1. Ényí a lin tamɛ dó Jexóva wú ɔ, étɛ́ ka nɔ wá ayi towe mɛ?

 A KA ko tɛ́n kpɔ́n bo ná dó nukún lěe Jexóva cí é mɛ kpɔ́n a? Ényí a ɖo ɖɛ xo sɛ́dó è wɛ ɔ, étɛ́ ka nɔ wá ayi mɛ nú we? Nǔgbó wɛ ɖɔ nukún nɔ mɔ Jexóva ǎ có, Biblu ɖɔ xó dó wǔ tɔn ɖo ali vovo nu. È ylɔ́ Jexóva ɖɔ ‘hwe, gǎglónú’ kpó “myɔ e nɔ fyɔ́ nǔ é” kpó. (Ðɛh. 84:12; Ebl. 12:29) Ezekiyɛ́li mɔ Jexóva ɖo nǔmimɔ mɛ, bo ɖɔ ɖɔ é cí awǐnnya xɔ akwɛ́ Safíi, gan e è ɖíɖí wǔ ná é kpó nyǐ e ɖo kínkɔ́n wɛ é kpó ɖɔhun. (Ezek. 1:26-28) Nǔ énɛ́ lɛ́ e è tínmɛ dó Jexóva wú é sixú jí wǔ nú mǐ tawun, bo tlɛ sixú lɛ́ dó xɛsi mǐ.

2. Étɛ́ ka sixú zɔ́n bɔ é ná vɛ́ wǔ nú mɛɖé lɛ́ bɔ yě ná vɛ́ xá Jexóva?

² Ðó mǐ ma sixú mɔ Jexóva ǎ wútu ɔ, é sixú vɛ́ wǔ nú mǐ, bɔ mǐ ná ɖi ɖɔ é yí wǎn nú mǐ. Mɛɖé lɛ́ nɔ lin ɖɔ Jexóva kún sɔ́ sixú yí wǎn nú émí gbeɖé ó, ɖó nǔ nyanya e jɛ wá yi ɖo gbɛzán yětɔn mɛ lɛ́ é wútu. Vlafo yě ɖu wǎnyíyí e tɔ́ ɖé nɔ ɖe xlɛ́ vǐ tɔn é sín le kpɔ́n ǎ. Jexóva mɔ nǔ jɛ lěe nǔ nɔ cí nú yě é wú, bo lɛ́ tuun nǔ e wa dó yě wú wɛ é ɖe é. Bo ná dó d’alɔ mǐ ɔ, é ɖe jijɔ tɔn ɖaaɖagbe lɛ́ xlɛ́ mǐ ɖo Xó tɔn mɛ.

3. Étɛ́wú mǐ ka ɖó ná sɔ́ ayi ɖó Jexóva sín wǎnyíyí jí hú gǎn?

³ Xókwín e nɔ ɖɔ mɛ alɔkpa e Jexóva nyí é hú gǎn é wɛ nyí wǎnyíyí. (1 Jaan 4:8) Wǎnyíyí wɛ é nyí. Wǎnyíyí wɛ nɔ sísɛ́ ɛ, bɔ é nɔ wa nǔ bǐ. Wǎnyíyí Mawu tɔn d’agba, bo lɛ́ syɛ́n tawun, énɛ́ wɛ zɔ́n bɔ é nɔ ɖe xlɛ́ mɛ ɖěɖěe ma tlɛ yí wǎn n’i ǎ lɛ́ é. (Mat. 5:44, 45) Ðo xóta élɔ́ mɛ ɔ, mǐ ná sɔ́ ayi ɖó Jexóva kpó wǎnyíyí tɔn kpó jí hú gǎn. Lě do mǐ kplɔ́n nǔ dó Mawu wú sɔ é ɔ, mɔ̌ do wɛ mǐ ná yí wǎn n’i sɔ.

