1-2. Nɛ̌ xó Jehovah tɔn e ɖò Ezayíi 65:16, 17 mɛ é ka dó wusyɛn lanmɛ nú mǐ, bɔ mǐ ma na jó gbè ǎ gbɔn?

“MA JÓ GBÈ Ó!” wɛ nyí xóta kpléɖókpɔ́ ɖaxó 2017 tɔn tɔn. Xóta enɛ sɔ́ akpakpa mɛ tawun! Tuto ɔ xlɛ́ mǐ lee mǐ sixu dɛ ɖò mɛtɛnkpɔn lɛ nu gbɔn é. É ko ɖó xwè ɛnɛ dìn, é ɖò mɔ̌ có, mǐ ka lɛ́ kpò ɖò didɛ ɖò gbɛ̀ mɛ tagba lɛ nu wɛ.

² Tagba tɛ nu a ka dɛ ɖè agaɖanu dìn? Xwédo towe sín mɛɖé, alǒ xɔ́ntɔn ɖé wɛ kú nú we à? Kúzɔn ɖé jɛ wɛ a ɖè à? Wuvɛ̌ e mɛxoxwe nɔ dɔn wá lɛ é nu dɛ ɖè wɛ a ɖè à? Adla, adakaxixo, alǒ yadonúmɛ wà nǔ dó wǔ we wɛ à? A ɖò wuvɛ̌ sè wɛ ɖó jɛmɛji Covid-19 ɔ, abǐ nǔ mɔ̌hun ɖevo wu wɛ à? Mǐ ɖò nukún ɖó hwenu e nǔ enɛ lɛ ɖě ma sɔ́ na tíìn ǎ é wɛ. Mǐ na wɔn ye; ye sɔ́ na tíìn gbeɖé ǎ.—Xà Ezayíi 65:16, 17.

3. Etɛ mǐ ka ɖó na wà dìn? Etɛwu?

³ Gbɛ̀ elɔ mɛ ninɔ vɛwǔ, bɔ é tlɛ sixu lɛ́ byɔ ɖɔ mǐ ni dɛ ɖò nǔ e vɛwǔ tawun hú lě lɛ é nu ɖò sɔgudo. (Mat. 24:21) É ɖò wɛn, mǐ ɖó na kpò ɖò nǔ kplɔ́n wɛ, bá dó dɛ hugǎn. Aniwu? Ðó Jezu ɖɔ: “Enyi mi . . . dɛ ɖò ya enɛ lɛ nu ɔ, Mawu na hwlɛn mi gán.” (Luk. 21:19) Tamɛ linlin dó lee mɛ ɖevo lɛ ɖò didɛ wɛ ɖò mɛtɛnkpɔn mǐtɔn ɖɔhun lɛ nu, bɔ é ɖò ye kpa wɛ gbɔn é jí sixu bló bɔ mǐ kpò ɖò didɛ wɛ.

4. Aniwu mǐ ka sixu ɖɔ ɖɔ Jehovah wɛ nyí kpɔ́ndéwú didɛ tɔn ɖagbe hugǎn ɔ?

⁴ Mɛ̌ ka sɔ́ kpɔ́ndéwú didɛ tɔn ɖagbe hugǎn ɔ ɖ’ayǐ? Jehovah Mawu wɛ. Xósin enɛ kpaca we wɛ à? Enyi a lin tamɛ d’eji ɔ, é sɔ́ na kpaca we ǎ. Awoví sín acɛ mɛ wɛ gbɛ̀ elɔ ɖè. Enɛ wɛ zɔ́n bɔ tagba gegě gɔ́ gbɛ̀ ɔ mɛ. Jehovah ɖó hlɔnhlɔn, bo sixu ɖó nǔ gbɛ̀ elɔ nu ɖò cɛju mɛ, amɔ̌, é ɖò te kpɔ́n hwenu ɖé ɖò sɔgudo bo na wà mɔ̌. (Hlɔ. 9:22) Dìn hwɛ̌ ɔ, Mawu mǐtɔn kpò ɖò didɛ wɛ kaka bɔ hwenu e é ɖó dó é na sù. Mi nú mǐ ni gbéjé nǔ e nu dɛ ɖè wɛ Jehovah ɖè é tɛnnɛ kpɔ́n.

