1. Nɛ̌ mǐ ka nɔ ɖu le kú Klísu tɔn flínflín sín nǔwiwa xwewú xwewú tɔn ɔ domɛ yiyi tɔn gbɔn?

 É ÐO wɛn ɖɔ a yí gbe ɖɔ gbɛxixɔ ɔ, nǔníná e akwɛ́ ma sixú xɔ ǎ é ɖé wɛ. (2 Kɔ. 9:15) Ðó Jezu sɔ́ gbɛ tɔn dó sá vɔ̌ wútu ɔ, a hɛn ɔ, a ná zun xɔ́ntɔn vívɛ́ xá Jexóva Mawu. A sixú lɛ́ ɖó nukúnɖíɖó bo ná nɔ gbɛ káká sɔ́yi. É sɔgbe ɖɔ mǐ ní ɖe nǔsumɛnukúnmɛ xlɛ́ ɖó gbɛxixɔ ɔ wú, bo lɛ́ ɖe nǔsumɛnukúnmɛ xlɛ́ Jexóva e wǎnyíyí sísɛ́ bɔ é sɔ́ nǔ ná é! (Hlɔ̌. 5:8) Bo ná dó d’alɔ mǐ bónú mǐ ná kpo ɖo nǔsumɛnukúnmɛ ɖe xlɛ́ wɛ, bo ma ná mɔ gbɛxixɔ ɔ dó mɔ nǔ e sín acɛ mǐ ɖó é gbeɖé ǎ ɔ, Jezu ɖó kú tɔn flínflín sín nǔwiwa e è nɔ bló ɖo xwe ɖokpó ɖokpó mɛ é ayǐ.—Luk. 22:19, 20.

2. Étɛ́ jí mǐ ka ná ɖɔ xó dó ɖo xóta élɔ́ mɛ?

² Xwe élɔ́ mɛ ɔ, è ná bló kú Jezu tɔn flínflín sín nǔwiwa ɔ ɖo samedi 12 avril 2025. É ɖo wɛn ɖɔ mǐ bǐ ɖo tuto bló wɛ bo ná yi tɛn tɔn mɛ. Ényí mǐ ba hwenu ɖo kú Jezu tɔn flínflín sín táan mɛ bo lin tamɛ a dó nǔ e Jexóva kpó Vǐ tɔn kpó wa nú mǐ é jí ɔ, mǐ ná ɖu le tɔn b’ɛ ná zɛ. Ðo xóta élɔ́ mɛ ɔ, mǐ ná ɖɔ xó dó nǔ ɖěɖěe gbɛxixɔ ɔ kplɔ́n mǐ dó Jexóva kpó Vǐ tɔn kpó wú lɛ́ é jí. Ðo xóta e bɔ d’é wú é mɛ ɔ, è ná d’alɔ mǐ bɔ mǐ ná mɔ nukún jɛ lěe mǐ sixú ɖu gbɛxixɔ énɛ́ sín le gbɔn é kpó lěe mǐ sixú ɖe nǔsumɛnukúnmɛ xlɛ́ ɖó gbɛxixɔ ɔ wú gbɔn é kpó mɛ.

