Xwè e bɔ d’ewu é mɛ ɔ, è ɖɔ nú xwédo Betɛli tɔn ɖɔ è ɖó hudo mɛɖéezejotɔ́ lɛ tɔn bɔ ye na yì wà sinsɛnzɔ́ ɖò alaxɔ Afrique du Sud tɔn mɛ, ɖó macinu e nɔ zín wema lɛ é ɖé na bɛ́ azɔ̌ ɖò finɛ. Un dó nyikɔ ce wema mɛ ɖɔ un na yì, bɔ ee è sɔ́ mì é ɔ, é víví nú mì. È lɛ́ sɔ́ mɛ e nɔ w’azɔ̌ ɖò Betɛli Canada tɔn lɛ é atɔn ɖevo; ye wɛ nyí: Dennis Leech, Bill McLellan kpo Ken Nordin kpo. È ɖɔ nú mǐ ɖɔ mǐ na nɔ Afrique du Sud nú hwenu línlín.

Un ylɔ́ nɔ ce, bo ɖɔ n’i ɖɔ: “Mamáa, un sè wɛnɖagbe ɖé. Un xwè Afrique du Sud!” Mamáa ce nɔ ɖɔ xó gbɔn mɔ̌ ǎ, amɔ̌, nyɔnu nǔɖitɔ́ ɖé wɛ n’i, bo lɛ́ lidǒ tawun ɖò gbigbɔ lixo. É ɖɔ xó sukpɔ́ ǎ, amɔ̌ un tuùn ɖɔ é ɖò gudo ce. É kpo tɔ́ ce kpo ɖě mɔ xó ɖɔ dó gbeta e kɔn un wá é wu ǎ, amɔ̌, zɔ e na jɛ nú ye wɛ un ɖè é vɛ́ nú ye tawun.

È kplɔ́n azɔ̌ mǐ mɛ ɛnɛ lɛ ɖò wemazínzín sín ali nu nú sun atɔn ɖò Betɛli Brooklyn tɔn. Enɛ gudo ɔ, mǐ dó tɔjihun yì toxo e è nɔ ylɔ́ ɖɔ Le Cap é mɛ ɖò Afique du Sud. Xwè 20 wɛ un ɖó hwe ɔ nu. Zǎnmɛ wɛ mǐ jɛ ali, bo dó pípan sín Le Cap yì Johannesbourg. Mǐ nɔte azɔn nukɔntɔn ɔ, ɖò ayitéhɔnnu ɖò toxo kpɛví e nyí gbetótló é ɖé mɛ ɖò Karoo. Afúntúntún kpé fí bǐ, bɔ yǒzo ɖè. Mǐ mɛ ɛnɛ lɛ nɔ kpɔ́n nǔ gbɔn flɛtɛli pípan ɔ tɔn lɛ nu, bo nɔ kanbyɔ mǐɖée ɖɔ, ‘fí alɔkpa tɛ ka nyí fí éyɛ?’ Fitɛ ɖíe mǐ ka xwè è? Xwè ɖé lɛ gudo ɔ, mǐ lɛ́ wá yì ba tò enɛ kpɔ́n, bo mɔ ɖɔ tò ɖaaɖagbe ɖé wɛ, bo dɔn mɛ tawun.

Macinu jinganjingan e zinzán tɔn vɛwǔ é ɖé kɔn wɛ un w’azɔ̌ ɖé nú xwè yɔywɛ ɖé, bo nɔ sɔnǔ nú wema e è nɔ zán dó zín Atɔxwɛ kpo Fɔ́n! kpo lɛ é. Alaxɔ ɔ nɔ zín xójlawema lɛ dó Aflika sín gbè gegě mɛ, é nyí nú Afrique du Sud kɛɖɛ ǎ, loɔ, nú Aflika-tò gegě ɖevo lɛ. Mǐ nɔ zán wemazínmɔ enɛ e zɔ́n bɔ mǐ wá Afrique du Sud é ganji.