5. Nɛ̌ è ka kɔn cí dó nyikɔ Mawu tɔn wu gbɔn? Nɛ̌ enɛ ka cí nú we?

⁵ Cí e mɛ lɛ kɔn dó nyikɔ tɔn wu é. Jehovah yí wǎn nú nyikɔ tɔn, bo nɔ ba ɖɔ mɛ bǐ ni ɖó sísí na. Biblu ɖɔ: “Nyi wɛ nyí [Jehovah, nwt]; mɔ̌ wɛ nyikɔ ce nyí; susu e nyí ce ɔ, un nɔ jó dó nú mɛɖé ǎ. Un ka nɔ jó yɛ̌yi e nyí ce ɔ dó nú bocyɔ ɖé ǎ.” (Eza. 42:8) Amɔ̌, nú xwè afatɔ́n donu ayizɛ́n mɔ̌ ɔ, è kɔn cí dó nyikɔ tɔn wu. (Ðɛh. 74:10, 18, 23) Jikpá Edɛni tɔn mɛ wɛ nǔ lɛ bɛ́ ɖè, hwenu e Awoví (tinmɛ tɔn wɛ nyí “Jidómɛtɔ́”) dóhwɛ Mawu ɖɔ é tɛ nǔ e na zɔ́n bɔ è na ɖó awǎjijɛ é ɖé Adamu kpo Ɛvu kpo é. (Bǐb. 3:1-5) Sín hwenɛnu ɔ, è dóhwɛ agɔ Mawu ɖɔ é tɛ nǔ e sín hudo gbɛtɔ́ lɛ ɖó tawun é ye. Cí e è kɔn dó nyikɔ Mawu tɔn wu é ɖu ayi mɛ nú Jezu. Enɛ wu ɔ, é kplɔ́n ɖɛ elɔ ahwanvu tɔn lɛ: “Tɔ́ mǐtɔn e ɖò [jixwé] ɔ, nyikɔ towe ni nyí nǔ sísí.”—Mat. 6:9.

6. Etɛwu Jehovah ka tin nú hwenu e kpé é na wá yì cobɔ é na xlɛ́ ɖɔ emi wɛ ɖ’acɛ, bo na kp’acɛ ɖò jixwé, bo lɛ́ kp’acɛ dó ayikúngban jí?

⁶ Gbè e è klán xá Nǔbǐwukpétɔ́ e é nyí é. Jehovah ɖokponɔ wɛ ɖ’acɛ bo na kp’acɛ ɖò jixwé, bo lɛ́ kp’acɛ dó ayikúngban jí, bɔ lee é nɔ kp’acɛ gbɔn é wɛ nyɔ́ hugǎn. (Nǔɖe. 4:11) Amɔ̌, Awoví tɛ́n kpɔ́n, bo flú wɛnsagun ɖé lɛ kpo gbɛtɔ́ ɖé lɛ kpo bɔ ye nɔ lin ɖɔ Mawu kún ɖó acɛ enɛ ó. Cobonu è na mɔ nǔ jɛ wu ɖɔ Jehovah wɛ ɖ’acɛ bo na kp’acɛ, bo lɛ́ nyí acɛkpatɔ́ ɖagbe hugǎn ɔ ɔ, é na byɔ hwenu. Nǔnywɛnú wɛ é nyí ɖɔ Mawu na hwenu e kpé é gbɛtɔ́ lɛ bonu ye na mɔ ɖɔ enyi emi tɛ́n kpɔ́n bo na kp’acɛ emiɖóɖó Gbɛɖotɔ́ emitɔn mɛvo ɔ, é kún na kpa emi gbeɖé ó. (Jel. 10:23) Suúlu e Mawu ɖó é na zɔ́n bɔ è na ɖeɖɛ Nǔbǐwukpétɔ́ e É nyí é sín xó e ɖò atɛ jí é bǐ mlɛ́mlɛ́. Mawu na klɔ́ cí sín nyikɔ tɔn wu hwenu e é na xlɛ́ ɖɔ Axɔ́suɖuto emitɔn kɛɖɛ jɛn sixu bló bɔ fífá kpo ayijayǐ kpo na tíìn ɖò ayikúngban ɔ jí nǔgbo nǔgbo é.

