1-2. Étɛ́ mǐ ka ɖó ná kpo ɖo wiwa wɛ ɖo batɛ́mu mǐtɔn gúdo? Tínmɛ.

 AZƆN nabí a ka nɔ jlá xɔ towe mɛ ɖó? Bóyá, cóbónú a ná yi jɛ xɔ ɔ mɛ ɔ, a xwe sɔ bo jlá ɖó. Amɔ̌, ényí a ma ka sɔ́ jlá ɖó ɖě ǎ ɔ, étɛ́ ka ná jɛ? Lěe a tuun gbɔn é ɔ, é ná yá wǔ kwíji. Cóbónú xɔ towe mɛ ná nɔ nɔ mǐmɛ́ jí ɔ, é byɔ́ ɖɔ a ní nɔ jlá ɖó hwɛhwɛ.

² Ðo ali ɖokpó ɔ nu ɔ, mǐ ɖó ná kpo ɖo azɔ̌ wa wɛ ɖo linlin mǐtɔn kpó mɛ alɔkpa e mǐ nyí é kpó wú. É ɖo wɛn ɖɔ cóbónú mǐ ná bló batɛ́mu ɔ, mǐ ko w’azɔ̌ syɛ́nsyɛ́n bo bló hǔzúhúzú e ɖo dandan lɛ́ é ɖo gbɛzán mǐtɔn mɛ, bo ná dó “slá wǔ nú agbaza kpó [gbigbɔ] kpó” mǐtɔn. (2 Kɔ. 7:1) Amɔ̌ din ɔ, é byɔ́ ɖɔ mǐ ní xwedó wěɖexámɛ mɛsɛ́dó Pɔ́lu tɔn e ɖɔ ɖɔ mǐ ɖó ná ‘kpo ɖo ayixa mǐtɔn kpódó linlin mǐtɔn kpó húzú wɛ bǐ kpéte’ é. (Efɛ́. 4:23, nwt) Aniwú mǐ ka ɖó ná kpo ɖo gǎn dó wɛ? Ðó bléwún jɛ́n gbɛ élɔ́ sixú wa nǔ dó mǐ wú bɔ mǐ ná húzú mɛ blíblí ɖo Jexóva nukɔn. Ényí nǔ mɔ̌hun ma ná jɛ ǎ, bɔ mǐ ná kpo ɖo mɛ mímɛ́ nyí wɛ ɖo Jexóva nukɔn ɔ, mǐ ɖó ná nɔ gbéjé linlin mǐtɔn, mɛ alɔkpa e mǐ nyí é kpó jlǒ mǐtɔn lɛ́ kpó kpɔ́n hwɛhwɛ.

3. Étɛ́ ka nyí tínmɛ “ayi [mɛtɔn] sín hǔzúhúzú” tɔn? (Hlɔ̌manu lɛ́ 12:2)

³ Étɛ́ é ka byɔ́ ɖɔ mǐ ní wa cóbá húzú ayi mǐtɔn, énɛ́ wɛ nyí lěe mǐ nɔ lin nǔ gbɔn é? (Xa Hlɔ̌manu lɛ́ 12:2.) È sixú tínmɛ xógbe Glɛ̌kigbe tɔn e è tínmɛ bɔ é nyí “ayi mitɔn sín hǔzúhúzú”  é, bɔ é lɛ́ nyí “azɔ̌ wa ɖo linlin mɛtɔn wú.” Hǔn, énɛ́ ɖo xlɛ́xlɛ́ wɛ ɖɔ é kún nyí nǔ ɖagbe kwín we ɖé kpowun wɛ mǐ ná wa ó. É nyɔ́ wa ɔ, mǐ ɖó ná gbéjé mɛ alɔkpa e mǐ nyí ɖo ayi gɔngɔn mǐtɔn mɛ é kpɔ́n, bo bló hǔzúhúzú ɖěbǔ e é byɔ́ é, énɛ́ ɔ, mǐ ná se tónú nú nǔgbódodó Jexóva tɔn lɛ́ lěe mǐ kpé wú gbɔn é bǐ. Azɔn ɖokpó wɛ mǐ ɖó ná wa mɔ̌ ǎ, loɔ, mǐ ɖó ná kpo ɖo mɔ̌ wa wɛ.

