1. Étɛ́ mǐ ka sixú wa dó hɛn xomɛ Jexóva tɔn hun?

 MǏ NÍ ɖɔ ɖɔ a ná nǔníná bǔnɔ e nyɔ́ ɖɛkpɛ, bo lɛ́ nyɔ́ zán é ɖé mɛ e a yí wǎn ná é ɖé. Ényí mɛ ɔ sɔ́ ɖó nǔsɛxwetɛn ɖé, bo ma ké ya ná ǎ ɔ, kpɔ́n lě do awakanmɛ ná kú we sɔ é! Ðo alɔ ɖěvo mɛ ɔ, ényí mɛ ɔ zán nǔníná ɔ ganjí, bo lɛ́ ɖe xlɛ́ ɖɔ é su nukún émítɔn mɛ ɔ, é ɖo wɛn ɖɔ xomɛ ná hun we. Nǔ tají ɔ lo? Jexóva sɔ́ Vǐ súnnu tɔn jó dó ta mǐtɔn mɛ. Ényí mǐ ɖe xlɛ́ ɖɔ nǔníná xɔ akwɛ́ énɛ́ kpó wǎnyíyí e sísɛ́ Jexóva bɔ é sɔ́ nǔ nú gbɛxixɔ ɔ é kpó su nukún mǐtɔn mɛ ɔ, kpɔ́n lěe xomɛ ná hun i sɔ é!—Jaan 3:16; Hlɔ̌. 5:7, 8.

2. Étɛ́ lɛ́ mǐ ka ná gbéjé kpɔ́n ɖo xóta élɔ́ mɛ?

² É ɖo mɔ̌ có, ényí hwenu ɖo yiyi wɛ ɔ, mǐ sixú jɛ mimɔ jí ɖɔ gbɛxixɔ ɔ, nǔníná e mǐ jɛxá é ɖé wɛ. É ná cí ɖɔ mǐ sɔ́ nǔníná Mawu tɔn ɖó nǔsɛxwetɛn ɖé wɛ ɖɔhun. É víví nú mǐ ɖɔ mǐ ɖó, amɔ̌, mǐ ɖe è sín fí e é ná nɔ bɔ nukún mǐtɔn ná ɖ’é jí é. Bónú nǔ mɔ̌hun ma ná jɛ ǎ ɔ, mǐ ɖó ná nɔ ɖe xlɛ́ hwɛhwɛ ɖɔ nǔ e Mawu kpó Klísu kpó wa nú mǐ é kpo ɖo nukún mǐtɔn mɛ su wɛ. Xóta élɔ́ sixú d’alɔ mǐ bɔ mǐ ná wa mɔ̌. Mǐ ná ɖɔ xó dó lěe mǐ nɔ ɖu gbɛxixɔ ɔ sín le din gbɔn é kpó lěe mǐ sixú ɖu le tɔn ɖo sɔgúdo gbɔn é kpó jí. Mǐ ná lɛ́ gbéjé nǔ e mǐ sixú wa dó ɖe xlɛ́ ɖɔ wǎnyíyí Jexóva tɔn su nukún mǐtɔn mɛ, ɖo tají ɔ, ɖo kú Jezu tɔn flínflín xwe élɔ́ mɛ tɔn sín táan mɛ é kpɔ́n.

LĚE MǏ NƆ ÐU LE TƆN GBƆN DIN É

3. Ðɔ ali e nu gbɛxixɔ ɔ nɔ hɛn le wá nú mǐ ɖo égbé ɖe é ɖokpó.

³ Mǐ ko ɖo vɔ̌sísá Klísu tɔn sín le ɖu wɛ. Ði kpɔ́ndéwú ɔ, Jexóva nɔ zɔn dó gbɛxixɔ ɔ jí, bo nɔ sɔ́ hwɛ mǐtɔn lɛ́ kɛ mǐ. Dandan wɛ é nyí n’i ɖɔ é ní sɔ́ hwɛ kɛ mǐ ǎ. Amɔ̌, é ba mɔ̌. Ðɛhanwlántɔ́ ɔ ji han kpó nǔsumɛnukúnmɛ kpó bo ɖɔ: “Hwi wɛ nyí Aklúnɔ, a nyɔ́, a ɖo gbesisɔmɛ bo ná sɔ́ hwɛ kɛ mɛ.”—Ðɛh. 86:5; 103:3, 10-13.

