nǔx. 25:27; 1 Tim. 4:8.

4. Etɛ lɛ jí mǐ ka na ɖɔ xó dó dìn?

⁴ Ðò xóta elɔ mɛ ɔ, mǐ na gbéjé nǔ e wu mǐ ɖó na wá gbeta nǔ e ɖò taji hugǎn ɖò gbɛzán mǐtɔn mɛ lɛ é tɔn kɔn é kpɔ́n. Mǐ na lɛ́ ɖɔ xó dó lee mǐ sixu zán hwenu mǐtɔn ganji  ɖó kpɔ́ xá Jehovah gbɔn é, kpo lee hwenu mǐtɔn e mǐ zán ganji kpo nǔnywɛ kpo é sixu hɛn lè wá gbɔn é kpo wu.

5. Nɛ̌ wěɖexámɛ e ɖò Efɛzinu lɛ 5:15-17 mɛ é ka sixu d’alɔ mɛ winnyawinnya ɖé, b’ɛ na wá gbeta ɖagbe hugǎn ɔ kɔn ɖò gbɛzán tɔn mɛ gbɔn?

⁵Wǎ gbeta ɔ kɔn, bo na zán gbɛ̀ ɖagbe hugǎn ɖé. Hwɛhwɛ ɔ, nǔ e nɔ ɖu ayi mɛ nú mɛ winnyawinnya lɛ é wɛ nyí lee ye na zán gbɛ̀ yetɔn ganji gbɔn é. Ðò alɔ ɖevo mɛ ɔ, mɛ̌si e nɔ ɖè wě xá mɛ lɛ é kpo hɛ̌nnumɔ yetɔn e ma nyí nǔɖitɔ́ ǎ lɛ é kpo sixu nɔ dó wusyɛn lanmɛ nú ye ɖɔ ye ni nya wema kplɔnkplɔn ɖaxó ɖaxó lɛ gbé, enɛ na zɔ́n bɔ ye na ɖó azɔ̌ ɖagbe ɖé, bo na nɔ ɖu akwɛ gegě. Wema kplɔnkplɔn alɔkpa enɛ ka sixu ɖu hwenu gegě ɖò ye sí. Ðò alɔ ɖevo mɛ ɔ, mɛjitɔ́ lɛ kpo xɔ́ntɔn e ɖò agun ɔ mɛ lɛ é kpo sixu nɔ dó wusyɛn lanmɛ nú mɛ winnyawinnya lɛ ɖɔ ye ni zán gbɛ̀ ɖò sinsɛnzɔ́ Jehovah tɔn mɛ. Etɛ ka sixu d’alɔ mɛ winnyawinnya e yí wǎn nú Jehovah é ɖé, b’ɛ na wá gbeta ɖagbe hugǎn ɔ kɔn? Efɛzinu lɛ 5:15-17 xixa kpo tamɛ linlin d’eji kpo na d’alɔ ɛ. (Xà.) Enyi mɛ winnyawinnya ɖé xà wemafɔ enɛ lɛ gudo ɔ, é sixu kanbyɔ éɖée ɖɔ: ‘Etɛ Jehovah ka ‘jló ɖɔ má wà’? Gbeta tɛ kɔn è ka sixu wá, b’ɛ na dó xomɛhunhun n’i? Gbeta tɛ kɔn un ka na wá, b’ɛ na zɔ́n bɔ un na zán hwenu ce ganji hugǎn?’ Flín ɖɔ, “hwenu e mǐ ɖè ɔ nyɔ́ ǎ,” bɔ gbɛ̀ elɔ e nu kp’acɛ dó wɛ Satáan ɖè é na wá vivɔnu zaanɖé dìn. Nǔnywɛnú wɛ é na nyí ɖɔ mǐ ni zán gbɛ̀ mǐtɔn ɖò ali ɖé nu, b’ɛ na dó xomɛhunhun nú Jehovah.