 NǓ ÐĚÐĚE GBƐXIXƆ Ɔ KPLƆ́N MǏ DÓ JEXÓVA WÚ LƐ́ É

3. Nɛ̌ kú gbɛtɔ́ ɖokpó tɔn ka sixú xɔ gbɛ nú gbɛtɔ́ lǐvi mɔ̌kpán gbɔn? (Kpɔ́n ɖiɖe ɔ lɔmɔ̌.)

³ Gbɛxixɔ ɔ kplɔ́n nǔ mǐ dó nǔjlɔ́jlɔ́wiwa Jexóva tɔn wú. (Sɛ́n. 32:4) Gbɔn nɛ̌ é? Lin tamɛ dó nǔ élɔ́ wú: Tónúmase Adámu tɔn zɔ́n bɔ mǐ ɖu hwɛhuhu e nɔ kplá mɛ jó nú kú é sín gǔ. (Hlɔ̌. 5:12) Bo ná dó ɖe mǐ sín hwɛhuhu kpó kú kpó kannu ɔ, Jexóva sɛ́ Jezu dó bónú é ná sɔ́ gbɛ tɔn dó sá vɔ̌. Amɔ̌, nɛ̌ vɔ̌sísá gbɛtɔ́ maɖóblɔ̌ ɖokpó tɔn ka sixú ɖe gbɛtɔ́ lǐvi mɔ̌kpán sín hwɛhuhu kpó kú kpó kannu gbɔn? Mɛsɛ́dó Pɔ́lu tínmɛ ɖɔ: “Lěe tónúmase gbɛtɔ́ ɖokpó [Adámu] tɔn zɔ́n bɔ mɛ gěgé húzú hwɛhutɔ́ gbɔn é ɔ, mɔ̌ ɖokpó ɔ, tónúsise mɛ ɖokpó [Jezu] tɔn zɔ́n bɔ mɛ gěgé ná húzú nǔjlɔ́jlɔ́watɔ́.” (Hlɔ̌. 5:19; 1 Tim. 2:6) Ðo xógbe ɖěvo mɛ ɔ, tónúmase gbɛtɔ́ maɖóblɔ̌ ɖokpó tɔn wɛ zɔ́n bɔ mǐ húzú kannumɔ nú hwɛhuhu kpó kú kpó. Énɛ́ wú ɔ, tónúsise gbɛtɔ́ maɖóblɔ̌ ɖokpó tɔn ɖó ná tún kan nú mǐ.

4. Étɛ́wú Jexóva ma ka hun ali nu ayijlɔ́jlɔ́nɔ e ɖo kúnkan Adámu tɔn mɛ lɛ́ é bónú yě ná nɔ gbɛ káká sɔ́yi kpowun ǎ?

⁴ Dandan jɛ́n Jezu ná kú cóbá hwlɛ́n gbɛ nú mǐ a? Jexóva sixú hun ali nú ayijlɔ́jlɔ́nɔ e ɖo kúnkan Adámu tɔn mɛ lɛ́ é kpowun bónú yě ná nɔ gbɛ káká sɔ́yi ǎ é? Mǐ sixú lin ɖɔ ali ɖagbe e nu è ná ɖe ɖɛ tagba ɔ ɖe é nɛ́. Amɔ̌, énɛ́ ná ɖe nǔjlɔ́jlɔ́wiwa Jexóva tɔn e nǔ bǐ vɔ ɖ’é wú é xlɛ́ ǎ. Ðó é ná cí ɖɔ Adámu kún hu hwɛ syɛ́nsyɛ́n mɔ̌hun gbeɖé bɔ vǐ tɔn lɛ́ nyí hwɛhutɔ́ ó ɖɔhun. Amɔ̌, énɛ́ ka nyí nǔgbó ǎ.

5. Étɛ́wú mǐ ka sixú kú d’é jí ɖɔ Jexóva ná nɔ wa nǔ e sɔgbe é hwebǐnu?

⁵ Amɔ̌, ényí Jexóva ma ko sɔ́ nǔ nú gbɛxixɔ ɔ ǎ, bo xo nǔjlɔ́jlɔ́wiwa éɖésúnɔ tɔn nyi kɛ́n, lobo yí gbe bónú Adámu sín vǐ hwɛhutɔ́ lɛ́ ná nɔ gbɛ káká sɔ́yi ɔ ka lo? Mɛ lɛ́ ná ɖibla kanbyɔ́ yěɖée ɖɔ Mawu ka ná lɛ́ xo nǔjlɔ́jlɔ́wiwa nyi kɛ́n ɖo ninɔmɛ ɖěvo lɛ́ mɛ ǎ é jí. Ði kpɔ́ndéwú ɔ, é ka sixú gɔn akpá tɔn ɖé lɛ́ ɖe wɛ a? É byɔ́ ɖɔ ado ní hu mǐ ɖó énɛ́ wú ǎ. Nǔgbó ɔ wɛ nyí ɖɔ Jexóva wa nǔ kpó hwɛjijɔ kpó, é ná bo tlɛ nyí hwenu e é byɔ́ vɔ̌sísá ɖaxó ɖo así tɔn é ɔ nɛ́, énɛ́ wɛ nyí ɖɔ é sɔ́ Vǐ súnnu vívɛ́ná tɔn dó sá vɔ̌, bɔ énɛ́ ná mǐ gǎnjɛwú ɖɔ é ná nɔ wa nǔ e sɔgbe é hwebǐnu.