4. Mɛ ɖětɛ́ lɛ́ Jexóva ka sɔ́ gbɛxixɔ ɔ sín nǔ ná? (Luki 5:32; 1 Timɔtée 1:15)

 ⁴ Mɛɖé lɛ́ sixú mɔ ɖɔ émí kún jɛxá hwɛsɔ́kɛmɛ Jexóva tɔn ó. Nǔgbó ɔ, mǐ mɛ ɖěbǔ jɛxá ǎ. Mɛsɛ́dó Pɔ́lu mɔ nǔ jɛ wú ɖɔ émí ‘kún jɛxá bónú è ná ylɔ́ émí ɖɔ mɛsɛ́dó ó.’ Amɔ̌, é ɖɔ gɔ́ ná ɖɔ: “Gbɔn fɛ́nú Mawu tɔn gblamɛ ɔ, un nyí mɛ e un nyí din é.” (1 Kɔ. 15:9, 10) Ényí hwɛ mǐtɔn lɛ́ vɛ́ nú mǐ ɔ, Jexóva nɔ sɔ́ hwɛ kɛ mǐ. Étɛ́wú? É nyí mǐ jɛxá wú wɛ ǎ, loɔ, é yí wǎn nú mǐ wú wɛ. Ényí é nɔ cí nú we ɖɔ a kún jɛxá hwɛsɔ́kɛmɛ Jexóva tɔn ó, b’ɛ nɔ zɔ́n bɔ awakanmɛ nɔ kú we hǔn, flín ɖɔ é kún nyí mɛ e hwɛ ɖě ma ɖo kɔ ná ǎ lɛ́ é wú wɛ Jexóva sɔ́ nǔ nú gbɛxixɔ ɔ ó, loɔ, hwɛhutɔ́ e hwɛ yětɔn lɛ́ vɛ́ ná é wú wɛ.—Xa Luki 5:32; 1 Timɔtée 1:15.

5. Dandan wɛ é nyí nú Jexóva ɖɔ é ní kú nǔbláwǔ nú mǐ a? Tínmɛ.

⁵ Mǐ mɛ ɖěbǔ ɖó ná lin ɖɔ mǐ jɛxá nǔbláwǔkúnúmɛ Jexóva tɔn, ɖó mǐ ko ɖo sinsɛnzɔ́ tɔn mɛ sín xwe mɔ̌kpán ɖíe kpowun wú ǎ. É ɖo wɛn ɖɔ, gbejíninɔnú e mǐ wa lɛ́ é bǐ nɔ su nukún Jexóva tɔn mɛ. (Ebl. 6:10) Vǐ tɔn e é ná mǐ é ɔ, vɔ̌nu wɛ, é nyí nǔ e è wa n’i lɛ́ é sín axɔ́ wɛ é sú mɛ ǎ. Ényí mǐ ɖɔ ɖɔ mǐ jɛxá nǔbláwǔkúnúmɛ, alǒ è ɖó ná wa nǔ xá mǐ ɖo ali bǔnɔ ɖé nu hǔn, ɖiɖɔ wɛ mǐ ɖe gbɔn mɔ̌ ɖɔ kú e Klísu kú é ɔ, nǔ yǎyá wɛ é nyí nɛ́.—Sɔ́ jlɛ̌ dó Galátinu lɛ́ 2:21 wú.

6. Étɛ́wú Pɔ́lu ka wa azɔ̌ syɛ́nsyɛ́n ɖo sinsɛnzɔ́ Jexóva tɔn mɛ?

