1. Wǔvɛ́ tɛ́ ka nɔ wá xwetɔ́n ɖo mǐ bǐ nukɔn?

 GBE bǐ gbe wɛ mǐ ɖó ná nɔ wá gbeta lɛ́ kɔn. Gbeta ɖé lɛ́ ɖe bɔ, wǐwá yě kɔn nɔ vɛ́ wǔ sɔ mɔ̌ ǎ, ɖi nǔ e mǐ ná ɖu é alǒ hwenu e mǐ ná yi mlɔ́ ayǐ é. Ðěvo lɛ́ ka nɔ vɛ́ wǔ tawun. Yě sixú kunkplá lanmɛ ná nɔ ganjí mǐtɔn, awǎjijɛ mǐtɔn, mɛ e mǐ yí wǎn ná lɛ́ é, alǒ mawusinsɛn mǐtɔn. Mǐ nɔ ba ɖɔ gbeta mǐtɔn lɛ́ ní hɛn le wá nú mǐ, bo lɛ́ hɛn wá nú xwédo mǐtɔn. Hú gǎn bǐ ɔ, mǐ nɔ ɖó nukún ɖɔ gbeta mǐtɔn lɛ́ ná nyɔ́ Jexóva nukúnmɛ.—Hlɔ̌. 12:1, 2.

2. Afɔɖiɖe tɛ́ lɛ́ ka ná d’alɔ we bɔ a ná wá gbeta e nǔnywɛ́ kpé lɛ́ é kɔn?

² A ná ɖibla kpé wú hú gǎn bo wá gbeta e nǔnywɛ́ kpé é ɖé kɔn ényí a wa nǔ élɔ́ lɛ́ ɔ nɛ́: (1) a xo mɔjɛmɛ lɛ́ kplé, (2) gbéjé linlin e Jexóva ɖó dó xó ɔ wú é kpɔ́n, (3) da ali e hun nú we lɛ́ é kpɔ́n. Xóta élɔ́ ná ɖɔ xó dó afɔɖiɖe énɛ́ lɛ́ jí, bo ná lɛ́ d’alɔ mǐ bɔ mǐ ná mɔ lěe mǐ sixú kplɔ́n nǔwúkpíkpé nukúnnúmɔjɛnǔmɛ tɔn mǐtɔn gbɔn é.—Nǔx. 2:11.

XO MƆJƐMƐ LƐ́ KPLÉ

3. Jlɛ̌ nǔ e wú a ɖó ná xo mɔjɛmɛ lɛ́ kplé hwɛ̌ cóbó wá gbeta ɖé kɔn é dó nǔɖé wú.

³ Ényí è ná wá gbeta ɖagbe ɖé kɔn ɔ, afɔ nukɔntɔn e è ɖó ná ɖe é wɛ nyí ɖɔ è ní xo mɔjɛmɛ lɛ́ kplé. Étɛ́wú énɛ́ ka ɖo tají? Mǐ ní ɖɔ ɖɔ mɛɖé yi mɔ dotóo, ɖó azɔn syɛ́nsyɛ́n e jɛ wɛ é ɖe é ɖé wú. Dotóo ɔ ná ɖɔ lěe é ná wa azɔ̌ n’i gbɔn é kpowun ma gbéjé è kpɔ́n alǒ ma kan nǔ byɔ́ ɛ wɛ a? É ɖo wɛn ɖɔ é kún ná nyí mɔ̌ ó. Ényí hwi lɔ lin tamɛ dó mɔjɛmɛ e kunkplá ninɔmɛ towe  lɛ́ é jí ganjí jɛ nukɔn ɔ, a ná wá gbeta ɖagbe ɖé kɔn. Nɛ̌ a ka sixú wa mɔ̌ gbɔn?