Nukɔnmɛ ɔ, un w’azɔ̌ ɖò azɔ̌xɔsa e nɔ bló tuto nú nǔ e kúnkplá wemazínzín, agban bíbɛ́ yì fí ɖevo kpo lilɛdógbeɖevomɛ kpo lɛ é é. Alɔnu ce nɔ ján, amɔ̌, un ɖó awǎjijɛ, bɔ gbɛzán ce lɛ́ ɖó nu.

Ðò 1968 ɔ, un wlí alɔ xá nɔví nyɔnu gbexosin-alijitɔ́ ɖé; Laura Bowen wɛ é nɔ nyí, bo  ɖò malin-malin dó Betɛli ɔ. Azɔ̌xɔsa Lilɛdógbeɖevomɛ tɔn wɛ é nɔ w’azɔ̌ ɖè, bo nɔ wlán nǔ e è lilɛ dó gbè ɖevo mɛ lɛ é. Táan enɛ mɛ ɔ, è nɔ yí gbè bonu asú kpo asì kpo yɔyɔ̌ lɛ ni nɔ Betɛli ǎ; enɛ wu ɔ, è sɔ́ azɔ̌ ɖevo d’así nú mǐ, bɔ mǐ huzu gbexosin-alijitɔ́ titewungbe. Ado hu mì kpɛɖé. Un ko w’azɔ̌ ɖò Betɛli nú xwè wǒ, bo ɖó fí e un nɔ nɔ é, bɔ nǔɖuɖu nɔ lɛ́ tíìn hwebǐnu, amɔ̌ dìn ɔ, nɛ̌ mǐ ka na zán akpomɛkwɛ e è nɔ na gbexosin-alijitɔ́ titewungbe lɛ é gbɔn b’ɛ na kpa mǐ? È nɔ sú ɖɔ̌la Amɛlika tɔn 35 (alǒ, 19000 F CFA mɔ̌) mǐ sunmɛ sunmɛ hwe ɔ nu, amɔ̌, enyi mǐ kpéwú bo mɔ ganmɛ nabi e è byɔ é, ɖó mɛbakpɔ́n nabi e è byɔ é, bo lɛ́ má wema junjɔn Biblu jí nabi e è byɔ é ɔ jɛn è na sú mǐ akwɛ enɛ. Mǐ ɖó na zán akwɛ enɛ dó sú xɔ kwɛ, xɔ nǔɖuɖu, kpé nukún dó lanmɛ mǐtɔn wu, lobo lɛ́ zán dó děyiděyi lɛ kpo hudo mǐɖesunɔ tɔn ɖevo lɛ kpo takúnmɛ.

È sɛ́ mǐ dó kánɖó kpɛví ɖé mɛ, ɖò malin-malin dó toxo Durban tɔn ɖò Inde-xù ɔ kpá. Inde-nu gegě wɛ nɔ nɔ finɛ, bɔ mɛ gegě ɖò ye mɛ bɔ azɔ̌watɔ́ e nɔ yì Afrique du Sud bo nɔ yì w’azɔ̌ ɖò lekégbo lɛ mɛ ɖò 1875 vlamɛ lɛ é wɛ dó kún yetɔn. Azɔ̌ ɖevo lɛ wà wɛ ye ɖè dìn, amɔ̌, ye jó aca yetɔn kpo nǔ e ye nɔ ɖu lɛ é kpo dó ǎ; nǔɖuɖu víví e è nɔ ylɔ́ ɖɔ currys é ɖò nǔ e ye nɔ ɖu lɛ é mɛ. Glɛnsigbe wɛ ye nɔ dó, bɔ é bɔwǔ nú mǐ bɔ mǐ nɔ ɖɔ xó ɖó kpɔ́ xá ye.

È nɔ ɖó nukún ɖɔ gbexosin-alijitɔ́ titewungbe lɛ ni zán ganxixo 150 ɖò sinsɛnzɔ́ ɔ mɛ ɖò sunmɛ sunmɛ, enɛ wu ɔ, nyi kpo Laura kpo bló tuto bo na zán ganxixo ayizɛ́n azɔn nukɔntɔn e mǐ na tɔ́n é. Fí lɛ bǐ wɛ hun myɔ gáɖágáɖá. Mǐ ɖó mɛbakpɔ́n kpo Biblu kplɔnkplɔn kpo ɖě ǎ, enɛ wu ɔ, mǐ ɖó na ɖɔ Mawuxó sín xwé ɖé gbè jɛ xwé ɖé gbè nú ganxixo ayizɛ́n. Ee mǐ bɛ́ b’ɛ na bló táan ɖé bɔ un kpɔ́n gan ce é ɔ, cɛju 40 kpowun bló wɛ jɛn mǐ kpò ɖè. Un gbɔ bo nɔ wá kanbyɔ nyiɖée ɖɔ fitɛ mǐ ka xwè kpo éyɛ kpo à jí.