⁶ Pɔ́lu tuun ɖɔ émí kún sixú jɛxá fɛ́nú Mawu tɔn ó. Bɔ étɛ́wú é ka wa azɔ̌ syɛ́nsyɛ́n ɖo sinsɛnzɔ́ Jexóva tɔn mɛ lo? É jló ná ɖe xlɛ́ ɖɔ émí jɛxá wú wɛ ǎ, loɔ, nǔsumɛnukúnmɛ ɖe xlɛ́ Jexóva wɛ é ɖe ɖó xomɛnyínyɔ́ tɔn e é ma jɛxá ǎ é wú. (Efɛ́. 3:7) Pɔ́lu ɖɔhun ɔ, mǐ nɔ kpo ɖo sinsɛnzɔ́ wa wɛ kpó kanɖódónǔwú kpó, bo ná dó jɛxá nǔbláwǔkúnúmɛ Jexóva tɔn wú wɛ ǎ, loɔ, bo ná dó xlɛ́ ɖɔ é su nukún mǐtɔn mɛ wú wɛ.

7. Ali ɖěvo tɛ́ nu mǐ ka nɔ ɖu gbɛxixɔ ɔ sín le ɖe ɖo égbé? (Hlɔ̌manu lɛ́ 5:1; Jaki 2:23)

⁷ Ali ɖěvo e nu mǐ nɔ ɖu gbɛxixɔ ɔ sín le ɖe égbé é wɛ nyí ɖɔ mǐɖésúnɔ mɛtún ɔ hɛn ɔ, mǐ ná zun xɔ́ntɔn vívɛ́ xá Jexóva. a Lěe è ɖɔ gbɔn ɖo xóta e wá yi é mɛ é ɔ, hwenu e è ji mǐ é ɔ, mǐ ɖó kancícá ɖě xá Mawu ǎ. Amɔ̌, gbɛxixɔ ɔ nyí tɔn bɔ mǐ sixú “nɔ fífá mɛ xá Mawu,” bɔ mɔ̌ mɛ ɔ, mǐ sixú sɛkpɔ́ ɛ.—Xa Hlɔ̌manu lɛ́ 5:1; Jaki 2:23.

8. Étɛ́wú wǔ e Jexóva jɔ mǐ bɔ mǐ nɔ xo ɖɛ sɛ́dó è é ka ɖó ná nɔ su nukún mǐtɔn mɛ?

⁸ Lin tamɛ dó nǔ e ɖo xɔ́ntɔn vívɛ́ e mǐ zun xá Jexóva é mɛ é ɖokpó kpowun jí, énɛ́ wɛ nyí wǔjɔmɛ e mǐ ɖó bo ná nɔ xo ɖɛ sɛ́dó è é. É nyí ɖɛ e mɛsɛntɔ́ Jexóva tɔn lɛ́ kplé ɖó kpɔ́ bo xo ɖo agbawungba lɛ́ é kɛ́ɖɛ́ wɛ é nɔ se ǎ, loɔ, é nɔ lɛ́ se ɖɛ e mǐ mɛ ɖokpó ɖokpó nɔ xo ɖo nǔglɔ́ lɛ́ é. Ðɛ sixú xo hwihwɛ́ ayi mǐtɔn, bo lɛ́ ná mǐ fífá ayi mɛ tɔn, amɔ̌, é nɔ lɛ́ wa nǔ hú mɔ̌. É sixú ná hlɔ̌nhlɔ́n xɔ́ntɔn e mǐ zun xá Mawu é. (Ðɛh. 65:3; Ja. 4:8; 1 Jaan 5:14) Hwenu e Jezu ɖo ayǐkúngban jí é ɔ, é nɔ xo ɖɛ hwɛhwɛ, ɖó é tuun ɖɔ Jexóva nɔ ɖótó ɖɛ émítɔn lɛ́, bɔ ɖɛ ná lɛ́ ná hlɔ̌nhlɔ́n xɔ́ntɔn e émí zun xá Tɔ́ émítɔn é. (Luk. 5:16) É su nukún mǐtɔn mɛ tawun ɖɔ mǐ sixú zɔn dó vɔ̌sísá Jezu tɔn jí, bo zun xɔ́ntɔn xá Jexóva, bo tlɛ lɛ́ ɖɔ xó n’I ɖo ɖɛ mɛ!