4. Nɛ̌ mǐ ka sixú wa gbɔn bɔ gbɛ élɔ́ ma ná wa nǔ dó linlin mǐtɔn lɛ́ wú ǎ?

⁴ Ényí mǐ húzú mɛ maɖóblɔ̌ ɔ, mǐ ná kpé wú bo ná nɔ wa nǔ e nɔ nyɔ́ Jexóva nukúnmɛ é hwebǐnu. Din hwɛ̌ ɔ, mǐ ɖó ná kpo ɖo azɔ̌ syɛ́nsyɛ́n wa wɛ bónú nǔ mǐtɔn ná dó nyɔ́ Jexóva nukúnmɛ. Ð’ayi wú ɖɔ ɖo Hlɔ̌manu lɛ́ 12:2 mɛ ɔ, Pɔ́lu ɖɔ ɖɔ é byɔ́ ɖɔ mǐ ní húzú ayi mǐtɔn bá dó tuun nǔ e Mawu ba ɖɔ mǐ ní wa é. Mǐ ɖó ná lɔn nú gbɛ nyanya élɔ́ ná wa nǔ dó mǐ wú ǎ, é nyɔ́ wa ɔ, nǔ nukɔntɔn e mǐ ná wa é wɛ nyí ɖɔ mǐ ná gbéjé mǐɖée kpɔ́n, bo ná kpɔ́n lě do mǐ nɔ jó linlin Mawu tɔn lɛ́ dó, bɔ yě nɔ xlɛ́ ali nǔ e gbé nya wɛ mǐ ɖe lɛ́ é kpó gbeta e kɔn mǐ nɔ wa lɛ́ é kpó gbɔn é.

5. Étɛ́ lɛ́ mǐ ka ɖó ná nɔ kanbyɔ́ mǐɖée dó lě do azǎn Jexóva tɔn ko sɛkpɔ́ sɔ é wú? (Kpɔ́n fɔtóo ɔ.)

⁵ Kpɔ́ndéwú ɖé ɖíe. Jexóva ba ɖɔ mǐ ní “hɛn azǎn [émítɔn] ayi mɛ ganjí.” (2 Pi. 3:12) Kanbyɔ́ hwiɖée ɖɔ: ‘Lěe un nɔ zán gbɛ gbɔn é ka nɔ xlɛ́ ɖɔ un tuun ɖɔ gbɛ élɔ́ sín vivɔnu ko sɛkpɔ́ a? Gbeta ɖěɖěe kɔn un wá dó wěma kplɔ́nkplɔ́n, alǒ azɔ̌ e un ná wa é wú é ka xlɛ́ ɖɔ Jexóva sinsɛn wɛ nyí nǔ tají hú gǎn ɔ ɖo gbɛzán ce mɛ a? Un ka kú d’é jí ɖɔ Jexóva ná kpé nukún dó nyi kpó xwédo ce kpó wú a, alǒ un nɔ ɖo adohu adohu jí dó nǔ agbaza tɔn lɛ́ wú?’ Ényí mǐ ɖo tíntɛ́nkpɔ́n wɛ bá wa jlǒ Jexóva tɔn ɖo nǔ e mǐ nɔ wa lɛ́ é bǐ mɛ ɔ, xomɛ nɔ hun i tawun.—Mat. 6:25-27, 33; Filí. 4:12, 13.