Mǐ lɛ́ vɔ́ tuto ɖevo bló tlolo. Gbè bǐ gbè ɔ, mǐ nɔ hɛn pɛ́ɛn, bo nɔ lɛ́ hɛn kafée dó nǔɖe mɛ gɔ́ na. Enyi mǐ jló na gbɔjɛ ɔ, mǐ nɔ gán mɔ̌to kpɛví mǐtɔn dó atín ɖé sá; hweɖelɛnu ɔ, vǐ kpɛví kpɛví ɖaaɖagbe Inde-nu ɖé lɛ nɔ lɛlɛ̌ dó mǐ, bo nɔ ɖò mǐ kpɔ́n wɛ tlítlí. Azǎn klewun ɖé gudo ɔ, enyi è ɖekúnnu nú ganxixo we, alǒ atɔn gudo ɔ, blewun jɛn zǎn nɔ kú.

Awǎjijɛnú wɛ é nyí ɖɔ è ni má nǔgbo Biblu tɔn lɛ xá tò enɛ mɛ nu e nɔ yí mɛ tawun lɛ é. Mǐ mɔ ɖɔ Inde-nu lɛ nɔ sí mɛ, nyɔ́ xomɛ, bo nɔ lɛ́ yí wǎn nú mɛ. Mɛ e ɖò sinsɛn Hindu tɔn mɛ lɛ é gegě nɔ yí wɛn mǐtɔn. Ye nɔ ba na kplɔ́n nǔ dó Jehovah, Jezu, Biblu, gbɛ̀ sɔgudo tɔn yɔyɔ̌ e mɛ fífá na tíìn ɖè é kpo nukúnɖiɖó e tíìn nú mɛkúkú lɛ é kpo wu. Xwè ɖokpo gudo ɔ, mǐ ɖó Biblu kplɔnkplɔn 20. Gbè bǐ gbè ɔ, mǐ nɔ ɖu hwemɛ núɖuɖu mǐtɔn xá xwédo e mǐ nɔ kplɔ́n nǔ xá é ɖé. Mǐ ɖ’awǎjijɛ tawun.

Amɔ̌, é lín ǎ bɔ è lɛ́ sɔ́ azɔ̌ ɖevo d’así nú mǐ; enɛ wɛ nyí ɖɔ mǐ na wà lɛdozɔ́ ɖò fí ɖaaɖagbe ɖé ɖò Inde-tɔ̀ ɔ kpá. Ðò aklunɔzán gbla lɛ ɖokpo ɖokpo mɛ ɔ, enyi mǐ yì agun ɖé ba kpɔ́n gbé, bo ɖò azɔ̌ wà ɖó kpɔ́ xá wɛnjlatɔ́ e ɖò agun ɔ mɛ lɛ é wɛ, bo na dó dó wusyɛn lanmɛ nú ye ɔ, xwédo ɖé nɔ yí mǐ dó xwégbe. Ye nɔ wà nǔ xá mǐ cí nǔ ɖɔ xwédo yetɔn mɛ wɛ mǐ ɖè ɖɔhun, bɔ mǐ nɔ zán hwenu ɖó kpɔ́ xá vǐ yetɔn lɛ kpo xwégbe kanlin yetɔn lɛ kpo. Mǐ ɖu vivǐ azɔ̌ enɛ tɔn nú xwè we, bɔ ajijimɛ kpowun ɔ, alaxɔ ylɔ́ mǐ, bo ɖɔ: “Mǐ ɖò linlin wɛ ɖɔ mi na lɛkɔ wá Betɛli.” Un yí gbè nú ye ɖɔ: “Mǐ ɖ’awǎjijɛ tawun ɖò fí elɔ e mǐ ɖè é.” Amɔ̌, nǔgbo ɔ wɛ nyí ɖɔ mǐ ɖò gbesisɔmɛ bá wà nǔ ɖebǔ e è na zɔ́n mǐ é.