6. Gbeta tɛ kɔn Mali ka wá? Etɛwu è ka sixu ɖɔ ɖɔ gbeta e nǔnywɛ kpé é ɖé wɛ?

⁶Nya nǔ e ɖò taji hugǎn lɛ é gbé. Hweɖelɛnu ɔ, nǔ we e ɖě ma nyla ǎ é sixu wá jɛ nukɔn mǐtɔn, bɔ enyi mǐ jló na zán hwenu mǐtɔn ganji ɔ, mǐ ɖó na sɔ́ ɖokpo ɖò ye mɛ. Tan e mǐ tuùn ganji, b’ɛ kúnkplá ba e Jezu yì ba Mali kpo Mata kpo kpɔ́n ɖò xwé yetɔn gbè é ɖè enɛ xlɛ́. Xomɛ hun Mata tawun ɖɔ Jezu wá ba ye kpɔ́n, enɛ wu ɔ, é ɖò nǔɖuɖu ɖaaɖagbe ɖé ɖa n’i wɛ. Amɔ̌, nɔví nyɔnu tɔn Mali jinjɔn Aklunɔ kpá, bo ɖò tó ɖó nǔkplɔnmɛ tɔn lɛ wɛ. Nǔgbo wɛ ɖɔ linlin ɖagbe e Mata ɖó é wɛ sísɛ́ ɛ bɔ é jɛ nǔ mɔ̌hun wà jí, amɔ̌, Mali “wɛ ka sɔ́ akpá ɖagbe ɔ.” (Luk. 10:38-42.) Nukɔnmɛ ɔ, Mali sixu wá wɔn nǔɖuɖu e è xwlé mɛ gbè enɛ gbè é, amɔ̌, mǐ sixu kúdeji ɖɔ é kún na wɔn nǔ e é kplɔ́n ɖò Jezu gɔ́n lɛ é gbeɖé ó. Lee Mali ma lɔn bɔ nǔɖe dín wǔ tɔn ɖò hwenu klewun enɛ e Jezu nɔ kpɔ́ xá ye na é mɛ ǎ é ɔ, mɔ̌ wɛ mǐ lɔ nɔ wlíbo nú hwenu e mǐ nɔ zán ɖó kpɔ́ xá Jehovah é gbɔn. Nɛ̌ mǐ ka sixu zán hwenu mǐtɔn ganji gbɔn?

7. Etɛwu é ka ɖò taji tawun ɖɔ mǐ ni nɔ xoɖɛ, kplɔ́n nǔ, bo nɔ lɛ́ lin tamɛ?

⁷Mɔ nǔ jɛ wu ɖɔ ɖɛxixo, nǔkplɔnkplɔn kpo tamɛ linlin kpo ɖò Mawu sinsɛn mǐtɔn mɛ. Enyi mǐ nɔ xoɖɛ hǔn, xó ɖɔ ɖó kpɔ́ xá Tɔ́ mǐtɔn jixwé tɔn e yí wǎn nú mǐ tawun é wɛ mǐ ɖè nɛ. (Ðɛh. 5:8) Enyi mǐ ɖò Biblu kplɔ́n wɛ ɔ, mǐ nɔ “mɔ nǔ jɛ lee è nɔ tuùn Mawu” ee nyí Jɔtɛn nǔnywɛ lɛ bǐ tɔn é gbɔn é wu. (Nǔx. 2:1-5) Nú mǐ ɖò tamɛ lin wɛ ɔ, mǐ nɔ gbéjé jijɔ ɖaaɖagbe Jehovah tɔn lɛ kpɔ́n, gɔ́ nú linlin e é nɔ ɖó dó nǔɖiɖó tɔn lɛ bǐ wu kaka jɛ mǐ lɔ jí é. A ka sixu lin tamɛ dó ali ɖagbe hugǎn e nu a sixu zán hwenu towe ɖè é jí à? Amɔ̌, etɛ ka sixu d’alɔ mǐ bɔ mǐ na wà mɔ̌?

