1. Etɛ Jehovah ka wà nú we?

NƐ̌ A ka huzu Kúnnuɖetɔ́ Jehovah tɔn gbɔn? A tò sè ‘wɛnɖagbe ɔ’ hwɛ̌; bɔya ɖò mɛjitɔ́ towe lɛ, azɔ̌gbɛ́ ɖé, alǒ ɖò wemaxɔmɛvígbɛ́ ɖé nu, kabǐ Mawuxó ɖɔ wɛ è ɖè gbɔn xwégbe xwégbe bɔ a sè. (Mak. 13:10) Enɛ gudo ɔ, mɛɖé zán hwenu gegě ɖó kpɔ́ xá we, bo dó gǎn tawun bo kplɔ́n Biblu xá we. Ee a ɖò nǔ kplɔ́n wɛ é ɔ, a wá yí wǎn nú Jehovah, bo lɛ́ kplɔ́n ɖɔ é lɔ yí wǎn nú we. Jehovah dɔn we wá nǔgbo ɔ mɛ, bɔ dìn e a huzu ahwanvu Jezu Klisu tɔn é ɔ, a ɖó nukúnɖiɖó bo na nɔ gbɛ̀ kaka sɔyi. (Jaan 6:44) É ɖò wɛn ɖɔ zǎn e Jehovah zán mɛɖé b’ɛ kplɔ́n nǔ we é, kpo gbè e é yí bɔ a nyí mɛsɛntɔ́ Tɔn é kpo sù nukún towe mɛ.

2. Etɛ lɛ jí mǐ ka na ɖɔ xó dó ɖò xóta elɔ mɛ?

² Dìn e mǐ wá tuùn nǔgbo ɔ é ɔ, mǐ ɖó wǔjɔmɛ ɔ bo na d’alɔ mɛ ɖevo lɛ bɔ ye na wá xò kpóɖó nú mǐ ɖò gbɛ̀ li ɔ jí. Mawuxóɖiɖɔ sín xwé ɖé gbè jɛ xwé ɖé gbè sixu nɔ bɔwǔ nú mǐ, amɔ̌, Biblu kplɔnkplɔn ɖé xwíxwlé mɛɖé, kpo nukún kpíkpé d’ewu kpo sixu nɔ vɛwǔ nú mǐ. Mɔ̌ wɛ nǔ nɔ cí nú we à? Enyi mɔ̌ wɛ ɔ, a sixu mɔ wěɖexámɛ e na d’alɔ we é ɖé lɛ ɖò xóta elɔ mɛ. Mǐ na ɖɔ xó dó nǔ ɖěɖee sixu sísɛ́ mǐ bɔ mǐ na d’alɔ mɛɖé b’ɛ na huzu ahwanvu lɛ é jí. Mǐ na lɛ́ gbéjé lee mǐ sixu ɖu ɖò nǔ ɖěɖee sixu zɔ́n bɔ mǐ na xò nǔ kpɔ́n dó nukún kpíkpé dó Biblu kplɔnkplɔn ɖé wu é jí gbɔn é kpɔ́n. Jɛ nukɔn hwɛ̌ ɔ, mi nú mǐ ni gbéjé nǔ e wu mǐ ɖó na jlá wɛnɖagbe ɔ mɛ lɛ, bo lɛ́ kplɔ́n nǔ ye é kpɔ́n.

3. Etɛwu mǐ ka nɔ jlá wɛn ɔ?

³ Hwenu e Jezu ɖò ayikúngban jí é ɔ, é zɔ́n azɔ̌ weɖobǔ ɖé ahwanvu tɔn lɛ. Nukɔntɔn, é ɖɔ nú ye ɖɔ ye ni jlá wɛnɖagbe  Axɔ́suɖuto ɔ tɔn mɛ lɛ, bo lɛ́ xlɛ́ ye lee ye na wà mɔ̌ gbɔn é. (Mat. 10:7; Luk. 8:1) Ði kpɔ́ndéwú ɔ, Jezu sɔnǔ nú ahwanvu tɔn lɛ nú lee ye na wà nǔ gbɔn hwenu e mɛ lɛ na yí wɛn Axɔ́suɖuto ɔ tɔn, alǒ gbɔ é. (Luk. 9:2-5) Hwenu e é ɖɔ ɖɔ wɛnɖagbe ɔ na nyí “kúnnuɖiɖe nú gbɛtɔ́ lɛ bǐ” é ɔ, ɖiɖɔ ɖ’ayǐ wɛ é ɖè ɖɔ ahwanvu emitɔn lɛ na jlá wɛn ɔ mɛ gegě gbɔn fí gegě. (Mat. 24:14; Mɛ. 1:8) Mɛ lɛ yí wɛn ɔ oo, ye gbɔ oo, ahwanvu lɛ ɖó na ɖɔ Axɔ́suɖuto Mawu tɔn kpo nǔ e é na wá wà lɛ é kpo xó nú ye.