LĚE MǏ SIXÚ ÐU LE TƆN GBƆN ÐO SƆGÚDO É

9. Nɛ̌ gbɛxixɔ ɔ ka ná hɛn le wá nú mawusɛntɔ́ gbejínɔtɔ́ lɛ́ ɖo sɔgúdo gbɔn?

⁹ Nɛ̌ mɛsɛntɔ́ Jexóva tɔn gbejínɔtɔ́ lɛ́ ka ná ɖu gbɛxixɔ ɔ sín le ɖo sɔgúdo gbɔn? È ná sɔ́  gbɛ mavɔmavɔ dó d’ajɔ yě. Mɛ gěgé nɔ lin ɖɔ nǔ mɔ̌hun kún sixú jɛ ó, ɖó sín xwe afatɔ́n mɔ̌kpán ɖíe wɛ gbɛtɔ́ ko ɖo kúkú wɛ. Amɔ̌, linlin e Jexóva ɖó sín do é wɛ nyí ɖɔ gbɛtɔ́ lɛ́ ná nɔ gbɛ káká sɔ́yi. Ényí Adámu ma ko hu hwɛ wɛ ǎ ɔ, mɛ ɖěbǔ ná lin ɖɔ gbɛ ninɔ káká sɔ́yi sín xó ɔ mɛ́ sin dín, bo ná nyí nǔgbó ǎ. Nǔgbó wɛ ɖɔ gbɛ ninɔ káká sɔ́yi sixú kpácá mɛ égbé, amɔ̌, Jexóva sú axɔ́ e ná zɔ́n bɔ linlin e é ɖó nú mǐ é ná lɛ́ jɛnu é, énɛ́ wɛ nyí Vǐ vívɛ́ná tɔn e é ná é.—Hlɔ̌. 8:32.

10. Étɛ́ ɖó nukún wɛ mɛ e gbigbɔ sɔ́ lɛ́ é kpó lɛ̌ngbɔ́ ɖěvo lɛ́ kpó ka ɖe?

¹⁰ Le sɔgúdo tɔn ɖé wɛ gbɛ mavɔmavɔ ɔ nyí có, Jexóva ba ɖɔ mǐ ní dó nukún mɛ kpɔ́n ɖo égbé. Mɛ e gbigbɔ sɔ́ lɛ́ é ɖo gbɛ e sɔ́ akpakpa mɛ é ɖé ɖó nukún wɛ ɖo jǐxwé, bo ná kpa acɛ dó ayǐkúngban ɔ jí xá Klísu. (Nǔɖe. 20:6) Gbɛ ninɔ ɖo palaɖísi ayǐkúngban jí tɔn e mɛ wǔvɛ́ kpó aluwɛ kpó ma sɔ́ ná ɖe ǎ é sín akpakpa ɖo lɛ̌ngbɔ́ ɖěvo lɛ́ sɔ́ wɛ. (Nǔɖe. 21:3, 4) A ɖo lɛ̌ngbɔ́ ɖěvo lɛ́, éé ɖo nukún ɖó gbɛ ninɔ káká sɔ́yi ɖo ayǐkúngban jí lɛ́ é mɛ wɛ a? Ajɔ énɛ́ nyí gbɔdónúmɛ sín ajɔ ɖé kpowun ǎ! Nǔ e wú è dá gbɛtɔ́ é bǐ wɛ. Gbɛ ninɔ ɖo ayǐkúngban jí ná d’awǎjijɛ nú mǐ b’ɛ ná zɛ.

11-12. Ðɔ nyɔ̌ná e mǐ sixú ɖó nukún ɖo palaɖísi mɛ é ɖé lɛ́. (Kpɔ́n ɖiɖe lɛ́ lɔmɔ̌.)

¹¹ Dǒ nukún lěe gbɛ ná cí nú we ɖo palaɖísi ayǐkúngban jí tɔn mɛ é mɛ kpɔ́n. Ado ɖě sɔ́ ná hu we dó azɔn alǒ kú wú ǎ. (Eza. 25:8; 33:24) Jexóva ná sú nǔ ɖagbe e nɔ jló we lɛ́ é bǐ sín do nú we. Étɛ́ wú a ka ba ná kplɔ́n nǔ dó? Kanlin lɛ́, nǔxixo, alǒ desɛ́ɛn ɖiɖe wɛ a? É ɖo wɛn ɖɔ è ná ɖó hudó xɔwéɖetɔ́, xɔgbátɔ́, alǒ glezɔ́watɔ́ lɛ́ tɔn ɖo fínɛ́. Gɔ́ ná ɔ, é ná lɛ́ byɔ́ ɖɔ è ní dó jinukún bo ɖa nǔɖuɖu, bló azɔ̌wanú lɛ́, bló jikpá lɛ́, bo lɛ́ kpé nukún dó yě wú. (Eza. 35:1; 65:21) Ðó è ma sɔ́ ná kú gbeɖé ǎ wútu ɔ, a ná ɖó hwenu bo ná bló nǔ énɛ́ lɛ́ bǐ, bo lɛ́ bló hú mɔ̌.