8. Etɛ lee Jezu zán hwenu tɔn gbɔn ɖò gbetótló mɛ é ka kplɔ́n mǐ?

 ⁸Enyi é nyɔ́ bló hǔn, ba fí e ɖò tóó é ɖé. Ð’ayi kpɔ́ndéwú Jezu tɔn wu. Cobonu é na bɛ́ sinsɛnzɔ́ tɔn ayikúngban jí tɔn ɔ, é tó nɔ gbetótló mɛ nú azǎn 40 hwɛ̌. (Luk. 4:1, 2) Ðò fí enɛ e ɖò tóó é ɔ, Jezu sixu ko xoɖɛ sɛ́dó Jehovah, lobo lɛ́ lin tamɛ dó linlin e Tɔ́ tɔn nɔ ɖó dó wǔ tɔn é jí. Enɛ d’alɔ Jezu, bɔ é kúdeji ɖɔ emi ɖò gbesisɔmɛ nú mɛtɛnkpɔn e na wá kpannukɔn emi ɖò malin-malin mɛ lɛ é. Nɛ̌ kpɔ́ndéwú Jezu tɔn ka sixu d’alɔ we gbɔn? Enyi xwédo e mɛ mɛ gegě ɖè é ɖé mɛ wɛ a ɖè ɔ, é sixu vɛwǔ nú we bɔ a na mɔ fí e ɖò tóó é ɖé ɖò xwégbe. Ðò ninɔmɛ enɛ mɛ ɔ, a sixu ba fí e jɛxa é ɖé ɖò fí ɖevo. Nú Julie ba na zán hwenu ɖó kpɔ́ xá Jehovah ɖò ɖɛ mɛ ɔ, mɔ̌ wɛ é nɔ wà. Xwé kpɛví ɖé gbè wɛ é kpo asú tɔn kpo nɔ nɔ ɖò France, bɔ é ka nɔ vɛwǔ tawun bonu è na nɔ mɛɖokpo, b’ɛ na lɛ́ nyí nú táan gegě. Julie tinmɛ ɖɔ: “Enɛ wu ɔ, hwelɛbǐnu wɛ un nɔ ɖisa gbɔn jikpá ɖé mɛ. Un sixu nɔ nyiɖokpo ɖò finɛ, bɔ nǔɖe na fɛ́ ayi ce ǎ, lobɔ un sixu lɛ́ vo bo ɖɔ xó nú Jehovah ɖò finɛ.”

9. Jezu sín alɔnu nɔ ján tawun có, nɛ̌ é ka nɔ xlɛ́ ɖɔ kancica e ɖò emi kpo Jehovah kpo tɛntin é xɔ akwɛ gbɔn?

⁹ Alɔnu Jezu tɔn nɔ ján tawun. Ðò sinsɛnzɔ́ tɔn hwenu ɖò ayikúngban jí ɔ, é jɛ fí ɖebǔ ɔ, gbɛtɔ́ lɛ nɔ ɖò gudo tɔn, bɔ ye bǐ nɔ ba ɖɔ é ni zán hwenu ɖó kpɔ́ xá emi. Ðò ninɔmɛ ɖé mɛ ɔ, “tò ɔ bǐ sésé wá kplé ɖò xwé e gbè Jezu ɖè ɔ sín hɔntogbo jí,” bo ba na mɔ ɛ. É na bo tlɛ nyí ɖò ninɔmɛ mɔ̌hun lɛ mɛ ɔ, Jezu nɔ mɔ nǔ jɛ wu hwelɛbǐnu ɖɔ emi ɖó hwenu bo na xoɖɛ sɛ́dó Jehovah. Cobonu hwe na tɔ́n ɔ, é “tɔ́n yì fí e mɛɖé ma na dó tagba n’i ɖè ǎ é,” bo na dó sixu zán hwenu ɖó kpɔ́ xá Tɔ́ tɔn éɖokpo.—Mak. 1:32-35.

10-11. Sɔgbe xá Matie 26:40, 41 ɔ, wě e jɛ gan é tɛ Jezu ka ɖè xá ahwanvu tɔn lɛ ɖò jikpá Jɛtisemaníi tɔn mɛ? Amɔ̌, etɛ ka jɛ?

¹⁰ Hwenu e sinsɛnzɔ́ Jezu tɔn xwè vivɔnu, ɖò zǎn e jɛ nukɔn nú kú tɔn é mɛ é ɔ, é lɛ́ ba fí e ɖò tóó é ɖé, bo na dó sixu lin tamɛ, bo lɛ́ xoɖɛ. É mɔ fí mɔ̌hun ɖé ɖò jikpá Jɛtisemaníi tɔn mɛ. (Mat. 26:36) Ðò ninɔmɛ enɛ mɛ ɔ, Jezu ɖè wě e jɛ gan é ɖé xá ahwanvu tɔn lɛ dó ɖɛxixo wu.