 ⁶ É byɔ́ ɖɔ mǐ ní nɔ gbéjé linlin mǐtɔn kpɔ́n hwɛhwɛ, bo nɔ bló hǔzúhúzú ɖěbǔ e jɛxá é. Pɔ́lu ɖɔ nú Kɔlɛ́ntinu lɛ́ ɖɔ: “Mi tɛ́n miɖée kpɔ́n, bo kíjé ayi miɖée tɔn mɛ kpɔ́n ɖɔ émí nɔ zán gbɛ ɖo nǔɖiɖi mɛ a jí?” (2 Kɔ. 13:5) Gbɛ zínzán “ɖo nǔɖiɖi mɛ” byɔ́ nǔ hú kplé klisánwun tɔn lɛ́ yiyi kpó alɔ ɖíɖó ɖo sinsɛnzɔ́ ɔ mɛ sín hweɖénu jɛ hweɖénu kpó. Lěe mǐ nɔ lin nǔ gbɔn é, nǔ e ɖo ayi gɔngɔn mǐtɔn mɛ lɛ́ é kpó nǔ e nɔ sísɛ́ mǐ bɔ mǐ nɔ wa nǔ lɛ́ é kpó lɔ ɖ’é mɛ. Énɛ́ wú ɔ, mǐ ɖó ná kpo ɖo linlin mǐtɔn lɛ́ húzú wɛ gbɔn Xó Mawu tɔn xixa, kplɔ́nkplɔ́n bo nɔ lin nǔ éɖɔhun kpó nǔ ɖěbǔ e é ɖo dandan ɖɔ mǐ ní wa bónú linlin mǐtɔn ná dó sɔgbe xá jlǒ Mawu tɔn lɛ́ é kpó wiwa gblamɛ.—1 Kɔ. 2:14-16.

7. Sɔgbe xá Efɛ́zinu lɛ́ 4:31, 32 ɔ, nǔ ɖěvo tɛ́ mǐ ka ɖó ná wa? Aniwú é ka sixú vɛ́ wǔ?

⁷ Xa Efɛ́zinu lɛ́ 4:31, 32. Gbɔn vo nú azɔ̌ wiwa ɖo linlin mǐtɔn lɛ́ wú ɔ, mǐ ɖó ná lɛ́ “sɔ́ gbɛtɔ́ yɔ̌yɔ́ ɔ dó.” (Efɛ́. 4:24) Énɛ́ byɔ́ ɖɔ mǐ ɖó ná ɖe afɔ ɖé lɛ́. Jijɔ baɖabaɖa élɔ́ lɛ́ ɖo nǔ e mǐ ɖó ná dó gǎn bo jó dó lɛ́ é mɛ: akpɔmimɔ, aɖi ɖíɖó kpó xomɛsin kpó. Étɛ́wú énɛ́ ka sixú vɛ́ wǔ? Ðó é sixú vɛ́ wǔ tawun bɔ è ná jó jijɔ nyanya ɖé lɛ́ dó. Ði kpɔ́ndéwú ɔ, Biblu ɖɔ ɖɔ mɛɖé lɛ́ nyí “xomɛsinnɔ,” bo nɔ “ɖo adǎn jí.” (Nǔx. 29:22) Kpɔ́ndéwú élɔ́ e bɔ d’é wú é xlɛ́ ɖɔ è na bo tlɛ ko bló batɛ́mu ɔ, é ná ɖibla byɔ́ gǎndídó tɛgbɛ tɔn cóbɔ è ná ɖu ɖo jijɔ mɔ̌hun lɛ́ jí.

8-9. Nɛ̌ kpɔ́ndéwú Stephen tɔn ka xlɛ́ ɖɔ é byɔ́ ɖɔ mǐ ní kpo ɖo gbɛtɔ́ xóxó ɔ ɖe nyi ayǐ wɛ gbɔn?

⁸ Nɔví súnnu ɖokpó nɔ nyí Stephen, bɔ é nɔ vɛ́ wǔ n’i bɔ é ná ɖu ɖo xomɛsin tɔn jí. É ɖɔ: “Un ko bló batɛ́mu có, un ɖó ná lɛ́ kpo ɖo gǎn dó wɛ bá ɖu ɖo xomɛ e un nɔ sin é jí.” Ði kpɔ́ndéwú ɔ, gbe ɖokpó tíin bɔ un ɖo mawuxó ɖɔ wɛ sín xwé ɖé gbe jɛ xwé ɖé gbe, bɔ ajotɔ́ ɖokpó fin hladíó ɖo mɔ̌to ce mɛ, bɔ un jɛ nyinya ɛ jí. Ée un ɖibla wlí i é ɔ, é da hladíó ɔ dó gbě. Ée un tínmɛ lěe un yí hladíó ce gbɔn é nú mɛ ɖěvo e kpó nyi kpó ɖo kpɔ́ lɛ́ é ɔ, mɛxó agun tɔn e ɖo gbɛ̌ta ɔ mɛ lɛ́ é ɖokpó kanbyɔ́ mì ɖɔ: ‘Stephen, ényí a ko wlí i wɛ ɔ, étɛ́ a ka ná wa?’ Nǔkanbyɔ́ énɛ́ zɔ́n tamɛ lin mì, bo lɛ́ sísɛ́ mì bɔ un ná kpo ɖo gǎn dó wɛ bá xo fífá kan.” b