¹² Doo dídó nú mɛ e fɔ́n sín kú wá gbɛ lɛ́ é ná víví tawun! (Mɛ. 24:15) Lɛ̌ dó nukún lěe nǔ kplɔ́nkplɔ́n dó Jexóva wú d’é jí gbɔn nǔ tootóbú  e é dá lɛ́ é gblamɛ é ná víví sɔ é mɛ kpɔ́n. (Ðɛh. 104:24; Eza. 11:9) Hú gǎn bǐ ɔ, a ná wa nǔ nyi do gbeɖé ǎ, b’ɛ ná zɔn bɔ a ná sɛn Jexóva, b’ɛ sɔ́ ná byɔ́ ɖɔ a ní byɔ́ hwɛsɔ́kɛ gbeɖé ǎ. A ná sɔ́ “vǐví e ɖo hwɛhuhu mɛ nú hwenu kléwún ɖé é” dó ɖyɔ́ nyɔ̌ná sɔgúdo tɔn énɛ́ lɛ́ ná wɛ a? (Ebl. 11:25) É ɖo wɛn ɖɔ nǔ kún ná nyí mɔ̌ ó! Vɔ̌ ɖěbǔ e è ná sá din dó nyɔ̌ná énɛ́ lɛ́ sín tamɛ é sɔ mɔ̌ kɔ. Flín ɖɔ palaɖísi ayǐkúngban jí tɔn ɔ kún ná nyí nukúnɖíɖó sɔgúdo tɔn káká sɔ́yi ó. É ná wá jɛnu jɛ́n wɛ. Ényí Jexóva ma ko yí wǎn nú mǐ káká bo sɔ́ Vǐ tɔn jó dó ta mǐtɔn mɛ wɛ ǎ ɔ, nǔ énɛ́ lɛ́ ɖě ná jɛnu ǎ!

XLƐ́ ÐƆ WǍNYÍYÍ JEXÓVA TƆN SU NUKÚN ÉMÍTƆN MƐ

13. Nɛ̌ mǐ ka sixú ɖe xlɛ́ ɖɔ wǎnyíyí Jexóva tɔn nɔ su nukún mǐtɔn mɛ gbɔn? (2 Kɔlɛ́ntinu lɛ́ 6:1)

¹³ Nɛ̌ mǐ ka sixú xlɛ́ ɖɔ gbɛxixɔ e Jexóva sɔ́ nǔ ná é su nukún mǐtɔn mɛ gbɔn? Gbɔn xíxlɛ́ ɖɔ azɔ̌ tɔn wɛ ɖo tají hú gǎn ɖo gbɛzán mǐtɔn mɛ gblamɛ. (Mat. 6:33) È ná ɖɔ ɔ, Jezu kú, “bónú mɛ e ɖo gbɛ lɛ́ é ní ma sɔ́ nɔ gbɛ nú yěɖésúnɔ ɖě ó, loɔ, yě ní nɔ gbɛ nú éyɛ́ mɛ e kú dó yě tamɛ, bɔ è fɔ́n wá gbɛ é.” (2 Kɔ. 5:15) É ɖo wɛn ɖɔ, linlin e wú Jexóva nyɔ́ xomɛ e mǐ ma jɛxá ǎ é dó mǐ wú é ɔ, mǐ kún ba ná xo kpo ó.—Xa 2 Kɔlɛ́ntinu lɛ́ 6:1.