Azɔ̌xɔsa Sinsɛnzɔ́ tɔn wɛ un w’azɔ̌ ɖè ɖò Betɛli, bɔ ɖò finɛ ɔ, è jɔwǔ mì bɔ un w’azɔ̌ ɖó kpɔ́ xá nɔví e zin bo lɛ́ mɔ nǔ kpɔ́n lɛ é gegě. Hwenɛnu ɔ, è nɔ sɛ́ wema dó agun lɛ ɖokpo ɖokpo mɛ, b’ɛ nɔ kúnkplá gbè e nukúnkpénuwutɔ́ lɛdo tɔn yetɔn ɖó ɖò mɛbakpɔ́n yetɔn gudo é. Ðò wema-sɛ́dó-mɛ lɛ mɛ ɔ, è nɔ do wusyɛn lanmɛ nú mɛ, bo nɔ lɛ́ na alixlɛ́mɛ e ɖò dandan lɛ é bǐ agun ɔ. É nɔ byɔ azɔ̌ tawun ɖò wěgbojinɔtɔ́ mǐtɔn lɛ sí, bonu ye na lilɛ gbeɖiɖó nukúnkpénuwutɔ́ lɛdo tɔn lɛ tɔn lɛ sín Xhosa, Zulu, kpo gbè ɖevo lɛ kpo mɛ dó Glɛnsigbe mɛ, enɛ gudo ɔ, ye nɔ lɛ́ lilɛ sín Glɛnsigbe mɛ dó Aflika-gbè gegě mɛ. Azɔ̌ syɛnsyɛn e lilɛdógbeɖevomɛzɔ́watɔ́ enɛ lɛ nɔ wà lɛ é nɔ sù  nukún ce mɛ; ye nɔ lɛ́ d’alɔ mì bɔ un nɔ mɔ nǔ jɛ wuvɛ̌ e mɔ wɛ nɔví sunnu kpo nɔví nyɔnu kpo anyǔ wiwinɔ e ɖò Aflika lɛ é ɖè é mɛ.

Hwenɛnu ɔ, acɛkpikpa Afrique du Sud tɔn nɔ ɖè mɛɖé ɖó vo nú mɛɖé sɔgbe xá sinmɛ agbaza tɔn e è ɖó é. È ɖó tɛn nú mɛ e ɖó sinmɛ agbaza tɔn vovo lɛ é ɖokpo ɖokpo, bonu mɛ e ɖó sinmɛ agbaza tɔn ɖé é ma wá zán hwenu ɖó kpɔ́ xá mɛ e ɖó sinmɛ agbaza tɔn ɖevo é ó. Nɔví mǐtɔn Aflika-nu anyǔ wiwinɔ lɛ nɔ dó gbè yeɖesunɔ tɔn lɛ, nɔ jlá wɛn ɔ dó gbè yeɖesunɔ tɔn lɛ mɛ, bo nɔ lɛ́ yì agun e mɛ è nɔ dó gbè yeɖesunɔ tɔn ɖè lɛ é.