4. Sɔgbe xá Nǔnywɛ́xó 18:13 ɔ, étɛ́ a ka sixú wa dó kú d’é jí ɖɔ émí ɖó mɔjɛmɛ lɛ́? (Kpɔ́n ɖiɖe ɔ lɔmɔ̌.)

⁴ Hwɛhwɛ ɔ, nǔ wɛ a sixú kanbyɔ́ dó mɔ mɔjɛmɛ lɛ́. Mǐ ní ɖɔ ɖɔ è ylɔ́ we dó mɛkplékpɔ́mɛ-núwiwa ɖé domɛ. A ná yi a? Ényí a ma tuun mɛ e ylɔ́ agɔ̌ ɔ é alǒ tuto lɛ́ ǎ ɔ, é ná byɔ́ ɖɔ a ní kan nǔɖé lɛ́ byɔ́ ɖi: “Fítɛ́ ná bló nǔwiwa ɔ ɖe wɛ è ka ɖe? Hwetɛ́nu? Mɛ nabí ka ja do tɔn mɛ? Mɛ̌ ka ná kpé nukún d’é wú? Mɛ̌ mɛ̌ é ka ja tɛn tɔn mɛ? Étɛ́ è ka sɔ́ nǔ ná bɔ mɛ e wá tɛn ɔ mɛ lɛ́ é ná bló? È ná xwlé ahan syɛ́nsyɛ́n mɛ wɛ a?” Xósin nǔkanbyɔ́ énɛ́ lɛ́ tɔn lɛ́ ná d’alɔ we bɔ a ná wá gbeta e nǔnywɛ́ kpé é ɖé kɔn.—Xa Nǔnywɛ́xó 18:13.

5. Ényí a xo mɔjɛmɛ lɛ́ kplé gúdo ɔ, étɛ́ a ka ɖó ná wa?

⁵ Ée mɔjɛmɛ lɛ́ ko jɛ alɔ towe mɛ din é ɔ, lin tamɛ dó ninɔmɛ ɔ blěbú jí. Ði kpɔ́ndéwú ɔ, ényí a se ɖɔ mɛ e ma nɔ xwedó nǔgbódodó Biblu tɔn ǎ lɛ́ é lɔ ná wá do tɔn mɛ, alǒ ɖɔ ahan syɛ́nsyɛ́n ná ɖo fínɛ́ bɔ mɛɖé kún ka ná ɖe bo kpé nukún d’é wú, bónú mɛɖé ní ma nu zɛ xwéwú ó ɔ ka lo? A ka lin ɖɔ mɛkplékpɔ́mɛ-núwiwa énɛ́ hɛn ɔ, é ná wá húzú agɔ̌ e tɛnmɛ è nɔ wa nǔ gblégblé ɖe é ɖé wɛ a? (1 Pi. 4:3) Ðo alɔ ɖěvo mɛ ɔ, ényí gan e mɛ nǔwiwa ɔ ɖe é ka wá jɛ kplé gan towe mɛ alǒ gan e mɛ a nɔ yi kúnnuɖegbé é mɛ ɔ ka lo? Ényí a lin tamɛ dó ninɔmɛ ɔ blěbú jí ɔ, é ná bɔ wú nú we hú gǎn bɔ a ná wá gbeta ɖagbe ɖé kɔn. Amɔ̌, afɔ  ɖěvo ɖe bɔ a ɖó ná ɖe. A tuun lěe nǔ cí nú hwɛ dó ninɔmɛ ɔ wú é; amɔ̌, a ka tuun lěe nǔ cí nú Jexóva d’é wú é a?—Nǔx. 2:6.

GBĚJÉ NǓ E JEXÓVA LIN É KPƆ́N

6. Sɔgbe xá Jaki 1:5 ɔ, étɛ́wú mǐ ka ɖó ná nɔ xo ɖɛ dó byɔ́ alɔdó Jexóva tɔn?

⁶ Byɔ̌ Jexóva ɖɔ é ní d’alɔ we bónú a ní mɔ nukúnnú jɛ linlin tɔn wú. Jexóva d’akpá ɖɔ émí ná ná mǐ nǔnywɛ́, bɔ ényí gbeta ɖé ná nyɔ́ nukún tɔn mɛ alǒ gbɔ ɔ, mǐ ná tuun. É ‘nɔ hun alɔ dó ná nǔnywɛ́ mɔ̌hun mɛ bǐ, é ka nɔ dó hwɛ mɛ ǎ.’—Xa Jaki 1:5.