4. Sɔgbe xá Matie 28:18-20 ɔ, gɔ́ nú wɛn Axɔ́suɖuto ɔ tɔn jijla ɔ, azɔ̌ ɖevo tɛ mǐ ka ɖó na wà?

⁴ Nǔ wegɔ́ tɛ xó Jezu ka ɖɔ ɖò gbè e é ɖè nú ahwanvu tɔn lɛ é mɛ? É ɖɔ nú ye ɖɔ ye ni kplɔ́n nǔ mɛ e sixu wá huzu ahwanvu sɔ lɛ é bonu ye ni setónú nú nǔ e emi kplɔ́n ye lɛ é bǐ. Mɛɖé lɛ sixu ɖɔ ɖɔ gbè e Jezu ɖè ɖɔ è ni jlá wɛn ɔ mɛ lɛ, bo lɛ́ kplɔ́n nǔ ye é ɔ, Klisanwun bǐbɛ̌mɛ tɔn lɛ kɛɖɛ wɛ é kan. Amɔ̌, nǔgbo wɛ à? Eǒ, Jezu ɖexlɛ́ ɖɔ azɔ̌ gbɛhwlɛngán tɔn enɛ na vunkan kaka jɛ égbé; enɛ wɛ nyí “kaka yì jɛ gbè e gbè gbɛ̀ ɔ na vɔ dó é.” (Xà Matie 28:18-20.) É cí ɖɔ hwenu e Jezu ɖè éɖée xlɛ́ ahwanvu 500 jɛji é wɛ é ɖɔ xó enɛ. (1 Kɔ. 15:6) Nukɔnmɛ ɖò nǔ e Jezu ɖexlɛ́ Jaan é mɛ ɔ, é xlɛ́ nyi wɛn ɖɔ emi ɖò nukún ɖó wɛ ɖɔ ahwanvu emitɔn lɛ bǐ ni d’alɔ mɛ ɖevo lɛ bonu ye na kplɔ́n nǔ dó Jehovah wu.—Nǔɖe. 22:17.

5. Nǔjlɛdonǔwu tɛ mɛsɛ́dó Pɔlu ka zán ɖò 1 Kɔlɛntinu lɛ 3:6-9 mɛ dó xlɛ́ kancica e ɖò wɛnɖagbe ɔ jijla kpo nǔ kplɔnkplɔn mɛ lɛ kpo tɛntin é?

⁵ Mɛsɛ́dó Pɔlu jlɛ́ nǔ kplɔnkplɔn mɛ lɛ bonu ye na huzu ahwanvu sín azɔ̌ ɔ dó gle lilɛ wu, bo xlɛ́ ɖɔ mǐ ɖó na wà nǔ hú nǔkún didó. É flín Kɔlɛntinu lɛ ɖɔ: “Nyɛ wɛ tun atín ɔ, bɔ Apolosu hú sin na; . . . Midɛɛ lɛ ka nyí gle Mawu tɔn.” (Xà 1 Kɔlɛntinu lɛ 3:6-9.) Ðó azɔ̌ wà ɖò “gle Mawu tɔn” mɛ wɛ mǐ ɖè wutu ɔ, mǐ ɖó na nɔ dó nǔkún kɛɖɛ ǎ, loɔ, mǐ ɖó na nɔ hú sin na, bo na nɔ lɛ́ gbéjé lee sù gbɔn wɛ nǔkún ɔ ɖè é kpɔ́n hwɛhwɛ. (Jaan 4:35) Ðò hwe ɖokpo ɔ nu ɔ, mǐ nɔ mɔ nǔ jɛ wu ɖɔ Mawu wɛ nɔ bló bɔ nǔkún ɔ nɔ sù.