JEXÓVA YÍ WǍN NǓ MǏ TAWUN

4. Nɛ̌ nǔ ka nɔ cí nú we dó wǎn e Jexóva yí nú mǐ é wú? (Lɛ̌ kpɔ́n fɔtóo ɔ.)

⁴ “Jexóva nɔ . . . yí wǎn nú mɛ titewungbe.” (Ja. 5:11) Ðo  Biblu mɛ ɔ, Jexóva sɔ́ éɖée jlɛ́ dó nɔ wǎnyíyínɔ ɖé wú. (Eza. 66:12, 13) Dǒ nukún lěe vǐnɔ ɖé nɔ kpé nukún dó vǐ tɔn kpɛví ɖé wú kpó wǎnyíyí kpó gbɔn é mɛ kpɔ́n. É nɔ sɔ́ ɛ ɖ’akɔn, bo nɔ ɖo we dó n’i wɛ, lobo nɔ ɖo xó ɖɔ n’i wɛ kpó gbe fífá kpó, bo nɔ wa mɔ̌ kpó xomɛnyínyɔ́ kpó. Ényí é ɖo avǐ ya wɛ, alǒ ɖo wǔvɛ́ se wɛ ɔ, é nɔ tɛ́n kpɔ́n bo nɔ sú nǔ e hudó è é sín do n’i. Ényí mǐ ɖo wǔvɛ́ se wɛ ɔ, mǐ sixú ɖeji dó wǎn e Jexóva yí nú mǐ é wú. Ðɛhanwlántɔ́ ɖé wlán ɖɔ: “Ényí nǔ gěgé ɖo hǔn mɛ nú mì ɔ, gbɔ e a nɔ dó nú mì é wɛ nɔ dó xomɛhunhun nú mì.”—Ðɛh. 94:19.

5. Ðagbe tɛ́ xomɛnyínyɔ́ Jexóva tɔn ka ná wa nú we?

⁵ Jexóva ɖo gbejí. (Ðɛh. 103:8) É nɔ jó gbe dó mǐ wú hwenu e mǐ wa nǔ nyi do é ǎ. Izlayɛ́li ví lɛ́ lɛ́ kɔ sín Jexóva gúdo azɔn mɔ̌kpán có, é ɖe wǎnyíyí adodwé e é ɖó nú mɛ ɖěɖěe hwɛ yětɔn lɛ́ vɛ́ ná lɛ́ é xlɛ́ gbɔn xó élɔ́ lɛ́ e é ɖɔ é gblamɛ: “A xɔ akwɛ́ nukún ce mɛ, a ɖo ayi ce mɛ, un yí wǎn nú we.” (Eza. 43:4, 5) Wǎnyíyí Mawu tɔn ko ɖyɔ́ ǎ. Mǐ sixú ɖeji dó wǔ tɔn hwebǐnu. Ényí mǐ ná bo tlɛ hu hwɛ syɛ́nsyɛ́n lɛ́ ɔ, Jexóva nɔ jó mǐ dó ǎ. Ényí hwɛ mǐtɔn lɛ́ vɛ́ nú mǐ, bɔ mǐ lɛ́ kɔ wá Jexóva gɔ́n ɔ, mǐ ná mɔ ɖɔ nǔ ɖě kún tɔ́n fɛn wǎn e é yí nú mǐ é ó. “Hwɛsɔ́kɛmɛ nɔ ci kɔ n’i ǎ.” (Eza. 55:7) Biblu tínmɛ ɖɔ hwɛsɔ́kɛmɛ énɛ́ cí ‘kɔfánúmɛ sín hwenu lɛ́ éé nɔ gosín Jexóva ɖésúnɔ gɔ́n é’ ɖɔhun.—Mɛ. 3:19.

6. Étɛ́ Zakalíi 2:12 ka kplɔ́n mǐ dó Jexóva wú?

⁶ Xa Zakalíi 2:12. Ðó Jexóva yí wǎn nú mǐ wútu ɔ, é nɔ yá wǔ ɖ’ayi lěe nǔ nɔ cí nú mǐ é wú, bo nɔ lɛ́ ba vɛ́návɛ́ná bá cyɔ́n alɔ mǐ jí. Ényí mǐ ɖo aluwɛ mɛ ɔ, é lɔ nɔ nɔ aluwɛ mɛ. Énɛ́ wú ɔ, mǐ sixú ɖeji ɖɔ ényí mǐ xo ɖɛ élɔ́ ɔ, é ná se: “Nya xɛ ɖo jǐ ce nukúnzin ɖɔhun.” (Ðɛh. 17:8) Nukún ɔ, wǔjɔnú agbaza tɔn e jí è ɖó ná nya xɛ ɖe hú gǎn, b’ɛ lɛ́ xɔ akwɛ́ tawun é wɛ. Énɛ́ wú ɔ, hwenu e Jexóva jlɛ́ mǐ dó nukúnzin wú é ɔ, é cí ɖɔ nǔ lěhun ɖɔ wɛ é ɖe ɖɔhun: ‘Mɛ ɖěbǔ e ɖ’alɔ mi mɛ e ɖo togun ce mɛ lɛ́ é wú é ɔ, nǔ xɔ akwɛ́ ce wú wɛ é ɖ’alɔ.’