7. Nɛ̌ a ka sixú tuun linlin Jexóva tɔn gbɔn? Jlɛ̌ dó nǔɖé wú.

⁷ Ényí a xo ɖɛ sɛ́dó Jexóva bo byɔ́ wěɖexámɛ tɔn gúdo hǔn, jɛ ayi ɖó xósin tɔn wú jí. Nǔjlɛ́dónǔwú ɖé ɖíe: Ényí a ɖo fí ɖé yi wɛ bo bú ali ɔ, a sixú kan nǔ byɔ́ mɛ e ɖo xá ɔ mɛ é ɖé. Amɔ̌, a kan nǔ ɔ byɔ́ ɔ, mɛ ɔ ná ko ɖɔ xó ǎ bɔ a ná ɖidó kpowun wɛ a? É ɖo wɛn ɖɔ a kún ná wa mɔ̌ ó. A ná ɖótó ali e jlɛ́ nú we wɛ é ɖe é kpó sɔxwixwe kpó. Mɔ̌ ɖokpó ɔ, ényí a byɔ́ nǔnywɛ́ Jexóva gúdo hǔn, tɛ́n kpɔ́n bo ɖ’ayi xósin tɔn wú gbɔn sɛ́n kpó nǔgbódodó kpó Biblu tɔn e kunkplá ninɔmɛ towe lɛ́ é biba gblamɛ. Ði kpɔ́ndéwú ɔ, hwenu e a ɖo dida kpɔ́n wɛ ɖɔ émí ka ná yi mɛkplékpɔ́mɛ-núwiwa e xó mǐ ɖɔ wá yi é domɛ alǒ gbɔ a jí é ɔ, a sixú gbéjé nǔ e Biblu ɖɔ dó agɔ̌ e tɛnmɛ è nɔ wa nǔ gblégblé ɖe lɛ́ é kpó gbɛ̌ nyanya lɛ́ dídó kpó wú é kpɔ́n, bo lɛ́ gbéjé nǔ e é  ɖɔ dó nǔ e wú a ɖó ná sɔ́ nǔ Axɔ́súɖuto ɔ tɔn lɛ́ ɖó nukɔn nú nǔjlómɛ hwiɖésúnɔ tɔn lɛ́ wú é kpɔ́n.—Mat. 6:33; Hlɔ̌. 13:13; 1 Kɔ. 15:33.

8. Étɛ́ a ka sixú wa ényí é byɔ́ ɖɔ è ní d’alɔ we bónú a ná ɖó mɔjɛmɛ e sín hudó a ɖó lɛ́ é? (Kpɔ́n ɖiɖe ɔ lɔmɔ̌.)

⁸ Amɔ̌, hweɖélɛ́nu ɔ, é sixú byɔ́ ɖɔ è ní d’alɔ we bónú a ná ɖó mɔjɛmɛ e ba wɛ a ɖe lɛ́ é. A sixú ba wěɖexámɛ ɖo nɔví súnnu e mɔ nǔ kpɔ́n é alǒ nɔví nyɔ̌nu e mɔ nǔ kpɔ́n é ɖé gɔ́n. É ɖo mɔ̌ có, do biba nú nǔ hwiɖésúnɔ ná lɛ́ hɛn le wá nú we. Mɔjɛmɛ xɔ akwɛ́ gěgé ɖo azɔ̌wanú nǔkplɔ́nkplɔ́n tɔn mǐtɔn lɛ́ mɛ ɖi Alixlɛ́mɛwéma dobanúnǔ tɔn nú Kúnnuɖetɔ́ Jexóva tɔn lɛ́ kpó Wěmafɔ lɛ́ nú klisánwun gbɛ zínzán kpó. Flín nǔ e gbé nya wɛ a ɖe é: a ná wá gbeta e ná nyɔ́ Jexóva nukúnmɛ é kɔn.

9. Étɛ́ mǐ ka sixú wa bo ná kú d’é jí ɖɔ gbeta mǐtɔn ná nyɔ́ Jexóva nukúnmɛ? (Efɛ́zinu lɛ́ 5:17)