6. Ðɔ ali e nu gbɛxixɔ ɔ ɖe wǎnyíyí Jexóva tɔn xlɛ́ ɖe é ɖokpó. (1 Jaan 4:9, 10)

⁶ Gbɛxixɔ ɔ d’alɔ mǐ bɔ mǐ mɔ nukúnnú jɛ wú ɖɔ Jexóva nɔ wa nǔ jlɔ́jlɔ́. Amɔ̌, ali e nu é lɛ́ d’alɔ mǐ ɖe tawun é wɛ nyí ɖɔ é bló bɔ mǐ mɔ lě do wǎnyíyí tɔn gɔ́ngɔ́n sɔ é. (Jaan 3:16; xa 1 Jaan 4:9, 10.) Nǔ e mǐ kplɔ́n dó gbɛxixɔ ɔ wú é xlɛ́ ɖɔ Jexóva ba ɖɔ mǐ ní nɔ gbɛ káká sɔ́yi. É ka nyí énɛ́ kɛ́ɖɛ́ ǎ, loɔ, é lɛ́ ba ɖɔ mǐ ní nɔ xwédo tɔn mɛ. Lin tamɛ dó nǔ élɔ́ jí: Hwenu e Adámu hu hwɛ é ɔ, Jexóva nya ɛ sín  xwédo tɔn e mɛ mɛsɛntɔ́ tɔn lɛ́ ɖe é mɛ. Wǎgbɔ tɔn ɔ, mǐ lɔ ɖo xwédo tɔn mɛ hwenu e è ji mǐ é ǎ. Amɔ̌, Jexóva zɔn dó gbɛxixɔ ɔ wú bo sɔ́ hwɛ mǐtɔn lɛ́ kɛ mǐ, bo ná wá dɔn mɛ e ɖe xlɛ́ ɖɔ émí ɖó nǔɖiɖi n’i bo nɔ se tónú n’i lɛ́ é bǐ wá xwédo tɔn mɛ. É ná bo tlɛ nyí din ɔ, mǐ hɛn ɔ, mǐ ná zun xɔ́ntɔn vívɛ́ xá Jexóva kpó mawusɛntɔ́ hǎtɔ́ mǐtɔn lɛ́ kpó. Jexóva yí wǎn nú mǐ nǔgbó nǔgbó!—Hlɔ̌. 5:10, 11.