7. Étɛ́wú é ka byɔ́ ɖɔ mǐ ní ná hlɔ̌nhlɔ́n jiɖe e mǐ ɖó dó wǎnyíyí e Jexóva ɖó nú mǐ é wú é?

⁷ Jexóva ba ɖɔ mǐ ní kú d’é jí ɖɔ émí yí wǎn nú mǐ mɛ ɖokpó ɖokpó. Amɔ̌, é tuun ɖɔ nǔ e jɛ dó mǐ wú wá yi lɛ́ é sixú zɔ́n bɔ mǐ nɔ kanbyɔ́ mǐɖée ɖɔ é ka sixú yí wǎn nú mǐ a jí. Alǒ, mǐ sixú ɖo tagba ɖěɖěe nɔ tɛ́n jiɖe e mǐ ɖó dó wǎn  e Jexóva yí nú mǐ é wú lɛ́ é mɛ gbɔn wɛ alɔnu din. Étɛ́ ka sixú ná hlɔ̌nhlɔ́n jiɖe e mǐ ɖó dó wǎnyíyí Jexóva tɔn wú é? Kplɔ́n nǔ dó lěe Jexóva ɖe wǎnyíyí e é ɖó nú Jezu, mɛ e gbigbɔ mímɛ́ sɔ́ lɛ́ é kpó mǐ mɛ bǐ kpó xlɛ́ gbɔn é wú.

LĚE JEXÓVA NƆ ÐE WǍNYÍYÍ TƆN XLƐ́ GBƆN É

8. Étɛ́wú Jezu ka kú d’é jí ɖɔ Tɔ́ émítɔn yí wǎn nú émí?

⁸ Nú xwe maxamaxa ɔ, Jexóva kpó Vǐ vívɛ́ná tɔn kpó bló bɔ kancícá wǎnyíyí tɔn e ɖo tɛ́ntin yětɔn é syɛ́n tawun. Kancícá énɛ́ tlɛ ko ɖo tɛ́ntin yětɔn có wɛ̌kɛ́ ɔ jɔ. Jexóva ɖe wǎn e é yí nú Jezu é xlɛ́ nyi wɛn lěe mǐ mɔ gbɔn ɖo Matíe 17:5 mɛ é. Jexóva hɛn ɔ, é ná ko ɖɔ kpowun ɖɔ: ‘Mɛ élɔ́ ɔ, nǔ tɔn nɔ nyɔ́ nukún ce mɛ.’ Amɔ̌, é ba ɖɔ mǐ ní tuun lě do é yí wǎn nú Jezu sɔ é, énɛ́ wú ɔ, é ylɔ́ ɛ ɖɔ: “Vǐ súnnu ce vívɛ́ná ɔ.” Jexóva nɔ gó ɖó mɛ alɔkpa e Jezu nyí é kpó nǔ e wa gbé é ja é kpó wú. (Efɛ́. 1:7) Gɔ́ ná ɔ, Jezu nɔ xo nǔ ɖěbǔ kpɔ́n ɖɔ Tɔ́ émítɔn ka yí wǎn nú émí a jí ǎ. É kú d’é jí bǐ mlɛ́mlɛ́ ɖɔ Tɔ́ émítɔn yí wǎn nú émí. É nɔ ɖɔ hwɛhwɛ kpó jiɖiɖe kpó ɖɔ Tɔ́ émítɔn yí wǎn nú émí.—Jaan 3:35; 10:17; 17:24.