6. Etɛ nǔ kplɔnkplɔn mɛ lɛ sín azɔ̌ ɔ ka nɔ byɔ?

⁶ Mǐ nɔ ba mɛ ɖěɖee “ɖó ninɔmɛ ayi mɛ tɔn e jɛxa gbɛ̀ mavɔmavɔ lɛ é.” (Mɛ. 13:48, nwt) Bo na dó d’alɔ mɛ enɛ lɛ bonu ye na huzu ahwanvu ɔ, mǐ ɖó na d’alɔ ye bɔ ye na (1) mɔ nukúnnú jɛ nǔ e kplɔ́n wɛ ye ɖè ɖò Biblu mɛ lɛ é mɛ, (2) yí gbè nú nǔ enɛ lɛ, (3) zán ye. (Jaan 17:3; Kolo. 2:6, 7; 1 Tɛ. 2:13) Enyi Biblu kplɔntɔ́ yɔyɔ̌ enɛ lɛ wá kplé lɛ ɔ, mɛ e ɖò agun ɔ mɛ lɛ é bǐ sixu ɖè wanyiyi xlɛ́ ye, bo lɛ́ yí ye ganji dó sɔ́ kpɔ́ndéwú ɖagbe ɖé ɖ’ayǐ. (Jaan 13:35) É sixu lɛ́ byɔ ɖɔ mɛ e ɖò nukún kpé dó nǔkplɔnkplɔn ɖé wu wɛ é ni zán hwenu gegě ɖó kpɔ́ xá nǔkplɔntɔ́ ɔ, bo lɛ́ dó gǎn lobo d’alɔ ɛ bonu é na lɛkɔ sín nǔ e é ko ɖi nǔ na lɛ é kpo nǔwalɔ kpo ee cí “ahohó” ɖɔhun lɛ é gudo. (2 Kɔ. 10:4, 5) É sixu byɔ ɖɔ è ni xlɛ́ ali mɛɖé nú sun gegě cobɔ é na ɖè afɔ enɛ lɛ, bo na dó wá kpéwú lobo bló baptɛm. Amɔ̌, gǎndidó enɛ lɛ nyí sin kɔn nyi kpákpá nɛgbé ǎ.

7. Etɛ ka nɔ sísɛ́ mǐ bɔ mǐ nɔ ɖ’alɔ ɖò wɛnjijla kpo nǔ kplɔnkplɔn mɛ lɛ bonu ye na huzu ahwanvu kpo sín azɔ̌ ɔ mɛ?

⁷ Etɛwu mǐ ka nɔ ɖ’alɔ ɖò wɛnjijla kpo nǔ kplɔnkplɔn mɛ lɛ bonu ye na huzu ahwanvu kpo sín azɔ̌ ɔ mɛ? Nukɔntɔn, ɖó mǐ yí wǎn nú Jehovah. Enyi a nɔ wà nǔ e wu a kpé é bǐ bo nɔ setónú nú gbeɖiɖe e ɖɔ ɖɔ è ni jlá wɛn ɔ mɛ lɛ, bo lɛ́ kplɔ́n nǔ ye bonu ye ni huzu ahwanvu é hǔn, xlɛ́xlɛ́ wɛ a ɖè ɖɔ emi yí wǎn nú Mawu nɛ. (1 Jaan 5:3) Lin tamɛ dó nǔ elɔ jí: Wǎn e a yí nú Jehovah é wɛ nɔ sísɛ́ we bɔ a nɔ jlá wɛn ɔ gbɔn xwégbe xwégbe. Tónúsíse nú gbeɖiɖe enɛ ka nɔ bɔwǔ à?  Dóo ǎ. Azɔn nukɔntɔn e a yì mɛɖé sín hɔn nukɔn bo na ɖekúnnu é ɔ, ado hu we wɛ à? É ɖò wɛn ɖɔ nǔ nyí mɔ̌. É ɖò mɔ̌ có, a ka tuùn ganji ɖɔ Jezu wɛ ba ɖɔ a ni wà azɔ̌ enɛ, bɔ gbè e é ɖè é wɛ a setónú na. Hwenu ɖò yiyi wɛ é ɔ, alɔɖiɖó ɖò wɛnjijlazɔ́ ɔ mɛ sixu ko wá bɔwǔ nú we. Amɔ̌, nɛ̌ nǔ ka nɔ cí nú we dó nukún kpíkpé dó Biblu kplɔnkplɔn ɖé wu wu? Nú a ɖò tamɛ lin d’eji wɛ ɔ, akpɔ nɔ ɖó we wɛ à? Nǔ sixu nyí mɔ̌. É ɖò mɔ̌ có, enyi a nɔ byɔ Jehovah ɖɔ é ni d’alɔ we bonu a na ɖu ɖò akpɔ e nɔ ɖó we é jí, bo kpankɔ́n lobo xwlé Biblu kplɔnkplɔn mɛɖé ɔ, Jehovah sixu d’alɔ we bɔ jlǒ e a ɖó bo na kplɔ́n nǔ mɛ lɛ bonu ye na huzu ahwanvu é na lɛ́ syɛn.