7. Nɛ̌ wǔvɛ́ e Jezu se é ka d’alɔ mǐ bɔ mǐ mɔ nukúnnú jɛ lě do Jexóva yí wǎn nú mǐ sɔ é mɛ gbɔn?

⁷ Ényí mǐ lin tamɛ dó nǔ e gbɛxixɔ ɔ byɔ́ ɖo Jexóva sí é jí ɔ, mǐ sixú mɔ nukúnnú jɛ lě do é yí wǎn nú mǐ sɔ é mɛ hú gǎn. Satáan ɖɔ ɖɔ mɛsɛntɔ́ Mawu tɔn ɖě kún ná kpo ɖo gbejí n’I ényí mɔ̌ wiwa vɛ́ wǔ ɔ ó. Bo ná dó xlɛ́ ɖɔ Satáan ɔ, adingbannɔ wɛ é nyí ɔ, Jexóva yí gbe bɔ Jezu se wǔvɛ́ cóbó kú. (Jɔb. 2:1-5; 1 Pi. 2:21) Jexóva mɔ bɔ mɛ lɛ́ ɖɔ slamɛ Jezu wú, sɔ́ja lɛ́ xo è, bo wá xwe è nyi atín ɖé wú. Énɛ́ gúdo ɔ, Jexóva mɔ bɔ Vǐ súnnu tɔn se wǔvɛ́ tawun cóbó kú. (Mat. 27:28-31, 39) Jexóva ɖó hlɔ̌nhlɔ́n bo hɛn ɔ, é ná sú ali dó nǔ énɛ́ lɛ́ bɔ ɖěbǔ ná jɛ ǎ. Ði kpɔ́ndéwú ɔ, hwenu e gbeklánxámɛtɔ́ lɛ́ ɖɔ: “Mawu ní bo hwlɛ́n ɛ din, ényí nǔ tɔn nyɔ́ nukún Tɔn mɛ ɔ nɛ́” é ɔ, Jexóva hɛn ɔ, é ná ko wa mɔ̌. (Mat. 27:42, 43) Amɔ̌, ényí Mawu ko d’afɔ xó ɔ mɛ wɛ nyí ɔ, è ná sú axɔ́ ɖě dó xɔ gbɛ nú mǐ ǎ, bɔ mǐ ka sɔ́ ná lɛ́ ɖó nukúnɖíɖó ɖě ǎ. Énɛ́ wú ɔ, Jexóva yí gbe bɔ Vǐ súnnu tɔn se wǔvɛ́ káká bo bɔ nu.

8. Jexóva ka se wǔvɛ́ hwenu e é mɔ bɔ Vǐ súnnu tɔn ɖo wǔvɛ́ se wɛ é wɛ a? Tínmɛ. (Kpɔ́n ɖiɖe ɔ lɔmɔ̌.)

⁸ Énɛ́ wú ɔ, mǐ ɖó ná lin ɖɔ ɖó Mawu nyí Nǔbǐwúkpétɔ́ wú ɔ, é kún nɔ se wǔvɛ́ ó ǎ! É dá gbɛtɔ́ lɛ́ kpó nǔwúkpíkpé ɔ kpó bɔ yě hɛn ɔ, yě ná nɔ aluwɛ mɛ, alǒ ɖó awǎjijɛ kpó nǔ ɖěvo lɛ́ kpó. Gɔ́ ná ɔ, ɖó Biblu ɖɔ ɖɔ é dá mǐ ɖó akpajlɛ́ tɔn mɛ wú ɔ, énɛ́ ɖo xlɛ́xlɛ́ wɛ ɖɔ lěe nǔ nɔ cí nú gbɛtɔ́ e wɛ é nɔ cí nú élɔ́. Biblu ɖe xlɛ́ ɖɔ “xomɛ” nɔ sin i; é nɔ lɛ́ nɔ “aluwɛ” mɛ. (Ðɛh. 78:40, 41) Lɛ̌ lin tamɛ dó tan Ablaxámu kpó Izáki kpó tɔn jí. A ná ko flín ɖɔ è byɔ́ Ablaxámu ɖɔ é ní sɔ́ vǐɖokpónɔ tɔn dó sá vɔ̌. (Bǐb. 22:9-12; Ebl. 11:17-19) Nukún jɛ́n mǐ sixú dó lěe nǔ cí nú Ablaxámu hwenu e é ɖo gbesisɔmɛ bo ná sɔ́ hwǐ dó hu vǐ tɔn Izáki ná é mɛ kpɔ́n kpowun. Dǒ nukún lě do Jexóva ná ko blá wǔ, bo lɛ́ flú sɔ hwenu e é mɔ bɔ mɛ lɛ́ dó ya nú Vǐ súnnu tɔn bo hwi i é mɛ kpɔ́n!—Kpɔ́n video Ði nǔ yěɖɔhun: Ablaxámu, Akpáxwé wegɔ́ ɖo jw.org jí.

9. Nɛ̌ Hlɔ̌manu lɛ́ 8:32, 38, 39 ka d’alɔ we bɔ a mɔ nukúnnú jɛ lě do Jexóva yí wǎn nú hwi kpó mawusɛntɔ́ hǎtɔ́ towe lɛ́ kpó sɔ é mɛ gbɔn?