¹¹ Ð’ayi nǔ e jɛ é wu. Hwenu e ye wá jikpá Jɛtisemaníi tɔn mɛ é ɔ, ganmɛ ko yì tawun, bɔya gan wěwe zanmɛ tɔn ko xò dín. Jezu ɖɔ nú mɛsɛ́dó lɛ ɖɔ ye ni “nɔ wunzɛn,” bɔ éyɛ ɖidó ɖɛ xò gbé. (Mat. 26:37-39) Hwenu e é ɖò ɖɛ xò wɛ é ɔ, yedɛɛ lɛ ɖò amlɔ dɔ́ wɛ. Ee é mɔ ye bɔ ye ɖò amlɔ dɔ́ wɛ é ɔ, é byɔ ye ɖɔ ye ni “nɔ wunzɛn bo xoɖɛ.” (Xà Matie 26:40, 41.) É ɖ’ayi wu ɖɔ ye ɖò aluwɛ ɖaxó ɖé mɛ, bɔ  nǔ lɛ́ cikɔ nú ye. Wuvɛ̌sexámɛ zɔ́n bɔ Jezu mɔ nǔ jɛ wu ɖɔ ‘agbaza kún ɖó gǎn ɖé ó.’ Azɔn we jɛji wɛ Jezu yì xoɖɛ, amɔ̌, nú é lɛkɔ wá ahwanvu tɔn lɛ gɔ́n ɔ, é nɔ mɔ bonu ye nɔ ɖò ɖɛ xò wɛ ǎ, loɔ, amlɔ dɔ́ wɛ ye nɔ ɖè.—Mat. 26:42-45.

12. Enyi hweɖelɛnu ɔ, mǐ nɔ ɖó linkpɔ́n tawun, alǒ nǔ nɔ cikɔ nú mǐ kaka bɔ mǐ nɔ sixu xoɖɛ ǎ ɔ, etɛ mǐ ka sixu wà?

¹²Ba hwenu e jɛxa dó é. Hweɖelɛnu ɔ, lě dò mǐ ɖó linkpɔ́n sɔ, alǒ lě dò nǔ cikɔ nú mǐ sɔ é sixu zɔ́n bɔ mǐ gɔ́n ɖɛ xò. Enyi nǔ mɔ̌hun nɔ xá we hǔn, tuùn ɖɔ é kún nyí hwiɖokpo wɛ ó. Etɛ a ka sixu wà? Mɛ ɖěɖee nɔ xoɖɛ sɛ́dó Jehovah ɖò gbadanu lɛ é ɖé lɛ wá mɔ ɖɔ é nyɔ́ tawun ɖɔ ye ni nɔ xoɖɛ ɖò gbadanu cawun hwenu e nǔ ma ko cikɔ nú ye sɔmɔ̌ ǎ é. Mɛ ɖevo lɛ nɔ mɔ ɖɔ lee ye nɔ nɔ dó xoɖɛ é sixu wà ɖagbe tawun. Amɔ̌, nú a ka ɖó linkpɔ́n dín, alǒ awakanmɛ kú we tawun dó ɖɛxixo wu ɔ ka lo? Ðɔ lee nǔ cí nú we é nú Jehovah. A sixu kúdeji ɖɔ Tɔ́ nǔblawukúnumɛtɔ́ mǐtɔn na mɔ nǔ jɛ mɛ.—Ðɛh. 139:4.