8. Sɔgbe xá Maki 6:34 ɔ, nǔ ɖevo tɛ ka nɔ sísɛ́ mǐ bɔ mǐ nɔ jlá wɛn ɔ mɛ ɖevo lɛ?

⁸ Wegɔ́, wǎn yí nú nɔzo mǐtɔn lɛ nɔ sísɛ́ mǐ bɔ mǐ nɔ kplɔ́n nǔgbo ɔ ye. Ðò ninɔmɛ ɖé mɛ ɔ, Jezu kpo ahwanvu tɔn lɛ kpo ko ɖɔ Mawuxó kaka bɔ nǔ ko cikɔ nú ye bǐ. Ye ɖó hudo fí e ye na gbɔjɛ ɖè é ɖé tɔn, amɔ̌ mɛ wɔbuwɔbu ɖé mɔ ye. Nǔ yetɔn blawǔ nú Jezu b’ɛ jɛ “nǔ gegě” kplɔ́n ye jí. (Xà Maki 6:34.) Agbɔ̌n kpé è có, é ka w’azɔ̌ syɛnsyɛn. Etɛwu? Jezu sɔ́ éɖée ɖó ahwan ɔ tɛnmɛ. É mɔ lě dò ye ɖò wuvɛ̌ sè wɛ, bo lɛ́ ɖó hudo nukúnɖiɖó tɔn sɔ é, lobo ba na d’alɔ ye. Ninɔmɛ mɔ̌hun pɛ́ɛ mɛ wɛ mɛ lɛ ɖè ɖò égbé. Ma nú lee ye ɖè ɖò wěxo é ni blɛ́ we ó. Lɛngbɔ̌ e ɖò bubú wɛ bo ma ɖó nyinyitɔ́ ǎ lɛ é ɖɔhun wɛ ye cí. Mɛsɛ́dó Pɔlu ɖɔ ɖɔ mɛ enɛ lɛ jɛ zɔ nú Mawu, bo kún ɖó nukúnɖiɖó ó. (Efɛ. 2:12) “[Ali] e è nɔ gbɔn, bo nɔ yì dɔn” é jí wɛ ye ɖè. (Mat. 7:13) Enyi mǐ lin tamɛ dó lě dò é byɔ ɖɔ mɛ e ɖò fí e mǐ nɔ ɖɔ Mawuxó ɖè lɛ é ni tuùn Mawu sɔ é jí ɔ, wanyiyi kpo wuvɛ̌sexámɛ kpo na sísɛ́ mǐ bɔ mǐ na d’alɔ ye. Bɔ ali taji hugǎn e nu mǐ sixu d’alɔ ye ɖè é wɛ nyí Biblu kplɔnkplɔn ɖé xwíxwlé ye.