Un tuùn Aflika-nu anyǔ wiwinɔ nabi ɖé ǎ, ɖó fí e è nɔ dó Glɛnsigbe ɖè lɛ é kɛɖɛ wɛ agun e mɛ è nɔ sɛ́ mì dó lɛ é nɔ w’azɔ̌ gbɔn. Amɔ̌ dìn ɔ, ali hun nú mì bɔ na kplɔ́n nǔ dó mɛwi Aflika-nu lɛ, aca yetɔn kpo nǔwiwa yetɔn lɛ kpo wu. Un sè wuvɛ̌ e ɖí xwi xá wɛ nɔví mǐtɔn lɛ ɖè, ɖó hwɛndomɛnú lɛ kpo nǔ e mɛ lɛ ɖi nǔ na ɖò sinsɛn linu lɛ é kpo wu é. Ye nɔ ɖè akɔ́nkpinkpan xlɛ́, bo nɔ gbɛ́ ɖɔ emi kún na xwedó aca ɖěɖee ma sɔgbe xá Biblu ǎ lɛ é ó, lobo nɔ lɛ́ gbɛ́ ɖɔ emi kún na ɖ’alɔ ɖò awovínúwiwa mɛ ó, enyi é tlɛ byɔ ɖɔ ye ni dɛ ɖò gbeklánxámɛ syɛnsyɛn mɛ e ɖò xwédo yetɔn mɛ lɛ é kpo mɛ e ɖò gletoxo yetɔn mɛ lɛ é kpo tɔn nu ɔ nɛ. Ðò gletoxo lɛ mɛ ɔ, mɛ lɛ nɔ jiya tawun. Mɛ gegě tíìn bɔ ye yì azɔ̌mɛ ɖě kpɔ́n ǎ, alǒ kpɛɖé jɛn ye yì, amɔ̌, ye ka nɔ ɖó sísí nú Biblu.

È jɔwǔ mì bɔ un ɖ’alɔ ɖò hwɛɖiɖɔxó e kúnkplá vivomɛninɔ bo sɛn Mawu kpo wǔ ɖiɖó zɔ kpo é ɖé lɛ mɛ. Nú è mɔ gbejininɔ kpo akɔ́nkpinkpan kpo, ee Kúnnuɖetɔ́ winnyawinnya e è ɖè sín wemaxɔmɛ, ɖó ye gbɛ́ ɖɔ emi kún na gɔ́ nú gbɛ̌ emitɔn lɛ bo xoɖɛ, lobo lɛ́ jí amǐsahan ó wutu lɛ é nɔ ɖexlɛ́ é ɔ, é nɔ hɛn nǔɖiɖi mɛtɔn lidǒ tawun.

Nɔví lɛ lɛ́ mɔ wuvɛ̌ ɖevo ɖò Aflika-tò kpɛví e è nɔ ylɔ́ ɖɔ Swaziland ɖ’ayǐ é mɛ. Ee Axɔ́su Sobhuza IIgɔ́ ɔ kú é ɔ, è byɔ toví lɛ bǐ ɖɔ ye ni fɔ yɛsu ɖé lɛ. Sunnu lɛ ɖó na xwlɛ́ ta, bɔ nyɔnu lɛ ɖó na kpa ɖa yetɔn yì dò. Nɔví mǐtɔn lɛ gegě gbɛ́ ɖɔ emi kún na ɖ’alɔ ɖò aca enɛ e cá kan xá mɛ e ko kú lɛ é sinsɛn mɛ é ó, bɔ enɛ zɔ́n bɔ è dóya nú ye. Gbejininɔ yetɔn nú Jehovah dó awǎjijɛ nú mǐ tawun! Gbejininɔ kpo suúluɖiɖó kpo nɔví mǐtɔn Aflika-nu lɛ tɔn kplɔ́n nǔ gegě mǐ.

Ðò 1981 ɔ, è byɔ mì ɖɔ má d’alɔ ɖò lee è nɔ zán ɔdinatɛ́ɛ ɖò wemazínzín sín ali nu gbɔn é kɔn. Enɛ wu ɔ, un lɛ́ lɛkɔ yì wemazínxɔsa. Táan enɛ mɛ víví kpɔ́n! Lee è nɔ zín wema lɛ gbɔn é ɖyɔ tawun. Azɔ̌xwé ayǐ ɔ jí tɔn e nɔ sà nǔ é sín afɔsɔ́ɖótetɔ́ ɖé hɛn macinu ɖé wá nú alaxɔ ɔ, bɔ mǐ tɛ́n zinzán tɔn kpɔ́n vɔ̌nu. Wǎgbɔ tɔn ɔ mǐ ɖyɔ macinu mǐtɔn tɛnnɛ xóxó lɛ, bo jɛ atɔ́ɔ́n yɔyɔ̌ ɖevo lɛ zán jí. Mǐ lɛ́ ɖó macinu e nɔ zín wema é yɔyɔ̌ ɖevo dìn. Mǐ nɔ zín wema dìn tawun hú ɖ’ayǐ tɔn!