9. Xógbe tɛ́ ka ɖe wǎnyíyí e Jexóva ɖó nú mɛ e gbigbɔ mímɛ́ sɔ́ lɛ́ é xlɛ́? Tínmɛ. (Hlɔ̌manu lɛ́ 5:5)

⁹ Jexóva lɛ́ ɖe xlɛ́ ɖɔ émí yí wǎn nú mɛ e gbigbɔ mímɛ́ sɔ́ lɛ́ é. (Xa Hlɔ̌manu lɛ́ 5:5.) Ð’ayi nukɛgbe “è kɔn . . . dó” ɔ wú. Xókwíntínmɛwégbó ɖé tínmɛ gbɔn lě: “É sa wá mǐ gɔ́n ayǐsun ɖɔhun.” Nǔjlɛ́dónǔwú agbɔ̌nnɔ e tɛ ɖě lě do Jexóva yí wǎn nú mɛ e gbigbɔ mímɛ́ sɔ́ lɛ́ é sɔ é jí é ɖé nɛ́! Mɛ ɖěɖěe gbigbɔ mímɛ́ sɔ́ lɛ́ é tuun ɖɔ ‘Mawu yí wǎn nú’ émí. (Ju. 1) Mɛsɛ́dó Jaan ɖe lěe nǔ nɔ cí nú yě é xlɛ́ hwenu e é wlán xó élɔ́ é: “Mi kpɔ́n wǎnyíyí alɔkpa e Tɔ́ ɔ ɖe xlɛ́ mǐ, bónú è ní dó ylɔ́ mǐ ɖɔ vǐ Mawu tɔn lɛ́ é!” (1 Jaan 3:1) Mɛ e gbigbɔ mímɛ́ sɔ́ lɛ́ é kɛ́ɖɛ́ wɛ Jexóva yí wǎn ná a? Éǒ, mǐ mɛ bǐ wɛ Jexóva ko ɖe wǎnyíyí tɔn xlɛ́.

10. Étɛ́ ka nyí nǔ ɖaxó e ɖe wǎn e Jexóva yí nú we é xlɛ́ é?

¹⁰ Étɛ́ ka nyí nǔ ɖaxó e ɖe wǎnyíyí Jexóva tɔn xlɛ́ é? Gbɛxixɔ ɔ wɛ; é wɛ nyí wǎnyíyí núwíwa ɖaxó hú gǎn e è wa kpɔ́n ɖo wɛ̌kɛ́ ɔ mɛ é! (Jaan 3:16; Hlɔ̌. 5:8) Jexóva sɔ́ Vǐ vívɛ́ná tɔn jó, bo yí gbe ɖɔ é ní kú dó gbɛtɔ́ lɛ́ bǐ tamɛ, bónú mǐ ná dó sixú mɔ sɔ́ kɛ hwɛ mǐtɔn lɛ́ tɔn, bo lɛ́ nyí xɔ́ntɔn tɔn. (1 Jaan 4:10) Lě do mǐ lin tamɛ dó axɔ́ e Jexóva kpó Jezu kpó sú é jí sɔ é ɔ, mɔ̌ do wɛ mǐ nɔ mɔ nǔ jɛ wú ɖɔ wǎn e yě yí nú mǐ mɛ ɖokpó ɖokpó é gɔ́ngɔ́n tawun sɔ é nɛ́. (Ga. 2:20) È xɔ gbɛ nú mǐ ɖó hwɛjijɔ Jexóva tɔn byɔ́ mɔ̌ kpowun wútu ǎ. Nǔníná wǎnyíyínɔ ɖé wɛ. Jexóva ɖe wǎn e é yí nú mǐ é xlɛ́ gbɔn mɛ e xɔ akwɛ́ n’i hú gǎn é sísɔ́ dó sá vɔ̌ dó ta mǐtɔn mɛ gblamɛ, mɛ énɛ́ wɛ nyí Jezu. Jexóva yí gbe bɔ Vǐ tɔn se wǔvɛ́, bo kú dó ta mǐtɔn mɛ.

11. Étɛ́ Jelemíi 31:3 ka kplɔ́n mǐ?

¹¹ Jexóva nɔ mɔ kpowun ɖɔ émí yí wǎn nú mǐ ǎ, loɔ, é nɔ lɛ́ ɖɔ lě do é yí wǎn nú mǐ sɔ é nú mǐ. (Xa Jelemíi 31:3.) Jexóva dɔn mǐ, ɖó é yí wǎn nú mǐ wútu. (Sɔ́ jlɛ́ dó Sɛ́nflínmɛ 7:7, 8 wú.) Nǔ ɖěbǔ alǒ mɛ ɖěbǔ sixú ɖe mǐ ɖó vo nú wǎnyíyí énɛ́ ǎ. (Hlɔ̌. 8:38, 39) Nɛ̌ nǔ ka cí nú we dó wǎn e é yí nú mǐ é wú? Xa Ðɛhan 23​gɔ́ ɔ, bo kpɔ́n lěe nǔ cí nú Davídi dó wǎnyíyí Jexóva tɔn wú é kpó lěe nǔ sixú cí nú mǐ d’é wú é kpó.