⁹ Lěe kpɔ́ndéwú Stephen tɔn xlɛ́ gbɔn é ɔ, jijɔ nyanya ɖé sixú wá xwetɔ́n ajijimɛ, ényí mǐ ná bo tlɛ lin ɖɔ mǐ ko li fɛn ná ɔ nɛ́. Ényí nǔ mɔ̌hun jɛ hǔn, ma nú awakanmɛ kú we ó, ma ka lin ɖɔ klisánwunnyí wɛ émí jɛ kpowun ó. Mɛsɛ́dó Pɔ́lu tlɛ yí gbe ɖɔ: “Un jló ná wa ɖagbe hweɖébǔnu ɔ, nǔ nyanya kɛ́ɖɛ́ wú jɛ́n un nɔ kpé, bo nɔ wa.” (Hlɔ̌. 7:21-23) Klisánwun lɛ́ bǐ wɛ ɖó ná ɖí xwi xá jijɔ nyanya e nɔ lɛ́ wá xwetɔ́n lɛ́ é, lěe kɔ́ kpó afúntúntún kpó nɔ lɛ́ wá gɔ́ xɔ mǐtɔn mɛ é ɖɔhun. Mǐ ɖó ná kpo ɖo gǎn dó wɛ, bo ná nɔ nɔ mǐmɛ́ jí. Nɛ̌ mǐ ka sixú wa énɛ́ gbɔn?

10. Nɛ̌ mǐ ka sixú li za xá jijɔ nyanya lɛ́ gbɔn? (1 Jaan 5:14, 15)

¹⁰ Xo ɖɛ sɛ́dó Jexóva dó jijɔ e a ɖo tíntɛ́nkpɔ́n wɛ bo ná jó dó é takúnmɛ, bo ɖeji ɖɔ é ná se, lobo d’alɔ we. (Xa 1 Jaan 5:14, 15.) Jexóva ná bló nǔjíwǔ dó ɖe jijɔ énɛ́ síin ǎ có, é sixú ná we hlɔ̌nhlɔ́n bɔ a ná jó gbe ǎ. (1 Pi. 5:10) Din hwɛ̌ ɔ, nɔ wa nǔ sɔgbe xá ɖɛ towe lɛ́ gbɔn alɔ nyinyi nú nǔ ɖěbǔ e ná zɔ́n bɔ gbɛtɔ́ xóxó ɔ ná lɛ́ wá xwetɔ́n é gblamɛ. Ði kpɔ́ndéwú ɔ, nɔ ɖ’ayi te dó fímu, tuto televizyɔn jí tɔn lɛ́, alǒ tan e nɔ sɔ́ jijɔ e a ɖo tíntɛ́nkpɔ́n wɛ bo ná li fɛn ná lɛ́ é su lɛ́ é wú.  Gɔ́ ná ɔ, ma nɔ ɖo tamɛ lin dó linlin masɔgbe lɛ́ jí wɛ magbokɔ ó.—Filí. 4:8; Koló. 3:2.