14. Nɛ̌ mǐ ka sixú ɖeji dó Jexóva wú, bo nɔ xwedó ali e é nɔ xlɛ́ mǐ é gbɔn?

¹⁴ Mǐ sixú lɛ́ xlɛ́ ɖɔ wǎnyíyí Jexóva tɔn su nukún mǐtɔn mɛ, gbɔn ji ɖiɖe dó wǔ tɔn kpó ali e é nɔ xlɛ́ mǐ é xwixwedó kpó gblamɛ. Gbɔn nɛ̌ é? Ényí mǐ ɖo gbeta lɛ́ kɔn ná wá wɛ, ɖi kpɔ́ndéwú ɔ, dó bǎ e mɛ mǐ ná kplɔ́n wěma yi ɖó é, alǒ azɔ̌ alɔkpa e mǐ ná yí gbe ná é wú ɔ, mǐ ɖó ná gbéjé nǔ e Jexóva ba ɖɔ mǐ ní wa é kpɔ́n. (1 Kɔ. 10:31; 2 Kɔ. 5:7) Ényí mǐ zɔ́n azɔ̌ nǔɖiɖi mǐtɔn ɔ, nǔ ɖaaɖagbe ɖé nɔ jɛ, énɛ́ wɛ nyí ɖɔ, nǔ e mǐ ɖi nú Jexóva é kpó xɔ́ntɔn e mǐ zun xá ɛ é kpó tlɛ nɔ lí dǒ d’é jí. Nukúnɖíɖó mǐtɔn nɔ lɛ́ za wě d’é jí.—Hlɔ̌. 5:3-5; Ja. 2:21, 22.

15. Nɛ̌ mǐ ka sixú ɖe nǔsumɛnukúnmɛ xlɛ́ ɖo kú Jezu tɔn flínflín sín táan mɛ gbɔn?

¹⁵ É lɛ́ kpo ali ɖěvo e nu mǐ sixú xlɛ́ ɖɔ wǎnyíyí Jexóva tɔn su nukún mǐtɔn mɛ ɖe é. Énɛ́ wɛ nyí ɖɔ mǐ ná gbɔn kú Jezu tɔn flínflín sín táan élɔ́ mɛ dó xlɛ́ Jexóva lě do gbɛxixɔ ɔ su nukún mǐtɔn mɛ sɔ é. Gɔ́ nú tuto e bló wɛ mǐ ɖe bo ná wá kú Jezu tɔn flínflín ɔ sín domɛ é ɔ, mǐ sixú lɛ́ ylɔ́ mɛ ɖěvo lɛ́ ɖɔ yě ní wá do tɔn mɛ. (1 Tim. 2:4) Tínmɛ lěe nǔ lɛ́ ná yi gbɔn ɖo kú Jezu tɔn flínflín ɔ domɛ é nú mɛ ɖěɖěe a ylɔ́ lɛ́ é. Video Étɛ́wú Jezu ka kú? kpó Flín kú Jezu tɔn kpó xlɛ́xlɛ́ yě ɖo jw.org jí ná d’alɔ. Mɛxó agun tɔn lɛ́ ɖó ná kú d’é jí ɖɔ émí ylɔ́ mɛ e awakanmɛ gbɔjɔ́ ná lɛ́ é. Dǒ nukún awǎjijɛ e nɔ ɖo jǐxwé kpó ayǐkúngban jí kpó hwenu e lɛ̌ngbɔ́ Jexóva tɔn e bú é ɖé lɛ́ lɛ́ kɔ wá kpó tɔn mɛ é mɛ kpɔ́n! (Luk. 15:4-7) Gbe dídó mǐɖée lɛ́ ɖo kú Jezu tɔn flínflín ɔ domɛ ní ma nyí nǔ ɖokpó e gbé mǐ ná nya é ó, loɔ, ɖo  tají ɔ, gbe dídó mɛ yɔ̌yɔ́ lɛ́, alǒ mɛ ɖěɖěe ma sɔ́ wá ǎ b’ɛ ko lín lɛ́ é gbé wɛ mǐ ná nya. Mǐ ba ná bló bɔ yě ná mɔ ɖɔ è yí émí ganjí!—Hlɔ̌. 12:13.

16. Étɛ́wú mǐ ka ɖó ná lin tamɛ dó nǔ gěgé wiwa d’é jí ɖo sinsɛnzɔ́ ɔ mɛ ɖo kú Jezu tɔn flínflín sín táan mɛ jí?