7. Mɛ̌ mɛ̌ e ka fɔ́n gǔ dó Jehovah jí? Etɛ é ka na wà nú ye?

⁷ Gǔ e vǐ tɔn ɖé lɛ fɔ́n é. Hwenu e Jehovah dá wɛnsagun lɛ kpo gbɛtɔ́ lɛ kpo é ɔ, blɔ̌ ɖě ɖò ye wu ǎ. Amɔ̌, enɛ gudo ɔ, Satáan (tinmɛ tɔn wɛ nyí “Gbeklánxámɛtɔ́”) ee nyí wɛnsagun gǔfɔntɔ́ ɖé é bló bɔ Adamu kpo Ɛvu kpo fɔ́n gǔ dó Jehovah jí. Wɛnsagun ɖevo lɛ kpo gbɛtɔ́ ɖé lɛ kpo xò kpóɖó n’i ɖò gǔfínfɔ́n tɔn mɛ. (Ju. 6) Nukɔnmɛ ɔ, mɛɖé lɛ ɖò akɔta Izlayɛli tɔn, ee nyí togun e Mawu sɔ́ é mɛ, bo tlɛ gbɛ́ Mawu lobo jɛ vodun sɛn jí. (Eza. 63:8, 10) Jehovah mɔ ɖɔ è flú emi. É ɖò mɔ̌ có, é dɛ, bo ka na lɛ́ kpò ɖò didɛ wɛ kaka jɛ hwenu e é na sú kún dó nú gǔfɔntɔ́ lɛ bǐ é. Hwenɛnu ɔ, xomɛ na hun Jehovah kpo mɛsɛntɔ́ tɔn gbejinɔtɔ́ lɛ kpo tawun, ɖó ye bǐ wɛ ɖò didɛ ɖò wuvɛ̌ lɛ nu wɛ ɖò égbé.

8-9. Adingban tɛ lɛ è ka ɖó dó Jehovah kɔ? Nɛ̌ mǐ ka ɖó na wà nǔ gbɔn?

⁸ Adingban e Awoví nɔ ɖó lɛ é. Satáan dóhwɛ Jɔbu e nyí mɛsɛntɔ́ gbejinɔtɔ́ Jehovah tɔn é, bo ɖò ɖiɖɔ wɛ gbɔn mɔ̌ ɖɔ cejɛnnabi wɛ zɔ́n bɔ mɛ e ɖò Jehovah sɛn wɛ kpo gbejininɔ kpo lɛ é bǐ ɖò sinsɛn ɛ wɛ. (Jɔb. 1:8-11; 2:3-5) Awoví kpò ɖò hwɛ dó gbɛtɔ́ lɛ wɛ kaka jɛ égbé. (Nǔɖe. 12:10) Ðó mǐ yí wǎn nú Jehovah wutu ɔ, mǐ sixu dɛ ɖò mɛtɛnkpɔn mǐtɔn lɛ nu, bo kpò ɖò gbeji nɔ n’i wɛ dó xlɛ́ ɖɔ nǔgbo ɖě kún ɖò adingban Satáan tɔn lɛ mɛ ó. Lee é nyí gbɔn nú Jɔbu é ɔ, Jehovah na kɔn nyɔna dó mǐ jí, ɖó didɛ mǐtɔn wu.—Ja. 5:11.

⁹ Satáan nɔ zán nukɔntɔ́ sinsɛn nǔvú tɔn lɛ, bɔ ye nɔ ɖɔ ɖɔ dakaxotɔ́ wɛ nú Jehovah, lé é wu wɛ wuvɛ̌ mǐtɔn lɛ nɔ sín.  Mɛɖé lɛ tlɛ nɔ ɖɔ ɖɔ enyi vǐ kpɛví ɖé kú ɔ, Mawu wɛ ylɔ́ ɛ, ɖó é ɖó hudo wɛnsagun gegě tɔn ɖò jixwé. Nu nyla dó Mawu wu tɛ ɖíe! Amɔ̌, mǐ tuùn ɖɔ Tɔ́ wanyiyinɔ ɖé wɛ nú Jehovah. Enyi mǐ ɖò azɔn syɛnsyɛn ɖé jɛ wɛ, alǒ mɛvívɛ́ ɖé kú nú mǐ ɔ, mǐ nɔ dóhwɛ Mawu mǐtɔn gbeɖé ǎ. É nyɔ́ wà ɔ, mǐ ɖi ɖɔ nǔ lɛ bǐ na jɛ ganji gbè ɖokpo. Mǐ sixu jlá mɛ e ba na sè lɛ é bǐ ɖɔ Mawu wanyiyinɔ ɖé wɛ nú Jehovah. Enɛ ɔ, Jehovah na na xósin nú mɛ e ɖò nǔɖɔ ba ɛ wɛ é.—Nǔx. 27:11.