11. Afɔ tɛ́ lɛ́ mǐ ka sixú ɖe, bo ná kpo ɖo gbɛtɔ́ yɔ̌yɔ́ ɔ sɔ́ dó wɛ?

¹¹ A ko ɖe gbɛtɔ́ xóxó ɔ nyi ayǐ, amɔ̌, é ɖo tají ɖɔ a ní sɔ́ mɛ yɔ̌yɔ́ ɔ dó. Nɛ̌ a ka sixú wa mɔ̌ gbɔn? Ényí a ɖo nǔ kplɔ́n dó jijɔ Jexóva tɔn lɛ́ wú wɛ hǔn, tɛ́n kpɔ́n bo nɔ wa nǔ éɖɔhun. (Efɛ́. 5:1, 2) Ði kpɔ́ndéwú ɔ, ényí a ɖo tan Biblu tɔn e ɖɔ xó dó hwɛsɔ́kɛmɛ Jexóva tɔn jí é xa wɛ hǔn, nɔ kanbyɔ́ hwiɖée ɖɔ: ‘Un ka nɔ sɔ́ hwɛ kɛ mɛ ɖěvo lɛ́ a?’ Tan gěgé ɖo Biblu mɛ, bo xlɛ́ ɖɔ Jexóva nɔ se wǔvɛ́ xá mɛ ɖěɖěe gbɔn ninɔmɛ vɛ́ wǔ lɛ́ mɛ lɛ́ é. Ényí a ɖo tan mɔ̌hun lɛ́ xa wɛ hǔn, nɔ kanbyɔ́ hwiɖée ɖɔ: ‘Nǔ ka nɔ cí mɔ̌ nú mì dó nǔɖitɔ́ hǎtɔ́ e ɖo hudó mɛ lɛ́ é wú, bɔ un nɔ ɖe xlɛ́ ɖo nǔwiwa ce lɛ́ mɛ a?’ Nɔ húzú linlin towe gbɔn gbɛtɔ́ yɔ̌yɔ́ ɔ sísɔ́ dó kpó suúlu ɖíɖó dó hwiɖée wú hwenu e a ná ɖo mɔ̌ wa wɛ é kpó gblamɛ.

12. Nɛ̌ kpɔ́ndéwú Stephen tɔn ka xlɛ́ ɖɔ Biblu ɖó agbɔ̌n bo nɔ húzú gbɛzán gbɛtɔ́ lɛ́ tɔn gbɔn?

¹² Stephen e xó mǐ ɖɔ wá yi é ɖɔ ɖɔ kpɛɖé kpɛɖé wɛ émí sɔ́ gbɛtɔ́ yɔ̌yɔ́ ɔ dó. É ɖɔ: “Sín hwenu e un bló batɛ́mu é ɔ, ninɔmɛ e nɔ sɔ́ suúluɖíɖó ce ɖ’axɔ́ nu lɛ́ é gěgé mɛ wɛ un gbɔn. Un kplɔ́n bo nɔ gbɔn zɔzɔ nú mɛ ɖěɖěe nɔ tɛ́n kpɔ́n bá ba nǔɖɔ mì lɛ́ é, alǒ un nɔ sɔ́ alɔ ɖěvo dó ɖu ninɔmɛ ɔ ná. Mɛ gěgé, káká jɛ asi ce jí kpa mì, ɖó alɔ e un sɔ́ dó ɖu ninɔmɛ énɛ́ lɛ́ ná é wú. É tlɛ nɔ kpácá nyiɖésú! Un sixú xɔ súsú nú nyiɖée ɖó hǔzúhúzú énɛ́ lɛ́ e un bló ɖo gbɛzán ce mɛ é wú ǎ. É nyɔ́ wa ɔ, un kú d’é jí ɖɔ hǔzúhúzú énɛ́ lɛ́ xlɛ́ ɖɔ Biblu ɖó agbɔ̌n bo ná húzú gbɛzán mɛ lɛ́ tɔn.”

13. Étɛ́ wiwa ka ná d’alɔ mǐ bɔ mǐ ná nyi alɔ nú jlǒ nyanya lɛ́? (Galátinu lɛ́ 5:16)