9. Sɔgbe xá Filipunu lɛ 2:13 ɔ, nɛ̌ Jehovah ka sixu d’alɔ we gbɔn?

⁹ Vlafo a nɔ xò nǔ kpɔ́n dó Biblu kplɔnkplɔn ɖé xwíxwlé mɛ wu ɖó é na ɖu hwenu gegě ɖò así towe wu. Enyi ninɔmɛ mɔ̌hun mɛ wɛ a ɖè hǔn, ɖɔ lee nǔ cí nú we é nú Jehovah. Byɔ̌ Jehovah ɖɔ é ni d’alɔ we bonu a ni ɖó jlǒ bá ɖó Biblu kplɔnkplɔn ɖé, lobo lɛ́ kpé nukún d’ewu. (Xà Filipunu lɛ 2:13.) Mɛsɛ́dó Jaan na ganjɛwu mǐ ɖɔ Mawu na na sinkɔn nú ɖɛ e sɔgbe xá jlǒ Tɔn lɛ é. (1 Jaan 5:14, 15) Enɛ wu ɔ, kánɖeji ɖɔ Jehovah na d’alɔ we bɔ a na ɖó jlǒ bo na ɖ’alɔ ɖò nǔ kplɔnkplɔn mɛ lɛ bonu ye na huzu ahwanvu sín azɔ̌ ɔ mɛ.

10-11. Etɛ ka sixu zɔ́n bɔ mǐ na xò nǔ kpɔ́n dó nukún kpíkpé dó Biblu kplɔnkplɔn ɖé wu wu?

¹⁰ Mǐ nɔ mɔ wuvɛ̌ ɖé lɛ, b’ɛ sixu zɔ́n bɔ lee mǐ nɔ ba na ɖ’alɔ ɖò nǔ kplɔnkplɔn mɛ lɛ bonu ye na huzu ahwanvu sín azɔ̌ ɔ mɛ gbɔn é nɔ vɛwǔ nú mǐ. É ɖò mɔ̌ có, gbè e è ɖè nú mǐ ɖɔ mǐ ni kplɔ́n nǔ mɛ lɛ é nɔ vɛ́ adɔ̌ mǐ. Mi nú mǐ ni gbéjé wuvɛ̌ enɛ lɛ ɖé lɛ kpɔ́n, bo na kpɔ́n lee mǐ sixu ɖu ɖò ye jí gbɔn é.

¹¹ Mǐ sixu mɔ ɖɔ ninɔmɛ mǐtɔn lɛ ɖó dogbó nú mǐ. Ði kpɔ́ndéwú ɔ, wɛnjlatɔ́ ɖé lɛ ko kpò, alǒ ɖò azɔn jɛ wɛ. Ninɔmɛ mɔ̌hun mɛ wɛ a ɖè à? Enyi mɔ̌ hǔn, ɖ’ayi nǔ e jɛmɛji Covid-19 ɔ sín táan kplɔ́n mǐ lɛ é ɖokpo wu. Mǐ mɔ ɖɔ mǐ sixu zán alokan, alǒ nǔ mɔ̌hun ɖevo lɛ dó kpé nukún dó Biblu kplɔnkplɔn lɛ wu ganji. Enɛ wu ɔ, a sixu vo ɖò xwé towe gbè fɛɛ bo bɛ́ Biblu kplɔnkplɔn ɖé, lobo lɛ́ kpé nukún d’ewu. É lɛ́ ɖó lè ɖevo lɛ. Mɛɖé lɛ nɔ ba na kplɔ́n Biblu, amɔ̌, ye nɔ ɖó táan hwenu e nɔví mǐtɔn lɛ nɔ jlá wɛn ɔ é ǎ. É ɖò mɔ̌ có, ye sixu nɔ ɖó táan zǎnzǎn tɛɛn, alǒ zǎnmɛ. A ka na sixu ɖò gbesisɔmɛ bo sú dò enɛ à? Jezu kplɔ́n nǔ Nikodɛmu  ɖò zǎnmɛ, hwenu e Nikodɛmu ba dó é.—Jaan 3:1, 2.