10. Etɛ Ðɛhan 22:23, 24 ka ɖexlɛ́ dó Jehovah wu?

¹⁰ Wuvɛ̌ e sè wɛ mɛsɛntɔ́ tɔn vívɛ́ná lɛ ɖè lɛ é. Mawu wuvɛ̌sexámɛtɔ́ ɖé wɛ nú Jehovah. Enyi yadonúmɛ, azɔn, alǒ hwɛhuhu gbaza mǐtɔn zɔ́n bonu mǐ ɖò wuvɛ̌ sè wɛ ɔ, é nɔ vɛ́ mɔ n’i. (Xà Ðɛhan 22:23, 24.) Jehovah nɔ mɔ nǔ jɛ wuvɛ̌ e sè wɛ mǐ nɔ ɖè lɛ é mɛ, bo ba na bló bɔ mǐ na mɔ kɔ dó sà fún; é ka na wà mɔ̌. (Sɔ́ jlɛ́ dó Tíntɔ́n 3:7, 8; Ezayíi 63:9 wu.) Hwe ɔ nu na wá sù bɔ, ‘é na súnsún ɖasin bǐ sín nukún mǐtɔn mɛ; kú sɔ́ na tíìn ǎ, aluwɛ sɔ́ na tíìn ǎ, alěnina sɔ́ na tíìn ǎ, wuvɛ̌ mimɔ sɔ́ na tíìn ǎ.’—Nǔɖe. 21:4.

11. Nɛ̌ nǔ ka nɔ cí nú Jehovah dó mɛsɛntɔ́ tɔn gbejinɔtɔ́ e ko kú lɛ é wu?

¹¹ Sɛ̀ e kú nɔ sɛ̀ xɔ́ntɔn tɔn lɛ dó zɔ n’i é. Nɛ̌ nǔ ka nɔ cí nú Jehovah dó sunnu kpo nyɔnu kpo gbejinɔtɔ́ e kú lɛ é wu? Akpakpa ɖò sísɔ́ ɛ wɛ, b’ɛ na lɛ́ mɔ ye. (Jɔb. 14:15) Dǒ nukún lě dò Jehovah jɛ dò xɔ́ntɔn tɔn Ablaxamu tɔn sɔ é mɛ kpɔ́n! (Ja. 2:23) Bɔ Mɔyizi e kpo é kpo “nɔ kpé nu bo nɔ ɖɔ xó” é ka lo? (Tín. 33:11) Gɔ́ na ɔ, kpɔ́n lee é na ko ɖò nukún ɖó wɛ bo na sè bɔ Davidi kpo Ðɛhan-wlantɔ́ ɖevo lɛ kpo na ɖò susu kpikpa sín han ɖaaɖagbe yetɔn lɛ jì wɛ sɔ é! (Ðɛh. 104:33) Nǔgbo wɛ ɖɔ xɔ́ntɔn Jehovah tɔn enɛ lɛ ko kú có,  é ka wɔn ye ǎ. (Eza. 49:15) É kpò ɖò mɛ alɔkpa e ye nyí é flín wɛ hlɛ́nhlɛ́n. Ðò ali ɖé nu ɔ, “ɖò Mawu nukɔn ɔ, ye bǐ wɛ ɖò gbɛ̀.” (Luk. 20:38) Gbè ɖokpo ɔ, é na fɔ́n ye, bo na ɖótó ɖɛ vívɛ́ yetɔn lɛ, lobo lɛ́ yí gbè bɔ ye na sɛn ɛ. Enyi mɛvívɛ́ ɖé kú dó we kpɔ́n ɔ, linlin enɛ lɛ sixu dó gbɔ nú we.