⁹ Étɛ́ mǐ ka sixú wa bo ná kú d’é jí ɖɔ gbeta mǐtɔn ná nyɔ́ Jexóva nukúnmɛ? Jɛ nukɔn hwɛ̌ ɔ, mǐ ɖó ná kplɔ́n bo tuun i ganjí. Biblu ɖɔ: “Mɛ e tuun Mawu mɛ mímɛ́ ɔ, Mawu nɔ ná mɛ ɔ nukúnnúmɔjɛnǔmɛ.” (Nǔx. 9:10) Ɛɛn, jijɔ Jexóva tɔn lɛ́, linlin tɔn kpó nǔ e é yí wǎn ná alǒ gbɛ́ wǎn ná é kpó tuuntuun wɛ nɔ zɔ́n bɔ è nɔ ɖó nukúnnúmɔjɛnǔmɛ e sɔgbe é. Kanbyɔ́ hwiɖée ɖɔ: ‘Kpó nǔ e un tuun dó Jexóva wú é kpó ɔ, gbeta tɛ́ kɔn un ka sixú wá bɛ́ ná nyɔ́ nukún tɔn mɛ?’—Xa Efɛ́zinu lɛ́ 5:17.

10. Étɛ́wú nǔgbódodó Biblu tɔn lɛ́ ka ɖo tají hú lěe è nɔ wa nǔ lɛ́ gbɔn ɖo xwédo mǐtɔn mɛ, alǒ ɖo xá mǐtɔn mɛ é?

¹⁰ Bo ná dó nyɔ́ ɖo Jexóva sí ɔ, hweɖélɛ́nu ɔ, mǐ ɖó ná gblé ɖo mɛ e sɛkpɔ́ mǐ lɛ́ é sí. Ði kpɔ́ndéwú ɔ, mɛjitɔ́ e ɖó linlin ɖagbe é ɖé lɛ́ sixú nɔ dó cɔcɔ nú vǐ nyɔ̌nu yětɔn ɖɔ é ná da súnnu e ɖó akwɛ́ tawun é, alǒ mɛ e sixú ná agban ɖaxó yě é, ényí mɛ ɔ ná bo ma tlɛ lí dǒ ɖo gbigbɔ lixo ǎ ɔ nɛ́. Nǔgbó wɛ ɖɔ yě ɖo biba wɛ ɖɔ è ní kpé nukún dó vǐ nyɔ̌nu yětɔn wú ɖo agbaza lixo, amɔ̌, mɛ̌ ka ná d’alɔ ɛ b’ɛ ná yi nukɔn ɖo gbigbɔ lixo? Linlin tɛ́ Jexóva ka ɖó dó xó ɔ wú? Mǐ mɔ xósin ɔ ɖo Matíe 6:33 mɛ. È byɔ́ klisánwun lɛ́ ɖo fínɛ́ ɖɔ “Axɔ́súɖuto ɔ . . . ní nɔ myá nukún nú mi jɛ nukɔn.” Mǐ nɔ wlí yɛ̌yi nú mɛjitɔ́ mǐtɔn lɛ́, bo nɔ ɖó sísí nú mɛ e ɖo xá mǐtɔn mɛ lɛ́ é có, nǔ e ɖo tají hú gǎn nú mǐ é wɛ nyí ɖɔ mǐ ní dó xomɛhunhun nú Jexóva.

DA ALI E HUN NÚ WE LƐ́ É KPƆ́N

11. Jijɔ tɛ́ xó è ka ɖɔ ɖo Filípunu lɛ́ 1:9, 10 mɛ b’ɛ ná d’alɔ we bɔ a ná gbéjé ali e hun nú we lɛ́ é kpɔ́n?

¹¹ Ée a ko gbéjé nǔgbódodó Biblu tɔn e kunkplá gbeta towe lɛ́ é kpɔ́n din é ɔ, a ɖó ná gbéjé ali e hun nú we lɛ́ é kpɔ́n. (Xa Filípunu lɛ́ 1:9, 10) Ayiɖote ná zɔ́n bɔ a ná tuun fí e ali e hun nú we lɛ́ é ɖokpó ɖokpó ná kplá we hɛn yi é. Hweɖélɛ́nu ɔ, gbeta ɔ kɔn wíwá sixú bɔ wǔ. Amɔ̌, gbeta lɛ́ bǐ kɔn wíwá wɛ nɔ bɔ wǔ ǎ. Ayiɖote ná d’alɔ we bɔ a ná wá gbeta e nǔnywɛ́ kpé lɛ́ é kɔn, é ná bo tlɛ nyí ɖo ninɔmɛ e gɛ́dɛ́ lɛ́ é mɛ ɔ nɛ́.