13. Nɛ̌ alokan mǐtɔn lɛ ka sixu fɛ́ ayi mǐtɔn hwenu e mǐ ɖò hwenu zán ɖó kpɔ́ xá Jehovah wɛ é gbɔn?

¹³Ny’alɔ nú nǔ ɖěɖee na fɛ́ ayi towe hwenu e a ɖò nǔ kplɔ́n wɛ lɛ é. Ðɛxixo kɛɖɛ wɛ nyí ali ɖokpo e mǐ na gbɔn dó na hlɔnhlɔn kancica e ɖò mǐ kpo Jehovah kpo tɛntin é ǎ. Xó Mawu tɔn kplɔnkplɔn kpo kplé agun tɔn lɛ yiyi kpo sixu d’alɔ mǐ bɔ mǐ na sɛkpɔ́ Mawu. Etɛ a ka sixu wà dó zán hwenu e a nɔ dó kplɔ́n nǔ é kpo hwenu e a nɔ zán ɖò kplé lɛ sín domɛ é kpo ganji? Kanbyɔ hwiɖée ɖɔ: ‘Etɛ lɛ ka nɔ fɛ́ ayi ce ɖò kplé lɛ hwenu, alǒ hwenu e un ɖò tintɛnkpɔn wɛ bá kplɔ́n nǔ é?’ Ylɔ̌ e è nɔ ylɔ́ mì ɖò alokan jí lɛ é, kabǐ nǔ e è nɔ wlán sɛ́dó mì ɖò alokan, alǒ nǔ mɔ̌hun ɖevo lɛ jí é wɛ à? Égbé ɔ, gbɛtɔ́ liva mɔ̌kpan wɛ ɖó alokan alǒ azɔ̌wanú mɔ̌hun ɖevo lɛ. Dobanúnǔtɔ́ ɖé lɛ ɖɔ ɖɔ enyi mǐ ɖò tintɛnkpɔ́n wɛ bo na zé ayi mǐtɔn ɖó nǔɖe jí bɔ alokan na bo tlɛ ɖò akpá mǐtɔn vɔ́vɔ́ ɔ, enɛ sixu fɛ́ ayi mǐtɔn. Mɛ̌si nǔkplɔnmɛtɔ́ e nɔ kplɔ́n nǔ dó lee taglo gbɛtɔ́ tɔn nɔ w’azɔ̌ gbɔn é jí é ɖé ɖɔ: “Enyi è ɖò tamɛ lin dó nǔ ɖevo jí wɛ ɔ, ayi mɛtɔn bǐ sixu nɔ nǔ e wà wɛ è ɖè é jí ǎ.” Cobonu kpléɖókpɔ́ lɛ na bɛ́ ɔ, hwɛhwɛ wɛ è nɔ ɖɔ nú mǐ ɖɔ mǐ ni sɔ́ alokan mǐtɔn lɛ ɖó alɔ ɖé jí bonu é ma wá fɛ́ ayi mɛ  ɖevo lɛ tɔn ó. Mǐ ka sixu wà nǔ ɖokpo ɔ hwenu e mǐ ɖò mǐɖokpo é, bonu alokan mǐtɔn ma wá fɛ́ ayi mǐtɔn, bo lɛ́ d’avaja hwenu e zán ɖó kpɔ́ xá Jehovah wɛ mǐ ɖè é mɛ ó à?

14. Sɔgbe xá Filipunu lɛ 4:6, 7 ɔ, nɛ̌ Jehovah ka sixu d’alɔ mǐ bɔ mǐ na zé ayi mǐtɔn ɖó nǔ ɖokpo jí gbɔn?

¹⁴Byɔ̌ Jehovah ɖɔ é ni d’alɔ we bonu a na nɔ sɔ́ ayi ɖó nǔ ɖokpo jí. Enyi a ɖ’ayi wu ɖɔ hwenu e a ɖò Biblu kplɔ́n wɛ é, alǒ hwenu e a ɖò kplé agun tɔn ɖé jí é ɔ, a nɔ jɛ tamɛ lin dó nǔ ɖevo jí jí hǔn, byɔ̌ Jehovah ɖɔ ni d’alɔ we. Enyi ado ɖò huhu we wɛ, alǒ a ɖò linkpɔ́n mɛ ɔ, é sixu vɛwǔ bɔ a na xò nǔ e zɔ́n bɔ nǔ cí mɔ̌ nú we é nyi kɛ́n, bo zé ayi ɖó nǔ gbigbɔ tɔn lɛ jí, amɔ̌, é ka ɖò taji tawun ɖɔ a ni wà mɔ̌. Xoɖɛ bo byɔ fífá e na bló ayi towe ɖó, bo na lɛ́ bló “linlin towe lɛ” ɖó é.—Xà Filipunu lɛ 4:6, 7.

15. Ðɔ ɖagbe e hwenu zínzán ɖó kpɔ́ xá Jehovah nɔ wà lɛ é ɖokpo.