Ɔdinatɛ́ɛ zinzán d’alɔ mǐ, bɔ mǐ ɖè wlɛnwín yɔyɔ̌ lɛ tɔ́n, bo nɔ zán MEPS (système électronique d’édition multilingue) dó tò nǔwlanwlán lɛ dó wexwɛ lɛ jí. Hwenu e è sɛ́ mǐ mɛ e nɔ w’azɔ̌ ɖò alaxɔ Canada tɔn mɛ é ɛnɛ dó, bɔ mǐ wá Afrique du Sud é ɔ, nukɔnyiyi tíìn tawun ɖò nǔnywɛ xwitixwiti linu! (Eza. 60:17) Mǐ mɛ ɛnɛ lɛ bǐ wɛ da nɔví nyɔnu gbexosin-alijitɔ́ ee nǔ gbigbɔ tɔn lɛ nɔ ɖu ayi mɛ na lɛ é. Bill kpo nyi kpo kpò ɖò sinsɛnzɔ́ wà wɛ ɖò Betɛli. Ken kpo Dennis kpo ko jì vǐ, bo ɖò malin-malin dó Betɛli ɔ.

Azɔ̌ e è nɔ wà ɖò alaxɔ ɔ mɛ lɛ é, nɔ fɔ́n bo nɔ ɖò jijɛji wɛ. È nɔ lilɛ wema jinjɔn Biblu jí lɛ dó gbè gegě mɛ, bo nɔ lɛ́ zín ye; gbè enɛ lɛ ka fɔ́n bo ɖò jijɛji wɛ. Enɛ gudo ɔ, è nɔ sɛ́ wema enɛ lɛ dó alaxɔ ɖevo lɛ mɛ. Enɛ wɛ zɔ́n bɔ è ɖó hudo alaxɔ yɔyɔ̌ ɖé tɔn. Nɔví lɛ gbá alaxɔ ɖé ɖó fí ɖaaɖagbe ɖé ɖò gbadahweji Johannesbourg tɔn, bɔ è hun ɖò 1987. Xomɛ hun mì ɖɔ un ɖ’alɔ ɖò nukɔnyiyi enɛ lɛ bǐ mɛ, bo lɛ́ nɔ Wěɖegbɛ́ Alaxɔ Afrique du Sud tɔn tɔn mɛ nú xwè gegě.

Ðò 2001 ɔ, è byɔ mì ɖɔ má wà sinsɛnzɔ́ ɖò Wěɖegbɛ́ Alaxɔ États-Unis tɔn tɔn yɔyɔ̌ e è ɖó ayǐ é mɛ. É kpaca mǐ tawun! Nǔgbo wɛ ɖɔ wǔ kú mǐ, ɖó mǐ sɔ́ na w’azɔ̌ ɖò Alaxɔ Afrique du Sud tɔn mɛ dìn ǎ, bo ka na lɛ́ jó xɔ́ntɔn mǐtɔn lɛ dó, amɔ̌, gbɛzinzán yɔyɔ̌ e na bɛ́ wɛ mǐ ɖè ɖò xwédo Betɛli États-Unis tɔn tɔn mɛ é sín akpakpa ɖò mǐ sɔ́ wɛ.

É ɖò mɔ̌ có, ado lɛ́ ɖò mǐ hu wɛ dó Laura sín nɔ e ko kpò bɔ mǐ ɖò zɔ na jɛ na wɛ é wu. Mǐ sixu ɖò New York bo wà nǔ gegě n’i ǎ, amɔ̌, Laura sín nɔví nyɔnu atɔn lɛ zin alɔ d’akɔ́n bo ɖɔ emi na kpé nukún wǔ tɔn ɖò agbaza, lee nǔ nɔ cí nú mɛ é kpo akwɛzinzán kpo lixo. Ye ɖɔ: “Mǐdɛɛ lɛ ɖò sinsɛnzɔ́ hwebǐnu tɔn ɔ mɛ ǎ, amɔ̌, enyi mǐ kpé nukún dó Mamáa wu ɔ, é na d’alɔ mi bɔ mi na kpò ɖò sinsɛnzɔ́ mitɔn wà wɛ.” Xomɛ hun mǐ tawun dó ye wu!

