A ka tuun a?
Kɛkɛ́ví alɔkpa tɛ́ mɛ agooɖojǐe Etiopíinu ɔ ka ɖe hwenu e Filípu sɛkpɔ́ ɛ é?
XÓKWÍN gbe dodó ɔ tɔn e è tínmɛ bɔ é nyí “kɛkɛ́ví” ɖo Biblu gbɛ yɔ̌yɔ́ ɔ tɔn mɛ é sixú dó gesí kɛkɛ́ví alɔkpa alɔkpa. (Mɛ. 8:28, 29, 38) É ɖo mɔ̌ có, é cí ɖɔ kɛkɛ́ví e mɛ Etiopíinu ɔ ɖe é d’agba hú ahwankɛkɛ́ví yǎyánɔ ɖé, alǒ kɛkɛ́ví e è nɔ zán ɖo wezunkínkán hwenu é ɖɔhun. Mǐ ní kpɔ́n hwɛjijɔ e wú è wá gbeta énɛ́ kɔn é ɖé lɛ́.
Nya Etiopíinu ɔ, axɔ́súzɔ́watɔ́ ɖaxó e zɔn ali gaga yi tomɛ é ɖé wɛ. “Nya ɖé wɛ bo ɖó acɛ ɖo axɔ́si Etiopíi tɔn sín acɛkpikpa mɛ, bo nɔ kpé nukún dó axɔ́si ɔ sín dɔkun lɛ́ wú.” (Mɛ. 8:27) Soudan égbé tɔn kpó akpáxwé e ɖo tofɔligbé bǐ nú Ejípu égbé tɔn é kpó ɖo Etiopíi ɖ’ayǐ tɔn ɔ mɛ. Nǔgbó wɛ ɖɔ é cí ɖɔ nya ɔ kún zɔn kɛkɛ́ví ɖokpó ɔ mɛ ɖo tomɛyiyi tɔn bǐ hwenu ó có, é ɖo wɛn ɖɔ, é hɛn agban e ɖo dandan é gěgé ɖo tomɛyiyi gaga énɛ́ hwenu. Kɛkɛ́ví e è nɔ zán dó bɛ́ tomɛyitɔ́ lɛ́ ná ɖo xwe kanweko nukɔntɔn H.M. tɔn mɛ é ɖé lɛ́ nɔ ɖó afɔ ɛnɛ. Wěma e tín nǔ mɛ dó wěma Mɛsɛ́dó tɔn wú é ɖé ɖɔ: “Kɛkɛ́ví mɔ̌hun ná ko nɔ hɛn agban gěgé, bló bɔ tomɛyiyi ná bɔ wǔ, bɔ vlafo ɔ, lěe é ɖe é ná ko nɔ zɔ́n bɔ è nɔ zán dó yi fí línlín lɛ́.”
Nǔ xa wɛ nya Etiopíinu ɔ ɖe hwenu e Filípu sɛkpɔ́ ɛ é. Tan ɔ ɖɔ: “Filípu kán wezun, bo sɛkpɔ́ kɛkɛ́ví ɔ, bo se bɔ agooɖojǐe ɔ ɖo gbeyíɖɔ Ezayíi sín wěma xa dó aga wɛ.” (Mɛ. 8:30) È bló tomɛyiyi sín kɛkɛ́ví énɛ́ lɛ́ bónú yě ná kán wezun ǎ. Lěe yi gbɔn wɛ kɛkɛ́ví ɔ ɖe dɛ̌dɛ̌ dɛ̌dɛ̌ é ná ko ná tɛn agooɖojǐe ɔ bɔ é ná xa nǔ; é ná ko lɛ́ zɔ́n bɔ Filípu kpé wú bo xwedó kɛkɛ́ví ɔ wú kpó afɔ kpó.
Nya Etiopíinu ɔ “byɔ́ Filípu ɖɔ ní byɔ́ kɛkɛ́ví ɔ mɛ, bo jínjɔ́n akpá émítɔn.” (Mɛ. 8:31) Ðo kpɔ́ndéwú wezun kínkán tɔn e hwenu è nɔ zán kɛkɛ́ví ɖe lɛ́ é mɛ ɔ, te wɛ kɛkɛ́víkuntɔ́ lɛ́ nɔ nɔ. Amɔ̌, ɖo kɛkɛ́ví e è nɔ zán dó yi tomɛ ná é mɛ ɔ, agooɖojǐe ɔ kpó Filípu kpó bǐ sixú mɔ tɛn bo jínjɔ́n ayǐ.
Sɔgbe kpó nǔ e Mawu sɔ́ dó ayi mɛ nú mɛ bɔ è wlán dó Mɛsɛ́dó wěmata 8gɔ́ ɔ mɛ é kpó kúnnuɖenú e tíin ɖo hwenuxó linu lɛ́ é kpó ɔ, è nɔ ɖe agooɖojǐe Etiopíinu ɔ ɖo wěma mǐtɔn lɛ́ mɛ agaɖanu din bɔ é nɔ ɖo kɛkɛ́ví e d’agba hú ahwankɛkɛ́ví yǎyánɔ ɖé, alǒ kɛkɛ́ví e è nɔ zán ɖo wezun kínkán hwenu é ɖé mɛ.