¹⁵ Enyi a nɔ zán hwenu dó ɖɔ xó nú Jehovah, ɖótó è, bo nɔ lɛ́ lin tamɛ dó jǐ tɔn ɔ, a na ɖu lè tɔn tawun. Gbɔn nɛ̌ é? Nǔkɔntɔn, a na wá gbeta ɖagbe lɛ kɔn. Biblu na mǐ ganjɛwu elɔ: “A dó nǔnywɛtɔ́ há ɔ, a na huzu nǔnywɛtɔ́.” (Nǔx. 13:20) Enɛ wu ɔ, enyi a nɔ zán hwenu ɖó kpɔ́ xá Jehovah e nyí Jɔtɛn nǔnywɛ tɔn é ɔ, a na ɖó nǔnywɛ tawun. A na mɔ nǔ jɛ lee a na nɔ wà nǔ e na nɔ nyɔ́ nukún tɔn mɛ lɛ é gbɔn é kpo lee a na nyi alɔ nú gbeta e na nɔ dó xomɛsin n’i lɛ é kɔn wiwa gbɔn é kpo wu.

16. Nɛ̌ hwenu zínzán ɖó kpɔ́ xá Jehovah ka nɔ zɔ́n bɔ mǐ nɔ kplɔ́n nǔ mɛ ganji gbɔn?

¹⁶ Wegɔ́, a na huzu nǔkplɔnmɛtɔ́ dagbe ɖé. Nú mǐ ɖò Biblu kplɔ́n xá mɛɖé wɛ ɔ, nǔ taji hugǎn e gbé mǐ nɔ nya é wɛ nyí ɖɔ mǐ na d’alɔ Biblu kplɔntɔ́ mǐtɔn b’ɛ na vɛ́ kpo Jehovah kpo. Lě dò mǐ nɔ ɖɔ xó ɖó kpɔ́ xá Tɔ́ jixwé tɔn mǐtɔn sɔ é ɔ, mɔ̌ dò wɛ wǎn e mǐɖesunɔ mɛtún ɔ yí n’i é na jɛji sɔ; mɔ̌ mɛ ɔ, mǐ na kpéwú hugǎn bo d’alɔ nǔkplɔntɔ́ mǐtɔn bɔ é lɔ na yí wǎn n’i. Lin tamɛ dó kpɔ́ndéwú Jezu tɔn jí. É zán xógbe e dɔn mɛ lɛ é, xógbe e wanyiyi kpé lɛ é dó ɖɔ xó dó Tɔ́ tɔn wu bɔ enɛ d’alɔ ahwanvu tɔn gbejinɔtɔ́ lɛ, bo lɛ́ zɔ́n bɔ ye yí wǎn nú Jehovah tawun.—Jaan 17:25, 26.

17. Etɛwu ɖɛxixo kpo nǔkplɔnkplɔn kpo ka sixu d’alɔ mǐ bɔ mǐ na na hlɔnhlɔn nǔɖiɖi mǐtɔn?

¹⁷ Atɔngɔ́, nǔɖiɖi towe na lidǒ d’eji. Enyi a byɔ Jehovah ɖɔ é ni xlɛ́ ali we, dó gbɔ nú we, alǒ ni nɔ gudo nú we ɔ, dǒ nukún nǔ e nɔ jɛ é mɛ kpɔ́n. Hweɖebǔnu e Jehovah na sinkɔn nú ɖɛ enɛ lɛ é ɔ, nǔ e a ɖi  n’i é na lɛ́ lidǒ d’eji. (1 Jaan 5:15) Nǔ ɖevo tɛ ka sixu na hlɔnhlɔn nǔɖiɖi towe? Nǔkplɔnkplɔn mɛɖesunɔ tɔn. È na ɖɔ ɔ, “nǔ e sè wɛ è ɖè ɔ mɛ wɛ nǔɖiɖi nɔ tɔ́n sín.” (Hlɔ. 10:17) Amɔ̌, nǔɖiɖi e lidǒ é ɖé ɖiɖó nɔ byɔ nǔ hú nǔkplɔnkplɔn kpowun. Nǔ ɖevo tɛ sín hudo mǐ ka lɛ́ ɖó?