¹³ Xa Galátinu lɛ́ 5:16. Bo ná dó d’alɔ mǐ bónú mǐ ná ɖu ɖo gǎn e dó wɛ mǐ ɖe bá wa nǔ ɖagbe é jí ɔ, Jexóva nɔ hun alɔ dó ná gbigbɔ mímɛ́ tɔn mǐ. Ényí mǐ nɔ kplɔ́n Xó Mawu tɔn hǔn, tɛn ná gbigbɔ mímɛ́ tɔn wɛ mǐ ɖe mɔ̌ nɛ́. Kplé mǐtɔn lɛ́ lɔmɔ̌ yiyi nɔ zɔ́n bɔ mǐ nɔ mɔ gbigbɔ mímɛ́. Ðo kplé klisánwun tɔn énɛ́ lɛ́ jí ɔ, mǐ sixú zán hwenu ɖó kpɔ́ xá nɔví mǐtɔn e ɖo tíntɛ́nkpɔ́n wɛ bá wa nǔ ɖagbe mǐ ɖɔhun lɛ́ é, bɔ énɛ́ nɔ dó wǔsyɛ́n lanmɛ nú mǐ. (Ebl. 10:24, 25; 13:7, nwt) Gɔ́ ná ɔ, ényí mǐ xo ɖɛ vívɛ́ sɛ́dó Jexóva, bo sa vo n’i ɖɔ é ní d’alɔ mǐ ɖo gǎnmaɖó mǐtɔn lɛ́ mɛ ɔ, é ná ná mǐ gbigbɔ mímɛ́ tɔn, bɔ gbigbɔ mímɛ́ énɛ́ ná ná mǐ hlɔ̌nhlɔ́n, bɔ mǐ ná kpó ɖo za li xá gǎnmaɖó ɔ wɛ. Nǔ énɛ́ lɛ́ wiwa sixú gɔn jlǒ nyanya lɛ́ ɖe síin có, yě ka ná d’alɔ mǐ bɔ mǐ ná dɛ ɖo zɛn e ɖo mǐ sɔ́ wɛ bɔ mǐ ná wa nǔ nyanya é nu. Lěe Galátinu lɛ́ 5:16 ɖɔ gbɔn é ɔ, mɛ ɖěɖěe nɔ jó yěɖée dó bɔ gbigbɔ mímɛ́ nɔ xlɛ́ ali yě lɛ́ é “ná wa jlǒ agbaza tɔn ɖěbǔ ǎ.”

14. Étɛ́wú é ka ɖo tají ɖɔ mǐ ní kpo ɖo tíntɛ́nkpɔ́n wɛ bá ɖó jlǒ ɖagbe lɛ́?

¹⁴ Ényí mǐ jɛ nǔ e ná zɔ́n bɔ mǐ kpó Jexóva kpó ná vɛ́ d’é jí lɛ́ é wa jí ɔ, é ɖo tají ɖɔ mǐ ní kpo ɖo nǔ énɛ́ lɛ́ wa wɛ, bo lɛ́ kpo ɖo linlin e sɔgbe lɛ́ é ɖó wɛ. Aniwú? Ðó kɛntɔ́ mǐtɔn lɛ́ ɖokpó tíin bɔ éyɛ́ ná gɔn za li xá mǐ gbeɖé ǎ. Kɛntɔ́ énɛ́ wɛ nyí nǔnyanyawiwa sín zɛn e nɔ sɔ́ mǐ é. Ényí mǐ ná bo tlɛ ko bló batɛ́mu ɔ, nǔ ɖěɖěe mǐ tuun ɖɔ mǐ ɖó ná nyi alɔ ná lɛ́ é sixú lɛ́ jɛ mǐ jló jí; nǔ énɛ́ lɛ́ ɖé lɛ́ wɛ nyí akɔ dida, ahan syɛ́nsyɛ́n nunu zɛ xwé wú kpó fɔtóo nǔblíblíwiwa tɔn kpínkpɔ́n kpó. (Efɛ́. 5:3, 4) Nɔví súnnu wínnyáwínnyá ɖokpó yí gbe ɖɔ: “Nǔ e vɛ́ wǔ nú mì tawun bɔ un ná ɖí xwi xá lɛ́ é ɖokpó wɛ nyí wǎn yí nú mɛ e kpó nyi kpó ɖó mɛ̌ ɖokpó ɔ é. Un tuun ɖɔ un ná wá ɖu ɖo mɔ̌ e nǔ nɔ cí nú mì é jí, amɔ̌, din hwɛ̌ ɔ, un kpo ɖo wǔvɛ́ tɔn se wɛ.” Ényí  nǔnyanyawiwa e sín zɛn ɖo sísɔ́ we wɛ é wá syɛ́n bǐ ɔ, étɛ́ ka sixú d’alɔ we?

15. Mǐ tuun ɖɔ mɛ ɖěvo lɛ́ lɔ ɖo xwi ɖí xá jlǒ nyanya e ɖí xwi xá wɛ mǐ ɖe lɛ́ é wɛ. Étɛ́wú mɔ̌ e mǐ tuun é ka nɔ dó gbɔ nú mǐ? (Kpɔ́n fɔtóo ɔ.)