12. Ðò azǎn gudogudo tɔn nyanya elɔ lɛ mɛ ɔ, etɛ ka nɔ vɛ́ mɔ nú Jehovah?

¹² Ya e adakaxotɔ́ lɛ nɔ dó nú gbɛtɔ́ lɛ é. Hwenu e gǔfínfɔ́n bɛ́ ɖò Edɛni é ɔ, Jehovah tuùn ɖɔ ninɔmɛ lɛ na nyla, cobo na lɛ́ wá kpɔ́n te. Nǔnyanyawiwa, hwɛagɔɖiɖɔ kpo dakaxixo kpo e gɔ́ gbɛ̀ ɔ mɛ égbé é nɔ vɛ́ mɔ nú Jehovah. Mɛ e ma ɖó gǎn ɖě ǎ lɛ é sín nǔ nɔ ɖu ayi mɛ nú Jehovah tawun. Mɛmaɖómɛɖé lɛ, tɔ́cyɔvǐ lɛ, nɔcyɔvǐ lɛ gɔ́ nú asúkúsi lɛ ɖò mɛ enɛ lɛ mɛ. (Zak. 7:9, 10) Enyi Jehovah mɔ bɔ è ɖò ya dó nú mɛsɛntɔ́ tɔn gbejinɔtɔ́ lɛ wɛ, bo lɛ́ ɖò ye wlí dó ganmɛ wɛ ɔ, é nɔ lɛ́ vɛ́ n’i tawun. Kánɖeji ɖɔ é yí wǎn nú mi mɛ e ɖò didɛ wɛ éɖɔhun lɛ é bǐ.

13. Nǔwalɔ e xyɔwǔ é tɛ Mawu ka nɔ mɔ ɖò gbɛtɔ́ lɛ tɛntin? Etɛ Mawu ka na wà?

¹³ Fɔ́n e gbɛtɔ́ lɛ nɔ fɔ́n bo nɔ ɖò nǔbliblí wà wɛ é. Satáan nɔ ba na dɔn gbɛtɔ́ e Mawu dá ɖò akpajlɛ tɔn mɛ lɛ é dó nǔbliblíwiwa mɛ. Ee Mawu “mɔ ɖɔ dakaxixo gbɛtɔ́ tɔn sukpɔ́” ɖò Nɔwée hwenu é ɔ, “gbɛtɔ́ e é bló ɔ wá vɛ́ n’i, bɔ akpɔ ɖó è.” (Bǐb. 6:5, 6, 11) Sín hwenɛnu ɔ, ninɔmɛ lɛ ka kpɔ́n te à? Ðebǔ ǎ! Enyi Awoví mɔ bɔ nǔbliblíwiwa alɔkpa alɔkpa lɛ ɖò kan vun wɛ ɖò gbɛtɔ́ lɛ tɛntin ɔ, kpɔ́n lee é na víví n’i sɔ é! É sixu nyí nǔbliblíwiwa ɖò mɛ e ma ɖó mɛ̌ ɖokpo ɔ ǎ lɛ é tɛntin, alǒ mɛ e ɖó mɛ̌ ɖokpo ɔ lɛ é tɛntin. (Efɛ. 4:18, 19) Enyi Satáan lɛ́ kpéwú, bo dɔn mɛ e ɖò Jehovah sɛn wɛ lɛ é dó hwɛhuhu mɛ ɔ, xomɛ nɔ lɛ́ hun i tawun. Hwenu e Jehovah na ɖɔ é kpé dó é ɔ, é na ɖexlɛ́ ɖɔ emi gbɛ́ wǎn nú nǔbliblíwiwa alɔkpa lɛ bǐ gbídígbídí.