12. Etɛ lɛ ka na mǐ ganjɛwu ɖɔ mǐ sixu nyí nǔkplɔnmɛtɔ́ alɔsekpɛ́nnanɔ lɛ?

¹² Mǐ sixu nɔ ma ɖeji ɖɔ mǐ kpéwú bo na kpé nukún dó Biblu kplɔnkplɔn ɖé wu. Bɔya mǐ nɔ mɔ ɖɔ mǐ ɖó na ɖó nukúnnúmɔjɛnǔmɛ tawun, alǒ nyí nǔkplɔnmɛtɔ́ alɔsekpɛ́nnanɔ ɖé cobo na sixu kplɔ́n nǔ xá mɛɖé. Enyi mɔ̌ wɛ nǔ nɔ cí nú we hǔn, ɖ’ayi nǔ atɔn elɔ lɛ e sixu zɔ́n bɔ jiɖe e a ɖó é na lɛ́ jɛji é wu. Nukɔntɔn, Jehovah nɔ mɔ ɖɔ a kpéwú, bo sixu kplɔ́n nǔ mɛ ɖevo lɛ. (2 Kɔ. 3:5) Wegɔ́, Jezu e ɖó “acɛ e ɖò jinukúnsin, kpodo ee ɖò ayikúngban jí ɔ kpo bǐ” é wɛ ɖegbe nú we ɖɔ a ni kplɔ́n nǔ mɛ. (Mat. 28:18) Atɔngɔ́, Jehovah kpo nɔví lɛ kpo sixu d’alɔ we. Jehovah d’alɔ Jezu b’ɛ tuùn nǔ e é na ɖɔ é; é sixu wà mɔ̌ nú hwi lɔ. (Jaan 8:28; 12:49) Gɔ́ na ɔ, a sixu byɔ nukúnkpénuwutɔ́ gbɛ̌ta kúnnuɖegbé tɔn tɔn towe, alǒ gbexosin-alijitɔ́ e kpé nǔ wu é ɖé, abǐ wɛnjlatɔ́ e ko mɔ nǔ kpɔ́n é ɖé ɖɔ é ni d’alɔ we bonu a na bɛ́ Biblu kplɔnkplɔn ɖé, bo lɛ́ kpé nukún d’ewu. Nǔ e sixu zɔ́n bɔ a ɖó jiɖiɖe é ɖokpo wɛ nyí ɖɔ hwenu e wɛnjlatɔ́ lɛ ɖě na ɖò nukún kpé dó Biblu kplɔnkplɔn ɖé wu wɛ é ɔ, a ni nɔ dò tɔn mɛ.

13. Etɛwu mǐ ka ɖó na ɖò gbesisɔmɛ bo huzu sɔgbe xá wlɛnwín yɔyɔ̌ lɛ?

¹³ Mǐ sixu mɔ ɖɔ wlɛnwín yɔyɔ̌ lɛ kpo azɔ̌wanú yɔyɔ̌ lɛ kpo zinzán vɛwǔ. Lee mǐ nɔ kpé nukún dó Biblu kplɔnkplɔn lɛ wu gbɔn dìn é gbɔn vo. Wema nǔkplɔnkplɔn tɔn taji mǐtɔn Ðu Gbɛ̀ Víví Kaka Sɔyi! ɔ nɔ byɔ ɖɔ mǐ ni sɔnǔ nú nǔkplɔnkplɔn ɔ, bo kpé nukún d’ewu ɖò ali ɖé nu, bonu é na gbɔn vo nú ɖ’ayǐ tɔn. Mǐ nɔ xà akpáxwé klewun klewun lɛ, bo nɔ ɖɔ xó xá nǔkplɔntɔ́ ɔ nú táan gegě. Enyi mǐ ɖò nǔ kplɔ́n mɛ wɛ ɔ, mǐ nɔ zán video lɛ hugǎn, bo nɔ lɛ́ zán nǔ e ɖò tɛn Ɛntɛnɛti tɔn mǐtɔn jí lɛ é kpo JW Library^® kpo. Enyi a ma tuùn lee a na zán azɔ̌wanú enɛ lɛ gbɔn é ǎ hǔn, ɖɔ nú mɛɖé nú é ni d’alɔ we bonu a na tuùn lee a na zán ye gbɔn é. Nǔ e má mɛ é wiwa nɔ víví nú mɛ. Huzuhuzu sɔgbe xá wlɛnwín yɔyɔ̌ ɖé zinzán nɔ d’ayihun ǎ. Amɔ̌, alɔdó Jehovah kpo mɛ ɖevo lɛ kpo tɔn na zɔ́n bɔ a na mɔ ɖɔ huzuhuzu lɛ blobló kún vɛwǔ ó, bɔ a tlɛ na ɖu vivǐ nǔ kplɔnkplɔn xá mɛ ɖevo lɛ tɔn tawun. Gbexosin-alijitɔ́ ɖé ɖɔ ɖɔ wlɛnwín nǔkplɔnkplɔn tɔn enɛ nɔ “fá kɔ nú nǔkplɔntɔ́ ɔ kpo nǔkplɔnmɛtɔ́ ɔ kpo bǐ.”