⁹ Gbɛxixɔ ɔ kplɔ́n mǐ ɖɔ mɛ ɖěbǔ kún yí wǎn nú mǐ sɔ Jexóva ó. É ná bo tlɛ nyí hɛ̌nnumɔ mǐtɔn e mǐ vɛ́ ná hú gǎn é alǒ xɔ́ntɔn vívɛ́ mǐtɔn ɖé ɔ nɛ́. (Xa Hlɔ̌manu lɛ́ 8:32, 38, 39.) É ɖo wɛn ɖɔ Jexóva yí wǎn nú mǐ hú mǐɖésúnɔ mɛtún ɔ. A ka ba ná nɔ gbɛ káká sɔ́yi a? Jexóva  tlɛ lɛ́ ba hú mɔ̌. A ka ba ɖɔ è ní sɔ́ hwɛ towe lɛ́ kɛ we a? Jexóva tlɛ lɛ́ ba hú mɔ̌. Nǔ e byɔ́ mǐ wɛ é ɖe kpowun é wɛ nyí ɖɔ, mǐ ní yí gbe nú gbɛxixɔ ɔ, éé nyí nǔníná xɔ akwɛ́ ɖé é gbɔn nǔɖiɖi ɖíɖó n’i kpó tónú sise n’i kpó gblamɛ. Lě do Mawu yí wǎn nú mǐ sɔ é sín xlɛ̌ téwúngbéjú ɖe wɛ gbɛxixɔ ɔ nyí. Gɔ́ ná ɔ, ɖo gbɛ yɔ̌yɔ́ ɔ mɛ ɔ, mǐ tlɛ ná kplɔ́n nǔ dó wǎnyíyí Jexóva tɔn wú hú gǎn mɔ̌.—Nǔt. 3:11.

NǓ ÐĚÐĚE GBƐXIXƆ Ɔ KPLƆ́N MǏ DÓ JEZU WÚ LƐ́ É

10. (a) Étɛ́ ka gba ayi dó nú Jezu tawun dó kú tɔn wú? (b) Ali tɛ́ lɛ́ nu Jezu ka jɛ hun dó nyǐkɔ Jexóva tɔn jí ɖe? (Kpɔ́n gbǎví “ Gbejíninɔ Jezu tɔn klɔ́ cí sín nyǐkɔ Jexóva tɔn wú” ɔ lɔmɔ̌.)

¹⁰ Nǔ e mɛ ɖěvo lɛ́ nɔ lin dó Jexóva wú é nɔ ɖu ayi mɛ nú Jezu tawun. (Jaan 14:31) Hwɛ e è dó Jezu ɖɔ é nylá nu dó Mawu wú é zɔ́n bɔ wǔ kú i tawun, ɖó énɛ́ sixú kɔn cí dó nyǐkɔ Tɔ́ tɔn wú. Nǔ e wú é xo ɖɛ élɔ́ é nɛ́: “Tɔ́ ce, ényí é nyɔ́ bló hǔn, kɛnklɛ́n bo sɛ kɔ́fu élɔ́ dó zɔ nú mì.” (Mat. 26:39) Gbejí e Jezu nɔ nú Jexóva káká yi kú é zɔ́n bɔ é wá klɔ́ cí sín nyǐkɔ Tɔ́ tɔn tɔn wú.