¹⁵ Ényí a ɖo xwi ɖi xá jlǒ nyanya e dó ve bǐ é ɖé wɛ hǔn, flín ɖɔ é kún nyí hwiɖokpónɔ wɛ ɖo ninɔmɛ mɔ̌hun mɛ gbɔn wɛ ó. Biblu ɖɔ: “Mi mɔ tɛ́nkpɔ́n ɖěbǔ zɛ ée gbɛtɔ́ nɔ mɔ é wú ǎ.” (1 Kɔ. 10:13a) Biblu ɖěvo tínmɛ akpáxwé énɛ́ gbɔn lě: “Mi ko mɔ tɛ́nkpɔ́n ɖě bɔ é zɛ ée gbɛtɔ́ lɛ́ nɔ mɔ hwɛhwɛ é wú ǎ.” Klisánwun ɖěɖěe ɖo Kɔlɛ́nti lɛ́ é wɛ è wlán xó énɛ́ lɛ́ sɛ́dó. Yě mɛ ɖé lɛ́ ko nɔ lɛ aga, nɔ ɖó xó xá mɛ e kpó yě kpó ɖó mɛ̌ ɖokpó ɔ lɛ́ é, bo nɔ lɛ́ nu ahan mú. (1 Kɔ. 6:9-11) A ka lin ɖɔ ɖo batɛ́mu yětɔn gúdo ɔ, yě kún sɔ́ ɖí xwi xá jlǒ masɔgbe ɖě kpɔ́n ó wɛ a? Nǔ sixú nyí mɔ̌ ǎ. Klisánwun yí ami dó ɖe wɛ yě bǐ nyí có, yě kpo ɖo gbɛtɔ́ hwɛhutɔ́ nyí wɛ. Hǔn, yě ná ko nɔ ɖí xwi xá jlǒ masɔgbe lɛ́ sín hweɖénu jɛ hweɖénu. Énɛ́ ɖó ná dó wǔsyɛ́n lanmɛ nú mǐ. Aniwú? Ðó énɛ́ xlɛ́ ɖɔ jlǒ masɔgbe ɖěbǔ e ɖí xwi xá wɛ a ɖe é ɔ, mɛɖé ko dɛ ɖ’é nu kpɔ́n. Nǔgbó ɔ, a sixú kpo ɖo tíntɛ́nkpɔ́n wɛ bá “lí dǒ ɖo nǔɖiɖi mɛ, lobo tuun ɖɔ kplékplé nɔví lɛ́ tɔn [mǐtɔn] e ɖo gbɛ ɔ mɛ é lɔ ɖo wǔvɛ́ ɖokpó ɔ lɛ́ se wɛ.”—1 Pi. 5:9.

16. Awǒvinú tɛ́ mǐ ka ɖó ná nyi alɔ ná? Aniwú?

¹⁶ Ma nɔ lin nǔ gbɔn lě gbeɖé ó: Mɛ ɖěbǔ sixú mɔ nǔ jɛ wǔvɛ́ e ɖí xwi xá wɛ un ɖe é mɛ ǎ. Nǔ lin gbɔn mɔ̌ sixú zɔ́n bɔ a ná lin ɖɔ nukúnɖíɖó ɖěbǔ kún sɔ́ ɖe nú émí ó, bɔ a sɔ́ ná mɔ gǎn bo ɖí xwi xá jlǒ masɔgbe lɛ́ ǎ. Flíjɛ tɔn wɛ Biblu ɖɔ. É ɖɔ: “Mawu nɔ gɔn akpá e é dó lɛ́ ɖe ǎ; é ná lɔn bɔ tɛ́nkpɔ́n ɖé ná wá nú mi bo hú gǎn hlɔ̌nhlɔ́n e mi ɖó é ǎ; amɔ̌ hwenu e tɛ́nkpɔ́n ná wá nú mi ɔ, é ná ná hlɔ̌nhlɔ́n mi bɔ mi ná dɛ ɖ’é nu; énɛ́ ɔ, é ná ɖe ali nú mi bɔ mi ná tɔ́n sín mɛ.” (1 Kɔ. 10:13b) Nǔgbó ɔ, ényí jlǒ nyanya ɖé ná bo tlɛ ko dó ɖɔ do ɖo ayi mǐtɔn mɛ bǐ ɔ, mǐ sixú  dɛ ɖ’é nu, bɔ é ná kpa mǐ. Kpó alɔdó Jexóva tɔn kpó ɔ, mǐ sixú gɔn nǔ wa sɔgbe xá jlǒ énɛ́.