14. Enyi mǐ ɖò Mawuxó ɖɔ wɛ ɖò fí e mɛ lɛ ma nɔ yí wɛn ɔ ɖè mɔ̌ ǎ é ɔ, etɛ mǐ ka ɖó na flín? Nɛ̌ 1 Kɔlɛntinu lɛ 3:6, 7 ka nɔ dó wusyɛn lanmɛ nú mǐ gbɔn?

¹⁴ Mǐ sixu nɔ jlá wɛn ɔ ɖò xá ɖěɖee mɛ Biblu kplɔnkplɔn ɖé bíbɛ́ xá mɛɖé nɔ vɛwǔ ɖè é ɖé. Mɛɖé lɛ nɔ gbɛ́ wɛn mǐtɔn, alǒ tlɛ nɔ klán gbè xá mǐ ɖ’ékɔn. Etɛ ka sixu d’alɔ mǐ bɔ mǐ na kpò ɖò linlin e sɔgbe é ɖó wɛ ɖò xá mɔ̌hun lɛ mɛ? Flín ɖɔ ninɔmɛ mɛ lɛ tɔn sixu huzu hazawun ɖò gbɛ̀ nyanya elɔ mɛ, bɔ mɛ ɖěɖee gbɛ́ wɛn mǐtɔn ɖò bǐbɛ̌mɛ lɛ é sixu wá mɔ ɖɔ emi ɖó hudo nǔ gbigbɔ tɔn lɛ tɔn. (Mat. 5:3) Mɛ ɖěɖee nɔ gbɛ́ wema mǐtɔn lɛ ɖ’ayǐ lɛ é ɖé lɛ sixu wá yí gbè nú Biblu kplɔnkplɔn. Mǐ lɛ́ tuùn ɖɔ Jehovah wɛ nyí Gǎn Nǔkún-yiya ɔ tɔn. (Mat. 9:38) É ba ɖɔ mǐ ni kpò ɖò nǔkún dó wɛ bo lɛ́ kpò ɖò sin hú na wɛ, amɔ̌, Éɖokpo wɛ nɔ bló b’ɛ nɔ sù. (1 Kɔ. 3:6, 7) Enyi mǐ na bo ma tlɛ kpéwú bo ɖò Biblu kplɔ́n xá mɛɖé wɛ ɖò alɔnu dìn ǎ ɔ, Jehovah nɔ zɔn dó sínsɛ́n e mǐ nɔ na é wu dó d’ajɔ mǐ ǎ, loɔ, gǎn e mǐ nɔ dó é wu wɛ é nɔ zɔn dó, bɔ enɛ flínflín nɔ dó gbɔ nú mɛ tawun! *

15. Enyi mɛɖé yí gbè nú Biblu kplɔnkplɔn, bo nɔ zán gbɛ̀ sɔgbe xá nǔ e kplɔ́n wɛ é ɖè lɛ é ɔ, nɛ̌ nǔ ka nɔ cí nú Jehovah?