11. Nɛ̌ Jezu ka ɖe wǎnyíyí e gɔ́ngɔ́n é xlɛ́ gbɛtɔ́ lɛ́ gbɔn? (Jaan 13:1)

¹¹ Gbɛxixɔ ɔ lɛ́ kplɔ́n mǐ ɖɔ gbɛtɔ́ lɛ́ sín nǔ nɔ ɖu ayi mɛ nú Jezu tawun, tají ɔ, ahwanvú tɔn lɛ́. (Nǔx. 8:31, nwt, xa Jaan 13:1.) Ði kpɔ́ndéwú ɔ, Jezu tuun ɖɔ sinsɛnzɔ́ ayǐkúngban jí tɔn émítɔn sín akpáxwé ɖé lɛ́ ná vɛ́ wǔ tawun, ɖo tají ɔ, wǔvɛ́ kú e é ná kú é. É ɖo mɔ̌ có, hwenu e Jezu ɖo sinsɛnzɔ́ tɔn wa wɛ ɖo ayǐkúngban jí é ɔ, é wa nǔ lɛ́ mɔ̌tɔn mɔ̌tɔn kpowun ǎ. É nyɔ́ wa ɔ, é sɔ́ ayi tɔn bǐ ɖó wɛnjíjlá mɛ ɖěvo lɛ́, nǔ kplɔ́nkplɔ́n yě kpó mɛsɛntɔ́zɔ́ wiwa nú yě kpó jí. É ná bo tlɛ nyí gbe e gbe è ná hu Jezu é ɔ, é ba hwenu bo klɔ́ afɔ nú mɛsɛ́dó tɔn lɛ́, bo lɛ́ ɖɔ xó gǔdo gúdo tɔn gěgé dó dó gbɔ nú yě, bo lɛ́ xlɛ́ ali yě. (Jaan 13:12-15) Énɛ́ gúdo ɔ, hwenu e Jezu ɖo atín ɔ wú é ɔ, é zán hwenu kléwún  ɖé dó hun nukúnɖíɖó sín ali nú alǎnnúwatɔ́ e ɖo kúdonu é ɖé, bo lɛ́ bló tuto bɔ è ná kpé nukún dó nɔ éɖésúnɔ tɔn wú. (Luk. 23:42, 43; Jaan 19:26, 27) Hǔn, é nyí kú e Jezu kú é kɛ́ɖɛ́ wɛ ɖe lě do é yí wǎn nú mǐ sɔ é xlɛ́ ǎ, loɔ, gbɛ e é zán ɖo ayǐkúngban jí é blěbú lɔmɔ̌ ɖe mɔ̌ xlɛ́.

12. Ali tɛ́ nu Jezu ka kpo ɖo vɔ̌ lɛ́ sá dó ta mǐtɔn mɛ wɛ ɖe?

¹² Nǔgbó wɛ ɖɔ Klísu “kú azɔn ɖokpó bɔ xó fó,” amɔ̌, é kpo ɖo vɔ̌ lɛ́ sá dó ta mǐtɔn mɛ wɛ. (Hlɔ̌. 6:10) Gbɔn nɛ̌ é? É kpo ɖo gǎn dó wɛ, bo lɛ́ kpo ɖo hwenu zán wɛ bónú mǐ ná ɖu le gbɛxixɔ ɔ tɔn. Lin tamɛ dó nǔ e é hɛn alɔnu tɔn ján bo ɖo wiwa wɛ lɛ́ é jí. É nyí Axɔ́sú mǐtɔn, Vɔ̌sánúxwlémawutɔ́ ɖaxó mǐtɔn kpó ta agun ɔ tɔn kpó. (1 Kɔ. 15:25; Efɛ́. 5:23; Ebl. 2:17) É wɛ ɖo mɛ e gbigbɔ sɔ́ lɛ́ é xixokplé kpó mɛ wɔ̌búwɔ́bú ɔ xixokplé kpó sín azɔ̌ ɔ nu. Azɔ̌ ɖé wɛ bɔ è ná wa fó bǐ mlɛ́mlɛ́ cóbɔ wǔvɛ́ ɖaxó ɔ ná fó. b (Mat. 25:32; Mak. 13:27) É nɔ lɛ́ zán mɛsɛntɔ́ gbejínɔtɔ́ ɔ bɔ é nɔ ɖo nǔ e sín hudó mǐ ɖó bo ná sɛn Jexóva kpó gbejíninɔ kpó ɖo azǎn gǔdo gúdo tɔn élɔ́ lɛ́ mɛ lɛ́ é ná mǐ wɛ. (Mat. 24:45) Gɔ́ ná ɔ, ɖo Axɔ́súɖuɖu tɔn xwe afatɔ́n tɔn ɔ hwenu ɔ, é ná kpo ɖo hudó mǐtɔn lɛ́ sín do sú wɛ. É ɖo wɛn ɖɔ Jexóva ná Vǐ súnnu tɔn mǐ!