NƐ̌ NǓ KA NƆ CÍ NÚ WE DÓ WǍNYÍYÍ JEXÓVA TƆN WÚ

12. Nɛ̌ a ka sixú sɛ sin xwe nú Ðɛhan 23​gɔ́ ɔ gbɔn?

¹² Xa Ðɛhan 23:1-6. Ðɛhan 23​gɔ́ ɔ, han e ɖe jiɖiɖe e mǐ ɖó dó wǎn e Jexóva yí nú mǐ é wú é xlɛ́ é wɛ. Ðɛhanwlántɔ́ Davídi tínmɛ kancícá syɛ́nsyɛ́n e ɖo Jexóva e nyí Lɛ̌ngbɔ́nyitɔ́ tɔn é kpó éɖésúnɔ kpó tɛ́ntin é. Davídi mɔ ɖɔ émí ɖo ayijayǐ mɛ, ɖó é jó Jexóva dó b’ɛ nɔ xlɛ́ ali i, bɔ é wú wɛ é lɛ́ ɖeji dó bǐ mlɛ́mlɛ́. Davídi tuun ɖɔ Jexóva ná nɔ ɖe wǎnyíyí tɔn xlɛ́ émí  ayǐhɔ́ngbe ayǐhɔ́ngbe nú gbɛhwenu émítɔn bǐ. Étɛ́ ka zɔ́n bɔ é ɖeji sɔmɔ̌?

13. Étɛ́wú Davídi ka ɖeji dó nukún e Jexóva nɔ kpé dó wǔtu tɔn é wú?

¹³ “Nǔɖé ná hwedó mì ǎ.” Davídi nɔ mɔ ɖɔ è nɔ kpé nukún dó émí wú ganjí, ɖó Jexóva nɔ ná ɛ nǔ e nɔ hudó è lɛ́ é hwebǐnu. Davídi lɛ́ tuun ɖɔ Jexóva ɔ, xɔ́ntɔn émítɔn wɛ é nyí, bɔ nǔ émítɔn nɔ lɛ́ nyɔ́ nukún tɔn mɛ. Énɛ́ wú wɛ é kú d’é jí ɖɔ gbɛ na bo gbɔn ɖěbǔ ɖo sɔgúdo ɔ, Jexóva ná kpo ɖo nǔ e hudó émí lɛ́ é sín do sú nú émí wɛ. Davídi tuun ɖɔ wǎnyíyí Jexóva tɔn ɖó hlɔ̌nhlɔ́n hú adohu adohu émítɔn ɖěbǔ, bɔ énɛ́ nɔ ná ɛ awǎjijɛ jɔ awǎjijɛ ɔ, bɔ nǔ e é ɖó é nɔ lɛ́ kpé è.—Ðɛh. 16:11.