¹⁵ Enyi mɛɖé yí gbè nú nǔgbo Biblu tɔn lɛ, bo lɛ́ má xá mɛ ɖevo lɛ ɔ, é nɔ víví nú Jehovah. (Nǔx. 23:15, 16) Ee Jehovah na ɖò nǔ e wà wɛ togun tɔn ɖè ɖò égbé é mɔ wɛ é ɔ, kpɔ́n lě dò é na ɖó awǎjijɛ sɔ é! Ði kpɔ́ndéwú ɔ, jɛmɛji ɖé ɖò nǔ gbà wɛ gbɔn gbɛ̀ ɔ bǐ mɛ có, ɖò xwè sinsɛnzɔ́ tɔn 2020 tɔn mɛ ɔ, gbɛtɔ́ 7 705 765 wɛ è kplɔ́n Biblu xá, bo d’alɔ mɛ 241 994 bɔ ye zé yeɖée jó nú Jehovah, bo bló baptɛm. Ahwanvu yɔyɔ̌ enɛ lɛ lɔ na kplɔ́n Biblu xá mɛ gegě, bɔ ye na huzu ahwanvu. (Luk. 6:40) É ɖò wɛn ɖɔ enyi mǐ nɔ ɖò alɔ ɖó ɖò nǔ kplɔnkplɔn mɛ lɛ bonu ye na huzu ahwanvu sín azɔ̌ ɔ mɛ wɛ ɔ, xomɛ nɔ hun Jehovah.

16. Nǔ ɖagbe tɛ gbé mǐ ka sixu nya?

¹⁶ Nǔ kplɔnkplɔn mɛ lɛ bonu ye na huzu ahwanvu sín azɔ̌ ɔ bɔwǔ ǎ, amɔ̌, kpo alɔdó Jehovah tɔn kpo ɔ, mǐ sixu w’azɔ̌ e nyí mǐtɔn é, bo kplɔ́n nǔ mɛ yɔyɔ̌ lɛ bɔ ye na yí wǎn nú Tɔ́ mǐtɔn jixwé tɔn ɔ. Mǐ sixu nya nǔ elɔ gbé: é hwe bǐ ɔ, mǐ na bɛ́ Biblu kplɔnkplɔn xá mɛ ɖokpo, bo lɛ́ kpé nukún d’ewu. Enyi mǐ nɔ gbɔn ninɔmɛ e jɛxa lɛ é bǐ sín yɛkan mɛ, bo nɔ byɔ mɛ e mǐ xò gò lɛ é bǐ ɖɔ ye ni wá kplɔ́n nǔ xá mǐ ɔ, bɔya nǔ e mǐ ma ɖó nukún tɔn ǎ é wɛ na jɛ. Mǐ sixu kúdeji ɖɔ Jehovah na dó nú gǎndidó mǐtɔn lɛ.

17. Enyi mǐ kpéwú bo nɔ kplɔ́n Biblu xá mɛɖé ɔ, nɛ̌ nǔ ka na cí nú mǐ?

¹⁷ Wǔjɔmɛ tɛ ɖíe mǐ ɖó bo na jlá wɛn ɔ, lobo lɛ́ kplɔ́n nǔgbo ɔ mɛ ɖevo lɛ è! Awǎjijɛ adodwé ɔ wɛ azɔ̌ enɛ nɔ na mɛ. Mɛsɛ́dó Pɔlu e d’alɔ mɛ gegě ɖò Tɛsaloniki bɔ ye huzu ahwanvu é ɖè lee nǔ cí n’i é xlɛ́ gbɔn lě: “Nukún mǐtɔn sɔ́ ɖò mɛɖé jí zɛ midɛɛ lɛ kɛɖɛ wu ǎ; mi jí wɛ nukún mǐtɔn ɖè; mi wɛ nyí xomɛhunhun mǐtɔn, bo nyí ɖuɖeji mǐtɔn sín xlɛ́ e wu mǐ na sixu tɛ afɔ ayǐ ɖò Aklunɔ mǐtɔn Jezu nukɔn, ɖò hwenu e é na lɛkɔ wá é. Nǔgbo wɛ! Mi wɛ nyí susu mǐtɔn, bo nyí xomɛhunhun mǐtɔn.” (1 Tɛ. 2:19, 20; Mɛ. 17:1-4) Lee nǔ nɔ cí nú mɛ gegě ɖò égbé é nɛ. Nɔví nyɔnu ɖé nɔ nyí Stéphanie bɔ é kpo asú tɔn kpo d’alɔ mɛ gegě bɔ ye kpéwú bo bló baptɛm. É ɖɔ: “Nǔ ɖě sɔ́ nɔ d’awǎjijɛ nú mɛ hú è ni d’alɔ mɛ lɛ bonu ye ni zé yeɖée jó nú Jehovah ǎ.”