Mɔ̌ jɛn fofó ce kpo asì tɔn kpo ee nɔ nɔ Toronto, ɖò Canada é ɖò nukún kpé dó nɔ ce e nyí asúkúsi é wu wɛ gbɔn é nɛ. Hwe ɔ nu ɔ, nɔ ce ko nɔ gɔ̌n yetɔn nú xwè 20 jɛji nɛ. Wanyiyi e ye ɖexlɛ́ ɛ, gɔ́ nú nukún e ye kpé dó wǔ tɔn kaka jɛ hwenu e é kú ɖò New York wiwá mǐtɔn gudo zaan é sù nukún mǐtɔn mɛ tawun. Nyɔna ɖaxó ɖé wɛ é nyí ɖɔ mɛ e ɖò xwédo mɛtɔn mɛ lɛ é ni ɖò gbesisɔmɛ bá bló huzuhuzu lɛ ɖò gbɛzán yetɔn mɛ bo na dó kpé nukún dó mɛjitɔ́ mɛxomɔ lɛ wu. Azɔ̌ enɛ ka sixu vɛwǔ tawun hweɖelɛnu.

Nú xwè gegě ɔ, fí e è nɔ zín xójlawema lɛ ɖè ɖò États-Unis é wɛ un w’azɔ̌ ɖè. Lee è nɔ zín xójlawema lɛ gbɔn dìn é sɔgbe xá hwe mǐtɔn nu tawun, bo lɛ́ bɔkun. Agaɖanu dìn ɔ, un jɛ azɔ̌ wà jí ɖò Azɔ̌xɔsa Axixwléxwlé tɔn. É ko bló xwè 20 dìn bɔ un ɖò azɔ̌ wà wɛ ɖò alaxɔ e mɛ gbɛtɔ́ sukpɔ́ ɖè é ɖé. Dìn ɔ, mɛ 5 000 mɔ̌ wɛ ɖò azɔ̌ wà wɛ ɖò alaxɔ enɛ mɛ, gɔ́ nú mɛɖéezejotɔ́ e nɔ gosin xwé yetɔn lɛ gbè bo nɔ wá w’azɔ̌ é 2 000 mɔ̌. Wǔjɔmɛ enɛ e un ɖó bo na w’azɔ̌ ɖò alaxɔ mɔ̌hun mɛ é víví nú mì kpɔ́n!

Xwè 60 jɛji ɖíe ɔ, un sixu lin ɖɔ na ɖò fí ǎ. Laura nɔ gudo nú mì kpo ayi bǐ kpo ɖò xwè enɛ lɛ bǐ vlamɛ. Un ɖó awǎjijɛ ɖò gbɛzán ce mɛ tawun! È sɔ́ azɔ̌ vovo lɛ d’así nú mǐ, bɔ mǐ lɛ́ w’azɔ̌ xá nɔví xomɛnyɔtɔ́ gegě, kaka jɛ mɛ ɖěɖee ɖò alaxɔ vovo e è sɛ́ mǐ dó bɔ mǐ yì ba kpɔ́n ɖò akpáxwé gbɛ̀ ɔ tɔn gegě mɛ é jí. Nǔ enɛ lɛ bǐ nɔ sù nukún mǐtɔn mɛ tawun. Un ko ɖó xwè 80 jɛji dìn, b’ɛ byɔ ɖɔ má ɖè kan kpò nú azɔ̌ ce lɛ, ɖó è ko kplɔ́n azɔ̌ nɔví sunnu winnyawinnya gegě bɔ ye na w’azɔ̌ enɛ lɛ.

Ðɛhanwlantɔ́ ɖé wlán ɖɔ: ‘Nǔ nyɔ́ nú akɔta e nɔ sɛn Jehovah ɖokponɔ é.’ (Ðɛh. 33:12) Nǔgbo séé wɛ xó enɛ nyí! É víví nú mì tawun ɖɔ un kpéwú bo ɖò Jehovah sɛn wɛ ɖó kpɔ́ xá togun tɔn awǎjijɛnɔ ɔ.