14. Nɛ̌ Jexóva ka sixú kpé nukún dó mǐ wú kpó wǎnyíyí kpó gbɔn?

¹⁴ Jexóva nɔ kpé nukún dó mǐ lɔmɔ̌ wú kpó wǎnyíyí kpó, tají ɔ, hwenu e nǔ nyanya lɛ́ ɖo mǐ gbo wɛ é. Claire a e wa sinsɛnzɔ́ ɖo Betɛ́li nú xwe 20 jɛjí é mɔ ɖɔ émí zun émíɖokpó hwenu e xwédo tɔn gbɔn tagba syɛ́nsyɛ́n ɖě jɛ ɖě gǔdo lɛ́ mɛ é. Tɔ́ tɔn jɛ hunkangbadótaglomɛzɔn e nɔ zɔ́n bɔ gǎn nɔ ɖo vivɔ ɖo wǔ tɔn wɛ ayǐhɔ́ngbe ayǐhɔ́ngbe é, è ɖe nɔví tɔn nyɔ̌nu ɖokpó sín agun mɛ, xwédo ɔ gbɔn akwɛ́yózo mɛ, bɔ è lɛ́ yí xwé yětɔn sín yě sí. Nɛ̌ Jexóva ka kpé nukún dó yě wú kpó wǎnyíyí kpó gbɔn? Claire ɖɔ: “Jexóva nɔ tɛ́n kpɔ́n bɔ xwédo ce nɔ mɔ nǔ e sín hudó é ɖó gbe bǐ gbe é hwebǐnu. Azɔn mɔ̌kpán wɛ Jexóva ná nǔ mǐ, bɔ é zɛ nǔ e mǐ ma sixú ɖó nukún tɔn gbeɖé ǎ é wú. Hwɛhwɛ wɛ un nɔ lin tamɛ dó hwe ɖěɖěe nu un ɖu wǎnyíyí Jexóva tɔn sín le lɛ́ é jí, bɔ yě nɔ xɔ akwɛ́ nú mì tawun. Nǔ énɛ́ lɛ́ e un nɔ flín lɛ́ é nɔ d’alɔ mì bɔ un nɔ kpo ɖo didɛ wɛ ɖo tagba lɛ́ nu.”

15. Aniwú Davídi ka lɛ́ mɔ hlɔ̌nhlɔ́n? (Lɛ̌ kpɔ́n ɖiɖe ɔ.)

 ¹⁵ “É nɔ lɛ́ vɔ́ hlɔ̌nhlɔ́n ná mì.” Hweɖélɛ́nu ɔ awakanmɛ nɔ kú Davídi ɖó tagba tobutóbú e mɛ gbɔn wɛ é ɖe lɛ́ é wú. (Ðɛh. 18:5-7) Amɔ̌, wǎnyíyí Jexóva tɔn nɔ lɛ́ vɔ́ hlɔ̌nhlɔ́n ná ɛ. Jexóva nɔ kplá xɔ́ntɔn tɔn e nǔ ci kɔ ná é yi “fí e ama zɔ́n ɖe” é, bo nɔ kplá ɛ yi “sin e fá ɔ kɔn.” Wǎgbɔ tɔn ɔ, Davídi mɔ hlɔ̌nhlɔ́n, bo kpé wú bo kpo ɖo Jexóva sɛn wɛ kpó awǎjijɛ kpó.—Ðɛh. 18:29-33.

16. Nɛ̌ wǎnyíyí Jexóva tɔn ka lɛ́ vɔ́ hlɔ̌nhlɔ́n ná we gbɔn?

¹⁶ Mɔ̌ ɖokpó ɔ ɖo égbé ɔ, ényí mǐ ɖo xwi ɖí xá gbɛ mɛ wúvɛ́ lɛ́ wɛ ɔ, xomɛnyínyɔ́ Jexóva tɔn wɛ nɔ zɔ́n bɔ mǐ nɔ kpo ɖo gbɛ. (Gbɛ. 3:22; Koló. 1:11) Ð’ayi kpɔ́ndéwú Rachel tɔn wú. É flú tawun hwenu e asú tɔn jó é kpó Jexóva kpó dó ɖo jɛmɛjí Covid-19 hwenu é. Étɛ́ Jexóva ka wa dó d’alɔ ɛ? É ɖɔ: “Jexóva wa nǔ e wú é kpé é bǐ bɔ un nɔ mɔ ɖɔ è yí wǎn nú mǐ. É bló bɔ xɔ́ntɔn lɛ́ nɔ zán hwenu ɖó kpɔ́ xá mì, hɛn nǔɖuɖu wá nú mì, sɛ́ wěmasɛ́dómɛ e mɛ xomɛnyínyɔ́ tɔ́n ɖe lɛ́ é kpó wěmafɔ e dó wǔsyɛ́n lanmɛ nú mɛ lɛ́ é kpó dó mì, ko nǔ dó mì, bo nɔ lɛ́ ɖo flínflín mì wɛ ɖɔ Jexóva nɔ kpé nukún dó wǔ ye. Un nɔ gɔn kú dó nú Jexóva gbeɖé ɖó xwédo ɖaxó e mɛ wǎnyíyí ɖe, bɔ é ná mì é wú ǎ.”

17. Étɛ́wú Davídi ma ka “nɔ ɖi xɛsi nú nǔɖé ǎ”?