14. Etɛ wà dó ayikúngban kpo kanlin kpo e Mawu dá lɛ é wu wɛ gbɛtɔ́ lɛ ka ɖè?

¹⁴ Nǔɖiɖó tɔn lɛ e hɛn gblé wɛ gbɛtɔ́ lɛ ɖè é. Gɔ́ nú ‘acɛ gannaganna e gbɛtɔ́ nɔ kpa nú nɔzo tɔn, bo nɔ wà nǔ dó wǔ tɔn’ é ɔ, gbɛtɔ́ lɛ nɔ lɛ́ wlíbo nú ayikúngban ɔ kpo kanlin lɛ kpo e Mawu sɔ́ d’así nú ye é ǎ. (Nǔt. 8:9; Bǐb. 1:28) Nǔnywɛ xwitixwitizɔ́watɔ́ ɖé lɛ ɖɔ ɖɔ ɖó gbɛtɔ́ lɛ ɖò nǔ wà gbɔn mɔ̌ wɛ wutu ɔ, ɖò xwè yɔywɛ ɖé lɛ gudo dìn ɔ, gbehan, atín kpo kanlin kpo livi ɖokpo jɛji sín kún na sú dó. Ado e nɔ hu gbɛtɔ́ lɛ dó ayikúngban ɔ wu é sɔ́ kpaca mɛ ǎ. Awǎjijɛnú wɛ é nyí ɖɔ Jehovah d’akpá ɖɔ emi “na vívá mɛ e nɔ hɛn ayikúngban ɔ gblé lɛ sín kún dó,” bo na bló bɔ ayikúngban ɔ bǐ na huzu palaɖisi.—Nǔɖe. 11:18; Eza. 35:1.

15-16. Etɛ ka ɖó na sísɛ́ mǐ bɔ mǐ na dɛ Jehovah ɖɔhun? Jlɛ̌ dó nǔɖe wu.

¹⁵ Lin tamɛ dó nǔ tootobu e nu dɛ ɖè wɛ Jehovah ɖè sín xwè afatɔ́n mɔ̌kpan ɖíe é bǐ jí. (Kpɔ́n gbǎví “ Nǔ E Nu Dɛ Ðè Wɛ Jehovah Ðè lɛ É.”) Jehovah sixu ɖó nǔ gbɛ̀ nyanya elɔ nu hweɖebǔnu. Amɔ̌, suúlu e ɖó wɛ é ɖè é ɖò ɖagbe wà nú mǐ wɛ tawun. Lin tamɛ dó nǔjlɛdonǔwu elɔ wu. Mǐ ni ɖɔ ɖɔ è ɖɔ nú asú kpo asì kpo ɖé ɖɔ vǐ e ye na jì é na ɖó wɔ̌n ɖò wǔ tawun, bɔ enyi è jì i gudo ɔ, gbɛ̀ ninɔ na vɛwǔ n’i, b’ɛ na kú ɖò winnyawinnya mɛ. Nukúnkpíkpé dó vǐ ɔ wu na vɛwǔ tawun có, hwenu e mɛjitɔ́ lɛ jì vǐ ɔ é ɔ, xomɛ hun ye tawun. Wanyiyi e ye ɖó nú vǐ ɔ é zɔ́n bɔ ye dɛ ɖò wuvɛ̌ alɔkpa lɛ bǐ nu, bo na dó bló bɔ vǐ ɔ na vo.

¹⁶ Mɔ̌ ɖokpo ɔ, mɛ ɖěɖee jɔ ɖò kúnkan  Adamu kpo Ɛvu kpo tɔn mɛ lɛ é bǐ wɛ ɖó blɔ̌ ɖò wǔ. É ɖò mɔ̌ có, Jehovah yí wǎn nú ye, bo nɔ lɛ́ kpé nukún dó ye wu. (1 Jaan 4:19) Gɔ́ na ɔ, Jehovah cí mɛjitɔ́ e xó mǐ ɖɔ ɖò nǔjlɛdonǔwu mǐtɔn mɛ lɛ é ɖɔhun ǎ; é sixu wà nǔɖe dó ɖó wuvɛ̌ vǐ tɔn lɛ tɔn te. É ko sɔ́ hwenu ɖé, bo na bló bɔ wuvɛ̌ e sè wɛ vǐ tɔn lɛ ɖè lɛ é bǐ na wá vivɔnu. (Mat. 24:36) Wanyiyi e é ɖó nú mǐ é na sísɛ́ mǐ bɔ enyi é na bo tlɛ lín gbɔn ɖebǔ ɔ, mǐ na dɛ éɖɔhun à cé?