12-13. Nɛ̌ ayiɖote ka sixú d’alɔ we bɔ a ná wá gbeta e nǔnywɛ́ kpé é ɖé kɔn dó agbazazɔ́ wú gbɔn?

¹² Lin tamɛ dó ninɔmɛ élɔ́ jí. A ɖo azɔ̌ ba wɛ bá dó kpé nukún dó xwédo towe wú. Azɔ̌ we sín ali hun nú we. A gbéjé mɔjɛmɛ lɛ́ bǐ kpɔ́n, ɖi azɔ̌ alɔkpa e wɛ é, azɔ̌ ganmɛ ɔ, táan nabí e a ná bló ɖo ali jí cóbó yi azɔ̌ ɔ mɛ é kpó nǔ ɖěvo lɛ́ kpó. Azɔ̌ we lɛ́ ɖě t’afɔ nǔgbódodó Biblu tɔn lɛ́ jí ǎ. Bóyá, azɔ̌ lɛ́ ɖokpó dɔn we hú gǎn, ɖó azɔ̌ alɔkpa e a nɔ ba é wɛ, alǒ ɖó sunzánfókwɛ́ ɔ tlí tawun wútu. Amɔ̌, nǔ ɖěvo lɛ́ lɛ́ ɖo fínɛ́ bɔ a ɖó ná gbéjé kpɔ́n hwɛ̌ cóbó wá gbeta ɖé kɔn.

¹³ Ði kpɔ́ndéwú ɔ, azɔ̌ lɛ́ ɖě ka ná jɛ kplé gan towe mɛ wɛ a? Azɔ̌ lɛ́ ɖě ka ná ɖu hwenu e sín hudó a ɖó, bo ná bló bɔ xwédo towe ná nɔ ayijayǐ mɛ, ɖó awǎjijɛ, bo lɛ́ sɛkpɔ́ Jexóva é ɖě sín mɛ wɛ a? Nǔ mɔ̌hun lɛ́ kinkanbyɔ́ ná d’alɔ  we bɔ a ná sɔ́ “nǔ e nyí nǔ tají hú gǎn lɛ́ é,” yě wɛ nyí mawusinsɛn towe kpó hudó xwédo towe tɔn lɛ́ kpó ɖó nukɔn nú nǔ agbaza tɔn lɛ́. Mɔ̌ mɛ ɔ, a sixú wá gbeta e Jexóva ná kɔn nyɔ̌ná d’é jí é ɖé kɔn.

14. Nɛ̌ ayiɖote kpó wǎnyíyí kpó ka ná d’alɔ mǐ bɔ mǐ ma ná nyí afɔklɛ́nnú nú mɛ ɖěvo lɛ́ ǎ gbɔn?

¹⁴ Ayiɖote nɔ lɛ́ d’alɔ mǐ bɔ mǐ nɔ lin tamɛ dó lěe gbeta mǐtɔn sixú kunkplá mɛ ɖěvo lɛ́ gbɔn é jí, bo sɔ́ nɔ nyí “afɔklɛ́nnú” nú yě ǎ. (Filí. 1:10) Énɛ́ ɖo tají hwenu e mǐ ɖo gbeta mǐɖésúnɔ tɔn lɛ́ kɔn wá wɛ dó nǔ lěhun lɛ́ wú wɛ é: nǔsísɔ́ kpó acɔ́biba kpó. Ði kpɔ́ndéwú ɔ, mǐ sixú nɔ ba nǔsísɔ́, alǒ acɔ́biba alɔkpa ɖé lɛ́. Amɔ̌, ényí é ka ná cí ɖě nú mɛ ɖěvo e ɖo agun ɔ mɛ, alǒ agun ɔ gúdo lɛ́ é ɔ ka lo? Ayiɖote ná d’alɔ mǐ bɔ mǐ ná ɖó sísí nú lěe nǔ nɔ cí nú yě é. Wǎnyíyí ná sísɛ́ mǐ bɔ mǐ ná ba ɖagbe “mɛ ɖěvo lɛ́” tɔn, bo nɔ jlɛ̌ jí. (1 Kɔ. 10:23, 24, 32; 1 Tim. 2:9, 10) Mɔ̌ mɛ ɔ, mǐ ná wá gbeta  ɖé kɔn b’ɛ ná xlɛ́ ɖɔ mǐ yí wǎn nú mɛ ɖěvo lɛ́, bo lɛ́ ɖó sísí nú yě.