¹⁶ A ka sixú wa nǔ gěgé d’é jí ɖo sinsɛnzɔ́ Jexóva tɔn mɛ, ɖo kú Jezu tɔn flínflín sín táan mɛ a? Ali ɖagbe e nu mǐ ná ɖe xlɛ́ ɖɔ nǔ e Mawu kpó Klísu kpó wa nú mǐ lɛ́ é bǐ su nukún mǐtɔn mɛ ɖe é ɖokpó nɛ́. Bǎ e mɛ mǐ ɖ’alɔ ɖo sinsɛnzɔ́ Jexóva tɔn mɛ yi ɖó é ɔ, bǎ énɛ́ mɛ wɛ mǐ ná mɔ ɖɔ é ɖo gǔdo mǐtɔn sɔ, bɔ wǎgbɔ tɔn ɔ, jiɖe e mǐ ɖó dó wǔ tɔn é ná jɛjí. (1 Kɔ. 3:9) Gɔ́ ná ɔ, kú d’é jí ɖɔ émí xa wěmafɔ Biblu tɔn e kunkplá kú Jezu tɔn flínflín ɔ, bo ɖo Nɔ kíjé Mawuxówéma ɔ gbe bǐ gbe mɛ é alǒ, éé ɖo gbǎví e ɖo kplé aklúnɔzángbla tɛ́ntin tɔn sín azɔ̌wéma mɛ é. A tlɛ sixú wá gbeta ɔ kɔn bo ná zán wěmafɔ Biblu tɔn énɛ́ lɛ́, bɔ yě ná nyí nǔ e jí a ná kplɔ́n nǔ dó é.

17. Étɛ́ ka nɔ nyɔ́ Jexóva nukúnmɛ? (Kpɔ́n gbǎví “ Ali ɖěɖěe nu mǐ sixú ɖe xlɛ́ ɖɔ wǎnyíyí Jexóva tɔn su nukún mǐtɔn mɛ ɖe lɛ́ é” ɔ lɔmɔ̌.)

¹⁷ Ninɔmɛ towe lɛ́ sixú nɔ ma yí gbe nú we bónú a ná xwedó wěɖexámɛ e xó è ɖɔ ɖo xóta élɔ́ mɛ lɛ́ é bǐ. É ɖo mɔ̌ có, flín ɖɔ, Jexóva kún nɔ sɔ́ nǔ e a nɔ ná é jlɛ́ dó ée mɛ ɖěvo lɛ́ nɔ ná é wú ó; é nɔ mɔ nǔ jɛ ayi towe mɛ. Ényí é mɔ bɔ a ɖe nǔsumɛnukúnmɛ xlɛ́, ɖó nǔníná xɔ akwɛ́ e gbɛxixɔ ɔ nyí é wútu ɔ, é nɔ víví n’i.—1 Sam. 16:7; Mak. 12:41-44.

18. Étɛ́wú Jexóva Mawu kpó Jezu Klísu kpó sín nǔ ka nɔ su nukún mǐtɔn mɛ?

¹⁸ Gbɛxixɔ ɔ wɛ nyí tɔn bɔ è nɔ sɔ́ hwɛ mǐtɔn lɛ́ kɛ mǐ, mǐ nɔ zun xɔ́ntɔn xá Jexóva, bo lɛ́ ɖó nukúnɖíɖó gbɛ mavɔmavɔ tɔn. Mi nú mǐ ní nɔ xlɛ́ hwebǐnu ɖɔ wǎnyíyí Jexóva tɔn e sísɛ́ ɛ b’ɛ zɔ́n bɔ nǔ énɛ́ lɛ́ bǐ tíin nú mǐ é su nukún mǐtɔn mɛ. (1 Jaan 4:19) Mi nú mǐ ní nɔ lɛ́ ɖe xlɛ́ ɖɔ Jezu e yí wǎn nú mǐ tawun, bo sɔ́ gbɛ tɔn jó dó ta mǐtɔn mɛ é sín nǔ nɔ su nukún mǐtɔn mɛ!—Jaan 15:13.