17. Nɛ̌ xó e kúnkplá Jezu ɖò Eblée lɛ 12:2, 3 mɛ é ka dó wusyɛn lanmɛ nú mǐ, bɔ mǐ na kpò ɖò didɛ wɛ gbɔn?

¹⁷ Jehovah wɛ sɔ́ kpɔ́ndéwú didɛ tɔn e nǔ bǐ vɔ ɖ’ewu é ɖ’ayǐ. Jezu kpéwú bo dɛ Tɔ́ tɔn ɖɔhun. Hwenu e Jezu ɖò ayikúngban jí é ɔ, è ɖɔ nǔyá n’i, dó winnya ɛ, bo lɛ́ xwè è dó yatín jí có, é ka dɛ bo na dó xɔ gbɛ̀ nú mǐ. (Xà Eblée lɛ 12:2, 3.) Kpɔ́ndéwú didɛ tɔn Jehovah tɔn wɛ na hlɔnhlɔn Jezu b’ɛ dɛ. É sixu na hlɔnhlɔn mǐ lɔmɔ̌.

18. Nɛ̌ 2 Piyɛ́ɛ 3:9 ka d’alɔ mǐ bɔ mǐ mɔ nǔ jɛ mɛ ɖɔ suúlu e Jehovah ɖó é ɔ, gbeta ɖagbe ɖé kɔn wɛ é wá gbɔn?

¹⁸ Xà 2 Piyɛ́ɛ 3:9. Jehovah tuùn hwenu e nyɔ́ hugǎn, b’ɛ na sú kún dó nú gbɛ̀ nyanya elɔ é. Suúlu e Jehovah ɖó é zɔ́n bɔ mɛ gegě ko kpéwú bo wá tuùn i, bɔ dìn ɔ, mɛ wɔbuwɔbu e mɛ gbɛtɔ́ livi mɔ̌kpan ɖè é ɖé ɖò sinsɛn ɛ wɛ. Ye bǐ wɛ xomɛ nɔ hun ɖɔ Jehovah ko dɛ kaka bɔ ye wá gbɛ̀, bo kplɔ́n bo yí wǎn n’i, lobo lɛ́ sɔ́ yeɖée jó n’i. Hwenu e Jehovah na d’ajɔ gbɛtɔ́ livi mɔ̌kpan e ko dɛ kaka jɛ vivɔnu lɛ é ɔ, é na wá ɖò wɛn lo ɖɔ suúlu e Jehovah ɖó é ɔ, gbeta ɖagbe ɖé kɔn wɛ é wá!

19. Etɛ jí mǐ ka kú dó? Ajɔ tɛ mǐ ka na mɔ?

¹⁹ Jehovah kplɔ́n mǐ lee è nɔ dɛ kpo awǎjijɛ kpo gbɔn é. Satáan dɔn nǔ baɖabaɖa kpo wuvɛ̌ kpo nyi ayǐ kpɔ́ có, Jehovah kpò ɖò “Mawu awǎjijɛnɔ ɔ” nyí wɛ. (1 Tim. 1:11, nwt) Ðò ali ɖokpo ɔ nu ɔ, mǐ sixu kpò ɖò awǎ jɛ wɛ, ee mǐ na ɖó suúlu bo na ɖò te kpɔ́n Jehovah bɔ é na wà nǔ elɔ lɛ é: klɔ́ cí sín nyikɔ tɔn wu, ɖè Nǔbǐwukpétɔ́ e é nyí é xlɛ́, sú kún dó nú nǔ nyanya lɛ bǐ, bo ɖeɖɛ tagba e mɔ wɛ mǐ ɖè dìn lɛ é bǐ mlɛ́mlɛ́. Mi nú mǐ ni kánɖeji bo na dɛ kpo awǎjijɛ kpo, lobo tuùn ɖɔ Tɔ́ mǐtɔn jixwé tɔn ɔ lɔ ɖò didɛ wɛ. Enyi mǐ wà mɔ̌ ɔ, xógbe elɔ lɛ na ɖò wɛn nú mǐ mɛ bǐ: “Nǔ nyɔ́ nú mɛ e nɔ syɛnlǐn ɖò mɛdókpɔ́n hwenu é; ɖó nú é ɖè linsyɛnsyɛn tɔn xlɛ́ gudo ɔ, é na mɔ gbɛ̀ jɔ gbɛ̀ yí; gbɛ̀ jɔ gbɛ̀ enɛ wɛ nyí ajɔ e sín akpá Mawu dó nú mɛ e yí wǎn n’i lɛ é.”—Ja. 1:12.