MA GƆN NǓ KPLƆ́N GBEÐÉ Ó

13. Nɛ̌ a ka sixú kpo ɖo nǔ kplɔ́n dó wǎnyíyí e Mawu kpó Klísu kpó ɖó nú mǐ é wú wɛ gbɔn?

¹³ Ényí a kpo ɖo tamɛ lin dó wǎnyíyí e Jexóva Mawu kpó Klísu Jezu kpó ɖó nú mǐ é jí wɛ ɔ, a ná kpo ɖo nǔ kplɔ́n d’é wú wɛ. Bóyá ɖo kú Jezu tɔn flínflín xwe élɔ́ mɛ tɔn sín táan mɛ ɔ, a hɛn ɔ a ná xwe sɔ bo xa Wɛnɖagbewéma lɛ́ ɖokpó alǒ hú mɔ̌. Ma tɛ́n kpɔ́n bá xa wěmata gěgé ɖo tɛndo ɖokpó ɔ mɛ ó. É nyɔ́ wa hǔn, xwe sɔ bo ba hwɛjijɔ ɖěvo e wú mǐ ɖó ná yí wǎn nú Jexóva kpó Jezu kpó lɛ́ é. Gɔ́ ná ɔ, ɖɔ xó nú mɛ ɖěvo lɛ́ dó nǔ e a mɔ ɖo Biblu xixa towe mɛ lɛ́ é wú.

14. Sɔgbe xá Ðɛhan 119:97 ɔ, nɛ̌ dobanúnǔ ka sixú d’alɔ mǐ bɔ mǐ ná kpo ɖo nǔ kplɔ́n dó gbɛxixɔ ɔ kpó xóta ɖěvo lɛ́ kpó wú wɛ gbɔn? (Kpɔ́n ɖiɖe ɔ lɔmɔ̌.)

¹⁴ Ényí a ɖo nǔgbó ɔ mɛ din é ɔ, xwe ko sɛ yi ɔ, a sixú kanbyɔ́ hwiɖée ɖɔ é ka sixú nyɔ́ bló bɔ è ná ɖó nukúnnúmɔjɛnǔmɛ yɔ̌yɔ́ lɛ́ dó xóta élɔ́ lɛ́ e ko má mɛ sɔmɔ̌ lɛ́ é wú a jí: Nǔjlɔ́jlɔ́wiwa Mawu tɔn, wǎnyíyí tɔn kpó gbɛxixɔ ɔ kpó. Nǔgbó ɔ wɛ nyí ɖɔ mǐ sixú kplɔ́n nǔ dó xóta énɛ́ lɛ́ kpó ɖěvo lɛ́ kpó wú kpé gbeɖé ǎ. Énɛ́ wú ɔ, étɛ́ a ka sixú wa? Ðu le nǔɖuɖu dó jǒ  ɖěɖěe è sixú mɔ ɖo wěma mǐtɔn lɛ́ mɛ lɛ́ é tɔn bǐ mlɛ́mlɛ́. Ényí a ma mɔ nǔ jɛ akpáxwé ɖé mɛ ganjí ǎ hǔn, ba do nú nǔ. Énɛ́ gúdo hǔn, lin tamɛ dó nǔ e a kplɔ́n é kpó nǔ e é kplɔ́n we dó Jexóva, Vǐ tɔn kpó wǎn e yě yí nú we é kpó wú é jí ɖo kéze ɔ mɛ.—Xa Ðɛhan 119:97.

15. Étɛ́wú mǐ ka ɖó ná kpo ɖo nǔ xɔ akwɛ́ e ɖo Biblu mɛ lɛ́ é ba wɛ?