17. Mǐ sixú gɔn jlǒ nyanya lɛ́ ɖó bǐ mlɛ́mlɛ́ ǎ có, étɛ́ jí mǐ ka ɖó acɛ dó?

¹⁷ Nɔ flín nǔ élɔ́ hwebǐnu: Ðó gbɛtɔ́ hwɛhutɔ́ wɛ nú we wútu ɔ, a sixú gɔn jlǒ nyanya lɛ́ ɖó bǐ mlɛ́mlɛ́ ǎ. Amɔ̌, ényí yě wá xwetɔ́n ɔ, mǐ sixú nya yě dó gbě afɔjíafɔjí, lěe Jozɛ́fu yá wǔ hɔ́n ɖo Potifáa sín asi nukɔn gbɔn é ɖɔhun. (Bǐb. 39:12) É byɔ́ ɖɔ a ní wa nǔ sɔgbe xá jlǒ nyanya lɛ́ ǎ!

18-19. Ényí mǐ ɖo tíntɛ́nkpɔ́n wɛ bo ná húzú linlin mǐtɔn ɔ, nǔ tɛ́ lɛ́ mǐ ka sixú kanbyɔ́ mǐɖée?

¹⁸ Linlin mǐtɔn hǔzúhúzú nɔ byɔ́ ɖɔ mǐ ní kpo ɖo azɔ̌ syɛ́nsyɛ́n wa wɛ, bónú nǔ e mǐ nɔ lin lɛ́ é kpó nǔ e mǐ nɔ wa lɛ́ é kpó ní nyɔ́ Jexóva nukúnmɛ. Bo ná dó kpé énɛ́ wú hǔn, nɔ gbéjé hwiɖée kpɔ́n hwɛhwɛ gbɔn nǔ élɔ́ lɛ́ kinkanbyɔ́ hwiɖée gblamɛ: ‘Lěe un nɔ wa nǔ gbɔn é ka nɔ xlɛ́ ɖɔ un tuun ɖɔ mǐ ko sɛ yi nukɔn tawun ɖo azǎn gǔdo gúdo tɔn lɛ́ mɛ a? Un ka ɖo tíntɛ́nkpɔ́n wɛ bá sɔ́ gbɛtɔ́ yɔ̌yɔ́ ɔ dó a? Un ka nɔ ná tɛn gbigbɔ mímɛ́ Jexóva tɔn bɔ é nɔ xlɛ́ ali gbɛzán ce, bónú ma mɔ tɛn bo gbí dɔn ɖo jlǒ agbaza tɔn e sín zɛn nɔ sɔ́ mì lɛ́ é nu a?’

¹⁹ Ényí a ɖo hwiɖée gbéjé kpɔ́n wɛ hǔn, ɖ’ayi gǎn e a ko dó lɛ́ é wú, é ní ma nyí fí e a jɛ do ɖe lɛ́ é wú ó. Ényí é byɔ́ ɖɔ a ní bló hǔzúhúzú lɛ́ hǔn, ma nú awakanmɛ kú we ó. É nyɔ́ wa hǔn, xwedó wěɖexámɛ élɔ́ e ɖo Filípunu lɛ́ 3:16 mɛ é: “Nǔ ɖěbǔ ná bo ɖo jijɛ wɛ hǔn, mi nú mǐ nǎ wlí ali e jí mǐ ko ɖe káká jɛ din ɔ ɖidó fí e mǐ xwe é.” Ényí a nɔ wa mɔ̌ hǔn, kú d’é jí ɖɔ Jexóva ná kɔn nyɔ̌ná dó gǎn e dó wɛ a ɖe bo ná kpo ɖo linlin towe lɛ́ húzú wɛ é jí.