¹⁷ “Un nɔ ɖi xɛsi nú nǔɖé ǎ, ɖó a ɖo kpɔ́ xá mì.” Hwɛhwɛ wɛ gbɛ Davídi tɔn nɔ ɖo axɔ́ nu, b’ɛ lɛ́ ɖó kɛntɔ́ agbɔ̌nnɔ gěgé. Amɔ̌, wǎnyíyí Jexóva tɔn zɔ́n bɔ é nɔ mɔ ɖɔ émí ɖo ayijayǐ mɛ, bɔ è lɛ́ cyɔ́n alɔ émí jí. Davídi sixú mɔ ɖɔ Jexóva nɔ ɖo kpɔ́ xá émí ɖo ninɔmɛ lɛ́ bǐ mɛ, bɔ énɛ́ nɔ vɔ́ gǎnjɛwú ná ɛ. Énɛ́ wú ɔ, é sixú ji han ɖɔ: “[Jexóva] ɖe mì sín nǔ e ɖo xɛsi dó nú mì wɛ lɛ́ bǐ mɛ.” (Ðɛh. 34:5) Nǔgbó wɛ ɖɔ hweɖélɛ́nu ɔ xɛsi nɔ ɖi Davídi tawun có, é kpé wú bo ɖu ɖo xɛsi tɔn jí, ɖó é tuun ɖɔ Jexóva yí wǎn nú émí.

18. Nɛ̌ tuun e a tuun ɖɔ Jexóva yí wǎn nú we é ka sixú ná hlɔ̌nhlɔ́n we hwenu e xɛsi ɖi we é gbɔn?

¹⁸ Nɛ̌ tuun e mǐ tuun ɖɔ Jexóva yí wǎn nú mǐ é ka nɔ ná hlɔ̌nhlɔ́n mǐ hwenu e mǐ ɖo ninɔmɛ e nɔ dó xɛsi nú mɛ lɛ́ é mɛ gbɔn? Gběxosín-alijítɔ́ ɖé nɔ nyí Susi bo tínmɛ lěe nǔ cí nú é kpó asú tɔn kpó hwenu e vǐ súnnu yětɔn hu éɖée é, bo ɖɔ: “Ényí nǔblánɔwunú ɖé jɛ ɖo gbɛzán mɛtɔn mɛ ɔ, é nɔ wa nǔ dó mɛ wú tawun, bɔ xɛsi nɔ lɛ́ ɖi mɛ ɖɔ nǔ e nylá hú mɔ̌ lɛ́ é ná lɛ́ wá jɛ. Amɔ̌, wǎnyíyí Jexóva tɔn nɔ zɔ́n bɔ mǐ nɔ mɔ ɖɔ mǐ ɖo ayijayǐ mɛ, b’ɛ́ lɛ́ nya xɛ ɖo mǐ jí.” Rachel e xó mǐ ɖɔ wá yi é flín nǔ élɔ́:  “Zǎnmɛ gbe ɖokpó hwenu e un ɖo aluwɛ syɛ́nsyɛ́n ɖé mɛ, bɔ ado lɛ́ hu mì tawun, lobɔ xɛsi lɛ́ ɖi mì é ɔ, un xo ɖɛ sɛ́dó Jexóva kpó avǐ kpó, énɛ́ gúdo tlóló ɔ, un mɔ ɖɔ é fá ayi ce lobo lɛ́ dó gbɔ nú mì lěe vǐnɔ ɖé nɔ wa nú vǐ tɔn gbɔn é ɖɔhun bɔ un d’amlɔ xwɛ́nwún. Un ná wɔn hwe énɛ́ nu kpɔ́n gbeɖé ǎ.” Mɛxó agun tɔn ɖé nɔ nyí Tasos, bo bló xwe ɛnɛ ɖo gankpá mɛ, ɖó gbɛ̌ e é gbɛ́ ɖɔ émí kún ná byɔ́ ahwan mɛ ó é wútu. Nɛ̌ é ka ɖu wǎnyíyí Jexóva tɔn sín le gbɔn? É ɖɔ: “Jexóva kpé nukún dó nǔ e hudó mì lɛ́ é bǐ wú, bo tlɛ lɛ́ wa nǔ hú mɔ̌. Énɛ́ ná hlɔ̌nhlɔ́n kán e un kán ɖ’é jí ɖɔ un sixú ɖeji bǐ mlɛ́mlɛ́ dó wǔ tɔn é. Gɔ́ ná ɔ, fí e nɔ ɖó linkpɔ́n nú mɛ é ɖé wɛ gankpá mɛ ninɔ nyí có, Jexóva gbɔn gbigbɔ mímɛ́ tɔn gblamɛ bo ná mì awǎjijɛ. Énɛ́ d’alɔ mì bɔ un mɔ ɖɔ lě do un ɖeji dó Jexóva wú sɔ é ɔ, mɔ̌ do wɛ un ná nɔ ɖu wǎnyíyí tɔn sín le sɔ. Énɛ́ wú ɔ, un bɛ́ gběxosín-alijítɔ́ hwebǐnu tɔn sín azɔ̌ ɖo gankpá ɔ mɛ.”