18. Nǎ kpɔ́ndéwú e xlɛ́ nǔ e wu mǐ ɖó na nɔ lin tamɛ é ɖé.

¹⁸ É byɔ ɖɔ mǐ ni nɔ lin tamɛ dó nǔ e kplɔ́n wɛ mǐ ɖè é jí. Ð’ayǐ kpɔ́ndéwú mɛ e wlán Ðɛhan 77gɔ́ é tɔn wu. É byɔ linkpɔ́n mɛ ɖó é mɔ ɖɔ nǔ emi kpo Izlayɛli-ví hatɔ́ emitɔn lɛ kpo tɔn kún sɔ́ nɔ nyɔ́ Jehovah nukúnmɛ ó. Linlin mɔ̌hun lɛ nɔ ɖó amlɔ ma dɔ́ n’i. (Wemafɔ 3-9) Etɛ é ka wà? É ɖɔ nú Jehovah ɖɔ: “Un na lin tamɛ dó nǔ e a bló lɛ wu, un na lin tamɛ dó azɔ̌ ɖaxó ɖaxó e a wà lɛ wu.” (Wemafɔ 13) Nǔgbo ɔ, ɖɛhanwlántɔ́ ɔ tuùn nǔ ɖěɖee Jehovah ko wà nú togun tɔn wá yì lɛ é ganji, amɔ̌, é kpò ɖò kinkanbyɔ éɖée wɛ ɖɔ: “Mawu sɔ́ flín ɖɔ emi nɔ wà fɛ́nú nú mǐ ǎ cé? É sin xomɛ ɔ, é sɔ́ na kú nǔblawu nú mǐ ǎ wɛ à?” (Wemafɔ 10) Ðɛhanwlántɔ́ ɔ lin tamɛ dó nǔ ɖěɖee Jehovah ko wà wá yì lɛ é jí, bo lɛ́ lin tamɛ dó nǔ ɖěɖee xlɛ́ ɖɔ Mawu ɖè nǔblawukúnúmɛ kpo wuvɛ̌sexámɛ kpo xlɛ́ wá yì lɛ é jí. (Wemafɔ 12) Etɛ mɛ enɛ ka tɔ́n kɔ dó? Ðɛhanwlántɔ́ ɔ wá kúdeji ɖɔ Jehovah kún na jó togun tɔn dó ó. (Wemafɔ 16) Ðò ali ɖokpo ɔ nu ɔ, enyi a nɔ lin tamɛ dó nǔ e Jehovah ko wà nú togun tɔn wá yì lɛ é kpo nǔ e é ko wà nú hwiɖesunɔ mɛtún ɔ lɛ é kpo jí ɔ, nǔɖiɖi towe na lidǒ d’eji.

19. Nǔ ɖevo tɛ sín lè hwenu zínzán ɖó kpɔ́ xá Jehovah ka na zɔ́n bɔ mǐ na ɖu?

¹⁹ Ɛnɛgɔ́, ee ɖò taji hugǎn é wɛ nyí ɖɔ wǎn e a yí nú Jehovah é na gɔ́ngɔ́n. Jijɔ e ɖò taji hugǎn, bo na zɔ́n bɔ a na setónú nú Jehovah é wɛ nyí wanyiyi; é na lɛ́ d’alɔ we bɔ a na savɔ̌ e na dó xomɛhunhun n’i lɛ é, lobo lɛ́ dɛ ɖò tagba ɖebǔ nu. (Mat. 22:37-39; 1 Kɔ. 13:4, 7; 1 Jaan 5:3) Nǔ ɖevo ɖebǔ sɔ́ ɖò taji hú kancica wanyiyi tɔn syɛnsyɛn ɖé ɖiɖó xá Jehovah ǎ!—Ðɛh. 63:2-9.

20. Nɛ̌ a ka sixu bló tuto bo mɔ hwenu bo zán ɖó kpɔ́ xá Jehovah gbɔn?

²⁰ Flín ɖɔ ɖɛxixo, nǔkplɔnkplɔn kpo tamɛ linlin kpo ɖò Mawusinsɛn mǐtɔn mɛ. Jezu ɖɔhun ɔ, nɔ ba fí e ɖò tóó lɛ é, bo nɔ zán hwenu ɖó kpɔ́ xá Jehovah. Nyi alɔ nú nǔ e ma ɖò dandan ɖɔ ye ni fɛ́ ayi towe ǎ lɛ é. Enyi a ɖò alɔ ɖó ɖò azɔ̌ gbigbɔ tɔn lɛ mɛ wɛ hǔn, nɔ byɔ Jehovah ɖɔ é ni d’alɔ we bonu a na sɔ́ ayi towe ɖó fí ɖokpo. Enyi a nɔ zán hwenu towe ganji dìn ɔ, Jehovah na sɔ́ gbɛ̀ mavɔmavɔ dó d’ajɔ we.—Mak. 4:24.