15. Tuto tɛ́ a ka ɖó ná bló cóbó jɛ azɔ̌ wa dó gbeta tají ɖé jí jí?

¹⁵ Ényí a ɖo gbeta tají ɖé kɔn ná wá wɛ hǔn, lin tamɛ dó nǔ e é ná byɔ́ cóbɔ é ná yi ta é jí. Jezu kplɔ́n mǐ ɖɔ mǐ ní “lɛ́n akwɛ́ e é ná byɔ́” é. (Luk. 14:28) Énɛ́ wú ɔ, lin tamɛ dó hwenu, akwɛ́ kpó gǎndídó kpó e é ná byɔ́ ɖo así we cóbɔ gbeta ɔ ná yi ta é jí. Ðo ninɔmɛ ɖé lɛ́ mɛ ɔ, é sixú byɔ́ ɖɔ a ní ɖɔ xó xá xwédo towe dó nǔ e é ná byɔ́ ɖɔ yě mɛ ɖokpó ɖokpó ní wa dó nɔ gǔdo nú gbeta ɔ é jí. Étɛ́wú tuto alɔkpa énɛ́ bíbló ka xɔ akwɛ́? É sixú xlɛ́ ɖɔ gbeta towe ná byɔ́ hǔzúhúzú ɖé lɛ́, alǒ wlɛnwín ɖěvo ná w’azɔ̌ hú gǎn. Gɔ́ ná ɔ, ényí a ma xo mɛ e ɖo xwédo towe mɛ lɛ́ é nyi kɛ́n ǎ, bo ɖótó linlin yětɔn lɛ́ ɔ, yě ná ɖo gbesisɔmɛ hú gǎn bá d’alɔ we bɔ gbeta ɔ ná yi ta.—Nǔx. 15:22.

WǍ GBETA E NÁ YI TA É ÐÉ KƆN

16. Afɔ tɛ́ lɛ́ ɖiɖe ka ná d’alɔ we bɔ a ná wá gbeta e ná yi ta é ɖé kɔn? (Kpɔ́n gbǎví “ Lěe è ná wá gbeta e nǔnywɛ́ kpé lɛ́ é kɔn gbɔn é” ɔ lɔmɔ̌.)

¹⁶ Ényí a ko xwedó afɔɖiɖe e jí mǐ ɖɔ xó dó wá yi ɖo aga lɛ́ é hǔn, a ko ɖo gbesisɔmɛ bá wá gbeta e nǔnywɛ́ kpé é ɖé kɔn nɛ́. A ko xo mɔjɛmɛ lɛ́ kplé, bo ko ba do nú nǔgbódodó ɖěɖěe ná d’alɔ we bɔ a ná wá gbeta e ná nyɔ́ Jexóva nukúnmɛ é ɖé kɔn é. Din ɔ, a sixú byɔ́ Jexóva ɖɔ é ní d’alɔ we nú a ná bló bónú gbeta towe ná yi ta.

17. Nǔ tají tɛ́ ka ná d’alɔ we bɔ a ná wá gbeta ɖagbe lɛ́ kɔn?

¹⁷ Ényí a ná bo tlɛ ko wá gbeta e yi ta é gěgé kɔn wá yi hǔn, flín ɖɔ nǔ tají e ná zɔ́n bɔ a ná wá gbeta ɖagbe lɛ́ kɔn é wɛ nyí ɖɔ a ní ɖeji dó nǔnywɛ́ Jexóva tɔn wú, é ní ma nyí dó bǐbí hwiɖésúnɔ tɔn, alǒ nǔ e a ko mɔ kpɔ́n lɛ́ é wú ó. Éɖokpónɔ jɛ́n sixú ná nǔtuuntuun, nukúnnúmɔjɛnǔmɛ kpó ayiɖote kpó adodwé ɔ, éé nyí akpáxwé tají nǔnywɛ́ tɔn lɛ́ é we. (Nǔx. 2:1-5) Jexóva hɛn ɔ, é ná d’alɔ we bɔ a ná nɔ wá gbeta e nɔ nyɔ́ nukún tɔn mɛ lɛ́ é kɔn.—Ðɛh. 23:2, 3.