¹⁵ Ényí a ma mɔ nǔ yɔ̌yɔ́ ɖé alǒ nǔ e sɔ́ akpakpa mɛ é ɖé hweɖébǔnu e a júnjɔ́n ayǐ bo ná xa nǔ alǒ ba do nú nǔ é ǎ hǔn, ma nú awakanmɛ kú we ó. Ðo ali ɖé nu ɔ, mɛ e ɖo tíntɛ́nkpɔ́n wɛ bo ná mɔ siká é ɖé ɖɔhun wɛ a cí. Kpó suúlu kpó ɔ, sikábatɔ́ lɛ́ nɔ zán ganxixo mɔ̌kpán, alǒ azǎn mɔ̌kpán cóbó nɔ wá mɔ siká e tlɛ hwe tawun é ɖé. É ɖo mɔ̌ có, yě nɔ kpo ɖo kan ɖó dó biba tɔn wú wɛ, ɖó é ná bo tlɛ nyí siká kpɛví wɛ ɔ, é nɔ xɔ akwɛ́ nukún yětɔn mɛ. Nǔgbó xɔ akwɛ́ e ɖo Biblu mɛ lɛ́ é tɔn zun kwínkwín má kwín! (Ðɛh. 119:127; Nǔx. 8:10) Énɛ́ wú ɔ, ɖǒ suúlu, bo tɛ́ dó tuto Biblu xixa tɔn towe wú.—Ðɛh. 1:2.

16. Nɛ̌ mǐ ka sixú xwedó kpɔ́ndéwú Jexóva kpó Jezu kpó tɔn gbɔn?

¹⁶ Ényí a ɖo nǔ kplɔ́n wɛ hǔn, nɔ ba ali ɖěɖěe nu a ná zán nǔ e a kplɔ́n lɛ́ é ɖe lɛ́ é. Ði kpɔ́ndéwú ɔ, xwedó kpɔ́ndéwú nǔ jlɔ́jlɔ́ e Jexóva nɔ wa é tɔn bo ma nɔ ɖe mɛɖé ɖó vo ɖo mɛɖé mɛ ó. Xwedó kpɔ́ndéwú wǎnyíyí e Jezu ɖó nú Tɔ́ tɔn kpó mɛ ɖěvo lɛ́ kpó é tɔn gbɔn nǔ élɔ́ lɛ́ wiwa gblamɛ: Ðo gbesisɔmɛ bo ná se wǔvɛ́ dó nyǐkɔ Jexóva tɔn tamɛ, bo nɔ lɛ́ zán hwiɖée dó klisánwun hǎtɔ́ towe lɛ́ tamɛ. Gɔ́ ná ɔ, xwedó kpɔ́ndéwú tɔn bo nɔ ɖe kúnnu nú mɛ ɖěvo lɛ́, énɛ́ ɔ, ali ná hun nú yě lɔmɔ̌ bɔ yě ná yí gbe nú nǔníná Jexóva tɔn e akwɛ́ ma sixú xɔ ǎ é.

17. Étɛ́ lɛ́ jí mǐ ka ná ɖɔ xó dó ɖo xóta e bɔ d’é wú é mɛ?

¹⁷ Lě do mǐ mɔ nukúnnú jɛ gbɛxixɔ ɔ wú b’ɛ lɛ́ su nukún mǐtɔn mɛ sɔ é ɔ, mɔ̌ do wɛ mǐ ná yí wǎn nú Jexóva kpó Vǐ tɔn kpó sɔ. Wǎgbɔ tɔn ɔ, wǎnyíyí e yě ɖó nú mǐ é ná lɛ́ jɛjí. (Jaan 14:21; Ja. 4:8) Énɛ́ wú ɔ, mi nú mǐ ní nɔ zán nǔ ɖěɖěe Jexóva sɔ́ nǔ ná lɛ́ é dó kpo ɖo nǔ kplɔ́n dó gbɛxixɔ ɔ wú wɛ. Xóta e bɔ d’é wú é ná ɖɔ xó dó ali ɖěɖěe nu mǐ sixú ɖu le gbɛxixɔ ɔ tɔn ɖe é ɖé lɛ́ wú, bo ná lɛ́ ɖɔ xó dó lěe mǐ sixú ɖe xlɛ́ ɖɔ wǎnyíyí Jexóva tɔn su nukún mǐtɔn mɛ gbɔn é ɖé lɛ́ wú.