SƐKPƆ́ MAWU WǍNYÍYÍNƆ TOWE

19. (a) Ényí mǐ tuun ɖɔ Mawu yí wǎn nú mǐ ɔ, nɛ̌ mǐ ka ná nɔ xo ɖɛ gbɔn? (b) Ðɔ nǔ e dɔn we hú gǎn ɖo nǔ e è ɖɔ dó wǎnyíyí Jexóva tɔn wú é mɛ é. (Kpɔ́n gbǎví “ Wěmafɔ ɖěɖěe nɔ d’alɔ mǐ bɔ mǐ nɔ mɔ wǎn ɖaxó e Jexóva yí nú mǐ é lɛ́ é.”)

¹⁹ Kpɔ́ndéwú ɖěɖěe xó mǐ ɖɔ wá yi lɛ́ é bǐ xlɛ́ ɖɔ Jexóva “Mawu wǎnyíyínɔ” ɔ ɖo kpɔ́ xá mǐ. (2 Kɔ. 13:11) Nǔ mǐ mɛ ɖokpó ɖokpó tɔn nɔ ɖu ayi mɛ n’i. Mǐ kú d’é jí ɖɔ “xomɛnyínyɔ́ Mawu Mavɔmavɔ tɔn wɛ nɔ lɛ́ lɛ̌ dó” mǐ. (Ðɛh. 32:10) Lě do mǐ lin tamɛ dó bǎ e mɛ é yí wǎn nú mǐ yi ɖó é jí sɔ é ɔ, mɔ̌ do wɛ mǐ nɔ mɔ bǎ e mɛ nǔ mǐtɔn nɔ ɖu ayi mɛ n’i yi ɖó é sɔ é nɛ́, bɔ bǎ énɛ́ mɛ wɛ mǐ lɔmɔ̌ nɔ vɛ́ xá ɛ yi ɖó. Mǐ sixú nɔ xo ɖɛ sɛ́dó è faa, bo nɔ ɖɔ lě do mǐ ɖó wǎnyíyí tɔn sín hudó sɔ é n’i. Mǐ sixú nɔ ɖɔ nǔ e ɖo adohu adohu ɖó nú mǐ wɛ lɛ́ é bǐ n’i, lobo kú d’é jí ɖɔ é nɔ mɔ nukúnnú jɛ mɛ, bɔ akpakpa ɖo sísɔ́ ɛ wɛ, b’ɛ ná d’alɔ mǐ.—Ðɛh. 145:18, 19.

20. Nɛ̌ wǎnyíyí Jexóva tɔn ka dɔn mǐ sɛkpɔ́ ɛ gbɔn?

²⁰ Lěe myɔ xúxú nɔ dɔn mǐ ɖo hwenu e gbɛmɛ fá é gbɔn é ɔ, mɔ̌ wɛ wǎnyíyí ɖaxó Jexóva tɔn nɔ dɔn mǐ gbɔn. Nǔgbó wɛ ɖɔ wǎnyíyí Jexóva tɔn ɖó agbɔ̌n tawun có, é ka nɔ lɛ́ nyɔ́ xomɛ. Énɛ́ wú ɔ, nɔ j’awǎ ɖó wǎn e Jexóva yí nú we é wú. Mi nú mǐ bǐ ní yí gbe nú wǎn e Jexóva yí nú mǐ é kpó akpakpa sɔ́ mɛ kpó ɖɔ: ‘Un yí wǎn nú Jexóva’!—Ðɛh. 116:1.